Friday, 6 August 2010

صاحب مبدأ

جربت قبل كدة تبقى (صاحب مبدأ)؟!!
يعني يبقى لك مبدأ معين في الحياة تؤمن به و تصر عليه و لو الدنيا اتطربقت من حواليك و لا يهمك...انت ثابت و راسخ كدة على مبدئك؟!!
لو كنت ممن اقصدهم (اصحاب المبادىء) على حق فعلا يبقى اتحداك انك تقدر تعيش و تتعايش في البلد دي!!!
بلدنا (مصر) تعتبر من البلاد اللي ما ينفعش يعيش فيها حد (صاحب مبدأ) واحد.....ما بيعيش لها اصحاب المبادىء....ماينفعش يعيشوا فيها
علشان (تعيش) و (تتعايش) في مصر يبقى لازم انك (تطاطي) راسك شوية علشان الدنيا تمشي....يعني لازم تعيش بمبدأ (عدي يا ليلة) و (انحني للعاصفة) و غيرها من القيم اللي اخترعها اخوانا (اللي مالهمش مبدأ) علشان يبرروا نظرياتهم و تصرفاتهم.
انا مثلا كان عندي مبدأ اني لا اقبل اني ادفع رشوة في اي مكان علشان مصلحتي تقضى....و كنت دائما و ابدا رأيي ان الموظف دة بيتقاضى مرتبه علشان يخدمني...و بالتالي هو ملزم بخدمتي و رجله فوق رقبته...رشوة.....؟!!!!
قال رشوة قال.....!!!!!!
بس التجربة اثبتت لي اني لو فضلت مؤمن بالمبدأ دة يبقى من الأفضل اني اقعد في بيتنا...لأن بهذا المبدأ و لا مصلحة سيتم قضائها...لا اعرف استخرج رخصة قيادة و لا رخصة سيارة و لا اي ورقة رسمية كائنة ما كانت...و حتى لو عرفت يبقى بعد فوات الأوان و بعد ما تصبح الورقة المستخرجة بلا ادنى قيمة.
فقررت اني لازم (اطاطي البصلة) شوية علشان بس المركب تمشي....و اعرف انا كمان امشي حالي!!!!!
كنت لحد وقت قريب مؤمن برضة بمبدأ (ان اقول الحق و لو على رقبتي)...بس اكتشفت ان رقبتي استحملت كتير قوي و اشتكت و قالت (جاااااااااااي)
اتاري في البلد دي الحق بيزعل قوي....لازم الحق يبقى على هوى اللي بيسمع...انما الحق لو كان مش على المعدة...يبقى الباطل ساعتها هو الحل.
اكتشفت ان اي حد بيتناقش معاك و عايز يعرف رأيك ..هو في الحقيقة مش عايز يعرف رأيك و لا حاجة...هو عايز رأيك يتفق مع رأيه...او من الأخر هو عايز يطمئن ان رأيه هو رأي الجميــــــــع.....إجماااااااااااااااع
و يا ويلك لو كنت ممن يتشبثوا برأيهم....انســـــــــــــــى
كنت دائما مؤمنا بمبدأ (النظام) في التعاملات...كضرورة احترام الدور في الطابور (اي طابور)....و ان تحصل على خدمتك في وقتها...و ان من حضر قبلك للحصول على خدمة ما لابد ان يحصل عليها قبلك...اما من حضر بعدك فلا تنازل في ان تحصل على خدمتك قبله.
و لكن...أه.....أه من الواسطة و سنينها....تبقى واقف منتظر دورك زي اي حد محترم في اية دولة محترمة لتفاجأ بمن يقرر ضرب عرض الحائط بكل الوقوف (مش ماليين عينه)...و جايب واسطة للموظف المختص لكي يحصل على حق ليس حقه.
او يقرر في ظاهرة مصرية أصيلة (ابتكار) طابور موازي للطابور الأصلي يكون هو متصدره بالتأكيد!!!
و اذا احتجيت على هذا الوضع ...ستفاجأ بمن يتهمك انك (محبكها) حبتين...(مفيهاش حاجة لما نريح بعضينا...و كلنا هنمشي...!!!!!!!!)
كنت قبل كدة بأحرق في دمي و أعصابي...و لكن عندما قررت التخلي عن مبدأ (النظام) الحياة بقت اسهل و ألطف بكتير....بقيت و انا رايح انجز اية مصلحة اما اصطحب معي (واسطتي) او (قدرتي على التناحة في ابتكار طابور موازي للطابور الواقف)!!!!
كان من ضمن مبادئي برضة اللي الزمن اجبرني على الإقلاع عنها (و لو جزئيا) مبدأ (الذوق).....كنت اهتم قوي بالذوقيات....الذوق شيء اساسي من سمات الشخصية المحترمة
يعني لو كنت في مكان عام و انا(جالس) ووجدت أنسة او سيدة (واقفة) و مفيش مكان للجلوس...كنت لازم اقوم (أفز) من مكاني علشان هي تقعد.
و لكن يوم عن يوم اكتشفت ان انا الوحيد اللي بيعمل كدة....و كله (في وضع زي دة) بيرسم على وشه (التناحة) و كأنه مش واخد باله....و بيبقى منظري (كوميدي) جدا و كأني عملت حاجة عجيبة و غريبة.
و بتلاقي الناس بتنظر اليك نظرات تحتار في تفسيرها...هل هي اندهاش...؟!! ام استهجان و استنكار لتصرفك....؟!! ام سخرية منك بإعتبارك لسة مش فاهم الدنيا صح؟!!...ام نظرة شك في نواياك بإعتبار انك قمت من مكانك لغرض خبيث في نفسك خاصة لو اللي انت قمت من مكانك علشان هي تقعد كانت (مزة) مثلا....؟!!!
فقررت الا اشذ عن قاعدة (التناحة) و (قلة الذوق) و ارسم الوش (التنح) و ابطل اعمل نفسي الواد (ابن الناس) في مجتمع مش كذلك!!!
مؤمن برضة (و مازلت) الحمد لله ان (كرامة) الإنسان هي اعز ما يملك...لا فلوس و لا جاه و لا نفوذ و لا وظيفة و لا اي حاجة تعادل الكرامة اذا اهينت.
بس اكتشفت ان في الزمن دة ممكن جدا ان تدفع حياتك ثمنا لكرامتك...ثمنا لأن تعامل معاملة محترمة و تليق بك كبني أدم....و عادي جدا ممكن جدا بعدها يطلع بيان يثبتوا فيه بكل اريحية و برودة اعصاب ان انت مجرم و سوابق و تاجر مخدرات و متحرش و نشال كمان لو عايزين!!!
انا عن نفسي سأظل مؤمنا بهذا المبدأ (بالتحديد) لإني لو كفرت بفكرة ان (كرامة الإنسان هي أعز ما يملك) يبقى لازم أموت
تنازل عن اي مبدأ تؤمن به...........علشان تعرف تعيش...و لكن حذاري ان تتنازل عن كرامتك....الا الكرامة

18 comments:

  1. اول ما خلصت جيشي كنت لازم كل شوية اروح التل الكبير عشان اخد الشهادة بقى وطبعا الصول كان عايز الحلاوة وكان عامل فردة علينا يا الدفع يا التاخير ..وقلت له بالفم المليان ادفع الفلوس في المواصلات من القاهرة للتل ولا تاخدشي رشوة..وكان مشجعني زميلي على كدة وكنا نروح ونسافر سوا ونرجع وبعد خمس ست مرات تأكد انه مفيش امل وادانا الشهادة...وتلف الايام وارجع الاقي زميلي اللي كان حنبلى اوووي بقى ممشي شغله بالفلوس بعد ما أشتغل اعمال حرة رشاوي للجنة المشتريات رشاوي للجنة الفنية رشاوي للجنة البت .للساعى للموظف ألخ وقال لو عملنا زي زمان يا ابني مش ح اعرف ااكل العيال ...

    ReplyDelete
  2. نسيت مبداء النضافه
    انك لازم ما توسخش الشارع ولو معاك ورقه ولا بتاكل حاجه وخلصت
    لازم ترميها فى السله
    لانه ما ينفعش توسخ الشارع

    اظن الى يعمل كده ممكن يضرب من الناس

    ReplyDelete
  3. مبدأ مين يا دكتور ؟؟؟

    فكرتنى بفيلم البيضة والحجر لما كانوا بيحققوا مع احمد زكى ( وقد اعترف أمامنا بأنهصاحب مبدأ ) فاكر المشهد ده ؟؟؟

    خلاص معادش فيه حاجة اسمها مبدأ وصاحب مبدأ لأنالمبدأ العام الشرعىدلوقتى هو : اللى تغلب به العب به

    تحياتى

    ReplyDelete
  4. كان زمان وجبرنا خلاص

    ReplyDelete
  5. كل عام وانت بخير
    اعاد الله عليك رمضان بالخير واليمن والبركات وعلى كل المسلمين وكل المصريين

    ReplyDelete
  6. اعتقد ان الحياة في ظل المباديء محتاجه اتفاق الكل عليها بصورة جماعيه و لو مبدا مبدا نطبقه في ظل حكومه عندها مبدا بالضرورة حتي يقتنع الناس و يستمر الاصلاح
    اما بصورة فرديه فلا اظن انه سبيل حقيقي للاصلاح

    ReplyDelete
  7. مبدأ مين والناس نيمين .. كل مبدأ وانت طيب

    حمدلله على السلامة انا بصراحة فرحان عشان انك فهمت الحقيقة لانه فعلا الناس في مصر مينفعش معها مبدأ ولا النظام في مصر مينفعش معه مبدأ


    لان الناس او الجمهور او الشعب اصلا معترض على مبدئية المبدأ ذاته فكيف لك ان تخلق نظام سياسي له مبدأ محترم

    ReplyDelete
  8. tarkieb:
    الزمن بيغير
    و اكل العيش مر
    الراجل جرب المبادىء لقى نفسه هيفضل محلك سر
    قرر يمشي حاله

    ReplyDelete
  9. nody:
    اللي بعمل كدة مش هيعرف يعيش من التريقة اللي هياخدها

    ReplyDelete
  10. foxology:
    اه طبعا فاكر المشهد
    واضح ان احنا كلنا هنبقى احمد زكي و نلعب بالبيضة و الحجر بس من غير مبدأ

    ReplyDelete
  11. قلب فارس:
    ربنا يعيننا جميعا

    ReplyDelete
  12. dr.lecter:
    يعني خلاااااص
    مفيش فايدة؟

    ReplyDelete
  13. لورنس العرب:
    حاضر يافندم

    ReplyDelete
  14. فشكووول:
    الله اكرم
    كل عام و انت بكل صحة و سعادة ان شاء الله

    ReplyDelete
  15. ذو النون المصري:
    حكومة عندها مبدأ..؟؟
    بس دة طلب مستحيل

    ReplyDelete
  16. فارس عبد الفتاح:
    فعلا و الله انت جبت الخلاصة
    "مبدأ مين و الناس نايمين"
    صدقت و الله

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails