Thursday, 29 July 2010

بعد السابعة


الأقتراح الذي تقوم حكومتنا (الرشيدة) بدراسته و الخاص بإغلاق المحال التجارية في السابعة مساء كل يوم هو ما يمكن ان تطلق عليه 
انه اقتراح (في ظاهره الرحمة....و باطنه العذاب).
لاشك ان الهدف نبيل و عظيم و هو ترشيد استهلاك الكهرباء و خفض الأحمال و بالتالي الحفاظ على الطاقة الكهربائية و عدم اهدارها و توفير ملايين الجنيهات التي تضيع هدرا في الإضاءة المبهرة.....الخ.
كلام جميل و كلام معقول ماقدرش اقول حاجة عنه.......!!!!!
و لكن بفرض انه تم تطبيق هذا الإقتراح و تقرر غلق جميع المحال التجارية في السابعة مساء كل يوم (يستثنى طبعا من هذا القرار الصيدليات و المخابز و محلات المواد الغذائية و السلع التموينية)
دعونا نتخيل انه تم تطبيق هذا الإقتراح فعلا و تم تحويله الى قرار حكومي رسمي....
من يعوض اصحاب المحال التجارية و لتكن محلات الملابس الجاهزة مثلا عن الفاقد في الربح نظير تقليص ساعات العمل....بمعنى من المسئول عن تعويض اصحاب هذه المحلات عن عائد بيع الفترة من السابعة مساءا و حتى منتصف الليل (موعد اغلاقها حاليا)؟؟
و من يعوض العاملين في الفترة المسائية بهذه المحلات عن وظائفهم التي من المؤكد انهم سيفتقدونها اذا تم تطبيق هذا القرار....فلو افترضنا ان العامل او العاملة يتقاضى 300 جنيه نظير عمله من العاشرة صباحا و حتى الحادية عشر مساءا...فمن يعوضه عن تقليص مرتبه (الضئيل اصلا) نظير تقلص عدد ساعات عمله؟!!
ثم متى يتسوق الناس اذا تم تطبيق هذا القرار فعلا....؟؟
عدد كبير من العاملين بالشركات الخاصة و المصانع ينتهي عملهم اليومي عند الخامسة مساءا.....و بالتالي فهم مطالبون (في حالة تطبيق هذا القرار) على ان يتوجهوا (ركضا) من اعمالهم بإرهاقهم و تعبهم و رغبتهم في النوم الى المحلات التجارية و المولات للتسوق قبل ان تغلق ابوابها في السابعة مساءا.
مصر دولة سياحية....عدد كبير من ابناء هذا الشعب يعتمد في المقام الأول على السياحة كمصدر للرزق...هناك ايضا مهن كثيرة ترتبط بالسياحة و التسوق بشكل غير مباشر...كل هذا العدد سيتأثر تأثرا مباشرا بهذا القرار في حالة تطبيقه
ثم ان من اهم ما يميز مصر و يجعلها متفردة بين الدول المجاورة هو جو السهر و الليالي الصيفية...يكفي ان تسمع من اكثر من عربي في اكثر من دولة مقولة ان اهم ما يميز مصر هو سهرها الدائم...فأنت تستطيع الخروج و التنزه و الجلوس على المقاهي في اي وقت و هو ما لا يتوافر لهم في بلادهم...و هو ما يجعلها دولة (مفضلة) سياحيا لدى عدد كبير منهم...بتطبيق هذا القرار بغلق المحال و المتنزهات و المقاهي في السابعة مساءا تفقد مدينة مثل القاهرة احد اهم مميزاتها المتفردة بها بين المدن السياحية المختلفة.
اذن....ففي اعتقادي الخاص ان تطبيق قرار مثل هذا سيوفر الكثير من الطاقة الكهربائية و ملايين الجنيهات المرتبطة بها الا انه سيهدر الكثير من فرص العمل و ايضا التدفق السياحي و ما يدره من ملايين الجنيهات بالإضافة الى تقليص الأرباح المادية لعدد كبير جدا من المحال التجارية و المقاهي مما سيجعل اصحابها عاجزين عن سداد نفقاتهم من ايجار (في تصاعد مستمر) و كهرباء و مرتبات و خلافه..مما قد يؤدي بعدد كبير جدا من هذه المحال التجارية الى غلق ابوابها تماما و ليس قبل السابعة مساءا (بعد الإفلاس)...!!!
قرار يحتاج دراسة متأنية من جميع الزوايا...يحتاج لحساب دقيق للمزايا و الفوائد التي سيدرها هذا القرار و ايضا الخسائر المحتملة لهذا القرار (وما أفدحها) من وجهة نظري
ثم اليس من الأولى تطبيق هذا القرار على ملاهي (شارع الهرم) اذا كان حتما و لابد سيتم تطبيقه....؟!!!!
------------------------
دة كان رأيي الشخصي......و اليكم اراء عدد من اعضاء صفحة الأغلبية الصامتة على فيسبوك:
(لا و النبي......دة انا الحياة بتبتدي عندي بعد الساعة 7)
(دي اجمل حاجة في مصر انها مابتنمش...انا بيتهيأ لينسبة الإكتئاب هتزيد في الشعب لو حصل الكلام دة)
(ضد طبعا.....لإن لو عملوا كدة يبقى الدور علينا ننام بقى من الساعة 7)
(حراااااام و اللهي)
(ايه دة.....هي الناس ناقصة خراب...و اللهي حراااااااااام)
(مع طبعا......بصراحة الحياة في مصر منفلتة جدا....و مفيش حد بيشتغل....الصح المحلات تقفل و الناس تشتغل بجد زي بقية خلق الله...و فيه يومين اجازة...اللي عايز يشتري حاجة يتفضل و اللي عايز ينزل قبل الساعة 8 ينزل)

20 comments:

  1. بعد السلام والتحية .
    الشعب غلطان
    وعلي ما سمعت
    طب الأولي الكباريهات والقذراة دي تتقفل
    ثانيا طب ما يزودوا الطاقة لتزويد الكهربا
    أنا عمر ما سمعت ان فيه دولة محترمة تقطع عن شعبها الكهربا عشان توفر

    ReplyDelete
  2. مجرد طرح مقترح زى ده
    دليل قاطع على غباء حكومه
    لو على التوفير
    يدوروا على المليارات الى بتدفع فى مسلسلات رمضان
    ولا الدعايه الاعلانيه الى بتتكلف ملاين وبتبقى فاشله كالعاده
    ده ياعنى لو عاوزين يوفروا
    انما دول عاوزين ينموا الشعب من المغرب زى الفراخ
    مستكترين على الناس انها تسهر
    وتخرج باليل تشترى حاجاتها وتشم هوا
    ممكن يكون ده بيزعج سيادتهم
    انما توفير مااعتقدش

    ReplyDelete
  3. هو الصح أن اللي المفروض يتم غلقه بعد السابعه مساءا الورش
    ورش السيارات وورش النجاره وغيرها
    وأي ورشه لازم تقفل بعد 7 ومعاها محلات قطع غيار السيارات
    وده مش بسبب الكهرباء طبعا ولكن لدواعي انسانيه بحته
    انا بشوف بعيني في بع المناطق النجار شغال بمنشار الكهرباء بيقطع الخشب الساعه 11 باليل
    طيب الناس تنام ازاي؟
    وكمان الميكانيكيه بيكونوا شغالين للساعه 1 باليل وقارفين الناس في عيشتهم
    اما محلات الاكل والسوبر ماركت فدي لازم تشتغل باليل ومش هاينفع تقفل
    هو التفكير في حد ذاته مظبوط لكن محتاج شويه تركيز لنه مش هاينفع يتم تطبيقه على كل حاجه

    ReplyDelete
  4. عيد ميلاد سعيد
    يا أغلبية
    يا مش صامتة

    ░٭◙☆♪◎٭☺٭◎♫★◊٭░

    كل سنة و انتا طيب
    و بألف خير
    و محقق احلامك
    و ربنا يكرمك بكرمه
    و بحب الناس اكتر
    و تبقى وسطنا
    و منورنا دايما
    وعقبال كل سنة
    لما نيجى نقولك
    ازاى انت شخص جميل يا أحمد


    تحياتى ليك
    و خالص ودى

    ReplyDelete
  5. يا باشا حكومتنا اللي عاوزاه بتنفذه اما بقي مصلحتي ومصلحتك ومصلحة الناس الغلابه فدي مش في دماغها

    تحياتي

    ReplyDelete
  6. الحكومة اصلا مسطولة وبتاخد قرارات محشيشين
    هو فيه قرار اصلا سليم بتاخده حكومتنا المصونة
    يطفوا الانوار فى الشوارع اللى شغالةطول النهار الاول قبل ما يقطعوا رزق الناس وعيشهم

    ReplyDelete
  7. اعتقد انه من الأولى انهم يوسعوا رقعة الشبكة الكهربائية وبدل ما نصدرها للناس اللى بيشتمونا احنا اولى بيها ولا ايه ؟؟؟؟؟؟

    تحياتى

    ReplyDelete
  8. هما بصراحة موفقين فى اختيار كل الحلول الى ممكن تعكنن علي الناس

    كل واحد يفكرله فكيره
    يطرشها فى وشنا وننزل احنا نغطس ونعوم في بلاويها ونتخيل كم الهم والقرف الى هايحصل فينا
    بدليل ان عواميد كوبري اكتوبر فى النهار كلها منورة
    والنهاردة بيفكر وزير الكهرباء فى إلغاء الدعم عن الكهربا
    يعني مصانع الأسمنت والحديد والسيراميك والسجاد مدعومين بالطاقة والكهرباء والبيوت تتشوي فى نار جهنم
    والشوارع نورها يطفي بالليل لكن بالنهار لا
    ناس تجنن الحقيقة

    ReplyDelete
  9. تسلم عالبوست

    ويارب نفوق كلنا من الغيبوبة اللى احنا فيها

    ReplyDelete
  10. يطفو نور الشوارع اللي منور الصبح ومطفى بالليل بدل الحكم العسكري ده...هي ناقصة كمان التنكيد على الناس....

    ReplyDelete
  11. Mr.President:
    ماهو دة الجديد اللي مصر بتتفرد بيه على مستوى العالم

    ReplyDelete
  12. nody:
    هم لو يطولوا ينيموا الشعب من الظهر مش من المغرب مش هيتأخروا
    حد يطول يحكم شعب نايمعلى طول الخط كدة...؟!!!

    ReplyDelete
  13. لورنس العرب:
    اصلا فكرة وجود ورش في مناطق سكنية فكرة لا توجد الا في المحروسة
    كل شيء يختلط ببعضه المساكن مع المصانع مع الورش مع......
    كل حاجة سلطة

    ReplyDelete
  14. فاتيما:
    و انتي بألف خير و صحة و سلامة يا ام يوسف
    تحياتي و احتراماتي

    ReplyDelete
  15. rack-yourminds:
    و الحال دة هيفضل كدة كتير...؟!!!

    ReplyDelete
  16. احاسيس ايوشة:
    طالما مفيش حد بيحاسب الحكومة و لا يقوم تصرفاتها و قراراتها
    يبقى تعمل اللي هي عايزاه فينا

    ReplyDelete
  17. foxology:
    من وجهة النظر الحكومية
    ان دول بيستخدموا الكهرباء بفلوسهم
    انما احنا بلووووشي
    و اللي معاه قرش يسوى قرش طبعا

    ReplyDelete
  18. Monzer:
    طالما مفيش حد بيحاسب حد
    يبقى من حق اي حد يعمل اي حاجة

    ReplyDelete
  19. Sun Of Freedom:
    الف شكر على الكلام الجامد دة
    منور

    ReplyDelete
  20. Tarkieb:
    التنكيد على الناس دة فــــــــــــــن

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails