Thursday, 16 July 2009

عن (الحجب)...اتحدث


حكم المحكمة الادارية العليا بحجب المواقع الأباحية في مصر
هو حكم في ظاهره الرحمة و في باطنه العذاب
فأخلاقيا لا غبار عليه....بل ويجب الأشادة به بأعتباره حماية لشبابنا و اطفالنا من المواقع الضارة و الهدامة دينيا و اخلاقيا و ايضا فكريا
انما لو نظرنا للحكم دة بمفهوم اعم و اشمل سنجد انه فعلا حكم في منتهى الخطورة و اثاره ربما تتعدى حجب مواقع يرتادها المراهقين و المهووسين جنسيا
ففي اعتقادي الشخصي و ربما اكون مخطئا في هذا الأعتقاد ان (حنفية) الحجب لو انفتحت لن نستطيع اغلاقها ابدا
فلو نجحت الحكومة في حجب المواقع الأباحية سيصبح الطريق اسهل كثيرا بل ممهدا لحجب مواقع اخرى لا تمت للأباحية بصلة انما هي في نظر الحكومة قمة الأباحة و قلة الأدب كمان
طبعا انا اقصد (المدونات) و تحديدا المدونات المؤرقة للنظام و للحكومة و التي تهتم بفضح الكثير من الممارسات السلبية لبعض الهيئات السيادية في مصر
و طبعا لأن ساعتها سكة (الحجب) هتكون (سالكة)...فالتالي لا نستبعد ان يتم حجب اي موقع مش على المزاج بأعتبارها برضة (اباحية)...فالأباحية كلمة مطاطة....و هي تخضع لوجهات نظر مختلفة
و ليه كمان لا يتم حجب موقع (يوتيوب) مثلا بأعتباره منفذا لبعض الكليبات الأباحية و كمان موقع زي (فيس بووك) على اعتبار انه قد يكون مصدرا للأفكار الهدامة واللقاءات بين الشباب المصري المؤدب و بعض الشباب (الأبيح)...و غيرهم من المواقع اللي قد تكون مش على الكيف والمزاج
اعتقد ان فكرة الحجب دي فكرة على مزاج الحكومة تماما و بيضربوا بها اكثر من عصفور بحجر واحد....في حالة تنفيذ الحكم
اولا تظهر الحكومة في مظهر المدافعة عن الأخلاق و القيم و الفضيلة و ثانيها اظهارها بمظهر الملتزم بتنفيذ حكم القضاء و احترامها للأحكام القضائية و ثالثا ارضاء الجماعات الأسلامية و الأصولية بأعتبار ان الحكم دة على هواهم تماما و اخيرا فتح الباب على مصراعيه لحجب اي موقع مش على (المزاج) و (خارج السرب) ووصمه بوصمة الحجب بأعتباره يبث الأباحية
السبب الوحيد الذي قد يعرقل تنفيذ هذا الحكم هو التكلفة الباهظة التي يتطلبها حجب المواقع على شبكة الأنترنت و هو ما قد يتكلف المليارات الغير متوفرة طبعا حاليا بسبب الأزمة الأقتصادية العالمية و غيرها
انما السؤال اللي بيطرح نفسه بقوة:
هل حجب المواقع (الأباحية) في مصر سيساعد على انتشار الفضيلة في المجتمع بأعتبار ان منفذ الرذيلة والأنحراف تم سده بالضبة و المفتاح؟
دة طبعا على اعتبار ان منفذ (الأباحية) و (قلة الأدب) في الشارع سببه الأنترنت بأعتبار ان الشعب المصري شعب (انترنتي) اصيل
ام ان اسباب الأباحية و الانحرافات الجنسية سببها حاجات تانية خالص لن يتم حجبها زي ( القمر الأوروبي) و غيره و اقلها (قنوات
المزيكا) و (العري) كليب اللي ماحدش خالص اتكلم عن حجبها او غلقها؟
قرار حجب المواقع الاباحية كعادة كل القرارات النبيلة و الهادفة في مصر يبدأ بنية طيبة و سرعان ما سيحيد عن مساره الصحيح و يستخدم كمخلب قط لضرب كل صوت معارض او (غير مريح) للسلطة في مصر
اما دعاة الاخلاق فليطمئنوا....فأقل الوسائل الاعلامية خطرا على الاخلاق هي الانترنت ....فالدش اصبح يقوم بمهمة الافساد على اكمل وجه و للأسف بأموال مصرية و عربية

22 comments:

  1. و الله عندك حق تماما
    انا مش شايفة ان المواقع الاباحية هي السبب في الانحلال الاخلاقي و لا في الشذوذ اللي بقى فيه المجتمع
    في اسباب كتير تانية
    يعني على الاقل ييسروا الزواج و يوفروا للشباب حياة كريمة و لا هي الحكومة بتاخد الوسائل الاسهل اللى تريح دماغها و تيجي على هواها و خلاص؟؟
    طيب يا ريت بقى يرحمونا من الاعلانات بتاعت الادوية اياها و اعلانات ميلودي و يا ريت قنوات ميلودي كلها لأن انا شايفة انها بتقود بدور اكبر في الموضوع ده
    بجد ربنا يرحمنا

    ReplyDelete
  2. والله فعلا كلامك صح ومنطقي جدا لان فعلا هتبدا بكده وبعدين يحجبوا كل حاجه مش عاجباهم وبعدين انا معاك ان النت مش هو المصدر الي لازم يحجب بس ده في حاجات كتيييييير

    فعلا كلامك صح

    ReplyDelete
  3. هو من الأساس فكرة الحجب ليست صحيحة وانا مش موافقه عليها مش بس لانها سبيل لحجب حاجات كتير تانيه
    لان الفكره في حد ذاتها غلط مش الحجب هو اللي هيخلي مراهق عندي ميدورش علي الجنس لا في مليون طريقه وطريقه الانسان يعمل بيها كل انواع الانحرافات لو حب يعملها
    انت مثلا او اي شخص ممكن يبقي ادامه كل وسائل الانحرافات كما يقال متاحه ادامه ومش بيعملها
    الانسان هو حاجب نفسه
    ومش معاك اعذرني في إننا نشيد بالحكم علي الاطلاق
    الافضل ان تعلمني الاخلاق واتركني اختار
    وساعتها مش هتفرق معايا انحطاط الاخلاق جايلي منين
    لاني هبعد عنه في اي مكان
    سواء نت او واقع
    حتي في الاية الكريمة اللي مكتوبة في الصوره
    بتقول قل للمؤمنين
    مقالش اقفلهم عنيهم هما من نفسهم يغضوا

    ReplyDelete
  4. حتى لو الحكومة حجبت المواقع دى فى الف طريقة وطريقة للفرجة على افلام الاباحة المشكلة مش فى المواقع المشكلة فى التربية وثقافة المجتمع

    ReplyDelete
  5. والله مش شرط ان الحجب بدايه لحجب حاجات تانية

    المهم انهم يعملو حاجة عدله

    وكده كده فى طرق تانية للدخول عليها حتى لو محجوبه

    بس سيبهم يعملو حاجة

    ReplyDelete
  6. والله أنا بستغرب جدًا من اللي بيعارضوا فكرة الحجب لأي سبب كان
    ده على أساس إن حضراتكم في البيت لو دخل حد منكم على ابنه أو بنته أو اخوه ولقاه بيتفرج على النت على المواقع دي هيعتبر إن الموضوع مش موضوع نت وفيه ألف طريقة تانية؟
    وللا هيبقى رد الفعل إنه يعاقبه ويمنع عنه الإنترنت أساسًا بشكل مبدأي؟
    لما بتلاقي إبنك بيشرب سجاير بتمنع عنه المصروف وللا تقول المشكلة إني معرفتش أربيه وممكن يجيب سجاير بأي طريقة تانية لغاية ما رجع أديله مصروف تاني؟
    وكمان إزاي ألف طريقة تانية؟
    على أساس إن المجلات والفيديوهات والسي دي المنتشرة في أي مكان سهل جدًا إني أجيبها وأخليها معايا لغاية ما ألاقي فرصة أتفرج عليها؟
    وللا هبقى خايف إنها تقع في إيد حد وببقى عاوز أتخلص منها؟
    الحكاية هي تقليص الاختيارات
    الحكاية هي - ولو كان مش قصد الحكومة - تطبيق لأوامر الله
    مين عاوز يعترض على أمر من عند الله علشان فيه أسباب أخرى وراء تطبيق الحكومة للأمر الشرعي
    أنا ممكن أفتح شفرة الديجيتال وأتفرج بس بيبقى فيه شفرة علشان يبقى فيه حجب
    وما دام أولياء الأمور في البيت بيشفروا على أولادهم حتى لو عدوا سن العشرين .. يبقى من الرجعية إننا نقول الحكومة متعمليش الصح علشان الغلط ليه مليون طريقة

    ReplyDelete
  7. والله اليى مش عنده قناعه بغض البصر لو عملتله ايه

    واليى مش مؤدب من نفسه ولنفسه والله لو الحكومه عملتله ايه

    بس الخوف لتقلب على المدونات المعارضهوالغير معارضه وتبقى سلطة حجب بئه

    ReplyDelete
  8. ما لا يدرك كله لا يترك كله

    ReplyDelete
  9. ربما تكون على صواب

    ولكن ما زلت أرى أن حجب المواقع الإباحية هو خطوة على الطريق الصحيح

    ولكن أحب أن أطمئنك بشدة

    حكومتنا الرشيدة لن تقوم بحجب المواقع الإباحية من الأصل

    ولكنها ستقوم بحجب المدونات والفيس بوك وربما اليوتيوب

    تدري لماذا ؟

    لأن المواقع الإباحية تخدر الناس
    بينما المواقع المذكورة تساهم في الإفاقة

    تحياتي
    والسلام عليكم ورحمة الله وبركاته

    ReplyDelete
  10. اولا ده مش حل ولا هيعمل فرق وبعدين لما هما واعيين كده ان الشعب متنيل ما يعملوا توعية بدل العرى اللى هما نفسهم بينشروه
    ثانيا اشك جدا فى انهم ينجحوا فى عمل الحجب ده

    تحياتي ليك و شكرا على الخبر اول مرة اعرفه منك

    ReplyDelete
  11. طالما المنح والمنع
    اصبح فى يد انسان
    فلابد من دخول (الاهواء)مهما
    كان اللى امامك مجرد من الاهواء
    لابد وان يتحكم به بعض الهوى
    فات زمن الانبياء والمرسلين ما يغيظنا
    التبريرات والتفسيرات وكأن من يكلمونهم اطفالاً أو بلهاء لكن ارجع اقولك مادام أحد لن يرد عليهم فسيقولون ويفعلون ما يريدون
    ومرة تانية اسفة للرد على موضوع قديم
    ولكنا المرة الاولى الى اتى فيها الى هنا
    وبالمناسبة كـــــل لحظةوانت وهى فى سعادة وهناء
    وياريت تُسمعها وتُقرأها هذا الكلام :)

    ReplyDelete
  12. الحلم العربي::
    اعلانات المنشطات و قنوات العري كليب زادت عن الحد
    اصبحت في منتهى السخافة و السماجة
    من الواضح ان في خطأ في المجتمع...مش في الانترنت

    ReplyDelete
  13. حاسوباتية:
    اللي ربى خير من اللي اشترى
    حكومتنا و عارفينها و عارفين حركاتها
    ربنا يهديهم او يهدينا
    تحياتي

    ReplyDelete
  14. coca;
    يعني الاعتراض اساسا على الحكم
    حتى لو الحكم هدفه فعلا حجب المواقع الاباحية فقط
    على فكرة
    دي وجهة نظر برضة...على اعتبار ان الشعب مش قاصر و لابد ان تتوافر كل الطرق و السبل و على الفرد ان يختار بنفسه
    وجهة نظر ليبرالية
    تحياتي

    ReplyDelete
  15. يوميات شاب منوفي:
    هو دة الكلام المضبوط

    ReplyDelete
  16. هوندا:
    انتي بتفترضي حسن النية في ناس المفروض ان سوابقهم لا توجد بها اي نية حسنة
    ربنا يخلف ظني

    ReplyDelete
  17. osso:
    القصة مش قصة مع الحجب او ضده
    اكيد طبعا من منظور اخلاقي كلنا مع حجب المواقع الاباحية
    انما لأننا عارفين حكومتنا كويس قوي يبقى اكيد الموضوع فيه ان
    هذا كل الموضوع

    ReplyDelete
  18. mahasen saber:
    انا باشوف ان لو حنفية الحجب اتفتحت مش هتتقفل

    ReplyDelete
  19. م/الحسيني لزومي:
    خير الكلام ما قل و دل

    ReplyDelete
  20. ابو اسامة:
    هو فعلا خطوة على الطريق الصحيح
    بس دة طبعا بفرض حسن النية
    اللي اكيد غير متوفرة مع حكومتنا الرشيدة
    تحياتي

    ReplyDelete
  21. محمد ياسر:
    لأنهم لايعنيهم اخلاق الشعب في شيء
    كل ما يعنيهم هو فتح ماسورة الحجب
    لحجب مايحلو لهم من مواقع

    ReplyDelete
  22. norhaty:
    اهلا و سهلا بكي في اي وقت
    و الف شكر على الكلام الجميل دة
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails