Tuesday, 10 February 2009

الجنيه المعدني


اذا شاء قدرك ان تتعامل ماديا مع ابناء الريف فحذااااار ان تتعامل معهم بالجنيه الفضة (المعدني) او النص جنيه
قدري ساقني لأن اتعامل مع ابناء الفلاحين (فاتح صيدلية في احدى قرى محافظة الشرقية)....ولأني مصري وهم كذلك مصريون صور لي عقلي المريض اننا جميعا نتبع نظام سياسي واقتصادي واحد الا وهو النظام المصري لصاحبته ومديرته الحكومة المصرية الأبنة الشرعية للحزب الوطني الديمقراطي
ولأن الحكومة المصرية قررت ان (تمعدن) الجنية..(تجعله معدنيا يعني)..وكذلك ال (نص) جنيه يبقى غصبا عني وعن اللي يتشدد لي لازم اتعامل به والا ابقى خارج عن القانون (على حسب معلوماتي القانونية الضحلة)
ونظرا لأني لا يوجد لدي اي موقف مسبق مع الجنيه المعدني ولا حتى الجنيه الورقي ومش فارقة معايا ان شالله يعملوه جنيه قماش,فلقد انتظرت طرح الجنيه المعدني في الأسواق بأعتباره عملة جديدة شكلا فقط وليس موضوعا (يعني الحاجة اللي قيمتها جنيه ورق هيبقى برضة قيمتها جنيه معدن)...شيء منطقي وبديهي
واستقبلت اول جنيه معدني بالشكر والامتنان لحكومتنا الرشيدة اللي قررت تحدث الجنيه المصري وتمدنه وتهيئه وتخليه في شكل جديد بنفس الطعم الرائع...اقصد القيمة طبعا
وفوجئت على مدى اسبوع ان التعاملات بالجنيه والنص جنيه اصبحت اغلبها معدنية بس في اتجاه واحد..اتجاهي فقط (يعني الدفع بالجنيه المعدني انما بقية الحساب مني اليهم تبقى بالجنيه الورقي)...قلت اكيد دة لأن الجنيه المعدني لسة جديد بقى ومش واخدين عليه...مكسوفين منه شوية
اخر الاسبوع تكدس الدرج بكمية لا بأس بها من الجنيهات المعدنية اللي محدش عايز يأخدها تاني....اصبحت فلوس ميتة....حسيت ان الجنيه المعدني الشيك المؤدب دة (جربان) لامؤاخذة..محدش عايز يلمسه
كل ما اجي ارد بقية حساب ويكون في الباقي جنيه معدني احس ان الجنيه المعدني دة بيكهرب الزبون....
لا لا لا لا يا دكتور...بلاش الجنيه دة...بدله بجنيه عادي
طب ليه بس....ماله الجنيه المعدن دة يعني؟
محدش بيرضى ياخده....مابيرحش
(ما بيرحش...يعني غير قابل للصرف والتداول)
وطبعا ايثارا للسلامة وحفاظا على الزبون (بمنطق الزبون دائما على حق)..بأضطر اني اضع الجنيه المعدني في مكانه الوحيد والمفضل وهو درج مكتبي واستبداله فورا بجنيه ورقي محترم بيقبل الصرف والنحو كمان
واصبحت قاعدة الا استقبل او ارسل اية جنيهات او انصاف جنيهات معدنية من و الى زبائن الصيدلية على الرغم من عدم اقتناعي او فهمي او ادراكي لأي سبب وجيه يجعل من الجنيه المعدني كائنا منبوذا مستحقرا مستجنا بالشكل دة خاصة ان اخواته الخمسة والعشرة قروش واخوه الربع جنيه المعدن بيتم معاملتهم بكل تقدير واحترام
اكتشفت بعد فترة من قراري حظر التعامل بالجنيه المعدني في الصيدلية (اللي انا مستغرب له اساسا)..ان الموقف الجماهيري السلبي تجاه الجنيه المعدني اصبح (سلو) بلدنا....وان معارك يومية بتدور رحاها بين جموع المطحونين وسائقي السرفيس بيكون سببها ومحورها سفير جهنم الملقب ب(الجنيه المعدن)
الموظف او الفلاح المطحون بيدفع اجرة الميكروباص (السرفيس)...بالجنيه المعدن....والسيد سائق الميكروباص مش عاجبه الكلام دة على اعتبار انه عملة راكدة...(مابتروحش) يعني
و الاثنين معذورين..الأثنين لهم منطقهم....الموظف (كما حكى لي احدهم) بيقبض اكثر من نصف مرتبه جنيهات معدنية (مرتبه 300 جنيه)...بيلاقي نفسه ماسك في ايده 150 قطعة معدنية..طبعا بيتخانق مع الصراف اللي بدوره بيعلل ذلك ان البنك هو اللي صارف المرتبات بالشكل دة وانه غصب عنه مضطر انه يقبض الناس مرتباتهم عملات معدنية وان الكل هيقبض مرتبه بالشكل دة نص المرتب ورق والنص التاني معدن
انما طبعا-والكلام مازال للموظف-الكبار اللي مرتباتهم بالألف والألفين لا تنطبق عليهم قاعدة المعدن والورق دي...مرتباتهم كلها بالصلاة ع النبي ورق من ابو200
وبالتالي الموظف غصبا عنه لازم يدفع للميكروباص بالعملة المعدنية اللي بدوره بيلاقي صعوبة في تصريفها لرفض الناس التعامل بها
وبالتالي اصبحت القصة شبيهة بقصة البيضة والفرخة واصبح الكل يدور في حلقة مفرغة
الناس معاها جنيهات معدنية مضطرين للتعامل بها.....المحلات بترفض التعامل بها.....وان قبلوا فأن الناس بترفض التعامل بها وكنتيجة لرفض الناس التعامل بها ...ترفض المحلات قبولها
على الرغم ان الجنيه الورقي جنيه...والجنيه المعدني جنيه برضة......بس لله في خلقه شئون
الغريب والعجيب ان الظاهرة دي مش موجودة بالشكل دة في المدن....انما هي ظاهرة ريفية بحتة...وكأن في تار بايت او عدم استلطاف بين المواطن المصري الريفي وبين الجنيه المصري المعدني على الرغم ان كلاهما مصري وكلاهما مطحون وكلاهما اكل عليه الدهر وشرب وفرمته الحياة وعمايلها
طب والحكومة فين من الكلام دة؟
ودن من طيــــــــــــــــــــــــــــن واخرى من عجــــــــــــــــــــيــــــــــــــن
العملات المعدنية موجودة في جميع دول العالم ولها قيمتها واحترامها الا فيكي يا مصر...ليه ؟ مش عارف
مين السبب في سوء التفاهم دة؟ مش عارف
ليه الموقف دة من الجنيه المعدني؟ مش عارف
طيب ايه الحل؟ مش عارف
مش عارف....مش عارف...مش عارف..............يبقى انت اكيد...اكيد في مصر

45 comments:

  1. انا بتعامل بالجنيه المعدني عااادي معنديش اي مشكله
    واضح ان في فتنه طائفيه في الموضوع بين المعدني و الورقي و تفرقه عنصريه

    ReplyDelete
  2. مش حكايه فلاحين او صعايده يااحمد كل الحكايه بيتهيالى ودا اللى سمعته ان الجنيه المعدن بيقع منهم او بيعمل صوت او ممكن يتلخبطو بينه وبين العملات المعدنيه التانيه عشان كدا مش بيحبوه

    بس احنا بنتعامل بيه عادى بس بتبقى محتاج لسره دنانير عشان تشيله فيها

    ReplyDelete
  3. ههههههههههه
    كنت لسه هقولك يبقا انتا اكيد فى مصر
    لقيك قولتها
    طب والله فعلا مش فاهمة ليه
    انا بردو لما اكون هشترى حاجة بكسف ادى الفلسو المعدن اوى
    على اساس انها شبه البريزة
    والشلن
    فتحس انها عملة عبيطة كدة مش فاهمة الموضوع بردو
    ولما باجى اخد باقى بقول لاء عايزة ورق بس عشان بخاف المعدن يقع منى

    ReplyDelete
  4. معاك حق جداا
    ونا راكب اي مواصلة بلاحظ ان معظم الناس اللي بترفض العملات المعنية هما اللي جايين من الاقاليم
    وحتى واحنا ف طابور التذاكر بتاع المترو ممكن تصل خناقات بسبب الحكاية دي فعلاا

    الفكرة انهم بيشيلو هم الفلوس المعدنية دي ازاي يحطوها ف جيوبهم وانها معرضة تقع منهم من غير ما يحسوا
    واشياء من هذا القبيل
    :D

    أحييك ع الموضوع ده يا دوك

    ReplyDelete
  5. ههههههههههههههههههه

    انا معايا برضة كام جنية معدن مش راضين يتصرفوا وفعلا لاحظت الموضوع ده فى الارياف اكتر لما كنت فى اخر زيارة لبلدنا والمحلات هناك ما بتاخدش معدن
    ههههههههههههههههههههههههههه

    ReplyDelete
  6. السلام عليكم ورحمة الله وبركاته


    هههههههههههههه

    كان عندنا كده في الاول بس الحمد لله الناس ربنا هداها وبقوا بيتعاملوا عادي مع النص جنيه والجنيه المعدن

    لعلمك بقي الجنيه ده انا بحبه جدا شكله شيك كده وعامل زي العملات الاجنبيه دا حتي قعدت اجمع فيه شويه كده لحد ما بقي عندي مج ماليان جنيهات وفي الاخر ختها كلها في كيس وصرفتها في السوق عادي جدا

    -------
    في حاجه مش عارفه اذا كنت تعرفها ولا لاء

    تعرف ان وزارة الماليه بعد ما عملت الجنيه الفضي دي جت تشوف سعر التكلفه بتاعه ايه لقت ان قيمة الجنيه بمعني قيمة المعادن اللي داخله في تصنيعه اعلي بكتير من قيمته الشرائيه وان ده واقف عليها بخساره
    فابدات تلم اللي طرحته في السوق وتصنع دفعه جديده اقل تكلفه من القديمه عشان كده احيانا تلاقي معاك كام جنيه معدن بس مش كلهم بنفس الجوده القديم اثقل وبيلمع اكتر
    وبما ان انت عندك ثروة معدنيه ابقي افرزهم ولاحظهم حتي كده

    :))))))))

    سلام

    ReplyDelete
  7. اللينك ده فيه تفاصيل اكتر

    http://www.alaswaq.net/articles/2008/07/31/17539.html

    ReplyDelete
  8. ياربي لما يكون معايا مش بيرضى حد ياخده ابدا والله فبقيت لما حد يدهولي مش بوافق انا كمان

    ReplyDelete
  9. هنا في القاهرة في اول بدايات ظهور الجنية المعدني
    كان نفس رد الفعل

    كنت بخاف احاسب بيه التاكسي
    و علشان مايرفضدش كنت بزوده
    (بس لو هياخد جنية معدني فقط)

    لكن اهه الحمد لله الناس اتعودت خلاص
    و رضيت بالامر الواقع

    ReplyDelete
  10. طبعا انا بره مصر بقالي سنتين مشفتش الجنية المعدن لكن قبل ماأسافر كان الموضوع مثار والناس كانت متخوفه من إنه الفلوس المعدن ممكن تقع منهم بسهولة ومن غير ما يحسوا بيها وإذا ده مبررهم لعدم التعامل فيها عندهم حق
    بس موضوعك ده فكرني بدراسة كنت قريتها من زمان عن تعامل الشعب المصري مع العملة الورقيه وإنه من أسوأ الشعوب تعاملا معاها وإنه صاحب إختراع إنه يكتب عليها إسمه وللذكري الخالدة والكلام العبيط ده ....المهم لما سافرت السعودية لقيت مرة ريال سعودي مكتوب عليه قلت الله طيب ماهو فيه ناس تانية بتكتب على الفلوس أهه بقرأ المكتوب لقيت أخينا كاتب "للذكري الخالده محمد المصري مركز دكرنس دقهلية"

    ReplyDelete
  11. يا استاذ انا اتعقدت من الموضوع ده
    لماكنت في مرسى مطروح لقيت الناس بيقولوا ان العمله دي مش ماشيه معاهم
    وفي مدينة 6 أكتوبر حيث ان كل السواقين من الفيوم لما بحاسب العربيه اللي بتوصلني المصنع المفروض ادفع 3 جنيه
    الائي السواق بيقولي -لأ يا شيخ دي مش بتمشي هنا- الحقيقه قلت له هو انا امي اللي عاملاها ولا انا جايبها من بيتنا
    يقولي أصلها بتقع مني
    قلت له هو انت عيل صغير عشان تقع منك
    المهم انه بيقول اي كلام وخلاص عشان مش عاوز جنيه معدني

    ReplyDelete
  12. انا حصلي نفس المشكله قبل كده في ميكروباص بس مع العشره صاغ الورق و الخمسه صاغ الورق
    اللي كانوا لنهم ازرق و احمر ضغنيني كده
    و كان لسه التداول معاهم
    و انا معايا فلوس مجمده و اكيد مش هفك عشرين جنيه مثلا عشان اديله خمسه صاغ
    و ده ايمانا مني برضوا ان الفلوس لما بتتفك بتتصرف بسرعه
    هههههههههههه
    المهم يهديك يرضيك وصل معايا الموضوع اني قلتله ما هو انت لو مرضتش تاخد الفلوس اللي هي فلوس دوله و هي اللي طبعاها انا مش طابعاها في حمام بيتنا
    هاخدك علي القسم دلوقتي ووريني بقي ازاي مش هتاخد الفلوس و تقولي دي مش ماشيه يا ابله
    و في اّخر الخناقه
    لقيت نفسي الحمدلله قدام الشارع اللي نازله فيه
    بس طبعا تعكير دم و السلام
    بحس ان الشعب عندنا متسستم و عدو التغييير
    حافظ مش فاهم

    ReplyDelete
  13. أنا شايفة انها مسألة وقت
    لأننا مش واخدين على أي تغيير في بلدنا أصل احنا عشريين قوي ، و الدليل ...أكيد انت عارفه :))
    عجبنى قوي قوي البوست بتاع لست زعيما
    إنت حللت وجهة نظري انا كمان في الموضوع بشكل تفصيلى
    آسفة على الغياب فاتني كتير لكن انا متاكدة انك هتعذرني :))
    تحياتي الخالصة

    ReplyDelete
  14. ههههههههههه
    بالعكس والله ده حتى شكلة ظريف
    انا بجد بحبه و اساسا مش بحب اصرفه
    لما بيقابلني بحتفظ بيه ليا
    و بعينه عندي ف الدرج

    طيب ما تديني شوية من الدرج بتاعك ياابو حميد

    بس على فكرة اوقات برضه في الميكروباصات بشوف ناس بترفض تتعامل بيه و بستغرب جدا
    و اوقات بحل المشكلة لو معايا جنهات ورق ببدل معاهم
    و اخد منهم الجنية المعدني

    عموما هي فترة كده و هيتعاملوا بيه
    هما المصريين عمرهم قدروا يقولوا لحاجة لاء
    سياسة الأمر الواقع

    ReplyDelete
  15. الحكومه مطنشه لأنها بتسحب الجنيهات الورق من السوق وبتطرح المعدني
    وده السبب ان المهيه يكون فيها جزء معدني
    عشان تجبر الناس انهم يتعملو بيه
    يعني هي عارفه انهم لما مش هيكون قدامهم غيره هيتعاملو بيه غصب عنهم
    احنا هنا فعلا معندناش اي مشكله في التعامل بيه
    الجنيهات الورق اصلا خلاص بتنقرض

    ReplyDelete
  16. الأستاذ الفاضل/ أحمد سمير
    صاحب مدونة / الأغلبية الصامتة
    اعتذر عن الخروج من موضوع التدوينة، ولقد أرسلت لك رسالة هامة عبر البريد.
    أرجو الاهتمام والرد سريعا.
    تحياتي وتقديري
    شيماء إسماعيل
    باحثة بالماجستير- كلية الآداب جامعة القاهرة.

    ReplyDelete
  17. Emy:
    يا بختك يا ايمي
    انتي مش من البلد دي ولا ايه؟
    دة انا متوقع اندلاع حرب اهلية قريبا بسبب موضوع الجنيه المعدني دة
    تحياااتي

    ReplyDelete
  18. انا حرة:
    بيقع منهم ايه بس؟؟؟
    دة لو قرش صاغ هيحطوه في رموش عينيهم
    كل الحكاية ان الحكومة لم تهيىء الناس ولم ترشدهم للتعامل بالعملات الجديدة دي
    وكمان كسل في تطبيق القانون لأن الأمتناع عن التعامل بالعملات المعدنية دي تعتبر مخالفة قانونية
    نحياتي واحتراماتي

    ReplyDelete
  19. البنت المشمشيةحلوةبس شقية:
    على فكرة
    في اوروبا والدول المتقدمة بيتعاملوا بالعملات المعدنية دي في كل حاجة من غير كسوف
    ممكن تدفعي بيها حساب في كافيه او تشتري بيها جورنال....انما هنا بأحس ان العملات المعدنية بتعمل اكتئاب للناس..زي ما يكون شكلها حرام او مبتذل
    تحياتي واحتراماتي

    ReplyDelete
  20. الالام وامال:
    طيب والحل ايه؟
    مفيش اي حملة توعية للناس؟
    اي حد يقول لهم ان دي فلوس شغالة برضة....مش مضروبة بالنار؟؟؟
    عجبت لك يا زمن
    تحياتي واحتراماتي

    ReplyDelete
  21. هههههههههههههههههه

    لا جامده
    بتفكرنى زمان بالعشرة قرش الورق والمعدن
    نفس الفكرة تقريبا الانها كانت العكس محدش عايز يستخدم الورق اصل العشره قروش الورق مبتروحش
    هههههههههههههههههه

    بلد شهادات صحيح

    ReplyDelete
  22. تحويل الجنيه إلى عملة معدنية هو اعتراف ضمني من الحكومة إن الجنيه أصبح بلا قيمة .. مثلا في دول الخليج الدرهم والريال عملة معدنية .. يادوب ممكن تشتري بيه مصاصة ولا باكو لبان .. مش عارف طبعا الجنيه في مصر لسة بيجيب مصاصة هو كمان ولا ايه

    ReplyDelete
  23. كمان شئ

    الناس لما بتشيل الجنيه الورق بتحس ان لسة له قيمة .. الجنيه المعدن بيحسوا ان زي الشلنج والبريزة .. طبعا الشلنج دي عملة المانية :)

    ReplyDelete
  24. bosbos:
    احسن مكان بيتصرف فيه الفلوس المعدن دي من غير ولا كلمة
    هي محطات دفع الرسوم على الطرق الصحراوية او الزراعية
    بياخدوها من سكات
    وعلشان انا بأسافر كتير بأحوش العملات المعدنية دي علشان الكارتة
    تحياااااتي

    ReplyDelete
  25. خمسة فضفضة:
    يا بختك والله يا دكتورة
    انا بقى الناس اللي عندي لسة ربنا لم يأذن بهدايتهم و لسة برضة حالفين ماهم ماسكين العملات المعدنية دي
    بصراحة المعلومة دي ماكنتش عارفها
    منكم نستفيد وشكرا على اللينك
    تحياتي احتراماتي

    ReplyDelete
  26. حاسوباتية:
    ماهي دي سبب الازمة
    ان الناس اللي كانت بتتعامل بيها عادي لما لقيوا انها بتعمل لهم ازمة في الصرف...بطلوا يتعاملوا بيها
    ربنا يسهل وتنحل العقدة دي
    تحيااااتي

    ReplyDelete
  27. عارف ان اللي يرفض يتعامل بعملة بلده ده يبقي مخالف لقانون النقد والإئتمان ومفروض انه يتاخد أمل دولة بس عارف ان الحكومة نفسها بترفض تتعامل بالنقود المعدنية يعني وانا في زيارة لدار الاسلحة والذخيرة وهو موطن الجيش يعني الحكومة يعني السلطة يعني اللامؤاخذة القانون بيرفضوا يتعاملوا بالعملة المعدنية وكأنها رجس من عمل الشيطان واذا كان رب البيت بالدف ضاربا فشيمة اهل الدار الرقص والمسخرة والعياذ بالله
    ابقي حوشهم احسن لك واديهم عديات في العيد والا انت لسة ماتكلفتش بدفع العيدية
    كلف نفسك وساعتها اديها لعيال العيلة واللي يفتح بقه ويقول بم احرمه من الميراث قصدي العيدية

    ReplyDelete
  28. انا كنت كتبت بوست قبل كده عن الموضوع ده لانى بردو اتقرصت منه عندنا فى بلقاس محافظة الدقهلية وفى المنصورة بردو السيرفسات مبترداش تاخدو
    ونص المحلات مش بترضى مش عارفه يعنى اتعملت ليه طالما محدش بياخدها

    ReplyDelete
  29. و الله كلامك جميل يا احمد
    و الموضوع ده غيظنى جداااااا
    كل ما فعلا اتعامل بالجنيه المعدنى الاقى حد يقولى لالالا اصله بيقع منى
    و عمرى ما هخدة و لو حبيت ارخم انا شوية و اقوله مفيش غيره يبصلى و يبقى هيتخانق
    اقوم انا بكل ادب و احترام مطلعه جنيه ورقى و اديهوله

    طب ليييييييه بقى محدش عارف
    هو بينى و بينك يعنى الجنيه قلت قيمته اوى بعد موضوع المعدن دة

    ReplyDelete
  30. mony:
    هنا بقى في الاقاليم لسة سوء التفاهم موجود وبشدة
    ربنا يهدي
    تحيااااتي

    ReplyDelete
  31. kareem barakat:
    هههههههههههههههههههه
    هي دي بقى الكوميديا بجد
    ايه يابني دة؟
    المصري مصري في اي وقت واي مكان
    حيوية وعزم وهمة
    تحيااااتي

    ReplyDelete
  32. لورنس العرب:
    بلد اقل ما يقال عنها انها
    فوضــــــــــــــــــــــــى
    سايـــــــــــــــــــــــبة
    لا حول ولا قوة الا بالله
    تحياتي

    ReplyDelete
  33. والله أنا بقيت أتخنق من الموضوع ده
    كل ما اجي حد الجنيه المعندي يبصلي كأني تفيت عليه مثلا
    مش عارف بجد ايه الحل
    تحياتي يا احمد

    ReplyDelete
  34. koukawy:
    لما يبقى الشعب دة سلوكه في التعامل مع عملاته الوطنية
    يبقى حلال اللي بيحصل فيه والله
    تحياتي

    ReplyDelete
  35. الحلم العربي:
    اتعشم انها تكون مسألة وقت
    انما انا شايف انها مسألة جهل واستعباط
    تحيااااتي

    ReplyDelete
  36. kareem azmy:
    زي ما يكونوا بيتعاملوا بالشيكل الاسرائيلي
    حاجة عجيبة جداااااا
    شعب غريب....ولو جالهم اوامر انهم يتعاملوا بيه والاالكربااااج
    هتلاقيهم كلهم بيتعاملوا بيه زي ال
    ولا بلاش
    تحياتي واحتراماتي

    ReplyDelete
  37. esraa:
    يا بختكم يا اسراء
    احنا بقى عندنا المشكلة الاساسية هي الجنيه المعدني
    والورقي لسة له احترامه ومكانته وتقديره
    مش عارف يا اسراء حاسس ان انا وانتي مواطنين في دولتين مختلفتين
    تحيااااااتي

    ReplyDelete
  38. Shaimaa Ismail:
    تم الرد يا استاذة شيماء
    بالتوفيق ان شاء الله
    تحياتي واحتراماتي

    ReplyDelete
  39. shaymaa:
    فعلا والله
    نفس الفكرة بس الاختلاف في ان المشكلة في العشرة قروش والشلن في الورق بينما يتعامل الناس بالمعدن
    بلد عجيبة وشعب اعجب
    تحيااااتي

    ReplyDelete
  40. عالم حبيب:
    عندنا هنا في مصر....في انواع كتير من المصاصة واللبان اغلى من الجنيه بكتيـــــــــــــر
    تحياتي واحتراماتي

    ReplyDelete
  41. المفقوعة مرارتها:
    اللي انتي بتتكلمي عنها دي هي الدول المحترمة اللي بتحترم مواطنيها و مواطنوها بيحترموا القانون
    اما الحياة عندنا مش كذلك
    تحيااااتي

    ReplyDelete
  42. هوندا:
    واضح فعلا ان الحالة العجيبة دي حالة عامة
    ربنا يشفي المصريين يارب
    تحيااااتي

    ReplyDelete
  43. Rania:
    انتي بقى هنا اللي غلطانة يا رانيا
    لازم تصممي على موقفك
    مفيش غيره يعني مفيش غيره
    انما انتي اللي قلبك طيب
    ساعات لما بتطلب معايا رخامة على البشر اتعامل بالجنيه المعدن دة
    تحيااااتي

    ReplyDelete
  44. micheal:
    الحل ان احنا نسيب البلد العجيبة دي يا عم مايكل
    يشبعوا بجنيهاتهم الورقية والمعدنية
    عايزين نقفش دولارات يا عم

    ReplyDelete
  45. السلام عليكم
    موضوعك فعلا يتناول ظاهره كلنا نلمسها فى تعاملاتنا وخصوصا فى المناطق الريفية
    ومن وجهة نظرى المتواضعة جدا اعتقد ان هذا عامل نفسى ...نقول يعنى ايه
    لان الناس دايما معتقده ان الجنيه ده ورقة كبيرة كده وليها قيمتها ويشعرون انهم يقدروا يشتروا بيها كل حاجة حتى لو كانت العتبه الخضرة وفجأتن كده يلاقوه اتسخطت وبقا شبه العشرة قروش وعندئذ تحدث الصدمه النفسيه ويتم الرفض النفسى والمادى لهذه الصوره للجنيه ابو مدنه زى مابنقول فى ريفنا المصرى
    وده مجرد راى ..مش عارفه ايه رايك

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails