Sunday, 27 September 2009

عفوا ايتها الليبرالية


حملة أمنية توقف المجاهرين بالإفطار في رمضان لأول مرة بمصر

كثيرا ما اجد نفسي ممزقا بين ليبراليتي و التي تؤمن بحق الفرد في ان يمارس ما يشاء من الأفعال و ان يقتنع بما يشاء من المعتقدات طالما لا يمس حرية الأخرين او يتعدى على حقوقهم او معتقداتهم و بين تقاليدي التي تربيت عليها و قبلها تعاليم ديني
و هذه احدى المرات التي تنتابني فيها مثل هذه المشاعر
فمن ناحية الأخلاق و الدين اجد ان الجهر بالأفطار في نهار رمضان لهو فعل (مقزز) و كثيرا ما شاهدته بنفسي و دائما ما يثير هذا الفعل في نفسي الغثيان و (الأشمئزاز) الشديد من فاعله
و كم رأيت (شباب) زي الورد مليىء بالصحة و القوة يقف جهارا نهارا في وضح النهار و عز الصيام و في فمه (سيجارة) بلا اي احترام او (خجل) من ان يراه احد
و كم تمنيت في هذه اللحظة ان امتلكت الشجاعة الكافية لصفع مثل هذا (البغل) على قفاه و تلقينه درسا قاسيا في كيفية الخجل و الخشية ليس من الله سبحانه و تعالى فمثل هؤلاء (الضاعئين) لا يعرفون الله اصلا
و انما عملا ب (اذا بليتم فاستتروا).....و هل هناك بلوى اكثر بلاءا من ذلك؟
و كنت (اكظم) غيظي و احاول ان اتناسى هذا (المشهد) المؤسف .....و انجح في ذلك بعد جهد من التفكير العميق في هذا (البغل) و الأسباب التي تجعله ليس فقط ان يفطر في رمضان بلا عذر شرعي (رغم فداحة الفعل) و انما لا يتوارى خجلا من (جريمته) تلك بل و يجهر بفعلته الشنعاء
هل هو سوء سلوك؟؟ ام سوء تربية؟؟؟ ام نقص في التربية الدينية و الوازع الديني لدى امثال هؤلاء؟؟
و لأول مرة هذا العام اجد من (يأخذ تاري) و (يشفي غليلي) من هؤلاء (التيوس) عندما تحركت حملات من الداخلية للقبض عليهم بل و عرضهم على النيابة العامة
اخيرا سنرتاح من هذه المناظر المقززة و المؤسفة
جمعيات حقوق الانسان احتجت بشدة على (حملات) الداخلية بأعتبارها تعدي على حقوق هؤلاء (الأشخاص) في ان يصوموا او يفطروا في رمضان فهم احرار....و لسنا هنا في (السعودية) حيث (هيئة الأمر بالمعروف و النهي عن المنكر) التي تقوم بمثل هذا الدور و غيره او حتى (ايران) او (افغانستان) حيث السلطة الدينية
نظريا....كلام (جمعيات حقوق الأنسان) كلام جميل و كلام معقول و ماقدرش اقول حاجة عنه....الصيام في رمضان مثلها مثل الصلاة مثل الزكاة مثل الحج هي فرائض دينية لا يكتمل اسلام المرء الا بها و لكنها علاقة بين العبد و ربه فقط....و لا يجوز على الاطلاق ان يتدخل اي فرد في صلة فرد اخر بينه و بين ربه
هذا عن (الصيام) يا جمعيات حقوق الأنسان....و لكن في هذه الحالات الجريمة ليست في (الافطار) بل (الجهر بالأفطار) و هناك فرق و فرق كبير جدا
ممكن جدا الا تكون (تصلي) فربك فقط هو من سيحاسبك اما ان (تجهر) بأنك لا تصلي بل و تتفاخر بذلك فتلك مصيبة مثلها كأنكارك للزكاة مثلا او ان تجهر بالكفر
اذا اردت ان (تكفر) مثلا....اكفر.....و لكن اذا جاهرت بكفرك فأنك تكون قد أذيت مشاعري الدينية و بالتالي تعديت حريتك الشخصية الى ما يمس حريتي و معتقداتي
موقفي من (المجاهرين بالأفطار) في رمضان موقف نابع من العقل و المنطق قبل ان يكون موقفا دينيا...فأذا تعارض هذا الموقف مع (الليبرالية) التي تتيح لكل فرد ان يتصرف بحرية حتى لو كان (الجهر بالأفطار) في رمضان
فعفوا......ايتها الليبرالية

44 comments:

  1. WOW
    موضوع يجنن
    وأحلى مافيه اللون الأزرق اللي انت كاتبه بيه قد إيه هو ترى جانتي
    عايز أقولك إن اللون الأزرق بحبه آخر حاجة وكمان انت قد إيه حد لذيذ
    أهديلك أغنية أسيبك لأ لا مأدرش أسيبك
    سلام يا بيبي
    M.ADEL

    ReplyDelete
  2. تسلم ايديك
    بجد قلت كل اللى كان فى نفسى
    هو فى حتة رغى صغيرة
    مش معنى ان فى تصرفات كتيرة للملالى ولهيئة الامر بالمعروف فى السعودية احنا مش موافقين عليها
    اننا نهاجم فيهم وفى تصرفاتهم عمال على بطال
    فى الاول وفى الاخر احنا بيحكمنا دين
    لازم يكون فى قدر من الاحترام لطقوسه

    ReplyDelete
  3. حقيقي موضوع هايل وكمان انت تناولته بشكل ميزعلش ليبراليتك واتفق تماما مع الداخليه لاول مره

    ReplyDelete
  4. اسمحلي استغل ليبراليتك وادعوالجميع لقراءه الفاتحه للزعيم الراحل جمال عبد الناصرلان زكراه اليوم

    ReplyDelete
  5. هو في حاجة انا مش فاهمها .. بماذا يضايقني شخص يفطر في نهار رمضان؟
    و بعدين انا اعرف منين انه مسلم و لا غير ؟
    و حتى لو مسلم .. التزامه الديني شيء يخصه ..نفس حكاية غض البصر .. سيأتي من يقول انه يكره رؤية امراة غير محجبة في الشارع .. بصراحة و من الآخر هل نتضايق عندما نجد ان هناك اوامر دينية تصعب علينا و نجد غيرنا لا يمتثل لها فنجد ردة فعلنا تجاه المخالف أعنف؟
    أنا باقول الكلام ده علشان انا أعرف كذا شخص ليبراليين حتى النخاع بس لما عرفوا موضوع معاقبة المفطرين .. لم يبدوا أي اعتراض عليه هل لأنهم يصومون رمضان؟؟
    هو علشان انتم صايمين و لا ايه و مش عايزين تشوفوا اختلاف؟
    طيب بتلوموا السلفي ليه لما يرى ضرورة تنقب كل النساء.. و قياسا برده على صلاة الجمعة(بحكم أنها فرض) فيجب ان يعاقب من يتركها .. يعني مش عايزين نشوف شباب واقف عن الاكشاك ساعة الصلاة بيشربوا حاجة ساقع ة سجاير و احنا قاعدين نسمع الخطبة في عز الحر .؟
    طيب انا مسلم ليه بقى ؟
    امال فين حرية الاختيار؟

    تحياتي للموضوع الرائع

    ReplyDelete
  6. أنامرة وأنا واقف في شارع عين شمس في عز نهار رمضان لقيت شاب بمنتهى البجاحة بيسالني على ولاعة علشان يولع السيجارة اللي في ايده
    قلت له ما بادخنش
    وعلى فكرة في الكويت بيقبضوا على المجاهرين بالافطار في نهار رمضان وغالبا بيكونوا من جنسيات اسيوية

    ReplyDelete
  7. ههههههههههههههه
    دى من زمان اوى
    ده انا فاكرة وانا صغيرة
    شوفت ناس قاعدبن ع القهور وبيشيشو وايزى جدااا

    هو ده بقه حال المسلمين
    من سئ لاسؤا

    ReplyDelete
  8. لاصحاب الحريات المدنية
    نفسي بس نتعامل مع الاوامر الدينية و النظام الالهي بنفس الغيرة التي تنعامل بها مع اي نظام وضعي ولا تقولوا لي ان النظام الوضعي اتفق عليه الناس لانه الناس اباحت الشذوذ في البلاد الاوروبية و ليس هذا دليل علي صحة ما يجتمع عليه الناس دائما

    ReplyDelete
  9. و الله انا لسه بفكر فى موضوع الليبيراليه ده
    و حسيت ان الليبيراليه قد تؤدى الى الكفر فى بعض الاوقات

    ReplyDelete
  10. لو انت مبسوط من تصرف الشرطة ده يبقى ما تزعلش بكره لو ضربوك وحبسوك لانك مش مربى دقنك طبقا للسنة (على اساس ان منظرك من غير دقن حيأذي مشاعر المؤمنين الملتحين وحيسبب فتنه )
    أو مثلا تم ضرب زوجتك أو أختك لانها غير منقبه ( على اساس أن الحجاب مش كفاية وهى كده بتأذى مشاعر المنقبات وبتسبب فتنه )
    أو مثلا رحت جرى على صيدلية تجيب دوا لواحد بين الحياة والموت لقتها مقفولة بأمر الشرطة علشان ميعاد الصلاة
    هى دى البداية لو فرحنا بإنتهاك الشرطة للحريات العامة من منطلق نزعاتنا الدينية يبقى فتحنا الباب لتحويل مجتمعنا الى طالبان أخرى

    ReplyDelete
  11. الحريه بمعنى المسئوليه او الليبراليه بس اكيد حتى دى ليها حدود وهى لا تتعدى على الاخر
    هكذا شعارات الليبرالين اللى كنت زمان بتعجبنى بس حاليا اطلاقا
    للاسف شفت واحد بردوا فى رمضان بيشرب سجاير للاسف نرفزنى طول اليوم لان النموذج دا غريب جدا بالنسبه للصعيد عندنا لان المظاهر بالتدين هنا اكتر
    وان كانت غير الجوهر
    بس كويس ان الحكومه اتحركت اخيرا فى شئ جيد

    بالنسبه لمنظمات حقوق الانسان انها بعتبرها شئ مزيف جدا
    والامثله كثيره جدا لوقوفهم بس للافعال الغريبه والمجاهره بالمسانده وخاصه لو كانت ضد الاسلام خصوصا

    وربنا يهدى الجميع
    ويريحنا من الاشكال دى

    ReplyDelete
  12. هو انتو ليه متخيليين ان اللي بيفطر في نهار رمضان غرضه انه يستفزكم؟
    انا شخصيا على قناعة بفرضية الحجاب و لكنني لن افرضه على احد مين قال بقى ان البنت الغير محجبة بستتفزني لنها غير محجبة؟؟؟؟
    مرة أخرى .. احنا مضايقين ان احنا بنعمل حاجة صعبة و غيرنا مكبر دماغه
    و لما تبقى قاعد في اجتماع في شغلك و ممكن تستأذن علشان تلحق الظهر او العصر ليه مش زعلانين من اللي ما بيقوموش يصلوا معاكم؟؟
    هي دي حرية شخصية و الصيام مش حرية شخصية؟

    بجد نفسي حد يجاوب علي من الناس التي تكيل الأمور بمكيالين؟

    ReplyDelete
  13. احمد تانى موضوع اتفق معاك فيه لا كده انا حالتى بتدهور انا مش بحب ده بس مضطره انى اتفق طالما بتتكلم بالعقل

    ReplyDelete
  14. وانا احترم عقليتك اليى خلتك تفرق ما بين ليبراليتك وانتمائك واخلاصك ليها وبين موقف انتا شايفه انه بيسئ لمظهر من مظاهر الدين

    بس تصدق من سذاجتى كل ما اشوف حد بيدخن او بيشرب حاجه فى رمضان افتكره علطول مش مسلم
    فااقول عادى عادى

    ReplyDelete
  15. يبقى بالمرة لما تشوف اعلانات اكل فى التلفزيون فى نهار رمضان ممكن تعرف الاعلانات دى تبع اىشركة منتجة وترفع عليهم قضية او ترفع قضية على القناة نفسها اللى بتعرض اعلانات الاكل دى لانها كدا بتستفز مشاعر الصائمين
    ولسه يا ما حنشوف

    ReplyDelete
  16. محمد عادل:
    ماشي يا دوووووووولة
    نصحوني اني اقفل المدونة علشان الهزار و الكلام دة....بس انا مارضيتش
    عموما الماركت ديناميك و انت فاهم بقى

    ReplyDelete
  17. لقد خلقنا الله احرارا:
    ماهو لو كلنا نحترم مشاعر بعض سواء مسلمين او مسيحيين او غيرهم ماكانش يبقى في مشكلة
    بس تقولي لمين...........؟
    تحياتي و احتراماتي

    ReplyDelete
  18. anonymous:
    كويس جدا اننا متفقين......و حتى لو كنا مختلفين فأختلاف الرأي لا يفسد للود قضية
    بالنسبة لجمال عبد الناصر ممكن ندعيله ان ربنا يغفر له و يرحمه
    تحياتي و احتراماتي

    ReplyDelete
  19. fathys:
    بالنسبة لي...لا يضايقني على الاطلاق ان يفطر شخص في رمضان
    و لقد اوضحت ذلك في البوست تماما
    انا لا اعترض ان يفطر شخص ما او يصوم..فذلك شأنه فهو من سيحاسب و لست انا
    انا اتحدث عن الجهر بالافطار و ليس الافطار في حد ذاته...فأنا اعتبره سلوك مشين و مذدري لركن من اركان الاسلام
    بالنسبة لغير المسلمين فأغلبهم لا يجهروا بالافطار في رمضان مراعاة لمشاعر اخوانهم المسلمين...فما بالك بقى بمسلم لا يحترم دينه و اهل ديانته؟؟!!
    اكرر و اوضح
    يصوم او يفطر.....يصلي او يترك الصلاة......يؤمن او يكفر....هذا شأنه
    و لكن لا تؤذي مشاعري.......فهذا شأني
    تحياتي و احتراماتي

    ReplyDelete
  20. ياسر حسين:
    للاسف الشديد شفت المنظر دة اكثر من مرة
    و للأسف في القاهرة
    حاجة غريبة جداااا.........الناس دي مش من البلد دي و لا ايه؟
    تحياتي

    ReplyDelete
  21. البنت المشمية حلوة بس شقية:
    لا و الله يا شيموو......من رحمة ربنا ان الناس دي لحد دلوقتي لسة قلة برضة.......مانقدرش نعتبرها ظاهرة
    ممكن جدا يكون اللي بيفطروا في رمضان كتير......انما في كتير لسة ماعندهمش البجاحة انهم يفطروا جهارا نهارا كدة
    تحيااااتي

    ReplyDelete
  22. anonymous:
    على فكرة
    الليبراللين الصح و دعاة الحريات المدنية اللي بجد بيحترموا القوانين الدينية و الحريات الدينية اكتر بكتير من القوانين الوضعية
    لأن الحريات لا تتجزأ....و المبادىء لا تتجزأ
    تحياتي و احتراماتي

    ReplyDelete
  23. هبة الله:
    لا طبعا.......دة نتيجة التشويه اللي بيتعرض له الليبراللين و الليبرالية
    عمر ما الليبرالية تتعارض مع الاديان على الاطلاق
    دة أ ب ليبرالية هي ضرورة احترام الحريات الدينية و حق اي فرد في ان يعتنق ما يشاء
    فمن حق المسلم ان يتعبد كما يشاء و من حق المسيحي ان يذهب الى كنيسته و يتعبد و من حق الملحد ان يعتنق ما يشاء من الافكار فحسابه عند ربه
    هل هناك احترام للأديان اكتر من كدة؟؟

    ReplyDelete
  24. مرة اخرى .. ما الذي يؤذي مشاعرك في رؤية شخص مجاهر بفطره؟
    يعني زي ما ضربت مثال .. اللي ما بيصليش هو كمان بياذي مشاعرك؟
    المفروض كمان اللي بيشرب خمرة يتقال عنه نفس الكلام
    لا أننكر أن لا استسيغ الشخص المجاهر بفطره و شخصيا لا أكن له احتراما و لكن ان استسيغه شيء و ان يكون حرا في أن يفطر او أن يصوم فهذا شيء آخر

    بجد حد يجاوبني .. اشمعنى الصيام يعني اللي جينا عنده و قلنا لأ؟

    ReplyDelete
  25. هي المجاهرة بالإفطار في رمضان اصبحت جريمة يعاقب عليها قانون المحروسة؟؟

    دة من امتي بقه؟؟ واي قانون دة اللي بيعاقب المجاهر بالإفطار في الشهر الكريم؟؟ قانون ايه دة ان شاء الله؟؟

    وبعدين وانت مالك باللي واقف بيشرب سيجاره في نهار رمضان؟؟ مش جايز يكون مش مسلم اصلاً؟؟ وحتي ولو كان مسلم .. انت مالك بيه برضه؟؟ هو انت عشان صايم وعطشان ومصدع وحاسس بالفرهدة من الصيام في عز الصيف والحر عايز تكبت حرية غيرك؟؟

    ليبرالية ايه وزفت ايه؟؟ هو في ليبرالية في الإسلام؟؟؟ دة اللي بيترد من دينكم رقابته بتطير يا عم !!

    هو الإسلام يعرف الحرية اصلا؟؟ دة حتي تارك الصلاة والجماعة بيعتبر كافر ومهدور دمه !!

    يا عم اتبسط بالحملات علي المجاهرين بالإفطار .. بكره تتشد من قفاك من الشارع عشان تركك للصلاة !!

    حاجة تقرف

    ReplyDelete
  26. أهي شوية آراء متشددة و متخلفة هاتجيبنا لورا و هاتخلي واحد عنده عقد نفسية زي خادم المسيح يطلع عقده علينا و يشتم و يقل أدبه

    و الله الواحد ما عارف يلاقيها منين و لا منين

    ReplyDelete
  27. عقد نفسية مين يا ابني؟

    هو انا قلت حاجة غلط؟؟ ولا هو اي حد هيتكلم كلام مش هيعجبك سيادتك تقول عليه معقد ومجنون؟؟

    ReplyDelete
  28. تحياتي أخي الحبيب الغالي

    كلامك جميل

    حتى المرأة الحائض في رمضان التي يحرم م م م م عليها الصيام ويحق لها الفطر فالشرع يقول لها ان أكلتي فليس أمام الناس

    الحرية ليست مطلقة وبعض تعاليم الدين طالما ارتضاه الانسان له دينا تُفرض والا لماذا حارب ابو بكر رضي الله عنه مانعي الزكاة .. اذن لقال قائل : اعطاء الزكاة حرية شخصية ( اللي عاوز يدفع يدفع واللي مش عاو هو حر ) الانسان حر في كونه يختار الاسلام او غيره لكن طالما ارتضى الاسلام يلتزم به .. صح ولا ايه : )

    دعواتي لك بكل خير

    ReplyDelete
  29. Ehab Fayez:
    مصممين برضة نعمل مقارنات مش مضبوطة و لا تجوز اساسا
    انا لا اقر تصرفات الشرطة على الاطلاق بشكل عام
    و لكني في هذا البوست اتحدث عن واقعة بعينها و هي الجهر بالافطار في رمضان و ليس الافطار نفسه
    لأنه استفزاز
    اما تارك الصلاة طالما لا يستفز مشاعر المصلين فهو حر....يعني ما ينفعش ابقى تارك للصلاة و احرض الناس على تركها
    ساعتها ابقى استحق الحرق
    برضة ما ينفعش مالبس نقاب و اتحدى النقاب اني ابقى عارية تماما
    ساعتها برضة ابقى استحق الحرق
    انا قصدي التطرف في المعصية و ليس المعصية نفسها
    تحياااتي

    ReplyDelete
  30. بسنت:
    على فكرة يا بسنت
    دي مش شعارات.....دي هي الليبرالية اللي بجد
    انما بقى التطرف في الحريات و ازدراء الاديان و عدم الالتزام بأي قيم او قوانين مجتمعية دي مش ليبرالية
    دي قلة ادب
    نفس الكلام ينطبق على بعض و ليس كل جمعيات حقوق الانسان
    حادت عن الطريق الصحيح في الدفاع عن الحريات و القيم نحو الدفاع عن بعض التصرفات المنحرفة لبعض القلة
    تحياتي و احتراماتي

    ReplyDelete
  31. fathys:
    يا سيدي الفاضل
    للمرة المليون.......مش قصة افطار في رمضان انما قصة جهر بالافطار في رمضان
    هناك فرق و الله العظيم
    و بعدين القصة مش قصة حجاب او عدمه....قصة لما واحدة مش محجبة تستهزىء بالحجاب او تهينه...هنا لابد من وقفة
    الموضوع كله موضوع احترام ثوابت و مقدسات دينية حتى لو كنا لا نمارسها
    عارف امتى ازعل لو احنا في اجتماع من اللي ماقاموش يصلوا؟؟
    مش علشان هم ما قاموش يصلوا....ازعل لو استهزءوا باللي قاموا
    فهمت الفرق......؟؟
    تحياتي و احتراماتي

    ReplyDelete
  32. appy:
    شفتي انا بقيت مؤدب و باسمع الكلام ازاي؟؟؟؟!!!

    ReplyDelete
  33. mahasen saber:
    دة اغلب غير المسلمين يا محاسن من شدة ادبهم و احترامهم بيمتنعوا عن الاكل و الشرب جهارا في رمضان
    المصيبة بتيجي من المسلم اللي بيستهزأ بدينه و بتعاليمه
    حاجة تقرف بجد

    ReplyDelete
  34. اقصوصة:
    الف شكر على الاطراء الجميل دة

    ReplyDelete
  35. desert cat:
    ماعتقدش ان القضية بالسطحية دي
    او انتي اكيد فاهمة الموضوع غلط
    الموضوع مش ناس بتفطر و احنا زعلانين علشان بتفطر
    احنا زعلانين من بجاحة الناس دي و افطارها جهارا نهارا كدة
    مش قصة اعلانات و لا تليفزيون و لا كدة
    تحيااااتي

    ReplyDelete
  36. fathys:
    اكرر للمرة المليون
    مش بس الصيام....لو شفت حد بينكر الصلاة او بيمنع الزكاة او بيستهزء بالشعائر الدينية مسلمة كانت او مسيحية
    يستحق العقاب
    الا الاستهزاء بالشعائر
    لا تصوم..لا تصلي....اكفر حتى...ولكن لا تهين شعائري الدينية
    مش انت طبعا...بتكلم بشكل عام يعني
    تحياااتي

    ReplyDelete
  37. Servant of Christ:
    بداية:
    انت كمسيحي...حد وجه لك كلام سواء في هذا البوست او غيره؟
    البوست دة معمول للمسلمين المجاهرين بالأفطار في شهر رمضان...لم يذكر غير المسلمين على الاطلاق
    ثم اني اشهد اني لم ارى مسيحي او غيره يجهر بالافطار في رمضان احتراما لمشاعر اخوانهم من المسلمين على الرغم من ان احدا لم يطلب منهم ذلك
    اما عن ان الاسلام فيه ليبرالية ام لا؟
    بالتأكيد لست انت من تبدي رأيك في هذا الموضوع لعدم المامك به...كما اني تماما لا استطيع ان ابدي رأيي في الشئون الدينية المسيحية كالزواج و الطلاق لأني بالتأكيد غير ملم تماما بالموضوع من جهة و من جهة اخرى هو شأن لا يعنيني
    و بعدين ماتخافش لو مسكوك في الشارع علشان بتشرب سيجارة في رمضان او علشان الأذان بيؤذن و انت مش في المسجد..ابقى طلع لهم بطاقتك الشخصية و قل لهم انا مسيحي
    محدش ساعتها هيكلمك
    تحياااااااااااتي

    ReplyDelete
  38. fathys:
    المدونة لتبادل الأراء و الافكار سواء اختلفنا او اتفقنا معها
    هو اي نعم محتد قليلا في الكلام و لكن لا نملك الا ان نستمع لوجهة نظره و نتعامل معها بكل ذوق
    تحياتي

    ReplyDelete
  39. Servant of Christ:
    لا تعليـــــــــــــــــــــــق

    ReplyDelete
  40. عالم حبيب:
    كلام جميل و كلام معقول ماقدرش اقول حاجة عنه

    ReplyDelete
  41. A.SAMIR

    يعني بصراحة مش قادر افهم .. هو مفيش حد غير اخواتنا المسلمين هما اللي بيصوموا؟!! طيب وهل المسيحيين لما بيصوموا بيلوموا اي حد من المسلمين ياكل امامهم سندوتشات شاورمة مثلا؟؟

    مش فاهم برضه ايه علاقة صيامك بانك تجبر غيرك وتمنع عنه الحرية انه حتي يأكل او يشرب او يولع سيجارة؟؟ ويفرض اللي بياكل دة مسلم مريض مش قادر يصوم او مريض بمرض السكر وشعر بالعطش..؟؟ إيه نموته يعني عشان دخل محل يشرب ؟؟؟

    خلاص يعني؟؟ للدرجة انت ضعيف امام الاكل والشرب ومش قادر تتحكم في غرائزك؟؟

    امال انت بتصوم ليه اصلا؟ وايه فكرة الصيام؟؟

    وبعدين بطاقة ايه اللي انا هطلعها لو حد ماسكني؟؟ ويفرض اننا عايشين في دولة علمانية ومفيش خانة ديانة في البطاقة؟؟ ساعتها نعمل إيه؟؟ اروح اتجرجر في الأقسام واتبهدل لحد ما اثبت لهم اني مسيحي وكل دة عشان جرحت مشاعر سيادتك وشربت سيجارة قدامك وانت صايم؟؟

    يا اخي كفاكم هذا التفكير المتخلف

    ضحكتم علينا العالم ... !!

    واستحققنا بجدارة لقب
    أمة ضحكت علي جهلها الأمم !!

    ReplyDelete
  42. انا مش واخدة الموضوع بسطحية ولا فاهمه غلط بس ربنا وهبنى عقل اميز بيه
    انت زعلان من بجاحه الناس دى يبقى حسابهم على ربنا اللى خلقهم ربنا مش ادى حد توكيل لحد يحاسب عباده مكانه والعبادات علاقة بين الانسان وربه واذا كنت زعلان من بجاحتهم غض بصرك ومش تكون بجح زيهم ... ومن الاولى انك توجه نقدك للى قاعد فاتح الدرج يستنى حد يرمى له فيه خمسة جنيه علشان يخلص له ورقه المتعطل ولا الرشوة مش حرام ؟؟؟ .. ممكن توجه كلامك للبجحين اللى بيرموا زبالة فى الشوارع ولا هى النظافة مش من الايمان ؟؟
    ممن تقول للناس انا تقى وورع اهو بس مش بمهاجمة اللى فاطرين فى رمضان انما بمهاجمة كل ما يتنافى مع امن وامان المجتمع انت ايه عرفك انه مش مسيحى ؟؟؟
    ومش تقول لو مسيحى ياكل فى بيتهم ولا يشرب فى بيتهم اصل المسيحى بيبقى صايم وانت بتاكل فراخ وكل انواع اللحوم والاسماك وسبحان الله مش بيقول علينا منظرنا بيستفزه ولا حاجه .. هو المسيحى ايمانه اقوى من الى مبسوطين اوى علشان حملة وزارة الداخلية فى اسوان ؟؟
    النهاردة مبسوط علشان بيبقبضوا على الفاطرين مش تلوم لا نفسك بكره لما يقبضوا عليك علشان ماشى على رجليك مش راكب عربية كمان بحجة انك ماشى فى طريق مخالف

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails