Wednesday, 24 March 2010

استفزازات.....استفزازات

سألته مقدمة البرنامج:
ايهما اهم لمصر الجامع الأزهر أهم ام الحزب الوطني الديمقراطي ؟
كانت الإجابة الصادمة
لا يجوز المقارنة.....كلاهما على نفس الدرجة من الأهمية....لا يجوز القياس بين الأثنين مثلما لا يجوز القياس بين الليل و النهار او بن البشر و الحجر
لم اكن اتصور ابدا ان يأتي اليوم الذي يخير فيه شيخ الأزهر بين اهمية الأزهر الشريف كأقدم جامعة اسلامية و منارة العلم الإسلامي في مشارق الأرض و مغاربها....تلك المؤسسة العالمية و بين حزب سياسي ايا كان فيعجز فضيلته عن الإجابة...بل يضع الأثنين في كفتين متساويتين مؤكدا ان الأثنين على نفس الدرجة من الأهمية
فضيلة الإمام الأكبر الدكتور أحمد الطيب شيخ الأزهر الجديد صرح انه لن يتخلى عن منصبه بالحزب الوطني الحاكم بعد ان تم تعيينه بأعتبار ان منصبه بالحزب الوطني سيجعله (مسنودا) في مواجهة الضغوطات و التحديات المختلفة التي تواجهها مؤسسة الأزهر الشريف
ايها السادة:
لا تتفائلوا كثيرا بمستقبل الأزهر..فالعينة بينة و أول القصيدة...........
____________________________________________
بروموهات البرامج الدينية و الإجتماعية في الفضائيات اصبحت تذكرني بأفيشات افلام الثمانينات و التسعينات......لابد ان يحتوي (الأفيش) على صورة عارية للبطلة كعنصر جذب للجمهور الباحث عن (فيلم مناظر)
نفس المنطق تتبعه الفضائيات في (البرومو) الخاص بالبرنامج الديني او الإجتماعي فنجد ان جميع الأسئلة الواردة في (البرومو) ذات صبغة جنسية بحتة
كلها اسئلة عن المعاشرة الجنسية و العادة السرية و حقوق الزوجة تجاه زوجها و العكس....الخ
ليس لدي ادنى اعتراض على مناقشة كل هذه الأمور و لكن بداخل البرنامج...حيث ان البرنامج يخاطب مشاهديه
اما بالنسبة للمشاهدين المتابعين لمسلسل ما او فيلم سينمائي...و اذا به يفاجأ هو و اسرته بتنويه يتناول موضوعات محتواها لا يناسب الأطفال على الإطلاق.....فهذا هو الإستفزاز بعينه
______________________________________________
وليد صلاح الدين لاعب النادي الأهلي السابق متزوج منذ 16 عاما و لديه 4 اطفال.......وليد قرر ان يجدد حياته و ان يتزوج مرة أخرى...و لكنه قرر ان يتزوج من (زوجته)
وليد و زوجته قررا ان يتزوجا مرة أخرى...فقام بحجز قاعة في فندق 5 نجوم...و التعاقد مع مطربين و دعوة اصدقائه و احبائه و (أطفاله) لحضور حفل زفافه مرة أخرى على (زوجته) أم اولاده
و كانت ليلة ليلاء...ارتدى فيها وليد (بدلة) زفاف و ارتدت زوجته (عروسته و أم أولاده) فستان زفاف.....فرح و معازيم و مطربين و أكل و شرب و تورتة عروسة و......أطفالهم
هو في كام مليون عانس في مصر؟
بذمتكم......مش دة قمة الإستفزاز؟؟؟
______________________________________________
بما ان السينما هي مرآة المجتمع
فرجاء للسادة السينمائيين من مصريين مغتربين..............ارحمــــــــــــــــونا من افلامكم اياها
بنات مصر مش كدة....و رجالها مش كذلك......و المخدرات مش هي الغذاء الأساسي للشعب المصري كما تصوروه في أفلامكم....و الكباريهات مش هي المتنزهات للمصريين لما بيحبوا يرفهوا عن نفسهم.....و الزواج العرفي مش هو (العرف) السائد في المجتمع المصري
في الدول العربية بيعتقدوا ان المصريين بيتعاطوا المخدرات كأنهم بيشربوا ماء....و بيعتقدوا ان اي بنت مصرية هي (بائعة هوى) بالفطرة
و ان الواحد منهم هينزل من الطائرة سيجد نفسه محاطا بالنصابين و السماسرة و القوادين و فتيات الليل
اعرف ان كل هذا و اكثر موجود في المجتمع المصري...الا ان هناك ايضا نماذج محترمة في المجتمع و رجال و نساء عنوان للشرف و الكفاح
فلماذا التركيز الكامل على كل ما هو سلبي و ترك كل ما هو ايجابي حتى تصبح هكذا صورتنا وسط دول مجتمعاتها لها ما لها و عليها ما عليها مثلنا تماما...الا اننا من هواة تعرية أنفسنا و كشف عوراتناا
صانعو السينما في مصر.....ارجوكم...كفاية استفزاز
_________________________________________________
على مسئولية جريدة اليوم السابع:
علاج (حرم) السيد وزير الصحة في الخارج على نفقة الدولة بتكلفة قاربت ال 2 مليون جنيه
السيد الدكتور وزير الصحة احد مالكي اكبر مستشفى استثماري في مصر و احد افراد (حكومة) المليونيرات في مصر يعالج زوجته على نفقة الدولة
اعتقد انه لا يوجد اي استفزاز في الدنيا اكثر من هذا الخبر استفزازا
__________________________________________________
الوزراء في الأردن.....الأردن (تلك الدولة العربية الشقيقة) قرروا التبرع ب خمس(1/5) مرتباتهم لفقراء بلدهم....بالإضافة الى اتخاذ اجراءات صارمة لضغط ا
لنفقات الحكومية
بينما الوزراء في مصر (حكومة رجال الأعمال) بيتعالجوا هم و أسرهم على نفقة الدولة
عمار يا مصر

_________________________________________________
لما عملية (المرارة) يسافروا لها (المانيا)......يبقى عملية (اللوز) يسافروا لها فين؟

36 comments:

  1. بالنسبة للموضوع الأول (العيب على اللى بيسأل )
    التانى بردة العيب على اللى بيسأل
    التالت والرابع العيب علينا اننا ادينا شوية فناننين ولاعيبة قيمة أكتر بكتير من قيمتهم
    الرابع والخامس العيب على القانون الأعوج بتاعنا
    والخامس بئة مستشفى التيسير عاملة شغل جامد أوى بس يا ترى الريس خد يوناسين ولا ايه مندوب فايزر عامل شغل جامد هناك

    ReplyDelete
  2. التيسير همممم

    احنا نعرف بعض مش كده؟

    ReplyDelete
  3. 1 تعرف طارح السؤال كان يبحث عن الاجابة التي سمعها وشيخ الازهر الجديد يعمل بمبدأ خليك جنب الحيط
    2 كل شئ الان اصبح تجارة والجميع يتحاربون على تورتة الاعلانات وفي الحرب كل الاسلحة مباحة
    3 اللي عنده قرش محيره يجيب حمام ويطيره
    4 اضم صوتي لصوتك معك كل الحق فيما قلته
    5 اذا كان المثل بيقول طباخ السم بيذوقه وانت عاوز وزير الصحة ميعالجش مراته على نفقة الدولة انت فاكر نفسك عايش في عهد عمر بن عبد العزيز اللي كان بيطفي الشمعة اللي من بيت مال المسلمين لو حيتكلم في حاجة شخصية
    6

    ReplyDelete
  4. أن جه العيب
    من اهل العيب
    ما يبقاش عيـــب
    مثل اتعلمناه من أهلنا زمان
    وكمان مثل تانى إذا لم تستح فأصنع ما شئت
    فالرادع ممكن يكون الدين او المجتمع او الضمير
    إذا فُقد الثلاثة فماذا تنتظر من الاخريين؟؟
    لاشىء طبعا صرنا بغابة يصنع كل فرد فيها(طالما له ظهر)ما يشاء وأكثر مما يشاء

    ReplyDelete
  5. بص يا عم احمد انا مبسوطة انك خرجت اللى جواك شاهدات قويةمتخرجش غير من حد واعى بس ليا اعتراض على النقطة الاخيرة اى انسان بيحب يتعالج ف افضل مكان يبقى لو بنحط نفسنا مكان الشخص هنقدر

    ReplyDelete
  6. احنا ايه اللي وصلنا لكده ؟ايه اللي خلا اهم حاجه في مجتمعنا السينما و الكوره و المظاهر و الوضع الاجتماعي -مين المسئول عن حاله الفوضي الفظيعه دي ؟ ليه مستوي احترام البني ادم عندنا اقل من كل العالم؟لا حول و لا قوه الا بالله -اكيد احنا جزء من السبب -بس دلوقتي عايزين نفكر في حل سريع نلحق بيه اخواتنا و اولادنا-و يا تري المسئولين الكبار بيسافروا يتعالجوا بره ليه هوه مستوي الطب و الدكاتره و الاجهزه الطبيه اي كلام و لا ايه ؟؟؟؟؟؟طبعا زي الزفت و الطين علي دماغهم كلهم -عفوا و لكن بقي لي يومين بفكر في الموضوع ده احنا ساكتين ليه و لو اتكلمنا هنقول ايه و لمين-الشكوي لغير الله مزله حسبنا الله و نعم الوكيل-

    ReplyDelete
  7. لفت نظري وبشده موضوع وليد صلاح الدين
    وبحاول أقول أي تعليق عليه ولكن مش عارف
    يعني ده مثلا بيمثل الحب اللانهائي ولا ايه انا مش عارف
    أو ايه الهدف من شيء زي ده الله أعلم بردو
    _________
    بالنسبه لبتوع السيما
    انا بس نفسي انهم يقولوا مرة واحده ان الكباريهات الموجوده في مصر مفتوحه خصيصا للزبائن العرب مش المصريين
    ودائما ما يهاجمون بنات مصر بشكل قذر والاخوه العرب لأنهم عندهم عقل ربنا ما يحرمهم منه بيفتكروا ان الحال في مصر زي ما بيشوفوه في أفلام السيما
    ___________
    شيء عادي ان يتم علاج زوجة وزير الصحه على نفقه الدوله
    الراجل له تامين صحي له وللعائله
    لازم يستفيد منه
    هو هايدفع من جيبه ولا ايه- هي سايبه يا دكتور؟

    ولا تنسى ان السيد الرئيس سبق له وأن أجرى فحوصات على اذنه في ألمانيا منذ سنوات
    يعني عمليه المراره أرحم بكتير، اهي اسمها عمليه
    اما فحوصات على ودانه دي اللي كتير اوي اوي

    ReplyDelete
  8. معاك حق انا اعترضت على كلامك في المقال بتاع الفالنتين بس لازم اقولك ان معاك حق في الباقي كله مش هعلرغ اكتب اكتر من كده لان(مرارتي( اتفقعت من الاستفزازااااااااااااااااااااااااات دي كله

    ReplyDelete
  9. 1-الأخ/أحمد الطيب ربنا يهديه ويصلحه باع الأزهر لصالح الحزب الوثني وعلى ٍرأيك هذا التصريح من أزهري علمه الأزهر حتى الدكتوراة ونحن وتنكر له وللمسلمين لصالح الحزب الحاكم وكلنا نعلم من أين يأتون هؤلاء البشر؟؟!!من قاع المجتمع ليتعلم في الأزهر الشريف ويصبح عالمآ بصم وحفظ المواد بدون فهم
    2-أصبحت البرامج الدينية زي برامج المنوعات وهذا يعتبر -في نظري -استخفاف بالدين
    3-ناس فارغة من جوه ومن بره
    4-أختلف معاك فالسينما الحلية مرآة القوادين والسفلة والخارجين عن القانون..وعندما أشاهد فيلم الآن أحس ان أنا مش مصري أو هم بيحكوا عن بلد تانية
    5-أما علاج زوجة حاتم الجبلي على نفقة الدولة وعلاج عيون بطرس غالي وزير الجباية والاتاوات المفروضة على شعب مصر ..دي تصفية حسابات بينهم -واذا اختلف اللصوص ظهر المسروق
    5-أما وزراء الأردن المحترمين فأقول لهم ضربتم مثلآ في الايثار وانكار الذات -ليت حاشية الرئيس عندنا يعرفوا انهم ح يتحطوا في القبر وح يموتوا من الضرب
    6-حسبي الله ونعم الوكيل أقولها نيابة عن كل مريض فقير لم يجد أحدآ يساعده وربنا يرحم كل مريض مات لأنه لم لم يجد ثمن الدواء

    ReplyDelete
  10. يا سيدى لازم تتوقع الاجابات من تاريخه فى رئاسه جامعة الازهر واسلوبه
    وبعدين فى اغنيه لمحمود عبد العزيز بتقول يا حلو بانت لبتك اول ما دابت قشرتك
    :))
    اما عن الفضائيات فهى كلها قايمه على عنصر الاثاره والتشويق والفضايح ووبيظيطوا فى اللمه وهم تلات اربعهم ميعرفوش عن البطيخ ولا يصلحوا يكونوا قدوه
    .........
    لعيب الكوره ليه حق يعمل اكتر من كدا اللى معاه قرش محيره يعمل فرحه مرتين ويغيره:))
    ............
    السينيما السيئه بدات بافلام سى خالد يوسف وفكره الجديد فى سينيما واقعيه بلا قيود وبدا اسهال الافلام الزباله ينزل بتصوير واقع سودوى منيل واى هيصه وخلاص ويطلعوا يقولك بنناقش قضيه وهم ابعد ما يكونوا عن مناقشه اى قضيه
    حتى انهم محصلوش خالد يوسف فى افلامه على الاقل بيبقى فى فكر وبيبقى فى مناظر مش محترمه انما افلامهم كلها بقيت مناظر وقرف وبياخدا الوحش ينشروه ويكبروه وهم لا يفقهوا شىء عن البطيخ
    .................
    وبنتريق على سحس بومب عشان حيعمل مرارته برا :))
    ....................
    يعنى هو ملوش نفس زى مرات الوزير يعنى

    ReplyDelete
  11. اصلا اللي يعرف الطيب او يسمع عنه استحاله يكون متفائل باي شكل بمنصبه الجديد

    تصدق قد ماخبر وزراء الاردن فرحني لكنه زعلني علي حالنا

    ReplyDelete
  12. اقولهالك بصراحه
    مؤسسه الازهر انهارت من زمان ومابقاش فيه اي مؤسسه دينيه في مصر وانا لا اعترف بسلطه الازهر عليا كمسلم مصري لاني اري انها تخدم النظام وتغيب عقل المسلمين وليس لها اي دوري قيادي اسلامي بتاتا


    وليد صلاح الدين زي مابيقولوا رزق الهبل علي المجانين
    الناس عايزه تعيش مع نفسها وطز في اي حد تااني


    اقرا كتاب بلال فضل الاخير ضحك مجروج وهتضحك الي درجه البكاء في موضوع البرامج الدينيه الجنسيه
    احنا شعب مريض


    بالنسبه للسينما
    ماتقدرش تجمع كل صناع السينما في خانه واحده
    امثال خالد يوسف وافلام من نوعيه احاسيس دي افلام زباله مقززه

    عاطف الطيب ووحيد حامد وداوود عبد السيد ويسري نصر الله دول الي عملوا سينما في مصر حتي لو كانوا بينتقدوا الاوضاع الاجتماعيه في بلدنا

    ReplyDelete
  13. Anonymous:
    لا يا عم الفيزراوي
    التيسير غالية و تلاقي التأمين الصحي بتاعهم مش شامل التيسير

    ReplyDelete
  14. medzag:
    لو انت شرقاوي و دكتراوي
    يبقى اكيد نعرف بعض كلنا

    ReplyDelete
  15. خواطر شابة:
    لا....تقريبا هو قرر يمشي بداخل الحيط مش بس جنبه
    بالنسبة لتورتة الاعلانات...احنا غالبا اللي بندفع فاتورتها من اعصابنا
    المفروض ان الاعب المذكور على درجة عالية من الاخلاق و التدين...بس مش عارف ايه التصرف دة؟
    مستفزني قوي
    بالنسبة لعمر بن عبد العزيز...الله يرحمه و يرحم ايامه....راحت بلا رجعة

    ReplyDelete
  16. اولا تقبل تحياتى و اعجابى باسم مدونتك


    بشكل عام البرامج الدينية اصبحت بزنس كبير و كل همهم الربح و رسائل الموبايل و زيرو تسعمئة فمن الصعب الوثوق فى اى حد سوى عقلى

    ReplyDelete
  17. تصدق انك أستفزتنى اوى
    و خاصة بموضوع الفرح التانى ده
    هو بيحصل بره مش هنا ربما لأن مستوى معيشتهم أحسن هناك
    بس يحصل هنا ليه؟؟

    ReplyDelete
  18. norahaty:
    بس على كدة اهل العيب في الزمن دة اصبحوا اغلبية كاسحة

    ReplyDelete
  19. ههههههههههههههههههههههه
    لاتعليق بجد
    احسن حاجه لى اى حاجه مستفزه انه مايتردش عليها

    ReplyDelete
  20. Anonymous:
    بس دة مش اي واحد......دة رئيس الجمهورية
    و لازم يكون قدوة للشعب
    خاصة ان العملية مش خطيرة

    ReplyDelete
  21. Anonymous:
    انا عن نفسي بأشوف ان السبب في حالة التردي و التدهور الرهيب اللي احنا فيه دة هو انقلاب يوليو 52
    اللي وصل مصر تدريجيا الى ما نحن فيه حاليا

    ReplyDelete
  22. لورنس العرب:
    بالنسبة لوليد صلاح الدين اعتقد ان دة نوع من الفراغ مع الفلوس الكتير
    لما الفلوس بتكتر مع وجود فراغ في التفكير بينتج عنها ماحدث
    بالنسبة للسينما لازم بعض العرب يعرفوا ان اقذر اماكن عندنا معمولة علشان انضف ناس عندهم يزوروها
    بالنسبة للصحة في مصر من الواضح ان فخامته يثق فيها جدا

    ReplyDelete
  23. Anonymous:
    مرارتك اتفقعت...............المانيــــــــــا على طوووول

    ReplyDelete
  24. Anonymous:
    بصراحة.....غير متفائل على الاطلاق بمستقبل الازهر مع فضيلته
    ليس لشيء الا لأن المناخ العام كله فاسد
    البرامج الدينية كلها اصبحت ذات صبغة جنسية بشكل فج
    اما العلاج على نفقة الدولة فلقد اظهرت بعض التصرفات للسادة الوزراء كم هي منكوبة هذه البلد

    ReplyDelete
  25. سومة....مجنونة في بلد عاقل:
    بس دي لبته بانت من بدري قووي
    بالنسبة للفضائيات اصبحت تتنافس في الإسفاف للأسف الشديد
    بالنسبة للاعبي الكرة للأسف الشديد نحن في زمنهم
    تحياتي

    ReplyDelete
  26. esraa:
    موقف الطيب من طلبة الاخوان لا يزال في الاذهان
    مهزلة بكل المقاييس

    ReplyDelete
  27. dr.lecter:
    مؤسسة الازهر انهارت عندما قرر قادة انقلاب يوليو 52 ان يجعلوا اختيار شيخ الأزهر بيد رئيس الجمهورية شأنه شأن اي موظف
    وليد صلاح الدين بجد موقفه مستفز جدا و لم يكن منتظر منه اطلاقا

    ReplyDelete
  28. tears:
    الف شكر ليكي و منورة المدونة دائما

    ReplyDelete
  29. احمد بلال:
    هو بيحصل هنا لعدة اسباب اهمها وجود الفلوس بالكوم مع ناس لا يقدروا قيمتها
    و كمان لأن الناس فقدت قيمة الإحساس ببعضها
    تحياتي

    ReplyDelete
  30. meroooo:
    و حتى لو رديتي....هتفضل برضة امور مستفزة
    تحياتي

    ReplyDelete
  31. إيه يا عم حرقة الدم دي
    طب خد عندك..حفيدة الريس اتولدت في انجلترا..أصل مفيش مستشفيات ولادة في مصر
    !

    ReplyDelete
  32. انا مش هقول غير كلمه واحده بس

    حســـــــــــــــــــــبي الله ونعم الوكيل

    امتى بقه مصر هيتصلح حالها

    يعني انا واحده من الناس كنت مستنية محمد سيد طنطاوي ده يتعزل عشان يجي واحده عدل

    هنقول ايه بقه حسبنا الله ونعم الوكيل وربنا يصبرنا

    ReplyDelete
  33. micheal:
    و الله لازم يتقدم استجواب بخصوص الموضوع دة
    دي مهزلة

    ReplyDelete
  34. asfourelgana:
    ماهو طول ما الأوضاع بالشكل دة
    عمر ما هييجي واحد عدل
    تحياتي

    ReplyDelete
  35. أعلق على إيه ولا إيه ولا إيه
    أعلق عاللي راح ولا اللي جاي ولا إيه
    أعلق عالأفلام! ولا عالإعلانات؟
    أعلق الوزارة والحكومة ولا المتسولين؟

    لك الله يا مصر

    ReplyDelete
  36. e73:
    هو دة المفيد
    لك الله يا مصر

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails