Friday, 17 September 2010

تليفزيون رمضان 2010

على الرغم كوني كائنا تليفزيونيا الا ان ادائي التليفزيوني في رمضان هذا العام لم يعجبني....لم اتابع التليفزيون في هذا الرمضان المتابعة الواجبة زي كل سنة
اعتقد ان (تواضع) متابعتي التليفزيونية هذا العام له عدة اسباب رئيسية اهمها الكم الهائل و الوهمي و الغير طبيعي من البرامج و المسلسلات التليفزيونية التي تصيب اي بني ادم طبيعي بالتخمة التليفزيونية.....و انا الحقيقة تربكني (الكثرة) بشدة في المسلسلات التليفزيونية مثلها مثل الموائد الرمضانية!!!
الا انني لم يفتني ان اتابع بعض الأعمال الرمضانية و إن كان قد فاتني بالفعل الكثير من الأعمال المهمة بفعل (التخمة)...إلا انها ملــــــحوقة...!!!!
و هذه بعض الإنطباعات عن (بعض) الأعمال الرمضانية التي فلتت من هذه (التخمة) التليفزيونية الرهيبة:
*عايزة اتجوز: لو اجتمع صانعوا عمل ما على ان يخرجوه بمثل هذا السوء لما نجحوا مثلما نجح فريق عمل هذا المسلسل في ان يخرجوا هذا المسلسل بهذا الشكل!!
على الرغم من توافر جميع مقومات النجاح لهذا العمل من بطلة (نجمة) و مخرج (واعد) و إنتاج (متميز) و نص درامي حقق (نجاحا) ساحقا...الا ان المسلسل خرج بشكل محبط للغاية و ربما صادم!!!
مبالغة غير طبيعية او منطقية في اداء ابطال العمل....كوميديا (مباشرة) بزيااادة جدا حولها من (الكوميديا) الى الإستظراف المبالغ فيه بشكل (فج)!!
و على الرغم ان (النص الأدبي) للدكتورة غادة عبد العال كان من القوة بحيث ينتج عملا فنيا رائعا من نوعية الدراما الإجتماعية او ال LIGHT COMEDY الا ان صانعوا المسلسل قد اختاروا الكوميديا المباشرة و التي عجز ممثلون (غير كوميديين) على تنفيذها فظهر المسلسل ضعيف جدا و اقرب الى (الإستظراف) و المبالغة في كل الحوارات بلا اي مبرر.....خسرنا مسلسلا كان يمكن ان يكون رائعا!!!
* العار: أجمل ما في هذا المسلسل خروجه من عباءة الفيلم الشهير.....لم يقع صانعوه في فخ التقليد الذي وقع فيه كل من أعاد صياغة كلاسيكيات السينما المصرية فكان الفشل حليفهم بإمتياز, اما صانعو مسلسل (العار) فلقد ابتكروا مسلسلا تليفزيونيا بعيدا كل البعد عن الفيلم الشهير فإستحقوا كل الإحترام و (النجاح ايضا).
*الجماعة: كعادة وحيد حامد.....موقف (مش طبيعي) تجاه اي جماعة إسلامية (راجع افلامه وعادل امام و تهكمهم المستمر على كل ما هو اسلامي)...اراد إسقاط (الجماعة) بالضربة القاضية فكان رد الفعل عكسيا تماما!!!
جدل رهيب اثاره و يثيره المسلسل اعتقد ان (الجماعة) هي المستفيد الأول من هذا الجدل!!!
*زهرة و أزواجها الخمسة: ماليش في غادة عبد الرازق خاااااااااااالص!!!!!!!!!!
*موعد مع الوحوش: مسلسل قوي و رائع بس مش عارف ليه حاسس انه (اتظلم) بعرضه في رمضان.....المسلسل دة بجد يستحق المشاهدة....خالد صالح و عزت العلايلي في مباراة فنية من العيار الثقيل.
*كليوباترا: مسلسل (مخدوم) كويس.....انتاج ضخم و (متكلف).......استطاع ان يشد انتباه قطاعات كبيرة من المشاهدين للمسلسلات التاريخية و هو ما لم يكن يحدث من قبل....برافو!!
*اتصالات: حملة اعلانية رائعة سواء حملة ماجد كدواني او اعلان (النجوم) الضخم......سحبتوا البساط السنة دي من موبينيل و فودافون اللي حملاتهم الإعلانية كانت فعلا مخيبة للآمال السنة دي.....بس مش شايفين ان 7 مليون جنيه لمنير في 10 ثواني يعتبر مبلغ كبير شويتين؟!!
*محمد منير: كسبت 7 مليون جنيه من (اتصالات) و خسرت كتيــــــر قوي من رصيد شعبيتك لدى جمهور يعتبرك رمز اكبــــر بكتيــــــر من أي إعلان!!!!
*موبينيل و فودافون: انتم فين السنة دي على خريطة الإعلانات....ايه الحملات الإعلانية التعبانة دي...؟؟!!
*القاهرة و الناس: قناة فقدت الكثير من بريقها اللي نجحت في تحقيقه السنة اللي فاتت....3 برامج توك شو شبه بعض بيتذاعوا ورا بعض...(حفلة توك شو)...لم تشدني السنة دي مثلما شدتني السنة اللي فاتت!!!
*برنامج (بحث ميداني) زي العسل: نجحنم تماما في انكم تعرفونا قد ايه الشعب المصري مجموعة من محترفي (الإفتاء)...كله بيدعي معرفة كل حاجة و هو مش عارف أي حاجة!!!!
* التليفزيون المصري: برافــــــــــو....مجهود رائع و محاولات جادة للتميز و الإنفراد....برفو أسامة الشيخ و معاونيه.
*أهل كايرو: للأسف اخدت بالي منها متأخر قوي....بس الحمد لله لحقت نهايتها...اللي قتل صافي سليم هو (ابوها) على فكرة...معلومة لمن يريد متابعة المسلسل في الإعادة
بس بجد من الكام حلقة اللي تابعتهم في الأخر...خالد الصاوي وصل لمرحلة من النضج التمثيلي مرعبة....اغنية التتر لحسين الجسمي تحفة....بلال فضل لا غبار عليه
مسلسل رائع و لكنه كعادة المسلسلات البوليسية لا يشاهد الا مرة واحدة فقط و لكن اعتقد ان الأمر يختلف في هذه الحالة و السبب هو خالد الصاوي الذي لا يمل من مشاهدته يمثل.
*القنوات المصرية الخاصة: هي برامج التوك شو في رمضان (حرام) و لا إيه؟
*(الممثلين) أصحاب برامج (المقالب): مش آن الأوان بقى ان تعرفوا ان الشعب المصري (إتفطم) خلاص و مابقاش بيصدق البرامج دي؟!!!

و الى اللقاء في رمضان 2011 إن كان في العمر بقية.

16 comments:

  1. بداية كل سنة وانت طيب ولو انها متأخرة او زي مبتقولوا بالمصري بعد الهنا بسنة ههه
    بخصوص التلفزيون اتفق معك مائة بالمائة بخصوص مسلسل عايزة اتجوز لانني كنت من متابعي المدونة وقراءها وتوقعت ان يكون العمل الدرامي في مستواها وهو مالم يتحقق للاسف
    عن نفسي تابعت الدراما السورية مسلسل باب الحارة للسنة الخامسة على التوالي وهذا هو العمل الذي استطيع ان اقول اني شاهدت جميع حلقاته لى جانبه تابعت حلقات من المسلسلين السوريين تخت شرقي وذاكرة جسد
    يحيى الفخراني تابعت مسلسله في بدايته لكن لم اتممه لم يستهويني عالم الحروب والمكائد أكثر ما شدني فيه كان أداء الممثل الذي ادى شخصية الشخ سلام
    البرامج لاجديد فيها نفس الضيوف ونفس الاسئلة لا جديد يشدك لا ي الشكل ولا المضمون لكنني وجدت ضلتي في برنامج خواطر شاب لخالد الشقيري برنامج قصير في مدته غني في مضمونه.
    لكن مع ذلك يبقى حالكم أفضل من حالنا انا عن نفسي هجرت تلفزيون بلدي طيلة الشهر الكريم لانني خفت على اعصابي من ان تحترق من تفاهة ما يعرض لاشكل ولا مضمون لاشئ مجرد هراء
    دمت بكل الود

    ReplyDelete
  2. اولا : كل سنة وانت طيب

    ثانيا : الحمد لله مشوفتش غير مسلسل واحد بس وكان بيتعرض وقت الفطار فكنت بتفرج وبفطر ف نفس الوقت وهو مسلسل عبقرى فعلا فى الاداء الفنى ( موعد مع الوحوش) ومش هزود كلام غير انى موافقك تماما فى كلامك عنه وهو فعلا اتظلم سواء فى مواعيد عرضه فى رمضان او انه اتعرض ف رمضان اصلا

    ثالثا : قناة الناس هى قناة الهدف منها اولا واخيرا جمع اكبر حصة من الاعلانات وبسسسس وكفاية اوى الفوازير الميريامية اللى شوفت منها حلقة واحدة وكنت هرجع الحقيقة :))

    ثالثا : بحث ميدانى شوفت منه حلقة واحدة وعرفت وقتها ليه الحكومة بتعمل فينا كدة علشان هما عارفين ان الناس دماغها بقت فى الطراوة بمعنى الكلمة ومحدش هيركز فى اى حاجة بتعملها الحكومة

    رابعا : كل سنة وانت طيب هو انت شغال فى القاهرة والناس ولا ايه ؟؟ اصلك قلت الى اللقاء فى رمضان 2011 :))))

    تحياتى

    ReplyDelete
  3. العار حسيته مافيهوش اي لمحات فنيه او ابداع ومعجبنيش مسلسل تجاري بحت بشكل مبتذل كمان زي زهره بالظبط

    الجماعه واهل كايرو هم اهم عملين السنه دي بجداره

    وخاصه الجماعه محتاحه شهور نتناقش فيها ونجدال فيها

    ReplyDelete
  4. الحمد لله مضيعتش وقتي في ولا مسلسل

    ReplyDelete
  5. الحمدلله انا

    انتي تلفزيون

    يعني بس حبيت أقول عيد سعيد

    ReplyDelete
  6. نسيت اجمل مافى الليله
    شيخ العرب همام

    ReplyDelete
  7. الحمد لله اني مش اتفرجت علي التليفزيون في رمضان :)

    ReplyDelete
  8. السلام عليكم

    الحمد لله فقد من الله علي بعدم مشاهدة اي مسلسل واكتفيت بالرياضة ..

    والشكر والامتنان لشخصكم الكريم على زيارة مدونتي ..

    والتواصل معكم شرف لي

    تحيتي

    ReplyDelete
  9. خواطر شابة:
    و انتي طيبة..و مش متأخرة و لا حاجة
    اهلا بيكي في اي وقت
    عايزة اتجوز بالنسبة لي انا و ناس كتير كان صدمة
    توقعته اقوى من كدة بكتير
    بالنسبة لباب الحارة للأسف الشديد المصريون ليسوا من عشاقه عكس معظم الشعوب العربية الأخرى
    اعتقد انه مسلسل يستحق المشاهدة
    قرأت انا كمان ان المغاربة مستائين من تليفزيون بلدهم هذا العام ربما في البي بي سي او السي ان ان
    عموما خيرها في غيرها و رمضان الجاي يكون احسن اعلاميا ان شاء الله
    تحياتي

    ReplyDelete
  10. foxology:
    و انت طيب يا باشا
    موعد مع الوحوش فعلا مسلسل جامد جدا و اعتقد انه هياخد حقه في المشاهدة بعد رمضان
    فوازير ميريام.........بشـــــــــــعة
    بس برضة دي ميريام فارس يا معلم
    بحث ميداني بيثبت ان احنا شعب في البلالة
    تحياتي

    ReplyDelete
  11. dr.lecter:
    الجماعة مسلسل رائع فنيا و اخراجيا انما فكريا.....عليه مليون علامة استفهام
    بالنسبة لأهل كايرو مسلسل رائع فعلا بس عيبه ان لا يصلح الا للمشاهدة مرة واحدة بس
    تحياتي

    ReplyDelete
  12. mr.president:
    انت الكسبان و الله

    ReplyDelete
  13. كلمات من نور:
    كل عيد و انت طيب

    ReplyDelete
  14. بلال قلب فارس:
    فعلا...للأسف لم اتابعها
    كل سنة و انت طيب

    ReplyDelete
  15. كيارا:
    الحقي اللي فاتك بعد رمضان

    ReplyDelete
  16. جني:
    كل عام و انتم بخير
    و بالنسبة لزيارة المدونة
    دة شرف ليا
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails