Wednesday, 25 February 2009

كيف تصنع ارهابيا



وقال ايــــــــــــــــــــــــــــــــــه مش عارفين الناس الوحشة اللي يتفجر عبوات ناسفة في السواح بيعملوا كدة ليه؟
بيتسلوا........بيقضوا وقت لطيف........بيهزروا مع السواح........بيلعبوا عسكر وحرامية مع امن الدولة
طبعا سؤال ساذج......لما حد يسأل هو ليه الأرهابي ارهابي
الأرهابي بقى ارهابي علشان لما حاول يتكلم ويصرخ ويحتج على وضع معين....اترمى في غياهب السجون كذا يوم او شهر او سنة وهناك ذاق ما لا عين رأت ولا أذن سمعت
الأرهابي بقى ارهابي علشان حاول يدخل انتخابات اتحاد الطلبة في الكلية بتاعته لقي نفسه مشطوب مسبقا وبدون ابداء اسباب غير ان الأمن عايز كدة
الأرهابي بقى كدة علشان بيلاقي زمايله الطلاب بتوع الحزب الوطني بيطلعوا الرحلات والمعسكرات والذي منه وبينجحوا بالكوسة وهو كائن منبوذ لمجرد انه له رأي مخالف لسيادتهم
الأرهابي بقى كدة علشان لقي ابوه الموظف الشريف اللي طول عمره شارب المر وراضي بحاله بيطلع معاش مبكر وبياخد تعويض ملاليم ومعاش مابيكفيش علاجه لوحده بينما رؤسائه الموالسين والمنافقين بياخدوا ملايين لمجرد انهم بيجيدوا لعبة ال 3 ورقات
الأرهابي بيبقى كدة لأنه خاطب بقاله 5 سنين ومش لاقي خرم ابرة يسكن فيه بينما منتجعات الأكابر على قفا مين يشيل وبأسعار خيالية (الفيلا ب 3 مليون بس)..يا بلاش
الأرهابي بقى ارهابي لأنه شاف زميله بقى باشا ضابط او وكيل نيابة علشان ابوه باشا هو كمان في حين انه لسة عاطل عالة على ابوه وامه لمجرد ان ابوه لا باشا ولا بيه....موظف غلبان بس للأسف شريف
الارهابي بقى ارهابي علشان شايف الدنيا مقلوبة والواطي بقى فوق والعالي بينزل لسابع ارض
الأرهابي بقى كدة علشان شايف شعوب العالم كلها بتنتخب ممثليها بكل حرية وديمقراطية بينما هنا الشعب بيرتاح في بيته والحكومة هي اللي هتختار (الممثلين) اللي هيمثلوا دور نواب الشعب
الأرهابي بقى ارهابي علشان ساكن في صفيحة زبالة تقرف الحيوانات انها تسكنها....وياريت كمان عاجب الحكومة...دة ممكن تطرده منها في اي وقت بداعي انها عشوائيات
الأرهابي بقى ارهابي علشان ابوه مات في عبارة السلام وامه ماتت بالسرطان وعمه عنده تليف في الكبد واخوه غرق في البحر وهو مهاجر لأيطاليا هربا من بؤس وشقاء الوطن
الأرهابي بقى ارهابي علشان لما حلم انه يدخل كلية الشرطة او الحربية تم رفضه علشان (غير لائق) اجتماعيا......مش قد المقام يعني
اللي فات دة جزء يسير من المكونات اللازمة لصناعة ارهابي وهي متوفرة والحمد لله في مصر وبكميات كبيرة تكفي لصناعة اجيال من الأرهابيين والمدمرين والمخربين
وطالما دي احوال مصر.....وطالما بقى الحال على ماهو عليه
يبقى زي ما انفجرت قنبلة الحسين....انتظر قنبلة الأزهر و قنبلة شرم الشيخ وقنبلة طابا وقنبلة مارينا....انتظروا اجيال من الثائرين ممن طفح بهم الكيل....ممن عجزوا ان يصل صوتهم بحرية كاملة وبلا اي مضايقات امنية غير مبررة
ونرجع نسأل
هم عايزين ايه؟ هم بيعملوا كدة ليه؟

21 comments:

  1. كل دى اسباب منطقيه للتطرف والارهاب
    بس السؤال بقى هل كل الى بيقتلوا الابرياء بدون ذنب مروا بالظروف دى؟
    وهل الى بيتقتلوا دول ليهم ذنب فى الى وصلنا ليه؟
    الى عاوز ياخد حقه يروح ياخده من الى سرقه منه
    ما يتشطرش على حد ضعيف مسالم ويقول كده هاخد حقى
    وبارضه مش هاياخده

    ReplyDelete
  2. وجهة نظر
    بس مش ديه كل الاسباب اللى تخلى الارهابي ارهابي على فكرة
    فيه حاجة اسمها برمجة للدماغ
    و غسيل مخ كده زي غسيل الاموال
    ياما ناس زي اللى انت بتحكي عنهم و اكتر و راضيين او ختقولى مستسلمين للوضع
    بس برضه بيعرفوا ربنا و مش بيدمروا و لا يقتلوا
    الا القتل و التخريب و الدمار
    المشكلة فى العنف
    و زرع الحقد و الغل
    كل دول طبعا غير الفقر و الظلم ز الاتهاض
    بيكونوا ارض خصبة للارهاب

    و احنا الحمد لله ارضنا خصبة
    بس ربك يستر و مش عاوزين تاني

    انت عارف انى انا او انت فى اي بلد متقدم كنا رفعنا قضية عن الفعل نفسه و الفاعل و كان اتحكم غيابي
    و السبب من الدعوى انى تأذيت نفسيا

    و لعلمك فى دول متحضرة ممكن يتحكملى و اللى تدفع الحكومة اللى سمحت للفعل ان يقع اصلا
    تحياتي

    ReplyDelete
  3. خلاااااااااااااااص بقه
    كفايه
    الاسباب كتيره و الحل واحد
    الخلاص من النظام الزفت

    ReplyDelete
  4. ممكن دي تكون اسباب تخلي واحد يفقد ايمانه بوطنه وبلده
    لكن انا مش مقتنعه ان في حد عمل تفجير الحسين
    تفجير الحسين اتعمل عشان قانون الطوارئ مايتلغاش
    انا مش شايفاها غير كده

    ReplyDelete
  5. هيا ممكن تبقا الاسباب دى
    بس بردو مش مبرر
    وبعدين غياب الدين
    وحاجات كدة خارجية
    طبعا فاهمنى
    بيبقا قصدهم يعملو فينا كدة

    ReplyDelete
  6. أنا معاك في كل كلمة
    يمكن قبل كده كنت هقولك زي ما بيقولوك مش مبرر و هو طبعا مش مبرر لو احنا عايشين في ظروف منطقية لكن بصراحة لما شفت المواطن في بلاد تانية كانت أقل مننا بكتير دلوقتى حقوقه عاملة ازاي
    حسيت قد ايه المواطن المصري في عين بلده رخيص أوي
    بجد اللى الظروف بتدفعه انه يكون كده أكيد بيكون واحد من الأسباب اللى ذكرتها هو اللى دفعه
    و ناس كتير قالت و لسة بتقول ان فيه طبقة في الشعب المصري إن ما اخدناش بالنا منها هتبقى قنبلة موقوته و أنا شايفة ان دي بداية مش نهاية و ده بس طرف الفتيل
    ربنا يستر على بلدنا اللى كانت في يوم أجمل بلاد الدنيا

    ReplyDelete
  7. ادعوكم لقراءه هذه التدوينة لنوارة

    http://www.tahyyes.org/2009/02/blog-post_27.html

    نجم...فإن اردتم توفير الوقت فمن فضلك ضع توقيعك في هذا الرابط من أجل مطالبة العالم بتفكيك اسرائيل كدولة

    http://www.tahyyes.org/2009/02/blog-post_27.html

    ReplyDelete
  8. آه صحيح
    هما بيعملوا كده ليه؟
    ليس مبرر كل ما تم سرده أن يضع الشخص قنبلة قد تصيب ابرياء من ابناء بلده
    وإنما هو نوع من العته الناتج عن قمة الكبت والياس
    فمن يفعل ذلك فقد وصل إلى مرحلة من مراحل الجنون واللاعقل
    وربنا يلطف بينا

    ReplyDelete
  9. للاسف التصرفات دى والضغوط اللى حوالينا بتجعل من الانسان شخص عدوانى يريد ان ينتقم من الكل حتى يشعر بالامان

    ربنا يهديهم ويهدلنا النظام

    ReplyDelete
  10. كلامك صحيح

    واسباب منطقية موجودة فى بلدنا الحبيب

    بس مش كل انفجار بيكون سببة دة بس

    فى مؤامرات وايادى خارجية عايزة تعمل فتنة بالبلد وبلبلة واللى بيساعدها الاسباب اللى قولتها والوضع والظروف اللى الناس عايشة فيها

    ربنا يصلح الحال

    تحياتى

    ReplyDelete
  11. كلامك جميل بس مش شايفه انه مبرر لصنع ارهابى و محلى و يخرب بلده
    انت بتعانى من مشاكل بلدنا و انا بعانى و كلنا بنعانى و مش حل نبقى كدة

    ReplyDelete
  12. nody_1987:
    طبعا مش كل من تعرض للظلم يصبح ظالما
    انما اكيد القهر والعنف يولد التطرف والعنف
    تحياتي

    ReplyDelete
  13. ذو النون المصري:
    يا مستني السمنة من بطن النملة
    يحيينا ويحييك ربنا

    ReplyDelete
  14. esraa:
    يحتمل برضة وجهك نظرك تكون صحيحة
    بس اوعي تستبعدي ان ممكن اليأس و الاحباط والشعور بالظلم تخلي الواحد يفجر الكون كله مش بس قنبلة في الحسين
    تحياتي واحتراماتي

    ReplyDelete
  15. البنت المشمشية حلوة بس شقية:
    طبعا ليس مبررا على الاطلاق
    والبوست دة مش تبرير لانفجار الحسين..فلا احد على الاطلاق يقر قتل الابرياء المدنيين
    انما هو محاولة لمعرفة سبب ان بني ادم ممكن يفكر في قتل بني ادم اخر لا يعرفه ولا يمت له بأي صلة
    تحياتي واحتراماتي

    ReplyDelete
  16. الحلم العربي:
    وهترجع ان شاء الله اجمل بلد في الدنيا
    مصر ممكن جدا تمرض ولكنها لن تموت
    تحياتي

    ReplyDelete
  17. سكوت هنصور:
    يسمع من بقك ربنا
    لو كان تفكيك اسرائيل كدولة يتطلب توقيعاتنا اعتبرني اول من وقع

    ReplyDelete
  18. ياسر حسين:
    طبعا هو ليس مبرر على الاطلاق
    ولكن لعن الله من اوصله لهذه الحالة
    تحياتي واحتراماتي

    ReplyDelete
  19. EMMY BABY:
    ربك قادر على كل شيء
    تحياتي

    ReplyDelete
  20. Tamer Nabil:
    بس والله يا تامر الايادي الداخلية وافعالها اخطر على مصر بكتير من الايادي الخارجية
    ربنا يستر على البلد دي
    تحياااتي

    ReplyDelete
  21. Rania:
    بالتأكيد مش مبرر يا رانيا وان كانت كل الاسباب دي كفيلة بصنع انتحاري وليس ارهابي
    تحياتي واحتراماتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails