Friday, 19 June 2009

دكان شحاتة


ممكن جدا تصنع لوحة فنية جميلة...مافيهاش غلطة و تبوظ اللوحة دي علشان لون انت حطيته مش في مكانه
زي يالضبط ما تبوظ الطبخة علشان شوية ملح!!!!
هو دة اللي عمله خالد يوسف في فيلم (دكان شحاتة)...بالضبط
ففكرة الفيلم واداء معظم ابطاله كفيل برسم لوحة فنية رائعة و صناعة فيلم قد يصنف من اهم افلام السينما المصرية على مدار تاريخها
الا ان الوان (اللوحة) تداخلت...و الملح بوظ الطبخة
ففكرة الفيلم رائعة
ف (دكان شحاتة) هي مصر اما (شحاتة) نفسه فهو الشعب المصري الطيب الغلبان اللي بياخد على قفاه و بيسامح وبيتسامح وعنده استعداد للعيش و الحياة مع جلاديه وسارقيه و مش مجرد (العيش) معهم فقط بل الذوبان في غرامهم و عشقهم
ضربوه و اهانوه و عذبوه وسرقوه و سجنوه و سرقوا (دكانه) ومع ذلك يبحث عنهم ليس للأنتقام....ف (شحاتة) لا يعرف الانتقام...(شحاتة) لا يعرف الا التسامح الا الحب..على الرغم من انه قادر على الثورة و الانتقام و الخروج من واقعه المؤلم الا انه يعشق جلاده
اما دكانه...فقد (سرقه) الأجانب و طمعوا فيه و استولوا عليه فعلا
شحاتة في الفيلم لم يخرج من السجن لينتقم كما هي عادة الافلام المصرية على مدار تاريخها....انما خرج من السجن ليبحث عن (اخوته)... الذين سجنوه و سرقوا ميراثه و ايضا خطيبته ....يبحث عن الدفء...عن اللمة...عن العائلة...شعاره في الحياة (عفا الله عما سلف) و (احنا اخوات مالناش غير بعض)....غاية الأستفزاز...فالمشاهد تعود ان يستمتع بأنتقام المظلوم من ظالمه الا ان (خالد يوسف) قرر ان يكون واقعيا..قرر ان يعري للمشاهد المصري حقيقة الشخصية المصرية...شخصية لا تعرف الانتقام...شخصية متسامحة لأبعد مدى حتى لو وصل هذا التسامح الى (الهبل)...الا انها شخصية قادرة ان تحب جلادها و سارقها و سجانها
احداث الفيلم تتواصل بداية من عام 1980 مع اغتيال الرئيس الراحل محمد انور السادات و حتى عام 2013 مع تنبؤات بما سيؤل اليه حال المجتمع المصري من سيطرة كاملة للبلطجة و غياب كامل للأمن مع ظهور الجماعات الاسلامية المسلحة وفرضها لأفكارها على المجتمع بقوة السلاح و معارك و صراعات من اجل الحصول على قمح او خبز
كل دة هايل و جميل ....انما السؤال اللي بيطرح نفسه واللي فرض نفسه بقوة بعد مشاهدة الفيلم
لماذا هيفاء وهبي؟
ايه السبب اللي يجعل مخرج بحجم (خالد يوسف)..ان يسند مشهد البطولة لممثلة لم تمثل من قبل...بل انها مشهورة بأغنياتها المثيرة و كليباتها العارية؟
هيفاء وهبي بشهادة عدد كبير جدا ممن شاهد الفيلم كان ادائها التمثيلي ضعيف....حتى ان من دخل الفيلم و هو يمني نفسه بمشاهدة ابداعاتها خاب ظنه ولم تتحقق اماله و طموحاته!!!!!
في نظر عدد كبير ممن شاهدوا الفيلم ان فيلم (دكان شحاتة) على الرغم من فكرته الجيدة الا انه واحد من اضعف افلام المخرج خالد يوسف و من وجهة نظري الشخصية ان (هيفاء وهبي) هي من اهم اسباب ضعف الفيلم فالدور كبير عليهاو لم يكن (خالد يوسف) على صواب عندما اسند دور البطولة لممثلة مبتدئة
عمرو سعد: برافو...بس هتخرج من عباءة (خالد يوسف) امتى؟
محمود حميدة: فيلم عن فيلم بتثبت انك ممثل قدير...ليه ضيعت سنين من عمرك اونطة؟
غادة عبد الرازق: لم يضف الفيلم دة اي جديد ليكي...حاولي مرة تانية
عمرو عبد الجليل: حسيت اني بأشوف الجزء الثاني من حين ميسرة
محمد كريم: اديت الدور ببراعة...خليتنا نكرهك فعلا...انت بتشتغل حاجة تانية غير التمثيل؟

31 comments:

  1. متفق معاك تماماً
    و فعلاً الفيلم محصلته النهائية = ضعيف

    ReplyDelete
  2. مهما كان اهى حاجة لتحريك المياة الراكدة احسن من الافلام اللى بتضحك على عقول الناس

    ReplyDelete
  3. انا عرفت نقطة الضعف دى فقط من مشاهدة إعلان الفيلم ولم ولن أدخله

    لان غير إخفاقه فى دور هيفاء وهبى إلا ان خالد يوسف طريقة اخراجه نفسها وكادراته فيها حاجة غلط .. بحس ان الممثليين بيقطعوا فى الكلام بشكل غير طبيعى حتى الرتم والسرعة بتبقى أوفر شوية

    يمكن الفيلم المعقول الوحيد اللى شوفتهوله لحد دلوقتى هو جواز بقرار جمهورى .. بعد كدة ابتدى يعك رسمى

    ReplyDelete
  4. شكرا يا أحمد على عرضك للفيلم اللى أنا برضة ما شفتوش ومش ناوية أشوفه برضة
    :))

    ReplyDelete
  5. تحليلك للفيلم بجد رائع
    وعلى فكرة أنا كمان سألت نفسى السؤال ده ؟
    اشمعنى ( هيفاء وهبى )
    بس الحقيقة الفيلم فى المجمل جيد
    ولو إن مشكلة خالد يوسف إنه بيطرح أكتر من قضية فى وقت واحد فابيحصل نوع الاختزال للقضية وعدم التعمق فى كل قضية بشكل كافى
    شكرا ...أرجو قبول مرورى

    ReplyDelete
  6. بصراحه ماتفرجتش على الفيلم بس سمعت انه حلو ونقدك كويس

    ReplyDelete
  7. اية رائيك في مشهد النهاية؟؟ انا بنزل بوست عن مشهد النهاية

    ReplyDelete
  8. "من أضعف" أفلام "خالد يوسف"؟ هوة الراجل دة كان له أفلام قوية والعياذ بالله؟

    ReplyDelete
  9. غاده عبد الرازق بحسها موهوبه جدا جدا
    وانا لو هشوف الفيلم ده هتفرج عليه عشان غاده ومحمود حميده وعمرو عبدالجليل

    واتفرج على هيفا طببببببببببببببببعا ههههههههههههههه


    ازيك يا بلدياتى اخبارك ايه
    لسه الناس مبتاخدش منك جنيهات فضه

    ReplyDelete
  10. a7yeeeeeeeek gedaaaaaaan
    we awafek 100%

    salamy
    :))

    ReplyDelete
  11. ان امشوفتش الفيلم
    بس بفكر بينى وبين نفسى
    هو خالد يوسف جاب هيفا ليه فىالفيلم

    ReplyDelete
  12. مهندس مصري:
    هو الفيلم كفكرة ممتازة يا باشمهندس
    بس فعلا التنفيذ لم يكن على المستوى المطلوب
    نورتني

    ReplyDelete
  13. الشاب الميت:
    ماهو الواحد كان يتمنى ان طالما الفكرة رائعة و المخرج كبير و الامكانيات متوفرة يبقى لازم يتم انتاج فيلم بمستوى عال
    انما واضح ان الفنانة هيفاء وهبي كان لها رأي اخر
    تحياتي

    ReplyDelete
  14. انسانة:
    بس هي فوضى اعتقد انه فيلم جامد يا ياسمين
    ومفيش شك ان حين ميسرة برضة كان من الافلام القوية
    انا اعتقد ان خالد يوسف مخرج قدير جدا الا ان هيفاء وهبي كانت غلطته في الفيلم دة
    تحياتي

    ReplyDelete
  15. bosbos:
    استني لما تشوفيه على روتانا سينما
    مش هتقدر تغمض عنيك
    تحيااااتي

    ReplyDelete
  16. هو سؤال وجيه
    واعتقد انه جاب هيف عشان هي وجه جذاب للجمهور اليومين دول
    يعني عامل جذب للفيلم
    واعتقد ان نص الناس اللي دخلت الفيلم دخلت عشان تشوف هيفا
    وتزامن ده طبعا مع البروباجندا اللي حصلت علي موضوع جوازها
    ده السبب في رايي
    يمكن يكون بيحب يكتشف نجوم الله اعلم
    انا مشفتش الفيلم وكنت عايزة اشوفه
    ونقدك موضوعي وجميل

    ReplyDelete
  17. السلام عليكم
    شكرا على زيارتك يا احمد

    بس معلش
    انا مش عارف اضيف رابط مدونتك على القائمة
    ومش عارف المشكلة عندى ولا فى الرابط

    بكرر اعتذارى وياريت تقبله

    ReplyDelete
  18. راسبوتين:
    في حاجات كتير في الفيلم دة جيدة
    الا ان هيفاء وهبي اضعقت كثير من الفيلم نظرا لاهمية دورها
    نورت المدونة
    تحياتي

    ReplyDelete
  19. حاسوباتية:
    شوفي الفيلم و تعالي اقرأي النقد تاااني
    تحياتي

    ReplyDelete
  20. مواطن مصري:
    طبعا مشهد رائع و نهاية رائعة
    ولكنها نهاية نتمنى الا تتحول الى واقعية
    تحياااتي

    ReplyDelete
  21. قلم جاف:
    هو اكيد له افلام قوية...خالد يوسف من اعظم مخرجين السينما في الوقت الحالي
    يكفيه هي فوضى و حين ميسرة
    تحياااتي

    ReplyDelete
  22. mahasen saber:
    غادة عبد الرازق ممثلة موهوبة فعلا
    انما لو بتحبي غادة عبد الرازق بجد بلاش تتفرجي على الفيلم دة..لأنك مش هتحسي بوجودها اساسا
    بالنسبة للفضة...انا سيبت لهم البلد و هجيت
    هههه
    تحياتي و احتراماتي يا بلدياتي

    ReplyDelete
  23. shaymaa:
    الله يخليكي يا شيماء يا ؤافعة معنوياتي
    تحياااااااتي

    ReplyDelete
  24. البنت المشمشية حلوة بس شقية:
    ماهو السؤال دة...هو السبب في البوست دة

    ReplyDelete
  25. عدم انتقام البطل رفع لي الضغط
    الفيلم بصراحة استفزني جدا
    وبالرغم من حصولي على نسخة تكاد تكون أصلية من الفيلم إلا أنني لا استطيع أن أشاهده مرة تانية من كثرة سلبية بطل الفيلم اللي هو رمز الشعب المصري بسلبيته التي اعتقد أنه بدأ يتنبه في الفترة الاخيرة ولم يعد سلبيا

    ReplyDelete
  26. تحليل جميل للفيلم
    ديما بتفق معاك في كتير من وجهات ذظرك

    ReplyDelete
  27. الفيلم جماله انه شديد المصرية

    نقط ضعفه

    انه خلط الجد بالهزل

    مثل مشهد الذكر الذي تحول الي كوميديا انا شخصيا فطست على روحي من الضحك

    الفيلم بكاني و اضحكني بس كنت اتمنى
    ان ارى ممثلة اعظم من هيفاء

    لكن هيفاء في الفيلم ليست سيئة

    ReplyDelete
  28. صح جداً التحليل رغم ان المفروض اسم خالد يوسف لوحده كان كفايه اننا ندخل فيلم ليه لكن برده اعتمد للمره المش عارفه الكام علي عنصر يسمي بالاغرائي ولعلمك كتييييييييييييييييييييييير
    مش متقبلين هيفا هيفا ليه فعلا لو كانت ممثلة كويسه كان يبقي خير وبركه لكن الميوعه في الاداء توجع البطن
    واتفق معاك في رايك عن الشخصيات خصوصا غادة عبد الرازق لان شايفاها ممثلة رائعة مكنش المفروض تعمل دور تقريبا مالوش لازمه وغير واضح

    ReplyDelete
  29. فى رايىّ خالد يوسف استعان بها
    لسبب هام وبسيط جداً
    ايرادات الشباك!
    ولو حتى فى
    اسبوعه
    الاول والثانى حتى
    يكتشف (الجمهور)حقيقة
    الامر وانها ليست (بالشكل )الذى يطلبه)

    ReplyDelete
  30. وعفواً ان كان التعليق
    متأخراًبعض الشىء ولكنى
    ما قرأته الا الان فأردت التعليق عليه

    ReplyDelete
  31. ابو حميد

    على فكره انت واحشني قوي
    بس معلش عندي لخبطه مانعاني اني اجيلك هنا وابقى معاك في الاغلبيه

    نيجي للفيلم
    خالد جاب هيفاء عشان يضمن ان الفيلم يتشفا .. وده فكر تجاري .. زي ما عمل في الريس عمر حرب وأدخل المشاهد بتاعة هاني سلامه وغاده عبد الرازق

    وعلى فكره المشكله مش في اختياره هيفائ وهبي .. مش عشان انا باحبها وهي بتقول بوس الواوا .. لأ طبعا .. بس هو كان ممكن يضرب عشرميت عصفور بحجر واحد
    يعني كان ايه اللي هيحصل لو خلاها تنضم لأي ورشة تمثيل من الورش الموجوده .. سواءا ورشة الدكتور عبد الهادي او ورشة محمود حميده اللي بيحاضر فيها احمد كمال
    ناس كتير بيروحو الورشه دي حتى لو كانو نجوم
    دي غلطه فعلا لا تغتفر .. خصوصا لما تلاقي ناس داخله عشان تتفرج عاللحمه ومعشمه نفسها بفخده من هنا ولا دبوس من هنا .. وتلاقيها مش بتقلع فيه
    وده اللي كانو بيقولوه العيال المراهقين اللي شافو الفيلم معايا في السينما
    لدرجة ان اكتر من واحد قالوها باللفظ .. اللي بوّظ الفيلم هيفا

    اما عمرو سعد فهو حاليا بيعمل شغل مع طارق العريان .. ومش نتيجة خلاف بينه وبين خالد يوسف ولا حتى نوع من أنواع التمرد .. لأ
    بدليل ان الفيلم الجاي بتاع خالد يوسف فكرة عمرو سعد .. وبطولة عمرو عبد الجليل

    وبالنسبه لعمرو عبد الجليل وانه بيكرر نفسه في حين ميسره
    الفيلمين اصلا نفس التيمه .. بس ده في أجواء عشوائية والتاني في أجواء معداويه - نسبة للمعادي - ومتداخله مع اللهجه الصعيدي

    وبمناسبة الصعيدي .. اكبر غلطه في الفيلم .. ان هيفاء وهبي .. البنت اللي اتربت على ايد اخوها الصعيدي .. وفي جوار ناس صعايده زي اهل شحاته .. وصديقة طفولتها غادة عبد الرازق اللي بتتكلم صعيدي .. تبقى هيفاء وهبي بتتكلم قاهري
    وما تسألنيش ازاي


    معلش رغيت كتير
    بس انت فتحت نفسي للكلام

    ليك وحشه والله

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails