Tuesday, 3 March 2009

صديقي (النصف متزمت).....وعمل المرأة


في حوار مع صديقي (النصف متزمت)....سألني سؤال تقليدي قديم
ايه رأيك في عمل المرأة؟؟
السؤال في حد ذاته ليس غريبا....فلقد قتل بحثا....وياما تناقشت مع اخرين في موضوع عمل المرأة دة
وكعادتي لما اسئل....تنتابني حالة من الحماس و السخونة في شرح وجهة نظري اللي اكيد هي الأصح (من وجهة نظري) برضة
فأنا من اشد المناصرين والمؤيدين بل (المحرضين) على عمل المرأة
وانا دائما ارى ان امرأة لا تعمل هي امرأة (عطلانة) او (فاضية) ويا ويله يا سواد ليله اللي تتواجد في حياته امرأة (فاضية) هتبقى ليلته غامقة ومش باين لها ملامح
فزوجة فاضية.....شغلتها في الحياة هي زوجها وبيتها.....يعني (دماغ فاضية)...ولما تبقى دماغ الست فاضية يبقى اكيد هييجي وقت تحتاج تملأها....وغالبا دة الوقت اللي بيكون فيه زوجها عائدا الى منزله منهك القوى ومحطم القدرات ومش عارف يشيل دماغه على رقبته من الصداع
فبيحصل ان الزوج بيبقى مش عايز اي حاجة من الدنيا غير انه ينام....بينما الهانم طبعا ساعتها بتبقى مش عايزة حاجة من الحياة غير انها ترغي....ترغي فقط لا غير
وطبعا بما انها تعاني من الفراغ يبقى اكيد الرغي ساعتها بيكون في (كلام فارغ) غالبا
وهنا امام الزوج حاجة من اتنين:
يا اما يترفق بها و يقدر حالة الفراغ والوحدة التي تعاني منها زوجته ويقرر الأستماع والغاء فكرة النوم....وساعتها لازم يستعين بقرص بانادول وكوباية شاي
يا اما يصمم على موقفه ويقرر انه هينام يعني هينام
و ساعتها هو وحظه وحسب نوع الزوجة:
لو كانت من النوع (الأليف) هتكتفي انها تصاب بالأحباط من سكات وتكتم حزنها في نفسها....ودة نادرا ما يحدث
او تكون من النوع الثاني (الزوجة المصرية التقليدية) اللي هتحلف ان عينه مش هتشوف النوم الليلة دي مع محاضرة طويلة عن انها طول النهار محبوسة في البيت و انها زهقت من حياتها و انها من حقها تخرج وتتفسح وتشوف الدنيا والناس ومع ذلك هي مقدرة انه بيتعب و بيشقى...بس هي برضة بني ادم ولازم يحس بيها....وساعتها هتبقى الليلة كوبية
غير كدة كمان فزوجة عاطلة عن العمل هي في الحقيقة (عقل) عاطل عن التطور...عن مواكبة المتغيرات الحياتية اليومية...عقلية (قديمة)..غير متطورة وغير قابلة لمواكبة تغيرات المجتمع
غير موضوع الفراغ دة برضة..انا رأيي ان الكفاءة ليس لها علاقة بالنوع سواء ذكر او انثى....وكثير من السيدات والبنات في شغلهن ب (100) رجل
وحرام نحرم المجتمع من كفاءات ومن عقول متطورة لمجرد ان (البيه) مش عايز المدام تنكشف على رجالة
غير كدة ان فكرة ان الرجل يخفي زوجته عن عيون الناس علشان جنابه بيغير عليها وخايف عليها من استفزازات و تحرشات الأخرين او زملائها في العمل انا اعتبره منطق في غاية الغرابة
لأن من المفترض ان الزوجة كائن ناضج مكتمل النمو والعقل وبالتالي صعب جدا في الزمن دة ان سيدة او فتاة يتم التغرير بها الا اذا كانت هي عايزة كدة فعلا
بعدما انتهيت من مرافعتي الحماسية ودفاعي المستميت عن عمل المرأة...نظرت الى صديقي (النصف متزمت) لأرى رد فعله بعدما ظننت انني طرحته ارضا بالضربة القاضية الفنية
اذ افاجأ به (مبتسما) ابتسامة الواثق قائلا:
ومين اللي قال لك اني معترض او (متحفظ) على عمل المرأة من منطلق الغيرة ؟
لا طبعا.........ولكني لي ادلتي ان الأسلام (لا يحبذ) عمل المرأة
هو الحقيقة لم يقل(يحرم) ولكنه معتقد بأن الأسلام (لا يميل) الى عمل المرأة
طيب ليه يا سيدي؟
صديقي (النصف متزمت) يرى ان الاسلام خلق الرجل ليشقى.....اي ان الشقاء صفة من صفات الرجل وليس المرأة
والدليل على ذلك ان الله سبحانه وتعالى عندما خاطب ادم قائلا
"فقلنا يا ادم ان هذا عدو لك ولزوجك فلا يخرجنكما من الجنة فتشقى"
طه 117
فلقد قال سبحانه وتعالى (فتشقى) ولم يقل -عز من قائل- فتشقيا
وبالتالي فلقد خاطب سبحانه وتعالى الرجل ولم يخاطب الأثنين وبالتالي فالشقاء مقصورا على الرجل وبالتالي لابد ان يكون العمل خاص بالرجل
انا طبعا ذهلت...هأقول ايه يعني
مش كدة وبس...لا دة ضديقي اياه لحقني بضربة اخرى في الصميم وبرضة من القرأن الكريم
من سورة القصص
" ولما ورد ماء مدين وجد عليه امة من الناس يسقون ووجد من دونهم امرأتين تزودان قال ما خطبكما قالتا لا نسقي حتى يصدر الرعاء وابونا شيخ كبير"
القصص 23
اي لا نسقي حتى يسقي الرجال وابونا شيخ كبير
والهدف من "ابونا شيخ كبير" في هذا الموضع اي ان السقاء من عمل الرجال وانما اضطرتا ان تفعلا ذلك بدلا من ابيهما حيث انه شيخ كبير لا يقوى على ذلك
وهذا موضع اخر يثبت ان العمل والشقاء من اختصاص الرجل وليس المرأة الا للضرورة القصوى
غير كدة فصديقي يرى ان اي فرصة عمل تحتلها اي سيدة او فتاة....اليس من الاولى ان يحتلها رجل لتعينه على ان يفتح بيت
و هو يرى ان عمل المرأة سبب رئيسي من اسباب البطالة التي يعاني منها عدد لا بأس به من الشباب
الرجل كلامه منطقي الى حد بعيد الا ان الحوار دة (كعادة معظم حواراتنا) لم يسفر عن شيء
فلا هو اقتنع بكفائة المرأة ككائن له الحق في العمل والانتاج....ولا انا غيرت رأيي واقتنعت بأن البنت مسيرها لبيت جوزها
وتفرق كلا منا الى حال سبيله

36 comments:

  1. لا أحبذ -إن كان لى أنا كمان ألاّ أحبّذ كما يصف صديقك موقف الإسلام من عمل المرأه- التعاطى مع هذه المواقف من منظور دينى يحتكر صاحبه الرأى و الرؤيه و يسبغ على موقفه شكل دينى لمجرّد إفحام محدّثه ..

    أنا فى غاية الاندهاش من الربط بين آية الخروج من الجنّه و من ثمّ الشقاء و بين العمل !! إذ أليس الخروج من الجنّه فى حد ذاته شقاء و هو ما أتخيّل أنّه المقصود !! و هل يعقل أن يكون المقصود هو فقط الشقاء بالمسئوليه عن العمل فى الدنيا فيفهم أحدهم أن النساء و على رأسهم أمّنا "حوّاء" لم تشقى بالخروج من الجنّه فى حد ذاته و إنّما شقاءها سيكون لو عملت بعد النزول إلى الأرض !! اسمح لى أرى هذا فهما شديييييييييييييييييييييييد السطحيه للآيه و الغرض منه هو لىّ عنق الآيات لخدمة فكرة المتحدّث ..

    وبعدين هو ليه نظر لهذه الآيه ولم ينظر لما حولها من آيات و يستنتج منها بنفس المنطق الغريب .. يعنى الآيه التاليه تقول "
    إن لك ألاّ تجوع فيها ولا تعرى" فهل قصر الخطاب على "آدم" معناه أن "حوّاء" من نصيبها الجوع و العرى !! ثمّ يقول الله "و أنّك لا تظمؤ فيها ولا تضحى" فهل من نصيب "آدم" الرىّ و الظل بينما من نصيب "حوّاء" -لأنّها لم تظهر فى الخطاب- العطش و الحر !! منطق عجيب الحقيقه

    الغريب أن صديقك يتحدّث عن عمل المرأه للضروره القصوى كأنّنا نعيش فى إحدى الدول الإسكندنافيه مثلا التى ينتحر الناس فيها من الملل و زيادة الرفاهيه و لسنا فى "مصر" و الأحوال الاقتصاديه معروفه للجميع ولا تمايز فى الفقر بين النساء و الرجال عشان نقول الرجل أولى بفرصة العمل و كأن الفقر يمنح المرأه معامله خاصه و يعفيها من عواقبه !! المرأه الفقيره يا عزيزى معاناتها فى مجتمعنا المحترم شديدة الوطأه و عواقبها جسيمه و كان الأحرى بمن يتحدّث من منطلق دينى أن يكون أحرص على أن يكون لها مصدر دخل كى لا تضطرّ -بعضهنّ- للانحراف تحت وطأة الحاجه !! و لا أفهم لماذا بعض من يشبهون صديقك الذين يريدون أن يسبغوا لونا دينيا على آرائهم الهشّه يستشهدون بالإحصائيات -المغلوطه- حين يريدون مثلا الترويج لفكرة تعدّد الزواج بناء على زيادة عدد النساء على عدد الرجال ولا يفعلون المثل و ينظرون للإحصائيات التى تتحدّث عن عدد النساء المعيلات فى "مصر" قبل إطلاق نظرياتهم المستفزّه هذه و يعلمونا كيف يكون للرجل أفضليه على المرأه فى الحصول على فرصة عمل بينما نفس هذا الرجل الذى يريد الجميع أن يدللوه حتى دخوله القبر هو نفس الرجل الذى يتخلّى عن مسئولياته فى الإعاله و الإنفاق .. الذى يصلح للعمل يستحقه بصرف النظر عن نوعه و يكفى النساء استطاعتهم أداء وظائفهنّ داخل البيت و خارجه بشكل بطولى الأمر مش ناقص مزايدات و فكرة مسئولية عمل المرأه عن البطاله تجعل صاحبك مرشّحا بقوّه للعمل فى حكومة "نظيف" أو سابقيه أو لاحقيه لأنّه يقدّم للحكومات الفاشله الحل السحرى الذى يعلّقون عليه فشلهم فى حل أزمه خانقه لن يحلّها إقصاء النساء فى المنازل من أجل عيون بعض الفاشلين محدودى الهمّه ..

    ReplyDelete
  2. اول مره اتفق معاك ده مؤشر مش صحي ليه بس ما علينا
    بص يا سيدي رد على صديقك ده الرسول عليه الصلاه والسام كان متزوج السيده خديجه وكانت بتعمل فى التجاره زمان غير دلوقتى خالص دلوقتى كمان الراجل ميقدرش بجانب اللى انت قولته يتحمل البيت لوحده صدقنى مهما ان كان مرتبه ودخله ودي ببساطه جدا الست لها اعمال بتنفع فيها واعمال لا زي الراجل يعنى عمليه تكامل يا احمد

    ReplyDelete
  3. انتوا الاتنين ارائكو صح
    عجبني اوي لما قولت ان المرأه الغير عامله عاطله هو حقيقي بس مش كل الحالات
    في ستات بس مش بتشتغل بس ذكيه وبتعرف تواكب الحياه وتطورها وتعيش يومها بجد
    وفي ستات بتستسلم للروتين يخنقها ويخنق جوزها معاها
    رأي صديقك في بطاله الشباب صح جدا

    احنا بقينا في زمن المفروض صاحب الكفاءه يشتغل والكسول سواء راجل او ست يركن علي جنب

    ReplyDelete
  4. انا مع راى صديقك وياابى السيدة خديجة كانت بتدير مش بتعمل مجرد انها راس المال لكن مكنتش هى اللى بتخرج للتجارة العمل بالنسبة للمراة المفروض مش يكون مجال علشان تثبت نفسها وبس على حساب بيتها ولادها واى ست بتتشغل متقدرش تقول وبكل ثقة انها بتوفق بين الشغل والبيت لكن الشغل لازم يكون لضرورة ملحة

    ReplyDelete
  5. عزيزتى أيوشه

    لا أفهم سرّ التعميم فى حديثك حول النساء العاملات و أن مفيش واحده فيهم تقدر تقول ما قلتِ !! بعض النساء فاشلات -مثلما هناك رجال فاشلون- سواء خرجوا للعمل أو قرنَ فى بيوتهنّ و بعضهنّ ناجحات فى البيت و العمل على حد سواء .. الفكره أن هناك من يحتاج شمّاعه ليعلّق عليها خيبته و فشله زى اللىّ بيقول أن عمل النساء هو سبب البطاله رغم أن هناك رجال غيره يعملون بينما هو لم يحصل على وظيفه ربّما لأنّه سواء عملت النساء أم لم يعملن شخص اتّكالى عاوز يحصل على فرصة عمل من قلّة المتقدّمين للعمل و ليس عن استحقاق و جداره

    ReplyDelete
  6. عمل المرأة الحقيقي هو رعاية بيتها واطفالها وزوجها
    ولا توجد ست بيت عندها أطفال في مدارس فاضية للرغي
    هتلاقيها بتذاكر لهم وبتجهز لهم ملابسهم ولقمتهم
    أنا مع تعليم المرأة إلى أقصى حد ممكن من التعليم
    ولكن إذا خيرت بين الخروج للعمل ورعاية البيت والاسرة
    فأني أرجح البيت ، وألا تخرج المرأة غلى العمل إلا للضرورة القصوى
    كوفاة عائل الاسرة أو لتساعد زوجها في تحسين دخلهم من أجل الابناء

    ReplyDelete
  7. - المرأه التي تعمل يمكن ان يكون هناك نسبة اهمال في بيتها
    - المرأه التي لا تعمل يكون دماغها كلها في البيت وممكن تعقد الزوج
    صديقك عنده حق في موضوع ان شغل النساء ساهم في البطاله
    ودي فعلا حقيقه
    شغل البنات ساهم في البطاله وساهم في ازدياد العنوسه واصبح لدى النساء تطلعات غير طبيعيه ادت في النهايه الى قلة الزواج
    لكن مهما اتكلمنا
    اهي المرأه بتشتغل وخلاص

    ReplyDelete
  8. هرد عليك فى تدوييييييييينة عندى
    :D

    ReplyDelete
  9. هو لسه فى ناس بتفكر بالطريقة دى ؟؟؟
    البعض من الرجال ولن اقول الجميع يفضل المرأة العاملة .. لأ،ن خروجها واختلاطها بالمجتمع والعمل يقوى من ادراكها بما يدور حولها اما اللى قاعدة فى البيت تكلم الكرسى 24 ساعه اخرها جدران الغرفة
    كمان ربنا قال " الرجال قوامون على النساء بما أنفقوا " يعنى القوامة كمان ممكن تكون للمرأة لو زوجها متوفى وهى تعول اطفالها

    ReplyDelete
  10. بص يا أحمد أنا مع عمل المرآة مليون فى المية وفى خروجها وأحتكاكها بالمجتمع والناس ولان ده بيغير كتير فى اسلوب تفكيرها ونظرتها للحياه وانا عن نفسى ما اقدرش انكر انى لما اشتغلت بعد تخرجى اختلفت نظرتى فى حاجات كتير وبقى عندى خبرة فى حاجات كتيرة
    وانا برضة مع عمل المرأة بعد الزواج ولكن فى حالة أنها قادرة توفق بين بيتها وبين عملها بمعنى ما يكونش عملها سبب فى اهمالها لزوجها وبيتها لان ده هيعمل مشاكل كتيرة ولكن فى حالة انها قادرة توفق والزوج برضة متفاهم لطبيعة شغلها ومش معترض علية يبقى تشتغل ايه المانع

    ولكن انا عن نفسى بحب الشغل جدا وحاليا بشتغل طبعا ولكن فى حالة ارتباطى وزواجى بأى شخص هيكون بيتى وزوجى واولادى رقم واحد وبعد كده شغلى ولو لاقيت ان شغلى بيأثر على بيتى بالسلب ممكن اقلل من شغلى شوية ولو مقدرتش اوفق ممكن اسيبة حتى لو لفترة لحد ما ولادى مثلا يكونوا وصلوا لسن اقدر ساعتها اتابع شغلى وما اكونش قصرت فى حقهم ولا حق زوجى

    ReplyDelete
  11. سيبتلك رأيي ع الفيس توك
    تحياتي

    ReplyDelete
  12. حلو اوى الكلام ده
    انا طبعا مع انى اشتغل ويكونلى كارير محترم يدينى زى مابديله
    المهم انى لما اتجوز شغلى مياثرش "الكلمه دى انا حاسه ان فيها حاجه غلط" على بيتى وجوزى وولادى

    موضوع ان الشقا بقى من نصيب الراجل
    اه طبعا امال انت عايزنا نشقى معاكو ولا ايه
    ده بالرغم من اننا قدرتنا على التحمل اكبر بكتيير
    ده كفايه الشقى البيتى والحمل والولاده

    فى النهايه نطلع بانا عمل المراه مهم ليها اذا هيا حبت ده بشرط انه بعد الجواز ميبوظش حياتهاوالسلام عليكم ورحمه الله وبركاته
    :))

    ReplyDelete
  13. نسيبها تجرب لحد ما تتعب او تحس ان بيتها و اولادها محتاجين لها اكتر من الشغل
    لو قدرت تكون ناجحة فبيتها و شغلها
    يبقى حقها تشتغل بس زى ما هى بتشتغل لا الراجل يساعدها فالبيت حتى فى مذاكرة اولاده بس

    موضوع رائع يا احمد

    تحياتى

    اسلام

    ReplyDelete
  14. السلام عليكم

    شوف ياعم احمد

    انا مع عمل المراة وليس ضدة ولكن على ان يتعارض العمل مع عملها ومهمتها الاساسية اللى هيا بيتها وعيالها اى الحياة الاسرية

    موضوع مهم

    تحياتى

    ReplyDelete
  15. بص يا عم انا شايف ان عمل الست دةشيئ حلووجميل وكل حاجة
    لكن مش كل مجال تشتغل فيه المراة يعني دكتورة مدرسة بنات داعية دينية تتحدث في امور النساء يعني اي حاجة تنفع لكن تشتغل كول سنتر في شركة مش عارف ايه من8 ل 8 وتروح البيت عشرة والبيت يضرب يقلب لاء
    شغل الست حلو لوكان مفيد ولو ماكانش حد غيرها يسد في الشغلانة دي وبشرطما يجيش عل حساب جوزها
    تحياتي ليك يا جميل

    ReplyDelete
  16. بوست رائع يا اخى .
    عرض فيه رأيين مهمين جداا
    والرأيين غالبا صح .
    لكن فى حالات بيناسبها رأى صديقك .. لما يكون عمل المرأة مضر ليها ولبيتها ولحياتها .. لكن مادامت تقدر توازن مابين كل ده ..وعملها فى مكان كويس ومحترم وبيزيد من تطور فكرها .. يبقى اكيد عملها افضل مية مرة .
    أما حكم الدين فى عمل المرأة .. فإذا كانت ترعى حدود ربها فى عملها . فلما يحرم عملها .. أو حتى كيف يكون مكروه شرعا .
    انا عن نفسى أحبذ عمل المرأة جدااا

    شكرا لك يا اخى .. بوست بجد مهم جداا

    ReplyDelete
  17. السلام عليكم
    أول زيارة وباذن الله لن تكون اخر زيارة لان واضح انك شخص محترم في ارائك

    عامة ياعم أحمد الكلام ده قتل بحثا كما تحدثت أنت والواقع قتله أوضح حقيقة هذه الابحاث
    أولا
    مامهمة المراة الاساسية
    1-رعاية الابناء وتربيتهم
    2-الاهتمام بأمور زوجها وبيتها
    3-الحضانة العاطفية والنفسية للزوج والابناء وهذه مهمة مشتركة بين الجميع وليست الزوجة فقط ولكن الدور الاكبر علي الزوجة
    ثانيا
    نفترض أن الزوجة قصرت في دورها ماذا سيحدث؟
    اعتقد انه سيحدث خلل في المجتمع من حيث ابناء لايدركون دور المنزل في التربية وبالتالي سيربيهم الشارع واللي بيربيه الشارع يابيربيه كويس لا بيخربها علي دماغه
    ثالثا
    رأي الدين
    فتاوي علماء الازهر وليس أي علماء اخرين عشان أنت ممكن متاخدش برايهم
    قالت لاضرر من عمل المرأة ولكن في اعمال لاتؤثر علي أنوثتها و علي دورها اتجاه بيتها وزوجها واولادها

    مثلا حدثني بالله عليك كيف ستصبح امرأة مهندسة انشائية في مواقع العمل ووسط الفواعلية والعمال والتراب وطبعا ترجع البيت وعليها كوم تراب وشكلها مبهدل تخيل مراتك دخلة عليك البيت بالمنظر ده تعمل ايه ؟؟؟؟؟؟؟؟
    الجواب لك
    أزاي امرأة مثلا تشتغل في الجيش برضه متجيش والحمد لله أنها مش موجودة في بلدنا
    الشرطة برضه عمل المرأة فيها بحدود مع المجرمات فقط أما ان زوجتي تقف ادام واحد مجرم فده موضوع صعب شوية
    والكلام كتير اوووووووي
    ولكن عمل المرأة كطبيبة فده شئ محمود في رأي الشخصي مدرسة وما إلي ذلك من الاعمال التي تناسب طبيعة المرأة من حنان وعطف

    رابعا
    وخروج المرأة يكون في الحدود والاطر التي وضعها الاسلام من حيث المعاملة والملبس والكلام ده مش محتاج أحكي عليه لانك رجل وشايف اللي بيحصل زي زيك


    خامسا
    واحد يقعد مراته من الشغل ميقعدهاش فدي حاجة متخصش أي حد
    لانها مراته هو مش مراتي ولا مراتك ياعم أحمد وأنت بتكم بوجهة نظرك وهو بيحكم بوجهة نظره وأنت شايف أن كلامك صح وهو شايف أن كلامه صح ولكن لمن الحاكمية هنا
    له ولها وليس لك أو لي
    لانهما زوجان
    وكل واحد يخليه في جوزه يااسماعيل بيه
    هههه
    وسعيد بزيارة مدونتك
    والسلام

    ReplyDelete
  18. زمان الوصل:
    بالضبط...تناول اي قضية من منظور ديني كفيل باسكات اي راي معارض..من يجروء على مخالفة رأي الدين او مجرد الجدال
    انا عن نفسي فوجئت بهذا التفسير للأية فلم اعرف به من قبل
    اعلم طبعا ان المرأة التي تعاني من الفقر مأساتها كبيرة ومعاناتها اكبر الا انه اعتقد انه يقصد عمل المرأة في عير حالات الضرورة...كأن تكون تعمل لتزجية وقت الفراغ ليس الا
    عموما هو دة رأيه وهو رأي يوجد عدد لا بأس به من الاشخاص يتبنونه
    تحيااااتي

    ReplyDelete
  19. aPPY:
    يا خبر ابيض
    اول مرة تتفقي معايا
    دي كدة القيامة قربت خلاص
    طبعا المرأة لها اعملها..وانا شخصيا احترم المرأة العاملة جدا
    تحيااتي

    ReplyDelete
  20. عاشقة وغلبانة:
    لكل قاعدة شواذ بالتأكيد
    واكيد هناك سيدات غير عاملات ومخهن في منتهى التفتح وافكارهن في منتهى التقدم ولكني اتحدث عن الاغلبية فاغلب النساء الغير عاملات منغلقات الفكر غير مواكبات للتطور والتحديث في المجتمع
    اما رأي صديقي ان النساء العاملات مسئولات بشكل كبير عن بطالة الرجال فأنا اختلف معه فالكفاءة تفرض نفسها بصرف النظر عن النوع
    تحياااتي

    ReplyDelete
  21. ايوشة:
    انا والدتي كانت تعمل وكانت موفقة والحمد لله و موازنة بين غملها وبين بيتها
    وكذلك زوجتي
    انا فعلا ارى ان حصر المرأة في اعمال المنزل وتربية الاولاد فيه ظلم كبير جدا لعقلها و قدراتها
    تحيااااتي

    ReplyDelete
  22. زمان الوصل:
    بالتأكيد التعميم على اي قاعدة فكرة غير صائبة على الاطلاق
    فليس كل النساء العاملات مثقفات ولا العكس
    انا موافقك ان التعميم لا يجوز
    تحياتي واحتراماتي

    ReplyDelete
  23. ياسر حسين:
    كلام جميل وكلام معقول ماقدرش اقول حاجة عنه
    بس الا تتفق معي يا فنان ان زوجة كل وظيفتها رعاية الاولاد والمذاكرة لهم ستكون عاجزة عن مواكبة اي تطور مجتمعي؟
    في كثير جدا من الامهات والزوجات ينجحن في التوفيق بين العمل والمنزل
    تحياااتي

    ReplyDelete
  24. لورنس العرب:
    انا باقول ان احنا نقتلهم ونرتاح
    هههههه
    تحيااااتي

    ReplyDelete
  25. هوندا:
    قرأت تدوينتك الجميلة
    تحياتي و احتراماتي

    ReplyDelete
  26. Desert Cat:
    هو من ناحية لسة في ناس بتفكر كدة
    اه طبعا لسة
    وعلى فكرة....نسبة لا يستهان بها اطلاقا
    بس طبعا انا اتفق معاكي...انا احترم المرأة العاملة بشدة
    تحياتي واحتراماتي

    ReplyDelete
  27. اه هى الست ديما شايلنها فوق راسكم وزاعقين:))
    الشيوخ عاوزين يقعدوا الستات عشان شايفينهم فتنه لازم القضاء عليها
    وان الرجاله مش قادرين يصبروا او يغضوا بصرهم فريحوا نفسهم وقالواالحل اننا نقعد فى البيت
    واللى مش لاقى شغلانه وشايف نفسه عاطل يقول اصل الستات واخدين وظيفتى لو هو كان بيفهم كان عرف ان لو فى ست وراجل متقدمين لوظيفه والاتنين كفؤ حيتاخد الراجل لان الراجل معروف انه بيتحمل عن الست
    لكن الفشل هو اللى بيدخل دا فى راسهم
    اقولك على حاجه انا مره كتبت موضوع عن عمل المره وفضلنا انا وبطوط نتشاكس لمده يومين وفى النهايه قولت لنفسى انا واجعه راسى ليه انا والستات احنا نقعد فى البيت نحط رجل على رجل وناخد مصروف لينا ومصروف للبيت والراجل يطلع عينه يشتغل اربع شغلانات ويشيلوا الرجاله بقى
    حد يكره الراحه

    ReplyDelete
  28. وعموما انا متفقه مع الفاتح اليعقوبى معاه حق الى حد كبير

    ReplyDelete
  29. bosbos:
    احنا كدة متفقين يا بسبس
    فعلا المرأة العاملة بتكون مختلفة الى حد بعيد عن لمرأة غير العاملة
    في الثقافة في التفتح في حاجات كتير قوي
    بشرط زي ماقلتي التوفيق بين حياتها الخاصة وحياتها العملية
    ربنا يوفقك
    تحياتي

    ReplyDelete
  30. micheal:
    وصل يا مايكل باشا
    ربنا يخليك ليا
    تحياتي

    ReplyDelete
  31. shaymaa:
    طبعا الكلمة فيها حاجة غلط
    هي
    ما يؤثرش على شغلي
    تبقى اصح
    المهم ان احنا متفقين على اهمية عمل المرأة باعتبارها كيان مستقل له عقل ولابد من احترام هذا العقل
    تحياتي واحتراماتي

    ReplyDelete
  32. مواطن مصري نائم:
    رأي رائع يا اسلام
    الف شكر على الكلام الجامد دة
    تحياتي

    ReplyDelete
  33. mostafa rayan:
    طيب افرض يا مصطفى انها بتشتغل فعلا من 8 ل 8 زي مانت بتقول
    ومع ذلك هي قادرة توفق بين متطلبات زوجها ومتطلبات شغلها
    و زوجها راضي وما بيشتكيش
    الفكرة يا درش
    فكرة توفيق اوضاع ليس الا
    ومفيش استامبة او قانون يمشي عليه عمل المرأة
    كل حالة ولها ظروفها المختلفة
    تحياتي واحتراماتي

    ReplyDelete
  34. Tamer Nabil:
    كلام جميل
    مااختلفناش
    لابد ان توفق المرأة بين عملها وبين بيتها وزوجها
    والا يبقى في حاجة غلط
    تحياتي

    ReplyDelete
  35. ضي القمر:
    اكيد مافيش قاعدة مطلقة
    في حالات بيصلح فيها عمل المرأة وفي حالات ظروفها لا تكون مناسبة خاصة اذا كان على حساب بيتها وزوجها
    تحياتي واحتراماتي

    ReplyDelete
  36. عجبني اوي البوست ده .. وعلى فكرة انتو الاثنين صح

    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails