Friday, 9 July 2010

خلوا بالكم من اكونتاتكم


ليس بالضرورة ان نحزن لفقدان الأشياء القيمة او الثمينة (ماديا) فقط....هناك الكثير من الأشياء الغير قيمة (ماديا) و لكنها تساوي الكثير جدا لدى اصحابها.
ربما تمتلك شيئا ما في نظرك لا يقدر بثمن الا انه قد يكون عديم القيمة و الفائدة لدى أخرين...بل و يصابوا بالدهشة و الإستغراب التام عندما يرونك حزينا و مهموما بل و تكاد ان تموت كمدا اذا فقدت هذا الشيء القيم بالنسبة لك و العديم القيمة بالنسبة لهم.
هذا ما حدث معي بالضبط و مازال يحدث معي بداية من مساء يوم الخميس 27 مايو 2010 و حتى كتابة هذه السطور و ربما لفترة طويلة قادمة لا يعلم مداها الا الله .
القصة و ما فيها اني فجأة (اتنشلت)....مش بس كدة...دة انا اتمسح اسمي ووجودي بأستيكة....فجأة و بدون سابق انذار او موعد تم الغاء (الأكونت) بتاعي من على الفيسبوك....او بمعنى أخر تم تعليق عضويتي في الفيسبوك.
كدة....فجأة....تلاقي نفسك مش موجود....شخص ما قرر ان يلغيني....صدمــــــــــــة طبعا.....لو كنت احد اصدقائي على (الفيسبوك) وبحثت عني ضمن قائمة الأصدقاء فلن تجد لي أثرا.
و لو قرر حدهم ان يضيفني لقائمة اصدقائه و بحث عني في الفيسبوك فلن يجد لإسمي اثرا او وجودا.
من الأخر ...ادارة (الفيسبوك) قررت ان تمحو اسم (احمد سمير المسلمي) من الوجود تماما.
اللي يجنن بقى هو السؤال....ليــــــــــــــــــــــــــــــــــــه؟
ايه اللي انا عملته يعتبر بمثابة جريمة نكراء و شنعاء في نظر ادارة الموقع دة تستدعي حجبي و عزلي عن الناس؟!!!
و كل ما احاول ادخل على (الأكونت) بتاعي ..تظهر لي الرسالة دي:

Account Disabled

Your account has been disabled. If you have any questions or concerns, you can visit our FAQ page

و معناها انه تم حجب حسابك...اذا كان لديك اي اسئلة او استفسارات برجاء زيارة صفحة الأسئلة الشائعة

و طبعا ما كدبتش خبر و زرت صفحتهم و كلها من الأخر توضيح ان من اسباب حجب الأكونت (الكلام بشكل عام طبعا مش كل حالة على حدة) هو خرق اخلاقيات الفيسبوك كالحديث عن الدين او الجنس او اهانة شخص ما او تهديده او انتحال شخصية...الخ

و بالتأكيد لم افعل شيئا من الموبقات الموضحة اعلاه.

و الناس كتر خيرهم عاملين (اوبشن) لو انت معترض على الكلام دة و بتقول انك ماعملتش حاجة (زي حالاتي كدة) من حقك تملأ (ابليكيشن) و تحتج فيه على حجب الأكونت بتاعك.

طبعا عملت الإجراء دة معتقدا بل (موقنا) في قرارة نفسي ان الموضوع (غلطة) هتتصلح خلال ساعات...الا اني للأسف كنت واهما بل مغفلا.

اتاري الموضوع دة تكرر مع ناس كتيــــــــــر على مستوى العالم....و الناس دي عمالة تصوت و تولول و تعيط على اكونتاتها المحجوبة...اللي من أيام...و اللي من شهور...و اللي من سنة...و لا حياة لمن تنادي.

ادارة (الفيسبوك) قررت تعمل ودن من طين وودن من عجين و (تحلق) للناس المحجوبة دي كلها...و الناس عمالة تبعت في ايميلات و استغاثات و يستغيثوا في المنتديات و النتيجة....لا حياة لمن تنادي.

قلت اسوق عليهم الناس (حبايبي)....طلبت من الناس حبايبي و اصحابي و معارفي يبعتوا للفيسبوك يطالبوا برجوع (اكونتي) المحجوب المأسوف عليه...و يقولوا كلمتين حلوين في شخصي المتواضح يمكن قلب الخواجة (فيسبوك) يحن عليا و يقرر يرجع لي كياني و شخصيتي الفيسبوكية.

تفتكروا (الفيسبوك) رد عليهم بأيه........؟؟!!

رد برسالتين مش رسالة واحدة

الرسالة الأولى...و دي رسالة اوتوماتيكية بيتم الرد بها على اي رسالة استعطافية من النوع دة (زي الصواريخ و مضادات الصواريخ كدة..بالضبط)

الرسالة دي بتقول ان انا خرقت شروط الفيسبوك مع تعديد اسباب قفل الأكونتات (بشكل عام)....و ان دة قرار نهائي.

و بعدها بيومين تم ارسال الرسالة الثانية لهم و هي بإختصار رسالة من (الفيسبوك) لأصدقائي بأن (كل واحد يخليه في نفسه....و محدش له دعوة بحد)...أه و اللهي...ترجمتها كدة.

قلت بقى مابدهاش....و عملت اكونت جديد و بلاها الأكونت القديم...يرجع او مايرجعش...ما الناس اللي على الأكونت القديم لسة احياء يرزقون الحمد لله و هيتنقلوا على الأكونت الجديد...مفيش مشكلة.

و اذا كان الأكونت المحجوب شاف معايا كل الأحداث و المناسبات و الذكريات و الكومنتات و البوستات و البومات الصور و الفيديوهات....معلــــــــــــش...اللي عمل الأكونت القديم يعمل الجديد ان شاء الله....و معلـــــــــــش اللي بييجي في الريش...بقشيش.

الى ان ظهرت المفاجأة الكبرى......جروب الأغلبية الصامتة على الفيسبوك

بما اني مؤسس الجروب دة......و بما اني قد تم حجبي (و ليس الغائي) فلقد اصبح الجروب تماما مثل (البيت الوقف)....لا منه و لا كفاية شره...اصبح الجروب موجودا بلا مدير....فالمدير (اللي هو انا) محجوبا....و (الفيسبوك) قرر اعتباري (مؤسس) للجروب...زي سعد باشا زغلول بالنسبة للوفديين .

فالجروب اصبح بسبب (حجب) الأكونت بلا مدير يرسل الرسائل للأعضاء و ينظم الموضوعات التي يتم طرحها.....اصبح عبارة عن wall كل واحد يكتب عليه ما يشاء (و دة جميل في حد ذاته) الا ان اي نشاطات اخرى للمجموعة فهي متوقفة تماما.

و من جديد بدأت في مخاطبة (الفيسبوك) بخصوص ال group و برضة من جديد لا حياة لمن تنادي...طالبت بعودة الأكونت بتاعي بلا جدوى....طالبتهم بالغائه اساسا (لا حياة لمن تنادي)....طالبتهم بعودتي ك admin. للجروب و مفيش فايدة.

القصة (السخيفة) دي كلها بتطرح اسئلة كثيرة جدا بتدور في رأسي بلا اجابة محددة:

اولا: ال account بتاعي ليه تم حجبه؟!!! على الرغم اني لم اخالف قواعد او تعليمات الفيسبوك اطلاقا.....؟!!!

ثانيا: لماذا تم حجب ال account بدون اي تحذير مسبق من ادارة ال facebook على الرغم من ادعاءهم انه لا يتم حجب اي اكونت بدون تحذير مسبق بعدم تكرار المخالفة و اذا تم تكرارها يتم حجب الأكونت و هو ما لم يحدث معي؟

ثالثا: هل لما اكتبه هنا في "الأغلبية الصامتة" و بالتالي في ال group الخاص بها على الفيسبوك علاقة بحجب ال account؟!!!

و اذا كانت الإجابة ب (نعم)...يبقى في سؤال مهم جدا لابد من طرحه...

من يتحكم في ال facebook؟؟!!!

رابعا: لماذا يتعامل ال facebook مع اعضائه او عملائه بهذه الدرجة من الامبالاة المتناهية و كل هذا الصلف و الغرور...؟؟!! على الرغم من ان ادارته (اجنبية) الا انها ربما قد اعجبتها طريقة تعامل الحكومات العربية مع شعوبها فقررت ان تحذو حذوها...؟!!!

خامسا: رغم انشائي ل new account الا انه يبقى الأكونت القديم مليء بالذكريات الجميلة و اللحظات التاريخية (بالنسبة لي طبعا) و هو ما لا يمكن تعويضه بأي حال من الأحوال يا بتوع الفيسبوك....بس السؤال هم (علقوه) و لا (الغوه)....؟ّ!!!

و طبعا محدش يقول لي اسألهم علشان محدش هيرد عليا اساسا.

عموما:

اتمنى ان يعود لي ال account بتاعي في اسرع وقت ممكن....حتى تعود لي ال group حتى استطيع ان اتواصل مع الأغلبية الصامتة على صفحات الفيسبوك.

و الى ان يعود ال account القديم او لا يعود.....

دة الأكونت الجديد على الفيسبوك....لإضافتي انقر هنا

و الى ان يعود ال group الخاص بالأغلبية الصامتة.....ابتكرت صفحة خاصة بالجروب على الفيسبوك.....للدخول للصفحة انقر هنا

و في النهاية تبقى نصيحة غالية لازم اقولها لكم

خدوا بالكم من اكونتاتكم

20 comments:

  1. يعنى هما قالوا لهم كل واحد فى حاله
    يانهار ابيض
    هو الفيس بوك عنده قانون طوارىء هو كمان
    موافقة حضرتك جدا ان الاكونت قيمة غالية
    لانى بمجرد ماشفت العنوان خفت
    لكن المشكلة ان زى ماحضرتك قلت مافيش سبب محدد
    يعنى احنا وحظنا
    او مطلوب مننا نهيس وبس
    وحتى مانرحمش نفسنا بكلمتين بدل مانعلق نفسنا على الكبارى
    شكرا جزيلا على النصيحة

    ReplyDelete
  2. للاسف اللى حصل مع حضرتك حصل مع ناس كتير الفتره اللى فاتت
    من غير ما ترتكب اى اخطاء
    و بصراحه حاجه غريبه جدا

    ReplyDelete
  3. حصل معايا الموضوه ده من سنتين اول بعد ماعملت الاكونت بفترة ... وبعتلهم رسايل برضه بس رجعوه تانى بعد ما كنت عملت اكونت جديد

    بس اكيد الاكونت القديم يحلى
    :)

    ReplyDelete
  4. ربنا يعوضك خير
    ماتزعلش كله بيطلع في الغسيل
    بجد فعلا فيه حاجات معنوية بتدايق
    خالص تحياتي
    موجة

    ReplyDelete
  5. ولله هي حاجه تخنق وتضايق
    بس الفيس بوك ده بصراحه انا عمري ما حبيته وبالنسبة لي خنيق جدا جدا مش عارف ليه
    المدونه أفضل منه بكتير
    سيبك من الفيس بوك وخليك هنا يا دكتور ده هنا الاصل

    ReplyDelete
  6. علشان كده انت مابقيتش عندي؟

    عامه الحمد لله وكويس اني عرفت قدر الله وماشاء فعل

    ReplyDelete
  7. انا صار مع صديق مغربي لي هالشئ وماعرفنا السبب
    بس عارف اخي يمكن تكون كتبت شئ سياسي وما انتبهت
    او اى شئ وبالمناسبة امريكا بتراقب المواقع دي كويس متظنش اننا مش تحت رقابه هناك
    كل شئ بيتراقب الفيس بوك شبكة اجتماعية مخترعه مش عشان سواد عنينا عشان يعرفوا بنقول ايه وبنفكر ازاي

    ReplyDelete
  8. اول مرة اسمع عن الموضوع ده

    بس شكل حد عمل فيك زنبه
    يعنى اداك اسفين

    معرفش بلغة الشباب دلوقتى تتقال ازاى

    لكن اكيد انت فاهم معنى كلامى

    على العموم شكرا للنصيحة
    ومانجيلكش فى حاجة وحشة

    ReplyDelete
  9. بلال...قلب فارس:
    لا شكر على واجب
    لا اراكم الله مكروها في اكونت لديكم

    ReplyDelete
  10. حفيدة عرابي:
    الفيسبوك تقريبا سمع نصيحة من حد ازاي يعامل العرب
    تقريبا بيعاملهم بقانون الطوارىء فعلا زي ما انتي قلتي
    تحياتي

    ReplyDelete
  11. dalia:
    فعلا يا داليا
    الظاهرة دي انتشرت بشكل واسع
    انا كنت من فترة بأسمع عن اختفاء اكونتات او جروبات بس ماكنتش بأخذ بالي الحقيقة لحد ما حصل لي انا شخصيا كدة

    ReplyDelete
  12. بنت و ولد:
    تقريبا هناك اياد خفية وراء هذا الموضوع

    ReplyDelete
  13. رحيل:
    طبعا الأكونت القديم يحلى
    بس انتي كان حظك حلو....انهم رجعوا لك الأكونت بعد فترة
    تقريبا بالنسبة لي دة مش هيحصل
    تحياتي

    ReplyDelete
  14. موجة:
    و أي ضيق
    ربنا ما يوريكي

    ReplyDelete
  15. لورنس العرب:
    كلامك سليم
    المدونة هي الأساس طبعا
    بس الفيسبوك بالنسبة لي بيخدم على المدونة
    بأعتبره وسيلة لتحقيق الإنتشار للمدونة
    بس تخيل ان فعلا الفيسبوك دة في كتير زيك كدة مالهمش فيه على الإطلاق....مابيحبهوش كدة لله في لله
    تحياتي

    ReplyDelete
  16. dr.lecter;
    و تلاقيك ظلمتني و قلت اني عملتلك حذف
    ضيفني تاني بقى

    ReplyDelete
  17. الغاردينيا:
    ربما تحليلك يكون اقرب الى الصواب فعلا
    تحياتي

    ReplyDelete
  18. عابرةالسبيل:
    فعلا
    انا حاسس ان دة فعلا اللي حصل
    انتي عارفة....ولاد الحلال كتيـــــــــــــر

    ReplyDelete
  19. نفس الشيء حصل معايا بالظبط
    بصراحة ادارة الفيسبوك بتتعامل مع العرب بصفة خاصة على انهم مواطنين درجة تالتة
    وعلى فكرة من اللي ببشوفوه من كمية الشكاوى اللي بتجيلهم من البنات الاجانب من شوية الرعاع العرب اللي هاريينهم ريكوستات ورسايل
    برضه ده مش من فراغ
    احنا فينا كمية زبالة فظيعة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails