Thursday, 5 November 2009

زمن الردح

"هبلة......و مسكوها طبلة"
"بوبي........و مسكوه عضمة"
"الموظف.....المطبلاتي.....صاحب الشعر المصبوغ.......الجاهل"
"تاجر المخدرات.......المهرب....الحرامي"
"الشاويش زكريا منتظرك ترجع الزنزانة تاني....و لو صحته خسعت...ممكن نشوف لك واحد غيره"
"القزم.....العيال اللي بتتنطط.....المذيع اللي مش طايل الأرض و هو قاعد"
...................................................................
عينة........مجرد عينة لما قيل في البرامج الرياضية خلال الاسابيع القليلة الماضية....هذه الكلمات كانت بعض الأسلحة التي تم استخدمها في حروب 2009 الاعلامية.....الحرب الأولى هي الحرب الشوبرية المرتضية اما الحرب الثانية فهي الحرب الشلبية الصادقية.....حرب أخرى لا تقل سخونة بين شوبير و خالد الغندور
اسفاف و استهبال و قلة ادب و عدم احترام
نفسي اعرف....بقالي اسابيع بأسأل نفسي ليل نهار...اتنين متخانقين....احنا ذنبنا ايه؟
انا عن نفسي بأحب اشاهد البرامج الرياضية علشان انا بأحب كرة القدم...و منتظر اسمع اخبار عن كرة القدم و اشاهد اهداف و لقطات و لقاءات تخص كرة القدم
فأذا بي افاجأ ان البرنامج تحول الى برنامج (خلف الأسوار)......فهذا يعرض في بداية برنامجه مظاهرة اطلق عليها (مظاهرة حب)...من اهل دائرته الأنتخابية امام النيابة و هو ذاهب للأدلاء بأقواله في احد البلاغات المقدمة ضده من خصمه
انا مااااااااااااااااااااااااااااالي؟؟؟؟؟ مش عارف
و اخر يعرض في برنامجه لقطات لغريمه و يسميها (فضائح)...على الرغم ان هذه الفضائح-كما يسميها-تمت تحت رعاية نفس القناة التي يعمل بها و التي تتبرأ الأن من فضائح حدثت على شاشتها
حاجة تقرف بجد
الأستهانة بالمواطن المصري انتقل من الحكومة الى القنوات الفضائية فأصبحت هي الأخرى تتعامل مع المواطن المصري بأعتباره (طوبة) يتلقى ما يملى عليه بلا اي تفكير او تحليل
فأذا انقلب (شوبير) على (مرتضى) لا بد ان ينقلب جميع المشاهدين على هذا المرتضى.....فتنهال عن طريق الميل و الرسائل وصلات الردح و السباب في مظاهرة حب
ودة تخصص في استضافة خصوم غريمه في برنامجه على اعتبار ان عدو عدوي هو صديقي.......و تحولت البرامج الرياضية فعلا
الى (مهازل اخلاقية)...لا نكر انها تكون مسلية الى حد بعيد....صراع الديوك مسلي جدا
الا ان هذه التسلية (اللحظية) سرعان ما تتحول الى (قرف) مما و صل اليه اعلامنا...و قرف من هؤلاء (الكائنات الفضائية) التي تحسب مشاهديها مجموعة من (النعاج) التي لا عقل لها و التي توهموا بسذاجتهم انهم يستطيعوا السيطرة عليها و توجيهها
كل هذه الصراعات الفضائية التي ندفع نحن ثمنها و تدفع مصر ثمنها ايضا من سمعة اعلامها اللي كان اعلاما رائدا في يوم من الأيام..كل هذه الصراعات هي صراعات شخصية في المقام الأول هدفها الغيرة المهنية او المصالح الأنتخابية او (انتفاخ) و تضخم الذات لدى بعض مقدمي البرامج الذين توهموا انهم اعلاميين
و كل واحد منهم لديه رقم ال اس ام اس الخاص بالبرنامج و البريد الالكتروني الذي يستطيع من خلاله قراءة رسائل غاية في السخافة و النفاق لتمجيد نفسه و برنامجه و الحط من قدر (منافسيه) او بالأحرى (اعداءه) و سبهم و الاستهزاء من اسماءهم و اشكالهم او اجسامهم
شيء في منتهى القرف
العجيب ان كل واحد من هؤلاء (الأعلاميين) بعدما ينتهي من (تقطيع) عدوه و الحديث عنه بما يحط بل يحقر من شأنه امام المجتمع نراه يتحدث و براءة الأطفال في عينه عن الأخلاق و القيم و مبادىء العمل الأعلامي و ضرورة احترام الأختلاف في الرأي بأعتباره لا يفسد للود اية قضية
برامجنا الرياضية هذه الأيام اصبحت تبث مباشرة من اقسام الشرطة و النيابات.....تركت الملاعب و تفرغت للبذاءات.....و ا عزاء لمتابعي هذه البرامج من الشباب و الأطفال و العائلات

14 comments:

  1. فلوس يا استاذ
    فلوس وشهرة واعلام وناس الدنيا بتلف حواليهم
    هما صحيح تافهين لكن بيكسبوا من وراء التفاهه دي
    وحولوا الصراعات اللي بينهم على الهواء امام الناس لأنهم مش بيختشوا اصلا
    ليلة ما الجزائر كسبت رواندا 3-1 ظهر علاء صادق وقال فيه واحد جاهل من اتحاد الكورة بيقول لو كسبنا 2-صفر نصعد
    قلبت على قناة مودرن بعدها ب 5 دقائق لقيت مدحت شلبي بيقول انا بوضح كلامي اهو عشان فيه بغبغان بيتكلم عليا في قناة تانيه دلوقت!
    على طول راحوا قالا له الحق ده علاء صادق بيقول عليك كذا
    راح رادد عليه على الهواء وشاتمه
    يا عمنا دي مسخره
    المفروض كل الغجر دول يتركوا البرامج دي ويقعدوا في بيوتهم عشان الدنيا تنضف شويه
    لكن يظهر مفيش فايده

    ReplyDelete
  2. كنت ناوي أكتب بوست عن الظاهرة دي بس فعلا انت اديتها حقها
    السؤال:مين اللي مسك دول ميكروفانات واداهم لقب إعلاميين...ايه المعيار؟
    خالد توحيد قبل كده قال كلمة عجبتني أوي
    الإعلامي الفاسد أكثر خطورة من الطبيب الفاسد
    الطبيب الفاسد ممكن يعالج مئات بشكل خاطيء وبالكتير حيموتوا
    إنما الإعلامي يقدر من مكانه يضلل ملاييين
    تحياتي

    ReplyDelete
  3. كما قال الإعلامي الرياضي مايكل

    السؤال:مين اللي مسك دول ميكروفانات واداهم لقب إعلاميين...ايه المعيار؟

    انا اقولك المشاهدين اللي بيتفرجوا عليهم

    ReplyDelete
  4. فرصة بقه
    كل وحد جالو فرصةيشتم ويكلم
    برحتو اححنا بقينا فى زمن الردح
    اسفه بجد ع التقصير

    انا لما سمعت سى دى
    شوبير ان الكلام ده يطلع من واحد زى ده

    ReplyDelete
  5. حقيقى الاعلام الرياضى ف مصر بيمر بازمة حقيقية مش بس خلافات مقدمى البرامج اللى وصلت للبزاءة بعينهاوالتريقة على خلق اللة من النائب مرفوع الحصانة لما يقول المذيع اللى رجلة مش طايلة الارض ولا الاقزام انتو قزمتو من زعامة مصر للرياضة نرجع بقى لحرب التعصب قناة الاهلى والاسفاف اللى بيحصل فيها من تجاوزات ضد لاعبى الزمالك كل واحد بيتكلم بدماغة

    ReplyDelete
  6. معلشى على اللى حقوله منغير زعل عشان احنا اللى بنعمل فى نفسنا كدا وبارادتنا لازم نبنى لينا شخصيه تحترم لكن احنا اللى مهزقين نفسنا اصلا
    ولا عمرنا نجحنا فى الجد ولا فى اللعب حتى الرياضه مش عارفين نلعب صح الرايضه لتهذيب الشعوب اصبحت للردح وقله الادب والتشهير عليه العوض ومنه العوض

    ReplyDelete
  7. فعلا منتهى الاسفاف
    وأعتقد أن سبب ما يحدث أن غير دارسي الإعلام أصبحوا اعلاميين فالمحلل الرياضي أصبح مقدم برامج فنيه ولاعب الكرة الاسبق اصبح اعلاميا وممثلا احيانا
    والأخ التاني واخد القناة لحسابه ولحساب تحقيقات النيابة معاه .. تهريج اعلامي والجمهور بيتفرج على الخناقة زي ما بيتفرج من البلكونة على خناقة بين شوية عيال في الحارة ممكن ترمي عليهم شوية ميه عشان تفضها
    :))))

    ReplyDelete
  8. لورنس العرب:
    القنوات الفضائية مستفيدة من الصراعات الهمجية دي باعتبارها سبوبة بتجيب اعلانات
    و مش بعيد تكون كل دي تمثيليات اصلا
    تحياتي

    ReplyDelete
  9. micheal:
    المشكلة فعلا يا مايكل انهم فعلا مؤثرين فغلا
    تحياتي

    ReplyDelete
  10. عصفور المدينة:
    الاعلانات هي اللي اديتهم الحق في مسك الميكروفون

    ReplyDelete
  11. البت المشمشية حلوة بس شقية:
    انا كمان عايز ميكروفون اردح فيه
    و اوعدهم اني هاجيب اعلانات زيهم بالضبط

    ReplyDelete
  12. anonymous;
    كلامك سليم تماما الا فيما يخص قناة النادي الاهلي لأنها بعيدة تماما عن تجاوزات الاعلام
    تحياتي

    ReplyDelete
  13. سومة....مجنونة في بلد عاقل:
    العيب مش فينا و الله.....العيب في اللي سمح للاشخاص دي بالجلوس امام الشاشة
    حسبي الله و نعم الوكيل

    ReplyDelete
  14. Yasser Hussain:
    فعلا و الله
    هم عايزين شوية مية يفوقوا
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails