Monday, 6 April 2009

نفسي ابقى رئيس مدينة



نفسي ابقى رئيس مدينة-اي مدينة- في مصر لمدة شهر واحد
مش عايز ابقى محافظ ولا وزير....مجرد رئيس مدينة...ومش عايز اقعد ع الكرسي مدى الحياة ولا حتى سنة او اثنين....مش عايز اكثر من شهر
شهر واحد رئيسا لأي مدينة مصرية سيكون كافيا جدا لتطبيق ما احلم به لأي مدينة في مصر وما اراه بديهيا وسهل التطبيق....وما اراه غريبا جدا الا يكون موجودا في الواقع
هو ليه مفيش رئيس مدينة بيأخد بعضه وينزل يلف في الشوارع يشوف مشاكلها بل مأسيها....دة انت شغلتك رئيس مدينة...يعني الشوارع هي شغلك الشاغل
ليه اي رئيس مدينة-مجرد رئيس مدينة- بيمارس عمله من مكتبه المكيف ؟اذا كانت مهام وظيفته هي الشـــــــارع؟
ليه رؤساء المدن ما بيشوفوش اكوام الزبالة اللي مالية كل الشوارع المصرية بلا استثناء؟
ليه مفيش رئيس مدينة اخد باله قبل كدة من المطبات والحفر و النقر اللي مالية شوارعنا؟
ليه كل واجهات العمارات والمباني في مدننا المصرية قذرة ومتربة وغير متناسقة وربما بالطوب الأحمر؟
ليه اي حد من حقه انه يقفل الشارع بالرمل والزلط لمجرد انه بيبني...وليذهب المارة للجحيم؟
ليه في كل انتخابات من حق اي حد انه يلصق دعايته في اي مكان ولتبقى بعد الانتخابات شاهدة على التخلف و التلوث البصري اللي احنا بنعيش فيه؟
ليه مفيش ولا رئيس مدينة في مصر قال لا للتشوه المعماري والتلوث البصري اللي كل مدن مصر بتعاني منه بلا استثناء؟
ليه رئيس المدينة-اي مدينة- مش معروف لعامة الناس؟ليه عايش في برج عاجي رغم ان وظيفته شعبية تتطلب الحياة وسط الجماهير ومتابعة مشاكلها والعمل على حلها؟
اتحدى اي حد انه يكون عارف اسم رئيس مدينته على الرغم الراجل دة المفروض انه مسئول عن كل ما يتعلف بمسكنك وشارعك ومرافقك الحيوية؟
ليه الفساد في المحليات للركب....ليه مفيش رادع للفساد دة؟
ليه معظم رؤساء المدن ورؤساء الأحياء في مصر عسكريون سابقون؟ هل هو منصب تكريمي لمن بلغوا سن التقاعد؟
واذا كانت تجربة العسكريين في المحليات قد اوصلت مدننا لهذه الدرجة من الفساد وانعدام الذوق يبقى ليه مصممين على تعيينهم؟
هو ليه مفيش حد بيحاسب حد؟؟؟
هي الناس دي مبسوطة بالفوضى والفساد والتخلف والزبالة اللي شوارعنا غرقانة فيها؟
في حاجة غلط اكيد

28 comments:

  1. تعرف انى شاغلنى نفس كلامك ده ولان عندنا المدينة بقت بشعة جدا ومعظم الشواع بقت متكسرة وفيها مطبات طبيعية وصناعية ولا تعرف عربيات تمشى فيها ولا حتى بنى آدمين شكلهم هيحبسونا فى بيوتنا
    بقالهم يجى سنتين مش عارفة بيغيروا شبكة المجارى او الصرف الصحى مش متذكرة وبدأوا بشارع شارع ولكن المفروض او الطبيعى انهم لما ينتهوا من شارع يرجعوا يرصفوه ولكن مش يستنوا لما يكسروا كل الشوارع ونبقى فى كارثة بجد بسبب ان العربيات ولا الناس عارفين يمشوا ولكن اللى بيحصل انهم بيبوظوا شارع ويدخلوا على اللى بعده وهكذا ووصلنا حاليا ان معظم الشواع بقت متكسرة وفيها حفر ومطبات ومحدش عارف يمشى فيها ومش عارفة كمان كام سنه بقى عما يرصفوا الشوارع يمكن بعد ما الناس تهاجر من المدينة علشان مش عارفين يمشوا فيها اصلا

    حاجة غريبة جدااااااااااااااا

    ReplyDelete
  2. السلام عليكم
    رؤساء المدن فعلا بينزلوا يلفوا بس وراء المحافظ يشفوه هو رايح فين ويسبقوه علشان يقدموا فروض الولاء والطاعة ويعرفوه انهم موجودين
    وطبعا مش كلهم لكن اكيد فى ناس عندها استعداد تشتغل ... ولكن اخى لابد ان نعترف ان سلوكياتنا ايضا لابد ان تتغير ونحاول نعمل عمليه تطهير فى سلوكياتنا وجرائمنا ضد شوارعنا ومرافقنا العامة
    ودى كلمة حق

    ReplyDelete
  3. بلدياتى بلدياتى بلدياتى الغالى جدا جا واخويا الصغير العزيز قوى قوى

    اسفه اولا على غيبتى الطويلهع عن الاغلبيه المخروصه ومش بمزاجها طبعا

    بص بئه يا سمير كان كان دهكان عندنا رئيس مدينه بيعمل وعمل كل التساؤلات اليى انتا سألتها دى
    وكمان كان بيجمل المدينه بالتبرعات وجهود اغنيائها من رجال الاعمال
    وتخيل ولك وحدك ان تتخيل انه مكملش بالشكل ده اكتر من اريع شهور فى الحدود دى خلا البلد فيها شبه جنه وبعدين
    بعدين اتنقل مكأفاتا ليه على جهوده دى

    والاشاعات المغرضه بتقول ان البلد اليى اتقلها طلباه من ناس فوق فوق قوى انه يرأس مدينتهم وطبعا طبعا احنا يا فلاحين بنصدق كل اليى بيتقال لينا

    بس يكفيه دعوات الناس اليى بياخدها لحد الان


    ومنور مدونتك والتدوين كله يا اخونا الغالى

    ReplyDelete
  4. الكراسي بتغير النفوس
    مش عارفه الناس دي بتقعد عليها ليه
    مش عارفه ماحش بيشوف شغله ويراعي ربنا ليه


    اه بالمناسبه
    هو ايمن نور طلق جميله اسماعيل
    بمناسبه الصوره اللي في الجنب
    اصلي خلاص اتلخبطت

    ReplyDelete
  5. تحياتي اخي العزيز


    اولا فكرة شهر او ستة اشهر...غير كافبة اطلاقا...لان الامر ليس بهذه السهولة....حضرتك عايز 3 سنوات حتي تري ان بعض من احلامك قد تحقق.

    ثانيا...المسؤول لا يتجول لان طبيعة العمل البيروقراطي
    و حتمية توقيعه علي كل ورقة او كتاب وخلافة قد تعوق ذلك....

    ثالثا لدينا قصور في مفهوم العمل العام و الموظف العام...لان عمله لا بد الا يرتبط بمواعيد محدده...يعني
    مثلا ممكن الا يكون هناك عطلة نهاية اسبوع للمسؤول..
    و ايضا ممكن ان يعمل اكثر من ساعات العمل المحددة.

    رابعا...العسكريون كانوا و مازالوا الغالببة في رؤساء المدن و الاحياء....و في رأيي ان هذا خطأ...
    بل انهم تسللوا الي الوظائف المدنية الاخري فتري مثلا
    لواء سابق يعمل مديرا عاما للشؤون الادارية باحدي الجامعات و هذا حقيقي و ليس خيال.

    خامسا... الفساد للركب لانه لايوجد نظام دقيق للعمل
    مستخلص من قانون يبتر الفاسد..

    تحياتي و تقديري اخي العزيز

    ReplyDelete
  6. ممكن تاخدنى معاك لو سمحت لو بقيت يعنى
    بص على فكره فيه عيب فينا انا منيله جيرانى اللى فىالعماره التانيه علشان بترمى الكيس بتاع الزباله من البلكونه وانا قفشتها فى مره وكنت همد ايديى اجيبها من البلكونه على الرغم ان بينا اكتر من خمستاشر متر
    ومن ساعتها حرمت هى كده بتكون ساعات البلاوى يا احمد ممنا ومن الحكومه يعنى المفروض تعاون وساعات الناس بتشوف الزباله ومبتروحش تبلغ ولا تقول بس

    ReplyDelete
  7. بناء على تجربة الاخت محاسن ..اعتقد انه يصدق قول رسول الله صلى الله عليه وسلم:الخير فى وفى امتى الى يوم الدين
    وكل املى ان يقعد كل مسئول فى منصبه 6 اشهر تحت الاختبار..بس قولى مين هايقيم نجاح هذا المسؤول
    اذا كان اللى نجح فى مكان استخسروه فيهم
    بدل مايكون قدوه لغيره..ويكون هناك مئات زيه..لا خادوه وخبوه وخافو عليه من الحسد
    ربنا معاك ويوفقك ويعطيك ويعطى مصر ماتستحقه من رجال مثلك

    ReplyDelete
  8. سلام عليكحم

    عمر شهر و لا حتى سنة هتكفى

    القصة مش قصة زبالة
    قصة الناس اللى بترمى الزبالة

    و قصة مسئولين النضافة اللى بيلموا الزبالة

    ده مش يأس و لكن قراءة للواقع

    القصة قصة تربية شعب حتى يكون مؤهل للتغيير
    مش واحد بس اللى بغير

    ====
    شرفت جدا بمدونتك
    حقيقة رائعة

    و ايضا اتمنى أن نكون أصدقاء
    و ده اميلى
    لو حضرتك تضيفنى و نكون أصدقاء دا شىء يشرفنى

    drhaz_online@yahoo.com

    ReplyDelete
  9. الفساد وحش
    اى محافظ معدتش همه دلوقت انه يدور على نظافه او مصلحه مدنيته بقى بيدور هيطلع بكام لحد ما يخرج منها
    للاسف دة بقى واقع و اتمنى اتمنى التغيير القريب


    تحياتى

    ReplyDelete
  10. اعتقد انك لو مسكت رئيس مدينه .. مش هتستمر لمدة شهر ابدااا .. لأنك هتترفد من منصبك من اول اسبوع .
    وده بسبب ان هتكلف الوزارة مبالغ طائله .. وفى الحالة دى مش هيقدروا يكسبوا حاجه من وظيفتهم .

    وطبعا هتكون مشكله كبيرة ليهم ..

    ومن رأيى ان الناس لو شافت الماكن اللى هى فيه نظيف دايما خلاص هتستحرم ترمى حاجه .. ده الطبيعى طبعا . والمختلفين مش هما القاعده .
    يعنى لو فى مجموعة فعلا هى اللى بتشوه مكانها .. يبقى مش الكل كده ..

    وبصراحه بتمنى انك تستلم الوظيفه الجديده .. بس يارب تكمل فيها شهر واحد ..

    قول امين :)

    تحيتى لك ولموضوعك المميز كما أعتادنا منك دائما .

    ReplyDelete
  11. نفس نظام رؤساء الإتحادات الرياضية لما يقطعوا في بعض ويقولك ده عمل تطوعي في الاخر بدون أجر
    :)
    هو ده حال العمل العام في مصر عموما

    ReplyDelete
  12. ههههههههههههههههههه
    والله انتا طيب اوى يا احمد
    بس خلاص

    ReplyDelete
  13. هو في الحقيقة مقالك ده بينطبق على قيادات كتيرة مش رؤساء المدن وبس

    من الملفت جدا جدا جدا للنظر في مصر حاجة إسمها سياسة الوش المكشوف أو البجاحة

    يعني المسؤل من دول تقوله عالمشكلة في وشه وتلاقي ما عندوش دم .. وكأن مافيش حاجة .. ولا فيه كسوف ولا أي حاجة

    سبحان الله

    ReplyDelete
  14. bosbos:
    لا يا بس بس
    بالنسبة للحفر فدة علشان الكنز اللي بيدوروا عليه من سنيـــــن تحت الارض ومش لاقيينه
    اما المطبات والتسير والذي منه فدة علشان الاخوة الصنايعية ياكلوا عيش
    مفيـــــــــش فايدة

    ReplyDelete
  15. بس خلاص:
    ماهي قضية سلوكياتنا دي بتفكرني بالضبط بقضية البيضة والفرخة
    يعني الشوارع تبقى نضيفة الاول وبعدين احنا نبطل نرمي ولا نبطل نرمي فاتبقى الشوارع نضيفة؟؟؟
    تحيااااتي

    ReplyDelete
  16. mahasen saber:
    محاسن ازيك؟؟
    مش هاقدر اقول اختي الكبيرة قوي قوي قوي علشان كدة ممكن حد يفتكرك انك بتلعبي في الثمانينات من العمر
    طبعا الشرقية طول عمرها معمل اختبار للأكابر في القاهرة
    اي حد يبزغ نجمه كدة ويشم نفسه تلاقيه اتسحب فورا على القاهرة وليذهب الفلاحين للجحيم
    حاجة تقرف بجد
    تحيااااتي

    ReplyDelete
  17. عاشقة وغلبانة:
    الكراسي مش بتغير لنفوس ولا حاجة
    هم معظمهم اصلا مش مؤهلين للمناصب اللي بيحتلوها
    الرجل الغير مناسب في المكان الغير مناسب
    تحياتي

    ReplyDelete
  18. الربان:
    والله انا شايف ان الاصلاح سهل جدا...شهر واحد كفيل بالبدء في ازالة الافتات المشوهة وتنظيف الشوارع ورصفها
    تكفي البداية...مجرد البداية مش عايزين غيرها
    اما عن العسكريين فلقد احتلوا جميع الوظائف المدنية تقريبا
    بيعتبروها تكريم لهم بعد المعاش
    ماهي بلدهم وهم حرين فيها
    تحياتي

    ReplyDelete
  19. Appy:
    ماهي لو الناس شايفة الدنيا نظيفة ماحدش هيوسخها
    انما الفكرة ان الناس شايفة اصلا الشوارع في حالة مذرية
    فبيزيدوا الطين بلة
    تحياتي

    ReplyDelete
  20. ماما:
    الف شكر يا فندم على الكلام الجميل دة اللي اكيد لا استحقه
    تحياااتي

    ReplyDelete
  21. Adam El-Mahdy:
    انا اللي ازددت شرفا
    اهلا بك في اي وقت
    واتمنى ان تشرفني بالزيارة مستقبلا
    تحياااتي

    ReplyDelete
  22. RANIA:
    طيب تفتكري حظنا كدة؟
    و لا سوء اختيار من المسئول؟
    ولا ايه؟
    تحياااتي

    ReplyDelete
  23. بص رئيس مدينه ده او رئيس حى هتلاقيه مراته اصلا وعياله بيرموا فى الشارع وهو كمان فا ماتنتظرش من حد اصلا مش نظيف انه ينظف المنطقه اللى هو ماسكها
    لو بجد نفسك تحقق ده ابداء بالعماره اللى انت ساكن فيها واللى اهلك ساكنين فيها اتفق معاهم انهم يلموا بعض ويلموا حاولين البيت عندهم واللى له صحاب فى العماره اللى جنبه يعمل كده وهتلاقى حاجه حاجه ابتدات الحياة تبقى احسن يلموا من بعض ويتشروا صندوق كبير يرموا فيه الفضلات بتاعتهم حاجه حاجه ابداء بنفسك زى مابيقوله يااحمد

    ReplyDelete
  24. ضي القمر:
    طب يدونا فرصتنا شوية
    شهر...سنة...سنتين
    المهم ناخد الفرصة
    الف شكر على كلامك الجميل دة
    تحياتي

    ReplyDelete
  25. micheal:
    قصدك هي دي مصر المنكووووبة بناسها
    تحيااااتي

    ReplyDelete
  26. البنت المشمشية:
    اهي احلاااااااااااااام
    هي الاحلام بفلوووووووس؟
    تحياااااااااتي

    ReplyDelete
  27. يا مراكبي
    ياااااااااااااااااه
    كسوف؟؟؟؟
    يعني ايه؟؟؟؟
    من زمان ماسمعتش الكلمة دي
    دي من مخلفات الزمن الجميل

    ReplyDelete
  28. merooooooo:
    كلام جميل يا ميرو
    بس الموضوع اكبر من كدة كتير
    في ناس لازم يتعاملوا بالشدة
    يعني النظافة بالامر
    ممكن انا او انتي نحافظ على نظافة المكان انما في ناس تانية مابيجوش بالذوق
    لازم النظافة بقوة القانون
    تحياااااتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails