Tuesday, 4 August 2009

Top 5 People I Want To Meet


Top 5 People I Want To Meet
عنوان ل (كويز) على (الفيس بوك)....عليك اختيار 5 شخصيات تتمنى مقابلتهم
تتمنى مقابلتهم لأي سبب....سواء لأعجابك الشديد بهم او لكرهك الشديد لهم....تقابلهم علشان تحاورهم او تناقشهم او تضربهم او تقتلهم
لأي سبب كان
و هذه كانت اختياراتي:
اول شخصية اتمنى مقابلتها
محمد انور السادات
عبقري.....قوي.....منفتح الفكر.....داهية....كارثة....عقلية جبارة... داهية سياسية....كان قادرا لو امد الله في عمره ان يجعل من مصر تجربة رائدة في افريقيا و الشرق الاوسط
كان لديه فكر و تصور واضح المعالم لما ستكون عليه مصر مستقبلا......امتلك الخطة و الرؤية...سواء اختلفنا او اتفقنا مع خطته و رؤيته
شجاع....لا يخشى عواقب المغامرة......قوي في الحق....قادر على حماية مصر و ابناء مصر من التطاول و (حماقات الصغار)....اثبتت الأيام انه كان يمتلك (بعد نظر) لو امتلكه زعماء العرب في عهده....لما كانت (احوالنا) كما هي الأن
اخطأ خطئا جسيما و هو انه لم يكرس (الديمقراطية) في مصر....اراد ان يمحو اخطاء سلفه (الديكتاتور)....ولكنه لم يضع نظاما ديمقراطيا سليما انما ديمقراطية (شكلية) اشبه بالمسرحية الهزلية
اعتقد انه لو طال به العمر لعمد الى (اصلاح) النظام السياسي بالكامل من خلال نظام ديمقراطي غربي (كان مهووسا بالغرب)....و لما كنا وصلنا الى مانحن فيه حاليا
نفسي اقابله و اسأله:
راضي عن مصر دلوقتي بعد وفاتك ب 28 سنة؟؟؟
و لو رجع بك الزمن- ياترى كنت عملت ايه تتلافى بيه مانحن فيه حاليا؟؟
ثاني شخصية نفسي اقابلها
محمد حسني مبارك
نفسي اسأله
هل انت راض عن احوال مصر سنة 2009؟
هل بتقعد مع نفسك و تحاسب نفسك على حصاد 28 سنة من حكم مصر؟
هل ضميرك مرتاح؟
هل تحس بتأنيب الضمير ام تحس انك عملت اللي عليك؟
شايف ان مصر كانت ممكن تكون احسن من كدة؟
ليه (المصري) في عهدك بقى (مالوش قيمة) يا ريس؟
ليه (فقدنا) الريادة في كل المجالات في عهدك يا ريس؟
ليه (الفساد) و (البطالة) بينخروا في المجتمع المصري؟
انا متأكد ان انت بتحب مصر.....بس مش عارف ليه (البلد) وصلت للحالة دي؟
هل لو الزمن رجع بيك 28 سنة.....كنت هترضى تبقى (رئيس الجمهورية) برضة؟
ليه نفس الوجوه كاتمة على انفاسنا ابد الأبدين؟
انت عايز تورث مصر لأبنك فعلا؟
شايف مستقبل الشعب دة و البلد دي ازاي؟
ثالث شخصية نفسي اقابلها هي
باراك اوباما
نفسي اقعد معاه و اقول له
خد بالك مننا شوية يا ريس اوباما
من الواضح كدة ان الزعماء بتوعنا الديمقراطية مش جاية على معدتهم و عايزين واسطة علشان نبقى بني ادمين زيكم كدة بنمتلك حق تقرير مصيرنا و اختيار حكامنا
ممكن تبقى واسطتنا و تحاول تخلينا نتذوق الديمقراطية زيكم؟
طعمها حلو ....مش كدة؟؟
معلش استحملنا...احنا شعوب ضعيفة...جبانة...لا تملك تغيير واقعها
ممكن نستعين بك علشان تغير لنا الواقع؟؟
رابع شخصية
مانويل جوزيه
نفسي اقابله علشان اسلم عليه و اتصور معاه و اقوله
احنا بنحبك قوي
و مهما خفافيش الظلام حاولوا يشوهوا صورتك و يسوئوا علاقتك بجمهور الأهلي و مصر...هيفشلوا
لأنهم زي مانت وصفتهم بالضبط
فاشلين
ارجوك...ارجع لنا تاني....ايامك فعلا كانت جميلة...ذكرياتك معانا رائعة و مش هتتكرر ابدا مع حد تاني
بنحبك......و منتظرينك
اخر شخصية اتمنى مقابلتها هي
خالد الاسلامبولي
قاتل الرئيس السادات
نفسي اقابله و اسأله:
ايه اللي استفدته لما قتلته؟
هل تحقق الهدف من اغتيال السادات؟
هل الغيت معاهدة كامب ديفيد؟
هل احوال (الجماعات الاسلامية) اصبحت افضل بعد السادات؟
هل المشكلة كانت في (السادات) و بعد اغتياله..اتحلت كل ازمات و مشكلات مصر؟
هل لو عاد بك الزمن للخلف...كنت برضه هتقتل السادات؟
و لو كنت هتقتله كنت هتقتله (لوحده)؟
تفتكر (السادات) كان (احسن) من غيره؟ و لا (غيره) احسن منه؟

20 comments:

  1. bgd modo3 aksr mn raa3 bs a7b adef any nfsy awy aaby el rsol 3leh afdl el slam waoloh rady 3na b3d arb3tashr karn wkan nfsy awy aabl 3mr abn el khtab waaolo nfsna frb3 3dlk ashtana lnosrt el aslam w3zto

    ReplyDelete
  2. شخصيات فعلا تستحق اننا نقابلها متفقه معاك جدا في الرئيس السادات كان فعلا عبقري ولو قابلت حسني هقوله كلمه واحده بس وهي كفايه ارحمنا بالنسبه لجوزيه انا ماليش في الكوره
    اوباما مش برتاحله قوي بس اكيد احسن من بوش

    خالد لو قابلته هقتله هو

    ReplyDelete
  3. محمد حسني مبارك
    نفسي اسأله
    هل انت راض عن احوال مصر سنة 2009؟
    هل بتقعد مع نفسك و تحاسب نفسك على حصاد 28 سنة من حكم مصر؟
    هل ضميرك مرتاح؟
    هل تحس بتأنيب الضمير ام تحس انك عملت اللي عليك؟
    شايف ان مصر كانت ممكن تكون احسن من كدة؟
    ليه (المصري) في عهدك بقى (مالوش قيمة) يا ريس؟
    ليه (فقدنا) الريادة في كل المجالات في عهدك يا ريس؟
    ليه (الفساد) و (البطالة) بينخروا في المجتمع المصري؟
    انا متأكد ان انت بتحب مصر.....بس مش عارف ليه (البلد) وصلت للحالة دي؟
    هل لو الزمن رجع بيك 28 سنة.....كنت هترضى تبقى (رئيس الجمهورية) برضة؟
    ليه نفس الوجوه كاتمة على انفاسنا ابد الأبدين؟
    انت عايز تورث مصر لأبنك فعلا؟
    شايف مستقبل الشعب دة و البلد دي ازاي؟


    اكيد راضى وحاسس اننا مش فاهمين حاجه واغبياء
    شكرا

    ReplyDelete
  4. خمس شخصيات عايزة أقابلهم
    حسن نصر الله
    جمال عبد الناصر
    جيفارا
    اسماعيل ياسين
    محمد علي باشا والي مصر
    تحياتي
    مبسوطة ان كتابنا -تبيع دماغك - عجبك
    -راضية

    ReplyDelete
  5. بوست حلو قوي
    أحسنت الاختيار والاسئلة
    كل واحد فينا عنده أسئلة مالهاش اي اجابات
    المهم مين وامتى وفين هيتجاوب على اسئلتنا؟؟

    تحياتي :)

    ReplyDelete
  6. السلام عليكم
    بجد أنا حزين على ان يتحول السادات مضيع فلسطين واول من اعترف بكيان اسرائيل الهش الي بطل

    ReplyDelete
  7. كنت هقابل السادات وااقوله ماتروحش العرض العسكري علشان لو روحت البلد هتتبهدل من بعدك

    ReplyDelete
  8. ان يتحول السادات الي بطل فهذا امر طبيعي
    فقد قطع ايديهم الطويله و غرز بوزهم في رمال سينا بعد ان قالوا عن جيشهم بغرور و عنطظه انه لا يقهر و السبب كان البطل الذي رفض الاعتراف باسرائيل
    الاعتراف باسارئيل و عدمه ليس هو القضيه لانك سواء اعرتفت او لم تعترف فهي موجوده
    لكن فارق بين ان لا تعترف و تحاربهم و تهزم
    و ان تعترف و تحاربهم و تنتصر و بقوة

    ReplyDelete
  9. heyyyyyy
    موضوع جميل جدا ولازم اخد الكويز ده
    بجد افكارك مرتبة جدا وانشالله تكون بخير
    تحياتى
    رمضان كريم

    ReplyDelete
  10. بلنسبالى افضل شخصية حكمت مصر هيا السادات

    ReplyDelete
  11. طوبة ذهب و طوبة فضة:
    بالتأكيد الأنبياء والرسل خارج التصنيف و خارف المقاييس دي تماما
    تحياتي

    ReplyDelete
  12. حاسوباتية:
    تاني قتل؟؟
    يعني مش كفاية انه قتل الرئيس السادات...كمان عايزة تقتليه؟؟
    هههه
    تحياتي

    ReplyDelete
  13. appy:
    تفتكري انه بيستغبانا فعلا؟؟؟
    معقول؟؟؟

    ReplyDelete
  14. مرجانة:
    شخصيات رائعة فعلا
    لا شكر على واجب
    كتابكم اكثر من رائع
    بالتوفيق ان شاء الله

    ReplyDelete
  15. Rannon:
    اعتقد ان اغلب الاسئلة دي لن يتم الاجابة عليها
    لأن اغلب المسئولين في ذمة الله
    في الاخرة بقى ان شاء الله
    تحياااتي

    ReplyDelete
  16. مصعب صلاح:
    هي وجهات نظر بكل تأكيد يا مصعب
    و ان كان السادات هو اول من اعترف باسرائيل فهناك من مكنها من احتلال سيناء بطيشه و تهوره و ديكتاتوريته
    تحياتي

    ReplyDelete
  17. dr.lecter:
    مقدر و مكتوب يا دكتور
    الحذر لا يمنع القدر
    تحياتي

    ReplyDelete
  18. ذو النون المصري:
    يسلم قلمك يا ذو النون
    هو دة الكلام المفيد
    بس انت اكيد عارف ان بعض دراويش الناصرية الذين يروا في زعيمهم الخالد هو الزعيم الأوحد...لا يتخيلوا وعيما غيره
    و بالتالي لابد من التسفيه و تشويه انجازات الأخرين
    تحياتي

    ReplyDelete
  19. Hossam:
    الف شكر لك يا حسام
    منورني دائما
    تحياااتي

    ReplyDelete
  20. البنت المشمية حلوة بس شقية:
    و بالنسبة لي انا ايضا
    تحيااااااااااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails