Thursday, 23 September 2010

ازهى عصور الحرية...بعافية شوية ..

قرار حكومتنا (النظيفة) بسحب ارض (مدينتي) من مجموعة طلعت مصطفى تنفيذا للحكم القضائي ثم (إعادتها) لهم مرة أخرى...يثبت فعلا ان الحكومة بتتعامل معانا بمنطق (الأم الحنون) اللي بتخاف على (زعل) اطفالها (اللي هم إحنا) فبتريحهم...بس برضة بتعمل اللي هي عايزاه!!!!
الحكم القضائي أثبت ان عقد مدينتي (باطل) و غير منطقي و لابد من فسخه.....طبعا الناس المغفلين (امثالنا) كدة هللوا للحكم دة بإعتباره انتصارا للمنطق و مكافحة الفساد و احسوا انهم وضعوا (الحكومة) في مأزق فهي مطالبة بتنفيذ هذا الحكم القضائي و في نفس الوقت دي برضة (مدينتي) و (هشام طلعت)......طيب الحل ايه؟؟
طبعا الموضوع دة كان محتاج (ترتيب من مخ ديب)....و طبعا ثغرات القانون مفيش اكثر منها...!!!
تفتق ذهن قانونيي الحكومة الى حل سحري للخروج من المأزق.....تنفيذ حكم القضاء (فالأحكام القضائية واجبة النفاذ...و للقضاء قدسيته و حرمته......الخ) و سحب ارض (مدينتي) من مجموعة (طلعت مصطفى) تنفيذا لحكم المحكمة...!!!
بس برضة القانون بيعطي الحق للحكومة في تخصيص الأرض بالأمر المباشر بدون (مزايدات) و بالتالي فقد قررت تخصيصها لمجموعة (طلعت مصطفى) برضة....
و بكدة.....يبقى توتة توتة خلصت الحدوتة...و يا دار ما دخلك شر...و يجعل بيوت المحسنين عمار...و ربنا يخلي لنا الدماغات (الألماظ) اللي بتطلع منها الأفكار و الحلول السحرية دي!!
و كمـــــــــــــــــــــا كنــــــــــــــــــــــــــــــــت!!!!!
_________________________________________
الأزمة التي اثارتها ادارة مدينة الإنتاج الإعلامي مع (اوربت) بشأن (مستحقات و مديونيات) غير مسددة هي بكل تأكيد و بدون ادنى شك (تلكيكة) و (كمين) تم نصبه لبرنامج (القاهرة اليوم) لعمرو أديب.
يبدو ان (حنفية) حرية الرأي و التعبير و اللي صدعونا بيها الكام سنة اللي فاتوا آن الأوان انها (تتقفل) و بالضبة و المفتاح!!
و سواء عاد (القاهرة اليوم) للحياة مرة أخرى او لم يعد فالهدف قد تحقق.....و سواء اكانت (قرصة ودن) او (رصاصة رحمة) فعلى كل اللي صدقوا نفسهم اننا نعيش في (ازهى عصور الحرية) انهم يفوقوا و يصحصحوا و يخافوا على أكل عيشهم...!!!
________________________________________
بمناسبة الخوف على (أكل العيش) .....المهندس نجيب ساويرس خاف على اكل عيشه و قرر منع برنامج (ابراهيم عيسى) على on tv و طبعا السبب (المعلن) كان تفرغ ابراهيم عيسى لتطوير جريدة (الدستور) (اللي اعتقد انه هيسيبها قريبا برضة للتفرغ لمشاهدة التليفزيون).......
انما اعتقد ان الموج (الأمني) عالي قوي اليومين دول.....و سلومة الأقرع ما بيعرفش صاحبه...و الناس لها حق تخاف على مشروعاتها و استثماراتها و أكل عيشها بدل ما يلاقي نفسه (مفلس) و (متجدولة ديونه)....و ساعتها لا إبراهيم عيسى و لا 10 زيه هينفعوه!!!!
_____________________________________
بيع جريدة (الدستور)....(و ما ادراك ما هي الدستور) للدكتور سيد البدوي رئيس حزب الوفد و صاحب مجموعة قنوات الحياة (1 و 2 و مسلسلات و سينما و سبورت) لتنضم هذه الجريدة (اللي كانت شرسة) لهذه الباقة الإعلامية الترفيهية اللطيفة اللي بيملكها رئيس حزب معارض من بتوع (المعارضة اللطيفة) برضة...يجعلنا مقدما نترحم على جريدة معارضة اسمها (الدستور) ستتحول الى جريدة (لطيفة) برضة!!!!
________________________________
غياب (القاهرة اليوم) و إبعاد (ابراهيم عيسى) و (تقليم أظافر) جريدة الدستور....و ما خفي كان أعظم يثبت ان (ازهى عصور الحرية) بعافية شوية!!!!

16 comments:

  1. ان شاء الله الدستور ستبقى كما هى و حتى الان النبرة كما هى بل زادت

    ReplyDelete
  2. الشعب المصري هو الغلطان
    اااااااااااااه
    الحكومة هتموت نفسها عشان الشعب يعني
    ايك يولع الشعب
    :)
    مفيش اصلا شعب ولا معارضة
    لاني اللي اعرفه ان الشعب دا حاجة كدا لما يتهان يعبر عن اهانته
    لكن احنا اصبحنا عبيد للنظام عبيد للقمة العيش وحسبي الله ونعم الوكيل

    ReplyDelete
  3. ومين اللى قالك اننا عايشين اصلا ؟؟؟؟

    ابتسم فأنت مصرى

    تحياتى

    ReplyDelete
  4. اخبار منيلة بنيله سوداء
    انا رجعت للغربه من يومين و مفيش مدونه فيها خبر عدل
    ربنا يسترها
    لازم نعرف انهم يمكرون و ان الله خير الماكرين

    ReplyDelete
  5. خلاص يامعلم انسي النظام بيكشر عن انيابه وياقاتل يامقتول
    انا سيبتكم تلعبوا كتير بس خلاص زمن الدلع خلص

    هي دي باختصار الرساله بتاغعه النظام
    اما عقد مديبنتي اللي حصل بنظام زيتنا في دقيقنا ومحدش غريب يخش بيننا

    ReplyDelete
  6. ازهى عصور بجاحة الحكومة بقى على عينك يا تاجر واحنا نخبط راسنا فى الحيط مش مشكلة
    المهم النظام واتباعه هما مش شايفنا اساسا

    ReplyDelete
  7. وما اخدتش بالك من الناس الى بيعتقلوها فى المطارات من وجه حق
    دى رساله لمن يهمه الامر
    كان مولد وانفض

    ReplyDelete
  8. توصيف حقيقى وصادق
    لواقع يحيط به النفاق والزيف

    والكذب والفساد

    فى الغربة بعد نسبى عن معايشة ذلك الواقع
    ولكن تبقى فى القلب غصة وفى العقل فسحة من الامل فى غد افضل

    تحياتى وتقديرى

    ReplyDelete
  9. mido:
    انا كمان اتمنى ذلك يا ميدو
    بس مش هيبان دلوقتي
    هيبان في معمعة الإنتخابات
    تحياتي

    ReplyDelete
  10. mr.president:
    الشعب مات و شبع موووت بستفتكر ممكن يصحى تاني و لا خلاص كدة..؟؟

    ReplyDelete
  11. foxology:
    انا دلوقتي بأعيط من كتر الإبتسام

    ReplyDelete
  12. ذو النون المصري:
    والأخبار الحلوة هتيجي منين بعد الشر يعني....؟؟؟؟

    ReplyDelete
  13. dr.lecter:
    فعلا.......انا حاسس ان كل برامج التوك شو اللي لسة باقية بقت مهذبة جداااا
    الظاهر كدة ان القطة اندبحت خلاص

    ReplyDelete
  14. رحيل:
    برقع الحيا تم قلعه خلاااااااص

    ReplyDelete
  15. nody:
    يعني هييجي اليوم اللي هنترحم فيه على الأيام دي...؟؟؟

    ReplyDelete
  16. sal:
    فعلا الغربة في الظروف دي افضل بكتيييييير
    تحياتي و احتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails