Sunday, 15 March 2009

استاذ حمرة


الأستاذ/حمرة مابيضيعش وقته
هيضيع فلوسه في شوية كلام فارغ "اوقف المخدرات.....غير حياتك" ما بيأكلش عيش؟
قرر يستفيد بقاعدة 1*2 واستغل المساحة المتبقية في اللوحة في وضع صورة للسيد الرئيس راعي المصريين وابوهم الروحي
ولم ينس ان يبعث الينا بتحياته
وبكدة ادت (اليافطة) الغرض الرئيسي منها
وهو وضع صورة السيد الرئيس وتحتها تحيات واضع صورة السيد الرئيس
وطبعا التحيات دي مش موجهة لي او لك انما الى من يهمهم امر وضع صورة السيد الرئيس على (يافطة) كبيرة في طريق عام رئيسي
لتنضم (اللوحة) دي الى اخواتها من ملايين (اليفط) و(اللوحات) في شوارع المحروسة من شرقها لغربها لشمالها لجنوبها تؤيد وتبايع وتبارك وتساند وتؤازر وتشكر السيد الرئيس
لوحة عجيبة جدا بمدينة بلبيس بالشرقية
شفت يفط قليل وكتير....وصور للسيد الرئيس ماتعدش...واعلانات مبايعة وتأييد على كل لون
بس (اللوحة ) دي مختلفة
مثال فج ومستفز لوضع صورة رئيس الجمهورية على اي حاجة والسلام حتى لو مالوش ادنى علاقة بالكلام اللي في اللوحة
فحملة (اوقف المخدرات....غير حياتك) هي حملة ابتكرها عمرو خالد لحماية الشباب العربي من افة المخدرات برعاية بعض الهيئات كالأمم المتحدة وشرطة دبي وغيرهما
لم يكن السيد رئيس الجمهورية احد الرعاة للحملة ولا الأستاذ/حمرة كان احد المساهمين في انجاح الحملة
ولكن لأن ركوب الموجة عادة مصرية اصيلة...فلقد قرر الأستاذ/حمرة ان يستفيد من جميع الاطراف....من شعبية عمرو خالد بوضع ملصق لحملته على (لوحة اعلانات كبيرة) بشارع رئيسي وطبعا علشان (الرضا السامي) قرر سيادته وضع صورة رئيس الجمهورية على الحملة
مع تحياته
الصورة دي يمكن تلخيصها في كلمتين
فوضى النفاق

24 comments:

  1. يا عم أحمد فيه قاعدة يعرفها أصحاب الدعايات إن اللوحة اللي عليها صورة الرئيس لا تتعرض لها المرافق بالإزالة

    وبكدة يضمن لها الحماية من الإزالة

    ReplyDelete
  2. دع الخلق للخالق واللوحات للطريق يا بلديا

    ReplyDelete
  3. يعني هي جت علي الاستاذ حمره .. ما الجنين في بطن امه بينافق في البلد دي
    بس سؤال
    هي ايه اللي حمرا ؟؟؟

    ReplyDelete
  4. لأ دي ثلاثة في واحد
    غير حياتك ولا للمخدرات والسيد الرئيس أطال الله بقائه

    :))))))))))))

    ReplyDelete
  5. ههههههههههههههههه
    هما يبنى المصريين كدة
    بيحبو ينافقو وبكدبو
    تحية منى للريس

    ReplyDelete
  6. فوضى النفاق والفهلوة
    ماهو بيحاول يكسب من كل ناحيه ولو انى مش عارفه هيكسب ايه

    ReplyDelete
  7. يعني مالقاش غير أستاذ عمرو خالد اللى الحكومة حاربته و لسة بتحاربه لمجردانه عايز يعمل نهضة و يفوق الشباب
    بجد ربنا يرحمنا من النفاق و حرقة الدم
    أسوء ما فينا صفتين
    الخوف و النفاق
    فكرتني بالراجل اللى كان كاتم
    نعم لمبارك و ابن مبارك و ابن ابن مبارك
    :)))))))
    تحياتي
    لك الله يا مصر

    ReplyDelete
  8. بالعكس, انا ارى روابط مباشرة وواضحة, بين مبارك وبين أنتشار المخدرات فى مصر

    ReplyDelete
  9. مش هقول غير حاجة واحدة بس
    حمرة يا أستاذ حمرة
    محمد مشهور

    ReplyDelete
  10. انت بس مفهمتش صح هو تبع حزب كفايه وعاوز الشعب يقول كفايه للمهرب الكبير:))

    ReplyDelete
  11. و ممكن الصورة تتفهم بشكل تاني
    انه بيوجه كلامه لسنسن
    بيقوله كفاية ضرب كله بقى و غير حياتك علشان نرتاح منك
    رسالة مبطنه بدل ما يقول :
    غور بقى جتكم البلاوي مليتو البلد

    ههههههه

    تحياتي

    ReplyDelete
  12. هي الناس دي مش ناوية تبطل عبادة الأصنام اللي هي لسه عايشة فيها
    :)

    ReplyDelete
  13. عصفور المدينة:
    بقى في الدنيا في حاجة كدة؟؟؟؟
    لا حول ولا قوة الا بالله
    تحياااااااتي

    ReplyDelete
  14. mahasen saber:
    بس هم يسيبوا البلد في حالها ويبطلوا النفاق المدمر دة
    ربنا يحرقهم
    تحياااااتي

    ReplyDelete
  15. عقل مهوي:
    المعنى في بطن الشاعر
    مشيها بطن الشاعر وخلاص

    ReplyDelete
  16. ياسر حسين:
    اهو كله بيوصل لهدف واحد
    النفاااااااق

    ReplyDelete
  17. البنت المشمشية حلوة بس شقية:
    وتحية على تحيتك لفخامته

    ReplyDelete
  18. shaymaa:
    هيكسب فلوس و نفوذ وتسلط وركوب على اكتاف الغلابة
    تحيااااتي

    ReplyDelete
  19. الحلم العربي:
    مش بس خوف ونفاق...دة احنا عيوبنا كتيــــــــر قوي
    بس كلها هي اللي موصلانا لكدة
    تحيااتي

    ReplyDelete
  20. حازم سويلم:
    ياااااااه
    دي لفة كبيرة قوي
    بس تصدق..الاحباط اللي احنا فيه دة يؤدي الى ماهو اسوأ من المخدرات بكتير
    ربنا يستر على البلد دة
    تحياااتي

    ReplyDelete
  21. محمد مشهورك
    ههههههه
    يا قليل الادب

    ReplyDelete
  22. سومة...مجنونة في بلد عاقل:
    ماعرفهاش يا باشا
    دي مجنونة
    هههههههه

    ReplyDelete
  23. كلبوزة لكن سمباتيك:
    يااااااااه
    تصدقي ماكنتش واخد بالي من الراجل الثوري المناضل دة
    دة لو كان قصده كدة فعلا كان زمانه مات من 20 سنة
    تحياااتي

    ReplyDelete
  24. micheal:
    تصدق
    احلى حاجة اتقالت في الموضوع دة

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails