Thursday, 1 March 2012

أحمد سمير .....ممثل رغم أنفه

video



جميل جدا ان تكتشف بالصدفة البحتة جانبا مهما و حيويا من حياتك كنت تجهله تماما...!!
شعور في منتهى (الغرابة) تجد نفسك عاجزا عن وصفه عندما تكتشف انك كنت متزوجا من قبل و انت لا تعلم بل و ان لديك طفلا جميلا بل و تتجلى قمة التراجيديا  عندما تكتشف انك قد توفيت و طفلك الجميل اثر حادث سيارة اليم  تاركا أرملة جميلة سرعان ما تنساك و تهيم عشقا في (فاروق الفيشاوي)....!!!!!

الفقرة اللي فاتت مش (هرتلة)...و لا (تهييس)......و لا (منام) حلمت به و قلت أحكيه لكم....
القصة غريبة بعض الشيء و نادرا ما تتكرر........
من حوالي اسبوعين ..كنت قاعد  باتفرج على التليفزيون...ماسك (الريموت كنترول)  و باقلب في القنوات...
هاتف دعاني اني اقف على قناة (النيل للدراما) و كانت في تلك اللحظة تعرض حلقة من مسلسل -كنت لا أعرف أسمه وقتها- تظهر في احد مشاهده الفنانة دنيا عبد العزيز..
و اذ بينما أهم بتغيير القناة تحدث المفاجأة.....
الفنانة دنيا تتحرك في غرفة نومها...و تظهر في الخلفية (التسريحة)...و على التسريحة يوجد برواز و بداخله صورة...
انا باشبه على الصورة دي.....
أنا شبه اللي في الصورة.......
دة أنـــــــــــــــــــا....اللي في الصورة دي يبقى أنا....!!!!!
ايــــــــــــه دة....؟؟ و ازاي كدة......؟؟!!!
انا اي نعم كنت لسة صاحي من النوم ساعتها...بس أنا فايق.....!!
و بعدين انا (ماببلبعش) اي مخدرات..!!
دة انا حتى مش بادخن اساسا....!!!
ايه اللي جاب صورتي في غرفة نوم في مشهد جوة مسلسل مصري....؟!!!
مارضيتش (اصيح) لنفسي...و قلت بلاش تتسرع يابو حميد...ماتضحكش الناس عليك...!!
لقيت زوجتي داخلة عليا بعد ما عملت الشاي و قعدت معايا تتفرج....-(لسة ماقلتلهاش حاجة)-و انا بادعي ربنا ان البرواز اللي فيه الصورة يظهر في مشهد تاني علشان اسألها اللي انا شايفه دة صحيح؟
فتؤكد لي موضوع الصورة او تؤكد لي اني (بأهيس)...!!
و ظهرت االصورة مرة أخرى......
و سألتها: هو مش انا اللي في الصورة دي....؟!!
طبعا رد فعلها لم يكن اكثر من ابتسامة صفراء لسان حالها بيقول...أيه الهبل دة....؟!!
مش للدرجة دي يعني....؟!!
وصل بك اعجابك بنفسك لدرجة انك تتخيل نفسك طالع في التليفزيون...؟!!
مش بعيد تتوهم انك بطل المسلسل كمان...!!!!!!!
شوية و ظهرت الصورة في مشهد جديد لأتيقن تماما انني صاحب الصورة الظاهرة في المشهد
الصورة دي صورتي انا عارفها كويس...و اتصورتها في مارينا في 2005....!!!
ايه اللي جابها هنا....؟!!
و ايه المسلسل دة اساسا.....؟!!!
و بعدين المصيبة مش ان الصورة دي تخصني ...المصيبة ان الصورة دي تهمة في حد ذاتها...
الصورة بتضم (العبد لله) و الفنانة دنيا و بيننا طفل بريء من الواضح انه ابننا...!!!!!!
منظري بقى (محرج) جدا قدام المدام (مدامتي الحقيقية) اللي لفت نظرها اكثر من ظهور صورتي في المسلسل هو وجود الفنانة دنيا و هذا الطفل البريء بيننا..!!
قلنا نتابع المسلسل دة بقى و نشوف الموضوع دة ايه....!!
و مين اللي جابني هنا....؟!!
و ايه علاقتي بدنيا ؟؟(السؤال دة طبعا من المدام)
و لقد اكتشفنا من خلال متابعتنا الحثيثة لهذا المسلسل الهام جدا ما يلي:
المسلسل دة اسمه (ليل الثعالب)...تم عرضه للمرة الأولى في رمضان 2008...بطولة فاروق الفيشاوي و فردوس عبد الحميد و عايدة رياض و دنيا.......و طبعا العبد لله...!!!!
و انا الحقيقة بأمثل في المسلسل دور (ميت)...!!
او الزوج الراحل للفنانة دنيا سكرتيرة فاروق الفيشاوي في المسلسل و اللي بتهيم عشقا به بعد وفاة زوجها (اللي المفروض انه انا) و ابنها في حادثة سيارة..
دوري في المسلسل محوري جدا و هو عبارة عن صورة في برواز تجمعني بزوجتي (دنيا) و ابننا...!!
تلك الصورة التي تلجأ اليها (دنيا)  كل كام حلقة لتتأملها و تتذكر ابنها الراحل...!!
نظرات الشك تطل من عيون زوجتي العزيزة....
تقريبا هي تشك فعلا في كوني زوجا سابقا للفنانة دنيا عبد العزيز....
او اني حاليا  فاقدا للذاكرة و ناسي مراتي و ابني اللي المسلسل كشف بالدليل وجودهم في حياتي...!!!
عقلها غير قادر على استيعاب ان الإستسهال قد يصل لهذا الحد من الإستهبال للدرجة التي يتم السطو فيها على صور الناس من على شبكة الانترنت والإستعانة بها في اعمال تليفزيونية و مشاهد تمثيلية لا ناقة لهم فيها و لا جمل و لا تمت لهم بصلة و بدون اي استئذان او مراعاة لحقوق أصحاب الصور دي..!!
وعلى الرغم من كون دة اول ادواري التليفزيونية...و مش اي دور...دة دور تاريخي و هام و محوري جدا...رغم كوني اظهر كصورة مش اكثر....(الا ان حسي في المسلسل برضة)..!!
و اذا كنت في 2008 طلعت في دور (ميت)...وارد جدا اطلع في 2012  كومبارس صامت...و في 2016  اطلع في دور بيقول كلمتين و لا جملة على بعضها....الخ
و طول العمر (يبلغ) الأمل....!!!
الا ان بجد موقف الصورة دي بيثبت فعلا ان احنا لسة بدري علينا قوي علشان يبقى عندنا فن محترم و محل تقدير اقليمي و عالمي...
فاضل لنا خطوات كثيرة قوي اهمها هو الإهتمام بالتفاصيل الدقيقة و عدم الإستسهال و الإستهبال و الفبركة و مراعاة كل كبيرة و صغيرة في العمل الفني مهما كانت تافهة...
و اكيد الاعمال التليفزيونية مليئة بمواقف شبيهة بالفعل لما حدث معي...
ووارد جدا عزيزي القارىء ان تجد نفسك و قد تم اقحامك في مسلسل او فيلم في دور تاجر مخدرات او بلطجي او حتى راقصة بدون علمك.... 

و ساعتها ابقى قابلني بقى لو عرفت تثبت براءتك...!!!!!


18 comments:

  1. بس الصورة فى المسلسل خير
    ههههههه
    دمت بكل خير

    ReplyDelete
    Replies
    1. الصورة في المنام نصرة...!!!!!!!!!!
      الله يخليك و دمت انت ايضا بخير و سعادة ان شاء الله

      Delete
  2. بعد خبر بيع جوجل لتاريخ زائريها بدأ من 1 مارس 2012
    ممكن صور اطفالنا ازواجنا كل تاريخ تصفحنا لشيء يتبع ياهو ها يكون برضه ممثل ناشيء او ممثل صامت
    العالم مش مستسهل
    العالم بيستهبل
    فما بالك بالفن المصري العظيم

    ReplyDelete
    Replies
    1. بالضبط
      انا قرأت عن موضوع سياسة الخصوصية الجديدة لجوجل و هو شيء مخيف فعلا
      هيفتح المجال لتكرار مثل هذه الحوادث كثيرا

      Delete
  3. ههههههههههههههههه

    معلش من خبرتى المحدودة ده دور حاجة اسمها المنتج الفنى و الاكسسوار
    مطلوب كذا و كذا فالعملية استسهال
    تشاهد فى مسلسل احداثه تاريخية بقال عنده شيبسى

    طبعا التفاصيل الصغيرة مهمة مساعد المخرج و المخرج

    و لا يهمك انا نفسى اصبحت شهيد

    صورة بنتى موجودة ع النت و تحتها ابنة الشهيد عماد عفت

    تحياتى

    ReplyDelete
    Replies
    1. ههههههههههههههههههه
      ربنا يديك الصحة و طول العمر
      ماهي برضة زي بنتك و الشهيد عماد عفت اخونا كلنا

      Delete
  4. انا لو منك اشوف محامي كويس وارفع عليهم قضية للضرر
    علشان يتعلموا مايستسهلوش وياخدوا اي صورة من علي النت
    ممكن يعملوا مشاكل لناس تانية

    ReplyDelete
    Replies
    1. و الله كلام سليم
      بس مفيش وقت للأسف
      انا بس لو فاضي لهم شوية

      Delete
  5. هههههههههههههه قايم بدور واحد ميت ..بداية كويسة بعدين كومبارس صامت ووبعدين متحرك....مبروك يانجم ههههههههههه احمد ربك ماطلعتش مجرم

    ReplyDelete
    Replies
    1. الناس بتبدأ كومبارس صامت و بعدين كومبارس متكلم و بعدين ممثل و بعدين دور تاني و بعدها بطولة...
      اول مرة اسمع عن واحد بدأ النجومية في دور صورة

      Delete
  6. ههههههههههههههههههه تصدق حاجه تخوف بجد أنا مش عارفه ممكن تقاضيهم مثلاً أصل عيب كده أوي.

    ReplyDelete
    Replies
    1. و الله معاكي حق
      بس مفيش وقت للأسف

      Delete
  7. أنا بقى زعلت ماضحكتش! و شايفة موضوع القضية ده حاجه مهمه، بغض النظر عن نتيجتها بس مجرد إنتشارها حيخلي الناس دي تبطل إستسهال و إستخفاف بعقول الناس

    ReplyDelete
    Replies
    1. كلامك سليم تماما
      و هم يستحقوا كدة فعلا
      بس حظهم اني لا فاضي و لا رايق للكلام دة خالص

      Delete
  8. :)


    طب الناس بتوع المسلسل ذنبه ايه والنبى
    إذا كانت المشكلة عندك ؟!!!
    اكمنك ليك طلة وهيبة
    ومدى على نجم سونمائى
    هما يتصرفوا ازااااى ؟!!!


    على فكرة بقى
    دى مش اول مرة ...
    منتش فاكر زماااان قوى
    لما الدستور او عين مش فاكرة
    جرنال كدا حط صورتك برضو
    من غير إذنك
    وكان الموضوع عن الشباب على النت
    وحاجة كدا مش فكراها قوى
    بس المسلسل المرة دى أحسن شوية
    ع الأقل انتا كنت زوج مثالى اهو
    والست دنيا لسه فكراك بالخير
    والمشاهد ع الفضائيات
    يعنى انتا ف السليم
    وكدا

    :)

    مش عارفة أقولك ايه
    بس دا إستسهال
    لدرجة السخافة
    فعلا زى ما اتقال ف التعليقات
    ومعرفش ينفع التقاضى ولا يبقى تضييع وقت
    بس يمكن ف يوم لما يتطبق القانون بجد ف البلد دى
    يبقى فيه حد بيفكر الف مرة
    قبل ما يستخدم صور شخصية لحد تانى
    ...
    انما حتى تاريخه
    انتا وحظك
    وانتا حظك كدا بقى نعملك اييييه ؟!!!

    تحياتى ليك
    ولزوجتك العزيزة

    ReplyDelete
    Replies
    1. ماشاء الله
      ذاكرتك قوية جدا يا فاتيما
      فعلا هي نفس الصورة برضة
      مش عارف الصورة دي بيجيبوها منين
      الف شكر لكي على التعليق
      تحياتي و احتراماتي

      Delete
  9. أنا رأي إنك تاخد بالك فيما بعد ، وتبقى تطلع في مسلسل مشهور شوية أكتر من كده ، وبكرة تبقى نجم صور و نشوفك في أفلام و مسلسلات تكسّر الدنيا

    ReplyDelete
    Replies
    1. واضح اني اخيرا لقيت نفسي و مستقبلي خلاص في التمثيل
      و النجومية مستنياني
      هههههههه

      Delete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails