Thursday, 18 March 2010

حقوق أه.....واجبات لا


بداية و قبل كل شيء اقر و أعترف بأحترامي و تقديري الكامل للمرأة بأعتبارها كائن عاقل عقلها لا يقل ابدا كفاءة و قدرة عن عقل الرجل ان لم يكن يفوقه في احيان كثيرة
فمن الناحية الأقتصادية -على سبيل المثال- ارى ان المرأة اكثر حنكة و رؤية اقتصادية تفوق الرجل بمراحل و هذا ما شجع العديد من الأزواج على تولية زوجاتهم شئون المنزل الإقتصادية مثل الميزانية او ما يطلق عليه بالتعبير المصري (مصروف البيت) و ايضا تربية الأولاد......الخ
كانت هذه مقدمة لابد منها حتى استطيع ان ادخل في هذا الموضوع الشائك
اتابع بشغف الجدل الدائر بين المؤسسات القضائية حول تعيين (قاضيات) بمجلس الدولة ما بين مؤيد و معارض....و انتقال هذا الجدل الى المجتمع المدني
فدعاة (المساواة) و (جمعيات حقوق المرأة) يرون ان تعيين (المرأة) كقاضية هو حق لها و (بديهة) من بديهيات الحياة و انها خطوة طبيعية تأخرت كثيرا
اما المعارضون لهذا التعيين فيروا انه لا يصح ان تتولى المرأة القضاء لأسباب عدة بعضها ديني و بعضها اجتماعي و بعضها يرجع لأسباب (فسيولوجية) تخص طبيعة المرأة قد تقلل من (هيبتها) كقاضية كالحيض او الحمل..........الخ
لست من مؤيدي المنطق (المؤيد) على طول الخط.....و لست ايضا من (اعداء) المرأة الذين يروا انها لا تصلح الا وعاء لإفراغ شهوة الرجل
لي فلسفتي الخاصة في هذا الشأن و تتلخص في الأتي:
لا يوجد اي مانع في ان تتولى المرأة اي منصب سواء "قاضية" او غيره....و لكن بشرط.....اذا ارادت المرأة ان تتساوى بالرجل فلتكن (المساواة) كاملة...في الحقوق كما تطالب المرأة و ايضا في (الواجبات) كما يطالب الرجل
اذا ارادت المرأة ان تحصل على حقوقها كاملة مثل الرجل....فلتؤدي كل واجباتها كاملة ايضا مثل الرجل....اي ان المطلوب ان يتعامل الرجل و المرأة داخل المجتمع كمواطن بصرف النظر عن صفته التشريحية ذكر او انثى
بمعنى انه اذا اردنا (المساواة) بين الرجل و المرأة فلابد من الغاء عربات (المترو) المخصصة للسيدات فقط بأعتباره نوعا من التمييز لا مبرر له في ظل (المساواة) الكاملة بين الرجل و المرأة خاصة اذا اخذنا في الإعتبار ان السيدات يزاحمن الرجال في العربات المشتركة بينما لا يمتلك الرجل هذه الميزة في عربات (المترو) المخصصة للسيدات
قضية قد تبدو تافهة.....و لكنها (مؤشر) على ازدواجية الفكر لدى (دعاة المساواة بين الجنسين)
اذا ارادت المرأة المساواة الكاملة فما الداعي لتمييز المرأة بشواطىء خاصة يطلق عليها شواطىء (المحجبات) في الساحل الشمالي محظور دخول الرجل اليها بحجة انها مخصصة للسيدات و لا يجوز للرجل ان يخدش حيائهن بوجوده و يقلق راحتهن في شواطئهن بينما المرأة تزاحم الرجل في الشواطىء المفتوحة على الرغم ان هذا قد يضايق (بعض) الرجال الملتزمين دينيا الراغبين في الأستمتاع بالشاطىء بدون وجود اشياء قد تؤذي مشاعرهم كالمايوهات و الملابس العارية......الخ.
لماذا لا يطالب دعاة المساواة بين الجنسين بضرورة ان تؤدي المرأة الخدمة العسكرية مثلها مثل الرجل بأعتبارها متساوية مع الرجل في كل شيء في الحقوق و ايضا في الواجبات,و بما ان تأدية (الخدمة العسكرية) واجب وطني على كل مصري فلماذ لا تؤدي المرأة هذا الواجب المقدس؟
لماذا تتعلل المرأة بطبيعتها (الأنثوية) الخاصة في رفضها لأداء بعض الأعمال (الشاقة) و اعتبار انها لا تناسب (ظروفها) و (طبيعتها الأنثوية ) ....فأذا تتطلب عملها السهر لوقت متأخر خارج المنزل او السفر لأيام....اعتذرت فورا و كلفت (زميلا) لها للقيام بهذه المهمة الشاقة
و لكن اذا حانت (ساعة الترقية) فهي الأولى بالترقية طبعا....فهي الأكثر كفاءة و الأكثر خبرة و الأذكى و الأقوى و الأروع.......الخ
لماذا لا يطالب (دعاة المساواة) بضرورة ان تتقدم المرأة ب (طلب يد) من تريد ان ترتبط به...بل و تقدم المهر و تشتري الشبكة و عليها ان توفر (شقة) الزوجية اسوة بالرجل؟
لماذا هنا تنهار (المساواة) بين الرجل و المرأة لتظهر المرأة بشخصيتها الرقيقة المستأنسة؟
و الكثير و الكثير من الأمثلة الحياتية البسيطة التي رغم تفاهتها تثبت ان دعاة (المساواة) بين المرأة و الرجل لا يطالبوا الا بحقوق المرأة و في احيان كثيرة جدا نجدهم يغضون الطرف عن واجباتها و التزاماتها تجاه المجتمع.
في النهاية أقر انني لا يوجد لدي اي مانع في ان تتولى المرأة القضاء او حتى ان تكون رئيسة للجمهورية فهذا حقها....و لكن اذا اردنا المساواة بين الرجل و المرأة فلتكن مساواة كاملة غير منقوصة كل يؤدي ما عليه من واجبات قبل ان يحصل على حقوقه كاملة.

31 comments:

  1. ما تخبطش فى الحلل يا دكتور أحمد.... انت عايز المرأة تتقدم هى وتطلب يد الرجل
    وبتطالب كمان بدخولها الجيش والالتحاق بالخدمة العسكرية... على فكرة انا متأكد ولدى المعلومة الموثقة بان الجيش سيكون افضل معنويا بكتيير
    وياريييت يا سيدى

    ReplyDelete
  2. السلام عليكم :ممكن اعرف ليه سميت مدونتك الاغلبيه الصامته؟
    اما بالنسبه لموضوع المساواه و تعيين المراه قاضيه فانا غير موافقه لان المراه غير الرجل و عمرها مهتكون في مساواه بالرجل لان ده فيه ظلم لها مع تاييدي ان نسبه كبيره من السيدات رايهم حكيم و صائب و لكن الله سبحانه و تعالي خلق المراه وخلق فيها تعاطف و احاسيس رقيقه جدا لتوافق المهمه الرئيسيه لها وهي السكن للزوج و الرعايه و الحنان للاولاد و الدف للعائله باكملها-و العاقلات من النساء من يوقن في قراره انفسهن ان دور المراه في المجتمع اعمق بكثير من توليها المناصب -التي في راي انها شكليه فقط-

    ReplyDelete
  3. ياريتهم علموا المرأه أي حاجه
    لكنهم علموها فقط المساواه وإن خانك جوزك لازم تخونيه
    وما طرحته من مساواه لن يستطيع احدهم التحدث فيه
    لأن هناك خطوط حمراء لا ينبغي لك أن تتحدث فيها فيما يخص المرأه
    فقد عملوا لهم عربات خاصه بالمترو- وعلى الرغم من ذلك يركبون في عربات الرجال
    وتشكي من المضايقات في المواصلات والزحام على الرغم من انها نزلت من البيت برغبتها ويجب عليها ان تتحمل نتيجة قراراها مهما كان
    وإن تعرضت لأي مكروه قالت أن السبب في أن الرجال أصبحوا وحوش ويجب على العالم ان يعيد الانضباط للشوارع من اجل المرأه
    ولله انا عن نفسي تعبت من الموضوع ده وحاليا لا أعرف ماذا تريد المرأه أو من يدافعون عنها خاصة في المجلس القومي للمرأه
    فيه حاجه واحده هي الاكيده في المووع ده
    وهي ان المساواه مهما كانت فلا يمكن أن تكون في دفع الفلوس
    عند دفع الفلوس فده عيب لأن انت الراجل
    وعاوزها هي تطلب ايد الرجل
    أهو ده المستحيل
    وتدفع كمان
    ده بأه اللي لو راع المستحيلات تحقق فده لن يتحقق

    ReplyDelete
  4. ومن قال ان كل النساء يرغبن في المساواة لم نعد نرغب بها ولا نطالب بها لكن في المقابل نريد مراعاة الله فينا فسياسة الكيل بمكيالين التي ينتهجها المجتمع والصفة والتفكير الذكوري الغالبين على المجتمع كل هذا يجعل النساء ينتفضن ويبحثن عن حقوقهم الضائعة لكن احيانا يغالين في ذلك خصوصا بالنسبة لي عندما يناقشن أحكام الله كالارث والتعدد.
    انا معك ان المساواة يجب ان تكون في الحقوق والواجبات ايضا وانه ليس من العدل في شئ المطالبة بالمساواة في الحقوق وحدها
    تحياتي لك

    ReplyDelete
  5. أولا لازم نعرف الفرق بين الشرع والعرف يعنى المساواة بين الست والراجل واجبة شرعا أما كونها مابتطلبش ايده مثلا فده عرف يختلف من بلد لبلد أما تخصيص عربة للسيدات فده يخضع للاداب العامة لان الست هى اللى بتتعرض للتحرش والمضايقات مش الرجل لكن اللى شايفة نفسها قادرة على ردع اى متجاوز فتركب فى اى مكان وبرضه ده مش موجود فى كل البلاد .. عموما الست قادرة على القيام بكل ما يقوم به الرجل طالما اعتمد على العقل والتفكير والاختلاف الوحيد فى القوة الجسمانية ودى حاجة ليس لهم يد فيها ومن ثم ماينفعش تطالبها بالخدمة العسكرية متحديا ارادة الله فى خلقه وهذا نوع من الصفصطة كما ان المرأه فى حالة الحرب تقوم بأعمال لاتقل أهمية عما يقوم به الرجال وبعدين انت نتتكلم عن ضرورة أداء المرأة لواجباتها وفين الراجل اللى بيؤدى واجباته دلوقت .. يابنى أنا اتعاملت مع أكثر من 15 شغالة كلهم بيشتغلوا والتور قاعد فى البيت وممكن يكون بيحشش أو بيضربها وياخد فلوسها أو أو ولو الست مابتقومش بواجباتها ماكنتش انت وغيرك بقى لكوا شخصية ورأى تكتبوه..الخلاصة لو رجعنا لربنا وكل واحد عرف اللى ليه واللى عليه مش ح تكون فى أى مشكلة ومش ح نكون محتاجين عربية سيدات ولا غيره وح نعرف ان الحمل والحيض والولادة لايعيبوا المرأة ولايشينوها وعمرهم ما عطلوها عن أعمال البيت الشاقة وتربية الاطفال خاصة بعد تراجع دور الراجل والقاء الحمل عليها وأنا بتعجبنى مقولة ان الست نصف المجتمع وتربى النصف الآخر

    ReplyDelete
  6. انا كنت مستنيه انك تفتح الموضوع ده بس ماكنتش متخيله انك هتفتحه بالشكل ده وانك تتافه منه قوى انا معاك فى انك ماعندكش اعتراض فى اننا نكون قاضيات..لان ده حقنا وفى كل حاجه لينا حق ودينا الاسلام بيقول كده برضه وانا معاك فى اننا ندخل الخدمه العسكريه واننا نروح ونطلب ايد اللى عايزين نتجوزوا مع انه ده بيحصل بس بشكل تانى لاننا بنساعد فى الجوازه زينا زيه واحيانا فى سيدات بتساعد بااكتر مع ان زمان ايام جدتى وجدك كان على الراجل انه يتحمل مسؤليه البيت كلها وهى تروح بشنطه هدومها

    ReplyDelete
  7. لكن دلوقتى هيا بتساعده فى كل حاجه وكل حاجه بالنص اما بقى اذا جينا على حته انه يتلغى عربه السيدات فى المترو والشواطئ المخصصه للمحجبات وانت بتقول للمحجبات يعنى محجبه لو عايزه تنزل المايه براحتها تنزل قدام الرجل عادى يعنى عشان تبقى كده تحت مسمى انها المساواه فى كل حاجه يعنى احنا نسيب الاساس ونمسك فى الديل وعربه المترو اتعملت عشان يعنى يقلل شويه من التحرشات والاستهبال اللى بيحصل على كده بقى على نفس وطريقه كلامك انه زى ما الراجل بيتحرش بالست هيا كمان تتحرش بيه مش مساواه برضه
    لااحمد مابتحسبش كده بتتحسب فى انه الست زى الرجل فى العقل والتصرفات ممكن تتصرف لوعندها المساحه اللى تقدر تتصرف فيها لكن احنا جوانا عقده من ان الست ممكن تاخد منصب كبير وتكون هيا صاحبه القرار مع ان كليوباترا موجودا وغيرها بس دول مش بنفتكرهم كتير
    وشكرا على الموضوع واسفه لو كنت قولت حاجه مش عجبتك

    ReplyDelete
  8. على فكرة كون المرأة تعمل بالقضاء مش معناه المطالبة بالمساواة ومالوش علاقة بالمساواة من قريب ولا من بعيد لان السيدة كإنسانة من حقها تعمل بأي شىء طالما انها ستجتهد في عملها لان الله خلقها لها نفس الارادة و الطموح و حب النجاح
    محدش يقولي دي عاطفية والكلام الفارغ دة - انا مفيش مديرة مسكتني وحسيت فيها بذرة عواطف ولا نيلة
    عادي
    اساسا مفيش حاجة اسمها مساواة الرجل رج و الست ست عادي
    بس ربنا خلقهم متساويين في الصواب و الخطأ و اللي تقدر تعمله يقدر يعمله والعكس
    الارادة الانسانية واحدة
    بس احنا اللي بنفرق
    عربية الستات يا سيدي العزيز للحماية مش لان المرأة لا سمح الله أعلي
    ليك اخت او ام او بنت خالة , اسألها ولا بلاش تسألهن
    حضرتك شوف نظرات الشباب والرجال تنهش من تغطي ومن لا تغطي وكلهن متساويات في العيون الذكورية
    لاحظ من في قلوبهم مرض ولا يفكرون بالمساواة قيد أنملة بل يفكرون فيم يشاهدونه عالدش و اليوتيوب فقط لا غير ومستعدون لمغازلة فرخة أو قلة
    ان عربية السيدات تحمي النساء العاملات المحترمات ليس من المفترض أن تجلس في البيت حتى تحمي نفسها من " الذئاااااااااااااب " ليه ؟؟؟
    فين المساواة بأة يعني البنات يعاكسوا الولاد عشان نبقى خالصين ؟؟؟ ويتحرشوا بهم ؟؟؟
    ييجي يتحرش بها تقوم تتحرش بيه هي كمان ؟؟؟؟
    حلوة دي مش كدة ؟؟؟
    تحياتي
    سها المنياوي

    ReplyDelete
  9. هو حضرتك عايش فى "مصر"؟ مش عارفه ليه التدوينه دى حسستنى إنّك بتتفرّج عليها من الفضائيات !!


    الحقيقه التدوينه دى بتثبت إن فيه خلل فظيع فعلا فى طريقة تفكيرنا !! ببساطه لأن من حق المرأه أن تعمل قاضيه من غير سفسطه غريبه عن علاقة هذا بالمساواه و المجتمع الذكورى و دخول النساء للجيش !! مايبقاش فيه تفرقه غير مفهومة الأسباب و تتناقض مع الدستور و نيجى إحنا نبرّرها بكلام من نوعية "ادخلوا الجيش" و "أدّوا واجبكم" .. ببساطه لأن مش كل الرجّاله أصلا بتدخل الجيش ده فقط اللىّ أهله عندهم أكثر من ولد صبيان !! فيا ترى مش بتطلب من الأسر ذات الصبى الواحد تدخّل ولادها الجيش ليه و يؤدّوا واجبهم ولاّ انت شايف الستّات أجدع منهم !! و كتير من الرجاله - رجال كصفه تشريحيه- بيتهرّبوا من الخدمه العسكريه
    و كتير تانيين بيروحوا الجيش و يخرجوا زى ما دخلوا و كتير بيبقوا زعلانين خالص و بيعدّوا الأيّام و الليالى لحد ما تخلص مدّة الخدمه وبابى و مامى بيعيّطوا على بهدلتهم .. فموضوع الخدمه العسكريه الأكرم للرجال مايتكلّموش فيه لأنّه هيسيئ لهم أكتر من أى طرف تانى ..

    فيه قدر كبير من الخلط على طريقة "سمك لبن تمرهندى" فى منطقك !! يعنى موضوع الشواطئ المخصصه للنساء مرتبط برغبة المرأه فى نزول البحر من غير ما ترتكب حراما و هو ما يمكن للرجل أن يمارسه لو غضّ البصر عن العاريات على الشواطئ .. الرجل لا يكتفى بأنّه عورته محدوده لا تعيقه عن لبس المايوه و يريد كذلك أن يستمتع بالشاطئ و البحر و الطبيعه الخلابه و الحل الوحيد بالنسبه له إقصاء النساء من المكان !! بينما النساء و بسبب خلقة ربنا و كون جسدهم كله عوره محتاجين تخصيص مكان لهم عشان دى خلقة ربنا !! لو الفكره مش واضحه ممكن أستهبل و أقول لك الراجل يحمل مره و الست تحمل مره و أدوا واجبكم فى إنجاب الاطفال لكن الإجابه البديهيه يا دكتور إن دى بيولوجيا و طبيعه و خلقة ربنا !! مش البيولوجيا هى حجتكم لمنع النساء من العمل فى القضاء !! بتنسوها ليه وقت طلبهم تخصيص شاطئ !! هو مين اللىّ بيغتصب مين و مين اللى بيتحرش بمين !! ولاّ هو رصّ كلام و السلام و دى قصاد دى !! طيب الست بترضّع العيال شوفوا لكم حلّ و رضّعوهم ولاّ الست بس اللىّ تحمل و ترضّع !! بجد شئ مؤسف مستوى التفكير اللىّ وصلنا له ده و لله الأمر

    ReplyDelete
  10. الراجل راجل والست ست
    ومفيش حاجة اسمها مساواة كاملة

    ReplyDelete
  11. ههههههههههه انت اللى جبته لنفسك شكلك هتضرب بعد البوست ده الحق استخبى قبل ما يوصلوا لك بقى بتقول ندخل الجيش ونلغى عربيه السيدات قول على نفسك يارحمن يا رحيم نبقى قضاه وسفر ووزرا ورؤسا كمان انما جيش لا ارجع لعقلك يا ابنى قبل ما يقيموا عليك الحد هههههههههههههه انا عن نفسى ارى ان للرجل قوامه فى اشياء لاتقدر عليها المراه وللمراه اعمال لايستطيع ان يقوم بها غيرها وسلم لى على المساواه قال جيش قال

    ReplyDelete
  12. انا رايى انك اردت ان تقول شيئا وخانك التعبير انا اعلم تماما انك تحترم المراه وتقدر رايها وتبارك نجاحها ولكن عند\ما نقول مساواه فلا يمكن ان نتخطى الشرع والمجتمع الشرع الذى اقرها صريحة الرجال قوامون على النساء داخل المنزل اذا امرتها اطاعتك اما عندما تخرج المراه لممارسة العمل فالكفاءة هى المعيار التقييمى لها وانا عن نفسى مهما تتطلب الامر ف عملى اؤديه وبمباركة من زوجى وتشجيعه يعنى ناكل جاهز بس احضر اجتماعاتى واخلص شغلى بالنسبة لعربية المترو دى ذوقيات نظرا للانهيار الاخلاقى للمجتمع وبعدين بالنسبه لطلب الايد انا كنت مقتنعه تماما انى لو قابلت حد وعجبنى مااخجلش ابدا انى اطلب ايده بس بما لا يجرح كرامتى وبما انك بتنادى بالمساواه فمن بكره ان شاء الله اوعدك اطبق المساواه بينى وبين جوزى يوم هو يطبخ ويوم انا ويوم انا انضف والتانى عليه وهبقى ابلغك النتيجة ادعيلى

    ReplyDelete
  13. مساواة الراجل بالمراة
    من الواضح من كلام حضرتك انك عايز تساوى الراجل بالمراة لان المراة اساساً معندهاش اى مشاكل بالنسبة لموضوع المساواة علماً بأن المميزات الموجوده للمراه مش بهدف التميز و لكن بهدف عدم التحرش حضرتك و ده بالنسبة للمترو و الشواطىء و غيرها و لكن من حيث الواجبات فالمراة اساسا بتقوم بواجبات اكثر من الراجل و ده طبعا بالنسبة للمراة العاملة اللى بتساعد الزوج فى مصروف البيت فمثلا المراة بترجع من العمل تقوم بتنظيف البيت و اعداد الاكل و الغسيل و العناية بالاطفال فضلاً عن العناية بالزوج حضرتك الزوج بقى بيعمل ايه غير انه يجى من الشغل عايز ياكل و يدخل ينام علماً بان الاتنين بيصرفوا على البيت

    ReplyDelete
  14. مش عارف أقول ايه يا أحمد..يعني أنا مثلا في موضوع بسيط زي المترو..اه طبعا مش عاجبني فكرة عربية للنساء فقط بس هل أقدر أنكر مثلا وجود موضوع زي التحرش والمضايقات سواء في المترو أو غيره
    بص أنا عن نفسي مقتنع بنظرية ال50-50 عموما في الشغل في الجواز ..الخ
    يعني مثلا مش الراجل اللي يجيب ويصرف والست مش عليها دور
    والا تتجوز مكنة اي تي أم أسهل
    :)
    يعني بحب فكرةالمشاركة عموما..يبقى البيت مشارك فيه الاتنين
    وفي الشغل ليس عندي اي تحفظان: قاضية -رئيسة وزراء- رئيسة جمهورية
    المهم الكفاءة عندي ودي مالهاش غلاقة بالنوع ومش بقتنع بموضوع أصل العاطفة هنا وأصل العقل هنا..الخ
    تحياتي

    ReplyDelete
  15. Anonymous:
    بيتهيأ لك على فكرة
    بالعكس بقى
    الجيش ساعتها هيبقى خنيق جدا....و هيبقى فيه خيار و فاقوس
    و هتبقى معايير التعاملات داخل الجيش مختلفة تماما
    تحياتي

    ReplyDelete
  16. Anonymous:
    بداية انا سميت المدونة الاغلبية الصامتة علشان اغلبية الشعب المصري و انا منهم صامتون عن ممارسة حياتهم السياسية و المشاركة في اية نشاطات حزبية او سياسية او اجتماعية
    و النسبة دي اعتقد انها نسبة كبيرة جدا....اغلبية كاسحة
    فعملت المدونة دي لكي تكون صوت واحد من هذه الاغلبية الكاسحة
    بالنسبة لرأيك...كلام جميل جدا و غريب ان يصدر من عنصر نسائي
    طبيعة المرأة تختلف عن طبيعة الرجل و لكل وظيفته
    بس مين يقرا و مين يسمع

    ReplyDelete
  17. انا دايما رأيي المتواضع ان ليه الست دايما حاسه انها اقل علشان تطالب بالمساواة ؟

    انا عن نفسي شايفة انى مش عندى نقص ولا اقل من الرجل في الاهمية علشان اقول مساواة
    الموضوع ان كل لما خلق له

    ودى فطرة ربنا اللى خلقنا عليها
    الست لها دورها والرجل له دوره
    ولن تستقيم الحياة اذا تغيرت الادوار

    طبعا مع مراعاة احترام المرأة وعدم التقليل من اهمية دورها حتى لو هى في البيت

    ميرسي اوى لزيارتك مدونتى المتواضعة
    ونورتنى بجد
    وبعتذر لو كان البوست اللى عندى سبب لك اى الم
    ميرسي ليك مرة تانية

    ReplyDelete
  18. لورنس العرب:
    تصدق....المرأة نفسها لا تعرف ماذا تريد هي شخصيا
    المساواة عندما تكون المصلحة في المساواة
    و الطبيعة الخاصة للمرأة عندما يتطلب الأمر كذلك
    مخلوق عجيب

    ReplyDelete
  19. خواطر شابة:
    كلام رائع صادر عن عقل نسائي متزن
    فعلا المساواة اما في الحقوق و الواجبات و الا فلا
    تحياتي

    ReplyDelete
  20. Anonymous:
    مبدئيا...اكرر كامل احترامي للمرأة ككائن عاقل بالغ يستطيع القيام بالكثير من المهام التي يعجز الكثير من الرجال على القيام بها

    ReplyDelete
  21. merooo:
    مبدئيا يا ميرو هو ليس تسفيها من الموضوع و لكني وضعته في قالب من الفانتازيا الساخرة
    انا مقتنع تماما بأهمية المرأة ككائن عاقل...يستطيع القيام بمختلف الوظائف المختلفة
    وزي ما قلت لك...هو قالب فانتازي بحت
    و طبعا لا داعي للأسف انتي لم تقولي اي شيء ازعجني...و حتى لو اختلفنا في الرأي..دة هدف المدونة الاختلاف في الرأي و النقاش الهادف
    تحياتي

    ReplyDelete
  22. سها المنياوي:
    طيب لما العربات الخاصة بالسيدات و الشواطىء الخاصة...الخ بغرض الحماية...بنلاقي ليه سيدات في العربات الأخرى؟
    الموضوع دة اصله غريب شوية
    و انا معاكي طبعا ان في سيدات كتير تصرفاتهم عنيفة جدا و مديرات حازمات جدا و ربما تصدر عنهن قرارات يعجز كثير من الرجال على اصدارها
    تحياتي

    ReplyDelete
  23. Anonymous:
    على الرغم اني حاليا مش عايش في مصر...بس انا معجون بترابها
    انا سايبها من سنة تقريبا بس مهتم بشئونها بشدة
    انا ذكرت في البوست اني ماعنديش مشكلة على الاطلاق في عمل المرأة كقاضية او حتى رئيسة جمهورية انما انا اتحدث عن المتشدقات بعدم المساواة...الخ
    انا طبعا عارف ان للمرأة وظائف تختلف عن وظائف الرجل طبقا للتكوين الفسيولوجي و النفسي و لكن البوست نوع من الفانتازيا و الرغبة في التنفيس عن غيظي ممن يتحدثات عن المساواة بين الرجل و المرأة عمال على بطال
    تحياتي

    ReplyDelete
  24. موناليزا:
    هو دة الكلام السليم
    تحياتي

    ReplyDelete
  25. طوبة فضة و طوبة ذهب:
    هجووووم رهيب
    ايه دة
    انا حاسس ان تعليقين كمان و كانوا هيحلوا دمي

    ReplyDelete
  26. Anonymous:
    اعتقد ان علاقتك بزوجك اصبحت من ذكريات الماضي الجميل بعدما نشرتي هذا التعليق

    ReplyDelete
  27. Anonymous:
    يعني حضرتك شايفة ان الرجال واخدين حقهم تالت و متلت
    نفس المنطق
    ان المرأة مخلوق مظلوم مقهور يا حراام

    ReplyDelete
  28. micheal:
    كلام جميل و سليم يا مايكل
    بس شوف كام واحدة هتقتنع بموضوع ال50-50 دة؟

    ReplyDelete
  29. reem:
    رأيك رائع و يدل على فكر متطور و متزن
    بالنسبة لموضوعك بالمدونة لم يضايقني بالعكس هو موضوع شديد الانسانية
    ربنا يقوي والدتك و يلهمها الصبر ...امين يارب العالمين

    ReplyDelete
  30. الرجل هو الرجل على مر العصور وأنا أعتقد أن النساء المتشدقات بالمساواة بين الرجل والمرأة هن نساء مسترجلات وليس لهن علاقة بالجنس الناعم..أما المرأة اللي بحق وحقيق تستطيع أن تأخذ أكثر من كل هذا بالكلمة الطيبة والضعف الأنثوي الذي ينم عن منتهى القوة وكل واحدة تتطالب بالمساواة لو وجدت رجل يحبها ويحتويها لن تراها في الفضائيات يتكلمن كلام عبيط لا معنى له ولاهدف سوى الاستعراض وحب الظهور وأنا معك في المدونة اللذيذة دي والفانتازيا الرائعة واحنا معشر الرجال دايما ح نكون طيبين معاكم يامعشر النساء ونعطيكم كل الحقوق التي تطالبون بها لأنه بدون موافقتنا
    تاخدوا أي حاجة..ها ها ها ها ها
    د/حامد

    ReplyDelete
  31. فين ايام زمان كان الراجل راجل والست ست اما دلوقتى الراجل بقى بيس يا مان واشطه وكده ههههههههههه ربنا يسترها علينا

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails