Thursday, 14 May 2009

اعتقلني يا


ظالمين احنا الناس دي جدا
ذنبهم في رقبتنا ليوم الدين
هم بيعملوا لمصلحتنا و علشان بيحبونا و احنا بنقابل دة بكل جحود و قلة ادب ونكران للجميل
و مع ذلك الناس دي لا كلت ولا ملت عن اداء واجبها تجاهنا اولا و تجاه الوطن ثانيا....ما الشعب اهم من الوطن....و هو الوطن يبقى وطن من غير شعب برضة؟
عن الشرطة اتحدث....عن ناس بنتهمهم اتهامات اقل ما يقال عنها انها (قلة ادب) مننا بجد
لو حد سألني انت بعت نفسك بكام؟
اقول له اتق الله يا فتى
فلقد عرفت الحقيقة و لقد تبين لي النور من الظلام بعد تصريح لوذعي للسيد اللواء مساعد السيد اللواء وزير الداخلية اللي صرح وقال كدة بالفم المليان 
الأعتقال ليس عقوبة...ولكنه اجراء احترازي للحفاظ على بعض الشباب
قال وانا بقلة ادبي و نيتي الشيئة كنت فاكره عقوبة....اتاري الاعتقال دة حاجة حلوة
و بعدين و هو لما والدك يخاف عليك مش برضة بيعتقلك في البيت علشان يحافظ عليك؟؟؟
دة اللي بتعمله وزارة الداخلية بالضبط
بتعتقلك علشان تحميك من نفسك ومن وسوسة الشيطان لك
و بتكون في المعتقل معزز مكرم....واكل شارب نايم 5 نجوم.....مفيش حد بيدوس للمعتقل على طرف
لحد ما المعتقل يعقل كدة ويعرف  ان الله حق و يقر و يعترف انه غلطان وندمان و تائب توبة نصوحة...ساعتها يفتحوا له ابواب المعتقل و يقولوا له هتوحشنا و كانت ايام جميلة مش هتتنسي
 يااااااااااااااااااااااااااااااااااااااه
العلم نور بجد.......لما الصورة وضحت الواحد كدة ارتاح فعلا
طول عمري والشيطان ضاحك عليا...و فاكر المعتقلات دي حاجة وحشة....و اتفرجت على (احنا بتوع الأتوبيس) و (البريء) و جميع الأفلام المضللة دي اللي بينت المعتقلات على غير حقيقتها الخيرة الجميلة
انما بعد التصريح الخطير دة بأطالب بتصوير افلام من نوعية (انا و انت وساعات المعتقل)...او (اعتقلني يا) وغيرها من الأفلام الرائعة الواقعية اللي بتصور الحياة اللطيفة الرائعة اللي بتدور في المعتقلات المصرية و تظهر اهدافها النبيلة في حماية الشباب المصري من الضياع
وسمعني 
حزينة يا مصر......يا ارض الهرم
************************

ملحوظة:
تصريحات السيد اللواء مساعد وزير الداخلية
الكاريكاتير المرفق بالتدوينة مقتبس من الموقع التالي:

34 comments:

  1. ياااااااااااااااااااه يا أحمد كل ده وكنت فاهم غلط
    وتصدق أنا كمان كنت فاهمة غلط

    والحمدلله وضحوا لينا الصورة المفروض نبوس ايدينا وش وضهر كمان

    ReplyDelete
  2. ايوه السجن اصلاح مواسير وتهذيب شعر وخاصه فى مصر انتم اللى ناس وحشه وظالمين
    ربنا ما يكتبه على حد
    معلومه خبيثه تعرف ان فعلا امريكا ساعات لما بتحب تنتزع اعتراف من حد بتبعته على امن الدوله من مدينه نصر تحديدا فى الجهاز
    اى خدمه هتحبسنا اهو

    ReplyDelete
  3. كل مره تعتقلني فيها بابقى نفسي ا....ا... اجيلك اقلك ان اعتقالك ده عندي بالحياه طيب ا.... ا....ظ


    انت بقى اللي عايز تعتقل وا .... دانا اللي اللي هاقطعك واشفيك ا.... وا ..... وا ....ئ

    ReplyDelete
  4. احنا اساساشعب مفتري
    ومش عارفين مصلحتنا
    كتير بنتهور ونأذي روحنا فالحكومه الله يكرمه عماله تطبطب شويه وتسايس وتهدي لدرجه بتعتقلنا علشان نستجم شويه بعيد عن الضغوط الخارجيه ونتفسح جوه المنتجع ( المعتقل سابقا) شويه وبعدين نرجع لحياتنا اسوياء محترمين ماشين فوق يوووه قصدي جنب الحيط

    ياشعب مفتري

    ReplyDelete
  5. هههههههههههههههههههه..شفت مصر الريادة..يعني ادينا هو بنعمل اللي الأمريكان مش عارفين يعملوه
    يخرب بيت دي سمعة يا أخي
    :)
    تحياتي

    ReplyDelete
  6. السلام عليكم ورحمة الله وبركاته

    شفت بقي اد ايه احنا شعب ظالم ومفتري ومش بيقدر النعمه اللي هو فيها

    دا حتي اسم المعتقل اهه مشتق من كلمة عقل يعني بيخلوك فيه لحد ما تعقل كده وتعرف ان الله حق

    ههههههههههههه

    ReplyDelete
  7. الاعتقال محافظه على الشباب؟
    طيب هو مش ممكن يحافظ على الشاب من غير ما يدخل يجيبه من بيته الساعه 3 صباحا؟
    مفيش طريقه تانيه يحافظ بها على الشباب؟
    يا راجل ناس تفقع المراره

    ReplyDelete
  8. هههههههههههههههههههههه
    طيب مش هيطلعوا رحلات ونبي للمعتقلات دي اهو نروح نتفسح نروح على نفسنا يعني الحكومه بتعملنا اماكن ترفيح ومعتقلات واحنا الوحشين ياحرام الحمد لله ان ظهر الحق وطبعا الحكومه صح هههههههه

    ReplyDelete
  9. هو فيه حدعاد بيتابع تصريحات الوزراء او مساعديهم او اي مسؤلين في مصر؟؟؟
    ايه اللي خلاك تنكد علي نفسك و تتابع تصريحاتهم؟؟؟

    ReplyDelete
  10. المعتقلات دي أماكن للتأمل وتنقية الذهن ومراجعة النفس واللي بيدخلها الصفوة من الناس اللي بتشغل عقلها وبتفكر
    اشكرك على الموضوع ده لأنه صحح لي مفاهيم كتير مغلوطة عن المعتقلات اللي كنت فاكرها حاجة وحشة
    :)

    ReplyDelete
  11. يفتح باب بيت المدونين ذراعيه لكل الموهبين في :
    1/ القصة القصيرة
    2/ الشعر بشتى أنواعه
    3/ الرواية "رواية سنوية سنقوم بنشرها في الجريدة"
    4/ المقال الصحفي
    إذا وجدت في نفسك القدرة على المشاركة أرجوا التواصل معي على الميل التالي
    arabicsabah@yahoo.com
    شروط المسابقة
    1/ ..............................
    2/ .............................
    3/ ..............................
    لا يوجد شروط الشرط الوحيد هو العمل الجيد , والعمل المحترم البعيد عن الإسفاف
    المقالات أرجوا أن تكون تخص الانسان العربي , تاريخه , عاداته وتقاليده , مقالات إجتماعية وثقافية ....
    أرجوا التفاعل معنا في الجروب على العنوان التالي
    http://www.facebook.com/group.php?gid=45202724108#/group.php?gid=78080770039

    ReplyDelete
  12. ايه ده ده احنا كان مضحوك علينا صحيح
    ده بعدد كده الواحدأول ما يشوف ضابط في الشارع يقوله و النبي استضيفوني عندكو شوية علشان انا مش عاجبني اليومين دول
    :)))))))))
    دنيا

    ReplyDelete
  13. هههههههههههههه طول عمرى بقول كده برضه

    ده كفايه دخولك القسم تخلص مصلحه روحك بتخلص مع خلاص المصلحه ههههههههههه

    كله كوم والكاريكاتير كوم على بعضه

    مبدع دايما يا بلدبات

    يا رب يجى عليك اليوم اليى تكتب فيه البوست الجاى من بيتكوا او من سيبر حتى
    انما مش من داخل ابراج المعتقل الفخيمه والرخيمه
    ده تفخيم والنبى

    ReplyDelete
  14. bosbos:
    شفتي بقى
    احجز لك يومين هناك تستجمي؟

    ReplyDelete
  15. appy:
    امريكا بتعتبر مصر فرع للعمليات القذرة اللي ما ينفعش تعملها على ارضها
    عندهم حاجة كدة اسمها قانون...اختراع عجيب كدة
    بيحترموه
    تحياااااااتي

    ReplyDelete
  16. ahmed yousry:
    خليك كدة لحد ما تجرب بنفسك يا معلم
    و ساعتها هتعرف المعنى الحقيقي للأستجمام
    تحياااااتي

    ReplyDelete
  17. عاشقة وغلبانة:
    شعب مش وش نعمة
    ما يعرفش قيمة المتنزهات والحدائق اللي اسمها معتقلات
    تلاقي جوة في سونة و مساج
    ههه
    تحياتي

    ReplyDelete
  18. micheal:
    احمد ربنا ان احنا تميزنا في حاجة
    حتى لو في التعذيب

    ReplyDelete
  19. خمسة فضفضة:
    شعب قليل الخبرة والادب
    مش عارف مدى قيمة مكتسباته و معتقلاته و متنزهاته
    منورة يا دكتورة

    ReplyDelete
  20. لورنس العرب:
    لما والدك يصحيك من النوم و يفقعك علقة علشان يربيك
    هتفرق معاه الساعة 3 او 4
    هي الحكومة بتتعامل مع ابناءها احباءها المعتقلين بنفس المنطق
    تحيااااااتي

    ReplyDelete
  21. حاسوباتية:
    هاقول لأونكل عادلي ينظم رحلة ويعزمك عليها
    بس ما ترجعيش تعيطي

    ReplyDelete
  22. كيارا:
    معلومة قديمة...ايه لجديد في كدة؟

    ReplyDelete
  23. ذو النون المصري:
    انا مش بتابعها....هي اللي بلاقيها طالعة على عيني كدة وانا ع النت لا بي ولا عليا

    ReplyDelete
  24. ياسر حسين:
    اي خدمة يا فنان
    لو عايز...انا ممكن احجز لك ليلتين 5 نجوم
    تحياتي

    ReplyDelete
  25. hamada:
    مجهود كبير....تشكر عليه

    ReplyDelete
  26. لا لا لا فعلا شعب وحش وحش و قلبنا من جوه اسود كده شفت ظلمنا الراجل إزاي ده سجن ده فيه حدائق غناء تعالى شوف سجن طره حاجة تشرح القلب الحزنان هما عبط ولا إيه ؟!!

    ReplyDelete
  27. طب تصدق بالله
    مره واحد من الى كل ما بيحصل حاجه فى البلد دى بيروحوا يعتقلوه
    بيحلف انه بيعرف هو فى انهى معتقل مع انه بيكون عنيه متغميه
    تصور انت بيعرفوا منين؟؟؟
    اقولك انا
    من طعم الصدا الى فى البوبات وهما شادينه ومجرجرينه على الارض
    وبعد كل ده بنتجنى عليهم
    احنا بجد عالم مفتريه

    ReplyDelete
  28. الحلم العربي:
    كان الله في عونهم...الناس دي مش هتلاحق من كتر طلبات الاعتقال

    ReplyDelete
  29. mahasen saber:
    الحمد لله....لا ازال حي ارزق و اكتب البوست القادم من منزلنا العامر و الحمد لله
    تحياتي و احتراماتي

    ReplyDelete
  30. israa el saka:
    شفتي بقى الناس دي مظلومة بسببنا ازاي؟؟
    ناس ذوق ذوق ذوق

    ReplyDelete
  31. nody_1987:
    يا ساتر يا رب
    بجد البلد دي فيها بلاوي....و ما خفي كان اعظم

    ReplyDelete
  32. Υouг style iѕ really unique in comρarіsοn to other рeоple I've read stuff from. I appreciate you for posting when you have the opportunity, Guess I will just bookmark this blog.

    My web-site - ephedrine alkaloids

    ReplyDelete
  33. I must thank уou for the еffогts
    you have put in pеnning this website.

    Ι am hoping to see the same high-grade cоntеnt fгom you in thе futuгe аs well.
    In truth, your creatiѵe writing abіlities haѕ insρired me tо get my very оwn site now ;)

    Look into my webpage - ephedra effects

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails