Tuesday, 13 January 2009

تاج مشمشي


تاج لونه مشمشي طب عليا على سهوة و بدون اي سابق انذار
ولأن البنت المشمشية حلوة بس شقية طلبات سيادتها اوامر...فكان لابد من الأجابة على التاج دة في سرعة وبدون اي تلكؤ او لكاعة والا محدش يضمن ايه اللي ممكن يحصل فيه
نخش بقى على التاج في السريع

مبسوط من اسمك ولو مش بتحب اسمك كان نفسك يبقى اسمك ايه ولية؟
انا عن نفسي الحمد لله مبسوط من اسمي جدا
هو في احلى من كدة؟
الحمد لله والفضل لله ثم لخالتي اللي كانت السبب في تسميتي بأسم (احمد)..بناءا على رؤية لها في المنام ونظرا لأن الرؤية حق فلقد امتثل والدي ووالدتي تماما وعدلوا عن تسميتي بأسم (محمد) وقرروا ان اكون (احمد)...والحمد لله رب العالمين
وبمناسبة الرضا عن الاسم بتحضرني واقعة طريفة جدا
كان في واحد زميل في الكلية كان اسمه (عطوة)...وطبعا ماكانش راضي عن اسمه و الحقيقة انه كان ايجابيا وقرر تغييره رسميا عن طريق المحكمة....وقد كان
وتم تغيير اسمه
الى
خيـــــــــــــــــــــــــــــــــري
مش عارف ليه بصراحة؟؟؟
اهم حلم فى حياتك ؟
اني احس اني بني ادم في بلدي
احس اني رأيي مؤثر...احس اني اشارك في صناعة القرار وليس اداة في يد صانع القرار
اعيش في بلد يحترم القانون وسيادة القانون....يحترم حقوق الانسان....بلد بلا فساد ولا واسطة ولا محسوبية
بلد لا يعشق ولا يخاف من البدلة الكاكي ولا يركع امام النسر والدبورة
حلم حياتي اعيش في بلد يحاسب برلمانها حكومتها
بلد يخاف المسئول من الشعب وليس االعكس
تجوز البنت اللى بتحبها قبل الجوواز
ولاتجوز واحدة تانية مشيت مع غيرك ؟
اه طبعا ممكن اتجوز البنت اللي كنت بحبها قبل الجواز
ايه المشكلة يعني؟
على اساس بقى اني هاعمل (دكر)..واقوللك لااااااااا...ماينفعش الواحد يتجوز واحدة مشي معاها قبل كدة
لا..بصراحة انا مش من النوع دة
بس برضة مش من النوع اللي ممكن يتجوز واحدة مشيت مع غيره
اصل انا مش فري ي ي ي قوي كدة
بس من الاخر
انا مابحيش الناس اللي بتمشي مع بعض دوووول
انا طول عمري مبدأي في الحياة ان اللي يحب واحدة يتقدم لها على طووول
وغير كدة تبقى قلة ادب
لو نفسك تعمل مدونة تانية ممكن تكون بتكلم عن ايه؟
اعمل مدونة عن الكتب اللي بقرأها
اكتب عنها وعن انطباعاتي عن الكتاب او الرواية
انا الحمد لله بقرأ كتب كتير وفي مجالات متنوعة ومتعددة من السياسة للرياضة للرواية للأجتماع وبيبقى نفسي اعبر عن اعجابي بالكتاب او الرواية
ففكرت اني اعمل مدونة للكتاب فقط....بعد كل كتاب او رواية انتهي من قراءتها اعمل بوست عنه وعن انطباعاتي
بس تراجعت عن الفكرة....لضيق الوقت
للبنت ممكن تتخلى عن حاجات كتير من مغيرات الحياة عشان انسان والولد ممكن تغفر لبنت انها كانت بتحب واحد تانى فى الماضى وتتجوزها؟
اه طبعا ممكن اغفر
انا في رأيي في فرق كبير جدا بين ان واحدة تحب واحد وبين انها تمشي معاه
مفيش حد في الدنيا ماجربش الحب...وعلى رأي وردة
نكدب لو قلنا ما بنحبش
ممكن اغفر طبعا لواحدة انها تكون احبت شاب قبلي انما اللي مش ممكن اغفره على الاطلاق انها تكون لسه بتحبه
مش بس لسه بتحبه
مش ممكن اغفر لها انه يكون بييجي على بالها اساسا
لو في ايدك تحكم مصر لمدة24ساعة ممكن تعمل ايه؟
احل البرلمان فورا....واقوم بتشكيل لجنة قانونية محايدة لتغيير الدستور تمامامش مجرد تعديله وتكليف اللجنة بوضع دستور دائم للبلاد يضمن قيام دولة ديمقراطية محترمة قائمة على الفصل بين السلطات مع التشديد على ضرورة استقلال القضاء و الاعلام وحرية تكوين الاحزاب واصدار الصحف
ولن انسى ان اصدر اوامري فورا بالقبض على الشلة اياها ومحاكمتها محاكمة عادلة نزيهة...بس نزيهة بجد
انتا شايف ان محمد حسنى مبارك عامل ازاى؟
شايفه بيحب مصر.....بس بطريقنه
هو شايف انه ادرى بمصلحة مصر من اي حد...وان الشعب المصري يجب الا يحكم الا بالشكل دة
وان الشعب المصري لا تصلح معه الديمقراطية لأنه شعب اغلبيته جاهلة وغير مهتمة بموضوع الديمقراطية دي اصلا
وان مصلحة مصر وشعبها الا يجرها لأي حرب لأن عهد الحروب قد انتهى
وهو بيشوف ان بموالاته لأمريكا هو بيجنب الشعب المصري البهدلة
هو بيشوف ان الاخوان المسلمين خطر على مصر اكثر من اسرائيل وان على جثته ان تحكم الجماعة دي مصر في يوم من الايام
انا اعتقد ان هو بيفكر بالمنطق دة
على فكرة انا لا اشك انه بيحب مصر...بس بطريقته بصرف النظر هي صح او غلط
وهو وحش للدرجادى ولا الراجل بردو بيعمل اللى عليه وان بلدنا احسن من غيرها؟
مفيش حد وحش على طول او حلو على طووول
اي حد في الدنيا دي له ايجابياته وله برضة سلبياته
له مميزاته وله كمان عيوبه
بس البقاء في الحكم لمدة 28 سنة قابلة للزيادة كفيلة بأن تجعل اي ايجابيات هي سلبيات وسلبيات فادحة
اما بلدنا احسن من غيرها فهي اكيد احسن من غيرها
بس في بلاد كتير قوي احسن منها
مصر ممكن جدا تكون احسن من كدة وبكتيــــــــــــــــــــــــــــــــر كمان
الفساد والبيروقراطية وحكم العسكر ضيعوا مننا سنين كتير قوي علشان نبقى على الأقل زي ماليزيا او كوريا الجنوبية
ايه اكتر حاجة تخليك مبسوط فى االدنيا ؟
اني اكون السبب في اسعاد الناس اللي حواليا
ودي مش مثالية والله ولا حاجة
بس هي دي الحقيقة
ساعة ما ادخل الفرحة على قلب اي حد سواء والدي او والدتي او اصدقائي او زملائي او اي حد غلبان في الشارع بتبقى فعلا لحظة ممتعة
يه اللى ممكن ينكد عليك حياتك فى لحظة؟
اي لحظة احس فيها بالظلم
سواء الظلم لنفسي او للي حواليا
فكرة الظلم واستغلال النفوذ والسلطة واستعراض القوة بتصيبني بنكد شديد جدا
بتصيبني حالة رهيبة من القرف
بس اللي بينكد عليا بجد هو ان الأهلي يتغلب.....والحمد لله مابيحصلش دة الا نادرا
ايه رايك فى البت مشمسية حلوة حلوة بس شقيه؟
حلــــــــــــــــــــــــــــــــــــــوة.......وشقية
بجد اضافة جميلة وقوية للتدوين والمدونات
وعاملة جو وحالة شقاوة وعفرتة في النت
ومخلية الشاشة عندي بتتلون باللون المشمشي كل ما بتكتب تعليق عندي في المدونة
ربنا يوفقها
*************************
تم بحمد الله و توفيقه ولا اراكم الله تاجا مشمشيا زي دة

24 comments:

  1. تاج روووعه واجابات جميله جدا جدا يا احمد .
    واجمل ما فيها انها مكتوبه بطريقه تلقائيه جدا .
    اجمل تحيه لك ونشكر الجميله المشمشيه على التاج ده علشان نقرا الاجابات دى .
    وبعتذر انى ما علقت من زمان .
    مع انى قريت البوستات الآخيرة .ولكن لم أعلق للأسف .
    تحيتى لك واحترامى يا اخى :)

    ReplyDelete
  2. ههههههههههههههههه
    ايوة كدة
    فكرتك نسيت التاج
    كنت هعملك عمل واحطهولك فى المدونة
    بجد عجبتنى اجاباتك اوى انك تتجوز البنت الى بتحبها وانك مش زى كتير من الشباب
    ربنا يهديك يا احمد بس ايه حكايه خيرى دة
    غريبه اوى
    هههههههههههههه
    انا اعرف انك خاطب صح
    سلملى على خطيبتك
    وهيا اكيد بتقرا االتعليق
    وشكرا على الكلام الحلو اللى كتبتو ده عنى
    بس هما دول بس
    كنت مفروض تكتب فيا قصيدة مدح وشكر
    يلا بقه مش اشكال
    هعودها مرة تانيه
    ادين اسبرنتين وحقنة ببلاش

    ReplyDelete
  3. الظلم بينكد عليك حياتك
    وبتحب اسمك

    زيى بالضبط
    اجاباتك جميله يا بلديات
    واعمل مدونة الكتب دى

    ReplyDelete
  4. جميله التاج ده زي صاحبته مشمشيه وجميله ردودك عليه

    ReplyDelete
  5. شكرا يا جماعه ع الكلام الحلو ده
    انا عارفه انى حلوة وطعمة وسكرة ومفيش زى اتنين
    هاهاهاهاها
    مش عارفه يا احمند بخصوص مدونة الكتب دى
    مش عارفه
    دلوقتى مش زمن الكتب
    مش عارفه ممكن ناس كتير متتفاعلش معاها
    الناس زهقت من االقراية مش عارفه ده راى

    ReplyDelete
  6. رائع كالعادة يا أحمد
    وحلوة حكاية الكتب دى وممكن نتشارك فيها على فكرة مع بعض ونعمل مدونة جماعية ونشوف مين من الناس يحب يكون معانا وكل ما حد فينا يقرا كتاب يتكلم عنه وبعدين فرصة معرض الكتاب قرب
    هاه أيه رأيك
    قول موافق
    ههههههههههههههههههههههه

    تحياتى

    ReplyDelete
  7. حلو يا أحمد بإستثناء أني مختلف مع وجهة نظرك في جزئية حسحس وجزئية اللي بيمشوا مع بعض لان أحيانا مبتبقاش تهريج
    ع العموم يا عم أنا مالي اصلا..أنا مقضيها سولو للأبد ومش ناوي أتجوز خالص سواء كانت أصيع بنت في العالم أو أكثرهن خلقا
    يا رب كده الأهلي يفضل في العالي ولو أنب شايف أن ماتش الزمالك بيقف علينا بخسارة لاننا بتخدع في أهمية تدعيم الصفوف
    ما علييينا مش عاوز أفتح في الكورة
    تحياتي يا نجم

    ReplyDelete
  8. ربنا يكرمك يا احمد
    انت انسان جميل قوي

    ReplyDelete
  9. اتفق معاك جدا جدا في موضوع حسني مبارك ده

    ReplyDelete
  10. شارك معنا في حوارنا
    غزة في قلب مدون
    مع المهندس : الحسيني لزومي
    الحوار موجود علي الرابطة شارك معنا في الحوار
    كن إيجابيا وحاول المشاركة في إنشاء بلوجر فعال
    حوارنا مستمر مع المهندس
    متي دخلت سجل تعليقك بسؤالك أو إستفسارك بالنسبة للمهندس
    مع تحيات
    رابطة هويتي إسلامية

    ReplyDelete
  11. السيد الأستاذ/ أحمد سمير
    صاحب مدونة / الاغلبية الصامتة
    اعتذر عن الخروج من موضوع التدوينة لقد أرسلت لك الجزء الثاني من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
    تحياتي وتقديري
    شيماء إسماعيل
    باحث ماجستير- كلية الآداب جامعة القاهرة.

    ReplyDelete
  12. ضي القمر:
    الف شكر على الكلام الكبير دة قوي
    التاج فعلا جميل بس الفضل لصاحبة التاج مش ليا
    الفضل للبنت المشمشية
    تحياتي واحتراماتي

    ReplyDelete
  13. البنت المشمشية:
    انسى ايه بس؟
    ودة كلام برضة؟
    لا ممكن ابدا
    انا برضة مندهش من حكاية خيري دي
    بس حقيقية والله
    انا يا فندم مش خاطب ولا حاجة.....انا متزوج يا فندم من شهر 7 اللي فات
    عقبالك كدة ان شاء الله
    نحن السابقون وانتم اللاحقون
    وبعدين الكلام الحلو دة الشوية دول علشان الحسد مش اكتر انما انتي اكيد تستحقي اكتر من كدة بكتييييير
    تحياتي واحتراماتي

    ReplyDelete
  14. mahasen saber:
    لعن الله ضيق الوقت يا محاسن
    هو دة اللي مانعني من موضوع مدونة الكتب دي
    بس ممكن تطق في نافوخي واعملها
    ربنا يسهل
    تحياتي

    ReplyDelete
  15. هههههههه
    ايه ده بجد مجوز والله فكراك لسه خاطب
    عقبااااااااااااالى يارب
    امتا بقه
    وسلملى عليها

    ReplyDelete
  16. حاسوباتية:
    الف شكر يا فندم على شبورة الجمال اللي ضربت مرة واحدة دي
    تحياتي واحتراماتي

    ReplyDelete
  17. البنت المشمشية حلوة بس شقية:
    الكتــــــــــــب
    يا سلام ع الكتب
    هو في الدنيا امتع واجمل من الكتب
    جربي انتي بس تقرأي كتاب ممتع او رواية شيقة هتسرحي معاها مهتنسي الدنيا
    الكتب دي بانجو يا بنتي
    تحياااااتي

    ReplyDelete
  18. bosbos:
    والله يا بس بس الفكرة كويسة جداااا
    انا موافق تماما
    ممكن جدا نبدأ فيها ونعملها وكل واحد يضيف كتاب قرأه ويتكلم عنه
    انا موااااااااافق
    ممكن تبعتي لي اي ميل بالتفاصيل واقتراحك بشأن المدونة واسمها وكدة
    على بركة الله
    تحيااااتي

    ReplyDelete
  19. micheal:
    بخصوص حسحس...ومالو يا معلم الاختلاف في الرأي لا يفسد للود قضية
    بس انا متأكد ان الراجل دة بيحب مصر فعلا...بس هو البقاء في السلطة ربنا يجازي بطانة السوء اللي هم السبب
    اما بخصوص السولو....انا اؤيدك تماااااااما
    العزوبية نعمة لا يشعر بها الا المتزوجين
    اما بالنسبة للأهلي.....اعز عليا من اهلي
    تحياتي واحتراماتي

    ReplyDelete
  20. mostafa rayan:
    الله يكرمك يا درش
    دة من ذوقك يا باشا
    تحياتي واحتراماتي

    ReplyDelete
  21. عاشقة وغلبانة:
    دة شرف كبير ليا يا فندم
    تحيااااااتي

    ReplyDelete
  22. رابطة هويتي اسلامية:
    بالتوفيق ان شاء الله

    ReplyDelete
  23. Shaimaa Ismail:
    وصل يا فندم
    بالتوفيق ان شاء الله

    ReplyDelete
  24. البنت المشمشيبة حلوة بس شقية:
    مستعجلة على ايه؟
    نصيبك هيصيــــــــــــــــبك....وساعتها لن ينفع الندم
    هههههههه
    وعموما الله يسلمك

    ReplyDelete

نرحب بالرأي و الرأي الأخر

fb comments

wibiya widget

LinkWithin

Related Posts with Thumbnails