Thursday, 7 May 2009

اياك واكل عيشه


المواطن المصري الغلبان....عامل او فلاح او موظف على قده.....عايز ايه من الدنيا؟
محتاج ايه في الحياة علشان يكون سعيد ومبسوط وقانع و راض؟
بيت يضمه هو وعياله...يحميهم من برد الشتا وحر الصيف ويستره عن عيون الناس
اكل صحي....او حتى مش صحي...مجرد اكل يسد جوعه
مياه شرب....تروي عطشه....مجرد تروي عطشه مش مهم تكون معدنية او طبيعية او فوارة
فرصة عمل توفر له دخل...او حد ادنى من الدخل يقيه مذلة السؤال ويوفر احتياجاته واحتياجات اولاده الاساسية والضرورية وفقط..بدون اي رفاهية...فالرفاهية كلمة غير واردة في القاموس المصري لدى اكثر من 80% من ابناء الشعب دة
علاج....يقيه او يعالجه من امراض القرن ال 21 و ما اقساها من امراض وما اصعبه من علاج
مدارس يقدر يعلم فيها اولاده الحد الادنى من التعليم اللي يطلعهم بني ادمين بتفهم ومش طالب مدارس لغات ولا يحزنون...بس يعلم اولاده
شقق للشباب علشان اولاده يتزوجوا و في حدود امكانياته...مجرد شقة اسكان متوسط لا عايز فيلا بجنينة ولا حتى شقة 200 متر
دي الأحتياجات الأساسية للمواطن المصري الغلبان...حقوق اساسية للمواطن علشان يعرف يعيش...مجرد انه يعيش
 المواطن الغلبان المطحون مش عايز من الدنيا اكتر من كدة
لا عايز ديمقراطية....ولا فارقة معاه تعديل دستور (دة حتى ما يعرفش ان في جورنال اسمه الدستور)..ولا بيطالب بتداول السلطة ولا حاجة من دي خالص
و دة مش علشان هو مبسوط كدة و لا حاجة انما لأنه مش عارف ان الديمقراطية وتداول السلطة هي اللي هتوفر له الحياة الكريمة...هي اللي هتحسسه انه بني ادم مؤثر يصنع الأحداث في بلده....هي اللي هتخليه فعل وليس رد فعل
المواطن الفقير ماديا وتعليميا في مصر بيشوف ان الكلام عن الديمقراطية و حقوق الأنسان والمواطنة وتداول السلطة دة كلام ناس (مرتاحة)....ناس مش مطحونة...دي رفاهية مثقفين
و أه لو يعرف ان الكلام دة اساسيات حياة وليست رفاهية ولا كلام ناس مرتاحة
و لذلك فالمواطن المصري لا يتفاعل مع اية حركات للديمقراطية او اية احتجاجات من اجل تعديل الدستور ولا يتعاطف مع اية مبادرة لتطبيق حقوق الانسان فعليا في مصر
المواطن المصري لا يثور ولا يغضب الا اذا (هددت) اكل عيشه
هنا يتحول لبركان من الغضب..شعلة من الأحتجاج سرعان ما تهدأ بطمأنته ان (كله تمام) ولا مساس (بالملاليم) اللي يقبضها اول كل شهر
هنا يعود المواطن (الثائر) الى وداعته ورقته و قلة حيلته ويرضى بقليله
فالمصري يؤمن ايمانا تاما  بالمقولة القائلة (عض قلبي ولا تعض رغيفي).....فلا يسمح بالمساس بأكل عيشه حتى لو كان هذا (العيش) غير مطابقا للمواصفات الأنسانية ولا الأدمية
ثعالب السلطة ادركوا هذه الخاصية المصرية الفريدة من نوعها بين سكان الأرض....ادركوها مبكرا ووعوها تماما..فلكي تأمن غدر (المصري الغلبان)....لا تعبث بمرتبه...بمصدر دخله القليل...اسحله...عذبه...اسجنه....لوث مياهه....سرطن طعامه.....زور انتخاباته....هين كرامته
كل دة مقبول بالنسبة له...الا اكل العيش
فهموا الفولة من زمان......المصري كائن لا يهتم بالسياسة من زمان....على الرغم ان السياسة هي محور كل ما يمس حياته اليومية الا انه لا يراها اكثر من رفاهية و المهتمين بها ليس اكثر من ناس فاضية
للأسف هو دة (المواطن المصري).....هل انسان هي دي حالته و هو دة تفكيره يمكن الرهان عليه لأحداث التغيير؟؟؟؟
اعتقد ان لســـــــــة عليه بدري قوي

22 comments:

  1. هو ده اللى وصل له بقى ابسط طلباته اعيش النهارده وموتنى بكره علشان كده قولت ان ساعات فيه حلول لازم تبقى من الجذور يا دكتور

    ReplyDelete
  2. لا اختلف معاك
    صدقني الناس علي اخرها ومستني بس زقه
    هتلاقي الدنيا خربت

    ReplyDelete
  3. واحد مصري في الكويت المدير بتاعه أنهى خدماته والمدير ما يعرفش عربي
    دخل عليه وبيتخانق معاه
    ويقول له
    Don't cut my bread
    I run on my children

    =

    ما تقطعش عيشي انا باجري على عيالي

    بالترجمة المصرية
    :D

    ReplyDelete
  4. لو قعدنا مستنيين عشان المواطن الغلبان يتوصل منه لنفسه إلى إن الديموقراطية هى الحل الحقيقى اللى ها يحققله و يضمن له مطالبه اللى هى أصلا حقوقه الطبيعية كمواطن.. يبقى هانفضل مستنيين ليوم الدين و عليك خير.

    لازم يكون فيه طريقة الحقيقة دى توصله بشكل مبسط و بوضوح و لازم حقيقة تانية مهمه توصله و هى إن رغيف عيشه بالفعل مهدد و إنه إتسحب منه معظمه و اللى فاضل بيتاخد منه دلوقت.

    لازم يكون فيه نوع من الحوار بين اللى شايف و فاهم الحقيقة و بين المغيب فى الجهل و ذل البحث المضنى عن لقمة العيش.. لازم نحدد بالضبط النقط اللى غايبه عنهم و نلاقى طرق توضحها.

    ReplyDelete
  5. هذا المواطن البسيط الغلبان جاب اخره خلاص
    و فاضل زلطه و الحكومه تطلع بره
    و اذا مطلعتش يبقي المواطن هو اللي هتطلع روحه في النهاية

    ReplyDelete
  6. لما شفت صور الاشتباكات بين قوات الأمن والزبالين عشان الخنازير
    قلت المصرين لو سحلت عيالهم او عذبتهم في الأقسام أو اعتقلتهم من غير سبب مش هيعملوا حاجه
    لكن لو جيت جنب لقمة عيشهم يقتلوك
    بس اعتقد يااحمد ان اليوم اللي هيثوروا فيه عشان كل حاجه قرب
    اصل كده كده هياخدو منا حتي لقمة العيش

    ReplyDelete
  7. بس تعرف ان المواطن الغلبان لما بيقول على الكلام اللي قلت عليه انه كلام ناس مرتاحين يمكن يكون عنده بعض الحق
    وده لأن من يتحدث في وسائل الاعلام ليس منهم ولكن ناس من الطبقه العليا
    مثلا انا مرة كنت بتفرج على التليفزيون ولقيت 2 ستات من بتوع حقوق المرأه وبيتكلموا عن اهمية تبسيط مطالب الفتيات في الزواج
    وطبعا اتفرجت وفضلت اضحك لأن كل واحده منهم بتنصح الناس بما لا تفعله
    ويوجد واحد صديق اعرفه من سنين من اول ما بدأت اكتب على النت اسمه طائر الشمال
    عمال ينصحنا عمال على بطال بالثورة والخروج من اجل الخلاص من مبارك وافعاله
    وكل يوم يكتب في موقعه عن مبارك
    وفي احد المرات اختفى وقال انه بيستأذن في اجازه قصيره بجزيرة -مش عارف ايه كده- في اوربا لأنه يريد ان يريح اعصابه شويه، وهو اصلا بيكتب من اوسلو وعايش هناك
    قلت له طيب يا سيدنا ما تخلي ولادك الاتنين يسيبوا الجامعه وييجوا مصر يخرجوا معانا في المظاهرات وطبعا لم يرد
    قصر الكلام
    المواطن الغلبان عاوز اللي منه هو اللي يتكلم عشان يزداد اقتناع
    وطبعا انت صح في جملة انه آه لو يعرف ان ده اللي هايخليه كويس وهايصلح حاله
    لكنه مواطن بسيط - ينظر أولا لمظهر المتكلم
    إذا لقاه من اصحاب الابراج العاليه قالك يا عمنا دي ناس مرتاحه، مالهم ومالنا
    وعشان كده الموضوع حله صعب


    تحياتي لك لطرح الموضوع الهام والخير ده

    ReplyDelete
  8. السلام عليكم ورحمة الله وبركاته
    بارك الله لك في مدونتك الرائعة واتمني لك كل توفيق
    وادعوك لزيارة مدونتي المتواضعة التاريخ قبل الطبيخ ربما تجد فيها ما يفيدك
    http://aymanabdelazeem.blogspot.com/

    ReplyDelete
  9. بوست رائع بجد
    بس ايمن نور اقل من انه يوازي مانديلا مصر..
    دا مزور وليه اطماع عيير مانديلا اللي قاتل بشرف من غير اطماع وساب السلطة بنفسه

    ReplyDelete
  10. متفق معاك جدا بس تفتكر الثقافة دي محتاجة قد إيه لتغييرها؟؟
    تحياتي

    ReplyDelete
  11. فاضل كتير علشان يحصل التغيير ده ويارب مانفضلش مستنين لأخر عمرنا

    ReplyDelete
  12. appy:
    ماهو اصل الوصول للجذور صعب قوي في الزمن دة يا آبي
    محتاج قدرات خارقة
    تحيااااتي

    ReplyDelete
  13. محمد مفيد:
    لسة منتظرين زقة يا محمد؟؟؟
    حرام عليك
    دول اتهروا زق و مفيش فايدة...من الواضح كدة يابو حميد انهم عايزين شلوووت مش مجرد زقة
    تحياتي

    ReplyDelete
  14. عصفور المدينة:
    يا سلام على الروقان
    يا مزاجك العالي يا باشمهندس
    تحياتي

    ReplyDelete
  15. مهندس حر:
    كلام جميل وكلام معقول ماقدرش اقول حاجة عنه
    بس تفتكر يا باشمهندس مين اللي هيسمح للي فاهم انه يفهم اللي مش فاهم؟؟؟؟
    اعتقد هي مهمة مستحيلة
    تحياتي

    ReplyDelete
  16. ذو النون المصري:
    انا اعتقد ان الوضع دة مريح جدا لدى بعض الجهات
    طول ما الناس عمالة تجري على اكل عيشها وبيدوروا ويلفوا في الساقية..طول ما هم مريحين دماغهم ومش خايفين من اي غضب شعبي
    و دة طبعا هو المطلوب
    تحياتي و احتراماتي

    ReplyDelete
  17. esraa:
    ربنا يديني ويديكي طول العمر
    بس انا اعتقد ان احفادك هم اللي ممكن يعيشوا اليوم دة
    تحيااااااااتي

    ReplyDelete
  18. لورنس العرب:
    بس عايز اقولك حاجة مهمة
    المواطن الغلبان يقول اللي يقوله انما لا تستطيع ان تنكر ان فعلا الديمقراطية هي الحل السحري لمشاكل البلد دة
    ايا كان دعاة الديمقراطية سواء كانوا ناس مرفهين او ناس مطحونين
    انما دة لا يغير من الواقع شيئا
    الف شكر لك على الكلام الجميل دة
    تحياتي

    ReplyDelete
  19. ايمن عبد العظيم:
    دعوة مقبولة وبالتوفيق ان شاء الله و ارجو ان تعتبرني صديقك لمدونتك القيمة
    تحياتي

    ReplyDelete
  20. موجة:
    ليه مزور؟؟؟
    هل تعتقد انه مزور لمجرد ان الحكومة قالت عليه مزور؟؟
    يبقى على كدة سعد الدين ابراهيم عميل و كفاية شواذ ووووووو
    الخ
    من التلفيقات والافتراءات على كل من يقول لا في هذه البلد

    ReplyDelete
  21. micheal:
    اعتقد 3 او 4 اجيال يا مايكل
    يعني على احفادك بقى و عليك خير
    تحيااااااااتي

    ReplyDelete
  22. bosbos:
    ماتحطيش امل كبير يا بس بس
    يحيينا و يحييكي ربنا
    تحيااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails