Monday, 9 May 2011

مصريون لا أعرفهم


انا لا اعرف كاميليا و لا وفاء و لا عبير.....بس اعرف مصر كويس قوي...!!
انا لا اعرف حسان و لا يعقوب و لا بيشوي و لا عبد المسيح.....بس اعرف  برضة ان ربنا زي ما امرنا اننا ننصر ديننا - دة بفرض ان اللي بيحصل من اعتداءات و تهجم على دور العبادة او على دين الغير نصرة للدين-..,أمرنا برضة بالحفاظ على اوطاننا و بلادنا و ارواحنا و اهلنا..!!
انا لا اعرف  سلفيين و لا اخوان و لا ارثوذكس و لا كاثوليك....بس اعرف مواطنين مصريين عايشين فوق تراب البلد دي و تحت شمسها...بتطحنهم الحياة كل يوم...بيفرحوا لنفس اسباب السعادة....و بيحزنوا لنفس اسباب الحزن..!!
اعرف مصريين بيلعنوا البلد دي بالنهار و بالليل 100 مرة...من تلوثها و زحمتها و بطالتها و قسوتها على اهلها...بس لو اي اجنبي مسها بس بسوء..و لو بالكلام...بيتحولوا لأسود و مستعدين يداقعوا عنها لأخر نقطة دم...!!
أنا ماعرفش مصري مسلم و مصري مسيحي....بس أعرف مصريين بيشتروا حلاوة مولد النبي كل سنة....بيزرعوا و يحصدوا على حسب التقويم القبطي....بيخرجوا يتفسحوا و يفرحوا في اعياد الفطر و الأضحى و الميلاد و شم النسيم...!!
لما بيطلعوا رحلات كلهم بيروحوا الحسين...زي ما كلهم بيزوروا دير سانت كاترين..!!
طوال سنوات الدراسة من ابتدائي و حتى تخرجي من الجامعة...و انا لي زملاء و اصدقاء مسيحيين....عمري ما صادفت في حياتي مشكلة طائفية واحدة في المدرسة او في الجامعة.
كنت أفرح قوي لما الاقي (شلة) واقفة مع بعضها في الجامعة فيها مسلمين و فيها اقباط...بيتكلموا و بيضحكوا...كنت بأحس بإطمئنان غير عادي...بأحس ان احنا شعب راقي صعب تلاقي زيه في الدنيا دي..شعب يؤمن بأن (الدين لله و الوطن للجميع).
بأجد متعة في نفسي  و انا اهنىء اصدقائي الأقباط بأعيادهم الدينية...و لا تسعني الفرحة و انا استقبل تهاني اعياد الفطر و الأضحى من اصدقائي الأقباط..!!
أنا ماعرفش مصري مسلم و مصري مسيحي...بس أعرف مصريين كثير بيثقوا في مدارس الراهبات  بإعتبارها قلاع شامخة للتربية و التعليم و الإلتزام.
زي ما في مصريين بيختاروا البقال او الجزار علشان هو مسلم متدين و بيعرف ربنا...و علشان هو بيعرف ربنا يبقى عمره ما هيغشنا علشان احنا اقباط..!!
أنا ماعرفش مصري مسلم و مصري مسيحي....بس أعرف مصريين (مجانين) أهلي....و مصريين (مهاوييس) زمالك...بيشجعوا فريقهم مع بعض....بيفرحوا و يحضنوا بعض...بيتفعلوا و يسبوا للحكم مع بعض...لا عمرهم بصوا للصليب الموشوم على الذراع...و لا لزبيبة الصلاة اللي بتزين الجبهة...!!
انا لا اعرف مصري مسلم او مصري مسيحي....انا اعرف مصريين اقسموا ان دم الشهداء لن يذهب سدى..و انهم معتصمون بالميدان حتى سقوط الديكتاتور و عصابته...قاموا بحماية بعضهم اثناء صلاة الجمعة و قداس الأحد...غنوا جميعا ترنيمة (بارك بلادي) بكل حب لهذا الوطن.
انا لا اعرف مصري مسلم او مسيحي........بس اعرف مصريين حاربوا مع بعض...و انتصروا مع بعض...و استشهدوا مع بعض...و صعدت ارواحهم لبارئها سويا.
انا لا اعرف الا هؤلاء المصريون...........المصريون المؤمنون بالله ثم الوطن...المؤمنون ان الدين لله و الوطن للجميع...المؤمنون ان مصر وطن واحد يتسع للجميع...المؤمنون بأنهم ليسوا ألهة على الأرض...المؤمنون بأن الله وحده هو من سيحاسب البشر على ما اقترفوه في دنياهم و انهم ليسوا مؤهلين لحساب البشر على دياناتهم و علاقاتهم بربهم.
المصريون الذين يرون انهم اذا ارادوا   (تغيير المنكر) فعليهم اولا محاربة الفساد و البلطجة و الغش و التزوير و القذارة...عليهم ان يبنوا وطنهم بما ينفع البلاد و العباد..قبل ان يبحث عن (تغيير المنكر) بمهاجمة كنيسة او سب المسيحيين و مهاجمة رموزهم الدينية..!!
اما من قاموا بمهاجمة الكنائس و الإعتصام امام الكاتدرائية او التجمهر امام الكنائس او اهانة رموز الدين المسيحي  مثلهم تماما مثل من يتهجم على مقام  الرسول عليه الصلاة و السلام او يقتل سيدة و زوجها و اطفالها بدم بارد لمجرد انها  اسلمت او يبادر بإطلاق النار على المسلمين امام كنيسة امبابة..., هؤلاء جميعا متطرفـــــــــون..!!
بل لا ابالغ ان قلت انهم ليسوا مصريين...او على الأقل هم مصريون...و لكنني لا اعرفهم...و لا يشرفني ان اتعرف عليهم او اتعامل معهم يوما ما.
بل يجب ان يتم تطهير البلد من امثال اولئك و هؤلاء فهم أخطر على هذا البلد من اعداءه,,,فالعدو عدو..يسهل اخذ الحيطة و الحذر و التعامل معه كعدو..اما امثال اولئك المتطرفون من الجانبين فهم يستهدفون تخريب البلد و تدميره من الداخل و هذا هو أخطر ما في الأمر...., فإذا اردت ان تدمر بلد ما فماعليك الا تدمير جبهته الداخلية و سلامه الإجتماعي..
وهو ما يفعله هؤلاء المتطرفون اما عمدا و اما جهلا...!!
وهو ايضا ما لن نسمح به ان يحدث لمصر بلدنا جميعا طالما في العمر بقية حتى و ان ضحينا بأرواحنا في سبيل وحدتنا الوطنية ,,فبالتأكيد لن تكون ارواحنا  أغلى من ارواح من ضحوا بحياتهم في سبيل بقاء هذا البلد على مر التاريخ 
بقاء هذا البلد و تقدمه يكمنان  في وحدته الوطنية و تماسك جبهته الداخلية..فأن ضاعا ضاع الوطن و ضعنا جميعا معه.




لو عجبك الموضوع.......SHARE IT يمكن يسهم و لو بقدر ضئيل جدا في اطفاء نار لا تزال تستعر في صدور البعض...

14 comments:

  1. احمد

    اللى انت تعرفه تقريبا انا كمان اعرفه ومش انا بس هتلاقى فى كتير يعرفوا
    هاقولك على حاجه عمرى ما سالت اى شخص عن ديانته شاب او بنت لان الديانه ما هتفرق معايا
    الدين حاجه بينى وبين ربنا لكن الوطن ده بتاعنا كلنا

    تسلم على كلماتك الاكتر من رائعه


    زهراء

    ReplyDelete
  2. وزى ما انت عرفت
    مصر كدا احنا وقرايبنا
    كلهم عرفوها كدا ومش عارفة
    الى بيعمل كدا مين؟ ولمصلحة مين؟
    احنا فى مركب واحد:لو غرقت غرقنا
    كلناولو عدت بالسلامة كلنا حنعدى
    ربنا يسلم ونعدى كلنا يــارب

    ReplyDelete
  3. مصر فعلا كده بس فيه شوية بلاوى بيحاولوا يولعوا البلد و بيستغلوا الجهل المستشري

    ReplyDelete
  4. دا نتاج 30 سنه جهل وعدم احترام للاخر ، اللى بيحصل دا طبيعى لو مكنش طبيعى مكناش عملنا ثوره

    ReplyDelete
  5. ناس كثيرين جدا يعرفون ما تعرف لكن للاسف صوتهم في زحمة الاصوات الثورية اختفي
    لكن ان شاء الله كلها مده بسيطه و هتعدي زي غيرها من الازمات
    مش ازمة حكم مبارك و التوريث عدت بسلام؟؟؟
    ان شاء الله غيرها هيعدي

    ReplyDelete
  6. للاسف يا استاذ احمد مصر محتاجة زلزال للاخلاق والسلوكيات شوفوا اليابان فى عز ازمتهم نظام ايه والكل خايف على بعضه مش فوضى وحد يصتاد فى الميه العكر
    بس انا اللى اعرفه مفيــش حد فوق القانون لا شيخ الازهر ولا البابا شنودة والكنيسة ولا الجامع الكل يعمل تحت القانون
    واعمال القوانين على الكل هى الحل

    ReplyDelete
  7. ثقافة الهزيمة .. العتبة الخضراء‏

    و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار. و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

    ..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!! باقى المقال ضمن مقالات ثقافة الهزيمة بالرابط التالى

    www.ouregypt.us

    ReplyDelete
  8. لولا و زهراء:
    في ناس كتير يا زهراء بيفكروا زينا كدة
    بس تفتكري نسبتهم قد ايه........؟
    انا مرعوب يكون التطرف هو السمة السائدة و امثالنا هم الإستثناء
    تحياتي

    ReplyDelete
  9. norahaty:
    يا خوفي لتكون المركب بدأت الغرق فعلا
    ربنا يستر

    ReplyDelete
  10. tears:
    الخوف ان (البلاوي) دي صوتهم يعلى و ينجحوا يعكروا الأجواء

    ReplyDelete
  11. اعقل مجنونة:
    بس فعلا الفراغ الامني و التراخي الرهيب في عمل الشرطة اوصل بنا لهذه النتائج التي قد تكون كارثية
    ربنا يستر

    ReplyDelete
  12. ذو النون المصري:
    اغبطك على تفاؤلك
    يارب دايما

    ReplyDelete
  13. اماني:
    و دة اللي لازم تكون عليه مصر بعد 25 يناير ان شاءالله

    ReplyDelete
  14. تماااااااااااااام جدا الموضوع والكلام
    شهد

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails