Friday, 26 February 2010

عن الفيسبوك و أشياء اخرى

لأني غاوي انترنت .....بأقضي على الشبكة وقت طويل من اوقات الفراغ بأعتبارها هوايتي الأولى
لاحظت خلال الفترة الماضية بعض الظواهر (النتاوية) العجيبة شوية (من وجهة نظري) طبعا.....حبيت اكتب عنها البوست دة
بداية لابد ان اوضح نقطة و هي احترامي الكامل و المطلق لحرية الأفراد في التصرف كما يحلو لهم بأعتباره لا يضر بحريات الأخرين او يتعدى على حقوقهم
و حتى لا يعلق احد على هذا الموضوع بأعتبار ان "كل واحد حر يعمل ما بدا له" قررت ان استبق هذا التعليق بإقرار احترامي لحقوق الأخرين...ولكن هذا البوست من باب تحليل ظاهرة و نقدها و ليس الأستهزاء منها او ممن يقوم بها
ندخل في الموضوع:
و انا بأتصفح المدونات المختلفة.....دخلت على مدونة صاحبتها (فتاة)...وواضح ان المدونة ناجحة من كثرة التعليقات على موضوعاتها...فوجئت ببوست غريب عجيب ليس في موضوعه و لكن فيما استهلت به (الفتاة) موضوعها...لقد قررت هذه الفتاة العظيمة عدم الرد على اي تعليقات (ذكورية)...اي و الله
اعتذرت عن الرد على اي تعليق يكون صاحبه (ذكر) لأن هذا على حد قولها حرام شرعا
اه و الله هذا حدث.....في اغرب ما صادفني خلال رحلتي مع التدوين منذ 2006 وحتى يومنا هذا
قعدت مع نفسي افكر و افكر في سبب يجعل رد فتاة على شاب في موضوع عام على الانترنت بمدونة مفتوحة للجميع حرام....
ولماذا حرام اذا كان صاحب الرد سيرد بكل احترام و هي ستعقب بكل ادب وفي نفس الموضوع؟
هل اعتبرت ردها على تعقيب من شاب بمدونتها بمثابة خلوة بينها و بين شخص اجنبي عنها؟
لم أجد ردا على تساؤلاتي و اندهاشي الا ان اضرب كفا بكف و أكتفي بالقول ان لله في خلقه شئون

ظاهرة اخرى لاحظتها خلال الأسابيع الماضية خاصة بقائمة (اصدقائي ) على الفيسبوك.....وهي اختفاء بعض (الصديقات) الواحدة تلو الأخرى من قائمة الأصدقاء لدي
و الحقيقة انه نظرا لضخامة عدد (الأصدقاء) على الفيسبوك فلم الاحظ اختفاء (الصدبقات) مرة واحدة....ولكن بعد فترة من الغياب و عدم ظهور اي نشاط لهن على الفيسبوك قررت البحث عنهن لعل السبب خيرا خاصة ان منهن من هي زميلة عمل و الأخرى من اقارب زوجتي و احداهن زميلة دراسة .....الخ
لأكتشف انهن قرروا (الغاءي) من قائمة اصدقائهن......ولست وحدي من تم شطبه بل لقد قررن (بدون اي علاقة تجمع بعضهن ببعض) حذف معظم الأصدقاء (الرجال) من قائمة اصدقائهن
لقد اكتشفن فجأة انه لا يصح ان تحتوي قائمة الأصدقاء لديهم على (رجال)......فهذا ضد الأخلاق
هم كانوا فاكرين (الفسبوك) دة ايه بالضبط؟
المفروض و دة السبب اللي مبتكر هذا الموقع اخترعه من اجله هو ان يكون شبكة (اجتماعية) تربط الناس ببعضها خاصة من فرقت بينهم الحياة لظروف السفر او العمل و تجمعهم سمات مشتركة كأن يكونوا اصدقاء قدامى او زملاء دراسة او اقرباء او لهم نفس الهواية او الموهبة او راغبي اكتساب صداقات جديدة.............الخ
لم يدر بخلده قط ان يأتي يوما يتبرأ فيه شخص من صداقته او قرابته او معرفته بشخص أخر ارضاءا لشخص ثالث سطحي الفكر
لا اخفي سرا ان قلت ان هناك سمة مشتركة جمعت بين هذه الشخصيات على اختلاف اعمارهن و ثقافتهن الا وهي الأرتباط سواء بالخطوبة او بالزواج او حتى (بالكلام)......و يبدو ان التعليمات قد صدرت بأن يتم تنقية (البروفايل) من (اللبش) و (الناس) اللي مالهاش لزمة امثالي انا و غيري ارضاءا للسيد (سي السيد)
انا اتفهم جيدا ان يحمي الرجل زوجته او خطيبته او اخته من (الدخلاء) او المتطفلين او (المستظرفين) و ما اكثرهم في هذه الشبكات الأجتماعية ....اما ان يطالبها بأزالة اي (ذكر) من قائمة معارفها حتى لو كان قريب او زميل او صديق....فهو ما لا أفهمه على الإطلاق
احيانا تعتبر (الفتاة) ان محو هذه الكائنات الغريبة من (البروفايل) الخاص بها بمثابة (قربان) و (عربون محبة) للحبيب القادم و زوج المستقبل....بأعتبار انها (قدمت) السبت و منتظرة منه الأحد و الأثنين و حتى الخميس
بس ارجع و اقول....."لو ادوا للمجنون الف عقل على عقله....مش هيعجبه الا عقله"
وبرضة "لله في خلقه شئون"

من الظواهر الخاصة بالمدونات هو قلة عدد التعليقات على الموضوعات.....تلاقي الموضوع مميز جدا و يطرح قضية للمناقشة...و تلاقي ان العدادات الخاصة بالزوار تثبت ان المتصفحين للمدونات في تزايد مستمر الا ان التعليقات و المشاركات في تناقص حاد
ايه السبب اللي يخللي المهتمين بالمدونات (لاحظ اني لا اتحدث عن اشخاص يتصفحون الانترنت بغرض التسلية و المرح فقط) ايه اللي يخللي مدونين مهتمين بالشأن العام يتكاسلوا عن التعليق على مدونات بعضهم و يكتفوا بالفرجة و ابداء الإعجاب او الإمتعاض (من بعيد لبعيد)
هل هو كسل او تكاسل او ايه بالضبط؟
انا عن نفسي احترت و احتار دليلي في هذه الظاهرة

من ظواهر النت مؤخرا ظهور اكثر من شبكة اجتماعية تؤدي نفس الغرض.....و لكنه التنافس فبعد المنافسة الطاحنة بين (فيسبوك) و (تويتر) ظهر عملاق أخر هو (جوجل بظ)
google Buzz
شبكة اجتماعية اخرى ظهرت لتنافس (فيسبوك) و (تويتر) و من الواضح ان الشبكات الأجتماعية دي هي (سبوبة) القرن الحادي و العشرين
و تقريبا عمالقة الأنترنت في العالم اعتنقوا (الفكر المصري) في المنافسة...بمعنى ان لو السبوبة اليومين دول (سيراميك) مثلا يبقى كل المحلات تحول نشاطها للسيراميك و لو السبوبة (اكسسوارات) محمول يبقى مصر كلها لازم تتاجر في التليفون المحمول و قس على ذلك موضة النت كافيه و محلات (الفول و الطعمية)......الخ
فمن الواضح ان السبوبة النتية اليومين دول هي (الشبكات الأجتماعية) و يا خوفي يلاقوا نفس مصير معتنقي (الفكر المصري) في المنافسة برضة.....الا و هو (الأفلاس) ثم (الأغلاق) ف(تغيير النشاط) لسبوبة جديدة

60 comments:

  1. في الحقيقه و الواقع أنا شايفه ان مفيش مشكله اني أكتب تعليق لأي موضوع سواء اللي كتبه بنت أو ولد بس حكايه اني أضيف أي زميل أو قريب فأصلا ده أمر مرفوض تماما الصراحه
    facebook
    بالنسبه لي بعرف منه أخبار صديقاتي اللي مش بشوفهم كتير
    وبستفاد من أي معلومه دينيه أو معلومه تفيدني في مجال دراستي من groups,pages
    مش من حق أي زميل انه يعرف أخباري أو تفاصيل عن حياتي الزماله لها حدود خلال مجال العمل مش أكتر حتي الأقارب "الرجال" ما دام مش محرم لازم تكون هناك حدود واضحه وصريحه
    اما اني أتعرف علي حد مش أعرفه أصلا من النت ده مرفووووووووووووض

    ReplyDelete
  2. بالنسبة لالغاء الفريندز بالنسبالي مش بعملها لارضاء اي طرف اخر كتير بعملها عشان المضايقات والتجاوزات اللي بتحصل اما بالنسبة للرد على الملاحظات انت فعلا زي ماقولت الفيس بوك عباره عن عائلة واحدة بتقرب كل الناس ببعض وتزودني شخصيا بمعلومات انا مكنتش اعرفها واخيرا اتنمنالك التوفيق

    ReplyDelete
  3. بالنسبة لالغاء الفريندز بالنسبالي مش بعملها لارضاء اي طرف اخر كتير بعملها عشان المضايقات والتجاوزات اللي بتحصل اما بالنسبة للرد على الملاحظات انت فعلا زي ماقولت الفيس بوك عباره عن عائلة واحدة بتقرب كل الناس ببعض وتزودني شخصيا بمعلومات انا مكنتش اعرفها واخيرا اتنمنالك التوفيق

    ReplyDelete
  4. anonymous:
    بالنسبة للشق الأول الخاص بالتعليق فدة هو الطبيعي...انتي بتعلقي على الموضوع مش على صاحب او صاحبة الموضوع...متفقين
    اما فيم يخص الشق الثاني فيمكن تعديل شروط الخصوصية اذا كنتي مش عايزة فلان يعرف اخبار معينة او صور معينه..(بفرض انك بتحطي صورك ع الفيسبوك اساسا)....انما مسألة اضافة اقارب او زملاء ذكور على الفيسبوك فالمفروض ان دة شيء طبيعي
    اي علاقة في الدنيا لا تخرج عن الاحترام تبقى علاقة طبيعية
    انما المسألة دي بتخضع فعلا لعوامل كتيرة قوي من اهمها الثقافة و ظروف النشأة
    تحياتي

    ReplyDelete
  5. أولا: بالنسبة للفيس بوك ده انا الحقيقه مش بحبه على الاطلاق ولا أعرف ليه، أما موضوع الحذف لسبب ديني فلا اعرف ما أقوله
    ثانيا: بالنسبة للتعليقات، أعتقد ان الناس لا تنتظر الرد على التعليقات، كما أن هناك من لا يعلق مطلقا، وهناك من يتعمد المرور على المدونه فقط من أجل ان يضمن اكتساب واحد يدخل مدونته ويعلق عنده، وهناك من يتفرج من بعيد ويجري، وهناك وهناك، يعني، كل واحد له دماغه، لكن هذا لا ينتقص أبدا من ما هو مكتوب

    ReplyDelete
  6. أحيانا بنكون متفقين تماما مع فكرةالبوست
    ومش عايزين كل وجودنا فى صفحةالتعليقات
    يكون جميل وأحسنت
    مع ان البوست واصحابه يستحقونها
    احيانا الارهاق وضيق الوقت
    بيمنع الواحد انه يركز ويكتب تعليق
    فى اسباب كتير ممكن تمنعنى اكتب تعليق



    لكن الفيس بوك
    انا مش فاهمة فيه حاجة بصراحة
    ومش عارفةحد فيه
    الا ناس قريبين جدا منى
    بس مخضوضة من فكرة انى الاقى طلب صداقة
    ادخل عند صاحبه الاقيه سنه صغير جدا
    واقصد بيها
    انى مش هستمتع بكتاباته وافكاره ومش هيضيف جديد لى كل اهتماماته انه يهوى مصادقة الفتيات
    وبروفايلات الفتيات صديقاته
    حاجة عار بجد
    اكيد هارفض طلب الصداقة ده
    لكن حقيقى مش هحب انى أضيف حد معرفوش
    يمكن لأنى مش فاهمة طبيعةالفيس بوك ايه
    بس لو حسيت انى مرتاحةفيه
    هريح نفسى منه خالص



    أما اللى بترفض ترد على أى تعليق ذكورى
    مش عارفة أقول ايه بصراحة

    كل حاجةفى الدنيا لازم يكون ليها حدود
    وكمان الانسان المحترم بيجبر غيره على احترامه
    لكن التشدد فى كل شىء مش ظاهرة كويسة
    لكن هى المشكلة الازلية
    الاختلاط حرام ولا حلال
    ولو حلال حدوده ايه؟
    لو حلينا المشكلة دى هنرتاح

    ReplyDelete
  7. ماهو ده اصلا يدل علي مجتمع مضطرب فكريا ونفسيا ودينيا
    واحده داخله علي الفيس بوك وتقوةلك انا هخلي كل صاحباتي بنات
    طيب مكفايه عندك المسينجر وريحينا من خلقتك؟
    او تلاقي تقول مابحطش صور ليا
    ياسلام؟ اصلا الفيس بوك اساسا قايم علي الصور

    واما تحكم المحروس في المحروسه فده برده شيء مقزز جدا ومش متخيل ازاي صديقه او زميله تقطع علاقتي بها علشان اتخطبت
    ليه هو انا كنت بكلمها علشان اقعد احب فيها ولا اعاكس فيها؟
    عامه دي حريه

    اما المدونات انا شفت تدوينات اقل مايقال عنها رائعه لكن علشان صاحب المدونه مش مشهور او مالوش علاقات اجتماعيه او مابيدخلش كتير فماحدش بيعبره رغم اهميه اللي بيكتبه وخطورته

    لكن تلاقي تدوينات عن واحده لسه راجعه من السفر او واحده بتعيط من تاثر المطر وواحده بتكلم نفسها وحاطه ورد واطفال ومش عارف ايه
    وتلاقي مجاملات وتعليقات بالهبل لدرده في مره عدد التعلقات وصل ل 100 رد
    اغلبهم من نوعيه انا اول رد اهوو انا جييت

    او بخخخخخخخخخخ

    او ياحبيبه قلبي عامله ايه؟


    علشان كده مدونات قليله اللي بدخل ارد فيها الالي الاقيها تستاهل اني اجهد اصابعي علشان اكتب رد

    ReplyDelete
  8. بالنسبه للموضوع حذف الناس على الفيس بوك
    فدا ممكن يكون نتيجه لفتوى من الازهر اتنشرت فى صفحات كتيره على الفيس بوك وتقريبا مصدرها جريده قطريه مش فاكر بالظبط
    المهم انها بتقول بحرمه تعامل الرجال مع النساء على الموضع الشهير الفيس بوك

    انا مش فاكر الفتوى اوى بس ممكن ابقى ابحث عنها واديلك لنكلها لو لقتها المهم ان كان فى حيثيتها ان دا ممكن يأثر على العلاقه الزوجيه .. ويفتح مجال للشات حاجه كده مش فاكر اوى

    بالنسبه بقى لموضوع الناس مبقتش تعلق
    انا شخصيا بقيت بكسل جداااااااا ومش بعلق الا فى النادر
    مش عارف اسباب الكسل دا ايه بس اهو كسل وخلاص

    دمت بود يا دكتره

    ReplyDelete
  9. الأنيشتا said:

    طبعا انا متفق معك كالمعتاد وأهنئك على دقة الملاحظة ... ومتفق أيضا مع الدكتور/ليكتر فى تحليله ان المجتمع مضطرب فكريا ودينيا وثقافيا .. ومنتهى التناقض ... والمؤسف ان النسبة المختلة بمثل هذه المهاترات من الفتيات نسبة كبيرة وفى تزايد ... وكل هذا ليس بغريب ويؤكد الواقع المرير الذى نعيشه ... وندرك اننا وبنتهى الأمانة والصدق نعيش فى مجتمع متخلف ويزداد تخلفا يوما بعد يوم ...
    واخيرا انا لاحظت ان اسلوبك اصح اكثر من رائع واتوقع ان تكون صحفى ومحلل ناجح جدا

    ReplyDelete
  10. قطعت علينا الطريق
    من بداية الكلام وقولت
    انك عارف ان كل واحد حر
    وفعلاً كل واحد حر لكن هل جربت
    تبعت للى مش بترد على الرجال تسالها
    عن السبب؟ابعت لها واسالها وناقشها يمكن؟
    اما الفيس بوك دا فأنا مبتدئة فيه لسه وبالتالى
    مش عارفة اخره ايه معايا؟!

    ReplyDelete
  11. ههههههههههههههه
    عجبنى موضوع السبوبة ده...دي نظرية صحيحة مية في المية
    بس ال3 مواضيع معاك حق فيهم على فكرة
    طبعا كل واحد عنده الحق في انه يمسح أي حد من قائمته على الفيسبوك لكن مش علشان طرف آخر حتى لو كان شريك الحياةلأن معنى انها قبلت اضافتهم من الاول
    موضوع التعليقات بردو شئ مش لاقياله تفسير غير انه كسل :)

    ReplyDelete
  12. طبعا انا قابلت كتير من البنات اللى بتعتبر ان وجود شباب على البروفايب بتاعها ده نكرة وعيب ومن المحرمات هههه وكأن الشباب دول كائنات فضائيه مايصحش ندخلها
    كمان انا هاتطرق لموضوع حيوى وهام جدا
    هو التعصب حتى فى إضافه بعض المسيحين للمسلمين والعكس وكأنه التواصل انتهى واننا عايشين زى الاخوة الاعداء
    وفيه تحفظ شديد من إضافه الناس دى لبعض بمختلف اديانهم
    مع انى ومن وجهة نظرى الشخصيه الكاريزما اللى بتبقى موجوده بيم شخص والتانى مابتفرقش اذا كان الشخص ده بنت زى حالاتى ولا مسيحى او مسلم
    فأنا مع التواصل الفكرى الجاد واللى بيضيفلى ثقافه ويعزز مواقفى ويطرح موضوعات
    جديده وهامة وحساسه
    باتعامل مع اللى قدامى على انه انسان بيفكر وبيقرب من تفكيرى وفيه كاريزما وروح مشتركه
    بغض التظر ده ايه
    بنت . او ولد او مسيحى او مسلم او من غير دين حتى
    دى حريه شخصيه وفى النهايه رأيى صواب يحتمل الخطأ ورأى غيرى خطأ ويحتمل الصواب

    ReplyDelete
  13. طبعا انا قابلت كتير من البنات اللى بتعتبر ان وجود شباب على البروفايب بتاعها ده نكرة وعيب ومن المحرمات هههه وكأن الشباب دول كائنات فضائيه مايصحش ندخلها
    كمان انا هاتطرق لموضوع حيوى وهام جدا
    هو التعصب حتى فى إضافه بعض المسيحين للمسلمين والعكس وكأنه التواصل انتهى واننا عايشين زى الاخوة الاعداء
    وفيه تحفظ شديد من إضافه الناس دى لبعض بمختلف اديانهم
    مع انى ومن وجهة نظرى الشخصيه الكاريزما اللى بتبقى موجوده بيم شخص والتانى مابتفرقش اذا كان الشخص ده بنت زى حالاتى ولا مسيحى او مسلم
    فأنا مع التواصل الفكرى الجاد واللى بيضيفلى ثقافه ويعزز مواقفى ويطرح موضوعات
    جديده وهامة وحساسه
    باتعامل مع اللى قدامى على انه انسان بيفكر وبيقرب من تفكيرى وفيه كاريزما وروح مشتركه
    بغض التظر ده ايه
    بنت . او ولد او مسيحى او مسلم او من غير دين حتى
    دى حريه شخصيه وفى النهايه رأيى صواب يحتمل الخطأ ورأى غيرى خطأ ويحتمل الصواب

    ReplyDelete
  14. anonymous
    enas khaled
    بالنسبة للمضايقات اكيد لابد من الحذف طبعا..انما الكلام على اللي بيحذفوا ناس يفترض انها محترمة واصدقاء لهم لمجرد اسباب سخيفه

    ReplyDelete
  15. لورنس العرب
    الفيسبوك ممتع بس هو له عشاقه..وفي ناس كتير مالهاش فيه
    انت معاك حق بالنسبة للتعليقات بس برضة لما الواحد يبقى طارح موضوع للمناقشة و يلاقي الناس بتكتفي بالفرجة اكيد بيجي له احباط
    تحياتي

    ReplyDelete
  16. طب انا علقت تعليق كبير وفصصت البوست كما يقال وفى الاخر البلوجر يستخسر فيا ان التعليق يتنشر

    يرضيك كدا يابلدياتى

    طب خلاصة الليى قلته سالفا ان البوست ده عجبنى جدا وفيه نقط من اهميتها كل واحده تكون قضيه بذاتها

    زى ازدواجية المراه وعلاقتهابالرجل حتى لو على اسلاك

    وسى السيد زى ماوصفته وما يبيحه لنفسه ويحرمه ويجرمه على غيره

    والمدونات والزيارات وغيرها وغيرا

    البوست رائع فعلا يادكتور احمد

    ReplyDelete
  17. :]
    لازم ابتدى بابتسامه عشان بقالى كتير مجيتش ولا علقت

    انا مع اى حد انه يعمل اى حاجه طالما هو مقتنع بيها ومصدقها ميه فى الميه انما اعملها عشان ارضى فلان او علان يبقى سورى انا بلغى جزء من شخصيتى بلحسى قرارات ماضيه علشان ايه مش عارفه

    بالنسبه للسبوبه فهى فعلا ماشيه اوى الحكايه وبتكسب على فكرة يلا بينا بقى نعملنا حاجه زى كده :]
    .........

    بالمناسبه اللطيفه دى انا ضيعت البلوج بتاعى ومش عارفه ارجعه والحقيقه محدش عرف يساعدنى
    ارجوك تقول هقدر اساعدك
    :]]]]]

    معكم من تحت انقاض بلوجها المأسوف على شبابه
    shayma ... heart, mind and soul

    ReplyDelete
  18. على فكره .. لولا الفيس بوك مكنتش عرفت اوصل للمدونه هنا
    :(

    HELP :)

    shayma

    ReplyDelete
  19. لسه بدري علينا على مانفهم يعني ايه علاقات اجتماعية سليمة ومتوازنة ويعني ايه البنت تثق في نفسها وتوقف أى متجاوز عند حده..أما مسألة التعليقات فأحيانا وأنا واحد من الناس باحس بمرارة شديدة في بعض الموضوعات وباحس بغضب يمكن لو كتبت تعليق وأنا في الحالة دي يمكن أغلط ولساني يفلت بكلمات لاأحب أن يقرأها أحد ..فأوثر الصمت

    ReplyDelete
  20. اعتقد انها حرية شخصية لا نعيب عليها اذا كنت تحب أن ترضى خطيبها او ان كانت قررت ان لا تضيف شباب
    وحتى لو خطيبها مطلبش فممكن تشوف ان ده حفاظ على مشاعره الفيس بوك شخصى جداً فلا يمكن إضافة كل من هب ودب لمشاركته خصوصياتنا
    اذا كنت لا تعترض على وجود شباب عند زوجتك وتتفهم الأمر بأنها شبكة للمشاركة ووو فهناك من يرى بأنه لا يجب طالما لا داعى لحدوث ذلك

    ReplyDelete
  21. انا شايف اننا زى بلال فضل ماقال فى لقائه مع د0زويل فى ندوته اننا فى مصر نجحنا اننا نرحع بالزمن للخلف فمش مستغرب كل الظواهر اللى انتا رصدتها واللى بتنتشر كل يوم عن يوم عوده للخلف بسرعه الصاروخ يمكن تكون دى حكمه من الله اننا نرتد للخلف علشان دى تكون نهايه الأنحدار الوصول للقاع ونبدأ بعدها رحله الصعود يارب يكون كدا

    ReplyDelete
  22. حفيدة عرابي:
    انا معاكي ان فكرة البوست جميل و رائع و احسنت و الكلام دة ممكن جدا تبقى دمها تقيل
    انما ساعات كنيرة بيكون البوست عبارة عن موضوع هام للمناقشة و بيكون صاحب البوست محتاج اراء و تعليقات و بيكون الاحجام عن التعليق صدمة فعلا
    بالنسبة للفيسبوك مش مطلوب اكتر من انك تضيفى معارفك و قرايبك و اصدقائك انماممكن جدا لا تتقبلي طلب الاضافة من اشخاص لا تعرفيهم
    هو معمول علشان الناس اللي عارفة بعضها تلاقي بعضها
    تحياتي

    ReplyDelete
  23. تقريبا انا عرفت انت تقصد مين
    الغريب ان بدام هي وصلت للدرجة دي من التشدد لازم يبقى صورتها مثلا واحدة منقبة ولا محجبة ولا اي دليل تاني من دلائل التشدد لكن صورتها بنت سايبة شعرها
    ما علينا

    انا زهقت من الافكار العجيبة اللي الناس بتطلع بيها كل شوية

    ReplyDelete
  24. dr.lecter:
    فكرة الشبكات الاجتماعية اللي الناس اخترعوها علشانها مش واصلة خالص للناس هنا بشكل صحيح
    في بنات كتير بتتبرأ من الفيسبوك و النت اول ما ربنا يعدلها لها
    و كأنه جريمة
    اصلا فكرة الشبكة الاجتماعية اللي بتضم الناس اللي بتعرف بعض بصرف النظر عن كونهم شباب او بنات مش واصلة كويس
    بالنسبة للمدونات فكلامك سليم تماما...ساعات تلاقي البوست شخصي جدا في بعض المدونات و الردود على قفا مين يشيل....و ساعات تلاقي بوست بيناقش قضية خطيرة او فكرته او اسلوبه جميل فعلا و تلاقي و لا رد و لا حد معبره
    بتبقى حاجة تحرق الدم الصراحة
    تحياتي

    ReplyDelete
  25. بطوط حبوب:
    يا سلاااااااااااااااام
    يعني سابوا كل اللي في الفيسبوك و مسكوا في تأثيره على العلاقات الزوجية و الشات
    دة طبعا على اساس ان اللي عايز يخون مراته او تخون زوجها مفيش قدامها غير الفيسبوك؟!!!!!
    بالنسبة للتعليقات على المدونات....هو دة فعلا اللي انا بأتكلم عنه
    الكسل
    تحياتي و احتراماتي

    ReplyDelete
  26. على فكره انا زعلان
    لا بجد زعلان
    لا لا زعلان اوى كمان
    انا علقت هنا قبل كده فى نفس البويت ده بس مش لاقى تعليقى
    راح فين بقا !!!!
    عموما نرجع تانى ونقول
    الكسل حقيقى شىء فظيع
    لدرجة انى مكسل اكتب والله وعمال اتاوب :))
    بس مفيش تعليق غير اننا بنيجى فى الهايفه ونتصدر :)

    ReplyDelete
  27. هي دي الحقيقه وهو دا الواقع ههههههه

    كنت بكلم واحد زميلي علي واحده معانا في الكليه
    بقوله دي كانت كلمتني مره علي الفيس بوك قالي تلاقيها شالتك دلوقتي قولتله ليه قالي اصلها اتخطبت هههههههههههه
    وقيس علي كدا مش فلانه اتحجبت ليه؟ اصلها اتخطبت

    طب ليه اصلا كنتي ماشيه علي حل شعرك وطب مادمتى شايفه انك تضيفي راجل علي الفيس بوك عيب ضيفتيه ليه م الاول ولا كنتي مستنيه اما تتخطبي

    الناس فاهمه النت غلط

    ReplyDelete
  28. الحقيقى تناول رائع لبعض الظواهر النتاوية على حد تعبير سيادتكم بالنسبة للاخت التى لا ترد على الذكور جرب تزور مدونتها بمحرم المهم انا اكتر جزء عجبنى الاخوات اللى بيضيفوا ويحذفوا عشان خاطر حبيب القلب او سى السيد هما اساسا بيضيفوا الزبون لقوا منة رجا خير يعجب بجمالى وادبى وبيس اما مالقوش رجا يعنى متجوز او مرتبط لازم يفرقعوة عشان حبيب القلب ميقولش عليها بتعرف ولاد كتير انا عن نفسى ست متجوزة بحب وباحترم جوزى لانة بيحترم خصوصيتى ع الفيس بوك وبيسيبنى اضيف براحتى زمايلى القدامى وقرايبى دون قيود لانة واثق ف نفسة اولا ثم فيا ولانة واعى وفاهم الغرض من الفيس بوك بس لانة رااااااااجل شرقى ومبينساش يقوم بمنع اضافة اى حد معرفوش بل بالعكس يضايق قوى لو جتلى اضافة من حد لاتربطنى بية صلة مع ان الموضوع دة مش متبادل هو بيضيف اللى يعرفة واللى ميعرفوش ما عليناانا راضية بشوية الديمقراطية دى بالنسبة للمدونات البعض يتخيلها زى الصحف والمجلات الناس تقرا وتستفاد ومتعلقش اسفة للاطالة بس الموضوع شيق

    ReplyDelete
  29. ayman:
    ايه يا عم الكلام الكبير قوي دة
    انا كدة هيصيبني الغرور
    لا صحفي و لا محلل و لا حاجة......القصة كلها افكار و بدونها ليس اكثر و لا اقل
    اما بخصوص الموضوع....فالغريب فيه ان الانحلال بيزيد و التخلف بيزيد معاه برضة
    حاجة عجيبة
    تحياتي

    ReplyDelete
  30. norahaty:
    ما انا لو سألتها مش هترد عليا باعتباري شخص اجنبي لا يجوز ان ترد عليه
    اما بالنسبة للفيسبوك حاولي تجربيه....يمكن يعجبك و يمكن لا
    ناس اصبحوا مدمنيه و ناس لفظوه بشدة
    تحياتي

    ReplyDelete
  31. دكتور
    تسمحلى :-))
    نفصفص البوست
    البنات و الولاد و كل واحد و ليه دماغ
    جايز الاكثر دماغ فيهم هى التعارف السهل بين الاطراف
    و بعد فترة تلاقى المجتمع بيوحى بان التعارف خطيئة و لازم الاستغفار عنها بالحذف :-)
    لسه حيكبروا و يعقلوا و يعرفوا ايه الخطأ و ايه الخطيئة

    موضوع الفيس بوك بصراحة انا بداته فى اول الغربة لمعرفة احوال الشغل و زملاء الشغل
    لاقيت المعلومات قل فى الشغل و زاد فى الخصوصيات
    بطلتوه و ريحت دماغى
    ملغيتش حد و مطردش حد لانهم لسه زملائى فى الشغل
    و على اساس الزمالة قبلتهم و مدام لسه زملاء ليه ارفضهم
    بس عمله تحكمات و مضيقة علشان محدش يضايق حد من زملائى الثانين عن طريقى
    حصلت واحد علق على صورة جماعية بتريقة و كذا حد زعل و رد و كانت قصة

    سؤال شخصى هل انت بتابع نشاط المدام فى النت ؟ شكلك مش بتابع لانك واثق و معنى الثقة ديه عندى انك مبتحاولش تفقد ثقتها فى سكة النت برضه

    اغلب الرجال للاسف شكاكين و الدنيا علمتنى ان الى بيشك بيكون مجرب و عارف و بيعمل الشك ده بنفسه

    و بعدين متزعلش على انك فقدت زمالة زميلات
    انا كنت فقدت و كنت حافقد صداقة صديقة لمجرد انها تزوجت و جوزها مش راضى عنى :-( معرفش ليه و انا ضايقته فى ايه ؟ عمرنا كااصحاب متدخلنا فى شعللة مشاكل حد فينا بالعكس يانساعد يانطبطب بس هو كان من نوعية القفل بالمفتاح بالفعل و المعنى

    المهم لما هى اتخنقت و خنقته :-( سمحلها تعرفنا ثانى و شجعها على كده و احنا تناسينا اسباب البعاد الى ملوش سبب
    و خليناها ترجع لحياة المشاركة فى الحلو و الوحش معانا ثانى و نساعد بعضنا ثانى و نفرح بعضنا ثانى

    ساعات الستات ملهمش اختيار
    لنجاح البيت الا انهم يقبلوا و يايسكتوا علشان المركب تمشى مش تغرق
    و الرجالة خلقها ضاق من الحياة علشان تسمع و تتفهم :-(

    التعليقات
    بس يادكتور
    انا بتابعك ريدار :-) مش مدونة معتقدش العداد بيعدنى :-))
    و متضايقش
    مش ديما الكل بيعرف يرد زى ماهو عايز و لا مش عارف يرد عليك بايه صيغة
    انا ساعات برد هزار ساعات جد ساعات فلسفة و هكذا
    و مكبرة دماغى من انتظار التعليقات عندى لانى عارفة كلامى مش مفهوم لناس كثير
    لانى بكتبه لنفسى
    مذكراتى الشخصية لمدة سنه
    :-) كلام مينفعش اكتبه لحد فى اميل و استنى رد عليه
    و زهقت انتظار ردود الناس
    الناس يا دكتور مبقتش فاضية ترد على المعايدة فى الاعياد و الله
    من عيد لثانى ابعت 15 اميل و يرد عليا 3 او 5 بالكثير:-((

    فيس بوك ، مطنشاه
    توتير محاولتش فيه
    جوجل باز مش وحش لو فيها الموضوعات الى غيرى لقيها حلوة تستحق القراءة و يدنى فرصه اعرفها بنفسى

    بس تعرف الغريب ايه ؟
    متخيلتش العالم ده موجود بالشكل ده و اكثره فى صغار السن
    غريبة ؟؟ لما انا كنت فى السن ده مكنتش فاضية ابص على اميلى من احتكاكى بالناس الحقيقين
    الناس فى مصر بقيت متوحشة ناس فى وسط الزحمة ليه ؟؟

    ReplyDelete
  32. عدم فهم وتنفيذ عميانى وطبعا حرية بقى

    النت خلاص بقى سببوبة هذا الزمن

    معاك المدونة عدد االزيارات كبير ولايناسب ماموجود من رد بس فى ناس بتحب المتابعة من بعيد وبس
    مع خالص تحياتى

    ReplyDelete
  33. موضوع رائع يا أحمد

    وخلاصة الكلام أننا فى مجتمع مريض وعنده خلل فى التفكير وللأسف الخلل ده بقى منتشر قوى

    ReplyDelete
  34. موضوع جميل فعلا و غريب حقيقى هى اللى دخلت النت و عملت مدونه او اشتركت فى الفيس بوك كان قصدها ايه بالظبط ما هى شىء اجتماعى انا لو متشدده لهذه الدرجة اعمل جروب على الفيس بوك سرى و فيه خطوات فى الفيس بوك علشان ما فيش حد يعلق غير مثلا المنشئين للجروب بس و ممكن تحط كل الضمانتات ان ما فيش حد يدخل على الصفحة بتاعتها و لو الموضوع عويص اوى كده و هى شايفة ان فيه حرامنيه ما بلاش و كفايه الماسنجر او ايميل و خلاص للاسف الناس مش فاهمه هى عايزه ايه بالظبط يبقوا اجتماعيين و لا لا يبقوا متزمتين و لا لا كل شوية بحال
    و بعديين فكرة الغاء فلان لانى تزوجت او اتخطبت او او هى لو مش واثقة فى فلان من اصله ضافته لية و لو المحروس قالها بلاش رجاله يا ترى بلاش فى الشغل كمان و فى الجامعة و حيبفى بلاش الاهل كمان و عموما ما ده معناه انه لا يثق فيها او لا يثق بنفسة و بعديين ممكن اعمل رقابه على ابنى و بنتى فى سن معين علشان اكيد خبراتهم لسه ما اتكونتش صح بس مش بالمراقبة لا بالمصاحبه و النقاش انما اعمل رقابه على خطبتى و مراتى دى عدم ثقة و عموما انا لما بيكون فية موضوع ظريف بحكية لزوجى و نعض نتناقش فية مش بحول الموضوع الى سر و ارتبك ان فلان رد او انا كتب له حاجة و احول الموضوع الى شكوك و اوهام ما لهاش لزمة و فية صداقات كتير محترمه جدا فى الفيس بوك و الموضوع كله لو الواحد بيحترم نفسة و بيرد باسلوب محترم يبقى ليه احذفة انما لو حد غير محترم رضوضه فيها تجاوزات انا لا اسمح بيها مش جوزى او خطيبى اكيد حا اعرف اوقفه عند حده و فى الاخر هى اسلوب اجتماعى جديد للتعارف فا اللى مش عايزة بلاش يدخله اصلا

    ReplyDelete
  35. Sherry Jameel:
    اللي يعتبروا وجود ولد او شاب ع البروفايل بتاعهم عار و من المحرمات بيبقى غالبا عندهن خلل نفسي رهيب و اصلا لا يجدن التعامل مع الطرف الأخر
    بس فكرة اني لا ضيف شخص معين على اساس ديانته دي فكرة رهيبة و تتجاوز الخلل و الاضطراب النفسي الى الجنون
    دي ساعتها تبقى ناس مختلة
    بس هو السؤال:
    على اي اساس يمكن تقييم شخص على حسب دينه او لونه او جنسيته؟؟
    فعلا اللي يعيش ياما يشوف
    تحياتي و احتراماتي

    ReplyDelete
  36. الحلم العربي:
    طبعا كل واحد من حقه انه يمسح اي حد من قائمة اصدقائه
    انما اكيد بتكون محرجة لما صديق يمسح صديقه او احد اقاربه اللي المفروض انه شخص محترم بدون سبب مقنع
    تحياتي

    ReplyDelete
  37. mahasen saber:
    انا اللي اكيد خسران ان التعليق الأول لم يتم نشره
    نورتي المدونة يا فندم
    تحياتي و احتراماتي

    ReplyDelete
  38. و الله اللي اقدر ارد عليه في تساؤلاتك دي
    هو موضوع المدونات لأن بقية التساؤلات الله اعلم بها و بتفكي رالناس فيها فعلا

    العداد يمكن بيسجل ناس كتيرة لكن قليل اللي بيرد

    دا يمكن علشان العدد بتاع المدونات فعلا بقي رهيب و اكيد العدد الكبير دا عبئ علي الناس متتبعي المدونات و كويس اوي انهم يقرألان الكيد التعليق بياخد وقت

    انا فعلا عانيت الامر دا لكن بكبر دماغي لان النوتات علي الفيس بوك بتؤدي الغرض و بكتب في المدونة علشان بحبها و لانها اصلح للتوثيق فقط لا غير :)

    ReplyDelete
  39. بصراحه انا مستغربه جدا من اللى مش سامحه بالرد على اى تعليق ذكورى طيب هى فاتحه المدونه ليه وسيباها عام ليه مش عشان تتكلم وتسمع الاراء وبعدين ايه المانع ان هذا الذكر يرا ما لا تراه الانثى او يصحح لديها فكره غير صحيحه اما موضوع الفيس بوك فانا شايفه انها لو رضيت من الاول انها تحذف ناس ارضاء لسى السيد هترضى بعد كدا وهتتنازل تدريجيا عن كل شىء مع العلم انه مش هيتنازل عن شىء يعنى هو هيفضل يكلم زميلاته ومحتفظ بارقام قريباته يبقى احسن تتصرف على طبيعتها ولو ارادت الخصوصيه ايه المانع تعمل حساب خاص لها مع هذا الشخص ان كانت تريد ان تتحدث معه بمفرده اما موضوع التعليقات فانا بقيس موضوعى بعدد الماره حتى لو ما علقوش فمن يريد التعليق فهو اضاف لى شىء ومن لم يرد فيكفى انه قرأ موضوعى عله يخرج بذره استفاده احييك على كل النقاط التى اثرتها

    ReplyDelete
  40. لو اي فتاه اعتبرت ان الرد علي تعليق من شاب يعتبر دينيا لايجوز تبقي دي مصيبة لان ده معناه ان اي ورقة مكتوبة بخط يد انثوي تعتبر لا تجوز وبالتالي مطلوب حاجة من الاتنين يا نوقف تعليم البنات لان اوراق امتحانتهم اكيد هتنكشف علي رجال وده غلط يا اما نطالب بان اوراق البنات ماتنكشفش غير علي سيدات فقط بص يا احمد انا معنديش غير تعليق واحد اللي احنا بنوصلوا دلوقتي ده اسمه خيبة تقيلة وربنا يسطر

    ReplyDelete
  41. shayma ... heart, mind and soul;
    شيماء......ازيك اخبارك ايه؟
    انتي فين من زمان؟
    بالنسبة لمدونتك اكيد انتي لغتيها و انتي مش فاكرة
    دي عندي في المدونات المفضلة و دخلت عليها و لقيتها "تمت ازالة المدونة"......اكيد حذفتيها
    عموما خيرها في غيرها ممكن تعملي مدنة جديدة و بلغيني بعنوانها
    تحياتي

    ReplyDelete
  42. Anonymous:
    بس للأمانة التعليق مهم حتى لو كنت غاضب من الموضوع
    يكفي انك تعبر عن غضبك و استيائك بس اكيد بدون تجريح
    تحياتي

    ReplyDelete
  43. هوندا:
    طيب هل تتغير نفسية الفتاة قبل الخطوبة عن بعدها
    يعني اللي بتعمله قبل الخطوبة يختلف عن اللي بعدها
    و بعدين انا لا اتحدث عن اصدقاء الفيسبوك...لها مطلق الحرية ان تضيفهم او تحذفهم
    انا بأتكلم عن زملاء العمل و الدراسة و الأقارب و ناس يفترض انها محترمة
    هل يجوز حذفهم ارضاءا لرغبة سي السيد؟؟

    ReplyDelete
  44. انا تمام يا احمد الحمدلله
    :)
    مهو انا بغبائى ضيعتها لانى كنت بعمل حاجه على الاكونت بتاع جوجل ... يعنى ايييييييييييه مش هعرف اجيب البوستات بتاعتى تانى :(

    على العموم ميرسى جدا يااحمد .. اكيد عايزةاعمل واحده جديده بس مش هاين عليا :) سلامى الجامد اوى
    :)
    shayma ... heart, mind and soul

    ReplyDelete
  45. Anonymous:
    بس تفتكر رحلة الانحدار للخلف للوصول الى القاع ممكن تاخد مننا وقت قد ايه؟
    ممكن تاخد سنين و ممكن قرون علشان نقدر نسير للأمام مرة تانية
    تحياتي

    ReplyDelete
  46. Sharm:
    ما هو افضل تعليق فعلا
    "لله في خلقه شئون"
    تحياتي

    ReplyDelete
  47. عايش و لكن:
    لعن الله الكسل
    تحياتي

    ReplyDelete
  48. عاوز اصحى:
    انت فعلا جبت الخلاصة.....الناس فاهمة النت غلط
    مش فاهمين الفيسبوك و لا الفكرة اللي اتبنى عليها
    حاجة في منتهى الغرابة
    تحياااتي

    ReplyDelete
  49. Anonymous:
    تحياتي لزوجك الفاضل
    واضح انه فاهم الفيسوك صح
    فعلا....دة الصح......المفروض ان ىالشخص بيحترم شريكة حيلته و يثق فيها و بالتالي لا يحجر على تصرفاتها
    اكيد هي لديها اخلاق و عقل يسمح لها باضافة شخص و عدم قبول شخص اخر
    تحياتي

    ReplyDelete
  50. wanda:
    بالنسبة للتعارف بين الشباب و الفتيات هو لا خطأ و لا خطيئة بس طبعا لو تم في الاطار السليم
    بالنسبة للفيسبوك
    اللي انتي عملتيه دة هو السليم تماما...اعملي الخصوصية اللي انتي عايزاها...ماتحبيش الفيسبوك و ماتدخليش عليه اصلا....بلاش تقبلي اي حد انتي مش عايزة تضيفيه...انما تحذفي حد المفروض انه قريبك او زميلك دة اللي انا بأشوفه عيب بجد
    تحياتي ليكي على طريقة تعاملك مع الفيسبوك
    بالنسبة لموضوع الشك دة انا لي رأي فيه من زمان
    وهو ان الشك دة يعني فقد الثقة في النفس....هو مش واثق في نفسه و بالتالي دائما ما يحس بالضألة اللي بتخليه يشك في الانسانة اللي اختارته
    بالنسبة للتعليقات اعتقد فعلا ضعفها كسل كسل كسل...لعنه الله
    بالنسبة لتويتر و باظ هيفوتك كتير لو ماتبيعتهمش
    فعلا مواقع كويسة
    تحياتي و احتراماتي

    ReplyDelete
  51. Tamer Nabil:
    الناس فعلا بتحب المتابعة من بعيد لبعيد بس في احيان كتير قوي بيكون التعليقات مهمة خاصة لو الموضوع مطروح للمناقشة
    تحياتي

    ReplyDelete
  52. بسمة عبد الباسط:
    يعني مفيش فايدة و لا ايه؟

    ReplyDelete
  53. emyhash:
    بعض الفتيات اعتقد انهن ماكانوش مصدقين انهم ممكن يلاقوا ابن الحلال و بعد ما لاقوه اصبحن مستعدات لبذل الغالي و النفيس في سبيل الحفاظ عليه
    تحياتي

    ReplyDelete
  54. شمس الدين:
    فعلا الكلام دة صحيح
    الفيسبوك حرك الكثير من المياه الراكدة في عالم التدوين
    بس برضة التعليقات خاصة المواضيع محل النقاش بيبقى ليها طعم تاني
    تحياتي

    ReplyDelete
  55. طوبة فضة و طوبة ذهب:
    بالنسبة لصاحبة المدونة اكيد هي مبسوطة بفكرها و لها قناعتها اللي محدش من نا هيقدر يقنعها بعكسها
    بالنسبة للفيسبوك ياريت في منك كتير....الا ان الكتيرات لهن اهداف اخرى و افكار اخرى
    بالنسبة للتعليقات اكيد التعليق في المدونة بيزيد الموضوع ثراءا
    تحياتي

    ReplyDelete
  56. didi mounir;
    خيبة تقيلة دي كلمة صغيرة قوي على اللي احنا فيه دلوقتي
    تحياتي

    ReplyDelete
  57. shayma ... heart, mind and soul:
    معلش يا شيماء....امرك لله
    هي بتبقى حاجة تزعل ...بس ما باليد حيلة

    ReplyDelete
  58. نفسى نخرج من الخيبة دى مش انا و بس ده كمان مصريين كتير يا ريت اللى عايز يخرج من االخيبة دى مايستسلمش ويحاول تاني وعاشر

    ReplyDelete
  59. didi Mounir:
    بس دي محتاجة مجهود كبير قوي مش سهل

    ReplyDelete
  60. الموضوع عجبنى بس بصراحة مكسل ارد عليك

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails