Sunday, 29 September 2013

فضفضة

اكثر من اربعة اشهر و داخلين في الخامس و انا لم اكتب كلمة هنا في المدونة..!!!
مش من قلة الأحداث بالقطع....!!!!!! 
دة مفيش اكتر من الأحداث اللي حصلت و بتحصل..!!
ربما الإبتعاد عن المدونة كان بسبب سدة النفس من اللي بيحصل..
 او بسبب ان كل من هب و دب بقى بيفتي في السياسة و بالتالي الموضوع ماعدش حدث او حاجة فظيعة يعني انك تكتب سياسة..!!
او ممكن بسبب ان فيسبوك و تويتر معاركهم السياسية اشد و اسخن بكتير و كمان online فمش هتنتظر ان حد يحن عليك و يدخل مدونتك يقرا الكلام اللي انت كاتبه..!!
او يمكن يكون سبب الإبتعاد عن المدونة هو قلة الإقبال على المدونات بشكل عام بعدما هجرها اصحابها الى نشر تدويناتهم في كتب او الكتابة في الأعمدة الصحفية او حتى تقديم البرامج التليفزيونية او تفريغ افكارهم في شكل تويتات صغيرة على تويتر او ستيتس كبيرة على فيسبوك..!!
يمكن بكون برضة سبب البعد عن المدونة هو قلة عدد التعليقات بسبب ان الناس في مصر مابتحيش تقرا.. 
الناس في مصر بتحب تاخد فكرة عن الموضوع..لسه هيتعبوا قلبهم و يقروا الهري دة كله...؟!!!
فما بالك بقى انهم يعلقوا على الموضوع..!!
انسى يا عمرو...!!!!!
كل دي اسباب ربما بعضها ربما كلها ادوا الى انصرافي عن المدونة و هجرها كل هذه الشهور، الا انني لم أفكر لاحظة في الغاءها او هدمها..!!
حاسس دائما اني هارجع اكتب فيها..
يوم ما احتاجها هلاقيها فاتحة لي مسودتها و بتقولي :
اكتب....فضفض....قول اللي في نفسك
مش مهم مين اللي هيقرأ....
مش مهم حد يقرأ اصلا...!!!
كفاية انك عايز تكتب...
اكتب...
اكتب اللي انت عايزه...
طلع كل اللي جواك
اكتب لنفسك...لولادك...لناس لسة ماتولدتش و في يوم من الأيام ممكن يقروا الكلام دة و يحسوا به..!!
مش مهم انت بتكتب ليه و لا بتكتب لمين...
المهم انك تكتب و بس..!!!
لقيت نفسي بافتح المدونة و ابدأ اكتب و انا لسة مش عارف اكتب عن ايه..؟!!
اكتب سياسة..؟!!
بس دي الدنيا معكوكة في بعضها و المصريين ماسكين في بعضهم على فيسبوك و تويتر و كأن في بينهم ثأر..!!
طيب و (كأن) ليه؟!!
ماهم في بينهم ثأر فعلا..!!!
و لا اكتب عن اصدقاء وقعوا في بعض و علاقتهم اتقطعت علشان واحد منهم بيحب الإخوان و التاني شايف ان ٣٠ يونيو ثورة مش انقلاب..؟!!
و لا اكتب عن الزمن اللي لقينا فيه مصريين بيشتموا جيش بلدهم بدل ما يتباهوا بيه قدام الشعوب التانية..؟!!
اكتب عن حزب النور اللي عامل زي الشريك المخالف و لا عن لجنة الخمسين اللي هم نفسهم جواها مش عارفين هم بيعدلوا دستور قديم و لا بيكتبوا دستور جديد..؟!!
انا قررت ما اكتبش في السياسة...
انا هاكتب عن شعور واحد بيكبر في السن وحاسس انه لحد دلوقتي لسة ماحققش انجاز واحد في حياته..!!
واحد حاسس انه بقاله ١٣ سنة من عمره من ساعة ما اتخرج من كليته واترمى في الحياة العملية و هو محلك سر..لا جديد..!!
واحد حاسس ان كل يوم بيمر ابواب الأمل و الطموح بتتقفل في وشه و الدنيا بدل ما بتوسع بتضيق عليه..!!
واحد حاسس ان كلام من عينة الأمل و المستقبل و التفاؤل دة كلام افلام اصلا يصطدم مع واقع مؤلم الحياة فيه زحمة و الفرص محدودة و حتى ان توافرت على قلتها فإغتنامها ربما يحتاج لمواهب تانية خالص غير العمل او الكفاءة..!!
و لا اكتب عن واحد حاسس انه سيء الحظ على طول الخط ..؟!!
سوء الحظ ملازمه و تسبب في انه اتأخر كتير في حياته العملية..!!
ربما بسبب سوء الحظ او تسرعه في قرارات غير مدروسة في بداية حياته العملية لا يزال يدفع ثمنها حتى الأن..!!
و لا اكتب عن واحد بيشتغل شغلانة مابيحبهاش و غارق في التعاسة بسبب كدة..؟!!
شعور اقل ما يوصف بإنه قاتل انك تكون بتشتغل شغلانة انت حاسس انها لا تناسبك و لا تناسب قدراتك و انك كبرت عليها ..!!
و مع ذلك انت مضطر للإستمرار بما يسببه ذلك الإستمرار من ضغط نفسي غير طبيعي كل يوم و كل ساعة و كل دقيقة في يومك..!!
شعور بشع انك تكون شايف نفسك في مكان ما او وظيفة ما و شايف انها تناسب قدراتك و مع ذلك انت مش قادر تشتغلها علشان معندكش (الواسطة) اللي تاخد بإيدك و تحطك على اول الطريق..!!
ايوة الواسطة...
احنا في زمن الواسطة..!!
طيب اكتب عن ايه...؟!!
اكتب عن واحد الرؤية ضبابية فيما يخص المستقبل...؟!!
عن واحد نفسه يسيب شغله او او البلد اللي عايش فيها علشان يشتغل حاجة بيحبها في بلده اللي بيحبها..!!
حق مشروع لكل بني ادم ربنا خلقه انه يشتغل الشغلانة اللي يكون بيستمتع و هو بيشتغلها و بعيش في المكان اللي هو نفسه يعيش فيه...، و مع ذاك حتى الحق دة رغم بساطته مش عارف ينتزعه..!!
لأنه مش عارف لو ساب الشغلانة اللي مش مناسباه دي هيعرف يشتغل حاجة هو بيحبها و لا دي رومانسية فارغة في الزمن الصعب اللي احنا بنعيشه دة..؟!!
انا باكتب الكلام دة ليه اصلا...؟!!
انا مابكتبش...
انا بافضفض
انا عايز افضفض
علشان كدة سميت البوست دة (فضفضة)..!!
لا باطرح قضية و لا يهمني مين اللي هيقرا او هيقول ايه...!!
و لا انا مهتم بالإسلوب او بالكلام المنمق و المزوق
انا قررت افضفض و فضفضت
بس خلاص..!!!!!!

6 comments:

  1. مررت كالعادة
    وسوف أقل كلمة صغنونة

    ما عسى الغريق يفيد الغريق
    لكن الحكمة واضحة بعد أشد الحلكة يأتي فجر أكيد..
    سألت أخي عادل مساء امس فقط عن الوضع وقلت له
    هل ستفرج قريباً أم ماذا!!
    رد علي ميش باين إن لم تسير الأمور إلى الأسوأ
    زمن صعب يجبرك على التعلق بكل قشات ايمانك بعدل ربك وأن الجاي أفضل
    مع أن كل البوادر والصور اليومية لا تبشر بخير
    أو تترك مجالا للتفاؤل واليقين بالنجاة؟
    لكن لو كل واحد في المجتمع استسلم وسقط بسهولة كدا نتيجة الاحباط واكتئاب حاد
    لما وصل الينا شئ وبالتالي لن نوصل للجيل التالي شئ..
    أهم شئ نفسيتنا
    وهو شئ صعب مع كل الكوارث البشرية المتوارثة ديات.بالذات ف مصر
    إنما الحياة الجميلة ماماتتش لسة يعني
    ......
    فضفضتي طويلة وووووووو
    ما عسى الواحد يعمل غير ذلك على الأقل لكي لا يجن

    ReplyDelete
  2. اهو انت وصلت كده للحل..
    مش حل وقف الحال طبعا ولا الاحلام اللى مابتتحققش ولا العمر اللى بيعدى واحنا محلك سر ولا كل الحاجات اللى مالهاش حل الا رب كريم دى
    انا اقصد حل ازمتك مع التدوين
    مش شرط تكتب فى السياسة ادخل اكتب فضفضتك ان شالله كلمتين .. حاجة مريحة جدا وبتهدى الاعصاب واسال مجرب
    الكل بيتكلم فى السياسة .. عادى جدا وايه المشكلة واحسن على فكرة حتى لو مش فاهمين مسيرهم يتعلموا مش احسن ماكانوا بيتكلموا فى الدين وهم مش فاهمين .. ارحم كتير صدقنى

    ReplyDelete
  3. انا ساعات باخش اقري واسمع حاجاتي واضحك واقول عملت ده ازاي رغم ان محدش سمع او قراها غيري...المدونة زي مذكرات...والله الحالة ع الكل حالة قرف جماعي...ربنا يفرجها من عنده

    ReplyDelete
  4. أولاً حمد الله على السلامة

    ثانياً : ده الحال الطبيعي لكل المدونين تقريباً لكن المهم انك تكتب اللى جواك

    تحياتي

    ReplyDelete
  5. اكتب علشان انت عايز تكتب وفى ناس متابعاك بصرف النظر عن التعليقات الموضوع دا عامل زى الدين اللى لازم تسدده بزياره متبادله كل اللى قلته هو تمام اللى شاغل الاغلبيه العظمى انا هوافقك فى اهم شئ انى كمان عايزه اسافر من البلد دى فى اقرب فرصه ان شاء الله

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails