Wednesday, 14 October 2009

لسة بدري قوي


كلما صرح احد السادة الجهابذة المسئولين بقدرة مصر على تنظيم كأس العالم للكبار كلما اصبت بحالة غريبة من الأنبعاج النفسي و التكور العقلي
هو لسة في كدة؟؟؟
هو كل ما ننظم (ميني بطولة) زي كأس العالم للشباب او الناشئين...نسخن و نفرد صدرنا و نقول مالناش دعوة...احنا عايزين كأس العالم للكبار؟؟
في 1997 نظمنا كأس العالم للناشئين (تحت 17 سنة).....صدقنا نفسنا و طلبنا تنظيم كأس العالم للكبار 2010....و طبعا كلنا عارفين الباقي (صفر المونديال) الشهير
في 2009 بننظم كأس العالم للشباب (تحت 20 سنة).....يا خوفي لنطلب تنظيم الأوليمبياد 2020
تبقى مصيبة لو السادة المسئولين بيشتغلونا.....و تبقى مصيبة اكبر لو هم مقتنعين ان احنا مؤهلين لتنظيم اي بطولة بجد.....بطولة بحق و حقيقي يعني
بالنسبة لبطولات كأس العالم للشباب او الناشئين..هي طبعا (بطولات كدة وكدة)...لا يشعر بها العالم على الأطلاق و لا يهتم بها الا اسر و عائلات الاعبين المشاركين بالأضافة للدولة المنظمة ليس اكثر
انما بطولة زي (كأس العالم) اللي هي اكبر و اهم حدث كروي في العالم....اللي الناس بتحجز تذاكر مبارياتها قبل ما يعرفوا مين اطراف المباريات دي اساسا......لــــــــــــــسة بدري علينا قوي....قوي قوي كمان
مش علشان الجيش عمل ملعبين و قفلتوا (الاستادات) كام شهر و غيرتم (ارض الملعب) و ركبتوا (كراسي) في المدرجات بدلا من الحجارة يبقى خلاص.......من حقنا ننظم كأس العالم لكرة القدم
كأس العالم و الاوليمبياد دي احداث كبيرة جدا بتتطلب اشتراطات اسهل ما فيها هي الشروط الرياضية و توافر البنية التحتية الرياضية.......دي اتفه ما في الموضوع
احداث زي دي بتتطلب شروط للأسف علشان (مصر) تمتلكها محتاجين (مصر جديدة) خاااااااالص غير (مصر) اللي احنا عايشين فيها دلوقتي
محتاجين شوارع نظيفة مافيهاش اكوام زبالة....مافيهاش حفر و مطبات......مافيهاش شوارع مقفولة من بابها علشان معاليه ساكن هنا او سيادته بيزور و الدته او جنابه محتاج تأمين
محتاجين شوارع بتجري فيها سيارات حديثة منظرها يشرح القلب مش (عربيات) مهكعة ماركة (ادي زوبة زقة).....محتاجين شوارع طنطا و اسوان و الزقازيق و دمنهور يبقوا في مستوى شوارع القاهرة و الاسكندرية
محتاجين (رجال مرور) مهندمين و شكلهم نظيف يقفوا في الشارع لتنظيم المرور بكبرياء و كرامة مش بأنكسار و تسول....محتاجين نتعلم (السواقة) الأول و احترام قواعد المرور
علشان نبقى مؤهلين لتنظيم كأس العالم لازم نعرف نحترم بعض الأول و نحترم حقوق الأنسان علشان نعرف نحترم الضيوف
لازم نعرف نحترم السياحة و نتعامل معاهم بعلاقة (شراكة) و احترام بعلاقة (فد و استفد) مش نتسول منهم او نسرقهم
علشان نكون مؤهلين لتنظيم كأس العالم لازم الجمهور الحقيقي هو اللي يملأ المدرجات...مش نحشي الملاعب بعساكر الجيش و الأمن المركزي و ندعي زورا و بهتانا ان البطولة ناجحة
علشان نبقى ينفع ننظم كأس العالم لازم (نشيل) صور السيد الرئيس من ملاعب كرة القدم...لأن دي ملاعب للرياضة مش مؤتمرات انتخابية
علشان مجرد نحلم بتنظيم كأس العالم لازم كل فرد يحس ان البطولة دي (هو) اللي منظمها....(هو) بس المسئول عن نجاحها..و ليس بتعليمات السيد الرئيس و توجيهات السادة المسئولين
تعليمات و توجيهات المسئولين عمرها ما نجحت بطولة
ننظم كأس العالم ازاي و احنا فاشلين في تنظيم الدوري العام المصري....؟؟؟؟؟
انا علشان احضر مباراة (اهلي*زمالك) في الدوري العام الساعة 8 مساءا...بأقعد في الأستاد من الساعة 4 و الا لن اجد كرسي رغم حصولي على تذكرة او لن ادخل من باب الاستاد اساسا
حاجة ما بتحصلش في اي مكان في الكوكب الا في مصر
ازاي نجرؤ على طلب تنظيم كأس العالم و الأمن هو المتحكم الأول و الأخير في مواعيد و اماكن المباريات...بكلمة من ضابط شرطة يمكن تأجيل او حتى الغاء اية مباراة بداعي (تعليمات امنية),,,,برضة احنا بس اللي بننفرد بكدة على سطح الكوكب
ننظم كأس العالم ازاي بس و احنا ملاعبنا محاطة بأسوار من الحديد لعزل الجمهور عن الاعبين...على الرغم ان (فيفا) يمنع ذلك تماما بأعتبار ان هذا (المشهد) هو أهانة للجماهير و اعتبارها (كالحيوانات) التي يجب عزلها بسور من الحديد
و لكنها تعليمات الأمن طبعا
هي اي دولة عندها كام ملعب (تتوهم) انهم ملاعب يصلحوا لممارسة كرة القدم يمكن ان تطلب تنظيم كأس العالم......؟؟؟
الموضوع يا سادة اكبر من كدة بكتـــــــــــــــــــــــير.....و هو احنا اخذنا (الصفر) الشهير من شوية......؟؟؟
مش قلت لكم
لـــــــــــــــــســـــــــــة بدري قوي

12 comments:

  1. لالالالالالالالالالا الومبيات ايه حرام عليك انت كمان جالك قلب تنطقها؟
    ماشفتش بكين السنه الى فاتت ولا ايه؟
    وبعدين انت عمرك شفت رئيس دوله يروح يفتتح بطوله ويقعد فى معزل عن الناس
    طب شفت رئيس تركيا امبارح هو ورئيس ارمنيا حاضرين ماتش للبلدين
    وقاعدين عادى زيهم زى الجمهور لا ازاز ولا يحزنون
    وبذمتك سمير زاهر ده يصلح يكون رئيس اتحاد كوره
    ده جسم؟
    ده سن
    حررررررررررام

    ReplyDelete
  2. السلام عليكم

    ممكن بدرى وممكن لا

    المهم الناس تتغير وتحس بالمسئولية وانها عايزة تعمل حاجة صح مش مجرد كلام

    مع خالص تحياتى

    ReplyDelete
  3. الله ينور عليك يا بو حميد ..جبت المفيد
    لسه بدري أوي أوي أوي

    ReplyDelete
  4. I agree with you and i think the Egyptian government needs to know what needs to be done first.Ya ragel tab bas build hospitals and schools first!

    ReplyDelete
  5. mohamed abd el hakiem20 October 2009 at 14:33

    والله يا ابو حميد الكلان اللى انت بتقولة مظبوط لازم نكون مستعدين قبل ما نفتح صدرنا ونقول ان احنا نعرف ننظم المونديال يعنى نبقى مستعدين زى ليبيا كدة تماما.....هههههههههة

    ReplyDelete
  6. اذا بدك رأيي قارن المنجزات بالامكانيات والمنافسين

    ReplyDelete
  7. NODY:
    و الله يا نودي البوست دة كان ممكن يبقى اطول من كدة بكتير
    دة انا شايل في قلبي كتيــــــــــــر و ساكت

    ReplyDelete
  8. TAMER NABIL:
    تغيير سلوكيات شعب يحتاج لقرون يا تامر
    اعتقد انه لسة كنير قوي

    ReplyDelete
  9. MICHAEL:
    المشكلة يا مايكل انه مايكونش لسة بدري و لا حاجة
    و انه يكون مستحيــــــــــــــل
    ربنا يستر

    ReplyDelete
  10. ANONYMOUS:
    I THINK THIS GOVERNMENT AND THE PREVIOUS ONES AND ALSO THE COMING ONE WILL NOT ABLE TO ACHIEVE ANY OF OUR DREAMS
    THAT I THINK THE PROBLEM NOT IN PERSONALITIES THE PROBLEM IS MENTALITY AND THE NEED TO CHANGE

    ReplyDelete
  11. mohamed abd el hakiem:
    مش هأرد عليك...........انا بس اللي هضبطك

    ReplyDelete
  12. خالد القطيش:
    ماانا لا اقارن مصر بدول اوروبا و لكننا عندما قورنا مع جنوب افريقيا و المغرب حصلنا على الصفر الشهير

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails