Saturday, 31 January 2009

عادل امام....لست زعيما



لو سألتني عن رأيي المتواضع في عادل امام؟
سأرد عليك بسؤال:
تقصد اي عادل امام فيهم؟!!!!! عادل امام (البني أدم) الأنسان يعني ولا عادل امام الفنان؟
بالنسبة لي هناااااااااك فرق كبير بين الاثنين
فعادل امام الفنان لا تستطيع تقييمه الا داخل الاستوديوهات ودور العرض السينمائي.....وهو فنان قدير ولكنه ليس زعيما كما يلقب نفسه او كما يلقبه مريدوه
لعادل امام اعماله الفنية الرائعة ولكنه ايضا له اخفاقاته....فله افلامه القيمة سواء الكوميدية منها او التي تحمل رسالة ومضمون وفكرة وله ايضا بعض الاعمال التي لا تستطيع ان تصفها الا ب ال...(الهلس) او التفاهة لمجرد التفاهة
واذا ذُكر عادل امام كبطل لفيلم فعليك ان تسأل فورا او تخمن مع اصدقائك عن عدد القبلات الساخنة (البوسات) داخل الفيلم...وعن المنافسة الساخنة التي تنشأ بين بطلات الفيلم عن ايهن ستظهر امكانياتها الجسدية اكثر من الأخرى
واصبحت اغلب افلام عادل امام عبارة عن قبلات ساخنة ومشاهد مثيرة تم توليف وتركيب حدوتة عليها لكي تصبح فيلما سينمائيا والأهم ان ينبسط الزعيم
ولكي تتأكد من صدق كلامي راجع مشاهد عادل امام ويسرا في طيور الظلام ومشاهده مع وفاء عامر في الواد محروس بتاع الوزير ومشاهد نيكول سابا في التجربة الدنماركية و ومشاهده مع شيرين في بخيت وعديلة.....وكل دة على سبيل المثال وليس الحصر
وعلى الرغم من بعض هذه الأفلام قيمة فعلا وجيدة فنيا الا انك تخجل من ان تشاهدها مع اسرتك فعادل امام مشاهده الساخنة لا ترحم...وأهم ما في الفيلم ان (الزعيم)....يكون مبسوط
لدرجة انك لو اعلنت انك دخلت فيلم لعادل امام لابد ان تواجه السؤال التقليدي اياه..(الفيلم دة كالعااااادة برضة؟؟؟) زي بقية افلام عادل امام؟
لدرجة ان فيلم زي (حسن و مرقص) كان هو الأستثناء والشاذ عن كل افلام الزعيم لمجرد خلوه من اي مشهد سااااخن؟؟
الناس بجد كانت مذهولة و مش مصدقة ان فيلم لعادل امام يخلو من (بوسة) واحدة...وفيما يبدو انه اضطر لذلك آسفا حيث ان دوره كقس يحتم على الشخصية ان تتسم بالوقار والأحترام المطلوب لشخصية رجل الدين
لو راجعت تاريخ عادل امام الفني هتعرف قد ايه هو اتمرمط فنيا في بداياته (راجع مسرحية السكرتير الفني..لما كان كاتب محامي لفؤاد المهندس...او عفريت مراتي لما كان سنيد للبطل صلاح ذو الفقار او لصوص لكن ظرفاء لما كانت البطولة مشتركة مع احمد مظهر)....الخ
كل دة مش عيب....بالعكس دة شرف له انه يطلع السلم من أوله......انما العيب انه يعوض كل الضرب والمرمطة اللي شافها وهو صغير لقبلات واحضان ساخنة وهو كبير وكأن لسان حاله
اصبح نجما......لينتقم
اكثر ما يستفزني في عادل امام هو انه قرر ان يكون فنان شامل بحيث يكون قادرا على لعب جميع الأدوار
فهو كوميديان مصر الأول...ولا مانع من فتونة فريد شوقي....وجاذبية عمر الشريف..ورومانسية عبد الحليم حافظ...وأبوة حسين رياض
عادل امام غير قابل لأن (يُضرَب)....في أفلامه.....عادل امام (يضرَب) بس....يستفزني جدا مشهد طلعت زكريا في فيلم (التجربة الدنماركية) وهو يستجوب (عادل أمام) في الفيلم وبدلا من ان يضرب عادل امام (بالقلم) يقوم بضرب اللي جنبه بدلا من ان يضرب الزعيم
فالزعيم غير قابل للضرب....الزعيم (يبوس) بس
وطبعا الفيلم لابد ان يكون ذو رسالة.....فيلم ضد الأرهاب...فيلم ضد الفساد....فيلم ضد مافيا المحاماة.....فيلم ضد الفتنة الطائفية....فيلم يناقش قضية الأب المتسلط....فيلم عن فساد الكبار.....الخ
ولكن هل يؤمن عادل أمام الأنسان بقضايا افلام عادل امام الفنان؟؟؟؟
من يوم ما وعيت ع الدنيا وفنانينا العظام بيصدعونا بكلمات عن مصداقية الفنان وان الممثل لا يستطيع تمثيل اي دور فني الا اذا كان مؤمنا بالدور ومقتنع به تماما خاصة الأدوار السياسية والتي تعبر عن موقف معين
الا ان الفنان عادل امام قد شذ عن القاعدة تماما فمعظم افلام الفنان العظيم تنحاز للمواطن الغلبان الكادح ضد سطوة الحكومة وعنف الأمن بداية من (اللعب مع الكبار) وقبلها (احنا بتوع الأتوبيس) والذي تناول بشدة احوال المعتقلات المصرية ولكن في العصر الناصري واللي اعتقد انها لم تختلف كثيرا عن معتقلات هذا العصر مرورا ب( الأرهاب والكباب) والذي تناول البيروقراطية الحكومية وطريقة تناول الداخلية المصرية لأي ازمة طارئة وطرق تعامل الدولة مع الأزمات
كل الأفلام الجميلة دي والتي استطاع من خلالها الفنان (عادل أمام) ان يصل لقلب وعقل المواطن المصري المطحون لم تشفع له لكي ينحاز (عادل امام) الانسان لنفس المواطن ضد نفس النظام والحكومة
فالأنسان (عادل امام) يعشق الأضواء ويعشق السلطة ومنحاز للحكومة والنظام بحق وبدون حق وعلى عكس الفنان (عادل امام) فأن الأنسان (عادل امام) لا علاقة له على الأطلاق بالمواطن الغلبان بل اعتقد انه بيقرف منه اساسا وهو في حد برضه يسيب حضن السلطة الدافي المعطر لكي ينحاز للفقراء والمساكين اللي حضنهم مليان بالفقر والمرض والعرق
ففخامة (الزعيم) يرى ان الأفلام اللي بيمثلها ورسائل الأحتجاج التي يرسلها من خلال السينما ما هي الا (شغل سيما) ليست اكثر...انما الواقع مختلف تماما عن السيما
فالمتظاهرون الساخطون على اوضاع البلد من وجهة نظر (فخامته) ناس فاضية......اما مظاهرات التنديد بالعدوان على غزة فهي (مضرة) بالأقتصاد القومي......على اساس ان الأقتصاد القومي في أحسن حالاته بدون مظاهرات
اما (حماس) من وجهة نظر (فخامة الزعيم) فهي المسئولة عن العدوان على غزة بأعتبار ان اسرائيل لن تقابل صواريخ حماس بالورود
مش عارف دي وجهة نظر اي (زعيم) فيهم؟؟؟؟؟!!!!!!
اما الأخوان المسلمين فهم الشغل الشاغل للزعيم.....فجميع افلامه لا تخلو من تلميح او تصريح للأستهزاء من جماعة الأخوان المسلمين بسبب او بدون
راجع جميع افلام (عادل امام) بداية من فيلم الأرهابي وستكتشف انها جميعاااا بلا استثناء تتناول جماعة (الأخوان المسلمين) او الأسلاميين بشكل عام
اما في مشهد هزلي يسخر منهم او مشهد يتناولهم في صورة ارهابيين او متخلفين او لديهم شهوات جنسية مكبوتة....الخ
رغم ان فخامة (الزعيم) يعلم تماما ان ليست كل الجماعات الأسلامية على هذه الشاكلة فمعظم هذه الجماعات خاصة (الأخوان المسلمين) لديها كوادر في منتهى الأخلاق والذكاء والأحترام والمكانة الأجتماعية وهو نفسه قام بمصاهرة احد اقطاب جماعة الأخوان المسلمين (معتقل حاليا)
الخلاصة اني ارى ان (عادل أمام) الفنان يختلف تماما عن عادل امام (الأنسان)....فكلاهما له مواقفه المختلفة تماما وربما المتناقضة مع الأخر
فسواء (عادل أمام)...الفنان او الأنسان فهو ليس زعيما
فالزعيم هو من ينحاز للناس......هو من يبيع السلطة واضواءها وبريقها...هو من يقدر نبض الشارع ويحترم مشاعر جماهير أحبته بل عشقته...لا ان يتهمها بأنها (ناس فاضية) لمجرد انهم يعبروا عن غضبهم من سياسات حكومات لا تقدر مشاعرها
و (الزعيم) لا يعتمد في افلامه على (الأفيهات) الجنسية والمشاهد الخارجة .......(الزعيم) الذي يحترم جمهوره لا يرفع اسعار تذاكر مسرحياته لمبالغ فلكية بحيث لا يحضر مسرحياته الا المليونيرات وعلية القوم فقط
فهم جمهوره الحقيقي فعلا
استاذ عادل امام
عفوا.........انت لست زعيما

37 comments:

  1. بصراحه عادل امام مهما ضحكنا الا ان معظم افلامه اهدافها سيئه للغايه

    وافكاره الفاسده دى تنم عن قلب فاسد

    ربنا يهديه ويهدينا

    ReplyDelete
  2. عادل امام مشخصاتى وليس فنان . فالفنان لابد ان يحمل رسالة او قضية يدافع عنها وعادل لايحمل اية قضية غير حسابة فى البنك ورضا السلطة عنة وفى سبيل ذلك يخدر وعى البسطاء بأدوار الفقير الغلبان الذى ينتصر على الاغنياء الاقوياء بفهلوتة وذكائة الفطرى, ولامانع من ان يحقق المستحيلات بسلاح الفهلوة فقط. كلامة فى السياسة يفضح جهلة الشديد بها ويضعة - من الضعة- فى خانة المنافقين المنتفعين بحماية السلطة وبالتالى يحقق لة استمرار الشهرة ةالاضواء فضلا عن منافع اخرى لانعلمها. عادل امام اصبح مجرد مهرج مضحك من مهرجى القصور وتخلى عن ناسة واهلة والمجتمع الذى جاء من قاعة. عادل امام باع كل مبادئة لمافيا الحكم فى مصر واصبح -بقصد اوبدون قصد -طابور خامس يخدر وعى البسطاء ويذيع بيانات مخبرى الداخلية فى الفضائيات وهى بيانات ذليلة راكعة... ضد المقاومة ومع العدو ... ضد الشعب ومع السلطة ... ضد الحرية ومع التوريث والتزوير ... عادل امام اصبح كما يقول الصعايدة"واكل ناسة"وسيذكر بعد عمر طويل مع المحبظين ومهرجى السيرك. حسن على

    ReplyDelete
  3. عارف والله يا احمد انا طول عمرى بفكر نفس التفكير دده
    واقول ازاى الناس كلها بتحبو كدة وهو تقريبا معظم افلامو بصراحة فيها قلة ادب
    يعنى كل الكلام اللى انتا قولتو ده انا متفقه معاك
    ده مش الزعيم
    الزعيم من وجه نظرى هو محمد صبحى اخلاق وفن راقى
    واحترام للمشاهد والاسرة مش فيلم اكسف اشوفو وانا مع اسرتى
    بجد الموضوع المرادى مية مية

    ReplyDelete
  4. نسيت ان ابعت نصيحة لعادل امام النصيحة تقول:" خيرا لك ان تسكت حتى يظن الناس انك جاهل بدلا من ان تتحدث فتثبن لهم ذلك" بس خلاص حسن على

    ReplyDelete
  5. مين عادل امام ده
    ماهم دول الرويبضه للى الرسول عليه الصلاة والسلام قالنا عليهم

    ReplyDelete
  6. بخصوص عادل امام الفنان وده اللي يخصني واعرفه فانا اختلف معاك بشده
    انت في اول البوست صورت عادل امام راجل ذو شهوه بيطلعها في الافلام
    زي مايكون ياعيني مش هايعرف يبوس ولا يحضن غير في الافلام........؟؟؟
    حضرتك لو مش مركز بس علي البوس واللي مش بوس وحاولت تشوف مكانه الفيلم في ظل الافلام النص كم الموجوده هاتعرف الفرق..
    واولا واخيرا مافيش حد بيتفق علي نفس الشخص
    اما بخصوص عادل امام الانسان فانا بصراحه ماعرفش اذا كان بيتقرف من الفقرا ولا لا
    دي حاجه تخصه
    انا ماليش فيها
    وبخصوص موضوع غزه وتصريحه اللي قاله ان حماس المسؤله ( علي حسب ماسمعت ) فانا رأي كده من زمان
    ماروحش للغوله واقولها عينك حمرا وانا مش قدها
    ماروحش عند ناس بتتلككلي علي اي غلطه علشان تلاقي مبرر للضرب واديها
    انا لحد دلوقتي مش عارفه صواريخ رمضان بتاع حماس وغيرها عملت ايه غير انها جابت الموت للفلسطنين لحد عندهم ووجدت مبرر هايف لاسرائيل انها تضرب
    ناس شايفه وانا منهم ان حماس عملت بطل علي اجساد شهداء غزه اللي مالهومش ذنب

    رأي وانا حره فيه

    تحياتي

    ReplyDelete
  7. السلام عليكم ورحمة الله وبركاته

    احييك بشده يا احمد علي البوست الجميل ده ومتفقه معاك في كل كلمه قلتها عن اللي فرضوه علينا زعيم بالعافيه

    باحسه منافق وافاق وبتاع كلام واهم حاجه عنده رضا سيده عليه
    تعرف انه تنصل من كل الكلام اللي قاله عن حماس في حديث ليه مع جريدة الفجر وقال مش خايف من تنظيم القاعده دا مايقدرش يعمل حاجه والاعمار بيد الله وخبط فيهم جامد وتقريبا كده لما فاق من اللي كان فيه وتبين انه اهانهم جامد او الله اعلم حد قاله ان الكلام اللي قاله ده خطير رجع تاني وقال انا ماقلتش حاجه والحوار ده كله تلفيق وانا باحترم تنظيم القاعده

    وبالنسبه لانحيازه للفقراء والمساكين دا كله كلام دعايه وضحك علي الدقون ، خد اللينك ده هايبينلك اد ايه هو بيحب الناس الغلابه

    http://www.almasry-alyoum.com/article2.aspx?ArticleID=89246

    ReplyDelete
  8. نسيت اقولك مبروك المدونةالجديده

    ReplyDelete
  9. بوست اكتر من ممتاز



    بجد

    مش لاقية كلام احسن من كده ممكن اقوله

    ReplyDelete
  10. متفق معك في جزء كبير جدامن كلامك ولو أني أحيانا ما اتفق مع بعض اراء عادل إمام في السياسة الخارجية
    تحياتي ع البوست المتميز

    ReplyDelete
  11. هو فعلا ليس بالزعيم

    يمكن زمالن كان رعيم
    باافلامه مثل حب فى الزنزانه واحنا بتوع الاتوبيس وغيرخا من الافلام الكويسه
    انما دلوقت مستحيل

    ReplyDelete
  12. السلام عليكم

    انا متفق معاك يااحمد فى كل كلمة قولتها فى البوست ولايوجد اضافة عندى

    ربنا يكرمك

    تحياتى

    ReplyDelete
  13. تحليلك رائع اوي والله قلت كلام كتير كنت عاوز اقوله
    تحياتي

    ReplyDelete
  14. حقيقي يا دكتور احمد أنت جبت الخلاصة
    واللي ناس كتير قوي ملاحظاها
    سواء عن موضوع المشاهد الساخنة في افلامه أو غيرها
    وبصراحه المفروض أن يركز في عمله كممثل بيؤدي دوره في السينما ولا داعي للتصريحات التي لا تدر عليه إلا المشاكل
    وسخط الناس
    العجيب بقى ان الدكتور اشرف زكي نقيب الممثلين عمل مؤتمر بخصوص الموضوع ده وكان متعصب قوي من الناس اللي بتنتقد عادل إمام
    :)
    ربنا يهدي

    ReplyDelete
  15. بجد بجد بجد
    مقال تحفةةةةةةةةةةةةةة
    بكل المقاييس
    الله ينور بجد و عندك حق فكل كلمة
    انا حتى لما بشوفة فلقاء تليفزيونى او كده
    بحسه حد متكبر جدااا
    و كان مره فالبيت بيتك استفزتنى طريقة حوارة بشكل بشع
    و محمود سعد كان فرحان بيه

    تحياتى بجد يا ابو حميد
    بوست تحفة

    اسلام

    ReplyDelete
  16. مع معرفتى شخصيا بيه القليله علشان قابلته عادل امام مثقف جدا جدا بجد مش جاهل خالص وبيقرا كل حاجه تقع تحت ايده
    بس لما قال انا الزعيم مكدبش لانه لقب ممنوح ليه من جهات عليا
    عادل امام الوحيد اللى معاه حراسه خاصه ومش اي حراسه دي حراسه ظباط لدرجه ان فى بعض الاوقات يرافقه رجال قمل الدوله بجد وعلى علاقه شخصيه بتالت رجل فى قمل الدوله ودي معلومات موثوق منها بجد
    عادل امام اول ما بدا كان بيعجبنى فى الابيض واسود وده على فكره كان حاله فى الحقيقه وبعدين تحول بفعل فاعل انا معرفش الفاعل لكن اعرف المفعول به
    :))))))

    ReplyDelete
  17. حسبنا الله ونعم الوكيل فيه وربنا يا يهديه يا ياخده ويرحنا منه بقى


    سلام يا صاحبي

    ReplyDelete
  18. عادل امام الانسان
    انا معرفوش اما عن الفنان
    فبجد زعيم للكوميديا الى بجد
    و ساعات كتير بشوف اهداف و مغزى للافلامه بغض النظر عن كميه المشاهد الساخنه الى ممكن تبقى موجودة
    و بالنسبه للموضوع ده بالاخص
    فا مش هو لوحدة
    فى كمان فنانين كتير اوى بيعلموا اكتر من كدة و من غير هدف

    عامه عادل امام انا بحترمه و بحترم فنه بجد
    اما عن رايه فى الاونه الاخيره
    ففى ناس كتير قالت و عبرت عن رايها و لازم زى ما بنقول راينا نحترم راى الاخرين حتى لو مغاير لراينا
    بس
    تحياتى

    ReplyDelete
  19. المهم ان هو كتير بيقدم افلام عن الاخوان
    و بينتقدهم و بيتريق و بنته متجوزه منهم
    تناقض عادي عادي العالم ملئ التناقضات

    ReplyDelete
  20. د/ عرفة:
    آمين يارب العالمين

    ReplyDelete
  21. حسن علي:
    حتى المشخصاتي لابد ان يؤمن بالادوار التي يؤديها
    الا ان الزعيم لا يؤمن بمثل هذه الخزعبلات
    وزي ما قلت حضرتك اهم حاجة هي السلطة والفلوس
    تحياتي

    ReplyDelete
  22. البنت المشمشية حلوة بس شقية:
    المرة دي بس اللي الموضوع مية مية؟؟؟؟؟!!!
    ماشي يا بني ادمين
    محمد صبحي برضة مقل جدا في اعماله انما اسم النبي حارسه وصاينه مش عاتق من مسرحيات لأفلام ....الخ
    بس فعلا...افلام عادل امام تخجلي ان تشاهديها مع الاسرة
    تحياتي

    ReplyDelete
  23. حسن علي:
    كلام جميل وكلام معقول ماقدرش اقول حاجة عنه

    ReplyDelete
  24. اوعى تفكر:
    صلى الله عليه وسلم
    ربنا يهديه
    تحياتي

    ReplyDelete
  25. عاشقة وغلبانة:
    لا...اكيد هو مش محتاج الاستوديو والافلام علشان يعمل كدة
    وهو دة اللي مجنني....طيب ليه افلامه دائما عامرة بما لذ وطاب؟
    بالنسبة لسؤالك عن عادل امام الفنان واذا ماكان بيعامل الفقراء بقرف فيمكنك الدخول للينك اللي بعتاه خمسة فضفضة في الكومنت بتاعها علشان تعرفي هو بيعامل الفقراء ازاي
    بالنسبة لغزة...دي طبعا وجهة نظرك ولا املك الا ان احترمها
    وطبعا دة رأيك وانتي حرة فيه....اختلاف الرأي بالتأكيد لا يفسد للود قضية
    تحياتي

    ReplyDelete
  26. خمسة فضفضة:
    الف شكر على الكلام الجميل دة
    بالنسبة لكونه فرض علينا كزعيم....فهو دة الاعلام المصري اللي بيصنع النجم او يخسف به الارض
    وبالنسبة للينك اللي اتفضلتي وكتبتيه فهو ابلغ رد على المخدوعين في هذا الرجل
    الف شكر ليكي
    والله يبارك فيكي...منتظرين رأيك في المدونة الجديدة ان شاء الله
    تحياتي

    ReplyDelete
  27. mony:
    الف الف شكر على الكلام الجميل دة
    تحياتي واحتراماتي

    ReplyDelete
  28. micheal:
    اصل المصيبة يا مايكل ان اراءه في السياسة الخارجية مش مبنية على قناعات خاصة به بقدر ماهي تدعيم لموقف الحكومة وبالتالي فهو ليس اكثر من بوق دعائي
    تحياااتي

    ReplyDelete
  29. nody_1987:
    السلطة وبريقها ليس الا
    اصل اللي يجرب العز والهيلمان والسلطة ما يسلاهمش
    تحياتي

    ReplyDelete
  30. Tamer nabil:
    دة شرف ليا يا تامر باشا
    شكرا

    ReplyDelete
  31. Zika:
    دة شرف كبير قوي يا ممدوح بك
    يارب نكون عند حسن الظن دائما
    تحيااااتي

    ReplyDelete
  32. ياسر حسين:
    ازاي يركز في عمله بس؟
    اومال الاغراءات الحكومية والتلميع الاعلامي ييجي ازاي؟
    بالنسبة لأشرف زكي هو بيمارس دوره كنقيب للممثلين بصرف النظر عن موقفه من عادل امام وتصريحاته
    تحياتي

    ReplyDelete
  33. مواطن مصري نايم:
    يا اسلام بك
    الله يخليك
    انا مااستهيلش الكلام الكبير دة كله
    انا كتبت اللي انا حاسس بيه بس
    الف شكر على الكلام دة
    تحياتي واحتراماتي

    ReplyDelete
  34. Appy:
    المصيبة بتكون اكبر يا آبي لما يبقى الفنان قيمة ومثقف زي ما بتقولي كدة وبالتالي بدلا ما يوجه ثقافته وذكائه فيما ينفع الناس بيوجههم الى النفاق والموالسة
    وهنا بتكون المصيبة
    الفاعل معروف طبعا ولا يخفى على احد
    تحياتي واحتراماتي

    ReplyDelete
  35. صاحب المضيفة
    يهديه ان شاء الله
    تحياتي

    ReplyDelete
  36. Rania:
    وجهة نظر يا رانيا ولابد من احترامها
    بس انتي مش معايا ان لازم الممثل لما تكون افلامه ذات قيمة ولها مغزى انه يكون مؤمن بما يقدمه؟
    بمعنى انه بما انه ينحاز للمواطن الغلبان ضد جبروت السلطة يبقى لابد ان يكون منحازا في حياته مش كدة وكدة يعني؟؟
    انتي شايفة ان دة بيحصل؟
    تحياتي

    ReplyDelete
  37. koukawy:
    تناقض
    وهو ايه في حياتنا مش متناقض؟؟؟؟
    تحياتي

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails