Friday, 30 October 2009

الأستنساخ حق لكل مواطن


ما تيجوا نتخيل فكرة مجنــــــــــــــــــــــــونة؟
تعالوا نتخيل ان الأستنساخ اصبح متاح للجميع....زي عمليات (شد الوش) و (شفط الدهون)....و اصبحت مراكز الأستنساخ في يد الجميع....زي المحمول كدة
و كل واحد من حقه (يستنسخ) نفسه عدد لا نهائي من (النسخ)......تخيلوا لو دة حصل....الحياة تبقى عاملة ازاي؟؟
انا عن نفسي...هوزع (نسخي) في كل مكان......
هحط (نسخة) مني في البيت.....و هاعملها (نسخة) نائمة.....علشان (اخذ كفايتي من النوم)....ان لبدنك عليك حق برضة
و هأعمل (مني) برضة نسخة للبيت برضة...بس المرة دي (نسخة غير نائمة) علشان برضة التليفزيون...و (القعدة) مع المدام
و اكيد مش هايفوتني اني (انسخ) نفسي كام نسخة و اوزعها على الشركات....ماهو مش معقول ابقى راجل (مستنسخ) و (مني كتير) و اكتفي بالعمل في مكان واحد...لازم افيد و استفيد....هأعمل 3 او 4 نسخ و هأسميها (نسخ عاملة) و هتبقى وظيفتها (العمل ليل نهار) ...هخليها (نسخ حمير شغل)....ما هو في (نسخة نايمة) في البيت
مش معقول برضة ابقى بني ادم (مستنسخ)...و أنسى أؤمن مستقبل (نسخي)....لابد من السفر سعيا وراء الرزق....هأبعث نسخة مني للعمل في السعودية...و نسخة للكويت وواحدة للأمارات و نسخة لليبيا.... و هاسيب نسخة مني في مصر مع الأهل و الأحباب
و كمان السياحة و الفسح شيء في غاية الأهمية مش ممكن انسى اعمل كام (نسخة) مني و ابعتها اوروبا و امريكا و الشرق الأقصى..و مش هأنسى (ابعت) نسختين واحدة لشرم الشيخ و التانية للغردقة تشجيعا للسياحة الداخلية
هاستفيد من الأستنساخ برضة في (الدراسة)....و زي ما الأصل درس صيدلة....ممكن جدا (النسخ) تتخصص تخصصات اخرى
هخصص نسخة مني لدراسة الحقوق و نسخة لدراسة الصحافة...و نسخة تالتة للهندسة.....الخ
مفيش مانع برضة اعمل (نسخ) خاصة للكليات العسكرية....ينفعوا برضة
حكاية (النسخ) دي تنفع قوي في حالة الرغبة في مشاهدة (المباراة) مع (المسلسل العربي) في نفس الوقت.....(الاستنساخ) حل المشكلة تماما....(نسخة) للمباراة و (نسخة) تتفرج على المسلسل و يبقوا يحكوا لبعض
كمان (الاستنساخ) هيقضي على المنافسة الرهيبة بين برامج (التك شو) لأستقطاب اكبر عدد من المشاهدين....مع الاستنساخ مفيش مشكلة....كلنا هنقدر نتفرج على كل البرامج و كل القنوات في نفس الوقت
بما ان الخيانة الزوجية تعتبر احد اهم اسباب الطلاق......بالأستنساخ ستقل معدلات الطلاق تماما...ما الزوجة مش هتحس ان (زوجها) بيخونها...لأن الباشا عمل من نفسه(نسخة) مخلصة مقرها الأساسي هو البيت...و نسخ كتيــــــــــــــــــــــر وظيفتها الأساسية العربدة و الجري ورا الستات في كل مكان
انا كمان مش ناوي اخلي كل (نسخي) لهم نفس الأهتمامات علشان ما (ازهقش) من نفسي...هخلي (نسخة) بتحب الرياضة و (نسخة) بتحب الموسيقى و (نسخة) بتعرف ترسم....بس الأكيد اني هخلي كل (نسخي) اهلاوية...دة حرصا على صحتي طبعا
بس فكرة (الاستنساخ) دي هايلة.....هتحل كمية مشاكل لا حصر لها
ايه دة.........؟ هو انا بقيت كام (نسخة)...؟.....انا بقيت (كتيـــــــــــــــــــــر)....كدة ليه؟
لا يا عم......انا (كدة) زي الفل الحمد لله......دة لو كان في الدنيا مني اتنين كانت خربت

14 comments:

  1. فكرتك جهنمية لكن لمن احب هده الحياة انا بنسخة واحدة وبقول لو كان بأيدي الاختيار مكنتش جيت أقوم أعمل من نفسي نسخ تانية ليه هو أنا مجنونة
    ده عالم ميتعاشش غير بنسخة واحدة يدوب
    شوف لنا فكرة تانية تنفع في هدا الزمن الاغبر
    مع تحياتي

    ReplyDelete
  2. بمناسبة أننا في آخر الشهر و الحالة جيم سؤالي لحضرتك هو

    مش ممكن نستنسخ المرتب ؟؟
    : )

    ReplyDelete
  3. ولله هي فكره

    حتى كان فيه ناس بتقولي يا ريت فيه ناس زيك

    بس الحقيقه كنت بقول لهم كفايه عليكم واحد بس مني في الدنيا عشان الناس مش ناقصه بلاوي!!

    ReplyDelete
  4. بس الناحية الثانية للموضوع تخيل انه بوش واولمرت ونتنياهو وشارون واكيد بعض زعمائنا كان الهم عدة نسخ احنا بنسخة وحده ومش قادرين كيف لو كان اكتر
    هذا اول اشي خطر على بالي لما قرأت الموضوع

    ReplyDelete
  5. حقيقى فية كدة حاجات متكررش وتقليدها بيبقى مسخ مش نسخ واعتقد انك من الشخصيات الفريدة اللى تكرارها صعب عشان كدة بقولك ارضى لالامر الواقع كن انت وانت فقط اللى بتشتغل وتنام وتسافر وتشجع الاهلى وتخلص لزوجتك لانك لو فكرت ف العكس مش هنلاقيك ايوة انت هيفقد الاصل ف ظروف غامضة وبالتالى تتوة الصور

    ReplyDelete
  6. هو كفايه واحد بس الدنيا هتخرب كدا

    ReplyDelete
  7. بصراحة خيالك خصب اوى يا دكتور

    ReplyDelete
  8. خواطر شابة:
    ماهو علشان نكافح الحياة بكل قسوتها لازم نكون اقوى
    و عمرنا ما هنكون اقوى الا لو استنسخنا نفسنا
    علشان لما الحياة تطحن نسخة..........تلاقي الف نسخة

    ReplyDelete
  9. على باب الله:
    الفلوس بالذات كائنات غير قابلة للأستنساخ

    ReplyDelete
  10. لورنس العرب:
    الشهادة لله موضوع الاستنساخ دة عيبه ان في ناس ماينفعش يبقى في منها اكتر من نسخة
    و الا تبقى مصيبة سودة
    انت مش منهم طبعا يا باشا

    ReplyDelete
  11. خالد القطيش:
    يا نهار ابيض
    دي تبقى مصيبة
    بس برضة لو بصينا من زاوية تانية هنلاقي ان الحياة كان هيبقى فيها علماء و مبدعين و فنانين محترمين

    ReplyDelete
  12. anonymous:
    يا ساتر يا رب

    ReplyDelete
  13. كيارا:
    سبحان الله
    في ناس ياريت يبقى كل الناس زيهم كدة
    و في ناس مش هايزين منهم و لو نسخة و احدة

    ReplyDelete
  14. desert cat:
    الله يكرمك يا فندم
    دة مدح و لا ذم؟؟!!!!

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails