Wednesday, 7 April 2010

أه لو يقلدوه


لم أكن من الفرحين او المتفائلين بتعيين الدكتور أحمد زكي بدر وزيرا للتربية و التعليم, على الرغم ان معلوماتي عن الرجل تعتبر قليلة للغاية و لا تعدو كونه نجل وزير داخلية سابق يصنف انه واحد من اشرس وزراء الداخلية في تاريخ مصر و ايضا انه رئيس جامعة عين شمس السابق و الذي كانت تتواتر انباء من هنا و هناك عن اخلاصه الشديد للنظام في حربه الشعواء على عناصر الأخوان المسلمين و كيف لا تأخذه بالطالب شفقة او رحمة لمجرد معرفته بإنتماء هذا الطالب (للمحظورة)
و لذلك استقبل اغلب المتابعين قرار تعيين هذا الرجل في هذا المنصب التربوي بالكثير من الفزع و التوجس و الترقب
و الحق يقال ان الرجل لم يخذل متابعيه او المتوجسين خيفة فجاءت اولى قراراته داخل الوزارة اما بالنقل او الإحالة للتحقيق او اباحته للضرب بالمدارس....الخ
الى ان فاجأنا الوزير بجولة مفاجئة و لكنها (مفاجئة بجد) و ليست من نوعية (عندكم امتحان مفاجىء يوم السبت الجاي!!!!) و تفقد بنفسه حال احدى المدارس بمنطقة حدائق حلوان و هاله ما شاهده على الطبيعة من حال المدرسة و المدرسين و الطلبة
و الحقيقة ان ما شاهده الوزير و كان سببا في (فجيعته) و (ذهوله) لم يفاجأني على الإطلاق و اعتقد انه لم يفاجىء احدا ممن شاهدوا جولة الوزير على شاشة التليفزيون
فهذا الحال هو حال جميع المدارس الحكومية على مستوى الجمهورية...بل ان ما شاهدته يهون كثيرا امام احوال المدارس بالأقاليم و القرى المصرية
على الأقل ما شاهده الوزير و اثار استيائه بشدة كان بداخل مدرسة كاملة المنشأت و المرافق و تعاني فقط من اهمال مسئوليها....الا ان بر مصر المحروسة يعج بأعاجيب عن مدارس ليست بالمدارس و طلبة ليسوا بالطلبة و مدرسين ليسوا بمدرسين بأي حال من الأحوال
مدارس بلا اسوار و لا أبواب و طلبة يذهبون للمدرسة بدون كتب او كراريس او قلم و بأي ملابس ولا يوجد زي مدرسي من الأساس (نحن في زمن اصبح فيه الزي المدرسي رفاهية) و مدرسين لهم مهن أخرى يمتهنونها غير التدريس فهذا سائق تاكسي و ذاك يتاجر في التليفونات المحمولة و اخر يقلب عيشه في أية سبوبة....الخ
هذا هو حال المدارس الحكومية في مصر بعد ان هجرها اولاد الذوات الى مدارس اللغات الخاصة و اصبحت مدارس الحكومة هي مدارس الناس الغلابة و كلنا نعلم حقوق الغلابة في هذا البلد
انا عن نفسي الخص حال التعليم في مصر بمنظر كان دائما ما يثير ضيقي و غيظي و غضبي من ذلك النظام الفاشل الذي اوصلنا الى ما نحن عليه الأن
كنت معتادا كل يوم سبت السفر الى المنصورة حيث الأجتماع الأسبوعي للشركة التي أعمل بها...الطريق من الزقازيق الى المنصورة زراعي....يمر بالعديد من المراكز و القرى و توجد على الطريق اكثر من مدرسة (و دي مصيبة تانية وجود المدارس على الطرق الزراعية)
يتزامن موعد ذهابي الى المكتب مع موعد ذهاب الطلبة الى المدارس
اشاهد بنفسي على طول الطريق حال طلبة مصر في بدايات القرن ال21 ......الزي المدرسي اصبح من ذكريات الماضي الجميل...لا يوجد زي مدرسي.....حقيبة المدرسة من الخزعبلات التي لا وجود لها حاليا.....كل طالب يحمل في يده (كراسة) مطوية او حتى بدون....الطلبة و الطالبات لا يلبسون (أحذية)...تخيل طالب او طالبة يذهب الى المدرسة بالشبشب.....(التسكع) خارج المدرسة هو السمة المميزة لطلبة الثانوي.....(سيجارة) في يد كل طالب ....حالة مزرية من الفساد و الفوضى
هذا هو حال الطالب الفقير...و مدارس الفقراء و الفلاحين في مصر
وزير التعليم فعل ما فعله من اجراءات عقابية عندما شاهد بعض مظاهر (الفوضى) في (مدرسة)....المكان الذي زاره وزير التعليم يمكن ان نطلق عليه مدرسة....اما ما اراه بنفسي في (ريف) مصر فلو شاهده الوزير لربما توجه مباشرة الى رئيس الوزراء لتقديم استقالته فورا
اتعجب بشدة ممن ينتقد وزير التعليم على قراراته (العقابية) التي اتخذها في تلك المدرسة بحلوان.....و يعتبرونها قرارات (بوليسية).
ماذا كان ينبغي ان يفعل اي مسئول قرر ان يكون (مسئولا) و نزل بنفسه لمواقع هو مسئول عنها..هل المطلوب منه هو ان (يطبطب) على (ناظر المدرسة) و يقول له (خلاص يا حبيبي....بس ماتعملش كدة تاني؟)
دكتور أحمد زكي بدر فعل ما كان لابد ان يفعله اسلافه ممن تولوا حقيبة التعليم منذ عشرات السنين و كانوا هم السبب المباشر لما آلت اليه احوال مدارسنا و تعليمنا بشكل عام
اطالب وزير التعليم بأن يكرر جولاته المفاجئة حقا و لكن بطول مصر و عرضها....اتمنى ان اسمع انه يوما ما حضر فاجأ مدرسة بسرس الليان مثلا و حضر طابور الصباح او ان قرر ان يحضر الحصة الأولى بمدرسة ما بفاقوس مثلا....هي دي مصر الحقيقية..الأماكن دي بيتجلى فيها حقا مأساة التعليم في مصر...الأماكن دي هي اللي محتاجة نظرة ...الناس دي هم المصريون اللي بيعانوا بجد
ثم اين المحافظون مما فعله وزير التربية و التعليم؟
اعتقد ان لو كل محافظ فعل ما فعله وزير التربية و التعليم داخل نطاق محافظته كانت احوالنا ستكون افضل بكثير على كافة الأصعدة و المستويات
لماذا لا يترك محافظ الشرقية مثلا مكتبه الفخم ليرى بنفسه كمية (الزبالة) اللي مالية الشوارع؟
لماذا لا يهتم محافظ الإسماعيلية او بورسعيد الا بأحوال كرة القدم و فرق الإسماعيلي و المصري.؟
هل كرة القدم اهم عندهم من الهموم اليومية للمواطن المصري الغلبان؟
ثم اين بقية الوزراء؟
ايه اللي يمنع ان وزير الصحة يفاجأ المستشفيات الحكومية بزيارات مفاجئة فعلا......و لا وزير الداخلية يقرر بنفسه النزول للأقسام و النقاط الأمنية لكي يتعرف بنفسه كيف يعامل المواطنون من قبل الشرطة
ايه اللي مانع وزير النقل انه يركب (قطار) درجة ثالثة و يعاني بنفسه مثلما يعاني فقراء مصر من صعايدة و فلاحين؟
ما فعله (احمد زكي بدر) هو الطبيعي بل و المفترض ان يقوم به اي مسئول في اي موقع...الا انها تحولت لدينا الى (اعجوبة) و (خبر) يتصدر افتتاحيات برامج التوك شو
و اه...........اه لو قرر المسئولين عن هذا الشعب ان يقلدوا وزير التعليم.....حياتنا كلها هتتغير

28 comments:

  1. عندك حق فعلا
    أصلا ازاي واحد ما جربش المأساة بنفسه هيعرف ياخد قرارات فيها و ازاي هيحس بالمواطنين
    بس يارب يستمر على كده و يعدي الباقيين
    تحياتي

    ReplyDelete
  2. أنا مستغربة له المرور في مصر، رغم شدة سؤ

    محدش بيتكلم أن إن فيه مسؤول عنه إلا الشعب نفسه مع أن الشعب و الله برافو عليه اللي بيوصل من مكان لمكان بإجتهاد شخصي من غير أي قواعد أو شوراع عدلة. مش معقول إن إلمسؤول دة مش بينزل الشوراع و مش محتاج يعمل تفتيش موفجأ

    ReplyDelete
  3. هو ايه الشىء الجميل اللى عملة.. ان سيادة الوزير عاقب الجميع بنقلهم لاعداء مصر اللى فى الفيوم و المنيا على اساس انهم يستهلوا مدرسين خيبين و دول اصلا مش من شعب مصر و مايستهلوش غير المدرسين المعاقبين ، لية ما حولهمش للتحقيق و خصم مثلا من مرتباتهم و لو ان هذه المرتبات لا تغنى و لا تثمن من جوع لية لم يبدأاولا بدراسة احوالهم و رفع المرتبات بشكل يليق بأدميتهم و احتياجات اسرهم مما يجعلهم يلتزموابمهنتهم الاساسية و لا يتحولوا الى سائقى تاكسى و تجار موبايلات كما تقول و اكافىء الملتزم و اجعله قدوة ...انا مش ضد معاقبة المسيئ و لكن ضد الارهاب فى العقاب لهم و اسرهم و للبلد المنقولين لها...و بعدين يا ريته بعد كدة احترم حتى هذا القرار الاخرق اللى اخذة ده اول ما سيادة الوزير سيد مشعل الممثل لدائرة حلوان فى مجلس الشعب تـــوســــط لهم رفع عنهم هذا العقاب عملا بمبدأ اللى عاندة واسطة ما يضربش على قفاه و اهم مبدأ نربى علية ابنأنا من وزير الـــتــربــية و التعليم ان الواسطة اهم من الماء و الهواء ....و حسبنا الله و نعم الوكيل ..هو ده اللى عايزين باقى الوزراء يعملة زيه ...انا فى الاول توسمت فية خيرا و قلت على الاقل سوف يضبط التربية فى المدارس اولا ثم ينتهى بالتعليم و رفع كفائته علشان ما تفضلش المدارس تتطلع جهلة ما بيعرفوش حتى يكتبوا اسمائهم ..بس بسم الله ما شاء الله لا تربية و لا تعليم ده شوية ارهاب و تتحل بالواسطة ...لك الله يا مصر

    ReplyDelete
  4. مصريه و لكن7 April 2010 at 23:07

    قالوا في الامثال الشعبيه الغربال الجديد له شده-بس خلينا متفائلين و يا رب يا خلاف الظنون تجعل الوزير الجديد سببا في خطوه للامام-انا كنت في بلد عربي و كانت بنتي في مدرسه انترنشونال و كنت مبهوره بطريقه التعليم البسيطه السهله المؤثره جدا في ابنتي و الاهتمام من المديره الي العامله لدرجه ان المديره بنفسها- بدون معرفه شخصيه بها- اتصلت تعتذر لي عن تاجيل مقابله مع مدرسه الفصل لمتابعه ابنتي!!!! لما نزلت مصر دخلت بنتي مدرسه خاصه سمعتها كويسه و صدمت لمدي تدني مستوي التعليم و الاهتمام و توجيه اهتمام الاولاد بالموضه و فيونكات الطرح و حدث و لا حرج ----فكيف الحال مع المدارس العامه؟؟؟؟؟

    ReplyDelete
  5. مصريه و لكن7 April 2010 at 23:09

    قالوا في الامثال الشعبيه الغربال الجديد له شده-بس خلينا متفائلين و يا رب يا خلاف الظنون تجعل الوزير الجديد سببا في خطوه للامام-انا كنت في بلد عربي و كانت بنتي في مدرسه انترنشونال و كنت مبهوره بطريقه التعليم البسيطه السهله المؤثره جدا في ابنتي و الاهتمام من المديره الي العامله لدرجه ان المديره بنفسها- بدون معرفه شخصيه بها- اتصلت تعتذر لي عن تاجيل مقابله مع مدرسه الفصل لمتابعه ابنتي!!!! لما نزلت مصر دخلت بنتي مدرسه خاصه سمعتها كويسه و صدمت لمدي تدني مستوي التعليم و الاهتمام و توجيه اهتمام الاولاد بالموضه و فيونكات الطرح و حدث و لا حرج ----فكيف الحال مع المدارس العامه؟؟؟؟؟

    ReplyDelete
  6. حوافقك ان كل المسئولين
    مفروض ينزلوا ويلفوا
    بنفسهم وبحق وحقيق لكن
    احساسى انما يعمله
    وسيعمله ما هو الأ لخدمه
    (الشو الأعلامى)بتاعة والا ما أنهاش
    العقود اللى بالأف بتاعة المستشارين
    ما بُنى على باطل فهو باطل
    انا ماتفرجتش على الزيارة
    ومش حاتفرج لانى مش غاوية حرق دم
    لكن اقولك ولأسف ليس هكذا
    يُصلح حال التعليم.

    ReplyDelete
  7. اعتقد ان كان الاول يدرس ايه اللى وصلنا لكده وايه اللى خلى المدرس يشتغل شغل جانبى من الاساس وبعد حتى يفصل المقصر فى عمله بس بصراحه انا عجبتنى الزياره المفاجئه فكرتنى بفيلم عادل امام التجربه الدنماركيه وانا الوزير ياولاد التيت

    ReplyDelete
  8. This comment has been removed by the author.

    ReplyDelete
  9. احمد

    ازيك

    رأيى مش هيعجبك
    و ان كنت عارفة انك هتقبله بغض النظر
    عن اختلافه معاك كليا و جزئياً

    التعليم حاليا و طول عمره
    عاوز رؤية و شدة و صرامة كمان ..
    متقفة جدا لأن الدنيا سابت قوى


    قولنا عاوزين انضباط
    و اهو واحد شديد
    و جالنا


    ماشى
    اتفقنا


    لكن عاوز تفهمنى يا احمد
    ان الوزير مبيقراش جرايد
    ولا عارف احوال المخروبة الوزارة دى
    قبل ما يستلمها ؟؟؟


    اتفأجى باللى شافه؟!!!
    معقول !!!!

    هتقولى بناء على مشاهداتك
    التعليم و المدارس منحدرة
    و اللى عمله الوزير المفروض يعمله اى مسئول


    متفقين
    بس طيب
    الحال المنحدر دا
    من سنة و لا خمسة
    و لا نتاج زمن طويل ؟؟


    ينفع تغيره فى يوم ؟؟
    مينفعش
    بس ينفع تبتدى
    و تحاول طالما معاك صلاحيات


    بس يا احمد دى اسمها
    وزارة التربية و التعليم
    يعنى انتا بتربى قبل ما تعلم

    يعنى انا يوسف ابنى
    لما الاقيه بيتصرف تصرف غلط

    مش افهمه غلطه الاول
    يمكن مش فاهم ؟؟


    طب فهم خلاص

    اعاقبه بقى لو كرر خطئه

    لكن افرض دلوقتى هوه رجع من عند باباه
    و اتعلم هناك سلوك خاطىء انا مرضاش عنه
    اتصرف ازاى معاه؟؟

    ازعقله و ابهدله ؟؟
    و امرمط بكرامته الارض قصاد الناس كلها


    و لا اخده على جنب و افهمه
    و احتويه


    و أربيه

    أربيه يا أحمد

    دا معنى التربية


    لو فضل زى ما هو بقى
    بعد كل محاولاتى


    اعاقبه و لا يرف لى جفن
    لأنى كدا بشد عليه عشان مصلحته

    هتقولى الكلام دا يصلح مع طفل
    مش مع مدير و مدرسين
    يفترض انهم عارفين كل حاجة و متربيين خلقة

    هرجع اقولك المنظومة كلها يا احمد


    مينفعش تبقى بقالك عشرة عشرين سنة معود
    الناس على سلوكيات خاطئة
    و تيجى بدون سابق انذار تقولهم
    بس

    دا حتى اللى بيهد بيت عشان يبنيه من تانى
    بيبعت انذارت


    انا اللى كنت اتوقعه
    ان الوزير بعد ما استلم شغله
    يبص بصة متأنية و شاملة


    يحط تصورات و تخطيطات
    و يصدر قرارت
    و يبعتها لمحافظة ما .. كبداية تجريبية
    و يشوف قرارته دى
    خلال شهر شهرين اى كان التخطيط


    اتت ثمارها و لا لأ

    و بعدين يعممها على باقى البلد


    اللى هيقصر فى اداء الفكر الجديد دا
    ينضرب يا سيدى بيد من حديد
    و يتعاقب و يروح حلايب كمان


    انما يتاخد من الدار للنار كدا ؟؟

    و كأن الدنيا طول عمرها حلوة

    و المدارس فل و آخر تمام
    و دول هما اللى كانوا خاربينها ؟؟


    و بعدين معلش يا احمد انا عارفة انها جزئية مش محلها نقاش دلوقتى
    بس انا اشتغلت فى مدرسة حكومة
    و عارفة انا بتكلم عن ايه ..
    ف الجزء دا تحديدا

    انتا عندك فكرة عن المرتبات
    بتاعة اى مدرس
    سيبك من الدروس و خلافه

    انا بتكلم عن الحد الادنى من الكرامة
    الذى توفره الوزارة
    للناس دى عشان تشتغل بذمة


    مش مبرر للأهمال انا معترفة

    بس مينفعش تضغط ع الناس
    و تعيشهم على حد الكفاف
    و بعدعن تعاملهم كما لو كانوا
    بيشتغلوا فى احسن ظروف ممكنة متاحة ليهم
    و هما اللى بيتدلعوا ؟!!!

    برضو
    ارجع و اقولك
    ادى فرصة لكل واحد يساوى اموره
    و بعدين حاسبه

    انا طولت عليك معلش

    خالص تحياتى ليك

    ReplyDelete
  10. والله أنا فرحت زيك
    بس تخيل الى حصل امبارح بس
    اجتمع مع الوزير سيد مشعل النائب عن حلوان
    واتوسلطه والأمور خلصت
    وهديت وعدت
    وبجد مش المدرسين هما الى هايبقوا كبش فدا لحد

    تحياتي
    منذر - حين البأس

    ReplyDelete
  11. الحلم العربي:
    اعتقد ان الباقيين غير قابلين للعدوى
    عندهم تطعيم ضد العمل الجاد
    تحياتي

    ReplyDelete
  12. terry:
    قضية الشوارع و المرور دي قضية كبيرة قوي قوي
    محتاجة بوست لوحده
    تحياتي

    ReplyDelete
  13. اه و حياتك ya أحمد، please please talk about it. د بالإضافة إلى الحوادث البشعة إلي بالعشرات كل يوم

    دي محتجا كتاب مش بوست

    ReplyDelete
  14. السلام عليكم

    بص يااحمد الزيارات المفاجئه مابتكونش جارر وراك كل وسائل الاعلام عشان تعرفنا انه عمل والمفاجئه انه ينزل كده بعربيته لوحده يدخل ع المدرسه يشوف ايه اللى بيحصل
    دا اولا

    ثانيا
    انه بيدخل المدرسه يرفض ده وينقل ده ويحاكم ده طب انت لما هتنقل المدرس فلان والمدرسه فلانه هتوديهم فين ماهى مدرسه برضه مش مكان تانى
    زى البيضه ولا الفرخه الاول

    فكره الاصلاح مش انى امشى ابين للناس انى بشتغل وانى بنقل ده او برفض ده الشغل انه يحط خطط نظااام كامل وشامل لتعليم فى حد ذاته مش فى انى بس مركز فى ازاى اظبط الشغل قبل مااشتغل وهتفضل مقضى بقيت حياتك فى تظبيط الشغل وعمرك ماهتشتغل
    يعنى المدرسين اللى بينقلهم دول شايفهم مقصرين طب ليه هما كدا عشان هما مالهمش قيمه ايوه مالهمش قيمه لما مدرس ما يقبض مرتب محترم مايخليش تلميذ عنده يشتريه بتمن درس خصوصى يبقى مدرس مالوش قيمه
    هنا فى البلد اللى انا فيها المدرس هنا هيبته مش فى عصايته ولا فى زعيقه هيبته فى انه عارفين ان المدرس ده انا لو غلط فى حقه فى عقاب فى درجاتى فى معامله
    نرجع ونقول ايه اللى مخلى مدرس اجنبى احسن من مدرس مصرى؟
    لان المدرس الاجنبى اخد حقه تالت ومتلت احسن الناس وارقى الناس وكل الدنيا بتقف لمطالبهم عشان عارفين انه المدرس ده هو اللى باايده يبنى جيل والعكس ممكن يهدملى كيان دوله بحالها زى مااحنا شايفين
    لكن المدرس المصرى هزيل ماعندوش قوه ماعندوش حقوق وقياس بقى على كده ايه اللى ممكن يطلع من مدرس مصرى بالشكل ده
    زماااان المدرس كان على ايام اهلينا كان لما تشوفه من ع اول الشارع تمشى من شارع تانى من خوفك منه ومن حبك له كمان واحترامك له لانه كان اياميها مرتبه كافى احتياجته لكن دلوقت التلميذ بيشترى المدرس للاسف

    ReplyDelete
  15. انا جيت
    السلام عليكم
    انا حعلق الاول و بعدين اقرأ التعليقات
    و ده لأنى مش كل الناس حتوافق على اللى عملة وزير التربية و التعليم
    الراجل ده متربي تربية عسكرية
    فيها حزم
    و هو تقريبا شخصيتة زي شخصية ابوه
    بص بغض النظر بقا ايه و فين و ليه
    انا بقول ان مصر و المصرين فى الوقت الحالى محتاجة خرزانة
    المصريين محتاجين حزم شديد
    لان الدنيا متسابة على البحري و السايب بقالهم كتير جدااااا
    انا مع اللى وزير التربية و التعليم عملة
    و انا لو كنت مكانة كنت عملت أكتر الصراحة
    كتير من الشعب حيقولك اللى عملة مش حيغير من التعليم
    و اللى عملة مش عارف ايه
    انا بقا حقول للناس ديه
    ما تفرسونيش
    الراجل بيصلح العنصر البشري اللى هو اساس كل مصيبة ..و كل تخلف فى بلدنا
    انا مع التركيز فى الوقت الحالى على العنصر البشري و بعدين الخطوة التانية تكون المنهج
    ما هو يعنى احنا اتعلمنا ازاي
    ما هيه كانت حاجات اقل من بتاعة دلوقتى
    ده يا عمي دلوقتي فيه رياضة حديثة حاجة كده تحسسك انك غبي اصلا
    ما لها الرياضيات بتاعة زمان و الجبر و حساب المثلثات
    ما اغلب المسؤلين متعلمين ده
    العنصر البشري هو اللى المفروض ان كل المسؤلين يشتغلوا عليه الفترة ديه و القادمة
    ده لو عاوزين مصر تتقدم
    لكن لو عاوزين نفضل فى تخلفنا و رجوعنا لورا بالأميال
    افضلوا هاتوا و اصرخوا على المناهج
    و سيبوا المدرس و الناظر
    تصدق انا بتفرس جداااا من الناس اللى بتفكر كده
    المهم
    انا حروح اقرا التعليقات اللى اكيد حتفرسنى

    ReplyDelete
  16. رجعت تاني
    و معلش اسمحلى
    اعلق على تعليقين
    واحد بتاع فاتيما و التاني بتاع ميروووو
    بصي يا بطبط
    اولا اغلب المعلمين اخدو الكادر التعليمي
    و الكادر ده يخلى مرتباتهم الضعف
    صحيح لا تتناسب مع غلاء المعيشة
    بس حقولك الدروس الخصوصية شايلة كتير
    و الحكومة بتحاربها
    بس سايباها فى نفس الوقت
    و الناس بتروحلها برضه و بتدفع عادى
    الراجل بيقرا جرايد طبعا و عارف طبعا
    بس اللى عاوزة اقولهولك
    ان المدرسة ديه من المدارس المتجددة
    و اللى المصروف عليها كتير
    و اللى طبقوا عليها بعض القرارات
    اللى هيه ان المدير يكون سكنه جنب المدرسة
    و المدرسين كمان
    و بعدين انتى بتقولى كان يوجهه المدير و المدرسين
    باسلوب تربوي
    حقولك يا تمتم الاسلوب اللى انتى بتتكلمي عنه ده
    للناس اللى بتتحترم نفسها و تحترم عملها
    لكن اغلب الناس فى مصر النهاردة يفرسوا
    و مش محترمين عملهم
    من اول كناس الشارع
    انا مع الشدة فى الوقت الحالى
    لأن الذوق مش حينفع الفترة ديه ولا اللى جاية

    بالنسبة لميروو بقا
    الراجل واخد صحفين شهود
    لانه عارف ان الكلام ممكن يكتر
    و يتقال كتير
    فقالك على عينك يا تاجر بقا و الكل يشوف
    مش اقول و يكذبوني
    لأ يشوفوا بعنيهم

    و بعدين العقاب بالنقل ده
    شديد لدول بالذات
    لأن دول كان مطبق عليهم القرار الجديد
    بان المدري و المدرس
    يعمل فى المكان القريب لمحل اقامته
    يعنى لما المدير يبقى ساكن جنب المدرسة
    و يجي بعد ما الفصول تدخل معناه ايه؟؟؟؟؟؟؟
    فطبعا الصراحة انا لو مكان الوزير
    حقولة يا ابنى انت مش مقدر النعمة ديه
    خد على دماغك و روح بلاد الواء الواء
    ووريني بقا
    و يا ويلك يا سواد ليلك تتأخر بقا هناك
    الناس اهملتن
    الناس نايمة فى العسل
    الناس كسلانه
    الناس ضرباها طناش
    الصراحة الناس تفرس


    سوري يا احمد
    بس تعليقين حسيت انى عاوزة اتدخل و اعلق
    انا عارفة ان البيت مش بيتي
    و انى زودتها
    ممكن تشيل التعليق ده لو يضايقك
    تحياتي ليكم
    و كل من يعمل تحت ايده موظفين ياريت يكون فى شدة الحزم الفترة القادمة
    سلام

    ReplyDelete
  17. emyhash:
    القصة ان المنيا مش اعداء الشعب و لا حاجة...القضية انها بعيدة عن منطقة سكنهم
    بمعنى ان المدرس من حلوان يتنقل المنيا و لوكان من المنيا يتم نقله الى سوهاج مثلا و هكذا
    بالنسبة لوساطة سيد مشعل...انا كمان سمعت عنها و احبطت زيك بالضبط
    واضح ان احوال الكوسة في بلدنا ستظل مزدهرة الى الأبد
    تحياتي

    ReplyDelete
  18. مصريه و لكن:
    اقدر اقوللك و بالفم المليان
    المدارس العامة في هذا الزمن لا يدخلها اولاد الناس
    و بما ان اولاد الناس الكويسصين مش فيها
    اذن
    فلتذهب للجحيم هي و من فيها
    تحياتي

    ReplyDelete
  19. norahaty:
    ممكن اضيف كلمة على الجملة اللي انهيتي بيها تعليقك
    و هي
    ليس بهكذا فقط...ينصلح التعليم
    اللي عمله الوزير مهم لردع الفساد و المفسدين و المهملين
    الا انه مش كفاية
    في خطوات و اجراءات اعم و اشمل لابد ان تتخذ لأصلاح المنظومة ككل
    تحياتي

    ReplyDelete
  20. Anonymous:
    طيب و ليه اللي عمله دة يكون بيتوازى مع الاجراءات الأخرى
    دي حاجة و دي حاجة
    لابد من معاقبة المقصرين مع دراسة اسباب التقصير لعلاجه
    تحياتي

    ReplyDelete
  21. لعلمك
    الراجل ده أكيد مش هايكمل
    هيئة الابنيه التعليميه وقطاع الكتب والمطابع والناس اللي لهم مصالح عبارة عن أباطره داخل وزارة التعليم ومن المستحيل السيطره عليهم لأنهم مرتبطين بناس تقيله جدا في البلد
    يا اما انه هايهدا او انه هايمشي والناس دي هاتعمل فيه حاجه
    انت عارف انه احيانا بيكون الموظفين أقوى من المدير خاصة لو كانوا عاملين رباطيه

    ReplyDelete
  22. فاتيما:
    اكيد انتي عارفة كويس اني ارحب بالأختلاف في الرأي اكثر من الاتفاق معه
    اكيد الوزير لم يتفاجىء كليا...بس برضة اكيد فوجىء
    عارفة ليه؟
    لأن بالتأكيد اللي شاف غير اللي سمع
    طبعا الوزارة هي التربية و التعليم...بس انااعتقد ان الوزير تعامل بمنطق ادبح القطة
    دبح القطة لبتوع حلوان علشان الكل يحاول يضبط اموره
    منطقك سليم جدا...بخصوص ضرورة اللاصلاح...يمكن اللي عمله الوزير بسبب خلفيته كأبن وزير داخلية سابق او ربما للشو الاعلامي
    لكن عموما التجربة اتت ثمارها و الكل اصبح مرعوبا من احمد زكي بدر في طول مصر و عرضها
    انتي ماطولتيش عليا خالص
    اهلا بيكي انا بأسعد برأيك دائما
    تحياتي

    ReplyDelete
  23. منذر:
    هي دي مصر يا منذر

    ReplyDelete
  24. terry:
    حاضر يا فندم....انتظر بوست قريبا ان شاء الله

    ReplyDelete
  25. merooo:
    ماهي الزيارات المفاجئة بتكون مفاجأة على الموظفين المغنيين فقط...انما في مكتب اعلامي للوزير بيتصل بوسائل الاعلام لتغطية الجولة
    ممكن جدا يكون شو اعلامي انا معاكي....بس برضة مفيدة
    اما نقل المدرس او الموظف المهمل فبيكون عقاب له و ليس للمدرسة اللي تم النقل اليها
    علشان الجهة المنقول اليها الموظف بتكون بعيدة عن منطقة سكنه
    المقارنة لا تجوز بين كل ماهو اجنبي و كل من هو مصري في كل شيء و ليس في التدريس فقط
    تحياتي

    ReplyDelete
  26. واحدة مفروسة:
    بداية انا اتفق معاكي في صحة ما فعله وزير التعليم
    فعلا...في بعض الأحيان الشدة هي الحل
    بالنسبة لي
    عيب عليكي الاعتذار عن التعليق على التعليقات
    و المدونة دي اساسا مش بتاعتي...دي مدونة للناس كلها كله يكتب فيها و يعلق كما يحلو له
    تحياتي

    ReplyDelete
  27. لورنس العرب:
    تقريبا هو هيتهد
    بعد ما استجاب لوساطة سيد مشعل
    اصبحت العينة بينة
    تحياتي

    ReplyDelete
  28. بسم الله الرحمن الرحيم
    السلام عليكم روحمة الله وبركاته

    أولا بالنسبة لاستطلاع الرأي
    انا مش لاقية حاجة من الاختيارات يناسبني
    أنا ميهمنيش مين هيبقى الرئيس لأن كل المرشحين أصلا مش عاجبني

    اللي يهمني الحكومة اللي هيعينها هيبقى شكلها إيه لأن بقى خلاص المتعارف عليه إن الرئيس ده بيبقى في وادي وولاد بلده في وادي تاني كما لو كان بيحكم بلد تانية

    أيوة فترة الرئيس مبارك هي فترة استقرار خارجي إلى حد كبير
    لكن كانت فترة انهيار داخلي ونفسي بشكل أكبر

    مش متخيلة بصراحة هيحصل إيه لو وزير المالية ده اتشال وبطل نهب في أموال ولاد البلد من غير داعي وابتداع ضرائب غريبة مش بعيد نسمع بكرة عن ضرائب على الملبوسات ولما الشعب يتساءل عن أموال التأمينات يقول عوزينها يشربوا بيها خمرة حسبي الله ونعم الوكيل

    وهم دول اللي ماسكين مصر

    لكن في النهاية نرجع ونقول الشعب المصري شعب سلبي ماشاء الله من الدرجة الأولى يتحسد بجد على سلبيته المتناهية دي

    شعب مصر لاهو عارف قيمة نفسه ولا عارف قيمة بلده فاكر ان أي بقعة خارج أرض مصر جنة غلبان ماهو مخرجش وشاف برة مصر شكله ايه شعب ودني وبس بيسمع أكتر ما بيجرب

    ما علينا هقول في ايه مانا واحدة من الشعب ده

    نرجع بقى للمقال واللي له علاقة كبيرة بالاستطلاع ان لو الحكومة هتتغيير جذريًا مع تغير رئيس الجمهورية يبقى خير وبركة وكل الحكومة من كبيرها لصغيرها لموظف الشباك اللي بيزل خلق الله وهو قاعد يشرب كباية الشاي في المروحة والناس واقفة طابور عصير طماطم برة الشباك

    لو هتبقى الحكومة الجديدة بالمنظر الجديد ده

    لو المرتبات هتتوزع بشكل عادل ميبقاش واحد بيقبض 5 ألاف جنيه وواحد بيقبض 50 جنيه والله مش متخيلاها أبدًا إيه الفجوة دي؟ شالو صفرين بس ومش واخدين بالهم ان الصفر اللي على اليمين له قيمة كبيرة قوي بتساوي حياة بني آدم مش لاقي لقمة عيش ولا تمن الدوا

    المهم يعني لو كان المسئولين عن مصر مستقبلا هيبقوا بالشكل ده يبقى عمار يمصر

    وأفلح إن صدق

    بس هو بس يكررها وميتمش عزله أو إقالته بسبب الفضيحة اللي عملهالهم

    المصري فيه اللي مكفيه متخليش الواحد يتكلم لأنه لو فتح مش هتعرف تقفله

    عزائي الوحيد اني ان شاء الله هبقى مدرسة وربنا يعينني وأعرف أفرمت أدمغة الجيل الصاعد ربنا يعينني ويقويني ويؤتني الحكمة قول آمين

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails