Wednesday, 31 March 2010

عايزين (الحلاوة) يا ريس


لست من هواة (الشماتة) بشكل عام و في شيئين بشكل خاص (المرض) و (الموت)
و لست ايضا من (الداعين) لشفاء مرضى المسلمين فقط بل من (المبتهلين) و (المتضرعين) لله رب العالمين بالشفاء لجميع المرضى على اختلاف جنسياتهم و دياناتهم....فالمرض لا بفرق بين مسلم و كافر او بين مصري و هندي
كانت هذه المقدمة ضرورية لتوضيح لماذا لم (افرح) لمرض الرئيس مبارك او (اهلل) لشائعة وفاته
هي ناحية انسانية بحتة...ليس لها علاقة بإتجاه سياسي او اختلاف في الرؤى و الإتجاهات
و لكن بما ان الله قد (من) بالشفاء على سيادته....و انعم علينا بعودته سالما غانما الى ارض الوطن....فدعونا نطلب من الرئيس (حلاوة) شفائه
معروف طبعا ان لما حد بيقوم من (علقة سخنة) -كما وصفها الرئيس بنفسه- بتبقى نفسه مفتوحة و مزاجه عال العال و هنا بتبقى اللحظة المناسبة لتنفيذ اي طلب يطلب منه بنفس راضية
لو افترضنا ان الشعب قرر يطلب من السيد الرئيس (حلاوة) شفائه.....ممكن نطلب منه ايه؟
تخيلوا ان الحزب الوطني قرر توزيع 80 مليون استمارة على ال 80 مليون بني ادم في طول البلاد و عرضها ...الاستمارة تحتوي على طلب واحد على المواطن ان يطلبه بمثابة (حلاوة) شفاء السيد الرئيس
تفتكروا الشعب هيجمع على مطلب واحد.....او حتى مطلبين لمصلحة هذا البلد؟ و لا المصالح الفئوية الضيقة ستتحكم في طلبات (الحلاوة)؟؟
انا عن نفسي سأطلب طلبا وحيدا من فخامته الا و هو (تعديل المادتين 76 و 77 من الدستور المصري) التي تتيح حرية الترشح لرئاسة الجمهورية و قصر مدة الرئاسة على فترتين فقط لا غير
انا عن نفسي بأشوف ان دة اهم مطلب ممكن اي حد يطلبه اذا كان بيخاف على البلد دي و عايزها تاخد مكانها و مكانتها الطبيعية اللي تستحقها
لا هاطلب مصلحة خاصة و لا زيادة مرتبات و لا اقالة اشخاص و لا اي سيء من هذا القبيل....كل دة يهون جنب الهدف الأسمى...(تعديل الدستور المصري)
اللي من غير ما يتعدل....لن تقوم لهذه البلد قائمة...و سنظل ندور في نفس الحلقة المفرغة....نفس السياسات ....نفس الوجوه ...نفس المعاناة...ان لم يكن الى الأسوأ
عن نفسي هي دي الحلاوة اللي سأطلبها من رئيس الجمهورية...لكن يا ترى هل كل الناس هيطلبوا نفس الطلب و لا المصالح الضيقة و الأمتيازات الفئوية ممكن تلعب دورها في ذلك الوقت؟
يعني هل سيجمع الشعب المصري على طلب (تعديل الدستور) بإعتباره المنقذ الوحيد لمصر...ام ان هذه الفكرة لم تصل الى عموم الشعب و بالتالي قد نجد (الأقباط) مثلا يطلبون(حلاوة) شفاء الرئيس بناء كنيستين او ثلاثة , و (الصيادلة) يطلبون الغاء قرار وزير الصحة بزيادة مساحة الصيدلية الجديدة ل 40 متر مربع , اما (الأطباء) فلن يطلبوا من الرئيس سوى الكادر و لا شيء غير الكادر.....اما (الفلاحين) فلن تخرج مطالبهم عن تحسين الري و الصرف و زيادة مساحة الرقعة الزراعية و حل المشكلات مع وزارة الزراعة...الخ
كلها مصالح فئوية لا تغني و لا تسمن من جوع.....الشعب المصري لا يؤمن بقضية واحدة....لن يتكاتف و يهب هبة رجل واحد للمطالبة بمطلب واحد يرى الجميع انه الخلاص من متاعبهم و أوجاعهم
الشعب المصري لم يعتاد ان يطالب بحقه...بل ان يحصل على حقوقه هبة و منحة من حاكمه....فلن اراهن على موقف الشعب الذي انهكته الحياة و طحنته متطلباتها...بل سأراهن على (منحة) الحاكم لشعبه ابتهاجا و احتفالا بشفائه
و سأقولها
(عايزين الحلاوة يا ريس)
كلمات لا محل لها من الإعراب:
الدكتور حاتم الجبلي وزير صحة مصر.....سافر مع الرئيس الى المانيا و تنقل بين المانيا (حيث متابعة الحالة الصحية لرئيس الجمهورية) و بين الولايات المتحدة الأمريكية (حيث متابعة الحالة الصحية لزوجته)
السؤال هنا:
الدكتور حاتم الجبلي بيشغل منصب وزير صحة الشعب المصري ام وزير صحة الرئيس المصري؟
اذا كان ولابد من وجود طبيب مصري مرافق لرئيس الجمهورية فلماذا لا يتم تعيين مستشار طبي للسيد الرئيس يكون مسئولا عن متابعة الحالة الصحية لسيادته بدلا من السيد وزير الصحة المعني في المقام الأول بالحالة الصحية للمصريين ككل و ليس شخص واحد ايا كان مقامه و قيمته
ثم انه اذا كان هذا هو حال المنشأت الصحية في مصر في وجود وزير الصحة فكيف هو حالها في غيابه ؟
اذا كانت عملية (استئصال الحوصلة المرارية) تستدعي السفر للخارج.....يبقى قل على (الطب) في مصر يا رحمن يا رحيم

18 comments:

  1. والله يا بو سمير انا عايز الحلاوه بتاعتى تكون بريوش بالجبنه علشان مش لاقيه فى البلد دى تعديل دستورى ايه اللى عايز الشعب يتكلم عنه ونصه تحت خط الفقر المشكله ان كل الناس بتبص تحت رجلها ومحدش بيفكر لا فى المستقبل ولا فى مصلحه المجتمع ككل شوف اى مظاهره بتنادى بحقوق الناس مش بس فئه معينه بتلاقى الناس ماشيه بتتفرج ولا كأنها شايفه فقره فى السيرك القومى اكبر مشكله بقت عندنا دلوقتى هى السلبيه وبعدين انت زعلان من وزير الصحه ليه سيب الراجل يحافظ على اكل عيشه وبرضه ياريت متنساش البريوش علشان مش لاقيه

    ReplyDelete
  2. تفتكر نطلب ايه يااستاذ سمير
    غير انه يطمن الناس على حالها
    بس يطمنها بحق وحقيق مش بالكلام؟
    اما عمونا وزير الصحة فبلاش نتكلم عنه احسن؟

    ReplyDelete
  3. مصريه و لكن31 March 2010 at 21:43

    تفتكر تعديل الدستور هوه الحل؟هو يعني القانون عندنا بيطبق نصيا !ولا بيطبق تفصيل علي مقاس المسئولين المهمين و اقاربهم و حبايبهم و مصالحهم- اليوم شفت بوست لوزير التعليم الجديد قال ايه قام بزياره مفاجئه لمدرسه و ملقاش الناظر و التسيب في كل انحاء المدرسه وقال ايه كمان مستغرب البيه لحال المدرسه ؟!!!!و هي دي اصلا مش مسئوليته و لا ايه -انا مطلبي ان الريس يتقي الله لو اتقي الله في كل قراراته و اختياراته لحاشيته اكييد هيتغير حال البلد و الناس هترتاح و محدش هيحتاج يطلب مطالب فئويه و الله يخليك و صيلنا علي طبق عيش سرايا باقشطه و العسل مع البريوش و شكرا

    ReplyDelete
  4. مصريه و لكن31 March 2010 at 21:46

    نسيت اسال هوه وزير الصحه واخد بدل تنقل و لا سافر علي حسابه.........

    ReplyDelete
  5. المشكلة ليست في تعديل الدستور..المشكلة ان التعديلات الدستورية الأخيرة ليست دستورية ولا الشعب اللي راح قال رأيه فيها في الصندوق كان فاهم ايه الحكاية وحزمة من التعديلات ياتوافق عليها كلها أو ترفضها كلها (باكيتج) والمفروض من الأول يستفتى الشعب مادة مادة علشان نفهم القصة ..لكن الخلاصة ان اللي هم عايزينه بيعملوه وبكل بجاحة وطظ في الشعب وهي دي سياسة مبارك ومن حوله من الأفاقين سياسة احتقار الشعب والله العظيم الناس دي بتحتقر الشعب وكلهم كدابين وبيقسموا الفلوس والأراضي على بعض واحنا بنتفرج عليهم ...منهم لله ..واحنا كمان كشعب مننا لله عشان متخاذلين ضعفاء و90% مننا مش فاهمين حاجة وحسبي الله ونعم الوكيل

    ReplyDelete
  6. ما هي الحلواة كانت أغاني شيرين وعمرو وشعبولا
    مش هو بابانا كلنا
    أنا رديت ع البوست اللي فات
    قال طب مصري قال
    :)

    ReplyDelete
  7. الحلاوه هتكون في شهر يوليو كده زياده في المرتب 10 جنيه
    لنا الله وكفي

    ReplyDelete
  8. لو الناس اخدت 50 جنيه بس على الراتب هاينسوا الدستور وكل حاجه في الدنيا وهتكون دي الحلاوه الكبيره
    الناس عاوزين حاجه يتأثروا بيها في بيتهم تأثير مباشر وللسبب ده كله بعيد عن السياسه والكلام فيها لنهم هايقولوا لك طيب واحنا هناخد ايه
    شوف انت امريكا دلوقت واللي حصل لهم في موضوع التأمين الصحي ده
    هناك بيكون فيه تأثير مباشر على كل الناس بالنسبة لرئيس الجمهوريه
    اما عندنا لأ

    ReplyDelete
  9. النهارده كنت بتفرج على زياره البرادعى للمنصوره والاسثماره اللى بتتوزع على التغير الدستور والتغير بشكل عام..وكانوا بيتكلموا فى البرنامج انه على الحزب الوطنى انه يتحرك وكده لانه البرادعى بياخد خطوات كبيره وجريئه تقريبا هما وزعوا الاستماره بتاعت الحلاوه ياريس دى عشان مش بس يكتبو هما عايزين ايه واعتقد حتى لو اجتمعنا على التغير مش هيتاخد باالرائ بتاعنا لانها مجرد جس نبض للشعب ياترى ماشى ورا اللى بالى بالك ولاهما لسه عايشين فى الجميز زى ماهما
    واعتقد الاجابه هتكون واضحه جدااااااااااااااا

    ReplyDelete
  10. ياااااااااااه وهي دي عايزة سؤال
    وزير صحة الريئس طبعا
    هو فيه شعب أصلا
    الشعب مش عاوز وزير صحة
    الشعب عاوز حنوتي ويدفنه ويخلص الريس من بلاويه باه

    وانت نسيت ان مجلس الوزرا ما هو إلي سكرتارية فى خدمة الرئيس ولا ايه

    تحياتي

    منذر - حين البأس

    ReplyDelete
  11. السلام عليكم

    اول مرة ادخل مدونتك وسعدت بها
    اما عن موضوع البوست فانا لو اتيح لي ان اطلب فاطلب طلب واحد ان يترك مبارك وعائلته والحكومة الذكية ورجال الاعمال اللصون ان يتركوا الوطن ويرحلو ويتركوها لسكان مصر الشرفاء يحكومونها كيفما يرون



    تحياتي وصوت للتغيير
    https://www.taghyeer.net/

    ReplyDelete
  12. This comment has been removed by the author.

    ReplyDelete
  13. norahaty:
    ماهي المشكلة اللي الناس مش عارفة تدركها ان احوالها مش هتتحسن الا بتعديل الدستور علشان تبقى في ديمقراطية و تبادل سلطة بحق و حقيقي
    تحياتي

    ReplyDelete
  14. This comment has been removed by the author.

    ReplyDelete
  15. Anonymous:
    التعديلات الدستورية الاخيرة عار اصلا على اي شعب انه يقرها او يوافق عليها
    دي تعديلات تجعل من رئيس الجمهورية فرعونا
    و سواء كانت مادة مادة او حزمة على بعضها فهي تعديلات معيبة اصلا
    بس برضة اكرر
    الشعب هو من يغير...التغيير ليست هبة من الحاكم
    تحياتي

    ReplyDelete
  16. micheal:
    شعبولا و عمرو و شرين بيحبوه بجد يا عم مايكل
    هم هيلاقوا احسن من كدة عهد فين؟
    دي ايام لوووووووووز
    تحياتي

    ReplyDelete
  17. dr.lecter:
    ربنا يخليك.....طمنتني

    ReplyDelete
  18. لورنس العرب:
    كنت باتفرج امبارح عن تقرير عن احداث المحلة 6 ابريل 2008 و العنف و العنف المضاد و الاعتصامات و الاحتجاجات
    تحس ان الشعب المصري هيكسر الدنيا
    تخيل الموضوع دة اتحل ازاي
    شهر مكافأة للعاملين بشركة غزل المحلة
    و تحول العنف فورا الى الدعاء بالصحة للسيد الرئيس ووعد بزيادة العمل و الانتاج
    باعوا القضية علشان شهر حوافز
    مفيش فايدة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails