Saturday, 5 November 2011

له طعم تاني


الكلام اللي هيتقال في البوست دة يندرج تحت بند (الفضفضة)...!!
لا هي قضية عامة
 و لا تشغل بال احد 
و لا هي سخرية او نقد لوضع عام...!!
لقد قررت ان (افضفض)...
و هو الواحد ممكن يفضفض فين غير في مدونته ..!!

الغربة و البعد عن الأهل و الأحباب و الأصدقاء شيء مؤلم و قاس بشكل عام..
و لكن قسوة الغربة تزداد عشرات بل مئات المرات  في مناسبات كالأعياد..
كله كوم و العيد في مصر كوم تاني....
استطيع ان اؤكد لكم ان طعم  العيد في مصر يختلف تمام الإختلاف عن طعمه في اي مكان أخر من العالم...!!
في مصر العيد لمة و فرحة و فسحة و جو تاني خاالص لا يوجد مثله في مكان في العالم..!!
مش عارف الإحساس دة عندنا لوحدنا بحكم كوننا مصريين و طبيعي اننا نحس ان العيد عندنا له طعم مختلف عن اي مكان في العالم...
بس اعتقد ان في ناس كتير من جنسيات عربية بيحبوا (يعيدوا) في مصر لنفس السبب
الإحساس بالعيد في مصر مختلف!!
كنت دائما حريصا على ان اقضي العيد في مصر وسط الأهل و الأصدقاء....
خاصة عيد الأضحى...بولائمه و مآدبه...!!
الا ان الأقدار شاءت ان يكون عيد هذا العام مختلفا كالعام نفسه
سأقضي العيد وحيدا مغتربا بلا اهل و لا حتى اصدقاء...بلا اي فرحة...
سأقضي العيد بين اربعة (حيطان).....
مجرد (اسبوع) اجازة اجباري اتمنى ان ينتهي حتى اعود للتواصل الخارجي مع الناس و المجتمع....!!
ما اقسى ان تجد نفسك وحيدا ...بعيدا عن اهلك ووطنك  
تتجرع ذكريات العام الماضي و الأعياد السابقة التي قضيتها في حضن الوطن و الأهل..
العيد هذا العام و انا اقضي ايامه وحيدا غريبا بعيدا عن كل من احبهم يحمل لي اكثر من رسالة ...
اهمها ان طعم الوطن حلو جدا...حلاوته فوق ما نتصور
ثانيها ان الأهل نعمة....و ان ناس بيحبوك وجودهم جنبك دي بالدنيا و مافيها..
ثالثا ان فعلا دوام الحال من المحال و ان الأيام دول
 و كلما تذكرت حالي العام الماضي هذه الأيام و كيف قضيت واحدا من اجمل الأعياد التي مرت علي في حياتي و بين هذه الأيام التي احياها وحيدا غريبا ادرك فعلا حكمة ربنا  في ان دوام الحال من المحال....
و زي ما ذقت قبل كدة طعم العيد في مصر بحلاوته  وروعته...
علي ان أجرب طعم تاني للعيد...
عيد بطعم الوحدة و الغربة....
اكيد هيبقى له طعم تاني برضة....!!!

38 comments:

  1. ربنا يرد غربتك ان شاء الله ويجمعك بمن تحب عن قريب

    أجيلك طيب :))
    دمت بخير حال
    وكل سنة وانت طيب

    ReplyDelete
  2. حاسة بيك جدا والله

    وجربت ده مرة واحدة احساس صعب ودمه تقيل

    بس نعمل ايه ده نصيبك

    كل سنة وانت بالف خير وان شاء الله العيد الجاى تبقى بين اهلك

    ReplyDelete
  3. كل سنة و إنت طيب و بألف خير و برغم من إن أكيد طعمه هيكون مختلف بس إسمه عيد بردو ضروري تخرج وتحاول تنبسط بأي شئ حتى لو بسيط...و ربنا يخليلنا الskype :)

    إن شاء الله ربنا يجمعك قريب مع كل حبايبك

    تحياتي ليك

    ReplyDelete
  4. بجد يا استاذ احمد
    ربنا معاك في محنتك دي
    ان شاء الله العيد الجاي تقضيه وسط اهلك واصحابك
    وخد بالك انك في مكانك دا عداد الحسنات شغال
    ويارب يكون عيد سعيد عليك
    ومعلش
    استحمل
    بس ان شاء الله الجاي احلي

    ReplyDelete
  5. كل سنة و انت طيب يا احمد

    و يارب يخفف غربتك

    و ترجع و تعيد فى وسطنا

    (:

    ان شاء الله

    ReplyDelete
  6. ربنا يرجعك بالسلامة

    تقبل الله منا و منكم طيب القول و صالح العمل
    كل عام انتم بخير

    ReplyDelete
  7. كل سنه والجميع بخير
    عيد اضحى سعيد

    ReplyDelete
  8. كل سنه وانت طيب يا احمد وربنا يجعل ايام غربتك دى تعدى بسرعه وتترك بصمه حلوة مش وحشه :)

    ان شاء الله العيد اللي جاى يبقي بطعم اللمه والاسره

    بس انت شكلك متاثر من موضوع الاكل دة هو دة اللي تابعك هههه

    لو كدة نبعتلك فته ورقاق :)

    ReplyDelete
  9. كل عام وانت بخير
    وربنا يهون عليك الفتره الصعبه هذه...ولو عندك اي مشاريع او اشغال مؤجله تبقى تنفذها وتلهي نفسك بيها

    ReplyDelete
  10. كل عام و أنتم بخير أستاذ أحمد

    ReplyDelete
  11. أخى الفاضل: AHMED SAMIR
    بارك الله فيك وأعزك
    وكل عام وأنت بخير
    وأشكرلك معايدتك الطيبة
    تقديرى واحترامى

    عندك حق العيد فى مصر له طعم آخر

    ReplyDelete
  12. ثقافة الهزيمة .. عصابة البقرة الضاحكة‏ 3

    وأنا تقديري الشخصي لهذه العملية الخاصة بسعاد حسني أنه لم يكن ثمة ما يدعو لأقتحام الغرفة عليها أثناء وجودها مع ممدوح والأكتفاء بمواجهتها بالصور التي حصلنا عليها من عملية الكنترول خاصة وأن الأقتحام تم أثناء ممارسة أوضاع جنسية وكانت سعاد عريانة،

    وأذكر أنه في مرحلة من مراحل العملية كانت سعاد وممدوح متغطيين بملاية وكان ذلك من ضمن الأسباب التي دفعت إلى التفكير في الأقتحام أنما هذا لا يمنع من أننا ألتقطنا لهم صور قبل ما يتغطوا بالملاية، وقد كانت هذه العملية الخاصة بسعاد حسني هي أول عملية نلجأ فيها إلى هذا الأسلوب في التجنيد وهو ضبطها متلبسة. ...باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

    www.ouregypt.us

    ReplyDelete
  13. كل سنة وانت طيب
    والعيد فى مصر طعمه مختلف طبعاً
    والغربة مفيهاش أهل فعلاً بس ليه مفيهاش أصدقاء كمان؟!
    حاول تفرفش كده برضه وتقضيها
    سنة سعيدة ان شاء الله

    ReplyDelete
  14. كل سنة وانت طيب وبخير
    ويارب عيدك الجاي يكون احلى ان شاء الله

    ReplyDelete
  15. متفهمة احساسك و لو انى عكسك مش بحب اكون فى مصر فى العيد من الزحمة و المعاكسات و مش بطيق تواجدى بالذات فى عيد الاضحى لما الشوارع بتتملى دم فى مشهد شديد التخلف مش موجود فى دول الخليج حتى اللى بتمنع الذبح خارج المدبح و فيها سجن للمخالف

    ReplyDelete
  16. كل عام وانت بصحة وسلامه
    الغربة مؤلمة بس ان شاء الله الفرج قريب
    دمت بخير

    ReplyDelete
  17. للغربة دايما ضريبة
    عموما العيد أهو خلاص خلص :)
    كل سنة وأنت طيب

    ReplyDelete
  18. أستاذ أحمد ..
    السلام عليكم ورحمة الله ..
    الحق معاك .. بس والله إنت لو ترضى تعتبرني أخ ليك ومسرور جداً بمتابعتك .. ولو أقدر أجيلك وأمضي العيد وياك علشان ما تحسش بالغربة .. بس أعمل إيه أهو أنا اتأخرت والعيد خلاص انتهى .. كل سنة وحضرتك طيب .. أخوك محمد

    ReplyDelete
  19. monzer:
    كل سنة و انت طيب يا منذر

    ReplyDelete
  20. reemas:
    العيد برة مصر فعلا غير عادي
    عديم الطعم و اللون و الرائحة
    كل سنة و انتي طيبة

    ReplyDelete
  21. شيرين سامي:
    اللهه آمين
    الف شكر ليكي على التعليق
    و كل سنة و امني بخير و اسرتك جميعا ان شاء الله

    ReplyDelete
  22. beautiful mind:
    انا اللي مصبرني فعلا اني متفائل ان بكرة احلى ان شاء الله
    و غد يوم أخر
    تحياتي و احتراماتي

    ReplyDelete
  23. ramy:
    اللهم آمين...
    كل سنة و انت طيب

    ReplyDelete
  24. ذو النون المصري:
    كل سنةو انت طيب و بخير و صحة و سعادة

    ReplyDelete
  25. mrmr:
    و انتي يالصحة و السلامة
    كل عام و انتم بخير

    ReplyDelete
  26. rona ali:
    ما نتي عارفة يا رونا
    عيد اضحى يعني لحمة و فتة و لمة و الذي منه
    تخيلي لما تلاقي نفسك بعيدة عن كل دة فجأة
    انا قضيت ايام...ربنا لا يوريكي
    تحياتي

    ReplyDelete
  27. نيسان:
    الف شكر على النصيحة الغالية و هو دة اللي انا عملته فعلا
    كل عام و انتم بخير
    تحياتي

    ReplyDelete
  28. محمد محمود عمارة:
    و انت بالصحة و السلامة يا استاذ محمد
    الف شكر على المعايدة الرقيقة

    ReplyDelete
  29. محمد الجرايحي:
    كل عام و انت بكل خير يا استاذ محمد
    و الف شكر على معايدتك الرقيقة
    تحياتي

    ReplyDelete
  30. anonymous:
    الله يرحمها و يغفر لها بقى
    اذكروا محاسن موتاكم

    ReplyDelete
  31. ماجد الجلاد:
    اهي ايام و عدت الحمد لله
    تحياتي و كل عام و انت بخير

    ReplyDelete
  32. لبنى غانم:
    اللهم آمين
    الف شكر و كل عام و انتم بخير و صحة و سعادة
    تحياتي

    ReplyDelete
  33. tears:
    بالطبع شوارع مصر و مولاتها في العيد زحمة لا تطاق
    و لكني اتحدث عن جو العيد في مصر و سط الأهل و الأصدقاء
    للعيد طعم اخر تماما
    كل سنة و انتي طيبة و عيد سعيد
    تحياتي

    ReplyDelete
  34. الفراشة:
    الف شكر على المعايدة الرقيقة
    تحياتي و احتراماتي

    ReplyDelete
  35. موناليزا:
    الحمد لله
    خلاص خلص فعلا
    بس مش هانسى العيد دة بصراحة
    علم عليا جامد
    تحياتي

    ReplyDelete
  36. ظلالي البيضاء:
    الف شكر استاذ محمد على كلامك الطيب
    و كل عام و انتم بخير
    تحياتي و احتراماتي

    ReplyDelete
  37. ربنا يرد غربتك ان شاء الله ويجمعك بمن تحب عن قريب

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails