Saturday, 31 January 2009

عادل امام....لست زعيما



لو سألتني عن رأيي المتواضع في عادل امام؟
سأرد عليك بسؤال:
تقصد اي عادل امام فيهم؟!!!!! عادل امام (البني أدم) الأنسان يعني ولا عادل امام الفنان؟
بالنسبة لي هناااااااااك فرق كبير بين الاثنين
فعادل امام الفنان لا تستطيع تقييمه الا داخل الاستوديوهات ودور العرض السينمائي.....وهو فنان قدير ولكنه ليس زعيما كما يلقب نفسه او كما يلقبه مريدوه
لعادل امام اعماله الفنية الرائعة ولكنه ايضا له اخفاقاته....فله افلامه القيمة سواء الكوميدية منها او التي تحمل رسالة ومضمون وفكرة وله ايضا بعض الاعمال التي لا تستطيع ان تصفها الا ب ال...(الهلس) او التفاهة لمجرد التفاهة
واذا ذُكر عادل امام كبطل لفيلم فعليك ان تسأل فورا او تخمن مع اصدقائك عن عدد القبلات الساخنة (البوسات) داخل الفيلم...وعن المنافسة الساخنة التي تنشأ بين بطلات الفيلم عن ايهن ستظهر امكانياتها الجسدية اكثر من الأخرى
واصبحت اغلب افلام عادل امام عبارة عن قبلات ساخنة ومشاهد مثيرة تم توليف وتركيب حدوتة عليها لكي تصبح فيلما سينمائيا والأهم ان ينبسط الزعيم
ولكي تتأكد من صدق كلامي راجع مشاهد عادل امام ويسرا في طيور الظلام ومشاهده مع وفاء عامر في الواد محروس بتاع الوزير ومشاهد نيكول سابا في التجربة الدنماركية و ومشاهده مع شيرين في بخيت وعديلة.....وكل دة على سبيل المثال وليس الحصر
وعلى الرغم من بعض هذه الأفلام قيمة فعلا وجيدة فنيا الا انك تخجل من ان تشاهدها مع اسرتك فعادل امام مشاهده الساخنة لا ترحم...وأهم ما في الفيلم ان (الزعيم)....يكون مبسوط
لدرجة انك لو اعلنت انك دخلت فيلم لعادل امام لابد ان تواجه السؤال التقليدي اياه..(الفيلم دة كالعااااادة برضة؟؟؟) زي بقية افلام عادل امام؟
لدرجة ان فيلم زي (حسن و مرقص) كان هو الأستثناء والشاذ عن كل افلام الزعيم لمجرد خلوه من اي مشهد سااااخن؟؟
الناس بجد كانت مذهولة و مش مصدقة ان فيلم لعادل امام يخلو من (بوسة) واحدة...وفيما يبدو انه اضطر لذلك آسفا حيث ان دوره كقس يحتم على الشخصية ان تتسم بالوقار والأحترام المطلوب لشخصية رجل الدين
لو راجعت تاريخ عادل امام الفني هتعرف قد ايه هو اتمرمط فنيا في بداياته (راجع مسرحية السكرتير الفني..لما كان كاتب محامي لفؤاد المهندس...او عفريت مراتي لما كان سنيد للبطل صلاح ذو الفقار او لصوص لكن ظرفاء لما كانت البطولة مشتركة مع احمد مظهر)....الخ
كل دة مش عيب....بالعكس دة شرف له انه يطلع السلم من أوله......انما العيب انه يعوض كل الضرب والمرمطة اللي شافها وهو صغير لقبلات واحضان ساخنة وهو كبير وكأن لسان حاله
اصبح نجما......لينتقم
اكثر ما يستفزني في عادل امام هو انه قرر ان يكون فنان شامل بحيث يكون قادرا على لعب جميع الأدوار
فهو كوميديان مصر الأول...ولا مانع من فتونة فريد شوقي....وجاذبية عمر الشريف..ورومانسية عبد الحليم حافظ...وأبوة حسين رياض
عادل امام غير قابل لأن (يُضرَب)....في أفلامه.....عادل امام (يضرَب) بس....يستفزني جدا مشهد طلعت زكريا في فيلم (التجربة الدنماركية) وهو يستجوب (عادل أمام) في الفيلم وبدلا من ان يضرب عادل امام (بالقلم) يقوم بضرب اللي جنبه بدلا من ان يضرب الزعيم
فالزعيم غير قابل للضرب....الزعيم (يبوس) بس
وطبعا الفيلم لابد ان يكون ذو رسالة.....فيلم ضد الأرهاب...فيلم ضد الفساد....فيلم ضد مافيا المحاماة.....فيلم ضد الفتنة الطائفية....فيلم يناقش قضية الأب المتسلط....فيلم عن فساد الكبار.....الخ
ولكن هل يؤمن عادل أمام الأنسان بقضايا افلام عادل امام الفنان؟؟؟؟
من يوم ما وعيت ع الدنيا وفنانينا العظام بيصدعونا بكلمات عن مصداقية الفنان وان الممثل لا يستطيع تمثيل اي دور فني الا اذا كان مؤمنا بالدور ومقتنع به تماما خاصة الأدوار السياسية والتي تعبر عن موقف معين
الا ان الفنان عادل امام قد شذ عن القاعدة تماما فمعظم افلام الفنان العظيم تنحاز للمواطن الغلبان الكادح ضد سطوة الحكومة وعنف الأمن بداية من (اللعب مع الكبار) وقبلها (احنا بتوع الأتوبيس) والذي تناول بشدة احوال المعتقلات المصرية ولكن في العصر الناصري واللي اعتقد انها لم تختلف كثيرا عن معتقلات هذا العصر مرورا ب( الأرهاب والكباب) والذي تناول البيروقراطية الحكومية وطريقة تناول الداخلية المصرية لأي ازمة طارئة وطرق تعامل الدولة مع الأزمات
كل الأفلام الجميلة دي والتي استطاع من خلالها الفنان (عادل أمام) ان يصل لقلب وعقل المواطن المصري المطحون لم تشفع له لكي ينحاز (عادل امام) الانسان لنفس المواطن ضد نفس النظام والحكومة
فالأنسان (عادل امام) يعشق الأضواء ويعشق السلطة ومنحاز للحكومة والنظام بحق وبدون حق وعلى عكس الفنان (عادل امام) فأن الأنسان (عادل امام) لا علاقة له على الأطلاق بالمواطن الغلبان بل اعتقد انه بيقرف منه اساسا وهو في حد برضه يسيب حضن السلطة الدافي المعطر لكي ينحاز للفقراء والمساكين اللي حضنهم مليان بالفقر والمرض والعرق
ففخامة (الزعيم) يرى ان الأفلام اللي بيمثلها ورسائل الأحتجاج التي يرسلها من خلال السينما ما هي الا (شغل سيما) ليست اكثر...انما الواقع مختلف تماما عن السيما
فالمتظاهرون الساخطون على اوضاع البلد من وجهة نظر (فخامته) ناس فاضية......اما مظاهرات التنديد بالعدوان على غزة فهي (مضرة) بالأقتصاد القومي......على اساس ان الأقتصاد القومي في أحسن حالاته بدون مظاهرات
اما (حماس) من وجهة نظر (فخامة الزعيم) فهي المسئولة عن العدوان على غزة بأعتبار ان اسرائيل لن تقابل صواريخ حماس بالورود
مش عارف دي وجهة نظر اي (زعيم) فيهم؟؟؟؟؟!!!!!!
اما الأخوان المسلمين فهم الشغل الشاغل للزعيم.....فجميع افلامه لا تخلو من تلميح او تصريح للأستهزاء من جماعة الأخوان المسلمين بسبب او بدون
راجع جميع افلام (عادل امام) بداية من فيلم الأرهابي وستكتشف انها جميعاااا بلا استثناء تتناول جماعة (الأخوان المسلمين) او الأسلاميين بشكل عام
اما في مشهد هزلي يسخر منهم او مشهد يتناولهم في صورة ارهابيين او متخلفين او لديهم شهوات جنسية مكبوتة....الخ
رغم ان فخامة (الزعيم) يعلم تماما ان ليست كل الجماعات الأسلامية على هذه الشاكلة فمعظم هذه الجماعات خاصة (الأخوان المسلمين) لديها كوادر في منتهى الأخلاق والذكاء والأحترام والمكانة الأجتماعية وهو نفسه قام بمصاهرة احد اقطاب جماعة الأخوان المسلمين (معتقل حاليا)
الخلاصة اني ارى ان (عادل أمام) الفنان يختلف تماما عن عادل امام (الأنسان)....فكلاهما له مواقفه المختلفة تماما وربما المتناقضة مع الأخر
فسواء (عادل أمام)...الفنان او الأنسان فهو ليس زعيما
فالزعيم هو من ينحاز للناس......هو من يبيع السلطة واضواءها وبريقها...هو من يقدر نبض الشارع ويحترم مشاعر جماهير أحبته بل عشقته...لا ان يتهمها بأنها (ناس فاضية) لمجرد انهم يعبروا عن غضبهم من سياسات حكومات لا تقدر مشاعرها
و (الزعيم) لا يعتمد في افلامه على (الأفيهات) الجنسية والمشاهد الخارجة .......(الزعيم) الذي يحترم جمهوره لا يرفع اسعار تذاكر مسرحياته لمبالغ فلكية بحيث لا يحضر مسرحياته الا المليونيرات وعلية القوم فقط
فهم جمهوره الحقيقي فعلا
استاذ عادل امام
عفوا.........انت لست زعيما

Monday, 26 January 2009

قرأت مؤخرا


اعلان هام
للسادة زوار و زائرات المدونة الكرام
نحيط سيادتكم علما انه تم افتتاح فرع جديد لمدونات العبد الفقير لله أحمد سمير (اللي هو أنا)........وهي مدونة
بمشاركة متميزة للمدونة المتميزة بسمة عبد الباسط (مدونة الروح).......الشركة بالنص على فكرة
الفكرة بدأت من عندي وبالتحديد عن طريق البنت المشمية حلوة بس شقية اللي دبستني في تاج مشمشي من عندها وكان فيه سؤال عن فكرة انشاء مدونة تانية؟
فصرحت بالفكرة اللي كانت بتراودني من زمان وهي انشاء مدونة للكتب اللي بقرأها
كل ما انتهي من قراءة كتاب بأبقى نفسي فعلا اشارك اصدقائي فيه واحكي لكل اللي حواليا عن اللي عجبني في الكتاب دة...وامارس متعة النقد....والنقد ليس بالضرورة ان يكون سلبيا فالناقد من الممكن جدا ان يبرز ايجابيات الكتاب قبل سلبياته
وكانت العقبة الأساسية هي ضيق الوقت ليس الا...وهي عقبة كبيرة خاصة اذا ما اقترنت بالكسل
الا ان بسمة ربنا يكرمها تلقفت الفكرة مني وقررت مساعدتي في تنفيذ الفكرة الثقافية دي عن طريق تصميم المدونة واختيار القالب المميز لها ومشاركتي في تحريرها عن طريق تنظيم البوستات
بحيث يكون البوستات في المدونة اسبوعيا....كل اسبوع بوست جديد.....كل اسبوع كتاب جديد
سيتم نقد الكتاب ايجابيا وسلبيا وايه اللي عجبنا في الكتاب دة وايه اللي لم يعجبنا
كل ما يخص الكتاب بشكل عام مع نبذة مختصرة عن محتواه
نأمل ان تساهم المدونة في بناء فكرة عامة سريعة مبسطة عن الكتاب موضوع التدوينة بحيث تساعد القارىء في اتخاذ قراره بأقتناء الكتاب من عدمه
بعد تلقي التهاني والتبريكات والكلام الظريف دة...لي طلب لديكم
برجاء اي واحد شايف ان الفكرة شيقة وعجبته واستهوته انه لا يتردد في انه يشارك معانا في تحرير المدونة ومشاركتنا بنقده وتحليله لمجمعة كتبه حتى تزيد الفائدة وتعم على الجميع
من يرغب في الانضمام للمدونة برجاء زيارة المدونة وطلب اضافة
admin
للمدونة.....وستقوم بس بس بأضافته فورا
المدونة دي لمحبي الثقافة والكتاب وهم نسبة كبيرة لا يستهان بها....منتظرينكم في مدونتنا الجديدة
قرأت مؤخرا
ملحوظة:
انا لست ناقد ادبي ولا افهم وفي اصول النقد....الا اني سأتناول الكتاب من منظوري كقارىء ليس الا....يعني مش هتفلسف واقول كلام كبير.....مجرد هأنقل احساسي بالكتاب سلبا او ايجابا فقط

Monday, 19 January 2009

غزة مهمة.....مصر أهم


مش عارف اكتب عن ايه؟
عن احداث غزة؟؟؟؟
مش هأضيف جديد..انا شخصيا بدأت اتخنق من موضوع غزة دة...اقرأ صحف الحكومة الاقيهم بيشتموا في ايران وسوريا وقطر وحزب الله وحماس والكل كليلة.....افتح الصحف المحترمة الاقيهم بيشتموا في اسرائيل وبرضة في قطر وسوريا وايران وحزب الله وحماس بس بأسلوب محترم شوية عن الجرايد اياها
و تحولت القضية لحرب كلامية بين مصر وايران وبين مصر وقطر وبين الجزيرة والعربية وبين الأخوان المسلمين والحزب الوطني
برضة الواحد له طاقة...والمرارة برضة مابنلاقيهاش في الشارع,لما بتتفقع مش هينفعني حد....و الطحن الأسرائيلي في غزة اخد كتير قوي من وقتنا وعلى الرغم من اهمية الموضوع الا اني بدأت اشك ان حكومتنا و رجالها ورجال اعمالها متكيفين قوي من موضوع غزة دة ولسان حالهم بيغني ويقول (امانة عليك يا ليل طول)...ماهو موضوع غزة دة حايش عنهم بلاوي متلتلة..وكل البرامج اللي كانت بتؤرق منامهم زي (90 دقيقة) و (العاشرة مساءا) و (القاهرة اليوم)..مسخرة كل حلقاتها لموضوع غزة وضحاياها على الرغم ان (مصر وضحاياها) اولى بكتير بالأهتمام والمتابعة
وعلى رأي الكاتب الكبير ابراهيم عيسى لما قال ان عدد ضحايا العدوان الأسرائيلي على غزة لسة لم يتجاوز عدد ضحايا العبارة (السلام 98)...اللي كانوا ضحايا العدوان الفسادي والأفسادي على مصر
كما انه لن يتجاوز عدد ضحايا حوادث الطرق في مصر سنويا اللي بيمثلوا ضحايا عدوان الفساد والاهمال والامبالاة الحكومية الحزبية الوطنية المصرية
نسينا تماما ان احنا عندنا مشاكل مزمنة ومستعصية ...عندنا كوارث لا تقل عن كارثة غزة وان كانت اصعب....طيب هم مشكلتهم وهتنتهي بكرة او بعده او بعد اسبوع....انما احنا مشاكلنا مزمنة ومستعصية عن الحل على الأقل من المنظور القريب
لما تكتشف ان 170 مليون بني ادم في العالم حاملي لأحد الفيروسات الكبدية وان 12% من الرقم دة في مصر لوحدها...دي تبقى كارثة ولا لأ؟
لما تعرف ان حوالي 30 الف مصري هم ضحايا حوادث الطرق (ما بين قتيل ومصاب)......دة بالنسبة لك رقم مفزع ولا لأ؟
لما يكون هناك 69,000 قضية فساد في مصر من بينها 11,000 قضية رشوة (طبقا لوزير التنمية الأدارية) ذات نفسه.....يبقى فيه مصيبة
لما يبقى في بلدك مليون طفل مشرد (اطفال الشوارع) طبقا لتقديرات اليونيسيف يبقى انت عندك مليون قنبلة موقوتة في شوارع بلدك...ما بتخافش على اهلك وبناتك واخواتك؟
كل دة وغيره نسيناه تعاطفاااا مع غزة
نسينا مصر بمشاكلها بمأسيها ببلاويها وتفرغنا بكامل طاقتنا للأنقسام والتلاسن انا مع حماس وانا مع مصر وقطر دي بنت لذين وايران دي لها اجندتها وحسن نصر الله دة راجل مية مية وسوريا عملت وامريكا قالت واسرائيل عادت......الخ
انا لا انكر اهمية غزة واهمية ما يحدث هناك وتعاطفي الكامل مع ابناء غزة ودعواتي لهم باحدى الحسنيين النصر او الشهادة انما انا شايف ان احنا اتجهنا بكل طاقاتنا و امكانياتنا ومشاعرنا نحو الشرق نحو غزة وتخلينا تماما عن اهتمامنا بمشكلاتنا بل ومآسينا الداخلية وكأننا اصبحنا بلدا خاليا من المشكلات وتفرغنا لحل مشكلات الغير
اعلم تماما وقبل ما يتهمني اي احد بأني غير منتمي و مش بني ادم اساسا....اعلم تماما ان المصاب جلل وان الضحايا كثر وان الكرامة العربية ضاعت (ولو انها ضايعة بأهلها)....وان من لم يهتم بأمر المسلمين فليس منهم
اعلم كل هذا...ومهتم والله....بس برضة ليا حق اهتم ببلدي شوية
اه انا احب غزة.....ولكني احب مصر اكثر منها
اه ان مهتم بغزة واهلها...ولكني اكثر اهتماما بمصر وناسها
لأن
اذا كانت غزة مهمة.....فأن مصر أهم....على الأقل بالنسبة لي

Tuesday, 13 January 2009

تاج مشمشي


تاج لونه مشمشي طب عليا على سهوة و بدون اي سابق انذار
ولأن البنت المشمشية حلوة بس شقية طلبات سيادتها اوامر...فكان لابد من الأجابة على التاج دة في سرعة وبدون اي تلكؤ او لكاعة والا محدش يضمن ايه اللي ممكن يحصل فيه
نخش بقى على التاج في السريع

مبسوط من اسمك ولو مش بتحب اسمك كان نفسك يبقى اسمك ايه ولية؟
انا عن نفسي الحمد لله مبسوط من اسمي جدا
هو في احلى من كدة؟
الحمد لله والفضل لله ثم لخالتي اللي كانت السبب في تسميتي بأسم (احمد)..بناءا على رؤية لها في المنام ونظرا لأن الرؤية حق فلقد امتثل والدي ووالدتي تماما وعدلوا عن تسميتي بأسم (محمد) وقرروا ان اكون (احمد)...والحمد لله رب العالمين
وبمناسبة الرضا عن الاسم بتحضرني واقعة طريفة جدا
كان في واحد زميل في الكلية كان اسمه (عطوة)...وطبعا ماكانش راضي عن اسمه و الحقيقة انه كان ايجابيا وقرر تغييره رسميا عن طريق المحكمة....وقد كان
وتم تغيير اسمه
الى
خيـــــــــــــــــــــــــــــــــري
مش عارف ليه بصراحة؟؟؟
اهم حلم فى حياتك ؟
اني احس اني بني ادم في بلدي
احس اني رأيي مؤثر...احس اني اشارك في صناعة القرار وليس اداة في يد صانع القرار
اعيش في بلد يحترم القانون وسيادة القانون....يحترم حقوق الانسان....بلد بلا فساد ولا واسطة ولا محسوبية
بلد لا يعشق ولا يخاف من البدلة الكاكي ولا يركع امام النسر والدبورة
حلم حياتي اعيش في بلد يحاسب برلمانها حكومتها
بلد يخاف المسئول من الشعب وليس االعكس
تجوز البنت اللى بتحبها قبل الجوواز
ولاتجوز واحدة تانية مشيت مع غيرك ؟
اه طبعا ممكن اتجوز البنت اللي كنت بحبها قبل الجواز
ايه المشكلة يعني؟
على اساس بقى اني هاعمل (دكر)..واقوللك لااااااااا...ماينفعش الواحد يتجوز واحدة مشي معاها قبل كدة
لا..بصراحة انا مش من النوع دة
بس برضة مش من النوع اللي ممكن يتجوز واحدة مشيت مع غيره
اصل انا مش فري ي ي ي قوي كدة
بس من الاخر
انا مابحيش الناس اللي بتمشي مع بعض دوووول
انا طول عمري مبدأي في الحياة ان اللي يحب واحدة يتقدم لها على طووول
وغير كدة تبقى قلة ادب
لو نفسك تعمل مدونة تانية ممكن تكون بتكلم عن ايه؟
اعمل مدونة عن الكتب اللي بقرأها
اكتب عنها وعن انطباعاتي عن الكتاب او الرواية
انا الحمد لله بقرأ كتب كتير وفي مجالات متنوعة ومتعددة من السياسة للرياضة للرواية للأجتماع وبيبقى نفسي اعبر عن اعجابي بالكتاب او الرواية
ففكرت اني اعمل مدونة للكتاب فقط....بعد كل كتاب او رواية انتهي من قراءتها اعمل بوست عنه وعن انطباعاتي
بس تراجعت عن الفكرة....لضيق الوقت
للبنت ممكن تتخلى عن حاجات كتير من مغيرات الحياة عشان انسان والولد ممكن تغفر لبنت انها كانت بتحب واحد تانى فى الماضى وتتجوزها؟
اه طبعا ممكن اغفر
انا في رأيي في فرق كبير جدا بين ان واحدة تحب واحد وبين انها تمشي معاه
مفيش حد في الدنيا ماجربش الحب...وعلى رأي وردة
نكدب لو قلنا ما بنحبش
ممكن اغفر طبعا لواحدة انها تكون احبت شاب قبلي انما اللي مش ممكن اغفره على الاطلاق انها تكون لسه بتحبه
مش بس لسه بتحبه
مش ممكن اغفر لها انه يكون بييجي على بالها اساسا
لو في ايدك تحكم مصر لمدة24ساعة ممكن تعمل ايه؟
احل البرلمان فورا....واقوم بتشكيل لجنة قانونية محايدة لتغيير الدستور تمامامش مجرد تعديله وتكليف اللجنة بوضع دستور دائم للبلاد يضمن قيام دولة ديمقراطية محترمة قائمة على الفصل بين السلطات مع التشديد على ضرورة استقلال القضاء و الاعلام وحرية تكوين الاحزاب واصدار الصحف
ولن انسى ان اصدر اوامري فورا بالقبض على الشلة اياها ومحاكمتها محاكمة عادلة نزيهة...بس نزيهة بجد
انتا شايف ان محمد حسنى مبارك عامل ازاى؟
شايفه بيحب مصر.....بس بطريقنه
هو شايف انه ادرى بمصلحة مصر من اي حد...وان الشعب المصري يجب الا يحكم الا بالشكل دة
وان الشعب المصري لا تصلح معه الديمقراطية لأنه شعب اغلبيته جاهلة وغير مهتمة بموضوع الديمقراطية دي اصلا
وان مصلحة مصر وشعبها الا يجرها لأي حرب لأن عهد الحروب قد انتهى
وهو بيشوف ان بموالاته لأمريكا هو بيجنب الشعب المصري البهدلة
هو بيشوف ان الاخوان المسلمين خطر على مصر اكثر من اسرائيل وان على جثته ان تحكم الجماعة دي مصر في يوم من الايام
انا اعتقد ان هو بيفكر بالمنطق دة
على فكرة انا لا اشك انه بيحب مصر...بس بطريقته بصرف النظر هي صح او غلط
وهو وحش للدرجادى ولا الراجل بردو بيعمل اللى عليه وان بلدنا احسن من غيرها؟
مفيش حد وحش على طول او حلو على طووول
اي حد في الدنيا دي له ايجابياته وله برضة سلبياته
له مميزاته وله كمان عيوبه
بس البقاء في الحكم لمدة 28 سنة قابلة للزيادة كفيلة بأن تجعل اي ايجابيات هي سلبيات وسلبيات فادحة
اما بلدنا احسن من غيرها فهي اكيد احسن من غيرها
بس في بلاد كتير قوي احسن منها
مصر ممكن جدا تكون احسن من كدة وبكتيــــــــــــــــــــــــــــــــر كمان
الفساد والبيروقراطية وحكم العسكر ضيعوا مننا سنين كتير قوي علشان نبقى على الأقل زي ماليزيا او كوريا الجنوبية
ايه اكتر حاجة تخليك مبسوط فى االدنيا ؟
اني اكون السبب في اسعاد الناس اللي حواليا
ودي مش مثالية والله ولا حاجة
بس هي دي الحقيقة
ساعة ما ادخل الفرحة على قلب اي حد سواء والدي او والدتي او اصدقائي او زملائي او اي حد غلبان في الشارع بتبقى فعلا لحظة ممتعة
يه اللى ممكن ينكد عليك حياتك فى لحظة؟
اي لحظة احس فيها بالظلم
سواء الظلم لنفسي او للي حواليا
فكرة الظلم واستغلال النفوذ والسلطة واستعراض القوة بتصيبني بنكد شديد جدا
بتصيبني حالة رهيبة من القرف
بس اللي بينكد عليا بجد هو ان الأهلي يتغلب.....والحمد لله مابيحصلش دة الا نادرا
ايه رايك فى البت مشمسية حلوة حلوة بس شقيه؟
حلــــــــــــــــــــــــــــــــــــــوة.......وشقية
بجد اضافة جميلة وقوية للتدوين والمدونات
وعاملة جو وحالة شقاوة وعفرتة في النت
ومخلية الشاشة عندي بتتلون باللون المشمشي كل ما بتكتب تعليق عندي في المدونة
ربنا يوفقها
*************************
تم بحمد الله و توفيقه ولا اراكم الله تاجا مشمشيا زي دة

Friday, 9 January 2009

مستر اكس.....اغنى راجل في العالم

حاولت اخبي وأداري علشان أداري على شمعتي
ماقدرتش
حاولت ارتدي قناع الخباثة واللؤم وادعاء الفقر
ماعرفتش
و اليوم ازف اليكم الخبر السعيد
انا من اغنى مليار بني ادم على مستوى العالم
وبالتحديد
انا رقم 866,157,482 على مستوى العالم
ودة طبقا لموقع
انا طبعا مش عامل البوست دة علشان اعقد حد ولا حاجة لا سمح الله
انما البوست دة يندرج تحت بند واما بنعمة ربك فحدث
يسعدني تلقي تهانيكم و تمنياتكم
انما اي تعليق هأشم فيه ريحة طمع او جشع او حسد هتعامل معاه بمنتهى العنف
انتم مش عارفين قوة الفلوس في الزمن دة ولا ايه؟

Friday, 2 January 2009

جاوب يا بابا






اسفااااااااااااااااااااااااااااااااااااااااااف

قلة ادب

انحدار اخلاقي

دي اقل كلمات ممكن توصف الأعلان العجيب دة

والغريب والعجيب والمثير للضحك ان الدنيا قامت ولم تقعد احتجاجا على اعلان لمنشط جنسي اخر لمجرد ان خلفيته الموسيقية كانت موسيقى اغنية (خلي السلاح صاحي) واعتبروا ان كدة عيب وان دة اسفاف واهانة لأغنية وطنية

واني الاقي حد يحتج على الحوار العجيب المثير اللي في الاعلان دة؟

ابداااااا

بنزعل قوي من اللي يهين موسيقى لأغنية وطنية ولا نحرك ساكنا للي بيخدش حياء ملايين الرجال قبل السيدات

الأعلان المثير دة بيخدش حياء المتزوجين والمتزوجات ما بالك بقى بالبنات والشباب

مش عارف هي ثقافتي انا اللي كدة ولا الاعلان دة مضايقكم زيي كدة؟

انا اعرف ان المواضيع دي بتناقش اما في غرف النوم او في عيادات الأطباء انما في التليفزيون وبالطريقة دي في الحوار؟؟؟؟؟!!

غريبة شوية.....لا استسيغها على الاطلاق

شاهدت اعلانات كتير مصرية وعربية وحتى اجنبية لمنشطات وعقاقير جنسية ولكنها كلها لم تصل لفجاجة هذا الاعلان

كلها ببقى بالأيحاءات او الأشارات وكلها المعنى وصل للمشاهد المستهدف من الاعلان دة

انما اعلان بمستوى الحوار اللي في الاعلان دة......ماشفتش

اصلا اسلوب الكلام اللي في الاعلان دة وطريقته.....فجة وغريبة جدا

وازاي وزارة الصحة تسمح بأعلان عن عقار يباع في الصيدليات انه يكون بالشكل دة؟

من عجائب مصر ام العجائب ان القانون يمنع توجيه اعلانات عن مستحضرات طبية للجمهور

بمعنى ان ما ينفعش يظهر في التليفزيون اعلان عن دواء للضغط او القلب او الكبد مثلا

انما يسمح بعرض اعلانات تليفزيوني لمستحضرات منشطة جنسيا!!!!!!!!!

العري مش خلع ملابس وبس.....العري الاخطر في حوار مثير او طريقة كلام مش مضبوطة

محدش فكر هيجاوب ازاي لما ابنه او بنته يسأله

هو حامد هيرجع جامد ازاي يعني يا بابا؟

جاوب بقى يا بابا

ملحوظات:

من فترة طويلة كتبت بوست ينتقد اعلان لعقار (فياجرا)..وكان الأعلان بالنسبة لأعلان (حامد)...يعتبر اعلان في منتهى الخجل والوداعة

ماكنتش عارف ساعتها ان التقيل جاي ورا

-----------------------------

من شدة غيظي من الأعلان دة....كونت على (الفيس بووك) جروب يعبر عن غيظي وضيقي من الأسفاف دة

الجروب بعنوان:

ابتذال......اسفاف......(هتبقى جامد يا حامد)....عيب قوي كدة

لمن يريد الأنضمام....اضغط اللينك

fb comments

wibiya widget

LinkWithin

Related Posts with Thumbnails