Monday, 19 January 2009

غزة مهمة.....مصر أهم


مش عارف اكتب عن ايه؟
عن احداث غزة؟؟؟؟
مش هأضيف جديد..انا شخصيا بدأت اتخنق من موضوع غزة دة...اقرأ صحف الحكومة الاقيهم بيشتموا في ايران وسوريا وقطر وحزب الله وحماس والكل كليلة.....افتح الصحف المحترمة الاقيهم بيشتموا في اسرائيل وبرضة في قطر وسوريا وايران وحزب الله وحماس بس بأسلوب محترم شوية عن الجرايد اياها
و تحولت القضية لحرب كلامية بين مصر وايران وبين مصر وقطر وبين الجزيرة والعربية وبين الأخوان المسلمين والحزب الوطني
برضة الواحد له طاقة...والمرارة برضة مابنلاقيهاش في الشارع,لما بتتفقع مش هينفعني حد....و الطحن الأسرائيلي في غزة اخد كتير قوي من وقتنا وعلى الرغم من اهمية الموضوع الا اني بدأت اشك ان حكومتنا و رجالها ورجال اعمالها متكيفين قوي من موضوع غزة دة ولسان حالهم بيغني ويقول (امانة عليك يا ليل طول)...ماهو موضوع غزة دة حايش عنهم بلاوي متلتلة..وكل البرامج اللي كانت بتؤرق منامهم زي (90 دقيقة) و (العاشرة مساءا) و (القاهرة اليوم)..مسخرة كل حلقاتها لموضوع غزة وضحاياها على الرغم ان (مصر وضحاياها) اولى بكتير بالأهتمام والمتابعة
وعلى رأي الكاتب الكبير ابراهيم عيسى لما قال ان عدد ضحايا العدوان الأسرائيلي على غزة لسة لم يتجاوز عدد ضحايا العبارة (السلام 98)...اللي كانوا ضحايا العدوان الفسادي والأفسادي على مصر
كما انه لن يتجاوز عدد ضحايا حوادث الطرق في مصر سنويا اللي بيمثلوا ضحايا عدوان الفساد والاهمال والامبالاة الحكومية الحزبية الوطنية المصرية
نسينا تماما ان احنا عندنا مشاكل مزمنة ومستعصية ...عندنا كوارث لا تقل عن كارثة غزة وان كانت اصعب....طيب هم مشكلتهم وهتنتهي بكرة او بعده او بعد اسبوع....انما احنا مشاكلنا مزمنة ومستعصية عن الحل على الأقل من المنظور القريب
لما تكتشف ان 170 مليون بني ادم في العالم حاملي لأحد الفيروسات الكبدية وان 12% من الرقم دة في مصر لوحدها...دي تبقى كارثة ولا لأ؟
لما تعرف ان حوالي 30 الف مصري هم ضحايا حوادث الطرق (ما بين قتيل ومصاب)......دة بالنسبة لك رقم مفزع ولا لأ؟
لما يكون هناك 69,000 قضية فساد في مصر من بينها 11,000 قضية رشوة (طبقا لوزير التنمية الأدارية) ذات نفسه.....يبقى فيه مصيبة
لما يبقى في بلدك مليون طفل مشرد (اطفال الشوارع) طبقا لتقديرات اليونيسيف يبقى انت عندك مليون قنبلة موقوتة في شوارع بلدك...ما بتخافش على اهلك وبناتك واخواتك؟
كل دة وغيره نسيناه تعاطفاااا مع غزة
نسينا مصر بمشاكلها بمأسيها ببلاويها وتفرغنا بكامل طاقتنا للأنقسام والتلاسن انا مع حماس وانا مع مصر وقطر دي بنت لذين وايران دي لها اجندتها وحسن نصر الله دة راجل مية مية وسوريا عملت وامريكا قالت واسرائيل عادت......الخ
انا لا انكر اهمية غزة واهمية ما يحدث هناك وتعاطفي الكامل مع ابناء غزة ودعواتي لهم باحدى الحسنيين النصر او الشهادة انما انا شايف ان احنا اتجهنا بكل طاقاتنا و امكانياتنا ومشاعرنا نحو الشرق نحو غزة وتخلينا تماما عن اهتمامنا بمشكلاتنا بل ومآسينا الداخلية وكأننا اصبحنا بلدا خاليا من المشكلات وتفرغنا لحل مشكلات الغير
اعلم تماما وقبل ما يتهمني اي احد بأني غير منتمي و مش بني ادم اساسا....اعلم تماما ان المصاب جلل وان الضحايا كثر وان الكرامة العربية ضاعت (ولو انها ضايعة بأهلها)....وان من لم يهتم بأمر المسلمين فليس منهم
اعلم كل هذا...ومهتم والله....بس برضة ليا حق اهتم ببلدي شوية
اه انا احب غزة.....ولكني احب مصر اكثر منها
اه ان مهتم بغزة واهلها...ولكني اكثر اهتماما بمصر وناسها
لأن
اذا كانت غزة مهمة.....فأن مصر أهم....على الأقل بالنسبة لي

53 comments:

  1. انا معاك في كل كلامك فعلا موضوع غزه طول قوي وبقى بايخ وياريبت نخلي بالنا من بلا دنا بقى انا كمان زعلانه عليهم بس يعني الموضوع كبر وبالزات علينا قله الادب على مصر كترت بزياده تخنق

    تحياتي ليك ولكلامك الجميل ده

    ReplyDelete
  2. انا معاك جداااااا مصر اهم
    اهم من الكل
    لان ماحدش بيقدر ها و لا بيقدر اولادها و بيقدر ترابها
    انا معاك مصر اهم فى الرعاية و الفلوس
    انا معاك ان مصر اهم و اولى بالرعاية و الاهتمام
    انا معاك ان مصر اهم و حتفضل اهم
    رضيوا بقى الباقيين او لم يرضوا
    و حتفضل الاحسن
    الاحسن بولادها اللى قلبهم ابيض من اللبن الحليب
    احسن بناسها اللىبيقاسموا اللقمة مع اخواتهم العرب اللى بيجوا يستربعوا فيها زيها زيهم
    و بعدين بيتطاولوا عليها

    انا مع غزة و اهلها اللى مالهومش فى السياسة و لا الرياسة
    مع كل طفل اتقتل و مع كل ارملة
    و كل ام فقدت ابنها
    و مع ان اسرائيل لازم تبعد و تسيبلهم الارض

    بس برضه زيك مع مصر و الفقراء اللى فيها اللى مش لاقيين ياكلو
    و لا يتعالجوا
    ولا يتدفوا
    انا مع اطفالها اللى سايحين فى الشوارع و مش لاقيين حضن دافى يقومهم
    انا مع محاربة الفساد فى بلدي
    ومع كل واحد يفكر فى اصلاح البلد
    البوست بصراحة 10/10 و ياريت كلنا نتوحد و نحطة


    نحن مع غزة بس مع مصر الاول
    بحب غزة بس بنحب مصر اكتر
    بنحب العرب جميعا بس بنحب المصريين اكتر


    تحياتي ليك

    ReplyDelete
  3. انت قولت المفيد بصراحه
    واعتقد ان مش كتير هايفهم قصدك
    بس انا بلدي وامني الداخلي عندي اهم
    وخصوصا بقي لما الاقي في وسطه الهوجه دي بلدي بتتهان كمان علي اللي هي بتعمله
    يعني لا حمد ولا شكرانيه
    اه غزه في قلوبنا بس مصر كمان في قلبنا اكتر
    والبلد لو ماتنصفتش بايدين ولادها ماحدش هايفيدها
    ياريت الناس تفكر بعقلانيه شويه
    دي وصلت انهم عايزين مراقبين دولين علي ارضنا
    ياصلاه النبي
    ليه ان شاء الله
    وهو انا احرر بلد غيري اتدبس انا فيها........!!!!!

    مصر اكيد اهم
    وعلي فكره........ بلادي وإن جارت علي عزيزة .. وأهلي وإن ضنوا علي كرام

    ReplyDelete
  4. موضوع يحتاج التفكير .. ولكن يمكن الاهتمام بالاثنين معا .. ولا فائده من التركيز على احدها دون الاخر

    ReplyDelete
  5. اكيد
    مصر اهم مليون مرة
    والحمير اللي ماسكين يافطة عيب يا مصر
    عيب عليهم وعلى اللي خلفوهم
    ممكن تبقى متضايق من قرارات حكومتك
    وتكون اشد معارضيها لكن المهم يكونوا بيعرفوا يفرقوا بين الدولة وبين الحكومة

    يطلعوا مين دول ولا ايه دول
    عشان يقولوا عيب يامصر

    ReplyDelete
  6. اكيد معاك حق يا احمد ان مصر اهم وقضاياها كتيير
    بس زى مانت قلت
    قضاياها مزمنه ومستعصيه
    والى بيحصل فى غزة دلوقتى موقف وقضيه حاليه يعنى الوقفه معاها او الكلام عنها مش مزمن بس تبعا للموقف
    يعنى يارب تنتهى وساعتها هنرجع تانى لحياتنا وقضايانا والى هتفضل مزمنه ومستعصيه ومالهاش حل
    ويارب هيا كمان تنتهى بقى

    سلامى يا احمد

    ReplyDelete
  7. الله عليك
    يا ريت كان ينفع نسمع القر و نفهمهم انه بلدنا اولى بينا من باب جحا اولى بلحم توره

    ReplyDelete
  8. احمد اللى حصل فى غزة كان فى مصلحه مصر لانه كشف حاجات كتير اوى مكناش نعرفها
    بس ليه ملحوظه صغيره لااا اتنين
    يعنى انت عارف ان ده كله موجود من قبل كده كنا عملنا ايه ادينا بنكتب ونتكلم ونلعن الحكومه ليل ونهار وبنتحرك فى حدود امكانيتانا
    برضه اللى مع غزة هو ده اللى حصل لعنا واتكلمنا وبس

    حاجه كمان لما يموت واحد فى عباره او فى طريق قضاء وقدر مش زى ما واحد يتقتل تعمد وبوحشيه هنا الاختلاف
    لما يموت واحد من اسره مش زى ما الاسره باكملها تموت
    ده الفرق يا احمد

    ReplyDelete
  9. قالوا عن وزير الداخليه في حكومة حماس الذي استشهد في القصف انه كان قائد لسرية مكونه من 15 ألف مقاتل
    يا اخي فضلت ابحث عنهم طول الحرب ولم أجد
    ...
    خد بالك
    الكلام ده مش بيعجب الناس
    ستتعرض للهجوم الكاسح لأنك لو تكلمت بهذه الطريقه سيكون رد الفعل هو انك تقف مع اليهود ضد القضية الفلسطينيه
    واتعجب من اللي بيقولوا عيب يا مصر
    ولله شويه حمير
    الواحد هايقول ايه بس

    ReplyDelete
  10. احنا نحب مصر
    بس نحب غزة أكثر
    احنا نحب بلدنا لأن حب البلد جزء من حب الدين
    و بالتالى احنا بنحب ديننا أكثر
    و لذلك حبنا لغزة أكبر
    لأن غزة مش وطن ... فلسطين عقيدة دينية إسلامية

    أنا متفهم إهتمامك بمصر و ده اللى بنحكى عليه من زمان من قبل الحرب و يا ليتنا نرى من يتحرك

    عزيزى أحمد
    أننا كمسلمين لا نرى أن هناك فرق بين غزة و إسكندرية ، فكلاهما أرض إسلامية

    أن من أكبر الصدمات التى أذهلتنا كأفراد من جماعة الإخوان المسلمين " أننا لم نستطيع أن يصل للناس أن فلسطين عقيدة " خلال الفترة السابقة

    نشعر أننا كنا مقصرين أو كنا نعتقد أن هذا الفهم موجود بالفعل
    و عزمنا أننا من اليوم سيكون أهم محاور جهودنا هو أن يصل الناس إلى هذا الفهم

    هل تعتقد أنه لو كان بيننا اليوم رسول الله صلى الله عليه و سلم أو أبو بكر الصديق أو عمر بن الخطاب أو خالد بن الوليد أو المعتصم
    كانوا سيقولون أن هناك من مشاكلنا الداخلية ما هو أهم؟

    أدعو كل الناس إلى إجابة هذا السؤال بصدق مع النفس

    إنما فلسطين عقيدة إسلامية
    -----------------------
    عن إذنك يا أحمد سأنشر هذا التعقيب على المدونة عندى

    ReplyDelete
  11. انت بجد زعلتنى بس برضه الاختلاف فى الرأى لا يفسد للود قضية ... اللى يحب مصر يحب فلسطين يحب كل دولة مسلمة بدون تقديم أحدهما على الآخر لأن الرابط الأول لنا هو الدين الذى لا يحكمه جنس ولا وطن يعنى احنا بنتكلم على طول فى مشاكلنا ويوم ما تحصل مشكلة هناك مستخسرين نتكلم عنها

    ReplyDelete
  12. بلاش انانية ولو ان الطبع يغلب التطبع ليس منا من لا يهمة امر المسلمين

    ReplyDelete
  13. و اللهى عندى حق فى كل اللى قلته
    دة حتى برنامج الكرة ساب الكورة
    و بقى يتكلم عن العرب و اللى بيحصل فى غزة

    ReplyDelete
  14. أخى الفاضل
    الاهتمام العالمى بغزة وقضيتها لم ينسينا ابدا بلدنا ومشكلاتنا .. وانما هذا التعاطف وقتى بموجب الاحداث و ينتهى بمجرد انتهائها
    وتبقى مصر فى القلب والخاطر

    دمت فى حفظ الله
    سالى

    ReplyDelete
  15. شكلك عميل لمصر
    ........
    تحيا مصر
    عاشت غزه
    الموت للصهاينة

    ReplyDelete
  16. وبلاد الإسلام كلها أهم...

    ReplyDelete
  17. طبعا مصر اولا متفقة معاك جدا

    ReplyDelete
  18. السلام عليكم ورحمة الله وبركاته

    أولا : القضية ليست مجرد قضية إنسانية بمعنى أن هناك ضحايا وقتلى وأشلاء وإنما هي بالأساس قضية عقيدة ودين قبل أن تكون قضية أرض وحصار وحدود ، وقد افاض الكثيرون في الحديث حول هذه النقطة .

    ثانيا : ما تتحدث عنه يندرج مباشرة في إطار مسئولية النظام الحاكم وليس مسئولية الشعوب فأنت تتحدث عن طرق ورعاية صحية وفساد إداري المسئول الأول والأخير عنه هو النظام الحاكم من أول رئيس الجمهورية وحتى رئيس أصغر حي في أي مكان من مصر .

    ثالثا : هناك بالفعل الكثير من المهتمين والمشاركين بجدية في العمل الخيري داخل مصر ومن ذلك جمعية رسالة .

    رابعا : النظام الحاكم يمنع المتطوعين في كثير من الأحيان أن يمارسوا أي عمل خيري والأمثلة على ذلك كثيرة :
    - حاول ان تنشيء أي جمعية جديدة وتضع فيها إسم واحد فقط من الإخوان فهذا كافي لأن تتوقف الجمعية إلى الأبد ، والعيب ليس على الإخوان .
    - قوات الأمن المركزي التي كانت موجودة في كارثة الدويقة لم تكن تساعد في رفع الأنقاض وإنما كانت تساعد في منع المتطوعين من العمل بناء على تعليمات أمن الدولة .

    قبل أن نتحدث لابد أن نعرف إلى أين تتجه كلماتنا ومن المسئول حتى نحاسبه .
    جزاكم الله خيرا
    والسلام عليكم ورحمة الله وبركاته

    ReplyDelete
  19. أكيد مصر في المقام الأول والأخير مع كامل تعاطفنا ودعمنا بما نستطيع تقديمه لضحايا العدوان في غزة

    ReplyDelete
  20. بص يا احمد
    انا مقدر انك وطنى وبتحب مصر زينا كلنا بس انت نسيت زى اللى كانوا شايلين اليافطع وافتكرتم ان مصر هى مبارك ونظامه وطبعا ده مش صحيح يجماعه انا بحب مصر جداااااااااا بس مش اكتر من ديتى واسلامى ولائى الاول لدينى ولابن دينى وبعد كده لبدى وابن بلدى وفعلا زى ما شيماء قالت ان مشاكلنا دى والفساد اللى موجود عندنا موجود من زمان وهيفصل موجود لكن اللى كان بيحصل فى غزه ده شئ عارض وكان لازم ننسى قضاينا ولو لفتره بسيطه ونكرس اعلامنا واهتمامتنا لغزه لاننا مسلمين ولان الرسول قال علينا اننا مثلنا مثل الجسد الواحد اذا اشتكى منه عضو تداعى له سائر الجسد بالسهر والحمى يجماعه الناس لما بتعيب على ادارة نظامنا الحاكم فى الازمه مش بتعيب على مصر بشعبها وتاريخا وقيمتها دى بتعيب وتلوم على نظام وسياسه ولان لمصر الدور المحورى والاهم فى الدول العربيه ومش معنى كلامى انى كنت عايز مصر تخوض حرب عششان غزه ولو ان ده فرض على كل مسلم على وجه الارض تحرير اى شبر مغتصب من ارض الاسلام بس انا كنت عايز نساعدهم بجد نديهم سلاح نفتح المعبر ونعالج المصابين نبعت ليهم الاغذيه اللازمه مش نقعد فى كل وسائل الاعلام نتكلم عن الظابط المصرى اللى قتلته فلسطين يعنى شعب غزه كله هنعاقبه عشان ظابط مات ال يعنى احنا بنعاقب اسرائيل لما بيطلع حد من عندها يموت مصريين عالحدود وفى الحرب دى حصل كده فى مصريين عالحدود ماتو ا وفى اصابات من قصف اسرائيلى ....يجماعه والله انا بحب مصر جدا بس مصر مش نظام مستبد بيشوف الشعب عايز ايه ويعمل عكسه
    اسف على الاطاله

    ReplyDelete
  21. أخي الكريم :
    أعذرني فأقسم بالله العظيم انك مخطأ مع كل احترامي لك
    اخي الحبيب ليس من بلاد على هذه الأرض اهم من غزة وأرض فلسطين
    فإن نغر غزة نصر الأمة وغزة بداية الطريق
    اليوم غزة تنزف دماً ، وكل العالم في الخارج ينظر ويشاهد ما يحدث في غزة من مجازر ومذابح لا يمكن السكوت عنه

    اخي اعذرني اتفهم رأيك .؟
    لكن والله اطفال غزة لا يفهمون ما تقوله
    نساء غزة لا يفهمون ما تقوله
    الجريح على اسرة المستشفيات لا يفهمون ما تقوله
    اتعرف لا يشعر بالألم الا من ذاقه
    الوضع في غزة غريب ومؤلم وقاسي
    دعواتك لأهل غزة فوالله انهم يحتاجون دعائكم


    لا تنسوا اخوانكم في غزة من دعائكم

    ||..بحــر الدموع..||

    ReplyDelete
  22. السلام عليكم و رحمة الله و بركاته

    أول زيارة لمدونتك
    و اول بوست أقرؤه

    بجد البوست رائع جدا
    و معاك فى كل كلمة قولتها

    بس الموضوع مش حكاية مين مهم و مين أهم
    غزة عقيدة و مصر فطرة
    و محدش يقدر يمحى حبهم هما الاتنين من القلب

    لكن...
    النقطة هى
    ابنى نفسك الاول
    بمعنى
    الرسول صلى الله عليه و سلم قعد 13 سنة كاملة يبنى جيل صح
    و عقيدة صح
    و بعدين كون دولة صح
    بعد كدا انطلق إلى البلدان المجاورة

    صحيح غزة عقيدة
    بس ما ينفعش ابئا انا تعبان و مستهلك
    و اقول ربنا معايا
    لا
    ربنا قالنا خدوا بالاسباب
    لو فعلا الرسول صلى الله عليه و سلم بينا
    اعتقد-رأيى الشخصى- كان هيأنبنا كلنا على الحالة المزرية اللى احنا فيها
    على الانحلال و الفوضى اللى احنا فيها
    على الاعلام الساقط اللى مش بنقدر نغمض عنينا منه

    كان هيربينا الاول
    و بعد كدا ينطلق بينا لتحقيق دولة صح

    وهو دا اللى انا باقوله
    لازم نبص لنفسنا و نشوف هو احنا مين و فين أصلا
    عشان نعرف احنا ممكن نعمل ايه



    ان شاء الله مش هتكون الزيارة الاخيرة
    دمت بود

    ReplyDelete
  23. حاسوباتية:
    الف شكر على كلامك الجميل
    خاصة ان فعلا موضوع غزة دة وصل لمرحلة من الاهتمام المبالغ فيه بشكل كبير
    تحياتي واحتراماتي

    ReplyDelete
  24. واحدة مفروسة:
    اللي يعوزه البيت يحرم على الجامع
    مصر فعلا اولى بالرعاية والاهتمام والخدمات من اي مكان اخر
    احنا بلدنا تقريبا منهارة و تستحق كل الاهتمام ان شاء الله
    تحياتي

    ReplyDelete
  25. ازيك ياصاحبى اخبارك اية

    انا كنت غايب لظروف اكتر من 6 اشهر تقريبا والحمد الله على كل حال

    موضوعك مهم وانا معاك

    وياريت كان الاهتمام بغزة جاب نتيجة بالعكس ولاعمل حاجة مجرد كلام

    ربنا يصلح الحال

    تحياتى

    ReplyDelete
  26. السلام عليكم

    أنا قرات كل التعليقات وللأسف الشديد حتى على الحق الواضح اختلفنا

    الحق مش راى عشان نختلف عليه لكن الحق كلام الله الذي لا خلاف عليه أو المفروض ألا يكون عليه خلاف أو رأى

    لكن ما تدافع عنه فهم خاطىء لهذا الحق

    اقرأ معي هذا الآيه الكريمة من سورة التوبة:


    وإن أحد من المشركين استجارك فأجره حتى يسمع كلام الله ثم أبلغه مأمنه ذلك بأنهم قوم لا يعلمون

    صدق الله العظيم

    هذا كافر يعلمنا القرآن أن نجيره فما بالك بالمسلم العربي الجار الملاصق لك !!!!!

    لا تفاضل ابننا الكريم فهذا التفاضل بثه الاستعمار فينا من حدود وقوميات وعصبيات المفروض أن لا فرق بين غزة ومصر ولا بيننا وبين أى بلد مسلم وعربي
    فانما المؤمنون إخوة

    ولا يؤمن أحدكم حتى يحب لأخيه ما يحب لنفسه

    فلو وضعت نفسك مكانهم وأنت مغلق عليك من الأربع جهات وتستغيث بأخاك من هذا العدو البربرى وهذا الأخ يقول لك نفسى أهم ويشاهدك وأنت تحترق ويتركك حتى تلتهم النيران عظامك ليس عن عجز ولا قلة حيلة ولكن عن تواطؤ مع عدوك وعدوه

    أسال الله أن ينير بصيرتنا جميعا ويهدينا الى الحق

    ولا حول ولا قوة الا بالله

    ReplyDelete
  27. عندك حق

    فعلا غزة مهمة وفلسطين اهم

    بس مصر بلدنا اهم واهم

    شكرا جزيلا على البوست الجميل

    في حفظ الرحمن

    ReplyDelete
  28. عاشقة وغلبانة:
    فعلا زي ما تفضلتي وقلتي في ناس كتير مافهمتش كلامي وانتقدت البوست
    بس فعلا انا مقتنع بالكلام اللي كتبته
    لو الناس غضبت الغضب الشديد دة في مواجهة الفساد....ماكانش دة بقى حالنا
    تحياتي واحتراماتي

    ReplyDelete
  29. ahmed mubarak:
    لو الاهتمام والغضب الشعبي دة تم توجيهه لقضية زي قضية الفساد او السرقة او الاستبداد او العنف
    زي ما الناس غضبت لأحداث غزة
    كان زماننا حاجة تانية خالص
    تحياتي

    ReplyDelete
  30. انتا صح
    سيبك من كل التعليقات اللى فوق دى
    انتا بجد صح
    مصر اهم
    احافظ على بلدى واشوف غيرى بعدين
    هو اة لازم نجاهد
    عشان احنا مسلمين
    بس الحرب مش سهلة

    ReplyDelete
  31. Bluestone:
    العيب مش عليهم ولا على مصر
    العيب على حكومة مصر
    تحياااااتي

    ReplyDelete
  32. Shaymaa:
    نفسي يا شيماء الاقي مظاهرة واحدة بنفس حماس وقوة مظاهرات غزة تندد بالفساد والاستبداد وسلب الحريات
    انما من الواضح ان دي رفاهية مش متاحة حاليا
    تحياتي

    ReplyDelete
  33. Ahmed Al-Sabagh:
    الله يخليك يابو حميد
    الف الف شكر لك
    تحياتي واحتراماتي

    ReplyDelete
  34. Che:
    انا افضل مبدأ اللي يعوزه البيت يحرم ع الجامع

    ReplyDelete
  35. Appy:
    طبعا يا آبي انا متفق معاكي ان غزة علمتنا كتير
    بس اهم حاجة اتعلمناها ان الشعوب لما بتغضب ممكن يطلع منها حاجات كتير
    اي نعم مظاهرات برضة ليس اكثر الا انها كانت مظاهرات ضخمة نسبيا ماشفناش ربعها كأحتجاج على اوضاعنا المأساوية
    على الرغم ان اوضاعنا الداخلية اولى بالأحتجاج والتنديد
    بس برضة عايز اقول لك ان اللي بيموت ضحية الفساد والمرض ماماتش قضاءا وقدرا دة مات بفعل فاعل والفاعل دة معروف ومعلوم
    وهو الفسااااااااااد
    تحياتي

    ReplyDelete
  36. لورنس العرب:
    طبعا زي ما توقعت تماما
    في ناس كتير ماعجبهاش الكلام دة
    بس الحمد لله لحد دلوقتي لسة لم يتهمني احد بالعمالة والخيانة
    بس فعلا لو تفاعلنا مع قضايا بلدنا بالشكل دة هتفرق معانا
    تحيااااتي

    ReplyDelete
  37. ahmed al khashab:
    طبعا انا لا استهين بغزة و لا اقلل من اهمية الغضب الشعبي من احداث غزة
    ولكن الا ترى معي ان ديننا يأمرنا ان نغير المنكر ولو حتى باللسان
    يعني ممكن جدا ويبقى شيء طبيعي لو ثرنا على الظلم و انتفضنا غضبا لما يحدث في بلدنا من اوضاع مقلوبة تماما كما ننتفض ثورة لأحداث غزة
    تحياتي

    ReplyDelete
  38. خادم الدعوة:
    وهل حب مصر يتعارض مع حب فلسطين؟؟
    لا ابدا
    مصر طبعا في العقل والقلب والروح بحكم اني مصري زي ما السعودي بالنسبة له السعودية هي الحياة ومركز الكون بالنسبة له والجزائري بالنسبة للجزائر وهكذا
    انما انا لا اقلل من قيمة اي وطن خاصة اذا كان يمر بمحنة
    بس برضة لا ينبغي ان نننسى اننا نحن الاخرون نمر بمحنة اسمها الفساااااااد
    وزي ما حضرتك تفضلت....الاختلاف في الرأي لا يفسد للود قضية
    تحياتي واحتراماتي

    ReplyDelete
  39. anonymous:
    فعلا
    سيادتك معاك حق.......بس دة اللي لا يهتم بأمر المسلمين
    واكيد انا مش واحد منهم بأذن الله
    تحياتي

    ReplyDelete
  40. Samurai 4 ever:
    الدنيا بقت غزة * غزة
    والمصيبة ان الموضوع تحول الى سب ومعايرة بين العرب وبعضهم البعض
    واسرائيل واقفين نازلين ضحك
    تحيااااتي

    ReplyDelete
  41. سالي:
    الف الف شكر على رأيك القيم دة
    فعلا والله صدقتي
    تحيااااتي

    ReplyDelete
  42. ياسر حسين:
    حد يطول يبقى عميل لمصــــــــــر
    يسمع من بقك ربنا
    تحياتي واحتراماتي

    ReplyDelete
  43. dr.ibrahim:
    اه....طبعا بلاد الاسلام
    بس بالنسبة لي مصر طبعا اهم
    بالنسبة لي

    ReplyDelete
  44. desert cat:
    تمام تمام
    الف شكر على الاتفاق....وان كان الاختلاف برضة لا يفسد للود قضية
    تحياااااااتي

    ReplyDelete
  45. ابو اسامة:
    اولا الف شكر على التعليق القيم دة...اللي بيعكس احترام كبير لوجهات النظر المختلفة
    ثانيا:
    انا لا انكر اهمية القضية على الاطلاق...وانما اردت ان اوضح ان القضية دخلت منعطفات اخرى من تبادل الاتهامات والسباب بين العرب وبعضهم لدرجة ان اصبحت القضية مستهلكة واصبح الكلام فيها نوع من العبث
    تحياتي واحتراماتي

    ReplyDelete
  46. micheal:
    بس ياريت الاخوة اللي واخدين موضوع غزة دة على اعصابهم....انهم يهتموا بشئون بلدهم المتردية اولا
    تحياتي

    ReplyDelete
  47. بحبك يا مصر:
    انااكثر واحد بيفرق ما بين مصر وبين نظام الحكم في مصر
    هناااااااااااااك فرق
    و فرق كبير جدااااااا
    تحيااااتي

    ReplyDelete
  48. بحر الدموع:
    ربنا يوفق غزة واهلها
    بس اختلاف الرأي لا يفسد للود قضية
    تحيااااااتي

    ReplyDelete
  49. soulO0O whisper:
    اولا دة شرف كبير ليا زيارتك لمدونتي المتواضعة
    ثانيا هي الفكرة مش فكرة مين مهم ومين اهم
    انما الفكرة ترتيب اولويات
    اكيد غزة مهمة...بل مهمة جدااااااا انما مصر في حاجة الى كل ذرة اهتمام
    تحيااااتي

    ReplyDelete
  50. TAMER NABIL:
    تامر باشا......العود احمد
    منورني دائما
    بالتوفيق ان شاء الله
    تحياااتي

    ReplyDelete
  51. متفق معاك
    مصر أولاً
    مشاكلنا أولاً

    ReplyDelete
  52. بسم الله ماشاء الله انتوا بتتفقوا وتختلفوا زى ماتكونوا قاعدين فى مجلس وبتشيلوا وبتحطوا او كلامكم دا هايحرك ساكن والله المشكله ان فى ناس بتكتب كلام يمكن بياخد من كل تعليق شويه دى مش اساءة ولكن تعليق على البوست والمعلقين اولا اللى بيتكلم ان مصر مهمه انا معاه بس دا ميعرفش ايه اللى بعد غزة وايه المقصود من الغزو على غزة المشكله يا جماعة احنا مابنبصش الا تحت رجلينا انما اليهود بيفكروا ف100سنه للامام واحنا بناقش موضوع فساد عمر مصر مافاقت منه ماهم الفاسدين مننا واللى هاييجوا فاسدين مننا بس انتم عدو مرحلة حسنى مبارك وابنه والله يدينا ويديكم طولق العمر لما نشوف اللى هاييجى بعدهم اولا دا لو هايكون كويس لازمه 100سنة علشان يقدر يعدل الللى باظ
    اما بالنسبة لفلسطين دى لازم الاهتمام بها لانها فالقضيه قضيه عرب بس احنا اللى ظاهرين بس بسبب افعال حكومتنا ادخلوا يا جماعة على مواقع الشات ولا الجيمز حتى وشوفوا ايه اللى بيتقال على مصر والمصريين ومحدش يقولى انهم مش فاهمين حتى لو مش فاهمين احنا كلنا مش فاهمين ايه هى احوالنا الا اللى الحكومة عايزة تعرفهولنا وبس زينا زى بقية العرب والله لا هانحرك ساكن ولا هانحرر غزة ولا نعدل حال مصر العهد دا خلص خلاص عهد سعد زغلول وجمال عبد الناصر فوقوا يا بنى ادمين انتم فى عهد حسنى مبارك ملك المملكة العربية المصرية

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails