Wednesday, 30 June 2010

حدث في الأزهر بارك



المكان: الأزهر بارك....طريق صلاح سالم- القاهرة
الزمان: أحد الأيام الصيفية الحارة
الأبطال: عائلات مصرية متوسطة الدخل
المكان اللي العيال دي (بتبلبط) فيه مش حمام سباحة و لا (مغطس).....دي مجرد (بركة) ماء وسط الأزهر بارك لتجميل المكان.....!!!
اللي صمم الأزهر بارك لم يكن ليتخيل ان يتم استخدام هذه البركة كحمام سباحة على الإطلاق.......!!!!
الصورة دي جواها معاني و دروس كتير قوي......بتستخلص منها الكثير جدا حول اسباب ما نحن فيه كشعب و مستقبل هذه البلد.......
كل دة في الصورة دي.......؟!!!!!
و اكتر من كدة كمان
المنظر اللي في الصورة دي مثال حي وواضح تماما للفوضى اللي بيعيش فيها المصريون.......(بركة) ماء مصممة لتعطي شكل جمالي فقط لا غير تم تحويلها لحمام سباحة عنوة...(غصبا و اقتدارا)...بغض النظر عن مدى نظافة هذه المياه و هل هي صالحة للإستحمام ام لا...و هل من الممكن ان تكون ناقلة للأمراض ام لا.....الخ
كل دة مش مهم و لم يخطر ببال اي فرد في هذه الصورة.
و دة بيجرنا الى جزئية ضعف الوعي لدى المصريين بشكل عام (شريحة كبيرة) منهم على الأقل....الوعي الصحي بإعتبار ان هذه المياه قد تكون راكدة و ناقلة للأمراض الجلدية المعدية.
ضعف الوعي (الجمالي) على إعتبار ان هذا المنظر قد شوه المنظر الجمالي العام للحديقة بشكل فج و بشع.
ضعف الوعي (الثقافي) بإعتبارهم غير قادرين على التفرقة بين (بركة) مياه و (بركة) سباحة.....!!!!
على أساس ان (اي شوية مية......ممكن جدا يعملوا حمام سباحة)!!!!!!!!!!!
اساتذة نحن المصريون في اتلاف و هدم ما بنيناه و ما نفتخر به.....حدث هذا مع (مترو الأنفاق) الذي اصبح شاهدا على سوء الإستعمال و الإهمال و يحدث حاليا في اكثر من مكان كان شاهدا على الروعة و الجمال و الإبداع فأصبح شاهدا على الفوضى و القذارة و من بينها (الأزهر بارك).
اين المسئولون عن هذه الحديقة ....اين افراد الأمن من هذا المشهد؟!!!
كيف تم السكوت على هذا المشهد المؤسف و المسيء.....؟!!!
و لنفترض جدلا ان هذه (البركة) هي فعلا (حمام سباحة)....فهل يجوز نزول حمام السباحة بالملابس الداخلية....؟؟!!!
ملاااااااااااااابس داخلية....؟!!!
و العيال دي هتروح بيوتها ازاي؟
هيروحوا بيوتهم غرقانين مية كدة.....و لا هينشفوهم في الشمس قبل ما يروحوهم....؟؟؟
صورة في غاية الإستفزاز...........!!!
شعب بالعقلية دي و التصرفات دي (رغم انها تبدو تافهة) هل هو قادر على تغيير واقعه الى الأفضل....؟؟!!
شعب بيتصرف بالشكل دة هل فعلا يستحق ما هو فيه من ذل و هوان و مهانة و قهر.....؟؟!!
الصورة دي عندما تم نشرها على (الفيسبوك) اتهم صاحبها بالإساءة لسمعة مصر.....هذه التهمة (الموضة) التي بات كل من ينتقد شيئا او يهاجم واقعة فساد ما متهما بها دائما!!!
من يشوه سمعة مصر أكثر....هؤلاء الأشخاص اللي في الصورة بسلوكهم الهمجي الخالي من اللياقة و النظام و النظافة....؟!! ام من ينشر صورة كهذه ليوضح و يبين ما نحن عليه من سلوكيات متدنية كفيلة بتدمير اي أمة لا النهوض بها
الصورة دي مش متصورة في الريف...و لا في الأقاليم حيث سكانها (الفلاحين)....طبقا لرأي عدد لا بأس به من سكان القاهرة (المودرن)...و إنما في قلب القاهرة و في أحد معالمها السياحية الحديثة...!!!
صورة فيها الكثير و الكثير..............
*الصورة مقتبسة من جروب (بس يا سيدي...و قامت معيطة) على فيسبوك.

31 comments:

  1. سيد أحمد الصورة رغم أنها مؤلمة
    لكن دول عقول بشرية هتلاقيها اتربت في عشوائيات
    وانا طبعا مش هقولك ان ملهومش ذنب هما وأهليهم
    بس النظام الفاسد يتحمل قدر كبير من المسؤلية
    بسبب العشوائية اللي بقت تخبط في البلد
    والشعب كله في الضياع
    فيه المغييبين وفيه اليائسين وفيه المنتفعين
    ونقول حسبي الله ونعم الوكيل في كل من كان سبب
    وبالمرة النهاردة يوم القصيدة دي في المدونات
    ابعتها رسالة للي ماسك كرسي
    قصدية الفاجومي

    شيد قصورك ع المزارع

    من كدنا وعمل إيدينا

    الخمارات جنب المصانع

    والسجن مطرح الجنينة

    واطلق كلابك

    في الشوارع

    واقفل زنازينك

    علينا

    وقلّ نومنا في المضاجع

    أدي احنا

    نمنا ما اشتهينا

    واتقل علينا بالمواجع

    احنا اتوجعنا

    واكتفينا

    وعرفنا

    مين سبب جراحنا

    وعرفنا روحنا

    والتقينا

    عمال وفلاحين

    وطلبة

    دقت ساعتنا

    وابتدينا

    نسلك طريق

    مالهش راجع

    والنصر قريب من عنينا

    النصر أقرب

    من إدينا

    وان شاء الله يا سيد احمد هيتغير بفضل ناس محترمة
    ومصر هتتغير وعلي العموم في الحلو وفيه الوحش زي ما فيه اللي بيستحما في بركة أو نافورة واللي مستحمل الحر بس ما ينزلش بهدومة

    ReplyDelete
  2. صح طول ما في ناس مؤمنين بالتغير كل حاجة هتتغير بس بعد تعب بس اية يعني والله بجد بلدنا تستاهل نتعب عشاناها

    ReplyDelete
  3. مش ممكن ع المنظر بجد

    مش كل المصريين همج

    بس فيه فئه بجد عايزه يتولع فيها

    الازهر بارك اعتقد فيها امن كتير

    انا رحت مثلا مرتين , ف المرتين دول الامن قرفونا فعلا وكان ممنوع الجلوس عند النافورات والتصوير و و و و

    يعنى الامن شايف شغله اهوه , بس المفروض اننا نبقى متقبلين الكلام للمحافظه ع المنظر الجمالى العام

    دول ناس خلقوا ليعترضوا , يعترضوا على اى شكل جميل
    متعتهم بتكمن فى افساد كل جميل

    ربنا يرحمنا بجد

    :(

    ReplyDelete
  4. يادى الارف
    وقاعدين نعيط ونقول المسؤلين بيعملوا .. طيب ما الشعب اقذر من المسئولين بشوية الناس النضيفة بتهرب بره البلد بجلدها

    ReplyDelete
  5. والله أنا شخصيا شايف إن ده كارثة بس مش من نفس الناحية اللى إنت بصيت منها

    الكارثة فى رأيى إن يبقى فيه ناس مش لاقيه للدرجة دى
    ناس مامعهومش فلوس يشتركوا فى نادى فيه بيسين
    ناس مامعهومش فلوس يشتروا فيللا ويبنوا فيها حمام سباحه
    ناس مامعهومش فلوس يروحوا يصيفوا ويبلبطوا فى البحر بدل البركة دى
    ناس حتى مامعهومش فلوس يشتروا بانيو
    وإن كان معاهم يشتروه فالحمام بتاعهم ضيق لدرجة إن البانيو مالوش مكان
    ناس أول مالقت مساحة ميه ولو بركة زى دى وللا حتى نافورة قلعت هدومها ونزلت تبلبط !

    مابقولش إن الناس دى صح
    لكن اللوم الحقيقى مش عليهم

    ناس حتى ما

    ReplyDelete
  6. لأ لأ الا الازهر بارك
    يانااااس دا المكان اللي بحبه وبلاقي فيه مهرب من خنقة القاهرة حيث الهواء النقي والخضرة الرائعة
    توصل للمستوى ده
    لأ لأ يامصرييين
    الا الازهر بارك

    ReplyDelete
  7. عندنا في مدخل المعادي الثاني على الكورنيش فيه نافور وجنينه كبيره
    العيال على طول بتنزل في النافوره في الصيف
    بشوفهم وانا معدي دائما

    ReplyDelete
  8. وبعدين يا أخي سيب العيال تعوم
    العيال نفسها تبلبط في أي مكان



    يا دكتور
    احنا عندنا مشكله كبيره
    فيه نقص ثقافه ونقص تعليم عند الكل
    وده مودينا في 100 داهيه
    نحن نعاني من امية الحياه

    ReplyDelete
  9. شوف متحف شامبليون بقه عامل ازاي جنبه غرزه وزباله

    ReplyDelete
  10. مشكلتنا برضه مش مشكلة الحكومة مش هنا اللي عملوا فينا كده
    لا حول ولا قوة إلا بالله

    ReplyDelete
  11. هدوا أعصابكم. في المنتزهات العامة في أي مكان في العالم تكون هناك نوافير مياه يسمح للأطفال باللعب فيها في الأيام الحارة. احنا بس اللي منظر أطفالنا وامهاتهم عفش شويتين! آهو مثال من دول متقدمة ولا تزعلوا

    http://visitgwinnett.files.wordpress.com/2009/07/kids-in-fountain-town-green.jpg

    ReplyDelete
  12. عارف يااستاذ أحمد الصورة
    دى زى حاجات كتير من حياتنا
    الأحساس بعدم الأنتماء او عدم
    أهمية الشىء العام عدم الأحساس بأن
    هذا الشىء ملك لى أحافظ عليه زى ما بحافظ
    على بيتى :بالضبط زى اللى بتكنس وترمى(زبالتها)على
    السلم طب ليه ما السلم بيدخل على الشقة او جزء جمالى موصل للشقة...ابداً لا حياة لمن تنادى!! !!

    ReplyDelete
  13. وبعدين هل عدم توافر
    أماكن رخيصة وقريبة للأطفال
    دول هو السبب ولا زى ألأستاذ معتز
    (لورنس العرب )ما بيقول
    (نحن نعاني من امية الحياه)
    شىء يحزن

    ReplyDelete
  14. من غير مقدمات
    انا والحمدلله المهندس اللي مصمم و منفذ بحيرات و نافورات الأزهر بارك وكنت مدير المشروع و أفتخر بذلك -وكنت حاضر الموقف ده وعندي صور أكتر من كده بكتير وكلها في نفس اليوم
    وعلشان التعليقات المغلوطة لازم تعرفو الحقيقة كاملة
    :
    ده كان يوم تجارب تشغيل للبارك ٧-٧-٢٠٠٣... See More
    وكانت شركة الإدارة وهي مؤسسة أغا خان و هي شركة عالمية و مقرها جيينيف عاوزة تكافئ و تهدي هذا اليوم لسكان الدرب الأحمر (الباطنية -وهم السكان الأصليين للمنطقة و الجيران الملاصقيين للمشروع و اللذين عانوا الأمريين من جرأ تنفيذ هذا البارك العملاق وعلي مدار ٦ سنوات من عام ١٩٩٧
    فصدرت الأوامر والتعليمات من جينييف بأن تفتح أبواب البارك علي مصراعيها لجميع العائلات و الأفراد من سكان الدرب الأحمر بمجرد إظهار مايثبت أنه من هذه المنطقة - وكان هذا اليوم
    وللعلم-لم تكن شركة الإدارة قد عينت أفراد أمن بعد
    ولم تكن قد طبعت منشورات و لافتات إرشادية
    ولم تكن تتصور بأي حال من الأحوال أن تواجه هذا السلوك من أي إنسان عاقل حتي و إن كان جاهلا أو غير متعلم

    وكانت هذه المأسآة بالفعل وما خفي كان أعظم - فلقد سرقت جميع مخارج المياه بالنافورات و التي تجعل المياه تخرج بأشكال جمالية مغايرة لما هو موجود الآن ويا ليتها محلية ولكنها جميعها مستوردة ورفضت شركة الإدارة إستيراد بديل وترك الأمر كما ترونه حاليا
    عموما كانت التلفيات و السرقات في هذا اليوم أكثر من ٧٠٠ الف جنيه و أغلق البارك فورا للإصلاح و لغت شركة الإدارة فكرة إستثناء أهالي الباطنية و دخولهم المجاني للبارك

    ونظرا لأنها مؤسسة ثقافية أصلاً فقد أنشأت شركة تنمية مجتمع الدرب الأحمر بعد هذا الموقف خصيصا وكان الغرض منها توعية و تثقيف أهالي و أبناء المنطقة الملاصقة للبارك وتعليمهم آداب الحوار و مهارات حرفية كثيرة و غيرت وأثرت بالفعل في سلوك اأبناء هذه المنطقة بشكل ملحوظ
    و قامت مؤسسة أغاخان بترميم هندسي شامل لمعظم المباني و الحواري و الأزقة بالدرب الأحمر ويمكن مشاهدة ذلك من داخل الأزهر بارك من أي مكان مرتفع
    وهذا الحدث لم و لن يتكرر ثانية أبدا
    وذلك للأمانة المعلوماتية فقط ليس إلا و لوجه الله تعالي

    ReplyDelete
  15. فعلا هو فين الامن؟
    ازاى يسيبوا الناس كده

    ReplyDelete
  16. السلام عليكم
    هى فوضى اكيد المفروض كان حد يدخل ويمنع اللى بيحصل ده
    تحياتى

    ReplyDelete
  17. mr.president:
    اللي اصاب الشعب دة من عشوائية اصابه من سنة 1952 من
    يوم ما قرر العسكر ان يحكم البلد دي
    افسدوا كل شيء بما فيه ذوق الشعب و اخلاقه

    ReplyDelete
  18. anonymous:
    تغيير شعب بالتصرفات اللي بتظهر في الصورة دي شيء مش صعب بس
    دة صعب جدا جدا جدا
    و مش عايز اكون متشائم و اطلق عليه المستحيل بعينه
    تحياتي

    ReplyDelete
  19. زي الهوا:
    واضح ان الأمن فعلا بيشوف شغله علشان ما نظلمهمش
    طبقا لتعليق المهندس احمد في هذه الصفحة فإن اليوم دة كان تجريبيا
    و لكنهم اعتقد اهم اقسموا الا يتكرر بعدما شاهدوا هذه المهزلة
    تحياتي

    ReplyDelete
  20. desert cat:
    و هو اللي بيتعمل فسي الشعب دة ممكن يتعمل اصلا الا اذا كان الشعب عامل كدة؟

    ReplyDelete
  21. Leonardo:
    طبعا اللي انت قلته دة كلام سليم جدا
    بس هو السؤال
    دي سلوكيات ناس ممكن يكون عندها بسين اساسا؟!!!!

    ReplyDelete
  22. anonymous:
    فعلا..........لو عقول الناس نظيفة.......لازم الشوارع تكون هي كمان نظيفة

    ReplyDelete
  23. موجة:
    يعني هي جت على الازهر بارك.....بجملة الفوضى و الفساد و الإفساد
    تحياتي

    ReplyDelete
  24. لورنس العرب:
    ماعنديش مانع ابدا يعوموا
    بس قبل ما يعوموا لابد من تعليم ثقافة النظافة الأول

    ReplyDelete
  25. dr.lecter::
    لو هنتكلم على الفوضى و الإهمال هنكون محتاجين مدونة مستقلة بذاتها لهذا الغرض مش مجرد بوست واحد
    تحياتي

    ReplyDelete
  26. Mohamed ELShimy:
    راجع تاريخ مصر بداية من 1952
    هتعرف الذوق ليه انحدر كدة....
    تحياتي

    ReplyDelete
  27. Anonymous:
    كلامك صح
    الكلام دة بيحصل في اوروبا
    بس الناس بتتمتع بقدر من الثقافة و النظافة و النظام يجعلهم لا يقدمون على الإستحمام بالملابس الداخلية او حتى الخارجية
    دائما هناك لباس للبحر
    اعتقد ان هؤلاء من في الصورة لا يتمتعون بهذا القدر من الثقافة
    تحياتي

    ReplyDelete
  28. norahaty:
    من الواضح ان دي ثقافة شعب و محتجة كتير قوي علشان تتغير
    ربما اجيااااااااااااال
    تحياتي

    ReplyDelete
  29. Engineer ahmed:
    الف شكر يا باشمهندس على التوضيح
    تعليق اكثر من رائع
    بقدر ما احسست بالفخر لوجود اشخاص مثلك حريصون على توضيح الحقيقة
    بقدر حزني على صورتنا كبلد و شعب بسبب مثل هؤلاء البشر
    تحياتي

    ReplyDelete
  30. موناليزا:
    الباشمهندس احمد في التعليق السابق لتعليقك على طول اوضح ان دة كان يوم تجريبي قبل التشغيل الرسمي للحديقة
    حدثت هذه المهزلة
    تحياتي

    ReplyDelete
  31. جوجو:
    تعليق المهندس احمد اوضح ملابسات الموقف
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails