Tuesday, 6 October 2009

ابويا الناصري


ابويا رجل ناصري....يعشق عبد الناصر...يرى ان الحياة قد انتهت بموته.....يرى ان مصر قبل عبد الناصر كانت غابة يأكل فيها الكبير الصغير...اما بعد عبد الناصر فهي فوضى لا نظام فيها ولا قانون
ابويا يرى ان اي شخص ضد عبد الناصر هو شخص قاصر فكريا ومضلل سياسيا....هو شخص ضحية اعلام مغرض مضلل قام بتشويه رجل عظيم...رجل لم تنجب مصر قبله وعقمت ان تنجب بعده
فأنا من وجهة نظر ابي...شاب ضحل الثقافة السياسية..لم يعش الفترة الناصرية الزاهرة المزدهرة....لم يجرب قسوة القهر والظلم والاستعباد التي عانى منها المصريون قبل ثورة يوليو المباركة
انا من وجهة نظر ابي...مضلل...مغرر بي....ضحية اعلام حكومي عميل....اعلام شوه سمعة الرجل وانجازاته...اعلام ركز على سلبيات العصر الذهبي الناصري وتغاضى عن ايجابياته وانجازاته واعجازاته
ابويا دائما يسألني بشماتة ....وهو انت بتفهم في السياسة؟؟؟؟؟؟؟....تعرف ايه انت عن السياسة؟؟؟؟؟؟ انت كل ثقافتك من التليفزيون وكتب التاريخ المدرسية المغرضة.....وطالما لم تعش عصر ما فأنت لا تملك الحق في تقييمه سواء بالسلب او الايجاب
ابويا بيشوف اني طالما لي تحفظات على نظام عبد الناصر....يبقى انا بالضرورة عميل مباركي او ربما عميل ساداتي....مش عايز يصدق رغم اني حلفت له بأغلظ الايمان ان ما اسخم من سيدي الا ستي...وان مصر قدر لها ان تنكب وتبتلى بحكامها على مر العصور.....انما ايــــــــــــــــــــه.......لا حياة لمن تنادي
على ما يبدو ان تصلب الرأي وعدم احترام المعارضين فكريا هو حال وسلوك اغلب الناصريين...وبالتحديد عتاة الناصرية....لا يطيقوا من يخالفهم سياسيا....اعتقد ان دة لضعف حجتهم وعدم اقتناعهم بها اساسا
اقول له يابا..الراجل دة جاء الى الحكم بانقلاب عسكري....لم يسلم السلطة الى الشعب كما كان يزعم.....احتل كرسي لم يكن او زملاءه اهل له على الاطلاق.....
يبص لي شذرا ويقول لي...الشعب هو اللي طالبه بكدة...
اقول له يا حاج....دة الثورة دي قامت على 6 مبادىء لم يتحقق منها ولا واحد.............يرد عليا ان قوى الاستعمار والشر في الداخل والخارج تحالفوا ضده وضد قوى الخير والتنمية
اقول له يا سيدي......تقول ايه بقى في الاعتقالات وتكميم الافواه والقمع والخوف والرعب........يرد عليا بكل ثقة كل دة كان ضد اعداء الشعب فالحرية كل الحرية للشعب ولا حرية لأعداء الشعب
اقول له يا مولانا.....طب تقول ايه بقى في نكسة يونيو 1967 ومسئوليته المباشرة عنهاااااااااا؟ يرد عليا بكل ثقة وطمأنينة يحسد عليها وهو كان مسئول عن الجيش؟؟؟؟ اقول له بس عبد الحكيم عامر صاحبه وحبيبه هو المسئول وبالتالي عبد الناصر هو المسئول عن وجود الشخص دة في المكان دة وبالتالي هو مسئول مسئولية كاملة عن النكسة........يرد بثقته وطمأنينته المعهودة لقد ضللوه....ضللوه...افهموه ان الجيش مستعد وجاهز وبالتالي لقد غرروا به
ازنقه بقى في خانة اليك.....طيب يابا الراجل دة كان ممكن يدخل التاريخ من اوسع ابوابه باطلاق الديمقراطية ودعم الحريات وارساء دعائم دولة حديثة قائمة على دستور محترم...و زي ما كل الدول العربية والافريقية قلدوه في الانقلابات العسكرية والديكتاتورية وحكم الفرد..كانوا هيقلدوه في ديمقراطيته وبناء دولهم على اسس ادمية تحترم مواطنيها
يرد عليا قائلا....الشعب لم يكن مستعد للديمقراطية....كان لا يملك قوت يومه وبالتالي لم تكن تلك الفترة مناسبة للديمقراطية على اساس انها كانت ترف لا يملكه الشعب
وطبعا تعليقي ساعتها بيكون ومن امتى الديمقراطية طبخة مقاديرها هي الفلوس والتعليم؟؟؟؟ طب ما الهند لما طبقت ديمقراطيتها لم تكن تمتلك لا علم ولا فلوس ولا حتى صحة؟
شعب افقر مننا بكتييير واكثر جهلا بمراحل...وصحة اغلبه تعبانة وفي النازل ومع ذلك قدروا يكونو دولة دعائمها الديمقراطية واحترام المواطن بلا قمع ولا اذلال ولا انتهاك لادميته
ابويا مش عايز يقتنع....او- بيتظاهر بكدة-ان انا لا انتقد عبد الناصر علشان انا مقتنع ان الايام دي افضل...بالعكس انا باشوف ان اللي مصر فيه دلوقتي هو نتيجة لحكم عبد الناصر ورجاله
وهو لولا عبد الناصر كان ظهر السادات؟ وهل بدون حكم السادات هل كنا سمعنا عن محمد حسني مبارك؟
وبناءا عليه وطبقا لعلم المنطق
فأن عبد الناصر هو المسئول عن حكم مبارك لمصر
طبعا الجدال المتكرر دة...بينتهي بنتيجة واحدة مالهاش تاني
ان انا مابفهمش في السياسة....وانه ضيع وقته في الحوار معايا
ويبص ليا نظرة كلها عطف واشفاق وحزن على شاب مغرر به ومضلل وبيعاني من مرض لا شفاء منه وهو
عدم الايمان بالتجربة الناصرية
****************
ارجو الا يسبب هذا البوست غضب اصدقائي الناصريين علي....فلي مع احدى المدونات ذات الفكر الناصري تجربة غريبة نوعا ما...فلقد كتبت من قبل بوست ينتقد زعيمهم الملهم جمال عبد الناصر-رأيي-....فأذا بي اواجه بعاصفة من الانتقاد و الغضب الشديد ربما لم اكن اواجه بي لو كنت قد اخطأت او عبت في المقدسات الدينية
و انهت عتابها (الغير رقيق) لي بندمها الشديد على انها اضاعت وقتها الثمين في زيارة مدونة (شخص) (عديم الأشتراكية) مثلي
و من ساعتها قررت ان تقاطع مدونات (الجهلة) من امثالي (اعداء الشعب) و الثورة
ارجو ان يتسع صدر اصدقائي الناصريين لفكرة الخلاف في الرأي مع (غير الناصريين) ....فالخلاف في الرأي لا يفسد للود قضية

26 comments:

  1. للعلم
    يمكن للناصري ان يقبل الحوار بين السنه والشيعه
    لكنه غير مستعد للتناقش معك في امر الناصرية التي لا يأتيها الباطل من بين يديها

    فقط اريد ان اوضح لهم ان لكل عصر له حسناته وسيئاته
    وان الناصريه ما كانت تنفع بعد عصرها
    وكما ان اي شيء في مصر غير قابل للتناقض من اتباعه
    فمن يعترض على المعارضين يكون مع الحكومه ويقبض منها راتبه الشهري
    ولو اعترضت على الحكومه فأنت عميل للأمريكان

    من الآخر- مفيش فايده من الحوار

    ReplyDelete
  2. انا ماليش في السياسه ولا مع دول ولا ضدد دول
    بس بعشق عبد الناصر جدا

    ReplyDelete
  3. ما تسيبوا عبد الناصر في حاله وتتفالحوا على اللي جابوا البلد ورا.. على فكرة وقبل ما تطلعلي تهمة الناصرية من جيبك - رغم ان الناصرية مش تهمة -انا لا ناصرية ولا يحزنون.. بس بحب عبد الناصر وشايفه حسناته وسيئاته ورغم كدة مش شايفة ان سيئاته تيجي حاجة جنب معظم اللي قبله او كل اللي بعده عملوه.. كفاية ان الراجل دا كان بيحب البلد دي بجد.. غلط؟ وماله؟ ما كله بيغلط وساكتين وحاطين في بقنا جزمة ، جات يعني على الراجل الكويس وننصبله مشنقة؟ على الاقل غلط بحسن نية.. وهو قصده يخدم ويصلح ويعمر، مش ينهب ويفسد
    كل سنة وكل اللي بيكرهوا عبد الناصر زي ما هما.. اصلهم ميستاهلوش غير الدعوة دي

    ReplyDelete
  4. اولا
    تحياتى لوالدك اللى عاش أيام جميلة ومقتنع انها تستاهل الدفاع عنها بالحماس ده
    ثانيا
    انا لاناصرية ولا ساداتيةولا اى حاجة
    ودى المشكلة اننا عشنا من غير حلم
    ثالثا
    عبدالناصر والسادات الاتنين عندهم كاريزما عالية جدا
    يمكن عبد الناصر شعبيته اكتر لاسباب كتير
    لكن الاتنين لا ينقصهم الذكاء والقدرة على تحريك مشاعر الجماهير ولا الغباء احيانا كتيرولا الكتاتورية فى كل الاوقات
    بس عبد الناصر أقرب للناس اللى عاشت بعمق فترة
    ماقبل الثورة
    والدتى كانت بتحكى لى كتير عن تنحى عبد الناصر وانا ايام ثانوى ايام العنف الثورى كنت بستغرب جدا ازاى يبقى مهزوم والناس تترجاه يفضل فى الحكم لغاية ماسمعت خطاب التنحى بتاعه
    بجد والله كنت حاسة انى نفسى اخرج الشارع اقوله لا ياريس خليك معانا
    عبد الناصر عينيه كانت بتتكلم أبلغ من أى حروف
    هما عاشوا ايام جميلة واحنا اخرنا
    ايها الاخوة والاخوات


    بوست من أجمل ماقرات فى السياسة
    تستاهل نبارك لك عليه


    انا لقد خلقنا الله احرارا بس مش عارفة ادخل بالاكونت بتاعى
    تحياتى لحضرتك و لوالدك العزيز

    ReplyDelete
  5. I would like to say that i enjoyed your article so much and it is so great to have a healthy debate on all the issues and discuss it within the family and the public as a whole.
    Now as for the matter at hand..i agree with those who say that pres. Nasser intentions were good and noble..but intentions themselves are not enough to buld a strong community.

    I wish you insisted on leaving the office and arranging a democratic and fair ellectons ya President Nasser.

    I wish if you have put "Egypt" first when you had a chance to but you chose to go to yemen!.

    I wish you thought about the future and gave your country the gift of democracy,human rights and justice.

    Finally may Allah give you paradise because at least you were sincere and your intentions were good wa Allah A3lam.

    Regards to you ya Dr.Ahmed and to your dear Father.

    Ahmed Adel Ali

    ReplyDelete
  6. الحنين إلى الماضي ورؤية أنه الاجمل هو طبع بشري مصري أصيل
    كلنا بنحن لأيام عيشناها واحنا صغار متخيلين انها احسن ايام
    فوالدك متحمس لعهد عبد الناصر لأنه عاش فيه طفولته وشبابه في حين أني أعرف رجل متحمس لعهد الملك فاروق وبيقول انها احسن ايام وبيدعي انها تعود من تاني
    أنا شايف إن تحمس الناس لعبد الناصر أو للسادات نابع من نظرية الحنين إلى الماضي والهروب إليه من الواقع الاليم بالنسبة للبعض
    :)

    ReplyDelete
  7. لكل رئيس مزاياه وعيوبه .. ومجموعه عيوب ومميزات السادات بالنسبه لى هى الافضل ممن حكموا مصر

    ReplyDelete
  8. مش عارفه ليه غالبالنا يبقى فيه مقارنه بين الاتنين الرئيس عبد الناصر والرئيس السادات تتم بشكل عدائى او على الاقل تنافسى وكان مينفعش حد يحب او يقتنع بالاتنين
    فى رائى المتواضع الاتنين حبوا مصر بس كل واحد بطريقته ولانهم بشر فكل منهم كان له حسناته وسيائته اللى بتاثر على البلد بحالها لمكانتهم فيها
    وارجع واقل تانى الاتنين حبوا مصر والمصريين اى خطا ارتكبوها وهما فاكرين انهم كده بيعملوا لخير البلد
    تحياتى

    ReplyDelete
  9. ياعينى ربنا يشفيك فكرتنى بجدى اللى معلق صوره عبد الناصر فى اوضته ولحد دلوقتى مش عايز ينزلها لحد ما اصفرت من الزمن ومعلق صورته هو جنبها اصغر ومن غير برواز ولما سئلته ليه مش حاطت صورتك جنبها قالى انتى عبيطه احط صورتى جنب صوره الريس قلت له دا مات وتعافى عليه الزمن قالى برضو دا عايش فى قلوبنا شايف وجع القلب مش عندك لوحدك

    ReplyDelete
  10. فى سفريه قريبه لى لسوريا ولبنان والاردن لم يكن هناك حديث سياسى يخلوا من الترحم على عبد الناصر وايام عبد الناصر وكنت اتسائل ما الذى فعله لهم ليحبونه كل هذا الحب اذهب لجنوب افريقيا فى جوهانسبرج لتجد تمثالا ضخما لعبد الناصر وتجد اكبر واوسع شوارعها بأسم عبد الناصر وفى ساحل العاج وغانا وغينيا اكبر المساجد مسماه بأسمه فى سوريا ولبنان فى طرابلس وعلى مدخل الجامعه اكبر صوره فى العالم لعبد الناصر وعد للقاهره تجده مشتوما فى صحيف الوفد سفاحا فى صحف الاخوان ومخربا وارهابيا فى الصحف الاخرى ولن تجد تمثالا له ولكن اذهب لمقاهى ودكاكين الغلابه لتجد صورته معلقه لقد اعلن شافيز فنزويلا الشهر الماضى فى دمشق انه يشرفه ان يكون ناصريا ..المواطن المصرى كانت نظرة العالم له غير الان ..اما الان فهو يجلد فى السعوديه ويسجن فى الامارات ويطرد ويموت غرقا فى ايطاليا ويعذب فى الصومال ..الصومال!!ويهرب المصريين للخارج

    ReplyDelete
  11. لورنس العرب:
    اغلب الناصريين تجدهم لا ينفعلوا اذا مس احدهم الاديان قدر انفعالهم عندما يمس عبد الناصر
    على الرغم ان منتقدي عبد الناصر لديهم المنطق و الحجة و الدليل لأنتقاده...الا ان ردهم دائما ينحصر في تعنيف الشخص المهاجم و محاولة التقليل من شأنه دائما
    بس اعتقد ان الناصريين انفسهم هم اللي خلوا مفيش فايدة في الحوار...عايشين على ذكريات ماضي انا اراه غير سعيد على الاطلاق
    تحياتي و احتراماتي

    ReplyDelete
  12. عاشقة و غلبانة:
    اعتقد انك لو تعمقتي في السياسة هيكون ليكي رأي اخر

    ReplyDelete
  13. نورتني بزيارتك بس انا مش مع عبد الناصر بس الراجل اكيد ليها حسنات مش كلة سيئات؟؟؟؟؟؟؟؟؟
    وشايفه شيء كويس دفاع مستميت عن عبد ناصر من والدك واقتناعه واعتناقة فكر بهذا الشكل نحن غائبون عن تمسك بحقنا او افكارنا او انكون دفاعا عن بلدنا او معتقداتنا وافتكر ان دية ميزة خلقها عبد ناصر في اروح المصريين وتحسب ليه حتي لو كانت علي خطأ

    انا من يحب السادات ولكن يراني الاخرون بانني اخذ السادات بسطحية فقد قلب موازين البلد وضعها بين يدي الامريكان وفتح البلاد وادي النتيجة لما نحن فيه دة رئيهم

    انا شايفه انة من اكتر الرؤساء اللي تعبوا واتبهدلوا واتشتم وغيرة وغيرة
    ومن كان يجرا علي ان يشتم عبد الناصر

    اانا لست اعلم كل العلم بسياسة ولكني اتكلم بعقلي وبتفكيري قد يكون خطا او صحيح


    لكن الفكرة كلها ان احنا شباب هذا المجتمع لا نستطيع ان نتمسك بوجة نظرنا واذا تمسكنا بيكون لمجرد التمسك وليس عن اقتناع ولكن والدك مقتنع بكل كلمة يقولها


    هو دة الفرق

    دمت بالف خير

    ReplyDelete
  14. طب حاول تسال والدك لية بيحب عبد الناصر وازاي بقا مقتنع بكلامة كدة؟؟؟

    يمكن توصل لحل تعرف تتناقش بيه معاة من غير متطلع مش بتفهم حاجة في سياسة

    انا مش مؤيدي عبد الناصر
    بس اتكلم مع والدك في واقعه محمد نجيب وعزلة عن الحكم؟؟؟

    انا ملاحظة انك حاطط صورة ايمن نور وكاتب عليها مانديلا مصرر؟؟
    برغم كل ما ظهر منة من اكاذيب وادعائات فانت تراة هكذا ؟؟؟

    لماذا

    ؟

    في انتظار زيارتك
    دمت بالف خير اخي

    ReplyDelete
  15. ابوك فى ناصريته زى ابويا وزى ابهاتنا كلنا

    وان كنت انا اختلف مع سيادتك وع توقيرى لرأى فخامتك الا ان رأيك فى ناصر يختلف تمام الاختلاف مع رأى فى سيادته رحمة الله عليه

    وعليه ااقولك يا بلدياتى احنا ابناء محافظه واحده ومينفعش نقطع فى بعض

    ReplyDelete
  16. السلام عليكم

    مع والدك الحق في عشقه لعبد الناصر ومعك الحق أيضا في إنتقاد عبد الناصر

    فعبد الناصر كما أراه كان رجلا وطنيا وشريفا ولا أشك في ذلك وكانت له إنجازاته التي تحسب له

    وله أيضاً أخطاؤه التي تحسب عليه

    فيجب علينا أن نكون منصفين فنقول ما له و ما عليه

    ReplyDelete
  17. هو معظم جيل والدك ووالدي لسه متأثرين بعبد الناصر
    تانا نفسي كنت متأثر به لحد ما رميت العاطفة على جنب وحسبتها بالعقل ودي تفرق كتيييييييير أوي
    :)
    تحياتي

    ReplyDelete
  18. bobo:
    نفس الخطأ برضة
    هو انا هلشان مابحبش عبد الناصر يبقى لازم اللي بعده كانوا كويسين
    ما المصيبة ان كلهم زي بعضه
    دي اهم تهمة بتوجه لعبد الناصر اساسا انه كرس لنظام ديكتاتوري رهيب كانت من اهم نتائجه ما نحن فيه حاليا
    مصيبته انه كان في امكانه ان يوجه البلد في اتجاه تاني خالص كنا ساعتها هننافس كوريا و ماليزيا لولا التشبث بالسلطة مع ضباطه و عساكره
    تحياتي

    ReplyDelete
  19. لقد خلقنا الله احرارا:
    الف شكر مبدئيا على الكلام الجميل دة....و ان شاء الله في المرة الجاية تعرفي تدخلي بالاكةنت بتاعك
    بالنسبة لعبد الناصر هو ماكانش فيه غير كاريزما و قدرته الرهيبة في استقطاب الجماهير
    على الرغم من خطايا نظام حكمه في حق الناس
    الا انه كان قوي التأثير عليهم بشكل كبير و هي موهبة من الله لا يمكن ان ينكرها احد
    تحياتي

    ReplyDelete
  20. Ahmed Ali:
    i thank u very much for ur interesting in my blog.
    many people said that naser himself is a noble and great man while others who surrounded them spoiled his picture.
    its a very strange words
    thanks very much

    ReplyDelete
  21. Yasser Hussain:
    ولكن الحنين الى الماضي بكل اخطائه شيء صعب جداااا
    تحياتي

    ReplyDelete
  22. Mohamed Hamdy:
    متفق معاك تماما يا محمد..........و ان كنت ارى ان السادات و مبارك هما امتداد طبيعي لعبد الناصر الا ان السادات كانت لديه القدرة على التغيير و قبلها الرغبة فيه
    عكس من قبله و من بعده
    تحيااااااااااااتي

    ReplyDelete
  23. منى:
    ممكن جدا يكونوا الاتنين حبوا مصر
    بس ماتنسيش ان احيانا يكون من الحب ما قتل
    تحيااااااااااتي

    ReplyDelete
  24. Gemyhooooooooooood:
    حاااااااااااااضر
    هغيره و اتصل بيك

    ReplyDelete
  25. تعرف انا مستفيدة قوى من مدونتك من الروبط الى بتحطها فبدات اقراء الى كتبته

    اعتقد الموضوع بقى قديم و محدش حيحس برأئى
    جميل
    نكتب الى عاوزينه،مع العلم ان انا لا ليا فى السياسة و لا يحزنون
    برضه والدى زى والدك، بس كان بيقول ان ايام الملك برضة ايام حلوة مش بالشكل الى كانت افلام الثورة بتظهره، بس بيعشق عبد الناصر
    العجيب ماعتقدش حد بيقول انه بيحب السادات (الرجل ده كده يصعب عليا )

    ماعلينا انا لاعيشت ده و لا ده (فى الثانى كنت عيله اش فهمنى ساعتها فى سياسته)
    بس فى بالى كلمة قالتها والدتى ان زمن عبد الناصر كان زمن انقلابات على مستوى العالم و الشباب هو الى بدا يتصدر على العالم بعد نهاية الحرب العالمية الثانية، فاجت الثورة طبيعية عندنا و لاننا دولة مؤثرة فى الوطن العربى بعدنا الموضوع انتشر فى البلاد الثانية
    بس اه دلوقتى بترجع ملكية ثانى حتى فى الجمهوريات
    فاضل نتاثر كمان و نعمل تحالفات
    :-)
    المهم قالتلى ليه والدى حب الزمن ده
    لان الى كان عايز يدرس حاجة بيدرسها (مفيش حسب ووسايط)و الى اتخرج يلاقى شغل و سكن ومرتب و يجيب الموجود بالتقسيط، كمية مصانع و شركات اتعملت فى الوقت ده كثيرة، حاليا اعتقد انها بتتقفل و بتتخصص و تتباع

    كان عندهم امل فى مستقبل بدون معانة تخيل الاحساس ده الى احنا دلوقتى مفتقدينه
    بس النكسة فوقت الكل بسرعة ان الحياة مش بمبى بمبى

    كما عبد الناصر كان له كاريزما (زى هتلر كده) بس الحمد لله معملش حرب عالمية ثالثة كان اقصاها حروب ثلاثة فى كتب العالم الغير مصرية احنا خسرناها كلها :-) و مخدنا سيناء الا بالمعاهدات
    يعنى لو هتلر ده نهض بالمانيا منغير ميدبح فى البلاد الى حواليه و يجبلهم الكل يتحكم فى مصيرهم مش كانوا حبوه و عملوه بطل قومى

    بعده السادات جيه ادى الاشباب على دماغهم علشان يسكتوا و ميقلبلوش الدنيا
    فتربى جيلنا احنا ان علشان نعيش شبابنا نسكت احسن و منتكلمش

    المهم انت ايه رايك فى الجدع بتاع ماليزيا مهاتير محمد؟؟:-) اه ده شادنى قوى قصته و حكمه الدكتاتورى الى قوم البلد و بعدين ساب الحكم
    زى برضة شاددنى اعرف ليه شالو الجنزورى لحد دلوقتى مش مصدقه انه حرامى ، البلد على ايامة كانت مختلفة بجد ، انا شخصيا كان عندى امل فى المستقبل بعدها اتوكست :-)

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails