Tuesday, 29 March 2011

اللي اختشوا ماتوا

حاجة من اتنين مالهمش تالت
يا إما بيهزر..............أو بيهزر....!!!
الكابتن أحمد شوبير قرر ان يرشح نفسه لرئاسة الجمهورية  نزولا على رغبة الجماهير الغفيرة التي طالبته بذلك مؤكدا انه يمتلك برنامجا انتخابيا للعبور بمصر اقتصاديا و اجتماعيا و سياسيا......!!!!
ارجوكم ماحدش يقول لي و دي فيها ايه....؟!!!
مواطن مصري قرر الترشح لرئاسة بلده و هذا حق مكفول لكل مصري بقوة الدستور و القانون...!!
نظريا...لا غبار على ترشيح اي مصري نفسه لمنصب رئيس الجمهورية و لكن عمليا علينا ان نتذكر الحكمة التاريخية 
"اللي اختشوا ماتوا"
اذا كان الكابتن يراهن على ان جمهور الأهلي سينتخبه بإعتباره (ابن النادي)  فهو بالتأكيد يعيش في قمة الوهم....فهذه انتخابات  رئاسة مصر يا كابتن و ليست انتخابات نادي او حتى انتخابات مجلس شعب (من اياهم) الذي اعتدت ان تكون عضوا فيه....!!!
و اذا كان يراهن على ذاكرة الشعب المصري الضعيفة فدة كان زماااااااااااان....!!!
الذاكرة الشعبية المصرية قد تكون (ضعيفة) فعلا و متسامحة الى حد بعيد....الا ان ذاكرة الإنترنت و اليوتيوب و الفيسبوك  ليست ضعيفة على الإطلاق و تشهد على الجميع...!!
يبدو ان الكابتن شوبير تناسى طبيعة دوره في الحزب الوطني و لجنة سياساته...لعله لا يدرك صورته الحقيقية   التي كانت تظهر للمشاهدين و المتابعين لبرامجه و هو يحاول وضع اسم (الأستاذ جمال) في اي جملة مفيدة ضمن حملته المستميتة لتلميعه و تلميع نفسه معه بالمرة...!!
يعتقد الكابتن شوبير ان الناس ستغفر له كيف شن حملة شعواء على شباب (الألتراس) و هم في معظمهم من اروع الشباب المصري اجتماعيا و ثقافيا لمجرد انهم رفضوا ان يهتفوا له في المدرجات  وهم الذين لا يهتفوا لأحد على الإطلاق الا لبلدهم و ناديهم..!!
يتخيل كابتن شوبير ان المصريين سينسون لهاثه من اجل ان يفوز بترشيح الحزب الوطني على مقعد البرلمان بدائرته بطنطا ...و كيف كانت صدمته عندما قرر (عز) ان يجعل دائرته (مفتوحة) بترشيحه مرشحا اخر على نفس المقعد....و كيف كانت صدمته أكبر عندما لم يزور الوطني الإنتخابات لصالحه و قرر التضحية به  لصالح منافسه ...!!
كابتن شوبير ما ان يغضب على أحد لأي سبب كان و غالبا ما يكون سببا شخصيا (جوزيه....سمير زاهر...مدحت شلبي...الخ) ...حتى يفتح ابواب الجحيم على هذه الشخصية...حلقات كاملة تخصص لإغتيال هذه الشخصية معنويا.....تستطيع ان تسمي هذا (ابتزازا اعلامي ) ....ثم تفاجأ بعد عدة اسابيع بنفس الشخصية  (المغضوب عليها) وقد تحولت الى شخصية فذة و جديرة بكل احترام....!!
لا انت عارف هو ليه كان بيتقطع و لا هو ليه  دلوقتي بيتكرم.....!!!!!!
كابتن شوبير تخيل اننا سنتناسى كيف كان يخصص ساعات من برامجه (الرياضية)  للحديث في السياسة بما يخدم مصالح نظامه و حزبه...فتارة يوجه مدافعه في اتجاه البرادعي....و تارة أخرى في اتجاه جماعة الأخوان المسلمين...ليس مهما في اتجاه من...الأهم انه في صالح النظام  التي هي بالتأكيد صالحه ايضا....!!!
الكابتن شوبير و العهدة على مصدر الخبر صرح ان انتمائه للحزب الوطني (لا يعيبه)..... فغالبية المصريين كانوا منتمين للحزب الوطني الحاكم سابقا سواء بالقيد في سجلات العضوية او بالإنتماء الشكلي....!!!
انت اكيد بتهزر يا كابتن...........انت بتهزر.......؟!!  صح....؟!!
أغلبية المصريين كانوا منتمين للوطني....؟؟!!
دة على اساس ايه.....؟ و من خدعك بالمعلومة دي....؟!!
كونك يا سيدي و معك كام ألف او حتى مليون بني ادم كانوا اعضاء في هذا الكيان المزور لأهداف خاصة بهم وحدهم....فهذا اختيارهم....أما ان (تصم) أغلبية المصريين بهذه الوصمة و العار...فهذا عيب و لا يجوز يا كابتن.
للأسف يا كابتن شوبير....ترشحك لرئاسة الجمهورية ستكون احد اهم سلبيات الديمقراطية و الحرية التي منحتها لنا ثورة 25 يناير ...ربما سيكون ترشحك انت و غيرك من رموز النظام السابق الذين قرروا ركوب الموجة بعد ان قاموا بعمل (شقلباظ) لتغيير الأفكار و التوجهات و القناعات و الإنتقال من مرحلة (بالروح بالدم نفديك يا مبارك) الى مرحلة (الجيش و الشعب ايد واحدة) سيكون فرصة لكي تدركوا ان الشعب المصري ليس قطيعا من النعاج كما توهمتم انتم و نظامكم البائد ...و انه اذكى بكثير من ان ينتخب رئيسا لمصر رجل كان يوما ما عضوا في لجنة سياسات جمال مبارك....!!!!
يا خوفي اسمع بكرة ان الدكتور توفيق عكاشة و سيادة المستشار مرتضى منصور اعلنا ترشحهما لإنتخابات الرئاسة.....ساعتها تبقى باظت بجد.......!!!!

الخبر على موقع العربية....هنا
ملحوظة:
كابتن شوبير نفى هذه التصريحات جملة و تفصيلا مؤكدا انه لا ينوي الترشح لرئاسة الجمهورية و لا حتى انتخابات مجلس الشعب على الرغم من ورود هذه التصريحات في معظم المواقع الإخبارية و البرامج التليفزيونية.....!!!!!
و بصرف النظر عن كونه تورط في هذه التصريحات ....او لم يصرح بها من الأساس فلقد آثرت ان انشر هذا الموضوع ليدرك بنفسه رأي الشارع فيه هو او اي فرد انحاز لمصلحته الشخصية يوما ما على مصلحة 80 مليون مواطن مطحون...و يعتقد انه بإستطاعته ان يركب الموجة الجديدة و يتحول من عضو مجلس شعب عن (الحزب الوطني) الى مناضل ثوري...!!!
---------------------------------------
بعض التعليقات للسادة اعضاء صفحة الأغلبية الصامتة على فيسبوك:
- هههههه.....كدة مرتضى هيترشح بعد بكرة....!!!!!
- يبقى بعد كدة عبود الزمر من حقه يعمل حزب و يسميه "خللي بالك لنغتالك"....ماهي زاطت بقى...!!!!
- رئيس جمهورية ممسوك عليه سي دي....!!!!
- هي دي سلبيات الحرية....!!
- رئيس جمهورية نفسه...أكيد...!!!!
- ماله...يرشح نفسه...يرشح....المهم الناس هتختار مين....!!!
- عم فتحي البواب كان نفسي قوي انه يترشح....و أهي ديمقراطية برضة...!!
- مرشح نفسه علشان يسجن مرتضى منصور....!!!!!
- teeeeeeeeeeeeeeeeeeeeet.......!!!!!
- no comment...........!!!!!
- هزلت.............!!!
- لو كان حقيقي........تبقى شوربة!!!!!
- هي ناقصة..............؟!!!!!

22 comments:

  1. اللي اختشوا ماتوا فعلا

    بس على رأيك التعليق اللي بيقول


    خليه يترشح والناس تختار


    فعلا الناس هاتختار


    بالذات شوبير يعني لا يخفى على احد

    انه كان حزب وطني

    ReplyDelete
  2. انت عايز اكتر من سرور مفجر الثورة

    ReplyDelete
  3. أنا منت مفكر الموضوع هزار طلع جد!

    الله المستعان

    ReplyDelete
  4. توفيق عكاشه فعلا ها يترشح
    انت مش شايف الحلقه الجديده الى عاملها لزوم الصور والنيو لوك

    شوبير انشاء الله ها يجيب البنات الى ممسوك معاهم فى السى دى علشان يديرو له الحمله الانتخابيه

    ReplyDelete
  5. عادى جداااا مهو كل من هب ودب بيقول بفكر ارشح نفسى !!

    واحد متسلق مستنى منه ايه ؟؟؟

    تحياتى وهدى أعصابك

    ReplyDelete
  6. خليه يجيب صوت واحد ....اشمعنا مصر جابت صفر في المونديال بالنسبة لمصر حتكون النسبة اعلى بصوت...هههههههه

    ReplyDelete
  7. "اللي اختشوا ماتوا"

    عنوان صحيح ولا غبار علية


    وزى ما بيتقال نقول للكابتن هاتو الدفاتر تتقرى

    مع خالص تحياتى

    ReplyDelete
  8. شكلنا بقينا ملطشه ولا ايه
    وعلي فكرة هو حب يجس النبض ولما اتهزء رجع في كلامه وقال ماحصلش
    :)))

    ReplyDelete
  9. hu-man:
    المستفز انه يكون فاكر ان الناس هتختاره
    بأمارة ايه بس........؟

    ReplyDelete
  10. هيثم الشيشاني:
    لا هو اكيد هزاااااااار
    اصل دة ماينفعش يبقى جد ابدا

    ReplyDelete
  11. nody:
    اللي بيضايقني ان الناس دي هتحول الانتخابات الى مسرحية هزلية

    ReplyDelete
  12. foxology:
    انا بصراحة مش مرتاح
    حاسس ان الناس دي هتلعب دور مرسوم لها لإفساد التطور الديمقراطي و افراغه من مضمونه و تحويله لمسرحية هزلية

    ReplyDelete
  13. tarkieb:
    اصلا فكرة انه يرشح نفسه رغم كل ماهو معروف عنه فكرة تدعو للإستفزاز بشكل فظيع

    ReplyDelete
  14. محمد الجرايحي:
    لا طبعا
    ازاي يعني.......؟
    اومال يحرق دم مين....؟

    ReplyDelete
  15. تامر نبيل موسى:
    و هو دفاتره كتير جدا الحقيقة يعني

    ReplyDelete
  16. شمس النهار:
    تقريبا هو دة اللي حصل فعلا

    ReplyDelete
  17. شمس النهار:
    تقريبا هو دة اللي حصل فعلا

    ReplyDelete
  18. هيثم الشيشاني
    يا رب

    ReplyDelete
  19. ده بأمارة إيه شوبير هيرشح نفسه ؟!
    ده على أساس أنه فيلتر و لا صفاية ؟!
    لسه ياما هيورد على مصر فى إنتخابات الرئاسة دى .. ربنا يستر !

    ReplyDelete
  20. مشكووووووووووووووووووووور

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails