Friday, 23 April 2010

خلي عندك دم....و خليك بالبيت


توالت الفترة الماضية من خلال موقع (فيسبوك) دعوات حميدة لأستخراج بطاقات انتخابية تحت مسمى (خلي عندك صوت)....دعوة نبيلة (ايه حكاية حميدة ونبيلة دي)...دعوة نبيلة بجد بس للأسف انا مش معاها
مش علشان انا ضد الديمقراطية و لا سلبي و لا حاجة من كدة خالص....بس لأني ليا فلسفة خاصة بي في الموضوع دة
فلنفرض ان كل الشباب المصري على الفيسبوك استجاب للدعوة الكريمة دي و نزل من بيته بكرة الصبح و توجه لأقرب قسم شرطة و استخرج بطاقته الأنتخابية
عظيم جدا.....نحن على موعد السنة دي (نوفمبر2010) مع الأنتخابات البرلمانية....و يا سلام لما اللجان تكتظ بالناخبين الذين جاءوا من كل حدب و صوب لممارسة حقهم الدستوري و القانوني في اختيار نوابهم...ممثلوهم الشرعيون....الناطقون بلسانهم......الخ من الكلام اللي بيتقال قبل الأنتخابات بأيام على القناة الأولى
نظريا....مفيش احلى من كدة.....كلام جميل و كلام معقول ماقدرش اقول حاجة عنه....بس سيبنا من كلام (القناة الأولى) و خلينا في الكلام الواقعي
بعد التعديلات الدستورية الأخيرة...اللي اقرها (ممثلين) برضة....تم الأطاحة بالقاضي من على الصندوق و اصبحت الصناديق عارية...يجلس على كل صندوق (موظف) حكومة غلبان مسلط عليه سيف (لقمة العيش) و تربية العيال
تفتكر الموظف (الغلبان) دة ممكن يتمرد على التعليمات الحكومية و يشرد عياله او حتى ييتمهم؟؟
تخيل بقى الشاب المصري الجميل اللي تحمس لحملة (خلي عندك صوت) و نزل من بيته للمارسة حقه الدستوري و دخل لجنته الأنتخابية علشان يدلي بصوته (الثمين) لأختيار ممثله في البرلمان فأكتشف ان (الموظف) الغلبان اللي بيمارس حقه الدستوري برضة في الحفاظ على لقمة عيشه او حتى حياته قد اختار ممثله بالنيابة عنه و سرق صوته (الثمين) منه
اي حرقة دم ممكن تصيب هذا الشاب الغض اللي صدق نفسه...و افتكر نفسه (بني أدم) له حق الأنتخاب في انتخابات حرة (نزيهة) الله يخرب بيتها (نزيهة) طبعا
عملت له ايه بقى (بطاقته الأنتخابية) دي؟؟
بالعكس....دة بنزوله للجنة و الأدلاء بصوته (اللي مابقاش صوته) اعطى شرعية و مصداقية لأنتخابات كلنا عارفين ممكن نوصفها بأيه
حملة (خلي عندك صوت) حملة تصلح لدولة انتخاباتها نزيهة و شريفة بجد.....و دستورها محترم مش (متفصل) على مقاس فرد بعينه او حزب معين
انما لجنة (محاطة) بسياج من الأمن المركزي لمنع (الناخبين) من ارتكاب جريمة (الأنتخاب)...و موظف (عبد مأمور) قاعد على الصندوق (بيقفل) اللجنة براحته...دي انتخابات؟؟
دي (انتخابات) ناقصها بس (ناخبين).....؟؟ حراااااااااااام بجد
هنا اعتقد والله اعلم ان المشاركة في المهزلة دي هي الجريمة بعينها....(الأنتخاب) بهذا الشكل هي المهزلة -زي ما الكتاب بيقول
لما يبقى في انتخابات سليمة بقاضي على الصندوق و رقابة دولية محترمة و عدم تدخل للأمن على الأطلاق....لما يبقى القيد بجداول الأنتخابات متاح طوال العام.....لما يفك الأمن قبضته الحديدية على العملية الأنتخابية برمتها من مرشحين و ناخبين و لجان
هنا بس لازم (تخلي عندك صوت).....اما بالوضع الحالي يبقى لازم تخلي عندك دم
"خلي عندك دم....و اقعد في البيت...و بلاش تشارك في المهزلة دي"

24 comments:

  1. I Agree big time with you!

    ReplyDelete
  2. بس مفيش مانع يبقى عندنا بطاقه انتخابيه ومش عارفين بكره شكل البلد هيبقى عامل ازاى

    ReplyDelete
  3. عارفوا ازاى يشيلو الامل مننا؟؟

    ReplyDelete
  4. Sorry you are exactly doing what they want...

    Not to participate...

    being -ve.... Hopeless....Feel that nothing will cahnge...

    W dy moshkilet elaghlabeya elsamta....

    2oom tala3 elbeta2a... Mantash 3aref eh ely 7ye7sal in the coming months...

    ReplyDelete
  5. بالرغم من ان نظرة حضرتك الى حد ما واقعيه
    إلا انى شايفه انها تشاؤمية الى حد كبير
    صحيح البلد خربت و(الممثلين) اللي بينامو
    تحت القبه هما اللي خربوها هما وغيرهم وللاسف بإدينا
    بس بردو مينفعش تكون نظرتنا بهذا التشاؤم
    والمفروض نعمل اللي علينا لأن صوتنا ومشاركتنا دي
    اعمال ربنا ان شاء الله هيسألنا عليها يوم القيامه
    ومادمات هي خربانه خربانه يبقى نعمل اللي علينا
    ولا اييييييييييييييييييه؟

    ReplyDelete
  6. انت أكيد عارف اننا بنطالب بتعديل الدستور
    ولو حصل استفتاء علي تعديل الدستور هتحتاج فعلا انك يكون معاك بطاقة انتخابيه عشان تروح تقول رأيك
    ده غير ان انتخابات مجلس الشعل مهمه جدا
    لأن لو الدستور ماتغيرش اعضاء المجلس هم اللي هيحدووا المرشحين
    ولو احنا ماسمحناش بالتزوير المره دي وكلنا روحنا انتخبنا هيبقي ممثلينا في البرلمان نواب بجد وهينفذوا اللي احنا عايزينه

    ReplyDelete
  7. مصريه و لكن24 April 2010 at 17:05

    انا مختلفه معاك ليه التشاؤم ده خلي عندك امل في الله-كل اللي انت قلته صحيح و منطقي و لكن لازم ناخد بالاسباب

    ReplyDelete
  8. كلامك صح و لكن انت نسيت أمر هام عند الوقوف بين يد الله ماذا ستكون اجابتك فى ابسط حق لك و هو تغيير المنكر باليد ثم اللسان ثم القلب فلنبدأ باليد عن طريق استخراج البطاقة الأنتخابية ثم باللسان عن طريق الأنتخاب ثم بالقلب عن طريق الدعاء حتى نصبح ايجابيين وليس سلبيين-
    ثانيا أذهب للأنتخابات ثم أكتب بالورقة لا يوجد من هو كفؤا للأنتخاب أو لا تعليق لأنها مزورة أو الأختيار الأخر هو لا جرب و لن تندم و لكن لا تسمح لهم بأخذ أخر أمل منك و هو صوتك لأنهم ان أخذوة منك بهذه الطريقة أصبحنا للأسف بدون صوت كالحيوانات تساق الى مصيرها و لا تناقش او تناضل
    فكر بالعقل قبل الأحداث و حاول معرفة فكرهم من تلك الحركة و أقرأ المستقبل و اسبقهم بخطوة

    ReplyDelete
  9. وليه معملش اللى عليا ؟؟؟؟ انتخابات مجلس الشعب اللى فاتت مرشح الاخوان هو اللى فاز على فكرة فى دايرتنا وده بسبب اهل المنطقة اللى الامن ذات نفسه معرفش يعمل معاهم حاجة على فكرة برضه ... عارف الواحد لو عاوز يعمل حاجة هيعملها ومش هيهمه حد المهم انه يعمل الواحد يعمل اللى عليه علشان ميبقاش ظالم لنفسه على الاقل قدام ربنا ميبقاش مشترك معاهم فى الذنوب كمان ولا ايه ؟؟؟

    ReplyDelete
  10. مش كان اخر معاد لغايه 31 يناير؟

    انا المفروض استلمها اليومين دول كويس انك فكرتني

    ReplyDelete
  11. انا معاك تماما عندك حق

    ReplyDelete
  12. أنا متحير فى الموضوع ده بصراحة
    ومش عارف ايه الأفيد
    مافيش رأي سديد او مقنع الواحد ممكن ياخد بيه
    تحياتي

    ReplyDelete
  13. Anonymous:
    يارب شكلها يتغير للأحسن

    ReplyDelete
  14. كيكي عوووو:
    للأسف........كلامك مضبزط تماما

    ReplyDelete
  15. Khaled Fahmy:
    لا انكر انهم افقدونا الأمل مش بس في بكرة...انما في النهاردة و امبارح كماان
    ربنا يستر علينا
    تحياتي

    ReplyDelete
  16. asfourelgana:
    اليأس و الاحباط يعمل كدة و اكتر كمان
    ربنا يجازي اللي كان السبب
    تحياتي

    ReplyDelete
  17. esraa:
    انتي عارفة يا اسراء ان مش احنا و لا غيرنا اللي بيقرر تعديل الدستور
    و اذا فكروا في تعديل الدستور هيتعدل و اذا لم يقرروا لن تنفعنا اي بطاقات و لا دياللو
    للأسف هو دة واقعنا
    نظرتي تشاؤمية انا عارف...بس للأسف الشديدواقعية
    تحياتي

    ReplyDelete
  18. مصريه و لكن:
    نجحوا انهم يقتلوا فينا اي حلم و اي امل

    ReplyDelete
  19. Anonymous:
    كلام جميل و كلام معقول
    بس ياترى الموضوع بالسهولة دي
    كل ما اتفائل....افتكر حشود الأمن المركزي وهي بتمنع الناخبين من التوجه للجان
    اكتئب مرة تانية
    تحياتي

    ReplyDelete
  20. foxology:
    و الله وجهة نظر برضة
    ربنا يوفقك

    ReplyDelete
  21. dr.lecter:
    يارب تستفيد بيها

    ReplyDelete
  22. Anonymous:
    شكرا جزيلا...يارب متفقين دائما

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails