Sunday, 7 February 2010

رجل الأعمال بين الأصالة و المعاصرة


زمااااان وانا صغير...لما كنت بحلم ابقى كبير كان لما اي حد يسألني انت عايز تطلع ايه لما تكبر يا حمادة؟ كنت على طول وبدون تفكير ارد عليه عايز اطلع رجل اعمال يا عمو
ودة طبعا كان بسبب الصورة الجميلة في ذهني لرجل الأعمال حيث انه راجل شيك بيلبس بدلة على هاي كوول وبيدخن سيجار شكله جامد جدا وراكب عربية احدث موديل وماسك شنطة (كانت عاجباني قوي الشنطة ايامها) وطبعا الصورة الجميلة دي انطبعت في ذهني من خلال مسلسلات التليفزيون والأفلام السينمائية
لما كبرت شوية قعدت ادور في الواقع عن الصورة دي لرجل الأعمال مش لاقيها...والغريب ان حتى السينما والتليفزيون بدأت نظرتهم لرجل الأعمال تتغير بمرور الزمن وتحولت صورة رجل الأعمال من شخص جنتلمان بيلبس اشيك لبس و راكب احدث عربية لصورة شخص شرير بكرش و صوته تخين كل همه جمع المال بطريقة مشروعة او غير مشروعة وغالبا بينتهي العمل الدرامي ان رجل الاعمال دة بيشرف في التخشيبة بأحدى تهمتين اما تجارة المخدرات او استيراد بولوبيف فاسد (مش عارف ليه كانوا مركزين في الدراما على موضوع البولوبيف دة)
لما كبرت شويتين وبدأت انظر حولي في المجتمع لقيت رجال اعمال فعلا بس طبعا مش بالصورة التليفزيونية بتاعت الجنتلمان ولا بتاعت البولوبيف الفاسد...لقيت رجل الأعمال" اليافطة"...رجل اعمال يظهر بين الحين والاخر من خلال يافطة تهنئة للمحافظ او مبايعة لرئيس الجمهورية ثم تطور الموضوع ليصبح صورة ضخمة لرئيس الجمهورية تحتها اعلان عن احدى مشروعات رجل الاعمال وماتعرفش ساعتها ايه العلاقة بين الصورة والاعلان بس هو كدة
وغالبا بيكون التطور الطبيعي لرجل الأعمال دة انه بيكون مرشح الحزب الحاكم في الانتخابات القادمة ثم نائب الدائرة الى ما شاء الله لحد ما تخلص فلوسه او لحد ما يظهر في الصورة رجل اعمال تاني فلوسه اكتر ويافطاته اكتر ومبايعاته اكتر..الخ
دة طبعا حال رجال الأعمال في مدينتي...(اذا صح تسميتهم رجال اعمال) لأنهم مهما كان لسة على قدهم برضة بالمقارنة برجال الأعمال اياهم بتوع اللجنة اياها والفضايح اياها فدول علاقتي بهم كانت علاقة تليفزيونية فقط من خلال اعلانات مشروعاتهم المستفزة بالطبع والمفيدة جدا لنومك من خلال الأحلام السعيدة
اما حاليا فعلاقتي بهم علاقة صحفية من خلال صفحات الحوادث والقضايا يوميا وبرضة متابعة اخبار قضاياهم مفيدة جدا لأثارة شعور التشفي والشماتة داخل العقل الباطن
عموما,
اكيد هناك برضة رجال اعمال شرفاء ومخلصين ومحبين لمجتمعهم واهلهم وناسهم ويعملون من اجل تنمية بلدهم بدون اي منفعة شخصية وبرغبة حقيقية وصادقة (انا عن نفسي مااعرفش حد كدة...بس اكيد موجودين...)مش اكيد قوي يعني

6 comments:

  1. عمرى ما قولتها اشاشا
    و لا حتى الجكلة الشهيرة اطلع دكتورة اطفال
    لا كنت عايزة اطلع زى الوالد و الوالدة مهندسة زراعية لكن الله سلم :-)))
    المهم
    مهنة رجل اعمال تقريبا بتكتب فى جواز السفر للى ملهوش شغلانة معينة مقيدة فى نقابة :-)))))))))))))))))))))
    شغلانة لعب بفلوس الغير
    اتعلمت لما اشتغلت انهم نادرا لما بيغمروا بفلوسهم كله قروض و سلف ودين
    يعنى مش فلوسهم بس ذكائهم

    هى التجارة او البزنس و السياسة مرتبطين بجواز مدنى فى اغلب الدول
    فالى عايز يكسب صفقات اكثر لازم معارفة اكثر و واسيطه اكثر و بالتالى ارخص و احسن واسطة الاحزاب الحاكمة
    مفروض الاحزاب بتستفيد منهم اكثر مما تفيدهم علشان تحقق برامجها الانتخابية
    بس فى مصر الاستفادة سرية و الافادة علنية

    المهم ولا تزعل روحك
    اشترى هاى كول و جاكت و شنطة و بنك السعادة و تخيل :-)))))))))

    ReplyDelete
  2. رجل اعمال اصبحت كلمة دارجة من كتر استخدامها اللى مالهوش شغل رجل اعمال واللى لم فلوس من الخليج ورجع يرتاح وحط فلوسة ف البنك رجل اعمال واللواء المتقاعد برضة رجل اعمال معرفش لية هذا اللى جانب رجال الاعمال والمستثمرين بجد اللى بيسعو دايما لتزاوج المال والسلطة عشان يكونو ف امان

    ReplyDelete
  3. تفتكرو ان رجال الاعمال بيعملو اليوفط دى من دماغهم او لحبهم للقيادة السياسيه؟؟ الموضوع كله مصالح مشتركه

    ReplyDelete
  4. انا حاليا حققت نص المعادله
    انى اكون رجل
    بس لسه مستنى الاعمال
    :))
    اعتقد انى على مدى حياتى مشوفتش تقريبا رجال اعمال شرفاء بس اكيد موجود بس ليه مستخبيين معرفش

    ReplyDelete
  5. دلوقتى راجل الاعمال بيتعزم على طاولة قيمتها 2 مليون جنيه ولازم تكون على شمينه حسناء هيفاء فيحاء
    وبرضع مقدرش اقولك كلهم علشان مش اكون ظالمه
    تحياتى

    ReplyDelete
  6. واللهى يااحمد كنت بفكر فى الموضوع بتاع رجال الاعمال ده بس مش كده بطريقه تانيه بس بجد انا مابقيتش بشوف رجال اعمال
    نفسى اشوف واحد زى رفيق الحريرى كده عندنا مثلا رجل اعمال بحق ربنا وفى نفس الوقت رجل سياسى من الطراز العالى واحد حب بلده بجد وكان حابب يخليها عروسه بين العرب بس للاسف الله يرحمه

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails