Sunday, 14 February 2010

هابي فالانتاين يا مصر


و لأن الحياة اليومين دول لونها حمرا
و الدنيا من حوالينا عبارة عن قلوب و دباديب و هدايا بمناسبة الفالانتاين
ماكانش ينفع (افوت) مناسبة عيد الحب من غير بوست عن الفالانطاين
بس (البوست) في الأغلبية الصامتة لازم يبقى نوع مختلف........و الكلام لازم يكون غير
فلقد قررت ان اتوجه بالتهنئة بالفالانتاين لنوع مختلف من البشر..........نوع مش بس بيحب..........لا دة محتاج للحب بشدة
هابي فالانتاين لكل من اصيب بالسرطان او الفشل الكلوي نتيجة لسياسات زراعية او غذائية دفع هو ثمنها و قبض أخر ثمنها من حياة الأخرين و صحتهم
هابي فالانتاين لكل طفل او طفلة فقد والده بداخل زنزانة باردة اما بتهمة الأنتماء للمحظورة او الانضمام لتنظيم مسلح او متعاطفا مع حماس
هابي فالانتاين لكل معتصم مطالبا و متمسكا بحقه في حياة كريمة تحقق له الحد الأدنى من الحياة الأدمية
هابي فالانتاين لكل من فقد من يحب او من له في هذه الدنيا.......و اصبحت حياته بلا هدف و لا معنى
هابي فالانتاين لكل من يحب هذه البلد و يكتوي بنارها و يحس بالعجز و الفشل و هو يراها تسرق و تنهب و تتقهقر الى الوراء و هي لا تستحق الا كل خير و رخاء
هابي فالانتاين لكل شاب اقصى طموحه في هذه الدنيا هي (وظيفة) تضمن له دخل ثابت يعينه على الحياة و على تكوين (اسرة) يحيا من خلالها حياة طبيعية كأي بني ادم طبيعي على هذا الكوكب
هابي فالانتاين لكل موظف شريف بيعامل ربنا في معاملاته مع الناس اللي ربنا اختصه لقضاء حوائجهم
هابي فالانتاين لكل رجل او سيدة شريفة في اي مجال من مجالات العمل و الحياة لا يخشى في الحق لومة لائم....لا يهادن و ا ينافق من اجل لقمة العيش
هابي فالانتاين يا مصر

بمناسبة الفالانتين:
ليه بيطلع كل سنة في الوقت دة فتاوى و تحذيرات و تهديدات من بعض السلفيين بيندد و يهدد بالأحتفال بعيد الحب و يبشر المحتفلين بعذاب اليم في الدنيا و الأخرة
الناس دي ايه فكرتها عن عيد الحب بالضبط........؟
فاكرين ايه اللي بيحصل فيه؟؟؟
انا عن نفسي بأحتفل بعيد الحب اني بأهدي زوجتي هدية.............بس كدة..........لا اكثر و لا اقل؟؟
اذنبت انا ام اجرمت؟؟؟
لا بأسكر و لا اعربد و لا ارتكب اي من الموبقات في هذا اليوم على الأطلاق
و بعدين ماهو اللي بيعمل الحاجات دي مش منتظر يوم 14 فبراير علشان يعملها
اذا كانت (فتاوى) تحريم الأحتفال بعيد الحب من باب انه يفتح الباب للعلاقات الغير شرعية.......فهل العلاقات الغير شرعية لا تفتح الا يوم 14 فبراير من كل عام؟
و ماذا عن علاقات الحب (الشرعية) برضة لا يجوز الأحتفال بها في عيد الحب؟؟
اصلا علاقات الحب (الغير شرعية)اعتقد انها محرمة يوم 14 فبراير و كل يوم...............
ثم اننا لا نسمع من شيوخ (الوهابية) اي فتوى تخص الظلم و الأستبداد و الفساد و نهب ثروات الشعوب و السفه......الخ
لا نسمع منهم الا كل ما يكره الناس في حياتهم و انفسهم
ارحموا من في الأرض.......يرحمكم من في السماء

32 comments:

  1. This comment has been removed by the author.

    ReplyDelete
  2. الجزء الأول من البوست كئيب وسوداوي جدا

    الكلام في الجزء التاني من البوست جميل جدا.. خليني اقولك ان انهارده شفت معرض لهيئة الأمر بالمعروف والنهي عن المنكر بيستعرضو فيه انجازاتهم الجبارة اللي كان منها مصادرة قلوب حمره ودباديب.. ربنا يشفي

    ReplyDelete
  3. الفالانتين هنا مختلف فعلا
    اصحاب الابتلاء ربنا يعافيهم
    والشرفاء ربنا يثبتهم
    أما بعض الشيوخ
    بصراحة حضرتك جيت على الحاجةاللى بتخنقنى
    هاموت انا من حكاية طاعة الحاكم
    وعدم الكلام عن الفساد
    مرةدكتور تاريخ قال لى
    ان الحسين بن على هو الغلطان
    وان يزيد بن معاوية صح لانه الحاكم والحسين خرج عليه
    عندهم طاعة الحاكم مقدسة
    مع انى مقتنعة ان دستور حكم المسلمين كان خطبة ابى بكر الصديق لما قال
    اطيعونى ماأطعت الله ورسوله
    فأن عصيت الله ورسوله فلا طاعة لى عليكم
    ان احسنت فأعينونى وان أسأت فقومونى




    فى حاجةكمان الرسول عليه الصلاةوالسلام خلع بردته لكعب بن زهير
    لما القى قصيدته التى يعتذر فيها عن هجاء المسلمين
    والاجمل ان القصيدة كانت بتبدأ
    بالغزل على عادةالشعر الجاهلى
    تخيل حضرتك لما الرسول صلى الله عليه وسلم
    بعد صلاة الفجر يسمع ويستحسن
    بانت سعاد فقلبى اليوم متبو ل

    اسفة على الاطالة

    ReplyDelete
  4. كل سنة و انت طيب يااحمد
    انت و المدام
    و ربنا يسعدكم يا رب

    انا متفقة معاك طبعا
    ف الجزء التانى

    اما الجزء الاولانى
    فالمفروض يا عزيزى
    أحداثه و اشخاصه احنا
    بنكون فاكرينها كل السنة
    و وقت الاعياد و المناسبات من ضمن ايام السنة
    و بالتالى هما غير منسيين فى كل الاحوال


    و شكراً لأنك بتلفت نظر
    اللى ناسى او مش واخد باله ....ليهم

    خالص ودى يا احمد
    و معلش انا بقالى زمن مش بعلق
    لكن تأكد انى متابعك دايما

    ReplyDelete
  5. Ayman EL Aneshta :-


    ارجو من الصديق الصحفى محرر جريدة الشروق أن ينشر البوست ... لأنه أكثر من رائع وأتمنى أن يقرأه اكبر عدد من شباب مصر.. اللذين إنجرفوا وراء الفكر الوهابى بدون وعى ولا إدراك

    ReplyDelete
  6. كل عام و كل المصريين بخير
    تحياتي

    ReplyDelete
  7. ياعم سيبك منهم
    المهم تكون جبتلها هدية عليها القيمة
    مش تضحك عليها وتجبلها حاجة من الصيدلية

    ReplyDelete
  8. مع ان الجزءالاول خلانى اكش شويتين بلاش نسود الدنيا ونكركبها فوق راسنا بس ما علينا انا كنت داخلة اقولك ميرسى قوى على هديتك ودايما ذوقك حلو ووجودك ف حياتى احلى هدية ربنا ادهالى عشان انت مخلى كل ايامى فالانطين مش كدة برضو وكفاية عليك كدة عشان معكش كل سنة وانت طيب يا حبيبى مدام:احمدسمير

    ReplyDelete
  9. كل سنه وانت طيب
    كل عيد حب وانت طيب

    ReplyDelete
  10. تهنئة مختلفة ولفتة جميلة لفئة تستحق فعلا التهنئة وتحتاجها
    فكرة الاحتفال بعيد الحب ليست مطروحة على ما أعتقد في كل الدول العربية بنفس شكلها في مصر أو على الاقل لأكون دقيقة أتحدث عن بلدي المغرب اليوم عادي لاشئ مختلف برامج التلفزيون عادية ولامظاهر للاحتفال نهائيا ليس لان الناس تعتبر الاحتفال حرام نهائيا فقط الموضوع غير داخل في ثقافتنا
    كل سنة وانت ومن تحب بألف خير

    ReplyDelete
  11. 7elwa kelmet "wahaby" di......
    wallahi manto fahmeen 7aga

    ReplyDelete
  12. امبارح كان فيه برنامج في التليفزيون جابوا واحده بتتكلم عن الفالنتين وقالت ان العلماء والدكاتره- بما انك دكتور - قالوا ان الانسان في الايام الوسطيه في الشهر 14-15-16 بيكون فاير
    بس الحقيقه مقلتش ايه معنى الفوران بالظبط!!!
    انت مش دكتور يا عم
    قولي ايه موضوع الفوران ده؟

    ReplyDelete
  13. الجزء الاول حقيقي بس التاني انا اوافق واعترض عليه قولوا ليه؟العلماء بيحرموه عشان الاحاديث واضحةوصريحة ان مفيش غير عيدين بس للمسلمين وكمان واضحة وصريحة ف النهي عن التشبه بالكفار
    اما بالنسبة لموضوع الظلم والفساد فعلا علماء الامة بيطنشوه بطريقة مستفزة

    ReplyDelete
  14. الناس دايما تخلط بين العادات والعبادات واللى مش فاهم كل حاجة بيقول عليها بدعة والرسول كانبيقر العادات الجاهلية السليمة وينبذ السيئة والعرف منالاصول المعتبرة فى الشريعة واعياد الفطر والاحى هى اعياد دينية لكن هذه المنهسبات الاجتماعية من قبيل العادات التى تنشر المحبة والسلام زى عيد الام واليتيم...ىعنى لو قلنا يوم الحب او يوم الام كان يبقى افضل؟ المهم لانحتفل بهذه المناسبات بما يغضب الله

    ReplyDelete
  15. ok guys
    klam gamel bs fe 7eta ya abo 7emad we ya kol elqebt elmoslmen we 7ktbha keda 3shan t3rfo t2roha القبط المسلمين e7na elmsryen fen mrg3na eldeny ??? 3lma2 elazhr ???! wla mshay5 elr7ma wel7kma welnas wla wladna elra7o yshof 32od 3ml fel5leg fa 3gbhom klam iqr2 el heya fe bld elwhabya... ka moslmen sona tayheeeen ...
    m7dsh ynsa tare5 el azhr ya moslmen

    ReplyDelete
  16. yaser:
    اي نعم الجزء الأول كئيب يا ياسر بس للأسف دي نماذج من الناس عايشين معانا...ومش عايشين لأننا فعلا مش حاسين بيهم
    طبعا الهيئة دي عايشين في عالمهم الخاص بيهم
    الهيئة بتاعت السعودية دي بتفكرني بقانون ال 50% عمال و فلاحين عندنا
    حاجات عفا عليها الزمن و لكن للأسف لا يمكن المساس بها
    تحياتي

    ReplyDelete
  17. حفيدة عرابي:
    طبعا الاحساس و الاحتفال بعيد الحب بيختلف من شخص لأخر
    يعني في ناس تلاقي عندها عيد الحب دة احتفال أساسي و هدايا و كلام كدة
    و في ناس تانية هموم الدنيا نسيتها يعني ايه حب اساسا مش بس عيد الحب
    بالنسبة للشيوخ اياهم.....بيبصوا للدين من زاوية واحدة بس
    بيتناسوا ان ديننا دين رحمة و حب و طالما اي احتفال في الدنيا بيتم بكل ادب و بدون الخروج على التقاليد يبقى اكيد حلال....دة بيدعوا للمحبة
    ربنا يهديهم
    تحياتي

    ReplyDelete
  18. فاتيما:
    اولا الف الف شكر على التهنئة الرقيقة دي
    ثانيا
    بالنسبة للناس المهمشة و اللي بتعاني في هذا الوطن احنا اكيد فاكرينهم طول السنة طبعا بس عيد الحب فرصة لكي نقول لهم احنا بنحبكم خاصة انهم اكيد في طاحونة الحياة لا يحتفلوا بعيد الحب على الاطلاق
    مفتقد لتعليقاتك بشدة و الف شكر على المتابعة
    تحياتي و احتراماتي

    ReplyDelete
  19. ayman:
    الف شكر على الكلام الجامد دة
    الفكر الوهابي له اسباب كتير لأنتشاره من بينها (و ليس كل الأسباب) العائدون من الخليج و فضائيات الحكمة و الناس..........الخ

    ReplyDelete
  20. ذو النون المصري:
    كل سنة و انت بخير و سعادة

    ReplyDelete
  21. صح الكلام ارحمو من في الارض يرحمكم من في السماء
    تحياتى لك يا جميل

    ReplyDelete
  22. البنت المشمشية حلوة بس شقية:
    الحمد لله....على قد ما ربنا قدرني
    ممكن تسأليها
    بالمناسبة:
    انتي فين من زمان......يارب يكون خير
    تحياتي

    ReplyDelete
  23. زوجتي الحبيبة:
    كل عيد حب و انتي بخير و سعادة
    يارب تكون الهدية عجبتك
    تحياتي و احتراماتي

    ReplyDelete
  24. merooo:
    كل سنة و انت طيبة يا ميرو

    ReplyDelete
  25. خواطر شابة:
    اولا كل سنة و انت طيبة و بخير و سعادة
    ثانيا:
    طبعا الاحتفال بهذا العيد يختلف من بلد لأخر حسب ثقافة البلد نفسها كما ذكرتي
    انا هنا في ليبيا حيث اعمل حاليا بحتفلوا بعيد الحب و لكن على استحياء شديد وسط حملة رهيبة من البرامج الدينية في الأذاعة للتنديد بهذا الأحتفال المشين
    تحياتي

    ReplyDelete
  26. ahmad shahhat:
    معلش يابو حميد.........لو الكلمة دي بتضايقك...ممكن تقول عليها (سلفي)....(متشدد)....الخ
    تحياتي

    ReplyDelete
  27. لورنس العرب:
    يا عم (فوران) ايه و بتاع ايه؟
    المدونة دي نظيفة....ما ينفعش نتكلم عن الحاجات دي هنا.....ههههههه
    تحياتي

    ReplyDelete
  28. Anonymous:
    كلمة (عيد) هنا كلمة مجازية و ليس المقصود منها وضع (عيد الحب) في نفس كفة (عيد الفطر9 و (عيد الأضحى) و لكنها كلمة مجازية
    يمكن ان نطلق عليه كلمة (يوم) بدلا من (عيد) ليصير(يوم الحب) مثلا
    تحياتي

    ReplyDelete
  29. Anonymous:
    كلام جميل و رائع و راقي.........تحياتي

    ReplyDelete
  30. Medo Izac:
    اولا....جميل مصطلح (القبط المسلمين) دة....مصطلح رائع
    ثانيا:
    الأزهر و اكيد انت متابع يمر بأسوأ ايامه على الاطلاق....مواقف واهنة في معظم الأحيان...كل القضايا التي تهم الأمة و تتعارض مع مصلحة الحاكم نجد ان الأزهر يغض الطرف عنها بشكل مستفز
    الأزهر فقد مكانته على يد ابنائه
    تحياتي

    ReplyDelete
  31. mostafa rayan:
    الف الف شكر على التعليق الجميل دة
    تحياتي واحتراماتي

    ReplyDelete
  32. كنت مؤخرا قد جاء عبر بلوق الخاص بك وكانت القراءة على طول. ظننت انني سوف يترك تعليقي الأول. أنا لا أعرف ماذا أقول إلا أن لقد استمتعت القراءة. نيس بلوق.

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails