Saturday, 22 September 2012

انا أدون...لنفسي


السؤال اللي لازم تسأله لنفسك قبل ما تدون
انت بتدون لمين...؟؟
لنفسك و لا للناس...؟!!!
يعني بتدون علشان تخرج افكارك و اراءك من جوة دماغك و تفرغها على لوحة المفاتيح فتظهر لك على الشاشة فتقوم ضاغط publish فترتاح و دماغك تهدى...؟!!
حاجة كدة قريبة الشبه مع -الفارق الكبير طبعا -بأي عملية إخراجية اخرى جسمك بيعملها علشان ترتاح و تقوم ضاغط على زرار السيفون...!!!
و لا بتدون علشان الناس تقرا لك اللي بتكتبه فتتصيط و ممكن البلية تلعب معاك زي ما لعبت مع ناس كتير قبلك و تلاقي دار نشر كبيرة و محترمة و قد الدنيا بيتصلوا بك و فجأة تلاقي نفسك كاتب كبير و مشهور و لك كتاب في السوق و الطبعة بتخلص الواحدة ورا التانية و تلاقي نفسك فجأة لك عمود يومي في احدى الصحف الجديدة و ما اكثرها اليومين دوول..؟!!
لازم تبقى عارف على اساس ايه انت بتدون..؟!!
يعني من الأخر كدة بتدون ليييييه؟!!
في ناس كتير من اللي بيقرا الموضوع دة..(دة لو حد قراه) هتقول انا بادون علشان الاتنين..
لنفسي و في نفس الوقت للناس برضة (هو حد يكره الشهرة)..!!
اقول لك موافقك تماما
انا شخصيا بأدون برضة لنفسي و برضة علشان الناس تقرا لي..
اي نعم انا لا طمعان في دور نشر تكتشفني و لا باحلم اني يصدر لي كتب و ابقى هيكل زمانه...
بس دة لا يمنع اني بابقى في قمة السعادة لما ناس كتير بتقرا اللي باكتبه و بتعلق عليه كمان.
بس للأسف الشديد
الكام شهر اللي فاتوا لقيت نفسي باميل لا شعوريا كدة نحو التدوين للهدف الثاني
هدف اكتساب اكبر قدر ممكن من الزوار للمدونة و التعليقات للموضوعات اللي باكتبها..!!
بدأت اركز قوي قوي مع عدد الزوار و عدد التعليقات و مين بيعلق عندي و مين ما بيعلقش..و ليه التعليقات في المدونة دي كتير و ليه عندي قليلة..؟!!
من الأخر اكتشفت اني بقيت منفسن...!!
تزامن اهتمامي بمراقبة حركة الزوار في مدونتي مع بداية تراجع نشاط المدونين و هجرتهم جماعيا لمدوناتهم و ارتماء الجميع في احضان فيسبوك و تويتر..!!
لدرجة انقراض الجيل القديم او بمعنى ادق الرعيل الأول من المدونين تقريبا و ظهروهم المكثف اما على صفحات خاصة بهم على فيسبوك او اكونتات همها الأول اجتذاب اكبر عدد ممكن من الفولورز على تويتر،اما نجوم التدوين القدامى او بمعنى ادق مناضلو التدوين فلقد اصبحوا نجوما اعلامية على شاشات الفضائيات او على صفحات الجرائد..!!
اصبحت مدوناتهم القديمة بالنسبة لهم و التي احتضنت يوما ما افكارهم و ارائهم و اطلقتها للفضاء الخارجي بمثابة السيارة ال ١٢٨ (وش السعد) على شخص يركب الأن مرسيدس و شيروكي..!!!!
تراجع الإهتمام التدويني و اعداد الزوار للمدونات تزامن مع اهتمامي و ترقبي لعدد الزوار و كثافة التعليقات و هو ما ادى الى نتيجة محبطة للغاية بالنسبة لي جعلتني و لأول مرة اهجر مدونتي لمدة تزيد عن الشهرين و هي مدة كبيرة للغاية بالنسبة لمدون اعتاد لمدة 6 سنوات ان يدون اسبوعيا..!!
لم آخذ قرارا بالإبتعاد عن التدوين و انما اصابتني حالة من الإحباط و اليأس و سيطرت علي فكرة 
(طيب انا بأدون ليه اذا كان محدش مهتم باللي انا باكتبه و لا حد بيقراه اصلا)....!!!!
بس في لحظة كدة افتكرت حاجة مهمة قوي كانت تايهة عن بالي..
اني لما قررت اعمل المدونة دي في اخر يوم من ايام سنة 2006 لا كان في بالي ساعتها زوار و لا تعليقات و لا رأي الناس اصلا فيما اكتب..!!
انا عملت المدونة دي يوما ما علشان انا كنت عايز اكتب مش علشان الناس عايزاني اكتب..!!!
انا اللي عايز ادون..محتاج ادون..علشان انا باحب التدوين و علشان دائما دماغي مليانة افكار لو ماخرجتش لشاشة الكومبيوتر من خلال الكيبورد ممكن دماغي تنفجر...!!!
رأي الناس مهم جدا و التعليقات بتسعدني ..بس مش دة السبب اللي عملت علشانه المدونة دي..
و في نفس الوقت لا انا عايز ابقى نجم فضائي و لا باحلم بدار نشر تنشر لي كتاب او اتنين..!!
الكتابة بالنسبة لي هواية..و جزء مهم في حياتي
التدوين بالنسبة لي زي الأكل و الشرب و الشغل و القراءة...
اساسيات حياتية و نشاطات يومية باعملها علشان اعيش...و باعيش علشان اعملها..
انا ليه توقفت عن التدوين.....
انا لازم ارجع ادون تاني....انقل افكاري لشاشة الكومبيوتر مرة تانية
مش هاركز مين بيعلق عندي و مين لا....
مش هاهتم كام واحد زار المدونة النهاردة وكام واحد امبارح...
تعليقات الزوار هتسعدني و هارد عليها...
و لكن عفوا زائر مدونتي الكريم:
أنا أدون....لنفسي

26 comments:

  1. أولاً بقى مين قال إنك مش نجم تليفزيوني مش إنت طلعت في مسلسل قبل كده..في برواز خشب على ما أتذكر :)

    أنا كمان تغيبت شهر و دي مش عادتي لأني كنت بدون مرتين في الأسبوع تقريباً بقالي سنتين لكن بصراحه في محبطات كتير أكتر من عدد الزوار و قلة التعليقات..
    تدوينتك إنهارده عجبتني و أثارت في نفس السؤال "أنا بدوّن لمين؟" و الإجابه بالنسبة لي إني بدون لنفسي عشان أعمل الحاجه الوحيده اللي بستمتع بيها بجد, التواصل أكيد مهم و التعليقات بتسعدني جداً و تشجعني على كتابة المزيد و على إني أطور من نفسي..عايزه أقولك إن التعليقات هي اللي خلتني أفكر جدياً في النشر و المتابعين هما اللي كتير منهم أسعدوني بتواجدهم في حفلات التوقيع..
    التدوين متعه و لما بنكون بعيد عن مدوناتنا أكيد بنكون في حالة إشتياق لغاية ما بنرجع تاني.
    حاسه بكلماتك و شعورك جداً

    دوّن فحسب

    تحياتي لك

    ReplyDelete
    Replies
    1. هو من ناحية اني طلعت برواز
      هو دة حصل فعلا
      فكرتيني و الله.....
      ههههه
      فعلا
      انا اقتنعت اني لازم ادون و بس
      زي تويتر مثلا
      انا بأغرد
      مجرد بأغرد و مش مهم اي حاجة بعد كدة
      تحياتي و احتراماتي

      Delete
  2. تدوينة فى الجووون
    على رأى بتوع الكرة
    وانا عارفة أنك بتحب
    الكرة والماتشات وهكذا
    لو جاوبت السؤال عن نفسى
    انا بدون لنفسى وللناس وللزمن!
    ايوة للزمن يمكن حد يقرأ ما من وضعت
    من خبر او مقالة وتبقى يتذكرها
    ويستفيد بيها .

    ReplyDelete
    Replies
    1. يااااااه
      فكرتيني بالكورة
      و الله وحشتني
      ربنا يجازوا اللي كانوا السبب بقى
      فكرة التدوين للزمن دي راودتني فعلا
      حاسس ان في يوم من الايام في ناس مش موجودة دلوقتي ممكن تقرا الكلام دة
      ربما يستفيدوا بحاجة او يعرفوا احنا كنا عايشين ازاي

      Delete
  3. انها موضة يا صديقي زي موضة ترابيزات البنج بونج والاتاري والسايبرات وبعدين نظام نام ننة....احسن حاجة انك تكتب لنفسك زي ما بدأت وسيبك من حكاية الشهرة والفلوس لان كل اللي طبعو كتب اكيد ما باعوش منه حاجة واكيد ما لموش حق مصاريف الطباعة...زعلى فكرة في المانيا ناس بتستغل ده وتحاول تعمل لاي واحد كتاب وياخدو منه فلوس مع وعده انه فلوس البيع ليه وفي النهاية راحت فلوسك يا صابر ههههههه...

    ReplyDelete
    Replies
    1. يبدو للأسف الشديد ان كلامك صحيح
      كانت موضة
      و لن يتبقى الا محبي التدوين اللي بجد
      تحياتي

      Delete
  4. السلام عليكم ورحمة الله وبركاته

    أنا ادون لنفسي في مع نفسي وأدون للناس في معجزات ^_^

    هذه العبار أنارت في رأسي في بدايات المقال وأثناء متابعتي للقراءة

    وتحديدا عند هذه الجملة "" رأي الناس مهم جدا و التعليقات بتسعدني ..بس مش دة السبب اللي عملت علشانه المدونة دي..""

    تذكرت متعة الكتابة في معجزات والأجواء التي كانت تحتضن هذه الأيام على الرغم من التهاوي الشديد في عدد المتابعين والمعلقين فبعد ان كانت تصل مشاهدة المقال لـ 500 مشاهد والتعليقات لـما يزيد عن 60

    الى أن أصبعت المشاهدات 1 او 2 والتعليقات دائمًا 0

    >_< حالة من الاحباااااط

    ReplyDelete
    Replies
    1. لا ابدااااااااااااا
      انا كمان كنت محبط و ابتعدت فترة عن التدوين
      بس راجعت نفسي و عرفت اني لازم اكتب لنفسي
      اخرج افكاري للمدونة
      تحياتي

      Delete
  5. التدوين تفريغ للطاقه والافكار
    لا تعتقد ابدا انك تكتب لنفسك يدخل كثير من الناس صفحتك ولكنهم لا يتركون تعليق وليس زوارك فقط من عالم بلوجر بل من عالم جوجل ايضا
    اكتب واستمر جميعنا نشعر احيانا بالاحباط ولكن نرجع لعالمنا بسرعه فى لهفه وشوق للكتابه مره اخرى
    تمنياتى بالاستمرار والنجاح

    ReplyDelete
    Replies
    1. فعلا
      انا لم اطق الابتعاد عن التدوين اكثر من كدة
      تحياتي

      Delete
  6. الناس هجرت المدونات إلى الفيس بوك وتويتر- لكن هذا لا يغني عن المدونه ابدا
    شيء جميل انك تدون لنفسك- وبردو للناس عشان يشوفوا انت بتقول ايه
    لكن كتجربه شخصيه- انا فقدت الكثير من اصدقائي بعد الثورة بسبب ما كنت اكتبه، لكني لم أحزن، وفكرت في التوقف ولكني تراجعت وقلت انا في الأساس أكتب لنفسي ولأصدقائي ومعارفي المقربين وارسل لهم ما اكتبه عبر الميل، وغن لم يزورني احد فليس في هذا مشكله
    اهم شيء اني قلت ما أريده
    لن يفرق معك أبدا عدد الداخلين- فقد كان هذا الاهتمام مهما أول ما دخلت هذا العالم، كنت دائما ما انظر في العداد، وكنت ارى مدونات تعليقاتها كثيره- إلى ان شاهدت موضوع عند احد الصديقات وكان مشابها لموضوع عندي ومتطابق في وجهة النظر- فدخل "نفس الشخص" شتمني بينما أشاد بها، وقتها عرفت ان الموضوع فيه شيء من النفاق، فلا كثرة التعليقات تؤكد جودة الموضوع ولا عدمها تؤكد ان الموضوع غير جيد

    المهم بس انك تكتب وتظهر باستمرار
    وأعلم ان هناك من ينتظرك حتى ولو كان عددهم 2 او 3

    ReplyDelete
    Replies
    1. انا عن نفسي زعلان انك قفلت التعليقات في مدونتك
      ما اللي يزعل من اللي بتكتبه يزعل و اللي يختلف يختلف
      انما ليه تحرم ناس عايزين يعلقوا باحترام لمجرد ان في ناس قليلة الادب و لا تجيد فن الخلاف ؟؟
      الف شكر على التعليق
      تحياتي

      Delete
  7. جئت عن طريق تعليق قديم لكم عندي في تدوينة قدبمة لأني دائما كنت أحن لتدويناتي القديمة ولتعليقات الناس
    فقرأت ذلك الموضوع لماذا ادون ؟
    كانت نيتي في البداية اني ادون للمصلحة العامة ولحث الناس على اصلاح الحياة والسعي للأفضل ولكني وجدت التعليقات قليلة جدا ونادرا ما تتخطى حدود الله جميل تسلم ايديك من باب المجاملة
    أحبطت نعم وبطلت تدوين لأن كلامي جوايا مش فارق معايا بس كان نفسي يفرق مع الناس ولو الناس مبتقراش لازمة اني اكتب ايه ؟
    ولو كلامي مالوش فايدة عند الناس برضه لزمته ايه ؟
    دلوقتي بدون لما بيجيلي مزاج وافتكر اني كتبت حاجة كويسة ارجع الاقي مفيش تعليقات ازعل وابطل تدوين تاني
    لا مش حكتب لنفسي وشكلي مش حكتب للناس برضه :)
    تحياتي ودمت بخير

    ReplyDelete
  8. موضوع ممتاز جدااً....ونتمني لكم التوفيق الدائم
    umzug-umzug
    wohnungsräumung wien

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails