Thursday, 31 December 2009

الأغلبية الصامتة......3 سنوات..عيد ميلاد و أشياء أخرى



في 31 ديسمبر 2006 -من 3 سنوات تماما- تم تأسيس مدونة الأغلبية الصامتة
في لحظة من لحظات الملل على الانترنت قررت ان اؤسس مدونة....سمعت عن المدونات و قررت ان اكون مدونا قتلا للوقت و هربا من الملل
و اليوم و بعد مرور 3 سنوات على انشاء مدونة الأغلبية الصامتة اقر و اعترف انها اصبحت جزءا لا يتجزأ من حياتي
جزء من تاريخي....شاركتني افكاري على مدار 3 سنوات كاملة....بوستات من كل الأنواع سياسة...سخرية...حزن....فرح....فلسفة...رياضة...احداث عامة...مناسبات خاصة
كل ما فكرت فيه خلال 3 سنوات اجده موثقا على صفحات مدونتي الأغلبية الصامتة
و اليوم....31 ديسمبر 2009 جوايا كلام كتير قوي عايز اقوله....و ناس كتييييييير قوي عايز اشكرهم
ناس شاركتني عالمي التدويني....شجعتني...دعمتني....شاركتني افكاري.....استحملت خلافي معها في الرأي كما ايدتني في اتفاق ارائي معها...ناس ظهرت مع بداية المدونة و استمرت في متابعتها للمدونة سواء علقت او لا.....و ناس قررت ان تهجر عالم التدوين و تختفي....و ناس تتابع المدونة في صمت و بدون تعليق....و ناس....و ناس ...عاااااالم كبير قوي دخلت فيه بمحض الصدفة لأكتشف انني غصت فيه حتى الأعماق و لا اعتقد انني قادر على الهروب من هذا العالم الجميل
مدونتي "الأغلبية الصامتة".......كل سنة و انتي طيبة.....و كل سنة و انت مرآة لأفكاري و ارشيف لحياتي
Happy Birth Day To My Blog
******************************************
كالعادة كل سنة في مثل هذا التوقيت من العام...يطرح نفس السؤال
ماذا تتوقع في السنة الجديدة.......؟؟؟
و كالعادة (ربنا ما يقطعها عادة) سأحاول ان اتوقع ما قد يحدث في 2010...ليس رجما بالغيب و انما محاولة لأستكشاف المستقبل و استقراء الأحداث (حلوة استقراء) دي
في 2010 يحدث الأتي:
يخرج منتخب مصر من كأس امم افريقيا بأنجولا خالي الوفاض....ربما من دور ال8 او حتى قبل النهائي و لكنه لن يفوز بالبطولة (مش نفسية و لا شكل لعيبة ممكن تفوز بالبطولة) خاااااااالص
يفوز الأهلي بالدوري العالم للعام الخامس على التوالي (لأنعدام المنافسة) اساسا
يفوز الحزب الوطني الديمقراطي بأنتخابات مجلس الشعب بعد انتهاء (كابوس) قاضي لكل صندوق و بعدما اصبح التزوير يتم بكل اريحية و على عينك يا تاجر لتنتهي اسطورة الأخوان المسلمين في مجلس الشعب (مش هيشموه) تاني خلاااااص
قد لا يخلو الأمر في 2010 من حادثة او حادثتين تصادم قطارات(قطارات الغلابة) طبعا....بس مش عارف هيقيلوا مين المرة دي؟؟
تزداد كراهية العرب للنظام المصري و هو ما ينعكس على تعاملهم مع (الشعب المصري) بعد اكتمال بناء الجدار الفولاذي بين مصر و قطاع غزة
يستمر السيد جمال مبارك في نفيه للتوريث او نيته او حتى رغبته في حكم مصر و يستمر في اعلان استغرابه و اندهاشه و لسان حاله يقول (جبتوا الكلام دة منين) اساسا
يستمر الفيس بوك في لحس عقل الشباب و الفتيات مع تنامي اعداد مدمني الانترنت في مصر (طبعا المقصود هو الجانب الهلسي من الانترنت و ليس الجانب العلمي او الاكاديمي)...حاشا لله
قرارات ازالة لمنازل عشوائية مع احتجاجات و اعتصامات من اصحاب هذه المنازل بأعتبار انها منازل (غير عشوائية) تم بنائها تحت سمع و بصر (فساد) المحليات...بس لا حياة لمن تنادي
في 2010 الأمر لن يخلو من اعتصامات لأكثر من فئة اما تطالب بكادر خاص او زيادة مرتبات او الحصول على بعض الحقوق و لكن (عصا الأمن) غليظة و صاحبنا مابيعرفش صاحبه
في 2010 يستمر الجدال الأزلي (النقاب) فرض ام (فضل) ما بين مؤيد و معارض بدون ان نتوصل الى اي شيء في النهاية
تعديل وزاري يسفر عن تغير في الأشخاص و لكن بلا ادنى تغيير في السياسات...(سياسات) الوطني من اجلك انت....اما حركة المحافظين فتشمل وجوه جديدة معظمها من قادة الشرطة و الجيش المتقاعدين يحدثوا العديد من التغييرات و التطوير في محافظاتهم اولها طمس كل أثار المحافظين السابقين ووضع صورهم في الميادين لتحل محل صور سابقيهم من (الفراعنة)....عفوا المحافظين
يستمر الجدل في 2010 عمن سيرشح نفسه للأنتخابات الرئاسية القادمة 2011....هل الرئيس مبارك ام ابن الرئيس مبارك ؟؟ و هل سينافسه الدكتور البرادعي ام الدكتور ايمن نور ام السيد عمرو موسى ؟؟ و من سينافسهم من زعماء الأحزاب الكرتونية اياها لأكتمال الديكور
ولن يحسم هذا الجدل في 2010......و نبقى نتقابل في 2011 اذا كان في العمر بقية
مصر................................كل سنة و انتي طيبة..........سنة سعيدة عليكي
*******************************
و لأن التاجات كانت نادرة في سنة 2009 على عكس اهداءات ا
لتاجات في 2008 و 2007....فلقد اتخذت قرارا و ارجو ان تساعدوني عليه
لقد اتخذت قرارا بأبتكار (تاج) جديد.....سميته تاج (رأس السنة)....و هو تاج اجباري و ليس اختياري
و لأن البوست (بهوء) مني بشدة....فلقد قررت النهاردة طرح التاج على الجمهور و اهداءه لأصحاب نصيبه لنشره على النت و البدء الفوري في الأجابة عليه
اما انا فسوف يكون البوست القادم ان شاء الله (اول بوست في 2010) هو اجاباتي على التاج دة
و نخش ع الجد
السؤال الأول : أجباري
بالنسبة لسيادتك......ياترى سنة 2009 تقدر تعتبرها بشكل عام سنة سعيدة....كبيسة...مملة...مالهاش لازمة.....الخ؟
ياريت تختار لها وصف من كلمة واحدة
السؤال الثاني : اجباري برضة
ايه أجمل حاجة حصلت لك في 2009؟ و بالمرة أسوأ حاجة حصلت في 2009 (لو كانوا كتير اختار الأسوأ)؟
السؤال الثالث: برضة اجباري
لما بيتقال قدامك 2009.....ايه اول حاجة بتتبادر لذهنك على طوووووووووول؟
السؤال الرابع: أكيد عرفت انه اجباري
بتحتفل بليلة رأس السنة؟؟؟ و لا بتعتبر الأحتفال بها حرام؟؟؟ (طبعا اكيد مش مقصود الأحتفال السكر و العربدة لأنها حرام في رأس السنة و رجليها كمان) و لا ايه؟
السؤال الخامس : مبني على اللي قابله
لو مش محبكها..و ما بتعتبرهوش حرام....ياترى هتحتفل بيه السنة دي ازاي؟؟ او احتفلت بيه ازاي لو جاوبت على التاج دة بعد 31 ديسمبر؟؟
السؤال السادس: مش محتاج افكركم انه اجباري
فاااااااااكر 31 ديسمبر 2008 (اه...السنة اللي فاتت)؟ ياترى فاكر حالك ساعتها كان ايه و كنت عامل ازاي؟؟؟
في 31 ديسمبر 2009....ايه اللي اتغير فيك؟؟ ياترى لسة قاعد نفس القعدة و في نفس المكان و لا في حاجات كتير اتغيرت من 31 ديسمبر 2008 الى 31 ديسمبر 2009؟؟؟؟؟
السؤال السابع: برضة
غلطة غلطتها في 2009 و مش هتكررها في 2010
السؤال الثامن: و دة اكيد اجباري برضة
امنية هتتمناها في 31 ديسمبر 2009 و تدعي ربنا انه يحققها لك في 2010....ادعي...(مين عااااااااارف؟) مش جايز تكون ساعة اجابة؟؟
السؤال التاسع : و الأخير
شخص............تتمنى لا تشوف صورته و لا تسمع أسمه في 2010؟؟؟؟!!!! (ياريت بلاش اللي في بالي....عايزين حد غيره)....بلاش تقليدية
كل سنة و مصر كلها بخير
التاج دة لمين بقى:
APPY
البنت المشمية حلوة بس شقية
بس بس
WANDA
خواطر شابة
MEROOO
حاسوباتية
لورنس العرب
رانيا
و كل الأهل و الأحباب و الخلان و كل من يقرأ هذا البوست...عليه الاجابة فورا على التاج و نشره في مدونته و اهداءه الى اصدقائه فورااااا
BYE BYE 2009

24 comments:

  1. كل سنة ومدونتك طيبة وانت بخير وبسعادة يا رب السنة اللى جاية تبقى احلى يا رب دايما تبقى ف ازدهار فكرى وحالة تجاوب اجتماعية سيا سية ثقافية رياضيةجامدة جدا الحالة دى هى الاغلبية الصامتة عقبال 100 سنة تدوين وابداع ودايما للامام

    ReplyDelete
  2. مقدرش اتأخر فى الاجابة على التاج ويمكن ده كان اول حاجة رجعت بيها بعد اجازة صغنونة خااااااااالص

    ReplyDelete
  3. لن تختلف 2010 كثيرا لكنها ستصح سنه مصيبريهفي تاريخ مصر بلا شك هناك العديد من الاحداث القادمه في الطريق اقرب مما نتخيل


    كل سنه ومدونتك بخير

    ReplyDelete
  4. يا جبار فى وشى وخبط لزق وانا اول واحده جبت الجبروت ده منين بس عونيه يا ريس هجاوب اكيد مقدرش ازعلك يا دكتور
    اممممممم مش شايف ان بصتك للمنتخب ظالمه يا راجل فيه ناس بتلعب حلو انا عندى امل يكملوا اما باقى التوقعات فاكيد موافقه عاليه الاخوان مش هيشموا المجلس بس مش بعيد ينفوهم عن مصر من الاساس
    كل سنه وانت طيب

    ReplyDelete
  5. بداية وقبل كل شئ سنة سعيدة ويارب يتحقق فيها كل ما تتمناه ان شاء الله
    بالنسبة للمدونة عقبال ما تحتفل بعيد ميلادها الثلاثين بس ساعتها لازم تكون تحولت للاغلبية المتكلمة هو الصمت يعني قدر ومكتوب
    بالنسبة لتوقعاتك ل 2010 هي البلورة السحرية بتاعتك بتجيب بس الاطار المحلي وسع الدائرة شوية وقولنا تتوقع ايه يحصل في العالم كله
    بالنسبة للتاج أشكرك على اهدائه لي وسعيدة اني من ضمن الاسماء التي فكرت في اهدائه لها
    انا كنت محتارة بأي موضوع ابدأ السنة الجديدة والان انت وفرت علي الحيرة وستكون اجابتي على هذا التاج هي أول تدوينة في 2010 بأذن الله ان كان في العمر بقية
    تحياتي لك

    ReplyDelete
  6. كل سنة وحضرتك والاسرة والمدونة بخير
    انا جديدة هنا
    بس بجد استفدت واستمتعت كتير جدا
    تنوع الموضوعات لذيذ
    توقعات حضرتك منطقية جدا
    احنا بلد زراعى صاحب تاريخ طويل
    والشعوب اللى بالمواصفات دى
    التغيير بالنسبة لها صعب
    انا كنت بستغرب
    لما الاقى المصريين بيعانوا من شىء لقرون
    بدون أى عمل حقيقى ومستمر
    علشان يتخلصوا من اسباب معاناتهم
    علشان كده بنقعد كتير اوى
    نتكلم فى نفس المشاكل

    ReplyDelete
  7. كل سنة وانت طيب يا سمير وكل سنة ومدونتك بخير وعقبال مليون سنة تدوين وبالنسبة للى نفسى ما أشوفوش فى2010 أكيد هوة اللى فى بالك

    ReplyDelete
  8. Happy Birth Day To u & 2 ur Blog
    اقل ما يمكن به وصف 2009 انها سنه ممله ويارب 2010
    تكون سعيدة عليك وعلينا كلنا
    تحياتى

    ReplyDelete
  9. كل سنه وأنت طيب
    هاخد الاسئله للميكروباص الليله ان شاء الله وأشكرك جدا على اهداء الاسئله لي

    ReplyDelete
  10. شكلك متفائل قوى لسنه دى يااحمد
    ربنا يستر عليناااا

    ReplyDelete
  11. كل سنة وانت طيب

    ReplyDelete
  12. anonymous:
    الف شكر ليكي يا فندم
    لازم تكوني اول تهنئة طبعا
    مش جديدة عليكي
    تحياتي

    ReplyDelete
  13. بسمة عبد الباسط:
    حمدا لله على السلامة و في انتظار الاجابات
    تحياتي و احتراماتي

    ReplyDelete
  14. dr.lecter:
    تقريبا نبؤتك تحققت فعلا
    احداث رفح على الحدود و احداث نجع حمادي
    و لسه ياما في الجراب يا حاوي
    تحياتي

    ReplyDelete
  15. appy:
    شفتي بقى؟؟
    هو دة جبرةت رأس السنة
    و بعدين انتي قدها و قدود لازم تكوني انتي الاولى طبعا يا آبي هانم
    دي كفاية حكمك اليومية
    بالنسبة للأخوان احتمال يؤدوهم
    تحياتي

    ReplyDelete
  16. محمد مفيد:
    كل سنة و انت طيب يا محمد
    انت فينك يا عم؟
    مشتاقين لتعليقاتك
    تحياتي

    ReplyDelete
  17. خواطر شابة:
    و انتي طيبة و بالصحة و السلامة
    بالنسبة لعيد ميلاد المدونة الثلاثين.......يحيينا و يحييكي ربنا
    و يارب تكون الاغلبية اتكلمت...لأن لو بعد 27 سنة من دلوقتي لسة الاغلبية صامتة تبقى كارثة
    بالنسبة عالميا......اعتقد لن كون هناك جديد......الجديد هنا عندنا...في مصر بلد العجائب
    تحياتي

    ReplyDelete
  18. لقد خلقنا الله احرارا:
    و انتي بالصحة و السلامة
    و الف شكر على الكلام الجميل دة
    تحياتي

    ReplyDelete
  19. sal:
    thank u very much
    سنة 2009 كانت سنة محايدة تماما.....فيها الحلو و الوحش
    يارب 2010 تبقى كلها حلو
    بس البشاير ما بتقلش كدة
    تحياتي

    ReplyDelete
  20. لورنس العرب:
    يا باشا.....دة شرف ليا
    تحياتي

    ReplyDelete
  21. merooo:
    بصي يا ميرووو
    انا كنت متفائل فعلا
    بس البدايات مش مبشرة خالص
    ربنا يستر
    تحياتي

    ReplyDelete
  22. sharm:
    و انت بالصحة و السلامة

    ReplyDelete
  23. kimooo:
    الف شكر ليك يا باشا
    ربنا يهدي اللي في بالك
    تحيااااااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails