Saturday, 22 October 2011

معمر و ناصر....في العالم الأخر



حاولت من خلال السطور القادمة ان اتخيل حوار دار في العالم الأخر بين جمال عبد الناصر و معمر القذافي...!!
الحوار (تخيلي) بحت....و غير مبن على اسس دينية او جدال عقيم هل هما في الجنة ام في النار...
هذه امور غيبية بيد الله عز و جل وحده و لا دخل لنا كبشر فيها....
مجرد فكرة (طرأت) على بالي و قررت ان انقلها عبر المدونة...فقط لا غير.
--------------------------------------
ناصر
أهـــــــــــــــــــــــلا معمر....ازيك يا أخي لك وحشة و الله...إتأخرت كدة ليه؟
معمر
          إتأخرت إيه بس......بالعكس دة أنا حاسس اني جيت بدري...دة انا لسة ماكملتش 70 سنة....!!
         انا إتخطفت يا زعيــــــــــــــم....!!
ناصر:
          معلش...عموما حمدا لله على السلامة....بس ايه يا راجل اللي انت عملته تحت دة...!!
         42 سنة في الحكم....؟!!! مش كتير شوية...؟!!!
معمر:
        كتيـــــر؟!! مين اللي بيتكلم....؟!! طيب اراهنك ان انت لو كان ربنا طول في عمرك و فضلت تحكم...كان زمانك بتحكم مصر               لحد دلوقتي....!!
        دة احنا بنتعلم منك يا راااااجل...!!!
ناصر: 
          أنا......!!!!!!
         انت بتقارن نفسك بي أنا.....لا ملكش حق يا معمر بجد.
معمر:
          و ماقارنش نفسي بيك ليه...مش انت اللي قلت عليا على رؤوس الأشهاد (إاني أرى فيك شبابي)..!!
         مش إنت اللي اطلقت علي لقب (أمين القومية العربية)..!!
          إنت القدوة يا زعيم...منك اتعلمت الزعامة...انت اللي ابتدعت لقب (الزعيم الأوحد)..!!
          انت اللي علمتنا ان (الحرية كل الحرية للثورة و لا حرية لأعداء الثورة)...!!
         انت اللي ابدعت ازاي تتخلص من خصومك بالمحاكمات الهزلية و الإختفاء القسري و التعذيب...!!
        إنت اللي دلتنا على الطريق و كل حكام الدول العربية بعدك مشوا على خطاك...!!
ناصر:
        إخرس......انت بتقارن نفسك بي...!!
        أنا زعيم الأمة العربية....أنا اللي كل الجماهير بتحلف بإسمي لحد النهاردة من المحيط الى الخليج..
        أنا اللي اصبحت قدوة في النزاهة و الشرف و نظافة اليد...
        أنا عمري ما كنت دموي....انا كنت بأحمي الثورة...!!
       الثورة كانت في خطر و كان لازم أحميها من الأعداء المتربصين بها...!!!
معمر:
          ههههههههههه.....كلنا كنا بنقول كدة.....!!
         و كلنا كنا بنبرر لنفسنا قتل الناس  و سحلهم و تعذيبهم بالحفاظ على الثورة ...!!
         و انت عارف اكتر مني قد ايه الكرسي مريح و لا يمكن التنازل عنه حتى لو سالت بحور من الدماء....!!
ناصر:
       لا...لا...لا بس انت زودتها قوي...ايه اللي انت كنت بتعمله دة...؟!!
معمر:
          لو فكرت كويس هتلاقينا مشيت على خطالك يا زعيم...!!
         حرمت مصر من الديمقراطية......و أنا حرمت ليبيا من الديمقراطية
         نظام حكمك مبني على الحزب الواحد (الإتحاد الإشتراكي)...و انا نظام حكمي مبني على الكيان الواحد (المؤتمرات الشعبية)
         سحلت معارضيك و عذبتهم....و انا معملتش غير كدة...
         سوقت نفسك للشعوب المقهورة كعدو للغرب...و انا كذلك كنت عدو الغرب الأول في المنطقة..
        عشت في دور الزعيم الأوحد...حكم الفرد...و انا كنت الزعيم الأوحد برضة..
        اعتمدت على اهل الثقة...و انا كذلك ماكانش حواليا الا محل ثقتي...
ناصر:
         يعني عايز تفهمني ان مفيش فرق بيننا و ان احنا الاتنين زي بعض....؟!!!
معمر:
          لا طبعا...في فرق....!!
         الفرق في اختلاف الزمن يا عزيزي
         لو كان ربنا اطال عمرك و عشت في زماننا ..كنت هتعمل اكتر من اللي عملناه 100 مرة...!!
        انت اللي ساعدك و خلى سيرتك لسة (عطرة) على السنة الكثيرين هو ان ربنا لم يرد لك ان يختبرك في المواقف و الإنقلابات     و   محاولات الإغتيال التي تعرضت لها
       دة انت في 18 سنة حكم....و كمية الكوارث الإنسانية اللي عملتها....!!
      مابالك بقى 42 سنة كنت عملت ايه........؟!!!!
      كمان انت على ايامك لم تكن لوسائل الإعلام كل هذه القوة و السطوة و القدرة على كشف (المستخبي)...
     فكنت انت و اعوانك تعملوا (العملة) من دول...و لا مين شاف و لا مين دري..!!
ناصر: 
        طب و اولادك و اللي عملوه في البلد  و في الناس....ايه ياعم انت كنت بتربيهم على الإجرام...؟!!
        دي عصابة.....!!
معمر:
         حظك من السماء........!!
        لو كان ربنا امد في عمرك كنت هاتشوف بنفسك اولادك كانوا هيعملوا ايه في مصر...!!
       اللي كان (هيشبط) في الحكم...و اللي كان  هيبقى مزاجه في (البيزينس)....و لا زي الواد اللي ربنا بلاني به اللي كان عايز يبقى      لعيب كرة (بالعافية)..!!
      هي دي سمة العصر يا زعيم.....!!
      و هنروح بعيد ليه مانت عندك مبارك و عياله...و حافظ الأسد و عياله...و علي صالح و ابنه...!!
      و كانت الدنيا هتمشي حلاوة....منه لله اللي كان السبب بقى....!!
     دة انت تحمد ربنا انك اترحمت من العيال و همهم...!!
    العيال طالعين (طماعين) قوي يا زعيم....مش عارف لمين....؟!!
    بالمناسبة....هو السادات فين مش شايفه يعني....؟!!
ناصر:
           السادات زعلان منك يا سيدي و حالف ما يقابلك...!!
          مش ناسي انك (قللت أدبك) عليه في أخر أيامه...و لا انك كنت هتطير من الفرح لما اغتالوه...!!
معمر: 
        معقوووول...؟!!
       لا انا هصالحه...ما احنا خلاص كلنا في الهوا سوا....!!
      انا هامشي بقى يا زعيم علشان عندي جلسة (حساب) و غالبا هتتطول شوية.....!!
     إنت عارف...42 سنة في الحكم مش شوية....!!!
    بس قبل ما امشي عايز اقول لك حاجة مهمة......
"من سن في الإسلام سنة حسنة  كان له أجرها و أجر من عمل بها من بعده  لا ينقص ذلك من اجورهم شيئا, و من سن في الإسلام سنة سيئة كان عليه وزرها ووزر من عمل بها من بعده لا ينقص ذلك من أوزارهم شيئا"
صدق رسول الله صلى الله عليه و سلم
و انت يا زعيم...اول من ابتدعت الديكتاتورية و الحكم بالحديد و النار في المنطقة العربية....و كلنا مشينا وراك....!!
ربنا يسامحك بقى......!!!!  

30 comments:

  1. :) تخيلك حلو
    انا عرفت حاجات عن عبد الناصر مكنتش عارفاها
    بس بردو دة ميديش الحق للقذافى انه يعمل كدة .. هو بس عجبته اللعبة قال يكمل على خطى عبد الناصر

    ReplyDelete
  2. هو حمل ناصر كل التبعات

    ReplyDelete
  3. السلام عليكم
    لا أعلم إن كان هذا الكلام صحيح على عبد الناصر أم أنها حقيقة و نحن من نرفض التصديق ، و في كل الاحوال ما فعله القذافي كان فوق الوصف و لا يفوقه إلا بشار الأسد
    ربنا يخلصنا من كل ظالم

    ReplyDelete
  4. حوار جميل وممتع انا حسيت انه جد ربنا يكرمك وهو ده النوعية المطلوبة بننا الان الخيال الادبى الرائع والصورة القصصية الجميلة والهدف
    مع اجمل تحياتى عربى السمان

    ReplyDelete
  5. امممممممممممممممممم

    حلو اوى الحوار

    والله هو انا مش هتكلم في عن عبد الناصر
    معاصرتش عصره وكمان مبحبش التفتيح اللي حاصل اليومين دوال :)

    بس معمو عمر زياده واتبع اساليب غريبه في الظلم والفساد

    عيش بلده في رخاء بسبب البترول بس مكنش بيرحم اللي بيثوروا عليه ملك اولاده البلد كلها مكنش حد غيره بيحكم معتقدش ان جمال عاش 15 سنه ومعملش كدة ولا خزنته فيها فلوس ولو كان كمل كان وصل لمرحلته اللي عايز يعمل حاجه هبعملها من اولها

    بس انت عارف القذافي عمل حاجات كويسه لبلد

    الكهربا والمياه ببلاش
    العربيات تمنها كانها من المصنع
    بيدى فلوس لعاطلين ولسه مشتغلوش
    عملت حاجات كويسه بس في الاول والاخر كان طاغي

    تحياتى لقلمك :)

    ReplyDelete
  6. عندك حق
    ربنا يحاسبهم علي اعمالهم
    انا حاولت اتخيل حال القذافي مع الملكين فشلت
    لكن احد الظرفاء تخيل الموقف
    قال:
    القذافي اول ما شافهم شخط فيهم و قال لهم:من انتم؟؟؟؟

    ReplyDelete
  7. لأ ضحكتني ضحك

    :))))

    فعلا ياتري الناس دي لمااتقابلوا عملوا ايه؟؟؟

    كده فوق بورقيبة وصدام وجمال والسادات والقذافي والملك حسين والملك عبد الله بن عبد العزيز ومحب مصر الشيخ زايد

    عملوا ايه فوق بقا

    ReplyDelete
  8. تخيلك فى
    الجوووووون
    كلمة كلمة وحرف
    حرف وسطر سطر فعلاً

    ReplyDelete
  9. ثقافة الهزيمة .. مغامرات البقرة الضاحكة

    ما قصة لوسي أرتين؟
    ـ لوسي أرتين كانت علي علاقة بالرئيس مبارك والعلاقة بدأت عن طريق زكريا عزمي وجمال عبدالعزيز، و كان فيه رجل أعمال مشهور بيحب يعرف مبارك علي فتيات من دول شرق أوروبا وحسين سالم كان متولي دول غرب أوروبا.

    هل قصر الرئاسة كان يدار بهذه الطريقة؟
    - القصر كان يدار بالسفالة والأسافين والنقار والقمار والنسوان وقلة الأدب ودا كل اللي كان شغلهم ومصلحة البلد بعدين.

    هي سوزان كانت بتحس بالغلط اللي كان بيعمله الرئيس؟
    - هي كانت مقهورة من اللي بتشوفه والنسوان داخلة طالعة قدامها واللي جايين من أوروبا الشرقية وأوروبا الغربية ومش قادرة تتكلم وبتبكي علي طول بسبب اللي بتشوفه وأحيانا كنت بأصبرها وأقولها مصر مافيهاش غير سيدة أولي واحدة، بس بعدها قرر الرئيس أن ينقل جلساته الخاصة في شرم الشيخ وبرج العرب.

    ھل تزوج علیھا؟
    -لا ھو مش محتاج یتجوز .. البركة في زكریا عزمي وجمال عبدالعزیز. ...

    باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى

    www.ouregypt.us

    ReplyDelete
  10. محادثة جميلة
    ومقاربة للحقيقة

    تسلم

    ReplyDelete
  11. حوار ممتع
    اكيد بقي هو الاتنين دلوقتي بيتشوشوو
    وبيسلو بعض في جهنم ان شاء الله
    كل واحد بذنب اللي عمله في شعبه
    تحياتي علي ابداعك

    ReplyDelete
  12. أولا : أحييك على اللمحة الأدبية والخيال الراقى فى الحوار اللى فعلا هيبقى ممتع جدا لو تم تصويره بشكل أو بآخر

    ثانيا / اسمحلى أختلف معاك فى نقد عبدالناصر لسبب واحد وهو اننا أو الغالبية العظمى مننا معاصرناش الفترة اللى حكم فيها مصر وكل معلوماتنا من مصادر تحتمل الصدق وتحتمل الكذب سواء إعلام حكومى أو خاص أو حتى كتب ومطبوعات وعموما كل واحد هيتحاسب بالمللى على اللى عمله فى حياته وفى شعبه لأنه مسئول

    تحياتى

    ReplyDelete
  13. احمدجلال25 October 2011 at 10:51

    بجد مقاله تخيليه تحفه تحفه دانتا لو كنت قاعد معاهم ماكنتش هاتنقل بالدقه دي :) وكل اللي انت قلته دا علي عبد الناصر حقيقي بس الناس لغايه دلوقتي وعاملينه الهه وهيه دي اكتر نقطه سلبيه سابها الراجل دا في عقول الناس اللي عاصروا جيله

    ReplyDelete
  14. حوار تخيلى رائع بجد

    ReplyDelete
  15. nona:
    للأسف هو دة اللي حصل
    (من وجهة نظري طبعا)

    ReplyDelete
  16. محمد الجرايحي:
    في رأيي المتواضع هم الإثنان وجهان لعملة واحدة اسمها
    "الديكتاتورية"

    ReplyDelete
  17. ريهام المرشدي:
    انا في رأيي ان كل الحكام الديكتاتوريين واحد و لا فروق جوهرية بينهم
    تحياتي

    ReplyDelete
  18. العربي السمان:
    الف شكر لك يا استاذ عربي
    و اتشرف دائما بزيارتك
    تحياتي

    ReplyDelete
  19. rona ali:
    مش معقول هيقعد يحكم 42 سنة و يبقى مالوش انجازات...!!
    اكيد له انجازات و لكن الكوارث الأخرى تجب اية انجازات
    تحياتي

    ReplyDelete
  20. ذو النون المصري:
    ههههههههههههه
    و الله حلوة
    تحياتي

    ReplyDelete
  21. شمس النهار:
    ربنا يلطف بهم
    تحياتي

    ReplyDelete
  22. anonymous:
    كنت اتمنى يا استاذ غريب منسي ان تعلق على الموضوع

    ReplyDelete
  23. واحة خضراء:
    شكرا لك
    منورني دائما
    تحياتي

    ReplyDelete
  24. beautiful mind:
    و الله النقطة دي انا ما اقدرش افتي فيها.....!!!
    الله اعلم هم مصيرهم ايه دلوقتي

    ReplyDelete
  25. foxology:
    اقدر بالتأكيد اختلافك معي
    و لكن بكل تأكيد الديكتاتورية لا تحتاج لأن تعيشها فأثارها موجودة حولنا في كل مكان
    تحياتي

    ReplyDelete
  26. احمد جلال:
    الف شكر لك

    ReplyDelete
  27. موناليزا:
    الف شكر لكي
    و منورة دائما
    تحياتي

    ReplyDelete
  28. السلامو عليكو :)

    وسعو شوية بسسسسس وين يا عزيزى هذا البوست تحديدا خفيف ظريف وشوية شوية ع معمر

    الفترة اللى فاتت ع ليبيا كانت رهيبة جدااااا رغم ان عمرها اشهر بس بس اللى شفناه وعاصرنها وعايشناه كان جدا رهيب
    فترى الله لا تردها لا لعدو ولا لحبيب

    بالنسبة لتعليق رونا بان المية والكهرباء ببلاش ؟؟؟؟؟؟
    من قال انها ببلاش لا يا ستى بندفع ثمنها ممكن ميتقارنش بيكم بس بندفع يا عزيزتى ومفيش حاجة اسمها ثمن العربية كانها من المصنع
    !!!!
    ومفيش حاجة اسمها بيدو فلوس للعاطلين ع العمل


    متاكدة تتكلمى ع ليبيا اكيد مش ليبياى اللى حضرتى فيها

    معلومات الكثير مغلوطة بان الليبين عايشين ف عز ومع ذلك حتى لو بعز وبلا كرامة فبئس العز

    اللى حصل ياسادة بان جل الليبين كانو صامتين فى صمت الاعلام عن الكثييييييييييييير ولكن عندما استباح الطاغية كل شئ ولم يراعى الحرمات هب الشعب هبة واحدة لينفض عنه غبار لم يراعى يوما واحدا لا ارض ولا عرض لا دم ولا هم فكانت ثورة حقيقية شارك الجميع فيها والحمد لله انتصرت



    بوست هايل ياباشا :)
    ف انتظار ان تصبح الاغلبية ناطقة مطالبة بحقوقها ومحافظة لواجباتها

    مبروك عيدكم يا اهل مصر

    ReplyDelete
  29. nasimlibya:
    و حتى لو كل دة كان موجود فعلا
    يكفي كمية الفساد و السرقة و القمع و الظلم التي مارسها هو و عصابته
    تحياتي لكل الشعب الليبي
    كل عام و انتم بخير

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails