Sunday, 17 January 2010

قوانين مورفي


صراحة...اول مرة قرأت عن (قوانين مورفي) دي كان منذ وقت قصير و بالتحديد في كتاب (زغازيغ) للدكتور أحمد خالد توفيق
لم أكن اسمع عن هذه القوانين على الأطلاق من قبل على الرغم انني بعد قراءتي عنها اكتشفت مدى اهميتها بل و تدخلها الشديد في حياتنا اليومية
ايه حكاية (قوانين مورفي) دي؟؟
قوانين مورفي دي مجموعة من القوانين بتوضح ظواهر مالهاش اي تفسير و لكنها موجودة فعلا.....بمعنى ان قوانين مورفي بتخليك تلاحظ اشياء تحدث في حياتك بأستمرار و لكنها لا تفسرها و لا تبين اسباب حدوثها انما تلفت نظرك الى انها تحدث
و ستستغرب من رد فعلك عندما تؤكد ان هذا يحدث فعلا....بل دائما ما يحدث و لا أحد حتى الأن يعلم السبب
و قوانين مورفي تم تسميتها نسبة الى (الكابتن مورفي) و الذي كان يعمل بالجيش الأمريكي بقاعدة ادوارد الجوية بالولايات المتحدة الأمريكية....ثم قام العديد بأضافة الكثير من القوانين او القواعد التي يغلب عليها الكوميديا او التشاؤم الساخر....و تم انشاء العديد من المواقع على شبكة الانترنت لتستقبل (العبارات) على شاكلة (قوانين مورفي) لتنتثي منها الأفضل و تضيفه
بعض قوانين مورفي
جربت انك تستخدم سلك لتوصيل (الدش) مثلا بالريسيفر...او (مشترك) لتوصيله بجهاز كهربائي من ناحية و مصدر الكهرباء من ناحية؟؟؟
من قوانين مورفي
"أي سلك تقطعه حسب طول معين.......هو أقصر من الازم"
افتكر بقى بعض المواقف من هذا النوع......و ستتأكد من مدى صحة هذا القانون
جربت مرة تبقى قاعد كدة الصبح و قدامك كوباية الشاي و ماسك (توست) بأيدك و بتدهنه بالزبدة.........ممكن جدا يقع (التوست) من ايدك
هنا يظهر قانون مورفي التالي ليفسر لك هذا الحدث
"لابد ان يسقط التوست على الجانب الذي دهنته بالزبد"
افتكر كدة كام (توست) وقع من ايدك......و افتكر كدة وقع على اي جنب....ستتأكد من مدى صدق قانون مورفي
أما القانون التالي فهو نتيجة للقانون السابق
"أحتمال سقوط التوست على الجانب المدهون بالزبد يتناسب مع ثمن السجادة"
يا سلام عليك يا مورفي
لو حبيت مرة تنظف زجاج النافذة الخاصة بحجرتك....اكيد هتحب تنظفه من الداخل و الخارج....هنا يظهر قانون مورفي الأتي:
"القذارة على الجانب الأخر من الزجاج دائما"
و هنا المعاناة.......راجع تاريخك او تاريخ اسرتك مع تنظيف (الألوميتال) و ستكتشف كم كان (مورفي) على حق
هل تحب التدخين.....؟ غاوي (بنات)......؟ بتحب (الأكل).......؟؟ متعتك انك (تضرب) مخدرات.......؟؟؟
مورفي يوضح لك في قانونه الأتي ان
"كل شيء ممتع في الحياة غير قانوني او غير اخلاقي او يسبب السمنة"
مع الأعتذار لمحبي كل الموبقات
جربت مرة تبقى واقف في الحمام و ماسك فرشاة الأسنان في ايدك او ماكينة الحلاقة او فرشاة الحلاقة.....ووقعت من ايدك...مورفي يوضح لك في قانونه
"كل شيء يسقط في الحمام لابد ان يقع في المرحاض"
راجع تاريخك مع (المرحاض)...عفوا (الحمام) و ستكتشف مدى تحقق قانون مورفي
انا عن نفسي القانون الأتي لمورفي يتناسب معي تماما.....و ابصم عليه بالعشرة و يشهد عليه جميع محلات بيع الجوارب الرجالي
"الغسالة لا تبتلع الا فردة واحدة من كل زوج من الجوارب"
يشهد عليه درج الشرابات بتاعتي....منذ قديم الأزل و انا اعاني من هذه المأساة و يبدو اني سأستمر انا و (جواربي) نعاني للأبد
و دول كام قانون من قوانين مورفي تأمل فيهم بعمق.....علك تدرك ان سوء الحظ لا يلازمك انت وحدك...بل هي قوانين غير معلومة اسبابها
"الأشياء تتلف حسب قيمتها"
"عندما يفشل كل شيء آخر...اقرأ التعليمات"
"احتمال حدوث الخطأ يتناسب طرديا مع الضرر الذي سيسببه هذا الخطأ"
"لو لم تنجح تخلص من اية ادلة على انك حاولت"
و في النهاية هناك قانون من قوانين مورفي اعتقد انه اهم من اي قانون أخر
"معرفتك بقوانين مورفي......لن يساعدك في شيء"

22 comments:

  1. اخيرا حد جاب سيرة قوانين مورفي
    ياريت تترجملنا كمان
    لان تعليقاتك عليها جميلة

    ReplyDelete
  2. معرفتك بقوانين مورفي......لن يساعدك في شيء
    هذا هو في رأيي القانون الاهم من قوانين مورفي لانه تقول أمثالنا عند القدر يعمى البصر وتقول ايضا في مكمنه يؤتى الحذر
    بالتالي معرفة هذه القوانين مفيد فقط من جانب التسلية ولاشئ غيرها
    تحياتي لك

    ReplyDelete
  3. هيا كلام او جمل ولااعتبرها قوانين بالمعنى المعروف كل ما يقول من السهل تفسيرة من الاخرين

    مع خالص تحياتى

    ReplyDelete
  4. رغم انها صح جدا
    بس دا يمكن عشان حس التشائم اللى كنا بنتمتع بيه :D

    ReplyDelete
  5. فعلا مثيرة جدا قوانين مورفىى واول مرة اسمع عنها ياريت تتكتب عنها تانى وشكرا لك

    ReplyDelete
  6. دكتور احمد ضحكنا لما جابها في كتابه

    ReplyDelete
  7. أيوة كدة يا وديع أخيراً فهمتنى يا وديع أخيراً حد أكتشف أسباب الحاجات الى كانت بتحصلى ومش عارف ليه

    ReplyDelete
  8. والله مورفي ده هايل
    هي دي العلماء
    ينزلو كده لمستوانا
    (:
    مش ارشميدس ونيوتن والكلام الي كله نظريات مش عارفين ايه لازمتها
    (:
    تحيتي

    ReplyDelete
  9. عارف ايه اهم حاجه قلتها معرفتنا بالقوانين مش هيفرق فى حاجه يعنى عرفناها ولا ماعرفنهاش مش هتفيد كتير ههههههههههههههههههه بجد تسلم ايدك موضوع ظريف

    ReplyDelete
  10. واضح انه كان راجل متشائم اوى

    ReplyDelete
  11. medzag:
    ان شاء الله ليا بوست كمان هعمله عن قوانين مورفي
    الكتابة عنها ممتع جدا
    تحياتي

    ReplyDelete
  12. خواطر شابة:
    هي بالطبع قوانين فكاهية يالدرجة الاولى
    كوميدية بحتة
    بتنوه فقط عن ظواهر بتحصل لنا كلنا و كلها امور قدرية
    تحياتي

    ReplyDelete
  13. Tamer Nabil:
    هي ليست قوانين
    هو نوع من الفكاهة
    تحياتي

    ReplyDelete
  14. بطوط حبوب:
    فعلا
    دمها خفيف جدا.......بس بتحصل
    تحياتي

    ReplyDelete
  15. anonymous:
    علم و ينفذ ان شاء الله
    ان شاء الله في بوست تاني على الموضوع دة
    تحياتي

    ReplyDelete
  16. dr.lecter:
    د/احمد خالد توفيق له الفضل في تعرفي على هذه القوانين
    ماكنتش سمعت عنها قبل كدة

    ReplyDelete
  17. anonymous:
    ادعي بقى للحاج مورفي

    ReplyDelete
  18. ميرام:
    مورفي جاب المفيد
    بعيدا بقى عن الكلام المجعلص بتاع النظريات دة
    تحياتي

    ReplyDelete
  19. طوبة فضة و طوبة ذهب:
    الف شكر.......هي فعلا قوانين دمها خفيف
    حاجات بتحصل فعلا في حياتنا اليومية
    تحياتي

    ReplyDelete
  20. Tears:
    واضح انه شااااااف كتير
    تحياتي

    ReplyDelete
  21. بصراحة احييك على البوست ده لانه تزامن انى بقرا زغازيغ حاليا وبردو شدني أوي ونفسي اكتب عنه بوست

    سبحان الله فعلا شئ غريب وبيحصل مليون فى المية فعلا بس يمكن يكون من قوانين الحياة نفسها او داخل فيها فكرة ولقد خلقنا الانسان فى كَبَد وان الحياة كدح وهكذا

    كل شئ ممكن
    :))))

    ReplyDelete
  22. انسانة:
    هي قوانين فكاهية اوضحت بعض الاحداث الغريبة التي تحدث في حياتنا و لكنها لم تفسرها
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails