Thursday, 29 April 2010

حنين الى الماضي







زهقت من الكلام في السياسة.....قررت ان اعود طفلا.....فكان
هذا الموضوع:
لما الواحد مننا بيكون مخنوق...من شغله...... من اصحابه...... من العيشة بشكل عام....بيحتاج اي حاجة تخرجه من المووود دة
كنت زهقان....زهقـــــــــــان بشكل عام....فتحت الفيسبوك.....وجدتها
وجدت ما أخرجني من هذا (المووود)....فكرتني بأيام حلوة قوي....أيام البراءة....أحلى أيام
واحد صاحبي لقيته باعت لي على الوول بتاعي ع الفيسبوك اغنية (بولا بولا بالومبيلا) (طيري يا عصفورة)....اغنية رجعتني حوالي 20 سنة ....لأحلى أيام.
لقيت نفسي بأدخل على (اليوتيوب) و بأسمع لأحلى أغاني أطفال و أجمل ذكريات............ياااه الأغاني دي جميلة قوي....كل اغنية من دي لها ذكرى
فكرتني الأغاني دي ببرامج الأطفال بتاعت زمااااان....و مدى البساطة اللي كانت بتتمتع بيها البرامج دي ايامها (بساطة يمكن ان تنظر اليها حاليا و تصفها بالعته).
الجميل في تذكر هذه الرامج حاليا هو ان تتأمل كيف ان برامج بهذه الأمكانيات الضئيلة للغاية كانت ملأ الأسماع و الأبصار...شكلت عقليات أطفال اصبحوا الأن شباب زي الورد.
لم يكن في التليفزيون الا قناتين (الأولى و الثانية) و كانت هذه البرامج تعرض من خلال هاتين القناتين فقط....لا في art....و لا showtime و لا orbit .........مفيش (دش) أساسا.....اجيال كاملة طالعة لها نفس الثقافة....بتتفرج على نفس البرامج....بيسمعوا نفس الأغاني...لهم نفس الخلفية و نفس الذكريات....حلموا نفس الحلم بصرف النظر اذا كانوا حققوه لما كبروا و لا ماعرفوش.
مين في جيلنا ماتفرجش على برنامج (صباح الخير) لماما نجوى و بقلظ كل يوم اثنين ....مين ماكانش بيتلذذ و يستمتع و يضحك من حكايات بقلظ مع ماما نجوى (اكيد لو سمعناها دلوقتي هندرك كم تفاهتها...بس ايامها البرنامج دة كان حدث).
نجاح ماما نجوى و بقلظ في صباح الخير شجع التليفزيون على انتاج برنامج اخر مساء كل يوم خميس لماما نجوى و بقلظ برضة اسمه (مساء الخير)....بس بقى (صباح الخير) علامة مسجلة.
كل يوم خميس كان في برنامج (عروستي) مع ماما سامية شرابي - ماكنتش بحبها مش عارف ليه- بس البرنامج كان له شعبية برضة و كان قائما على فكرة لعبة (عروستي) الشهيرة الا انها كانت تلعب ببدائية شدية جدا في وجود عروسة اسمها (دباديبو)....لم اكن من عشاق هذا البرنامج على الإطلاق.
يوم الجمعة هو يوم (سينما الأطفال) مع ماما عفاف الهلاوي....و اوعى وشك بقى يا معلم....دة بقى (درة التاج) بتاعت برامج الأطفال....افلام كارتون (كانت ايامها حدث كبير) جديدة لانج وصاية لبرنامج (سينما الأطفال), ايامها ماكانش حد يتخيل ان ممكن ييجي يوم و يبقى فيه على التليفزيون اكثر من 10 قنوات كارتون (دة احنا كان ممكن يغمى علينا من الفرحة).
لن انسى (كرنبة)...العروسة كرنبة....كان برنامج يوم السبت...مش متذكر المذيعة بس كنت بحب (كرنبة) دي قوي....فاكر لها ذكريات جميلة الصراحة
و هي (كرنبة) الحقيقة تستاهل كل خير...شهرتها تعدت الأفاق...و لا يخلو محل لعب اطفال حتى الأن من هذه (الكرنبة) الجميلة....كانت بتطلع شقية قوي في البرنامج.
الجمعة بعد الصلاة بقى كان في برنامج اطفال على القناة الثانية -(في وقت عرض مجلة المرأة و عالم الحيوان على الأولى)- البرنامج دة كان دائما يعرض اغنية (الضفادع)....الأغنية دي تحفة..بأحب اسمعها قوي لحد دلوقتي...أعصابي بترتاح لما بأسمع الأغنية دي.
اتاري بقى الأغنية دي اغنية مشهورة عالميا اسمها we will stand together....المصريون عربوها و كانوا بيذيعوها بإستمرار في برنامج يوم الجمعة.
و على ذكر الأغاني...مين ينسى (يالا بينا) لعفاف راضي و لا (هم النم)....يا سلام على (ابريق الشاي)....مين يقدر يتجاهل اوبريت ليلى نظمي (جوايز للشطار)...يا خبر ابيــــــــــــــــــــض...كان رهيب...كان اكتشاف ايامها.
يا سلام على صفاء ابو السعود ايامها و اوبريتات اعياد الطفولة........ايه الجمال دة.....فين ايام (اه منك يا صابونة.....يا شقية يا مجنونة...بتقللي و تقللي لما هتبقي مللي)....و لا الحتة بتاعت (مع أنه خشب في خشب في خشب....إنما يستاهل تقله دهب).
يا سلام عليك يا عمو فؤاد و فوازيرك الجامدة....و لا جدو عبده زارع ارضه.....لن انسى فوازير جدو عبده و (قلقاسة).
لما اذيع كارتون (مازنجر) كان طفرة....طفرة رهيبة في صناعة افلام الكارتون في العالم العربي...(مازنجر) وتتر البداية الشهير....و خلص (مازنجر) و بدأ جنون (كابتن ماجد) يجتاح العالم العربي....و الكل يتقمص شخصيات (ماجد) و (بسام) و غيرهم.
ايـــــــــــــــــه الأيام البريئة دي؟
برامج و أغنيات غاية في البدائية الا ان طعمها (حلو) فعلا.....لا أدري اهو الحنين الى الماضي ام ان في هذا العصر و على الرغم من كل هذه المحطات و الإمكانيات تعجز عن انتاج برنامج جماهيري واحد من هذه البرامج او كارتون او حتى اغنية يغنيها كل الأطفال في كل بيت؟
هي الأيام طعمها بقى (وحش) و الا انا بيتهيأ لي؟
انا فعلا مش عارف بجد....الأيام دي كانت حلوة قوي للدرجة دي رغم محدودية الإمكانيات ايامها مقارنة باليومين دول؟ و لو دة حقيقي, ايه اللي مخللي اليومين دول دمهم تقيل قوي كدة ليه؟...طعم الأيام ليه بقى (مر) كدة ليه؟
ام ان الموضوع ليس الا (حنين الى الماضي) ببرائته و بساطته....بعيدا عن صراعات الحياة و طحنها...أيام البراءة و الطفولة بلا اية تعقيدات و مسئوليات؟
انا فعلا مش عارف.......بس اللي انا متأكد منه اني بأحب الحقبة دي من الحياة بحبها بأفلامها و مسرحياتها و اغنياتها و اعلاناتها و برامجها....بحبها و بحب اتفرج عليها و أضحك احيانا....و أبكي احيانا اخرى.

37 comments:

  1. اتفق معاك تماما تماما تماما

    الفكرة هى ان مكنش فى انفتاح ثقافى رهيب وقتها عن طريق قنوات ووصلات الدش اللى مجابتش غير العنف والانهيار الاخلاقى والاجتماعى عموما

    زمان ؟؟ الله يرحم ايام زمان

    ReplyDelete
  2. مصريه و لكن29 April 2010 at 19:04

    كانك بتقرا افكاري بس هي ماكنتش بدائيه بالعكس كانت هادفه و بسيطه انا فاكره حلقه لماما نجوي كانت بتعلمنا ازاي ناكل و بقنا مقفول و انك لو بتاكل حاجه مقرمشه مش عيب ان صوت القرمشه يطلع-انت نسيت برنامج بابا ماجد و الاعمال الفنيه و مذيعه العروسه كرنبه كان اسمها ماما فاطمه------كانت ايام جميله مفيهاش مسئوليه و لا اعباء -الحمد لله علي كل حال

    ReplyDelete
  3. شكرا يادكتور
    من وقت للتانى محتاجين نرجع لذكرياتنا الجميلة
    انا فاكرة ان من اوائل الموضوعات التى قرأتها هنا كان مشابه للبوست ده
    انا عنيا كانت بتجرى على الكلام
    واقول ياترى هيفتكر مازنجر
    وحكايات اندرسون
    طيب
    والنحلة زينة
    وكوكى كاك
    وكارتون طمطم
    انا كنت لازم اعمل الواجب يوم الخميس
    ولازم اصحى بدرى يوم الجمعة
    ونفطر بدرى
    علشان ماما توافق نتفرج على سينما الاطفال
    حقيقى كانت تستاهل التضحيات الجسيمة دى

    ReplyDelete
  4. الله يرحم ايام زمان ايام طفولتي ايام ابويا وامي ايام ايام الدرسه الابتدائيه (ايام ) علي فكره الكلام ده بيقوله كل جيل ،جيل جدي وجيل ابويا وجلنااحنا كل جيل في حلوه ومصعبوا بس ربنا يستر علي الجيل الجديد جيل الصراع علي الماء والطعام(من الواضح ان كل يوم بيعدي عالينا اوحش من اللي قابليه ) ربنا يستر

    ReplyDelete
  5. الله يرحم ايام زمان ايام طفولتي ايام ابويا وامي ايام ايام الدرسه الابتدائيه (ايام ) علي فكره الكلام ده بيقوله كل جيل ،جيل جدي وجيل ابويا وجلنااحنا كل جيل في حلوه ومصعبوا بس ربنا يستر علي الجيل الجديد جيل الصراع علي الماء والطعام(من الواضح ان كل يوم بيعدي عالينا اوحش من اللي قابليه ) ربنا يستر

    ReplyDelete
  6. والله يا سمير كانت أيام جميله جدا بس على فكره انا بحاول اسمع بنتى أغلب الأغانى القديمه اللى انا اتربيت عليها وفعلا بلاقيها مبسوطه ومبهورة بيها وبالنسبه للايام دى فى بعض القنوات اللى مسحققه بعض الشهرة وفيها أغانى كتيرة بردة الاطفال بيحفظوها بس انت مش حاسس بيها دلوقتى علشان انت مش بتتابع قنوات الأطفال بس انا يمكن بتابعها مضطر ومجبر أخاك لا بطل بس على العموم أغانى اليومين دول ملهاش طعم زى أيام زماااااااااااااااان

    ReplyDelete
  7. شكرا على ابريق الشاى
    و انا انا انا نا :-))
    بعز الاغنية ديه
    جدددددددددددددددا

    ReplyDelete
  8. شكرا جزيلا على اغنية ابريق الشاي لقد اعدتني لسنوات وسنوات لطفولة جميلة ينتابني احساس جميل ورائع كلما تذكرت أيامها.
    تعرف كان أخي الذي يكبرني بسنوات ووالدتي ايضا دائما ما يخبرونني عن رسوم متحركة اسمها السندباد البحري كانت تعرض في السبعينات وكيف ان الحياة كانت تتوقف وقت عرضها من الكبار قبل الصغار فكنت كونت صورة في خيالي عن هذه الرسوم من خلال حكيهم وتشاء الصدف ان يعاد عرضها منذ وقت قريب لأفاجئ من سذاجتهاومن بساطتها الشديدة حتى أخي ووالدتي تمنوا لو لم يكونوا اعادوا المشاهدة لتبقى تلك الاعمال بالصورة التي كانت في ذاكرتهم
    مع تحياتي

    ReplyDelete
  9. يخربيت عقلك يااحمد انت فظيع بجد
    انا لما بكون مخنوقه ومضايقه بفضل اسمع الاغانى دى وخصوصا ابريق الشاى عشان بيقول اسمى فيها(مرمر)وماكنتش بحب برضه برنامج عروستى ده نهائى يااخى سبحان الله ولا كنت بفهمه حتى وغيرهم وبتاع ايمان الطوخى برضه كنت بحبه جدااا..واللى مساعدنى انى ديما بجيب الاغانى دى اخويا الصغير ديما بسمعوا للاغانى دى وخصوصا اغنيه (بابا ماما وطنى علمى حريه قوميه سلام حمام جندى بلدى شجاع)يالهوى لما بيسمعها بيطنطت وانا كمان جامده الاغنيه دى قوى ولااغينه محمد فوزى بتاعت ذهب الليلا دى تحفه
    بجد ايام لايمكن انها تتعوض ولا الخنائق بقى عشان الكرتون ده ولاده ولا اللعب فى الشارع والكوارث ومفيش هم لى اى حاجه فى الدنيا كل التفكير احنا هنعمل ايه بكره لازام اخلص الواجب عشان اتفرج على اللى انا عايزه اتفرج عليه واستنى يوم الجمعه بفارغ الصبر عشان جدى يجبلى و هو راجع من الصلاه القصب واعقد بقى واتمزج يــــالهوى نفسى الايام دى ترجع تانى بقى ععععععععع
    بس بمناسبه الايام دى مر ولا ايام زمان حلو دا شئ احنا مش هنقدر احنا نحدده على دلوقتى بكره اولادك واولادنا لما يعيشوا الزمن ده لما يكبروا هنشوف وقتها هيقولوا على زمانهم ايه احنا بنتقد الزمن ده عشان احنا عايشينوا وفاهمينوا وشايفين قمه المساخه ان هيفاء تغنى لطفل برئ وغيرها يعنى بس هما بكره ممكن يشوف حلاوتها زى حلاوه ماما نجوى مثلا الله اعلم ماتشغلش بالك لانه لسنا نحن الحكام

    ReplyDelete
  10. ايام وذكريات جميلة
    ياااااريت ترجع تانى
    بس بشرط ميكونش فيها
    (:مذاكرة ولا أمتحانات

    ReplyDelete
  11. يسلااااااااااااااااااااااااااااااااااااااام
    والله العظيم انا كان مودى وحش وحضرتك طلعتني منه بالذكريات الجميلة دي

    اول مرة ادخل مدونتك وان شاء الله عتابعك

    تحياتي

    ReplyDelete
  12. بجد ما اروع ان تحن الى الماضى ان تعود طفلا تترج فوق ذكريات حياتك تتخيل نفسك فى انتظار ماما نجوى وبقلظ وكيس الشمعدان ف ايدك ولا روعة الصيام والفرجه على جدو عبدو وعمو فؤاد انا كنت متحمسه قوى انى اتابع بوجى وطمطم السنه الدى بس برضه الاصل احلى بكتير يااااااااااااااااه قد ايه المرحله دى كانت جميله وفعلا زى ماقلت الاجيال كانت بتتكون بثقافه واحده احييك على هذه النزهه الجميله فى اعماق النفس

    ReplyDelete
  13. ليت ايام الطفولة تعود يوماً

    ReplyDelete
  14. ولله مش عارف ايه مواضيع زمان دي معاكم
    لسه واحد صاحبي حاطط على الفيس بوك فوازير عمو فؤاد
    فكرتوني بأيام ما رمضان كان بييجي في الاجازه
    واغنيه كوكو واوا دي كانت بتيجي في برنامج ولله نسيت اسمه كان بييجي يوم الجمعه الصبح وكنا كلنا لازم نشوفه قبل ما نروح نصلي الجمعه وبعدها نرجع نزاكر


    الله يرحمها أيام كانت جميله ولله

    ReplyDelete
  15. يااااااااااااه
    كانت احلى ايام
    كتر خيرك انك فكرتنا بأيام زمااااااان

    ReplyDelete
  16. ام ان الموضوع ليس الا (حنين الى الماضي) ببرائته و بساطته....بعيدا عن صراعات الحياة و طحنها...أيام البراءة و الطفولة بلا اية تعقيدات و مسئوليات؟ بالظبط دا السبب مكنش فى ورانا حاجه غير اننا نقعد نستنى البرامج دى من المعاد عشان نتفرج عليه ويااااا على جماله ايام المدرسه وكمان الايام دى البرامج متوفرة فى كل وقت وعلى اكتر من قناة انما ايام زمان كان ليها معاد مرة فى الاسبوع بس بلا شك ان هيا ايام اجمل ما يكووووووووووووون

    ReplyDelete
  17. foxology:
    رغم ان الفضائيات افادتنا كثيرا لدرجة الا نستطيع ان نحيا بدونها
    الا انها دمرت الكثير من القيم و العادات الجميلة
    تحياتي

    ReplyDelete
  18. مصريه و لكن:
    هي كانت بتقدم محتوى و مضمون محترم بجد
    بس امكانياتها كانت ضعيفة جدا
    لا ديكور و لا جرافيك و لا اي امكانيات من بتاعة اليومين دول
    تحياتي

    ReplyDelete
  19. حفيدة عرابي:
    الواحد لو قعد يفتكر كل حاجة من حاجات زمان دي ممكن جدا يعمل بوست يتقري في 3 ايام
    بجد كانت ايام اكثر من رائعة
    تقريبا كلنا نحن الى براءة الماضي
    تحياتي و احتراماتي

    ReplyDelete
  20. Anonymous:
    اعتقد ان احنا في يوم من الايام هنقول على الايام دي انها احلى ايام العمر
    تحياتي

    ReplyDelete
  21. mohamed:
    اعرف ان في قنوات كتير طالعة اليومين دول
    سبيستون و طيور الجنة و غيرهما
    بس مش عارف ليه بأحس انها فعلا مش في اصالة حاجات زمان

    ReplyDelete
  22. wanda:
    لا شكر على واجب يا فندم
    الأغنية تحفة اصلا

    ReplyDelete
  23. خواطر شابة:
    اعمال زمان كانت بسيطة الا انها عميقة....تقدم محتوى و مضمون
    اما الأن الاعمال الحالية تعتمد على عناصر الابهار فقط
    تحياتي

    ReplyDelete
  24. merooo:
    ابريق الشاي دي اغنية تحفة بجد
    لحد دلوقتي الواحد لما بيسمعها بتثير في النفس الكثير من الشجن و الحنين
    بجد ايام الطفولة دي ايام رائعة
    غالبا كل ما يعدي يوم هنترحم على اليوم اللي قبله لحد ما ييجي اليوم اللي نقول على ايامنا دي انها احلى ايام
    تحياتي

    ReplyDelete
  25. norahaty:
    طيب المذاكرة و الامتحانات اهون بكتير من الهم اللي ما يتلم اللي الواحد فيه دلوقتي
    كنا كائنات بلا اي مسئوليات

    ReplyDelete
  26. Haytham Al-Sayes:
    هو دة الهدف من الموضوع يا هيثم
    ان اي حد مننا يقرأ الموضوع دة مووده يتغير و يعود بالذكريات لأيام جميلة
    منور يا هيثم و منتظر تعليقاتك دائما
    تحياتي

    ReplyDelete
  27. Anonymous:
    شكرا يا فندم على الكلام الجميل دة
    بس انتي من ايام كيس الشمعدان؟؟؟!!!!!
    تحياتي

    ReplyDelete
  28. Desert Cat:
    يا رييييييت

    ReplyDelete
  29. لورنس العرب:
    ايام ماكانش فيها لا دريم و لا الحياة و لا مودرن
    و الله كانت ايام رائعة فعلا

    ReplyDelete
  30. سبهللة:
    لا شكر على واجب

    ReplyDelete
  31. marwa:
    برامج زمان و ايام زمان لها طعم تاني خااااااااالص

    ReplyDelete
  32. نفس الحنين فى أول محاولاتى التدوينية
    http://deenwedonia.blogspot.com/

    ReplyDelete
  33. نفحات من الماضى :ما اجمل الذكريات وما اجمل العودة اليها.قد تعود اليك من مقطع فى اغنية تسمعها صدفة.. فتغمرك بعبير الماضى او بالذهاب الى مكان لك فية ذكرى جميلة او برؤية صديق او جار صدفة لم تراة منذ زمن، تعيش معة نفحة من الماضى.وقد يكون ايضا عن طريق صور تجمعك بمن تحب ومن غابوا عنك ....ذكرى عزيزة قد تبكيك او تضحكك ولكن مذاقها لذيذ وقريب من قلبك فعيش هذة اللحظة واسترجع عطر الماضي لا تبخل على نفسك ، فانت تستحقها

    هذا كان ملخص كل ما تناولتة،فلست وحدك التى تهب عليك نفحات الماضى بعطرها الآخذ فما ذكرتة من برامج يلخص برنامجى اليومى طوال الاسبوع
    ولكنى اختلف معك فى شىء بسيط بان ما يوازى عندنا هذة البرامج هى قناة طيور الجنة التى قد يذكرها ابنائنا كما نفعل الان

    ReplyDelete
  34. دين و دنيا:
    مبرووك المدونة يا هوور

    ReplyDelete
  35. Mrw.Waheed:
    انا اعرف ان طيور الجنة هي قناة اطفال هذا الزمان
    و لكن السؤال هنا
    هل هي في اصالة برامج و قنوات زمان ؟
    السؤال التاني
    هل لا تشعروا كأباء و امهات بالغيرة عندما يحفظ اطفالكم اغنيات بلهجات غير مصريى كخليجية او شامية؟؟

    ReplyDelete
  36. اولا هى القناة مميزة: لانها بتتحدث بلهجات عربية مختلفة
    ومعظم اغانيها تغنى باللهجة المصرية او باللغة العربية(وهذا فى حد ذاتة ممتاز ان اجد ابنى يغنى باللغة العربية) مع وجود التوجية الدينى فى صورة بسيط وسلسة تجذب الكبار قبل الصغار
    بالاضافة انها تحث بطريق غير مباشر على الوحدة العربية التى نفتقدها الان وما ادراك ان تكون قناة مثل هذة لها دور فى اخراج اجيال من شعوب مختلفة متحابة ومتعاونة
    اما من ناحية الاصالة فلكل زمن اصالتة
    فما كان يشاهدة ابائنا كان يتمتع بالاصالة بالنسبة لهم وهكذا نحن الان ومن بعد ذلك ابنائنا
    فكل عصر يختلف فى تذوقة للاشياء ومااعجبناقدلا
    يعجب ابنائنا الان ولا يجذبهم وكانوا يقولون:تيجى اية الحاجات دى جنب حاجتناوهكذا

    ReplyDelete
  37. حد يا جماعه يجيبلى لينكات كاتون السندباد اللى كانت المذيعه ساميه شرابى بتقدمه مع شريى عادل و هيثم مفيش على اليوتيوب غير 4 حلقت بس و انا نفسى اجمعه كله

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails