Sunday, 19 April 2009

تخيـــــــــــــــــــــــــــــــل و عيش اللحظة


لأني من زمااااااااااااان ما جاوبتش على تاجات
و لأننا في ايام ربيعية وشم نسيم وبيض ملون و حاجات روشة
قررت اني اجاوب على التاج الروش دة
اللي صراحة(ماحدش ) اهداه لي ولكني انا اللي اهديته لنفسي بعد ما لقيته على مدونة (ذو النون المصري)......ونظرا لأني في مووود تخيل و خزعبلات وحاجات كدة
قررت اهديه لنفسي و اتخيل و اعيش لحظة المغامرة اللي فيه
********************
س1) لو ماشي في الصحراء تخيل احساسك هيكون ازاي ؟متصورها ازاي؟و هتعمل ايه؟
الأحساس طبعا هيختلف بأختلاف السبب اللي مخليني ماشي في الصحراء
ويعني لو ماشي في الصحراء (سفاري) و (سياحة) هيكون احساسي احساس السائح المنبهر اللي عمره ما مشي في الصحراء قبل كدة
وكل 5 دقائق هتلاقيني بأفتح (بقي) واقول وااااااااااو
اما بقى لو تايه في الصحراء فهأبقى عمال اجيب مية و جاز و بنزين و كل السوائل الممكنة والغير ممكن و عمال اراقب عداد البنزين لو معايا عربية او كمية الأكل و المياه اللي معايا واللي اكيد هتبقى قربت تخلص
و لو الموضوع طول معايا قوي في الصحراء...يبقى هأقضي الوقت اللي فاضل لي في هذه الدنيا في الدعاء لله و الأستغفار و طلب الرحمة على اعتبار انه بيفصل بيني وبين الأخرة ساعات قلائل
س2)لو ماشي في غابة احساسك هيكون ايه ؟ و هتعمل ايه لو لقيت نفسك فيها؟
احساس (رعب) طبعا...هأبقى منتظر اللي هيهجم عليا هيطلع لي منين....يعني قرد هينزل عليا من فوق شجرة..ولا ثعبان هيطلع لي من الأرض و لا اسد هيهبشني من قدام و لا نمر هيهجم عليا من ورا.....الخ
اما بقى هأعمل ايه لو لقيت نفسي فيها...فكل اللي هأعمله اني هأقعد تحت شجرة انتظر مصيري اللي بالتأكيد هيكون مظلم وبائس
وغالبا هأقضي اللي باقي من وقتي في قراءة القرأن و ادعي ربنا ان الموتة ما تبقاش بشعة قوي يعني
بس السؤال هنا
انا ايه اللي هيوديني الغابة اساسا؟
س3) لو لقيت صندوق فى الصحراء هتحاول تفتحة ولا ؟ ولو فتحتة تتخيل هايكون فية اية؟
اكيد هأحاول افتحه...ماهي بايظة بايظة اساسا
و كدة كدة ميت....انا افتحه و رزقي على الله
ممكن جدا يكون جواه (بيبسي كانز) و كام قزازة مية
س5)لو لقيت حصان فى الصحراء تفتكر هايكون لونة اية؟ وهتركب ولا هتسيبة وتمشى؟
هي هتفـــــــــــــــــــــرق؟؟؟؟؟!!!!!
هيكون اونه اسود ان شاء الله
و طبعا مش هاركبه لأني مابعرفش اركب خيل اساسا
وبعدين لو كدة كدة ميت...الأفضل اني اموت من العطش على اني اموت تحت اقدام حصان
س6) لو لقيت سلم فى الصحراء هتعمل اية؟ هتاخدة معاك ولا هتطلع ولا هاتسيبة وتمشى ولا اية؟
سلم في الصحراء؟؟؟؟!!!!
ليــــــــــــــــــــــــــــــــــــــه؟
و ازاي اصلا يبقى في سلم في الصحرا؟ بيوصل لأيه
هأطلع السلم طبعا .....اشوف ايه اخرة اليوم دة؟؟؟؟
س7) لو لقيت ماج فى الصحراء تفتكر هايكون شكلة ازاى؟ وهتعمل بية اية؟
هايكون ماج معدن حديد مصدي و حالته بالبلاء
و مش بعيد تلاقي جوة الماج (عقرب) صغنون كدة مستخبي جوة
و مش هاعمل بيه اي حاجة طبعا لأن غالبا هتكون حالته مذرية
س8) لو كنت ماشى فى الغابة ولقيت أسد هتعمل اية؟ هاتجرى ياترى؟ ولا هتهاجم ؟ولاهاتقف مكانك ولا اية؟
انا مؤمن بمبدأ مهم جدا في الحياة
"الجري نص الجدعنة"
و ساعات زي في حالة الأسد دة بتكون هي (الجدعنة كلها)
هأجـــــــــــــــري طبعا هي دي عايزة كلام؟؟
س9) لو مشيت فى الغابة ولقيت بحيرة ياترى فى تخيلك هاتكون شكلها عامل ازاى؟ وهتعديها ولا ؟
بحيرة في غابة هتبقى عاملة ازاي يعني؟؟؟؟
بحيرة من (التماسيح) طبعاااااااااااااااااااااااااااااااااااا
و بالتأكيد مش هاعديها.....لأني مش هربان من كل حيوانات الغابة علشان في النهاية ابقى (سندوتش) لتمساح في بحيرة في غابة
س10) لو شفت سور فى الصحراء على شرط انة مرتفع قوى وطويل قوى قوى هتعمل اية ؟ هتمشى معاة وتشوف اخرة؟ ولا هتحاول تكسرة ولا هتعمل اية؟
اكيد مش هأحاول اكسره لأن بالتأكيد مش هايكون معايا حاجة اكسره بيها (ما انا اساسا نسيت الماج) وما رضيتش اخده
يبقى مش قدامي غير اني امشي مع السور لنهايته علشان اشوف اخرته ايه...واخر اليوم اللي ماطلعلوش شمس دة ايه
_______________________________________
و دلوقتي بعد ما ربنا نجانا من الصحراء و الغابة و التماسيح و الأسود و السلالم والكلام دة كله
أحب اهدي التاج الممتع دة للسادة والسيدات الأتية اسماؤهم...مع اعتبار ان التاج دة اجباري و الا...كل اللي في التاج دة هيبقى حقيقة و ابقوا وروني بقى هاتعملوا ايه؟؟؟!!!
و كل محبي المغامرات البوليسية

25 comments:

  1. إيه تاج الرعب ده
    بجد بجد أنا بحب المغامرات مع انى جبانة بس برضة بحبها جدااااااااااااااااااااااا

    وشكرا على التاج وانا رايحة جرى اهو اجاوبة بقالى فعلا فترة محدش ادانى تاج

    ReplyDelete
  2. إيه يا عم ده
    تاج تاني
    مش لاعب
    :)
    ايه فيلم الرعب ده يا أبو سمرة
    أنا اعتزلت التاجات بس عشان مزعلكش أنا حجري طبعا لو شفت الأسد وأنا ايه اللي يمشيني في غابة أصلا ولو لقيت سلم مش حعمل به حاجة
    :)
    تحياتي يا مان

    ReplyDelete
  3. عايزه أقولك على معلومه ممكن تكون مهمة :)
    ده اختبار نفسي وكل سؤال من الأسئله دي اجابتك عليه ليها معنى وكل حاجه من دي (كل رمز) لها معنى برضه من أول الصحراء لحد الحصان والماج والسور والسلم الى آخره

    ReplyDelete
  4. عظيم جدا جدا
    التاج دمه خفيف لكن انا شايف انك بتخاف من الصحاري و الغابات جدا رغم ان فيها عبره
    مش عبره لمن يعتبر بالمفهوم ابو دم خفيف
    لا عبره تانيه
    اعجبتني جدا اجاباتك
    تحياتي

    ReplyDelete
  5. يالى اوى التاج ده و مرعب اكييييييييد
    و بما انى مش بحب الصحرا ولا بحب الاسود و التماسيح
    بس هضطر اقبل التاج علشان خاطرك يا احمد يا سمير و ربنا يستر
    اجاباتك لذيذه جدا

    ReplyDelete
  6. هديه مقبوله يا سمير بس لو كانت رحلة سفارى مثلا كنت فى لحظه هناك انا وبيرو طبعا بس بالمنظر الغير مطمئن ده يبقى اسيب ابنى فى البيت يلعب بلعبه واغوص انا مع التاج وعليك خير

    بس قلى كل حاجه ظلمه معاك ليه الحصان اسود والمج مصدى اشمعنا دى حتى البقاء على الحياه فى ظروف زى دى مغامره حلوه

    ReplyDelete
  7. بس المهم انتا اخبارك ايه يا رب تكون بافضل حال

    ReplyDelete
  8. ههههههه
    ايه ياعم احمد فيلم ارعب ده والغابات
    ان شاء الله احل التاج قريب عشان لسه حليت تاج

    ReplyDelete
  9. هههههههه
    لا جامد التاج ده

    بس ده تاج تطلع منه على التاهيل المهنى عدل

    :)))))))

    سلامى

    ReplyDelete
  10. حمد الله ع السلامة ياعم الحاج
    صحرا وغابة
    دا انت اتكتبلك عمر جديد

    ReplyDelete
  11. والله ماكسفك ولا ارد هديتك ابدا
    عموما جو الغابات والصحرا لايق اوي علي المود الزفت اللي الواحد فيه
    كل اللي يجي منك سكر

    ReplyDelete
  12. ده ايه التاج اللى جاى من الصحراء ده يا احمد
    وبعدين مالها يعنى الصحراء دى حتى فيها قطط بريه جااااااااامدة
    حاسب بس وانت تايه منها احترس

    ReplyDelete
  13. bosbos:
    جاوبي يا بس بس و عيشي مع نفسك في الصحرا
    بس اوعي تتوهي
    تحيااااااتي

    ReplyDelete
  14. micheal:
    انت اساسا يا عم مايكل مووودك مش متضبط خالص اليومين دول
    قلت اخرجك من المووود دة بفيلم رعب
    تحيااااتي

    ReplyDelete
  15. Rehab Mustafa:
    انا برضة فاكر ان انا حليت التاج دة قبل كدة على انه اختبار نفسي
    تحيااااتي

    ReplyDelete
  16. ذو النون المصري:
    ماهو انت السبب يا باشا في التاج دة
    تاج عجيب فعلا
    تحيااااتي

    ReplyDelete
  17. Rania:
    هي ممكن جدا تكون الاجابات لذيذة فعلا
    بس دة علشان انا قاعد قدام الكومبيوتر
    انما اعتقد ان التاج دة لو في الواقع...هتبقى التصرفات بتاعتي مش لذيذة خالص
    تحيااااتي

    ReplyDelete
  18. Mahasen Saber:
    يعني عايزة جو صحرا وغابات ووحوش يا محاسن يبقى الموود عامل ايه
    اكيد الدنيا سودة ومصدية وحالتها حالة
    تحياااااتي

    ReplyDelete
  19. البنت المشمية:
    ربنا يزيد تاجاتك و يبارك
    تحياااتي

    ReplyDelete
  20. Shaymaa:
    انا اول ما خلصته..حددت ميعاد مع دكتور نفسي فورا
    تحياااتي

    ReplyDelete
  21. غمض عينيك:
    ربنا نجانا
    ربنا يعدينا منها على خير يا ولدي
    تحياتي

    ReplyDelete
  22. عاشقة وغلبانة:
    الله يكرمك يا فندم
    عيشي بقى مع التااج
    بالتوفيق
    تحياتي

    ReplyDelete
  23. Desert Cat:
    اااااااااااااااه
    انا نسيت ان انتي قطة الصحراء الشرسة
    معلش يا فندم على اقتحامنا لمملكتك
    يارب نكون ضيوف خفيفة
    تحياتي

    ReplyDelete
  24. Sharm:
    تاج صحراوي مرعب
    تحياااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails