Friday, 26 August 2011

تليفزيون رمضان 2011..انطباعات مشاهد...شاهد

خلاف العادة, اتيح لي هذا العام متابعة تليفزيون رمضان بشكل افضل من الأعوام السابقة.
دائما ما يأتي رمضان كل عام مزدحما بالأعمال و المشاغل, الا ان هذا العام اتى في الأجازة.
و الحق فإن تليفزيون رمضان لهذا العام 2011 لم يشدني بالشكل القوي...فقد جاء عكس المتوقع من حيث القوة و لا ادري السبب هل بسبب الثورة و انشغال الناس بمتابعة القنوات و البرامج  الإخبارية على حساب  متابعة الأعمال الدرامية و الفكاهية؟!!
ام بسبب ان المزاج العام للناس مزاج (غير تليفزيوني) بسبب ما يحدث في الشارع المصري من احداث متلاحقة يوميا..!!
و دي مجرد ملاحظات بسيطة..خالية من (العمق) و (التقعر) لبعض الأعمال التليفزيونية التي تم عرضها على فضائياتنا في رمضان 2011 من مشاهد على قده...لا هي رؤية نقدية و لا يحزنون...فقط انطباعات مشاهد....شاهد...!!!

* التليفزيون المصري بجميع قنواته الأرضية و الفضائية العامة و المتخصصة كان اداؤه ضعيف جدا في رمضان هذا العام...مسلسلات عديمة القيمة تقريبا ..برامج غاية في الرداءة..مواد تليفزيونية بلا نجوم..!!
و لا ادري من السبب الذي جعل التليفزيون الرسمي  يظهر على هذه الدرجة من السوء و انعدام قيمة الأعمال التي يتم عرضها على شاشاته المختلفة ..؟!!
و شتان الفارق بين شاشة التليفزيون المصري العام الماضي عندما كان شعاره (مفيش حاجة حصري..كله على التليفزيون المصري) و شاشة نفس التليفزيون هذا العام...!!
هل الفارق يكمن في وجود اسامة الشيخ العام الماضي و غيابه هذا العام...؟!!
ام ان كلمة السر في (الثورة) ...؟!!
ام ان ظهور شاشة التليفزيون المصري بهذا الشكل في رمضان سببه يكمن في  الحكمة الشهيرة  القائلة:
"تعلمت الحكمة من رأس الذئب الطائر"
و بما ان اسامة الشيخ رئيس اتحاد الإذاعة و التليفزيون  قد طارت رأسه بعد الثورة  و يقيم في سجن طرة حاليا  فلقد قرر خليفته ان يؤثر السلامة و يسير بداخل الحائط  حتى لا يجد نفسه يوما ما في الزنزانة المجاورة لزنزانة الشيخ..!!
فجاءت النتيجة كما هو ظاهر على شاشات تليفزيون مصر....!!
@@@@@@@@@@@@@
* اعلانات رمضان هذا العام بعضها مميز و بعضها سيء للغاية و بعضها مثير للجدل...!!
الحملة الإعلانية لبيبسي بطولة دنيا سمير غانم شدت انتباه الناس بشدة  لعدة اسباب منها وجود 3 اعلانات مختلفة لنفس المنتج  مما قلل من الشعور بالملل لتكرار اعلان واحد لمدة طويلة  بالإضافة الى ربط الإعلان بتصويت  الا ان الملل قد حدث فعلا بسبب تكرار عرض ال 3 اعلانات  بشكل اكثر من مكثف..!!
بالإضافة الى استفادتها ماديا بالطبع..جاءت استفادة دنيا سمير غانم بطلة الحملة  فنية ايضا عندما طرحت نفسها على الساحة بقوة كفنانة استعراضية مرشحة لبطولة اعمال استعراضية قادمة.
على النقيض تماما من بيبسي بحملتها الإعلانية الضخمة و الإستعانة بنجمة  سينمائية, قررت كوكاكولا ان تكتفي بإعلان واحد و لكنه مؤثر للغاية و استطاع ان يحوز اعجاب الجميع على الرغم من ان ابطاله مجموعة من الأطفال و هو اعلان (إفرح) الذي هو بحق دعوة للتفاؤل و الأمل في بكرة...برافو كوكاكولا..!!
حملة فودافون ايضا (شكرا) حملة مميزة للغاية باللحن الجميل و الكلمات الطريفة في الاعلانات....ايضا حذت فودافون حذو بيبسي بتقسيم الإعلان الى عدة مقاطع لمحاولة تقليل الملل الناتج عن تكرار اذاعة نفس الإعلان عشرات المرات في اليوم الواحد...!!
اما سوء الحظ فلقد ظل ملازما لموبينيل حتى في حملتها الإعلانية الرمضانية...!!
فلم تكد الشركة تتعافى من تأثير حملات المقاطعة  بسبب (كاريكاتير) ساويرس حتى توفى بطل اعلانها الجديد الفنان حسن الأسمر الذي عادت به موبينيل الى الشاشة مرة أخرى  الا ان القدر لم يمهله سوى ايام قليلة ليستمتع بنجاح اعلانه الجديد حتى توفى متأثرا بأزمة قلبية ليختفي فورا اعلانه الذي قام بتمثيله لصالح شركة موبينيل.
لتعود الشركة بإعلان طريف بطولة يوسف داوود....ربنا يديله الصحة...!!!!!
من الإعلانات الجميلة في رمضان اعلان (كيموكونو) بطولة مجموعة من الأولاد...بودي و ناجي و رامي و اوشة و أوسة...و اللي انتهى نهاية سعيدة  بإن (بودي) كسب البلايستيشن...!!
الاعلان دة شد انتباه الناس بشدة...ربما لإيقاعه السريع او لبساطة الحوار فيه او لوجوه ابطاله (الأولاد)...لدرجة ان (اوشة) اللي (بيلعب single و بقية الشارع next) اصبح من المشاهير على الرغم انه لم ينطق في الإعلان بكلمة واحدة (فقط نظرة جانبية صارمة)..!!
لعلك لمحت اكثر من بروفايل على فيسبوك قام بوضع صورة (أوشة) profile picture و هو ما يعظي انطباعا عن مدى اعجاب المشاهدين بالإعلان دة.
اما اكثر الاعلانات اثارة للجدل فهو اعلان (كوتونيل) الذي اختلف المشاهدون عليه ما بين مؤيد لفكرة الاعلان عن ملابس داخلية في التليفزيون بما تمثله هذا النوع من الملابس من خصوصية شديدة  لا يجوز عرضها او الاعلان عنها و بين من يرى (البوكسرات) سلعة زي اي سلعة يجوز الاعلان عنها  و طالما الاعلان لا يحتوي اية مشاهد خارجة او تلميحات يبقى ايه المشكلة....؟!!
المشكلة ان قطاع كبير من المشاهدين بيشوفوا ان مجرد ظهور (بوكسر) و (فانلة) في اعلان دة في حد ذاته قمة الإسفاف و الإبتذال...!!
اما عن الإعلانات السخيفة فحدث و لا حرج....فما اكثرهم خاصة اعلانات بنك الطعام و المطالبات بالتبرعات للمستشفيات المختلفة و التي كان من الأفضل توفير تكلفة هذه الاعلانات في المساهمة في المستشفيات  او علاج الحالات الإنسانية خاصة ان عمل الخير لا يحتاج الى كل هذه البروباجندا و الدعاية..!!
 
@@@@@@@@@@@@@
* اما عن البرامج الحوارية في تليفزيون رمضان 2011 فهي عن جدارة يمكن ان تسميها (برامج الفلول)...استضافات لعدة شخصيات كان من المفترض ان تتوارى خجلا لا ان تظهر بكل (بجاحة) لتتحدث عن مواقفها (المخزية) اثناء الثورة اما فخرا و تبجحا و اما بإنكار ما اقترفوه و ما صرحوا به في السابق  و كأننا نحن المشاهدون و المتابعون مصابون بمرض (الزهايمر)..!!
لم يعجبني برنامج لميس الحديدي...فلول رسمي...!!!
و لا برنامج توني خليفة...فقد بريقه هذا العام..!!
اعجبني برنامج عادل حمودة (كل رجال الرئيس) على الرغم ان كل ما ذكره في البرنامج قد قرأته بجريدة الفجر من قبل..الا ان (حكاويه) شيقة فعلا و بها الكثير من الأسرار.
اعجبني ايضا برنامج (انت و ضميرك) لمجدي الجلاد على شاشة دريم...البرنامج فكرته جيدة و به بعض الجرأة في الأسئلة بالإضافة الى ان مجدي الجلاد لم يخلع عباءة الصحفي و ارتدى قميص المذيع..!
بل ظهر كصحفي يحاور ضيفه و هو ما جعله ضيفا (خفيفا) متمكنا من أدواته.
تابعت برنامج أحمد حلمي (شوية عيال) و الذي يعتبر امتدادا لأول ظهور لأحمد حلمي على شاشة التليفزيون المصري في التسعينات برنامج (لعب عيال)..!!
البرنامج في مجمله ظريف...و الأطفال غاية في التلقائية و ان كان لي ملاحظة و هي ارتفاع اعمار الأطفال بالمقارنة  بمن كان يستضيفهم حلمي في برنامجه القديم (لعب عيال)...في برنامجه القديم كان الأطفال أخف دما..!!
"رامز قلب الأسد": مش هتبطلوا تشتغلوا الناس بقى و توهموهم ان دي مقالب حقيقية...؟!!
كفاية تمثيل بقى....الناس بقت واعية و عارفة مين اللي بيضحك عليها..!!
الغريب و العجيب ان البرنامج دة له جمهوره فعلا...!!
انا بدأت اقلق على مستقبل البلد دي..!!
@@@@@@@@@@@@@
* اما عن مسلسلات رمضان فهي كالعادة وجبة رمضانية دسمة و ان كانت في رأيي اقل دسامة هذا العام عن الأعوام السابقة..!!
اعتقد ان انتاج المسلسلات هذا العام على الرغم من غزارته الا انه اقل من العام الماضي ..هل هي ازمة اقتصادية؟ هل بسبب تقليص الإنفاق بعد الثورة؟ هل هي صدفة......؟!!
بالطبع لم اتابع جميع المسلسلات و الا كان ذلك يستلزم ان يصبح اليوم 240 ساعة و ليس 24 فقط ...!!
الا ان هناك من المسلسلات ما تابعتها بتركيز كامل..و اخرى متابعة (خطوط عريضة) فقط..و بالتأكيد هناك الكثير من الأعمال التي لم تطاوعني نفسي في ان اتابعها من الأساس..!!
- دوران شبرا: رائــــع فعلا...المخرج خالد الحجر ابدع في اختيار الوجوه...وجوه شبراوية اصيلة..شباب وجوه جديدة لكنها فعلا واعدة..اجاد اختيار وجوه تناسب الحالة الإجتماعية لشخصيات المسلسل.
الممثلان هيثم أحمد زكي و محمد رمضان...اخلعا عباءة احمد زكي ربنا يكرمكم..ارحموه و ارحمونا....!!!
-المواطن X: قصة قوية...اداء رائع...كادرات ممتازة....مسلسل حلو بجد....اسقاط طبعا على قضية (خالد سعيد) الشهيرة.
بس هو السؤال:
لو ماكانش 25 يتاير حصلت....كان هيبقى في مسلسل اسمه المواطن X.....؟!!!
خاتم سليمان: خالد الصاوي يستمر في ابداعه...كم انت رائع ايها الممثل القدير....استمـــــــــــر,,!!
الدالي: و بعدين بقى....؟!! هنفضل كدة كتيـــــــــــر؟!!! اخركم الجزء الكام....؟!!!
آدم: لم استطع متابعتها لأسباب لها علاقة بتامر حسني...(ماليش فيه)...!!
بس الغريب اني كل ما اقلب القنوات و الاقيها شغالة الاقي ماجد المصري عمال يعذب في تامر حسني...!!!
سمارة: صعب جدا اني اتابع مسلسل بطلته غادة عبد الرازق....دي خيانة للثورة و للذوق العام برضة...!!
كيد النسا:  فيفي عبده و سمية الخشاب معا....و في رمضان....!!!
لا لا..دة كتير قوي...دة ضد الفن و الذوق العام و الصيام و كل حاجة...!!
لم اتابعه بالتأكيد...و طبعا لن اتابعه مستقبلا.....هي ناقصه...؟!!!!
الريان: تابعته من بعيد لبعيد....بس واضح ان انطباعات الناس عنه جيدة....خالد صالح و باسم السمرة و صلاح عبد الله في مسلسل واحد يبقى اكيد مسلسل جامد..سقط مني سهوا...هحاول اتابعه في الإعادة ان شاء الله.
الزناتي مجاهد: هو الإسفاف بعينه....سامح حسين: ليه بتعمل في نفسك كدة...؟؟!! حرام عليك نفسك..!!
راجل و ست ستات: خلاااااااااااااااااااااااص...كفاية بقى كدة...اللي يزيد عن حده بينقلب لضده...8 مواسم كدة رضا قوي...التاسع هيبقى تدمير لنجاحات المواسم اللي فاتت كلها...!!
@@@@@@@@@@@@@

* قناة cbc كان اداؤها رائع في رمضان..اختيار جيد للمسلسلات و البرامج...قناة عايزة تنجح بجد و يبقى لها تواجد على خريطة القنوات المصرية و العربية.
- قناة النهار...لم تشدني لمشاهدتها...يكفي انها ارتكبت جريمة في حق نفسها و مستقبلها بعرضها لمسلسل آدم لنجم الجيل..!!
- القاهرة و الناس...جاء ادائها باهتا هذا العام...اقل قوة من الأعوام السابقة...و لا ادري السبب...؟!!
- قنوات الحياة: زحمــــــــــــــــة برامج و مسلسلات ....تخمـــــــــــــــة فعلا...!!
الجزيرة و العربية: شاءت الأقدار و تطورات الأحداث ان تجدا مكانا على المائدة الرمضانية و هو ما كان في السابق من عداد المستحيل..!!


و في النهاية تبقى كلمة:
كل ما شاهدناه في رمضان من برامج و مسلسلات سخيفة يهون امام أفلام العيد...!!
السبكي مصمم على استكمال رسالته في افساد الذوق العام...!!
فيلم (شارع الهرم)..دينا و سعد الصغير و مجموعة من المضحكاتية و العوالم و صبيانهم...!!
ربنا يهدكم............او يهديكم....

15 comments:

  1. عموما يتذرّع أصحاب القنوات و القائمين على البرامج بمقولة ( ما يحبّ المشاهدون )
    و هنا المشاهد يتلقى الصفعة مرّتين !

    الأولى أنه فُرضت عليه برامج تافهة و محلّة بضوابط الأخلاق و الدين

    و الثانية الحكم على ذوقه بالسذاجة و التبلّد برضاه !

    فهل ستغيّر الثورات الواقع المفروض و يُحجم المتفرّج العربي عن متابعة الرداءة ؟
    و هل سيفرض ( هو ) ذوقه و يسمو بنفسه ؟؟


    تحياتي و تقديري


    منجي باكير

    ReplyDelete
  2. متفقة مع كتير من الأراء في البوست وأحب اعلق على اعلان فودافون في رأيي انه اعلان مستفز جدا وكان في حمله ضده على تويتر شكرا على ايه على قطع الشبكة في يناير ولا على سرقة الرصيد وبالأغنية دي هما بيشوهو التراث مش بيحيوه

    أما عن المسلسلات ففي مسلسل رائع للأسف محدش اعطى له حقه مسلسل رجل من هذا الزمان علي مصطفى مشرفة بيحكي عن قصة حياة العالم عكس اللي سائد في المسلسلات عن حكايات العوالم مش العلماء

    أما عودة أفلام السبكي ف دي فعلا كارثة ونقدر نقول عنه اللي اختشوا ماتوا

    ReplyDelete
  3. ماشاء الله عليك اسجل اعجابي بطريقة كتابتك للبوست

    انا بقا عجبني اوشة جداااااااا

    :)))

    والحاجة الوحيدة اللي اتفرجت عليها ومش من الاول باسم شو
    برنامج معمول فيه شغل كويس

    وكل سنة وانت طيب
    وقول علي اعلامنا كله الله يرحمه

    ReplyDelete
  4. شكرا للجولة
    التليفزيونية
    دى وللحق أنا غير
    متابعة هذا العام فما
    يجرى على ارض بلدنا أعجب
    من أى مسلسل تليفزيونى
    واقعى أو خيالى حتى.
    كل سنة وأنت
    والأسرة بخير

    ReplyDelete
  5. أولاً عايزه أقولك إن المدونه كلها راااائعه من أول كتابتك في البروفايل إنك مبتحبش الكتاب اللي بيتفلسفوا لغاية التصميم المميز و الإسم طبعاً الجامد جداً...أما البوستات لسه مالحقتش أقرى قراءة جيده لكن واضح إني فاتني كتير :)

    أنا كمان مستمتعش بالتليفزيون خالص في رمضان ده و أفتكر إنك لخصت الأسباب , الأداء الضعيف اللي بيتاجر بالثوره و بيقدم الفلول و أمثالهم, و المزاج العام لينا كمصريين اللي مبقاش يقبل بأي حاجه هلس.

    بتفق معاك في إعلان كوكاكولا كان مُلهم جداً و مُفرح بجد كمان إعلان أوشه و السلعوه سابوا علامه مع الناس, إعلان شكراً معجبنيش خالص بالذات سمير عانم و نيللي كان دمهم تقيل جداً...أما إعلان كوتونيل فأنا شايفه إنه نجح رغم كل النقد و ربنا يستر و منلاقيش السنه الجاية إعلان زية أكثر إسفافاً.

    الحمد لله وقتي مسامحش بمتابعة مسلسلات و أعتقد المواطن X هو اللي فاتني و يستحق المتابعه بس بعد ما مولد التليفزين ينفض.

    برنامج البرنامج كان تُحفه بجد يا ريت تشوفه على اليوتيوب...أما رامز فبصراحه كان بيموتني من الضحك مش هيافه و الله بس فعلاً الموقف يضحك من مجرد تصوره...أما أفلام العيد فبجد مأساة و قلة أدب لما الأفلام تيجي بالمستوى ده مش بس شارع الهرم و تيك بوم و يا أنا يا هوه و بيبو و بشير, كده هيبقى الخروج في العيد أفضل.

    طولت عليك بس البوست هايل و أكيد هيسعدني إني أتابعك :)

    كل سنة و إنت طيب و بألف خير

    ReplyDelete
  6. منجي باكير:
    اعتقد ان العيب مش في القنوات العيب في المشاهدين اللي بيقبلوا على النوع دة من البرامج التافهة و السطحية
    نتمنى ان يرتقي المشاهد بذوقه حتى ترتقي تلك القنوات بالمواد التي تحترم ذوقه
    تحياتي

    ReplyDelete
  7. lady E:
    فعلا
    انا عن نفسي فودافون فقدت الكثير من مكانتها بعد الثورة
    الناس مش مستاءة من اتصالات و موبينيل اكثر من استيائها من فودافون
    اما عن مسلسل رجل من هذا الزمان فلم يتسن لي متابعته..هاحاول اتابعه في الاعادة ان شاء الله
    افلام العيد..............لا تعليق بجد

    ReplyDelete
  8. مجهود رائع

    ....................

    كل سنة و انت و الاسرة بخير

    عيد سعيد :)

    ReplyDelete
  9. كل سنه وأنت طيب يا دكتور
    وعيد سعيد
    انا الحمد لله ربنا عافانى السنه دى من التليفزيون
    حتى أوشا سمعت عنه واخيرا عرفت هو مين من البوست دا
    بس تابعت مسلسل الحسن والحسين معظم حلقاته وبرنامج مع التابعين معظمه بردوا واكتفيت

    التليفزيون هيتعدل لما البلد نفسها تتعدل

    ReplyDelete
  10. مختلف تماما:

    1-"أسامة الشيخ" ليس بالشخص الذي يستحق البكاء عليه رغم تبرئته اليوم ، الراجل بصراحة كان رجل الإيه آر طين في مصر ولما كان هناك كان له علاقة ولو من بعيد بتسريب شرائط نادرة للتليفزيون المصري وشديدة الأهمية للقناة دي قبل ما يستلم منصب في التليفزيون المصري بعديها يتم تصعيده وبشكل مريب لرئاسة الاتحاد علشان يبقى أول رئيس لاتحاد الإذاعة والتليفزيون من برة ماسبيرو ويدخل فتوات وبلاطجة الإيه آر طين ويفرضهم على القنوات فرض ..

    2-الثورة بتاخد وقت طويل للغاية علشان يبقى ليها نتاج ونقدر نعبر عنها صح ، مؤلف بأختلف معاه لحد الرفض لكني باحترم وجهة نظره هو "مدحت العدل" قال قبل رمضان إن عمل مسلسل عن الثورة بعد ست أو سبع شهور كلام فارغ ، وعنده حق.. إقحام الثورة في المسلسلات بالشكل الفج إهانة للثورة وأرواح الشهداء.. وعملية إتجارية من منتجي المسلسل اللي بيمثلوا تيار المال السياسي اللي كان لازم الثورة تقوم عليه مش بس على مبارك..

    والمسلسل عليه فنياً تحفظات بالجملة أشهرها أسلوب "عثمان أبو لبن" اللي بيفكر بثقافة مخرج فيديو كليب مش مخرج سينما (وفيلميه فشلوا فشل قاتل) ، والمونولوج الطويييييييييل جداً في الفينال -رغم إتقان "نبيل عيسى" كممثل- واللي ما يناسبش إيقاع دراما التليفزيون.. لكن الإقحام الانتهازي السطحي للثورة إداه حصانة فيما يبدو من النقد ، زيه زي مسلسل "خاتم سليمان" اللي هو صورة مشوهة من مسلسل للكاتب الكبير "يسري الجندي" اسمه "سامحوني ما كانش قصدي" ما حققش نجاح كبير لما اتعرض سنة 2000 تقريباً.. بل إن فيه ممثلين في "سامحوني...الخ" حققوا نقاط على ممثلين "خاتم سليمان" كأداء ، زي "إلهام شاهين" مقارنة بـ"رانيا فريد شوقي"-الممثلة بشهادة الميلاد- وزي "حنان ترك" اللي مفيش وجه مقارنة بينها وبين "فريال يوسف"..

    3-"عادل حمودة" يتحدث عن الثورة ورجال الرئيس .. نياهاهاهاهاهاهاهاها..

    تاريخ "عادل حمودة" القديم يؤكد إنه هو و"وائل الإبراشي" أكبر جوز متحولين في مصر ..

    دة أنا فاكر إن "الإبراشي" نزل تهزيق في "حمدي قنديل" في عدد من "روزا" سنة 2002 ، ونشر "قنديل" رد ورفضته "روزا" ورفع "قنديل" قضية وكسبها وبرضه "الإبراشي" نزل فيه هجوم واتهمه بـ"إهانة المصريين"..

    ولاء دول كان لأمن الدولة والجهاز السري للحزبوطني الغير مأسوف عليه ، وبعد كدة بقى للمال السياسي ووصولييه ولصوصه..

    4-مستوى الكتابة الدرامية للتليفزيون يزداد تخلفاً في الوقت الذي تتقدم فيه تقنيات الإخراج..

    مفيش وجه للمقارنة بين الإسقاط غير المباشر والاحترافي للمعلم "أسامة أنور عكاشة" في "الشهد والدموع ج2" على الوحدة الوطنية وبين "دوران شبرا".. مفيش وجه للمقارنة بين التحليل الرائع للعلاقة بين الطبقات في مصر ما بعد الحراك لـ"محمد جلال عبد القوي" في "حضرة المتهم أبي" وبين "العك" اللي شفناه في "إكس" مع احترامي لكل المعجبين بيه..

    والمؤسف إن بعض كتاب الأعمدة بينتقدوا مسلسلات اتعملت واتصورت بالكامل قبل الثورة بحجة إنها "لا تناسب التلقي بعد الثورة" في الوقت اللي بنشوف فيه أعمال راحت على أسلوبها من الخمسينيات..

    للتذكير : الأفلام الدعائية اللي صاحبت ثورة 1952 كان مصيرها مزبلة التاريخ ، بينما اللي عاش الأفلام اللي اتعملت باحترام للعقل وبرواقة وتروي ، "العصفور" لـ"يوسف شاهين".. (رغم إنه اتعمل بعد الحقبة الناصرية بفترة) ..

    ReplyDelete
  11. شمس النهار:
    اولا الف شكر
    ثانيا: كل سنة و انتي طيبة
    ثالثا: برنامج باسم يوسف كان كويس خصوصا حلقة توفيق عكاشة
    تحياتي

    ReplyDelete
  12. norahaty:
    شكرا ليكي و كل سنة و انتي بخير

    ReplyDelete
  13. شيرين سامي:
    اولا الف الف شكر على الكلام الكبير جدا دة
    البوستات تحت امرك و يشرفني بالطبع انك تقرأيها كلها و تديني انطباعك عن كل بوست منهم
    شكرا لرأيك القيم
    تحياتي

    ReplyDelete
  14. tears:
    و انتي بالصحة و السلامة و العافية
    الف شكر

    ReplyDelete
  15. بسنت:
    و انتي بكل صحة و سعادة ان شاء الله
    بالنسبة لأوشة الحمد لله انك عرفتيه لأنه حديث المدينة
    اما فكرة ان البلد كلها تتعدل فدي واضح انها هتحتاج وقت طويل جدا
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails