Friday, 30 October 2009

الأستنساخ حق لكل مواطن


ما تيجوا نتخيل فكرة مجنــــــــــــــــــــــــونة؟
تعالوا نتخيل ان الأستنساخ اصبح متاح للجميع....زي عمليات (شد الوش) و (شفط الدهون)....و اصبحت مراكز الأستنساخ في يد الجميع....زي المحمول كدة
و كل واحد من حقه (يستنسخ) نفسه عدد لا نهائي من (النسخ)......تخيلوا لو دة حصل....الحياة تبقى عاملة ازاي؟؟
انا عن نفسي...هوزع (نسخي) في كل مكان......
هحط (نسخة) مني في البيت.....و هاعملها (نسخة) نائمة.....علشان (اخذ كفايتي من النوم)....ان لبدنك عليك حق برضة
و هأعمل (مني) برضة نسخة للبيت برضة...بس المرة دي (نسخة غير نائمة) علشان برضة التليفزيون...و (القعدة) مع المدام
و اكيد مش هايفوتني اني (انسخ) نفسي كام نسخة و اوزعها على الشركات....ماهو مش معقول ابقى راجل (مستنسخ) و (مني كتير) و اكتفي بالعمل في مكان واحد...لازم افيد و استفيد....هأعمل 3 او 4 نسخ و هأسميها (نسخ عاملة) و هتبقى وظيفتها (العمل ليل نهار) ...هخليها (نسخ حمير شغل)....ما هو في (نسخة نايمة) في البيت
مش معقول برضة ابقى بني ادم (مستنسخ)...و أنسى أؤمن مستقبل (نسخي)....لابد من السفر سعيا وراء الرزق....هأبعث نسخة مني للعمل في السعودية...و نسخة للكويت وواحدة للأمارات و نسخة لليبيا.... و هاسيب نسخة مني في مصر مع الأهل و الأحباب
و كمان السياحة و الفسح شيء في غاية الأهمية مش ممكن انسى اعمل كام (نسخة) مني و ابعتها اوروبا و امريكا و الشرق الأقصى..و مش هأنسى (ابعت) نسختين واحدة لشرم الشيخ و التانية للغردقة تشجيعا للسياحة الداخلية
هاستفيد من الأستنساخ برضة في (الدراسة)....و زي ما الأصل درس صيدلة....ممكن جدا (النسخ) تتخصص تخصصات اخرى
هخصص نسخة مني لدراسة الحقوق و نسخة لدراسة الصحافة...و نسخة تالتة للهندسة.....الخ
مفيش مانع برضة اعمل (نسخ) خاصة للكليات العسكرية....ينفعوا برضة
حكاية (النسخ) دي تنفع قوي في حالة الرغبة في مشاهدة (المباراة) مع (المسلسل العربي) في نفس الوقت.....(الاستنساخ) حل المشكلة تماما....(نسخة) للمباراة و (نسخة) تتفرج على المسلسل و يبقوا يحكوا لبعض
كمان (الاستنساخ) هيقضي على المنافسة الرهيبة بين برامج (التك شو) لأستقطاب اكبر عدد من المشاهدين....مع الاستنساخ مفيش مشكلة....كلنا هنقدر نتفرج على كل البرامج و كل القنوات في نفس الوقت
بما ان الخيانة الزوجية تعتبر احد اهم اسباب الطلاق......بالأستنساخ ستقل معدلات الطلاق تماما...ما الزوجة مش هتحس ان (زوجها) بيخونها...لأن الباشا عمل من نفسه(نسخة) مخلصة مقرها الأساسي هو البيت...و نسخ كتيــــــــــــــــــــــر وظيفتها الأساسية العربدة و الجري ورا الستات في كل مكان
انا كمان مش ناوي اخلي كل (نسخي) لهم نفس الأهتمامات علشان ما (ازهقش) من نفسي...هخلي (نسخة) بتحب الرياضة و (نسخة) بتحب الموسيقى و (نسخة) بتعرف ترسم....بس الأكيد اني هخلي كل (نسخي) اهلاوية...دة حرصا على صحتي طبعا
بس فكرة (الاستنساخ) دي هايلة.....هتحل كمية مشاكل لا حصر لها
ايه دة.........؟ هو انا بقيت كام (نسخة)...؟.....انا بقيت (كتيـــــــــــــــــــــر)....كدة ليه؟
لا يا عم......انا (كدة) زي الفل الحمد لله......دة لو كان في الدنيا مني اتنين كانت خربت

Thursday, 22 October 2009

لعن الله من ايقظها


مقتل قبطى على يد مسلم فى جريمة "شرف" بأسيوط.. الغضب يهدد بإشعال فتنة طائفية جديدة

حدوتة كل يوم مع اختلاف اسماء ابطالها و اماكنهم
حدوتة بين مسلمة و مسيحي او مسلم و مسيحية ربما تتطور لما هو ابعد من قصة حب....فتنندلع فتنة طائفية...تسيل الدماء لها انهارا....و ربما ينتج عنها ضحايا غالبا ما يكونوا ليسوا هم ابطال القصة انما مجرد كومبارس
طيب دة (رجل) متزوج و عنده عيال بس عينه زايغة و فارغة....و هي (بنت) اقل ما يقال عنهاانها(ساقطة)....غرقا معا في (بحر الرزيلة) زي ما بيسموه المثقفين
ايه علاقة الأسلام و المسيحية بالموضوع...؟؟
يعني تفرق قوي لو كان الاثنين مسلمين او كان الاثنين اقباط
ايه علاقة الأديان بجريمة زنا...طرفاها الأثنان عديمو الدين اساسا
لا هي مسلمة متدينة و لا هو له علاقة بالمسيحية اساسا
ليه لما اطراف (بتغلط) بيأخذ الموضوع سكة تانية خاااااالص على الرغم ان اخر ما كان يفكر فيه (طرفا) الأزمة اساسا هو الدين
فلا الأسلام يقر بالزنا و لا المسيحية كذلك
هي طالبة منحلة و منحرفة جلبت العار لأهلها...و هو رجل قذر لم يحترم حرمات الأخرين....و المصيبة انها هربت و لا احد يعلم اين اختفت و هو لجأ للكنيسة
هنا فقط...الأن فقط....فكر في الكنيسة......لم يفكر في الكنيسةو هو يزني....و لكنه فكر فيها و لجأ اليها هربا حتى يحول الموضوع لفتنة طائفية و الأمر ابعد ما يكون عن ذلك
الطامة الكبرى ان ينساق الجميع وراء هذا (المنحل) و يتحول الموضوع الى مسلمين و اقباط...فتنة
طائفية لا يستحق المتسببان فيها الا الضرب بالنار
هي جابت العار لأهلها....و هربت.....و هو تسبب في قتل والده و تدمير اسرته و اشعال نار فتنة طائفية و خصومة ثأرية يعلم الله متى تنتهي
سيناريو مكرر بأختلاف اطراف و ابطال السيناريو.....سيناريو ممل و مكرر بحذافيره....يخطىء من يخطىء....و يعيث في الأرض فسادا من يشاء...و يبقى الدين شماعة يعلق عليها الفاسقون و الفاسدون
اخطاؤهم في امور الدين منها...اي دين...بريء
الفتنة نائمة............لعن الله من ايقظها
الخبر من موقع جريدة اليوم السابع

Wednesday, 14 October 2009

لسة بدري قوي


كلما صرح احد السادة الجهابذة المسئولين بقدرة مصر على تنظيم كأس العالم للكبار كلما اصبت بحالة غريبة من الأنبعاج النفسي و التكور العقلي
هو لسة في كدة؟؟؟
هو كل ما ننظم (ميني بطولة) زي كأس العالم للشباب او الناشئين...نسخن و نفرد صدرنا و نقول مالناش دعوة...احنا عايزين كأس العالم للكبار؟؟
في 1997 نظمنا كأس العالم للناشئين (تحت 17 سنة).....صدقنا نفسنا و طلبنا تنظيم كأس العالم للكبار 2010....و طبعا كلنا عارفين الباقي (صفر المونديال) الشهير
في 2009 بننظم كأس العالم للشباب (تحت 20 سنة).....يا خوفي لنطلب تنظيم الأوليمبياد 2020
تبقى مصيبة لو السادة المسئولين بيشتغلونا.....و تبقى مصيبة اكبر لو هم مقتنعين ان احنا مؤهلين لتنظيم اي بطولة بجد.....بطولة بحق و حقيقي يعني
بالنسبة لبطولات كأس العالم للشباب او الناشئين..هي طبعا (بطولات كدة وكدة)...لا يشعر بها العالم على الأطلاق و لا يهتم بها الا اسر و عائلات الاعبين المشاركين بالأضافة للدولة المنظمة ليس اكثر
انما بطولة زي (كأس العالم) اللي هي اكبر و اهم حدث كروي في العالم....اللي الناس بتحجز تذاكر مبارياتها قبل ما يعرفوا مين اطراف المباريات دي اساسا......لــــــــــــــسة بدري علينا قوي....قوي قوي كمان
مش علشان الجيش عمل ملعبين و قفلتوا (الاستادات) كام شهر و غيرتم (ارض الملعب) و ركبتوا (كراسي) في المدرجات بدلا من الحجارة يبقى خلاص.......من حقنا ننظم كأس العالم لكرة القدم
كأس العالم و الاوليمبياد دي احداث كبيرة جدا بتتطلب اشتراطات اسهل ما فيها هي الشروط الرياضية و توافر البنية التحتية الرياضية.......دي اتفه ما في الموضوع
احداث زي دي بتتطلب شروط للأسف علشان (مصر) تمتلكها محتاجين (مصر جديدة) خاااااااالص غير (مصر) اللي احنا عايشين فيها دلوقتي
محتاجين شوارع نظيفة مافيهاش اكوام زبالة....مافيهاش حفر و مطبات......مافيهاش شوارع مقفولة من بابها علشان معاليه ساكن هنا او سيادته بيزور و الدته او جنابه محتاج تأمين
محتاجين شوارع بتجري فيها سيارات حديثة منظرها يشرح القلب مش (عربيات) مهكعة ماركة (ادي زوبة زقة).....محتاجين شوارع طنطا و اسوان و الزقازيق و دمنهور يبقوا في مستوى شوارع القاهرة و الاسكندرية
محتاجين (رجال مرور) مهندمين و شكلهم نظيف يقفوا في الشارع لتنظيم المرور بكبرياء و كرامة مش بأنكسار و تسول....محتاجين نتعلم (السواقة) الأول و احترام قواعد المرور
علشان نبقى مؤهلين لتنظيم كأس العالم لازم نعرف نحترم بعض الأول و نحترم حقوق الأنسان علشان نعرف نحترم الضيوف
لازم نعرف نحترم السياحة و نتعامل معاهم بعلاقة (شراكة) و احترام بعلاقة (فد و استفد) مش نتسول منهم او نسرقهم
علشان نكون مؤهلين لتنظيم كأس العالم لازم الجمهور الحقيقي هو اللي يملأ المدرجات...مش نحشي الملاعب بعساكر الجيش و الأمن المركزي و ندعي زورا و بهتانا ان البطولة ناجحة
علشان نبقى ينفع ننظم كأس العالم لازم (نشيل) صور السيد الرئيس من ملاعب كرة القدم...لأن دي ملاعب للرياضة مش مؤتمرات انتخابية
علشان مجرد نحلم بتنظيم كأس العالم لازم كل فرد يحس ان البطولة دي (هو) اللي منظمها....(هو) بس المسئول عن نجاحها..و ليس بتعليمات السيد الرئيس و توجيهات السادة المسئولين
تعليمات و توجيهات المسئولين عمرها ما نجحت بطولة
ننظم كأس العالم ازاي و احنا فاشلين في تنظيم الدوري العام المصري....؟؟؟؟؟
انا علشان احضر مباراة (اهلي*زمالك) في الدوري العام الساعة 8 مساءا...بأقعد في الأستاد من الساعة 4 و الا لن اجد كرسي رغم حصولي على تذكرة او لن ادخل من باب الاستاد اساسا
حاجة ما بتحصلش في اي مكان في الكوكب الا في مصر
ازاي نجرؤ على طلب تنظيم كأس العالم و الأمن هو المتحكم الأول و الأخير في مواعيد و اماكن المباريات...بكلمة من ضابط شرطة يمكن تأجيل او حتى الغاء اية مباراة بداعي (تعليمات امنية),,,,برضة احنا بس اللي بننفرد بكدة على سطح الكوكب
ننظم كأس العالم ازاي بس و احنا ملاعبنا محاطة بأسوار من الحديد لعزل الجمهور عن الاعبين...على الرغم ان (فيفا) يمنع ذلك تماما بأعتبار ان هذا (المشهد) هو أهانة للجماهير و اعتبارها (كالحيوانات) التي يجب عزلها بسور من الحديد
و لكنها تعليمات الأمن طبعا
هي اي دولة عندها كام ملعب (تتوهم) انهم ملاعب يصلحوا لممارسة كرة القدم يمكن ان تطلب تنظيم كأس العالم......؟؟؟
الموضوع يا سادة اكبر من كدة بكتـــــــــــــــــــــــير.....و هو احنا اخذنا (الصفر) الشهير من شوية......؟؟؟
مش قلت لكم
لـــــــــــــــــســـــــــــة بدري قوي

Tuesday, 6 October 2009

ابويا الناصري


ابويا رجل ناصري....يعشق عبد الناصر...يرى ان الحياة قد انتهت بموته.....يرى ان مصر قبل عبد الناصر كانت غابة يأكل فيها الكبير الصغير...اما بعد عبد الناصر فهي فوضى لا نظام فيها ولا قانون
ابويا يرى ان اي شخص ضد عبد الناصر هو شخص قاصر فكريا ومضلل سياسيا....هو شخص ضحية اعلام مغرض مضلل قام بتشويه رجل عظيم...رجل لم تنجب مصر قبله وعقمت ان تنجب بعده
فأنا من وجهة نظر ابي...شاب ضحل الثقافة السياسية..لم يعش الفترة الناصرية الزاهرة المزدهرة....لم يجرب قسوة القهر والظلم والاستعباد التي عانى منها المصريون قبل ثورة يوليو المباركة
انا من وجهة نظر ابي...مضلل...مغرر بي....ضحية اعلام حكومي عميل....اعلام شوه سمعة الرجل وانجازاته...اعلام ركز على سلبيات العصر الذهبي الناصري وتغاضى عن ايجابياته وانجازاته واعجازاته
ابويا دائما يسألني بشماتة ....وهو انت بتفهم في السياسة؟؟؟؟؟؟؟....تعرف ايه انت عن السياسة؟؟؟؟؟؟ انت كل ثقافتك من التليفزيون وكتب التاريخ المدرسية المغرضة.....وطالما لم تعش عصر ما فأنت لا تملك الحق في تقييمه سواء بالسلب او الايجاب
ابويا بيشوف اني طالما لي تحفظات على نظام عبد الناصر....يبقى انا بالضرورة عميل مباركي او ربما عميل ساداتي....مش عايز يصدق رغم اني حلفت له بأغلظ الايمان ان ما اسخم من سيدي الا ستي...وان مصر قدر لها ان تنكب وتبتلى بحكامها على مر العصور.....انما ايــــــــــــــــــــه.......لا حياة لمن تنادي
على ما يبدو ان تصلب الرأي وعدم احترام المعارضين فكريا هو حال وسلوك اغلب الناصريين...وبالتحديد عتاة الناصرية....لا يطيقوا من يخالفهم سياسيا....اعتقد ان دة لضعف حجتهم وعدم اقتناعهم بها اساسا
اقول له يابا..الراجل دة جاء الى الحكم بانقلاب عسكري....لم يسلم السلطة الى الشعب كما كان يزعم.....احتل كرسي لم يكن او زملاءه اهل له على الاطلاق.....
يبص لي شذرا ويقول لي...الشعب هو اللي طالبه بكدة...
اقول له يا حاج....دة الثورة دي قامت على 6 مبادىء لم يتحقق منها ولا واحد.............يرد عليا ان قوى الاستعمار والشر في الداخل والخارج تحالفوا ضده وضد قوى الخير والتنمية
اقول له يا سيدي......تقول ايه بقى في الاعتقالات وتكميم الافواه والقمع والخوف والرعب........يرد عليا بكل ثقة كل دة كان ضد اعداء الشعب فالحرية كل الحرية للشعب ولا حرية لأعداء الشعب
اقول له يا مولانا.....طب تقول ايه بقى في نكسة يونيو 1967 ومسئوليته المباشرة عنهاااااااااا؟ يرد عليا بكل ثقة وطمأنينة يحسد عليها وهو كان مسئول عن الجيش؟؟؟؟ اقول له بس عبد الحكيم عامر صاحبه وحبيبه هو المسئول وبالتالي عبد الناصر هو المسئول عن وجود الشخص دة في المكان دة وبالتالي هو مسئول مسئولية كاملة عن النكسة........يرد بثقته وطمأنينته المعهودة لقد ضللوه....ضللوه...افهموه ان الجيش مستعد وجاهز وبالتالي لقد غرروا به
ازنقه بقى في خانة اليك.....طيب يابا الراجل دة كان ممكن يدخل التاريخ من اوسع ابوابه باطلاق الديمقراطية ودعم الحريات وارساء دعائم دولة حديثة قائمة على دستور محترم...و زي ما كل الدول العربية والافريقية قلدوه في الانقلابات العسكرية والديكتاتورية وحكم الفرد..كانوا هيقلدوه في ديمقراطيته وبناء دولهم على اسس ادمية تحترم مواطنيها
يرد عليا قائلا....الشعب لم يكن مستعد للديمقراطية....كان لا يملك قوت يومه وبالتالي لم تكن تلك الفترة مناسبة للديمقراطية على اساس انها كانت ترف لا يملكه الشعب
وطبعا تعليقي ساعتها بيكون ومن امتى الديمقراطية طبخة مقاديرها هي الفلوس والتعليم؟؟؟؟ طب ما الهند لما طبقت ديمقراطيتها لم تكن تمتلك لا علم ولا فلوس ولا حتى صحة؟
شعب افقر مننا بكتييير واكثر جهلا بمراحل...وصحة اغلبه تعبانة وفي النازل ومع ذلك قدروا يكونو دولة دعائمها الديمقراطية واحترام المواطن بلا قمع ولا اذلال ولا انتهاك لادميته
ابويا مش عايز يقتنع....او- بيتظاهر بكدة-ان انا لا انتقد عبد الناصر علشان انا مقتنع ان الايام دي افضل...بالعكس انا باشوف ان اللي مصر فيه دلوقتي هو نتيجة لحكم عبد الناصر ورجاله
وهو لولا عبد الناصر كان ظهر السادات؟ وهل بدون حكم السادات هل كنا سمعنا عن محمد حسني مبارك؟
وبناءا عليه وطبقا لعلم المنطق
فأن عبد الناصر هو المسئول عن حكم مبارك لمصر
طبعا الجدال المتكرر دة...بينتهي بنتيجة واحدة مالهاش تاني
ان انا مابفهمش في السياسة....وانه ضيع وقته في الحوار معايا
ويبص ليا نظرة كلها عطف واشفاق وحزن على شاب مغرر به ومضلل وبيعاني من مرض لا شفاء منه وهو
عدم الايمان بالتجربة الناصرية
****************
ارجو الا يسبب هذا البوست غضب اصدقائي الناصريين علي....فلي مع احدى المدونات ذات الفكر الناصري تجربة غريبة نوعا ما...فلقد كتبت من قبل بوست ينتقد زعيمهم الملهم جمال عبد الناصر-رأيي-....فأذا بي اواجه بعاصفة من الانتقاد و الغضب الشديد ربما لم اكن اواجه بي لو كنت قد اخطأت او عبت في المقدسات الدينية
و انهت عتابها (الغير رقيق) لي بندمها الشديد على انها اضاعت وقتها الثمين في زيارة مدونة (شخص) (عديم الأشتراكية) مثلي
و من ساعتها قررت ان تقاطع مدونات (الجهلة) من امثالي (اعداء الشعب) و الثورة
ارجو ان يتسع صدر اصدقائي الناصريين لفكرة الخلاف في الرأي مع (غير الناصريين) ....فالخلاف في الرأي لا يفسد للود قضية

fb comments

wibiya widget

LinkWithin

Related Posts with Thumbnails