Thursday, 13 May 2010

يا شوارعك يا مصر


عندما تغيب عن مكان ما.....تشتاق اليه بشدة.....تحب ما فيه....ما كنت غاضبا منه منذ شهور ربما تمنيت ان تراه رغم سوءاته و عواره
هذا بالضبط ما هو حادث لي فعليا هذه الأيام....منذ شهور و انا بعيد عن مصر.....مصر بها من السلبيات ما تجعلك تلعنها و تلعن اجدادك من اقاموا فيها منذ مئات السنين و جعلوك مصريا رغما عنك.
الا انك لا تطيق ان يذكرها غريب بسوء.....فلقد اكتشفت اننا كمصريين نتعامل مع مصر بمبدأ (أدعي على ابني.....و اكره اللي يقول آمين)....هذه هي الحقيقة
من أهم سلبيات مصرنا العزيزة و التي تجعلك تكره العيشة و اللي عايشينها هو (الشارع المصري).....يا عيني على شوارعك يا مصر....المادة الخام للفوضى....اذا اردنا ان نعطي شخصا ما درسا عمليا في كيفما تكون الفوضى فليس اسهل من التجول لمدة يوم واحد في شوارع و طرق المحروسة.
سافرت لعدة دول منها الأوروبية و منها العربية ....لمست سلبيات كثيرة في كل دولة......لم المس في اي من هذه الدول فوضى و عشوائية في الشارع مثلما توجد في مصر.....لقد تفردنا و تميزنا في عشوائيتنا و هو ما ينبغي ان نتمايل له طربا!!!!!
مصر تنفرد بين دول العالم بوجود عدة الوان لتاكسي العاصمة.....بداخل المدينة الواحدة اكثر من لون للتاكسي....القاهرة وحدها بها 3 انواع من التاكسي...التقليدي القديم (الأبيض * الأسود).....و السياحي (البرتقالي) ...و أخيرا المودرن (الأبيض ابو اعلانات)
شيء في منتهى العجب....أنا كمصري لا أعلم اذا اردت ان استقل تاكسي بالقاهرة فماذا اختار؟؟ شيء لا يصدقه عقــــــــــــل.
في مصر ....و فقط في مصر يمتلك صاحب المحل محله و ما يقابله من الشارع.....فمحظور محظور يا ولدي ان تركن سيارتك امام أحد المحلات....فهذا (يطفش ) الرزق....فسيارتك ربما تسد منافذ الرزق للمحل...و غالبا لن يترك صاحب المحل الأمر للصدف فستجد أمام المحل اما (حجر) عملاق...او (كرسي) او (دراجة) او (اصيص) زرع...لا يهم ما هو الشيء المزروع في الشارع ليمنعك من ركن سيارتك....المهم الا تركن سيارتك امام المحل...لقمة العيش أهم.
شرطة المرافق و الحق يقال شغلها الشاغل...الباعة الجائلين و اشغال الأرصفة...أما وضع احجار او كراسي او ما شابه امام المحلات فهذا لا يندرج تحت بند اشغال الطريق....و لا اعلم لماذا؟
شرطة المرور في مصر لديها قدرة رهيبة على حل الأزمات ...بارعين حقا...الا انهم يترفعون عن ايجاد البدائل ...بمعنى ان يتم حل ازمة تكدس المرور في شارع ما بجعل اتجاه حركة السير فيه اتجاه واحد...شيء جميل.....يحل ازمة التكدس...اما الإتجاه الأخر الذي تم الغاءه فدة مش مهم.....يحلها ربنا.
اساتذة هم في زرع لافتة (ممنوع الإنتظار) في الشارع ...اسهل حل من وجهة نظرهم هو (ممنوع الإنتظار)....بس مش مشكلتهم على الإطلاق توفير أماكن بديلة للإنتظار
الأسهل من وجهة نظرهم هو الغاء اي U-Turn لمنع التكدس المروري بدلا من وضع عسكري مرور لتنظيم حركة السيارات.
في مصر فقط تستطيع ان تميز سيارات بعض اعضاء الهيئات القضائية و النيابة و الشرطة و الجيش و اعضاء مجلسي الشعب و الشورى ...كل يضع البادج الخاص به على اللوحة المعدنية...ليه مش عارف؟
ربما بغرض الفشخرة (بأيه مش عارف؟) او الترويع و الترهيب (على اساس ان انت لو سيارتك وراء سيارة جهة سيادية ستصاب بالفزع و الترويع و تبلغ فرار فورا)
ظاهرة لها العجب....و في الغالب فإن البادج دة بيطمس معالم الأرقام من اللوحة...يعني مخالفة مرورية صريحة لو فعلها مواطن عادي لأحيل الى النيابة فورا بلا شفقة او رحمة
الغريب انه لم تخرج اية جهة سيادية بقرار يحظر على اعضاءها وضع مثل هذه (البادجات) و كأنه شيء عادي و طبيعي.
نفسي قبل ما أموت اشوف ضابط رخصته بتتسحب......نفــــــــــــــــــــــــــسي.
سائقو النقل الثقيل في مصر لهم (مزاج) في الحارة الشمال....من يوم ما وعيت على الدنيا و انا بأشوف على كل الطرق اليافطة دي (النقل الثقيل يلزم اليمين)....و لما كبرت شوية عرفت ان العالم كله بيتبع هذه القاعدة المرورية ...الحارة اليمين مخصصة لسيارات النقل الثقيل,الا ان سائقي النقل الثقيل في مصر لهم (كيف) في الحارة الشمال...بيعشقوها...سيارة نقل ثقيل تسير في اليمين اصبح حدث يستحق عليه سائق هذه المركبة التحية على الرغم من بديهية هذا الحدث.
و كالعادة شرطة المرور (ودن من طين و أخرى من عجين) فليس المهم بالنسبة لهم الأمان على الطرق السريعة و لا مثل هذه المخالفات التافهة...فالمهم هو (الحزام)....لابس الحزام تبقى في السليم.
المطبات في مصر متاحة للجميع.....اذا كان المواطن المصري مواطن (منزوع الحقوق)....لا يمتلك حرية انشاء الأحزاب السياسية و لا حرية تنظيم المسيرات و المظاهرات الا ان الحكومة تعطي له الحق تماما في (انشاء المطبات)
حرية انشاء و تأسيس المطبات هو حق مكفول للجميع...اي حد عايز يعمل مطب قدام بيته هيعمله بكل حرية.....مفيش مشكلة ابدا....و بالمواصفات اللي هو عايزها...فلو كان مؤسس المطب (رحيما) (عطوفا) سيرأف بحال اصحاب السيارات و يعمل مطب (حنين)...اما لو كان مؤسس المطب (سادي)او (منفسن) وما اكثرهم....يبقى قل على عفشة عربيتك يا رحمن يا رحيم.
لم تتح لي الفرصة لأتحاور مع أحد سائقي التاكسي لأسأله السؤال الذي يشغل بالي كلما قدت سيارتي في شوارع مصر.....ايه السبب اللي بيجعل سائق التاكسي يصر على انزال او تحميل الركاب في وسط الشارع؟
لابد من تعطيل كل السيارات لمجرد ان الباشا (سائق التاكسي) قرر التوقف لإنزال زبون او تحميله؟
ظاهرة استفحلت بشدة في الفترة الأخيرة...و كأن مجرد التحرك بالسيارة 5 او 10 متر على جنب...هتطير الزبون؟
شيء عجيب جدا.......و كأن شوارعنا ناقصة زحام و خنقة و تكدس علشان يقرر الأخوة سائقي التاكسي يزيدوا الطين بلة
الكلام عن شوارع مصر و طرقها و فوضويتها المرورية لا ينتهي....هذه الفوضى اتعجب في فهم اسبابها...هل هو سلوك شعب...ام اهمال مسئولين...ام تكاسل جهات منوطة بمراقبة الشارع و ضبط سلوكيات الأفراد فيه....ام كل هذا؟؟
تجربة الغربة تجعلني مشتاقا لمصر بكل ما فيها من سلبيات و عشوائية...الا اني متأكد تمام التأكد ان هذا الإشتياق كان سيتضاعف لو كانت مصر خالية من كل هذه العشوائية الخانقة و الفوضى المستفزة.

28 comments:

  1. بسم الله الرحمن الرحيم
    السلام عليكم ورحمة الله وبركاته

    ربنا يرجعك بالسلامة
    .............
    معنديش تعليق
    أنا في يوم فاكرة روحت لبيتي مشي لمدة ساعة ونص مشي لمجرد حاجة واحدة
    كنت بدور على علامة عبور المشاه عشان أعدي الشارع وأركب تاكسي
    بس يومها روح الانضباط وواجبي كمعلمة للنشئ كان نائح عليا حبتين ومخليني لازم أبقى قدوة صالحة
    وكانت دي النتيجة
    لا إشارة مرور ولا عبور مشاه في مكانه وإن لقيت عبور مشاه في شارع منقسم -حارتين واحدة رايحة والتانية جاية- هتلاقيها في حارة واحدة والحارة التانية منك للسما بقى وهتفضل واقف في الأوف سايت لحد لما حد يحن عليك ويهدي شوية باعتبار انك آدمي ومن حقك العبور أولا

    ReplyDelete
  2. المشكلة يااحمد ان دا مش بنلاقية ايام معينة فى الاسبوع يعنى مثلا ايام الزحمة او ايام بداية الاسبوع ولا حتى بنلاقية بس فى أوقات الذروة زى ما بيسموها الظباط بتوع تقارير المرور الى بيجو الصبح فى الازاعة لا دا بقى فى كل يوقت من اليوم وعلى راى المنادى مفاجئة اليوم وكل يوم
    بقت موجودة كل يوم بقيت من كتر العجب الى بشوفه فى الشارع حسيت ان الناس هما الطبيعين وانا الى غريبة

    ReplyDelete
  3. ظاهرة التاكسي دي محيراني بردو

    كمان حكاية ممنوع الانتظار دي.. أنا اللي أفهمه انه المفروض توفر أماكن وقوف للسيارات عند المصالح المهمة زي البنوك مثلا, لكن اللي حاصل ان كل بنوك مصر ممنوع الوقوف قدامها.. ليه معرفش؟ لو كان لأسباب تأمينية يبقى ممكن يمنعو الوقوف في وقت شغل البنوك بس وبالليل يبقى الوقوف مسموح.. على فكرة أنا مرة عرضت الفكرة دي على مدير إدارة المرور في المدينة اللي أنا ساكن فيها, والراجل استغرب جدا من الفكرة كأني جايبها من الفضاء الخارجي, في الآخر قاللي مينفعش.. بالمناسبة مدير إدارة المرور ده مكنش صاحبي, أنا كنت رايح أشتكيله ضابط الونش اللي سحب عربيتي من مكان مش ممنوع الوقوف فيه وعطلني نص يوم عشان ألاقيها.

    المشكلة عندنا في حاجة واضحة وصريحة, الإدارة والتخطيط.. يعني لما تيجي تشوف إشارات المرور المبتكرة الجديدة ومواصفاتها الغير قياسية أبدا, هتعرف ان اللي قرر يحطها في الشوارع دي مكنش ليه علاقة بالمرور أبدا..

    أنا في مصر من حوالي اسبوعين واخدت مخالفة الحزام.. خمسين جنيه فوري. وأنا بدفع المخالفة فكرت هوه ايه اللي انا عملته وضريت بيه غيري عشان أتغرم خمسين جنيه. أربط الحزام أو مربطوش دي حاجه تخصني أنا. أنا اللي هضر نفسي لو مربطتوش ومش هضر غيري.. لكن عقلية خبراء المرور في مصر خلت الحزام هوه المخالفة الأخطر ومش مهم السير في الممنوع أو كسر الإشارة أو أي مخالفة تانية..

    ReplyDelete
  4. وبالنسبة يااحمد للفوت الى على ايدى اليمين رأى او الى هعملة مش فى اى حاجة من الاربع اختيارات

    بص ياسيدى الاول كنت بقول واية يعنى مفيش حاجة علاء كويس مش ممكن يكون احسن من ابوه والبلد تتصلح على ايده
    بس لما فكرت وشفت بقى وعرفت حجات كتير مكنش فى دماغى زمان انى اعرفها لقيت لا كفاية اوى لحد كدة من ال مبارك من غير اعتصامات ولا اضراب بمنتهى البساطة انا مش عايزاك تبقى رئيس جمهورية كفاية

    سيدنا محمد قال المرء على دين خليله فلينظر احدكم من يخالل
    اشحال بقى دا ابوه وشايف سيساسته هيعمل فينا اية كفاية خلينا نجرب غيره بس متقوليش البرادعى برضو لا

    ReplyDelete
  5. دااااااااااااا سمعته كتير

    بس لم الشعب بيكون ساكت علي لقمة العيش عايزة يتكلم علي المواصلات وشرطة المرافق
    لما يكون التحرش وصل للركب عايز تتكلم عن المطبات
    لما يكون فيه فساد تعليمي تعمل ايه صيانة عفشة العربية



















    مسير مصر ترجع تاني

    ReplyDelete
  6. تصدق بالله أنا أحب أروح مصر عشان الشوارع دي وأشوف الناس الطيبين وإزاي هما بيحبوا التلاحم مع ببعض

    ReplyDelete
  7. مصر بلد العجايب مش فى الشوارع بس
    حتى الناس من جواها متناقضه

    ReplyDelete
  8. دي من أكبر مشاكل مصر و من أكتر الحجات إلي مشوهة منظرها حضريا و إللي عملة ضغط عصبي و نفسي للناس، دة غير الحوادث اللي بيروح ضحيتها عشرات كل يوم ، مأسة. الحل مش عند الشعب الحل قانون و تطبيق القانون. بس احنا كأن معندناش حكومة أصلا

    ReplyDelete
  9. يا أبو حميد حضرتك نسيت أهم مطهر من مظاهر الفوضى المروريه وهو مملكة الميكروباص واللي بيعملوه في الشوارع والبلطجيه اللي سايقينها ومفيش حد بيقرب لهم ابدا . هل يا ترى لأن هذه الميكروباصات مملوكه لبعض أمناء الشرطه وقلة قليله مندسه خارجه على القانون من صغار ضباط الشرطه؟؟ ولا عشان بيدفعهوا المعلوم في مواعيده؟؟

    هل تعلم يا صديقي ان اي كوفي شوب او مطعم الناس بتقعد فيه لازم ياخط ترخيص من المرور وعشان ياخد الترخيص لازم يكون للمبنى اللي فيه المطعم جراج ومكان انتظار يسع عدد معين من السيارات و طبعا ده مش موجود طب يا ترى اخدوا التراخيص ازاي؟؟؟

    فساد المحليات وعشوائيه التخطيط وخلط المباني السكنيه مع التجاريه مع الاداريه والطبيه والمدارس والنوادي بيساهم بشكل كبير في الفوضى المرورية وده عبء بتتحمله ادارات المرور ومالهاش ذنب فيه

    وكمان البنوك الكثيره اللي اخدت ترخيص للشغل في مصر بتعتمد على قروض السيارات والقروض الشخصيه
    RETAIL INVESTMENT
    وده مكن ناس كثير من امتلاك سيارات فوق استيعاب شوارع القاهره المكتظه اصلا

    و و و و حاجات كثير والكلام مش ها يخلص . على العموم الرئيس مهتم بموضوع المرور جدا وحسب الجرائد طرحه على مجلس الوزراء مرتين خلال ايام قليله وإنشاء الله خير وربنا يجيب العواقب سليمه ويجعله عامر

    ReplyDelete
  10. خليك يا احمد بره احسن مصر هتوحشك اه بس بدل مترجع وتلاقي اللي انت كنت حابه فيها اتغير وراح وهتكررها وقتها
    خليك تحبها من بعيد لبعيد

    ReplyDelete
  11. تصدق انا كمان مشتاقه جداا لكل الوحش اللى فيها اشتقت للاكسجين اللى مابقاش اكسجين عندنا بسبب اللى بيحصل ولما بنزل اجازتى بفضل اول اسبوع مستمتعه جدا وبعدين بيبقى نفسى انقل النظافه والحاجات الحلوه فيها حتى للمنظر العالم كا مرور كا احترام للمواعيد حاجات من دى وانا ع قد مابقدر بحاول اثر فى اللى حواليا بس كله بلا فائده تقريبا احنا ممكن لو نظافنا نمرض يااحمد

    ReplyDelete
  12. ياجماعة نسيتوا اهم حاجة فى الموضوع: تكتك التكاتك
    اذاى تنسوا سبب الكوارث الداخلية. دة هو دة اخرت صبرنا .اصلها كانت ناقصة، فار يمشى مش عارف تصطادة ولا تجيبة منين لا نافع معاة مصيدة ولا سم يهرية. دة غير يا عينى على الضوضاء والموزيكا العجيبة الشكل. وكفاية براعم الغد الى بيبقوا سيقينة. واحد كان لسة امبارح راكب البيسكلتة، تلاقية تانى يوم بيسوق تكتك حبنا. ولا الشعارت القاتلة المكتوبة على كل واحد لا متقوليش حاجة كدة ولا فى الخيال
    اصل المشرحة كانت ناقصة قُتلة؟؟؟؟؟؟

    ReplyDelete
  13. الشوارع المصرية ضربت المثل فى انعدام اى حاجة من اول النظام للنظافة لسوء الارض لباقى الحاجات

    احنا طول عمرنا كدة شوارعنا وواخدين عليها لدرجة لو لقينا شارعنضيف متسفلت ومحدش من الكبار بيعدى منه بيبقى صعب علينا نمشى فيه مش واخدين على كدة

    تحياتى

    ReplyDelete
  14. E73:
    علامات لعبور المشاة.....؟؟!!!
    دي رفاهية كبيرة جدا لا نملكها
    يااااااااااااه
    دة حلم كبير قوي
    تحياتي

    ReplyDelete
  15. mai rabea:
    لا دة بقى العادي تماما
    كان زمان في اوقات معينة بتبقى الناس عارفة ان الشوارع بتبقى فاضية فيها
    بس دة كان زماااااااااااان
    دلوقتي الزحام بنجاح ساحق منقطع النظير
    تحياتي

    ReplyDelete
  16. Yaser:
    كل الأماكن الخدمية في مصر يا ياسر اصبح ممنوع الوقوف امامها
    البنوك,محلات الأكل و محلات الملابس.....الخ
    مش فاهم ازاي محل اكل المفروض الناس تركن عربياتها علشان تنزل تاكل و في نفس الوقت تلاقي ننمتوع الوقوف امامه
    حاجة تطير العقل بصراحة
    بالنسبة لاشارات المرور الجديدة....اوقات اعطالها اكثر بكثير من اوقات عملها
    نفسي الاقي اشارة مرور شغالة لمدة اسبوع متواصل من غير ما تعطل
    و في النهاية
    الحزاااااااااااااام....اياك و الحزام
    تحياتي

    ReplyDelete
  17. الرجاء الاطلاع على اخر تدوينة عندي

    ReplyDelete
  18. mai rabea:
    هو دة اللي مجنني
    نفسي اعرف ليه البرادعي لأ؟
    نفس ما قيل عن ايمن نور؟؟
    حاجة عجيبة جدا

    ReplyDelete
  19. MR.PRESIDENT:
    يعني شوارعنا مش هتتضبط الا لما كل المشاكل دي تتحل...؟؟؟
    يا نهار ابيض
    دة لسة بدري قوي

    ReplyDelete
  20. دندنة قيثارة الوجد:
    جميل التلاحم
    بس ساعات كتير قوي بيكون التلاحم اكثر من الازم و بيبقى المرور لا يطاق

    ReplyDelete
  21. Desert Cat:
    الدنيا اساسا ماشية بالعكس

    ReplyDelete
  22. terry
    القانوووووووووون
    هو دة مربط الفرس
    المأساة ان القانون لا يطبق الا على عامة الشعب...اما اصحاب السطوة فلا يعرفون عن القانون الا انه الة موسيقية

    ReplyDelete
  23. Meero:
    بالنسبة لمملكة الميكروباص...دة مش عايز بوست لوحده
    دة ممكن يتعمل لمهازلهم مدونة لوحدها خاصة بيهم
    بالنسبة للمحليات فهي الجهة الحاصلة على توكيل الفساد في مصر
    ربنا يستر

    ReplyDelete
  24. dr.lecter:
    للأسف هي (مصر) برضة....رغم مشاكلها المستعصية

    ReplyDelete
  25. merooo:
    للأسف الشديد النظافة ثقافة
    هل نمتلك هذه الثقافة؟

    ReplyDelete
  26. Mrw.Waheed:
    التكتك دة اصلا معمول علشان الحوادث
    مثير للأعصاب بشكل لا يحتمل
    يا سااااااتر
    فكرتيني به ليه بس؟؟

    ReplyDelete
  27. Foxology:
    فعلا و اللهي معاك حق
    الشوارع النظيفة المتسفلتة هي الإستثناء
    حاجة عجيبة جدا

    ReplyDelete
  28. خواطر شابة:
    تم الاإطلاع طبعا على الموضوع
    و جاري التنفيذ

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails