Monday, 16 February 2009

من حقنا ان نراه


مع كل قضية تحرش جديدة تظهر على السطح
يطرح نفس السؤال:
هل من حقك ان ترتدي ما تشائي من الملابس...ثم تصرخي وتحتجي على تعرضك للتحرش؟
او بالمعنى الأصح:
هل ينبغي لك الا ترتدي ملابسك ثم تصرخي من التحرش؟؟
انا ازعم اني ليبرالي...واؤيد مبدأ ان من حق اي شخص ان يفعل ما يحلو له في اطار من القيم والتقاليد وبما لا يتعدى حدود حريته الشخصيه حرية الأخرين
الا ان في موضوع الملابس دة...بتحول لصعيدي فلاح وليس ليبرالي متفتح
اعلم تماما ان المحجبات يتعرضن للتحرش وان المنقبات قد يتعرضن للتحرش وبالتالي فالملابس مسألة هامشية في قضية التحرش الذي اصبح يطال الجميع بلا رحمة
ولكن لو افترضنا ان 10 فتيات يسرن في الشارع.....5 منهن يرتدين حجاب شرعي (حجاب بجد يعني) مش كدة وكدة و 3 منهن يرتدين الحجاب اياه(اللي كدة وكدة) بتاع (البادي والجينز وفوقهم طرحة)....و 2 منهن يرتدين ملابس فاضحة (ستريتش اوبودي اوجينز او ميكرو جيب)
تفتكروا من منهن سيكونن اكثر عرضة للتحرش؟؟؟
عين المتحرش ستتجه ناحية اي واحدة فيهن؟؟؟
انا لست من دعاة الحجاب...وان كنت احترمه...ولا يعني الحجاب بالنسبة لي الأخلاق على الاطلاق....فياما دقت على الراس طبول....وياما شفنا ولو طال العمر بنا لسة هنشوف
ولكن الحجاب واعني الحجاب اللي بجد مش اللي (كدة وكدة) بأعتبره احترام من الفتاة لنفسها اولا ولمجتمعها ثانيا بالضبط زيها زي الغير محجبة ولكنها محتشمة في لبسها ومظهرها لا تتعمد اثارة الأخرين
وبعدين نفسي اسأل واحدة من هواة البادي والجينز المحزق.....ايــــــــــــــــــــــــــــــــــــه الهدف؟
ايه الهدف من طريقة اللبس دي....وايه سبب ارتدائك لهذا النوع من الملابس اذا كنتي لا تتعمدي اثارة غرائز الأخرين؟
هل هي شياكة...موضة؟
وهل الملابس لو واسعة شوية....في العادي يعني والمعقول مش هتبقى شيك؟
مش هتبقى موضة؟
ياما باشوف يوميا محجبات وغير محجبات ولكنهن لابسات ملابس في غاية الشياكة والروعة والجمال...وبدون اثارة ولا استفزاز لمشاعر الشباب والرجال؟
هل معنى كدة ان المحتشمات او المحجبات لا يتعرضن للتحرش؟
لا طبعا.......بيتعرضن للتحرش
بس على الاقل عاملين اللي عليهم....لم يعطوا الفرصة لأي حد شاذ او مهووس جنسيا ان يبرر فعلته وتحرشه بهن بطريقة لبسهن او كلامهن
الخلاصة
انا لست من دعاة الأنغلاق ولا انا ضد المرأة ولكني مع الاحترام والأخلاق ومراعاة قيم المجتمع وعاداته واخلاقه.....وسواء الفتاة محجبة او غير محجبة تبقى الاخلاق والاحتشام حجر الزاوية والأساس الذي لابد ان تنطلق من خلاله اي دعوة لمكافحة التحرش الجنسي والحد منه
وقبل ما نطالب بشنق المتحرش في ميدان عام...ونطالب الشباب بالألتزام بالأداب العامة و التوقف عن الانحرافات الجنسية لابد ان نطالب الفتيات والسيدات بأحترام الاداب العامة و ارتداء ملابس محتشمة وغير مثيرة
وفي النهاية
لا تغضب.....فما تقبل ان يظهر من جسد زوجتك (ابنتك)(اختك)........من حقنا ان نراه

34 comments:

  1. أوافقك طبعاً

    زى مابيقولو محدش يحط الغنك جمب الذئب ويقوله اصله مفترس

    كمان أنا مقتنعه ان ربنا خير حافظ وانه استحالة هساوى واحدة نفذت أمره بأنها تتحجب حجاب صح بواحدة أساءت للحجاب وللمسلمين وانا مقتنعه تماما ان الانسانة الشيك شيك فى كل حاجة مش فى لبس قصير بس والا يكون ده نقص وعدم ثقه فى النفس

    ReplyDelete
  2. لو كل واحد أعطى نفسه الحق فى تقييم ملابس الفتاه قبل أن يتحرّش بها فهذه حشمه نسيبها فى حالها و هذه غير محتشمه من حقّنا نتحرّش بها لفسدت الأمور ولم تنج من التحرّش سوى قلّه قليله جدّا من الناس ..

    بصراحه محاولة تبرير التحرّش بما ترتديه الفتاه محاوله لا أتقبّلها بأى شكل من الأشكال لأن المتحرّش مش بس بيتحرّش بالمرأه الغير محتشمه -من وجهة نظره هو و حط تحت هذه الكلمه ألف خط- لأ ده بيتحرّش بالأطفال كمان و ممكن يتحرّش بالأطفال الذكور وليس فقط الأطفال الإناث رغم أنّه ليس فيهن ما يغرى بالتحرّش ..

    ولو فى يوم من الأيّام لسبب من الأسباب تركت باب صيدليتك مفتوح و ذهبت و جاء من يسرقها لن نستطيع وقتها الحقيقه أن نعطى للحرامى أى عذر أو تعاطف لأنّك لم تؤمّن مكان عملك و مصدر رزقك و أى محاوله منّا فى هذا الشأن أظنّها ستكون مستهجنه بشدّه ..

    ReplyDelete
  3. نسيت أضيف شئ آخر .. فى موضوع "نهى رشدى" محامى المتّهم أثار نقطه أخرى غير نقطة الملابس التى لم تكن خليعه .. وهى نقطة أن المجنى عليها كانت ماشيه بتتقصّع .. قال كده مرّه و مرّه أخرى قال كانت ماشيه بتضحك بصوت عالى .. ترك الأمور للحكم الشخصى لكل إنسان كى يحكم هل الأنثى التى يمر بها ماشيه بتتقصّع فعلا ولاّ هى مشيتها كده و هل تضحك بصوت عالى لأنّها قليلة الأدب أم لأن أحبالها الصوتيه صوتها عالى بسبب الوراثه أمر غير طبيعى ولا منطقى ولا مفهوم طبعا .. ليس من حق أى إنسان فى الشارع أن يعطى غيره صكوك البراءه أو الإدانه أو أن يحكم على سلوكه و خلقه و من ثمّ ينزل به العقاب الرادع فى صورة تحرّش سافل و دنئ ثمّ يبحث لنفسه عن أعذار لا محلّ لها من الإعراب

    ReplyDelete
  4. فى سلوك إسمه "غض البصر" وهو عكس البحلقة فى الناس. صحيح هو لا يمثّل سلوك ليبرالي لكن إيه المانع إن الناس تدعو إلى ممارسته بدل من دعوتهم للبحلقة!؟

    ReplyDelete
  5. تعقيبا على تعليق عدى النهار
    معنى طلبك لغض البصر أنك إن نظرت فسوف ترتكب ذنب
    وبهذا صارت الفتاه اداه لزيادة الزنوب عند الرجال
    طيب ما الاسهل من كده انها تمشي بلبس محترم أفضل لها وللجميع؟

    ReplyDelete
  6. ماشى لو افترضنا ان كل المصريات مشوا بهدوم محتشمه جدا ومافيهاش اى اثاره

    طب لو سياح وماشين فى الشارع بمهدومهم المثيره الى هى عندهم عادى هاتقوله لا والنبى علشان خاطرنا احتشموا علشان احنا اختذلنا جريمه فى حق المجتمع فى اللبس؟
    كل واحد حر يلبس الى هو عاوزه
    ومش معنى ان واحده متحرره فى لبسها ان كل حيوان يروح ينهش فيها

    ReplyDelete
  7. كلام مظبوط
    بس مش معنى كده برضه ان اى حيوان شهوته تزيد عليه يهب على واحده ماشيه فى الشارع

    لازم يكون فى امن وقانون وعقاب
    والحاجات دى نفتقدها فى مصر عشان كده كل البلاوى ممكن تحصل

    ReplyDelete
  8. انا قريت البوست
    وردي عليك يا احمد هو كوكتيل بين
    تعليق
    زمان الوصل
    ونودي
    ونقطة عدي النهار

    بص انا كمصريه عشت بره وعارفه الفرق بين اللبس هنا وهناك وبين تفكير الرجاله هناك وهنا
    صدقني هو الموضوع مش بيختلف
    يعني التحرش موجود في العالم كله سواء لفظي او جسدي
    لكن في مصر التحرش مختلف
    بيبقي مبرر .. وبعدين ما ينفعش نسيب الحكم الشخصي للناس
    ماهو كل واحد بيحب حاجه شكل ومتربي تربيه تختلف عن التاني فاكيد فكرته هتبقي مختلفه
    ويبقي كل واحد بيتحرش باللي علي مزاجه
    لا اكيد انت غلطان يا احمد
    اه اكيد لازم نحترم الفكر الشرقي والعادات والتقاليد والذي منه
    بس بارضه من غير ما نرجع لورا
    تحياتي

    ReplyDelete
  9. لا تغضب.....فما تقبل ان يظهر من جسد زوجتك (ابنتك)(اختك)........من حقنا ان نراه



    تعليق على الجزء ده

    لا مش من حقك انك تراه لان ربنا قال غضوا البصر

    ReplyDelete
  10. عندك حق يا احمد
    كل مرة اقول البوست ده احلى من اللى قبلو كلو حلو

    هو طبعا المفروض غض البصر
    بس احنا منحطش البنزين جمب النار ونسيب الدنيا كدة احنا بشر بردو

    ReplyDelete
  11. ملحوظة صغيرة المدونة بتاعتى طارت اللى انا دخلت بيه ده مدونة جديدة بس بنفس الاسم زيها بلظبط ياريت تضيفه لينك المدونة الجديدة عندك وياريت تعملى تنويه بكدة دى خدمة منك يعنىhttp://o0mshmsh0o.blogspot.com/

    ReplyDelete
  12. عشان متستغربش المدونة الجديدة هيا زى القديمة بلظبط
    دى خدمة منك يا احمد

    ReplyDelete
  13. بالنسبة لى أنا من دعاة غض البصر حتى لو البنت عريانة خالص فى الشارع وموضوع اللبس وربطه بفكرة التحرش مسألة قتلت بحثا وعرفنا ان الارتباط بينهم مش حقيقى.
    ياريت كل واحد يبدأ بنفسه ويبطل يبص على البنات وهتلاقى موضوع التحرش ده بيقل ولما ده يحصل هتلاقى لبس البنات اتعدل لأن اللى بتلبس مش كويس علشان حد يتحرش بيها هاتخسر جمهورها وهاضطر تحترم نفسها فى اللبس

    ReplyDelete
  14. فعلا والله القضية دى بقت غريبة اووووووى مكنتش احب اننا فى يوم من الايام نوصل للى احنا فيه دلوقتى

    العيب زى مانت قلت مش على الفتاة لوحدها مع انى مقتنعة انها عليها عبء اللى بيحصل لان فعلا لو كل بنت لبست محترم ومشيت صح ساعتها ممكن الظاهرة دى تقل

    لكن للاسف بقوا بيتفننوا دلوقتى فى مابين يلبس اكتر ملابس ضيقة

    غير ان المجتمع نفسه للاسف ماهو الا مقلد لما تنزل البنت تشترى لبس متلاقيش غير اللبس الاهبل ده فى السوق بجد والله بقت مهزلة

    بس اتا اعتقد ان لو البنت لبست فعلا محترم وممشيتشى فى شوارع ساكتة او فى وقت متأخر ساعتها ان شاء الله مش هتدى فرصة لاى حاجة تحصل

    وربنا يهدى ويسترها معانا يارب

    ميرسى جداااا لزيارتك واتمنى تكرارها

    تحياتى

    ايمى

    ReplyDelete
  15. سلامو عليكم

    أنا مع ان البنت تلبس محتشم ومش لبس مستفز زى ما حضرتك قلت لكن مش معنى ان واحدة بتعمل حاجة غلط فى طريقة لبسها يبقى دا مبرر لأى واحد انه يتحرش بيها.. ويقول ما هى اصلها هى لابسة كدا.. وحضرتك كاتب جملة غريبة فى التوبيك .. كاتب انك انسان ليبرالى يعنى مع الحرية ومع ذلك بتبقى صعيدى فى حكاية اللبس دى.. مش عارفة اذا كانت الجملة دى تعتبر تبرير لنفسك عشان تتفرج براحتك على اى واحدة مش لابسة اللبس اللى انت وصفته بإنه محتشم..

    وللا ايه..

    وبعدين اى مبرر فى الدنيا دا اللى يقول ان طالما غيرك بيتصرف غلط يبقى حضرتك تتصرف غلط زيه.. وتعامل الغلط بغلط اكبر منه..

    عارف دا معناه ان لو واحد سرق الكل يبرر لنفسه السرقة من منطلق ان تفكيره بردو بيتحول صعيدى فى موضوع السرقة ويقول ما هو انا كمان من حقى اسرق..

    البنت اللى لابسة مش محترم بتسرق عيون الناس اللى مش محترمين .. والناس اللى بيتحرشوا بالبنات بيسرقوا نظرات ولمسات مش من حقهم وبكدا يبقى مجتمع كله حرامية فى حرامية

    ReplyDelete
  16. انا مع باربي في كلامها احنا كدة بنبرر تصرف غلط للولد علي اساس ان البنت غلطت وللأسف هو دا الفكر المصري في كل حاجة ندفع رشاوي عشان الكل بيرتشي نعاكس البنات لان البنات لابسة مش محترم نسرق عشان غيرنا بيسرق
    لوكل واحد في البلد دي بدأ بنفسه الأول وعمل اللي عليه والتزم الأخلاق مش هايبقي فيه شماعات نعلق عليها اخطاءنا
    مع ذلك بتعجبني طريقة تناولك لأي موضوع
    تحياتي

    ReplyDelete
  17. المتحرش الان لا يفقر بين محجبه او غير محجبه
    الكل عرضه للتحرش
    و المطلوب ان لا تترك اي فتاه حقها القانوني اذا تعرضت لاي نوع من التحرش ايا كان شكل ملابسها
    فلا يعني اتنها ليست محتشمه انها حلال لاي متحرش
    الامر الاخر
    البنات المحجبات الان لبسهن يعرضهن في صورة اجمل و افتن بكثير من غير المحجبات

    ReplyDelete
  18. أنا بقي محجبه وضد العري
    لكن انا كمان ضد الجمله الاخيره جدا
    ده ماينفعش انه يكون مبدا نعيش به

    ReplyDelete
  19. الموضوع مش موضوع لبس ولا شهوة زايدة انا شايف ان الموضوع أكبر من كده الموضوع أنحلال عام وتراجع لقيم كتير أوي والتحرش جزء من الظاهرة مش كل الظاهرة واللبس طبعا مش هو الحل
    الحل اننا نتخلص من احتلال الحزب الوطني لينالأن كل اللي احنا فيه سببه الفقر والقهر والمهانة اللي احنا عايشين فيهابسببه عشان كده بتتكون جوانا أحقاد وميول عدوانية بتطلع ف صورة تحرش ولد ببنت أو أب يقتل ولاده أو...أو كل الحوادث الغريبة اللي بدأنا نسمع عنها ومكناش نتخيل انها تحصل ف مجتمعنا.
    إيه؟ انا كبرت الموضوع؟ ودخلت السياسة ف الكاوتش ؟ على العموم ده رأيي

    ReplyDelete
  20. السلام عليكم كمان مره انا لسه جايه من بوست الجنيه وقلت برضه سلام عليكم
    تناولت للمره الثانيه على التوالى ظاهرة اجتماعية
    ولكن الظاهرة فى هذه المرة شائكة جدا جدا ...واحنا المرة دهى مابنسألش دى غلطة مين ونعتب ليه واحنا الملومين ... برضه يعنى ايه ... ليس هناك طرف واحد مسئول عن هذه الظاهرة ولكن تعددت الاسباب والخطأ واحد بالاضافة الى كل ما تناوله الاخوة المعلقين من اسباب ايضا هناك الاسباب الاقتصاديه التى جعلت معظم الشباب لايستطيع ان يكمل دينه والبطاله والاميه الثقافية والدينيه ويرجع ذلك الى التربيه الدينيه الغير صحيحة لكل من بناتنا وشبابنا المسأله كبيرة ومتشعبه ياعزيزى وتستحق الددراسة والتأمل

    ReplyDelete
  21. لبس البنت مهما كان مش مبرر للمتحرش يا احمد
    الراجل المصرى اللى بيتحرش بنفسه هنا بيسافر اوربا بيشوفهم عريانين ومش بيقدر يبص لانه عارف ان فى قوانين وهيترحل من البلد فورا انما هنا بالرغم من ان اصبح فى عقاب الا ان برضه نسبة التحرش فى زيادة
    اللى بيتحرش ده انسان وضيع المفروض يروح يعالج نفسه اما لبس لبنات والكلام ده مجرد مبرر واهى
    وجود العذر لا يرفع ذنب ولا يكمل نقيصه

    ReplyDelete
  22. للاسف التحرش بس مش افعال
    لكن كلام معسول لبنات كتير وبوعدهم بالزواج
    زى مالدكتور الحيوان السافل القذر ببنها
    دكتور الاسنان المعروف ماضحك على بنات كتير منهم عشان يروحولوة عيادتة
    وحبة عشان يعمل اللى عايزوة داخل العيادة بمنتهى الحرية مع ان الغلط من ان البنت تدخل لوحدها
    لكن للاسف طبيب شاب قذر يتحرش ويعمل افعال قذرة ولانة نقيب دكتور يفتعل افعال قذرة جدا
    الدكتور هانى صبحى دكتور الاسنان اللى ماحدش بيحاسبوة اللى بلغوة فى اكتر من بلاغ وعيادتة مفتوحة وكل البلاغات مالهاش اى اهتمام او رقابة لعيادتة
    وكمان مش هو وبس
    لا دة ممرضة عارف بدة كلة
    ولو حد راح عيادتة من بنات ممكن يمشى بقية الزباين ويقولهم الدكتور مشغول ويروحوا بعدها بساعتين دكتور قذر
    ومش محترم مهنتة وللاسف بيتحرش ببنان ويغتصب بمنتهى الحرية

    ReplyDelete
  23. هوندا:
    كلام جميل وكلام معقول واقدرش اقول حاجة عنه

    ReplyDelete
  24. زمان الوصل:
    فكرة الاحتشام مش علشان المتحرش يقيمها ولا لأ
    فكرة الاحتشام علشان البنت ماتبقاش عامل اثارة لناس مريضة او مهووسة جنسيا
    طبعا انا لا ابرر التحرش بقدر ما احاول ان اتبين اسبابه
    ولا تنكري ان من اهم اسبابه هي تصرفات الفتاة او المرأة الا حالات قليلة جدا
    الموضوع ابسط من كدة بكتير
    الفكرة ان الشارع دلوقتي فيه السوي وفيه الشاذ وفيه المريض وبالتالي لو كلنا عملنا بمبدأ امشي عدل يحتار عدوك فيك
    هنلاقي الانحرافات اقل بكتيــــــــــــــــــر
    تحياتي واحتراماتي
    اما بالنسبة للمثال الذي ذكرتيه فطبعا الحرامي هياخ> جزاءه ولكني لن اعفي نفسي من اللوم والتأنيب والعقاب لأني ساعدته على ارتكاب جريمته بتركي باب الصيدلية ةمفتوح
    ساعتها انا اتحمل جزء كبير من المسئولية زي ما البنت تتحمل جزء كبير من اغراء المتحرش لكي يتحرش بها

    ReplyDelete
  25. عدى النهار:
    ومين قال ان غض البصر سلوك غير ليبرالي
    غض البصر مطلوب بل ضروري جدا
    بس برضة لا اعتقد ان الحل هو ان الكل يقلع هدومه وندعو الجميع لغض البصر

    ReplyDelete
  26. لورنس العرب:
    زي ماقلت لعدى النهار
    كلنا هنمشي قالعين.....مااحنا بنغض البصر بقى

    ReplyDelete
  27. Nody_1987:
    انتي ليه مفترضة اني ابرر التحرش
    انا احاول تحليل الاسباب وبالتالي تجنبها
    ومفيش شك ان لبس البنت او السيدة عامل مؤثر جدا في مسألة التحرش بها
    اعلم جيدا ان هناك محجبات وربما منقبات يتم التحرش بهن
    بس مش قاعدة
    القاعدة ان الملابس الفاضحة عامل اثارة وسبب رئيسي لسلوكيات منحرفة
    بالنسبة للسائحات...فعلا لازم السائح يحترم سلوكيات البلد اللي متواجد فيها ودي حاجة بديهية ومعروفة

    ReplyDelete
  28. BONDOKA:
    طبعا هو دة بيس مبررا للتحرش
    وان كان الجميع مطلوب منه التكاتف لفرض السلوكيات في الشارع المصري
    تحياااتي

    ReplyDelete
  29. اسماء عوني:
    طبعا يا اسماء كل واحد حر في لبسه
    بس بما ان الحرية دي هتجر عليه متاعب يبقى ليه الناس ماتلتزمش
    بمعنى ان الواحد في كل مكان يلبس اللبس المناسب للمكان دة
    اللبس حرية شخصية...بس اعتقد انه عامل مهم جدا من عوامل اندلاع ثورة التحرش الجنسي في مصر
    تحياتي

    ReplyDelete
  30. BONDOKA:
    التعبير مجازي طبعا
    معناه ان بما انك قبلت ان زوجتك تلبس كدة يبقى لا تلمن الا نفسك
    مجازي ليس اكثر انما ليست دعوة للبحلقة ولا حاجة
    تحيااااتي

    ReplyDelete
  31. البنت المشمشية حلوة بس شقية:
    يا سلام على الردود العاقلة والمتزنة
    هو دة الكلام السليم والله
    تحياااااتي

    ReplyDelete
  32. البنت المشمشية حلوة بس شقية:
    ولا يهمك يا فندم
    تم اضافة الرابط بتاع المدونة عندي
    احنا ما نستغناش
    تحياتي واحتراماتي

    ReplyDelete
  33. قلب مصري:
    يعني المفروض ان البنات تمشي قالعة في الشارع
    على اساس ان الشباب غاضض بصره؟؟؟؟؟
    وجهة نظر برضة

    ReplyDelete
  34. الموضوع كله غياب قيم من الجنسين يعنى المتحرش معندوش قيم ولا اخلاق ولا احترام للعادات وتقاليد المجتمع واللى بتلبس مش تمام وبتشتكى من التحرش كذلك مش تعرف قيم ولا احترام لعادات وتقاليد مجتمع
    بتقولوا اللبس مش اساس فى التحرش طيب اعملوا احصائية وشوفوا اللى بتلبس محترم اتعرضت لتحرش كام مرة واللى مش لابسه لبس لائق بتتعرض لاد ايه وعلى فكرة التحرش مش لازم يكون وجهه لوجه ممكن بالنظرات بالكلام من وراءها حتى على صفحات النت
    مش عارفة موضوع التحرش يكن علشان احنا فى الصعيد مش ظاهر بالدرجة اللى ملاحظة دلوقتى كل شوية تظهر قضية تحرش

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails