Tuesday, 11 August 2009

عن (التسعينات)..أتحدث....الحلقة الأولى....الاعلام والموسيقى

مش عارف ليه الأيام دي بتيجي على بالي قوي سنوات التسعينات
1990-1999
سنوات التسعينات بالنسبة لي هي سنوات الصبا وبدايات الشباب
في 1990 كان عندي 11 سنة وفي 1999 كان عندي 20 سنة
وبالتالي الحقبة دي هي اللي شكلتني....هي اللي خلتني كدة (بخيري وشري)...بمحاسني وعيوبي..بنقاط ضعفي وقوتي
مش عارف ليه حاسس ان التسع سنوات اللي فاتوا (2000-2009) الحياة فيهم اتغيرت كتير قوي من حوالينا للدرجة اللي اصبحت حياة
التسعينات بالمقارنة بحياتنا دلوقتي هي حياة بدائية جدا بل وكوميدية كمان
و لأن حقبة التسعينات دي حقبة فعلا (عزيزة) عليا.....قررت ان اكتب عنها....اكتب عنها في معظم مجالات الحياة و دي الحلقة الأولى من مجموعة موضوعات تتناول هذه الحقبة
في بداية التسعينات كان التليفزيون هو القناة الاولى والثانية وكانت القناة الثالثة حديثة الانشاء
بس هو دة التليفزيون....لا دش و لا فضائيات ولا يحزنون
وحتى الاولى والثانية والثالثة ماكانوش بالشكل اللي هم عليه حاليا خاااااالص
كان تليفزيون ممل بكل ما تحمله الكلمة من معنى....وكان عشاق المسلسلات العربية لا يجدوا متعتهم الا من خلال موعدين فقط لا غير
مسلسل 12 وربع ظهرا ومسلسل 7 وربع مساءا على الاولى (المهم ان غالبا مسلسل 7 وربع دة ماكانش بيذاع في ميعاده علشان جلسة مجلس الشعب).....وبعد المسلسل برنامجي جولة الكاميرا ثم حديث الروح وبعدهم نشرة اخبار التاسعة ودمتم
اما الخميس والجمعة فطبعا ايام استثنائية....(اليوم المفتوح) على القناة الأولى وطبعا اليوم المفتوح يوم استثنائي....يتميز اليوم المفتوح بوجود حدث هام الثالثة عصرا
الفيلم العربي
وطبعا في زمن مافيهوش (روتانا سينما) ولا (روتانا زمان) ولا (ميلودي)..يبقى فيلم عربي على القناة الأولى في التليفزيون المصري حدث هام يحرص الجميع على متابعته
اما اذا كنت من عشاق الأفلام الأجنبية فالقناة الثانية تعرض عصرا فيلم اجنبي (غالبا قديم جدا) في الثالثة و عشر دقائق بعد نشرة الأخبار
طبعا على مدار سنوات التسعينات ظهرت القنوات المحلية تباعا (الرابعة والخامسة والسادسة والسابعة والثامنة)...ويا سلااااااااام على الرفاهية اللي الواحد كان بيحس بيها و هو ماسك الريموت كنترول كدة وعمال يقلب بين القنوات بقى بشرط طبعا جودة الأريال بتاع سيادتك لأن قنوات لبنان واسرائيل ايامها -خاصة صيفا-ماكانتش بترحم وكانت بتبوظ ارسال القنوات المصرية وبتصبح الشاشة خليط ما بين المشاهد المصرية و الاصوات اللبنانية او الاسرائيلية او العكس
والغريب اني دائما كنت اسأل
اشمعنى قنواتهم هي اللي بتدخل على قنواتنا وتبوظ لنا ارسالنا؟؟وليه مش العكس؟؟؟
ولحد دلوقتي ماحدش جاوبني
طبعا اذا كنت من هواة الأغنيات المصورة (الفيديو كليب)...وطبعا مجازا ممكن نسمي اغنيات الفترة دي (فيديو كليب)....فما عليك الا ان تتابع (اماني واغاني) الساعة 2 ظهرا على القناة الأولى تقديم احمد مختار (مش عارف اختفى فين؟) و جميلة اسماعيل (اتجهت للسياسة)غصبا واقتدارا
وطبعا لو اي شاب او فتاة من ابناء (ميلودي) و (مزيكا) اتكعبل في اي حلقة مسجلة من حلقات (اماني و اغاني) ممكن جدا تجيله صدمة عصبية وتشنجات وتهتك في الغشاء البريتوني لو قارن بين كليبات 90 وكليبات 2009
في بداية التسعينات كانت اروش اغنية مصورة (فيديوكليب) ممكن تتفرج عليها هي (هياها) للفنان محمد ثروت...او (ولو) للفنان مدحت صالح
ثم تطورت الاغنيات بظهور (ساكن) لديانا حداد و (ويلوموني) لعمرو دياب - واللي كانت طفرة ايامها في صناعة الفيديو كليب- وفي نهاية التسعينات ظهرت اغنيات زي (يا ليلة) لهشام عباس و(عودوني) لعمرو دياب
لو كنت من متابعي القناة الرابعة اكيد هتفتكر (معاك ع الخط) واللي برضة كان متنفس مهم لعشاق الفيديو كليب في منتصف التسعينات تقديم علاء وحيد (اتجه للكورة......سنة الحياة بقى)....و لو كنت بتتابع القناة الخامسة اكيد هتفتكر (طلباتك اوامر) لدعاء عبد المجيد (اختفت تماما) بأختفاء القناة الخامسة هي الاخرى
طبعا مين يقدر ينسى برامج لا تعمل ولا هيتعمل زيها (رغم ضعف الأمكانات وقتها بالمقارنة ببرامج الايام دي).....مين ينسى (العلم والايمان) للدكتور مصطفى محمود....ولا (جولة الكاميرا) لهند ابو السعود ...مين يقدر ينسى (رئيس التحرير) لحمدي قنديل و لا (نادي السينما) للدكتورة درية شرف الدين (تم الغاؤه مؤخرا) ...مين يقدر ينسى (مازنجر) و(كعبول) ولا اهداف (الكابتن ماجد) اللي اكلت دماغ العيال ايامها
لسة لحد دلوقتي كل يوم جمعة عصرا بأفتكر (الشيخ الشعراوي) وافتكر ايامها قد ايه كنت باتغاظ منه علشان بأبقى مستني الماتش بعده وعايزه يخلص بسرعة بقى علشان الماتش ييجي بسرعة (الماتشات كانت بتتلعب عصرا) مش زي اليومين دول بتلعب في عز الثلج
بداية التسعينات شهدت انطلاقة (صباح الخير يا مصر)...واللي ايامه كان برنامج بجد....له شنة ورنة (زي البيت بيتك الأيام دي)...وكان الخبر يبقى صحيح لو اتكتب في الاهرام او اتقال في (صباح الخير يا مصر)....سبحان الله....دنيا
اما اذا كنت من هواة الاعلانات التليفزيونية ف(طارف نور) يعتبر هو نجم المرحلة بلا منازع...فكل اعلانات التسعينات المميزة عليها بصمة (طارق نور) المميزة
مين فينا ممكن ينسى اعلان (محمود ايه دة يا محمود).....ولا (رايب جهينة).......وغيرها
مين يقدر ينسى اعلانات (الشمعدان)...واللي كان المنتج الاول في مصر خلال النصف الاول من التسعينات
اما النصف الثاني من التسعينات فشهد سيل من اعلانات (السمن الصناعي) والزيوت المهدرجة مع اختفاء تدريجي لاعلانات الشمعدان وبم بم ومختلف المنتجات الغذائية الاخرى
بس الحقيقة على الرغم من ضعف الامكانيات وقلة عدد القنوات التليفزيونية الا ان اعظم ما تم انتاجه من الدراما التليفزيونية تم انتاجه خلال حقبة التسعينات
(رأفت الهجان).....(ليالي الحلمية)...(ذئاب الجبل)....(المال والبنون)....الخ
والغريب ان بعد ما امتلكنا قمرين صناعيين و حوالي 500 محطة فضائية على النايلسات...اصبحت الدراما التليفزيونية بلا لون ولا طعم ولا رائحة....مسلسلات ماسخة وبايخة
ازدهار الدراما التليفزيونية في التسعينات قابلها انحدار في مستوى سينما التسعينات مع ازدهار افلام المقاولات بشكل لم يسبق له مثيل من قبل خاصة النصف الاول من حقبة التسعينات
ولعل الجميع يتذكر او (لا يريد ان يتذكر) افلام (يوسف منصور) و (الشحات مبروك) وما كانت تحتويه على فن راق ورفيــــــــع
اما اغراء افلام التسعينات فحدث ولا حرج.....فمحبي افلام (الاغراء) واللقطات يدينون بكل الفضل لنادية الجندي ونبيلة عبيد والهام شاهين في اشباع هواياتهم من خلال افلام اقل ما يقال عنها انها (اسفــــــــــــــــــاف) شديد
اما النصف الثاني من التسعينات فكان اسعد حالا مع بداية هوجة افلام الكوميديا بباكورة انتاجها (اسماعيلية رايح جاي) والتي مازالت اثارها ممتدا حتى الان
ولكن افلام كوميدية بعضها مبتذل احسن حالا من افلام مقاولات واغراء كلها مبتذل

----------------------------
مجرد رصد سريع غير متخصص ولا متعمق لبعض احوالنا في حقبة (التسعينات) من القرن الماضي
علنا نقارن بين احوالنا في العشر سنوات الاولى م الالفية و العشر سنوات الاخيرة من القرن الماضي
ربما تطورنا للافضل....ربما انحدرنا للأسفل...ربما ظللنا في مكاننا
الحكم لك
سيتم الرصد من خلال حلقات خشية الأطالة
الحلقة الاولى: الاعلام والموسيقى
الحلقة الثانية: وسائل الاتصال
الحلقة الثالثة: الرياضة في التسعينات
الحلقة الرابعة: التعليم في التسعينات

26 comments:

  1. يااااااااااااااااااااااااااه بوست رااااااااااااااائع جدا يا أحمد فكرتنى بأيام يا خبر عليك بجد

    أنا سنه 90 كان عندى 7 سنين و99 طبعا 16
    بس برضة الفترة دى أثرت فيا جامد لأن بعدها حصل أنقلاب غريب فى كل حاجة

    مستنية كل حكاياتك

    ReplyDelete
  2. و لله يا أحمد فكرتنا بالذى مضى
    الفترة دى كنت ف الجامعة و ما بعدها ...
    بفكر أنافس سعادتك ببوست عن حقبة التمانينات بقى
    بس غالبا هقف لوحدى ف الطل
    و مفيش غير نفر قليل اللى هيقولى أيوه ... فاكرين
    إنتا حادف على الماضى ليه الايام دى ؟؟
    و سطورك مستخبى فيها شوية شجن ..
    إنتا كويس يا أحمد و أنا قلبى متوغوش عليك غلط ؟!!
    يا ريت تطمنى ..
    كل الود ليك

    ReplyDelete
  3. heyyyyyyyyyyyyyy
    ازيك...اشتقتلك كتير
    وحشتنى مدونتك بجد موضوع جميل جدا
    عجبنى اوى سرد افكارك من القناة الاولى للتانية وافتتاح القنوات الجديدة اللى هيا التالتة والرابعة وعلى فكرة اما انت كان عندك 11 سنة كنت انا لسة متولدتش اساسا
    واما كان عندك 20 كان عندى انا 7 سنين تخيل؟؟
    بجد موضوع جميل جدا ومستنين بقيت الحلقات
    كل سنة وانت بخير
    تحياتى

    ReplyDelete
  4. السلام عليكم ورحمة الله وبركاته

    ياااااه رجعتنا لزمان

    ايامها كنت في الثانوية والجامعه

    مش عارف ليه حاسه ان الحاجات زمان كانت ليها رونق وطعم احلي من دلوقتي كل الحاجات مش ب المسلسلات والبرامج

    واوعي تنسي

    الشمعدان زي ما بتحبه بيحبك كمان
    ههههههههههههههههههههه

    ReplyDelete
  5. على فكرة يا دكتور الشخ الشعرواى بعد صلاة الجمعه مش كان بيجى دايما ماتش كان غالبا بيكون فيلم عربى لاسماعيل ياسين
    :))
    اما بقى امانى واغانى فده كان حكاية كنت بموت فى احمد مختار وهو صغنون كدا
    كان فى برضه برنامج تانى لجميلة اسماعيل بيجى الصبح على القناة التانية كان اسمع شوارع لها تاريخ
    وكانت بتتجول فيه فى شوارع مصر القديمة وحى الازهر والحسين والدراسة وتتكلم عن نبذة تاريخية عن اسم الشارع اللى هى موجودة فيه مع استضافه شاهد عيان يعنى راجل او ست كبيرة شهدوا تطور التاريخ على الشارع ده وزمان كان موجود فيه ايه وايه مميزاته وايه اللى اختلف دلوقتى
    اييييييه
    كانت ايام وعدت

    ReplyDelete
  6. ياااااه فكرتنا بأيام جميلة والله

    مش هاتتنسي أبدا

    منذر

    ReplyDelete
  7. ألا ليت الشباب يعود يوما :)))))
    انا فاكرة سنة 1990 دي كان عندي 8 سنين و كانت حدث جلل ان سنة 1990 جت و فاكرة ليلتها قعدنا انا و اخويا ماسكين النتايج الجديدة و فرحانين بيها قوي هههههههه
    نسيت تقول على عمو فؤاد و بوجي و طمطم و بوابة الحلواني المسلسل ده كنت بحبه قوي و كمان فوازير نيللى و شريهان
    بجد كانت ايام حلوة الله يرحمها و يبارك لنا في الايام الجاية
    ماهو النهاردة هيبقى ذكرى لبكرة بردو فلازم نعمل فيه حاجة حلوة علشان نبقى نفتكرها لبكرة إن شاء الله

    ReplyDelete
  8. السلام عليكم

    ازيك ياصاحبى اخبارك اية

    كل سنة وانت طيب

    رمضان كريم

    مع خالص تحياتى

    ReplyDelete
  9. كل عام وانت بخير
    بلغك الله الشهر
    وعظم لك فى الاجر

    ReplyDelete
  10. في إنتظار الجزء الثاني

    ReplyDelete
  11. bosbos:
    كانت ايام جميلة يا بس بس
    مش عارف بحن للأيام دي جدا

    ReplyDelete
  12. فاتيما
    الف شكر ليكي على السؤال
    مفيش اي شجن ولا حاجة بقدر ما هو حنين الى فترات الصبا و الشباب الاولى
    الفترة دي كنت لسه بتشكل و عقلي بيتكون بخيره وشره
    فترة كانت فعلا بسيطة في دوشتها و صخبها و تكنولوجيتها
    تحياتي و كل سنة و انتي طيبة

    ReplyDelete
  13. hossam:
    كل سنة وانت طيب يا حسام
    مش عارف اقوللك انت محظوظ ولا سيء الحظ علشام ماعشتش الايام دي بشكل اكثر ادراكا ووعيا
    بس اكيد ان شاء الله في 2020 هتقول دي سنة 2009 دي كنا بدائيين قوي
    تحياتي

    ReplyDelete
  14. البنت المشمية حلوة بس شقية:
    الأتي احلى و اجمل ان شاء الله
    كل سنة و انتي طيبة

    ReplyDelete
  15. خمسة
    فضفضة:
    حد ينسى الشمعدان برضة؟؟؟؟
    ولا شاي القويري نزل السوق.....يبقى المزاج على طول هيروق
    ياااااااااااااه
    كانت ايام

    ReplyDelete
  16. desert cat:
    انا باعتبرها كانت اجمل ايام و عدت
    مش بس ايام
    بس ياترى ممكن ترجع تاني؟؟
    انا لا اعتقد
    تحياتي و احتراماتي

    ReplyDelete
  17. منذر:
    ازيك يا منذر؟
    كل سنة و انت طيب
    لسة برضة مش عارف تعلق بالاكونت بتاعك؟
    حاجة عجيبة جداا
    تحياتي

    ReplyDelete
  18. الحلم العربي:
    لازم انسى طبعا حاجات كتير
    سنوات التسعينات دي رغم بساطتها بالمقارنة بالألفية الا انها مليئة بالاشياء و الاحداث
    تحياتي

    ReplyDelete
  19. Tamer Nabil:
    انت اللي فينك يا تامر باشا و اخبارك ايه؟
    كل سنة و انت طيب
    و رمضان كريم

    ReplyDelete
  20. سبهلله:
    امين يارب العالمين
    رمضان كريم

    ReplyDelete
  21. Michael:
    الجزء الثاني هو اللي في انتظار تعليقك
    تحياااتي

    ReplyDelete
  22. أنتى نسيت الراديو كمان كان حاجة حنان برامج اعترافات ليلة وعمار الشريعى وغيره من برنامج على البرنامج العام يدقدم علماء التاريخ الااسلامى

    ReplyDelete
  23. احلى ايام الصبا والبال الرايق ومفيش هموم ولا مسئوليات رغم انى كنت وقتها مش بحب المدرسة عشان الاستاذ كان بيضربنى عشان جدول الضرب كت ضربة

    ReplyDelete
  24. احلى ايام الصبا والبال الرايق ومفيش هموم ولا مسئوليات رغم انى كنت وقتها مش بحب المدرسة عشان الاستاذ كان بيضربنى عشان جدول الضرب كت ضربة

    ReplyDelete
  25. هشام محمد والله احلى ايام ايييييييييه يازمن الزمن دموع بتجرى او ضحكة ملهاش اى معنى او لعبة ملناش يد فيها مهما اتشأمنا او اتفألنا 20 سنة عدو كأنهم سراب كتب حكايته على الوجوة والم فى كل ضحكة وساب علاماته الحزينة على طريقى من زمان

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails