Thursday, 25 December 2008

يحدث في 2009




يوم 31 ديسمبر من كل سنة بيمثل لي مناسبتين مش مناسبة واحدة زي كل البشر
كل الناس بيحتفلوا بليلة رأس السنة سواء بالأحتفالات الصاخبة او الأحتفال النفسي او المعنوي بنهاية سنة بحلوها ومرها وبداية سنة اخرى جديدة مع دعوات بأن تكون كل احداثها هي (حلوها) ومفيش (مرها) خالص
دي المناسبة الأولى العامة
اما المناسبة الثانية اللي بأحتفل بها في 31 ديسمبر من كل عام بقالي سنتين هو عيد ميلاد مدونتي العزيزة
الأغلبية الصامتة
و (الأغلبية الصامتة) في 31 ديسمبر 2008 تمت سنتين

يعني دلوقتي بقت طفل يتحرك ويتكلم
ومش هبالغ اذا قلت اني فعلا اعتبر مدونتي كائنا حيا ينبض وبالتالي يستحق الرعاية والأهتمام والتغذية
مدونتي العزيزة
كل سنة وانتي طيبة
نرجع بقى لموضوع 31 ديسمبر ونهاية سنة كاملة فيها كل المشاعر....حزن....فرح....مرض....صحة....عمل...تعب....راحة.....استرخاء...احباط....امل....يأس....تفاؤل........الخ
سنة كاملة.....12 شهر بالتمام....366 يوم.....8784 ساعة
في مساء 31 ديسمبر من كل عام بتنتابني مشاعر في غاية التناقض والتداخل..حاجات كلها عكس بعضها
فرحة بنهاية سنة وبداية جديدة...خوف من مجهول قد ينتظرني في السنة الجديدة....حزن على ايام وذكريات حلوة كان تاريخها في السنة اللي فاتت.....امل وتفاؤل بسنة جديدة بأحداث جديدة بفرص جديدة في الحياة.......ندم على ايام عدت وولت هباءااا في السنة القديمة.....تضارب ما بين (بكرة احلى من النهاردة) وبين(لو علمتم الغيب لأخترتم الواقع),,مشاعر وافكار غاية في التناقض
والنهاردة وسنة 2008 بتودعنا بحلوها ومرها....واحنا منتظرين 2009 بمجهولها وغموضها
فكرت اكتب بوست نهاية العام ازاااااااااي؟
السنة اللي فاتت في 31 ديسمبر كتبت بوست كان شبه محبط وكان بيدور عن موضوع ان 2007 لم تختلف عن اللي قبلها وكنت أامل ان 2008 تكون مختلفة
بس الحقيقة ان 2008 لم تختلف كثيرا عن 2007
وبالتاكيد نفسيا ماقدرتش اكتب نفس البوست وكان لابد من افتكاسة جديدة
واخيرا قررت ان اتقمص شخصية (الألوسي) العالم الفلكي الشهير واحاول انجم ما قد يحدث في 2009


يتسلم باراك اوباما رئاسة امريكا من جورج بوش ونكتشف نحن معشر العرب والمسلمين اننا اخدنا اكبر صابونة في حياتنا...وان احمد زي الحاج احمد وبرضة مش هنفهم ساعتها ولا هنستوعب ان لا يحك جلدك مثل ظفرك....فتولى انت شئون امرك
********
تستمر اسرائيل في سحل الفلسطينيين مستغلة حالة الصراع الداخلي الفلسطيني وتواطىء الحكومات العربية مع غضب وغليان في النفوس العربية ولكنه سيستمر كالعادة داخل النفوس ليس الا مع الأكتفاء بالشجب والتنديد والادانة
********
تستمر في 2009 النار تحت الرماد في لبنان مع تطبيق الحكمة العربية بتاعت (اللي في القلب في القلب) مع فرص مواتية تماما لمناوشات بين مختف الاطراف اللبنانية لأتفه الأسباب
********
في 2009 لا جديد يحدث في العراق....تبقى الحرب الأهلية كما هي عليه....يبقى الأحتلال الأمريكي للعراق (هو دخول الحمام زي خروجه ولا ايه)...وتستمر العمليات التفجيرية بين العراقيين وانفسهم على اعتبار ان ده نوع من انواع الجهاد
********
يستمر السعوديون في جلد وسحل واهانة المصريين العاملين في بلادهم مع تفضيلهم لقضاء اجازاتهم في مصر العروبة حيث الماء والخضرة والوسكي و والراقصات الحسناوات (وشارع جامعة الدول العربية....وشارع الهرم....والذي منه) مع تأكيدات رسمية مصرية على عمق العلاقات الأخوية بين الأشقاء
********
في 2009 قد تحدث بعض الخلافات بين مصر وليبيا على خلفية اساءة معاملة العمالة المصرية بليبيا مما يؤدي الى ان الأخ العقيد (ياخد على خاطره) ويقرر اغلاق الحدود وفرض رسوم عبور على المصريين الراغبين في التوجه لليبيا
مما يضطر الأدارة المصرية الى ارسال احد اهم كبار المسؤلين ل (تطييب خاطر) الأخ العقيد...فيتسامح ويصفح عنا
********
في 2009 تستمر البذاءات و المهاترات ضد الأسلام والرسول عليه الصلاة والسلام مما يشعل حملة تنديد واسعة النطاق في العالم الأسلامي سرعان ما تتحول لحملات لمقاطعة المنتجات الأوروبية سرعات ما تهدأ تدريجيا حتى تصل لمرحلة النسيان وعفا الله عما سلف
********
في 2009 تستمر زيارات السيد الرئيس والسادة المسئولين والبرلمانيين المصريين الى دول العالم شرقا وغربا وشمالا وجنوبا من اجل بحث العلاقات الثنائية بين مصر وجميع دول العالم ومن اجل تعزيز فرص الاستثمار والتبادل التجاري مع البلاد دي
وبرضة لا العلاقات الثنائية ستزدهر ولا فرص الاستثمار ستتعزز......ممكن جدا يحصل الكلام دة في 2010
********
اللي فات دة كانت بعض التنبؤات العالمية والعربية.....اما محليا فدي بعض التنبؤات و ربنا يستر
يستمر الدكتور فتحي سرور رئيسا لمجلس الشعب للموسم العشرين على التوازي....اطال الله في عمره المديد مع احتفاظه بموقعه كرئيسا في للبرلمان العربي والافريقي والافرواسيوي والشرق اوسطي........الخ
----------
في 2009 ربما تتغير الوزارة وربما لا تتغير انما من المؤكد ان السياسات السياسية والأقتصادية والأمنية ستظل ثابتة بأختلاف الأشخاص وربما لو تغير الشخصيات ان نتذكر المثل الشعبي (الواحد ما بيعرفش قيمة امه....الا لما يشوف مرات ابوه)....عادة مصرية
---------
في 2009 سيستمر تساقط الضحايا في جميع بؤر الصراع وميادين الحرب في مصر في طوابير العيش و طوابير التأمينات والمعاشات والأكمنة المرورية والعدد واماكن الحرب مرشحين للزيادة
---------
في 2009 سيتم انتاج عدد ضخم من الأفلام السينمائية اغلبها سيفشل فشلا ذريعا ولن ينجح الا عدد محدود جدا من الأفلام السينمائية وغالبا ما سيعجب الجمهور لن يعجب به النقاد
---------
في 2009 الأهلي سيفوز بالدوري ويمكن الكأس بس مش اكيد ولن يفوز بكأس افريقيا اما الزمالك فسيخرج من الموسم خالي الوفاض مع تأكيدات بفتح صفحة جديدة مع جمهورهم من اجل العودة لعصر البطولات
---------
في 2009 تزيد الأسعار في مصر وتنخفض في بقية انحاء العالم على اساس ان مصر ام الدنيا
---------
في 2009 ستخرج كذا فتوى عجيبة من نوعية (بول الرسول والتدخين الذي لا يبطل الصوم) هينشغل الناس بيهم بتاع 3 او 4 شهور عن بلاوي حياتهم ومآسيها
---------
في 2009 هنقول نفس الكلام بعد موسم الحج عن نصب بعض شركات السياحة واهمال مسئولي بعثة الحج وافتراش الحجاج لأراضي المزدلفة ومنى مع وعد بتلافي الأخطاء العام القادم
--------
في 2009 يستمر ازدحام الشوارع وفوضى المرور ومافيا الميكروباص مع كام حادثة مرورية مروعة تخرج بعدها تصريحات حكومية عن تعويضات لأهالي الضحايا ويتم الأعلان عن خطط طموحة لتطوير الطرق السريعة لتلافي وقوع حوادث اخرى مستقبلا مع تكرار تلك التصريحات مرارا مع حوادث جديدة
--------
في 2009 يستمر اطلاق قنوات فضائية غنائية جديدة وسط تنافس شرس بين هيفاء وماريا وقمر ومن يستجد للفوز بنصيب الأسد من اعجاب الجمهور وانبهارهم ومش عارفين التنافس دة ممكن يوصل لحد ايه؟
---------
في 2009 يخطب السيد الرئيس خطابات تاريخية وشاملة هامة في اول مايو والمولد النبوي وثورة يوليو و 6اكتوبر وافتتاح الدورة البرلمانية وعيد العلم وليلة القدر........الخ
خطابات تاريخية شاملة جامعة
----------
في 2009 يودع الأخوان المسلمون قبة البرلمان بأعتبارها اخر دورة برلمانية (انتخابات مجلس الشعب القادمة في 2010)...وابقوا يقابلوني لو شافوها تاني (الاشراف القضائي قاضي لكل صندوق) اصبح ماضي جميل
---------
في 2009 تخسر مصر في كأس القارات من البرازيل وايطاليا وبنتيجة كبيرة وتتعادل مع امريكا لكنها تصل لنهائيات كأس العالم جنوب افريقيا 2010
-----------
في 2009 يستمر سجن دكتور ايمن نور ونفي دكتور سعد الدين ابراهيم وهروب دكتورة نوال السعداوي واختفاء دكتورة هالة سرحان
-----------
في 2009 تستمر خطة تدمير احزاب المعارضة بتفجيرها من الداخل بنجاح ســـــــــــــــــــــاحق بداية من الوفد ومرورا بالغد حتى الناصري والتجمع....الخ
-----------
في 2009 يستمر نضال جميع طوائف الشعب في مطالباتها بكادر خاص تصحيح اوضاعها بداية بكادر الأطباء وكذلك الصيادلة مرورا بمطالبات المهندسين برفع الحراسة عن نقابتهم وانتهاءا بجميع طوائف الموظفين والعمال للمطالبة بمرتبات آدمية
ولكن لن تستجاب لكل هذه المطالبات قبل سنة 2090
-----------
في 2009 يستمر المفتش (كرومبو) في اطلاق فوازيره الصعبة جدا على المصريين مما يضع الشعب المصري في حيرة عظيمة طوال العام وتصبح قضايا المفتش كرومبو هي الشغل الشاغل للمصريين
-----------
في 2009 من المنتظر ان تكون امتحانات الثانوية العامة في منتهى الصعوبة مما قد يؤدي الى حدوث العديد من حالات الأغماء والأنهيار العصبي داخل لجان الأمتحانات قد تصل الى اللأنتحار
وتظهر في الأعلام عدة مصطلحات غريبة مثل (مأساة الفيزياء),(كارثة الأحياء) و (دموع الجيولوجيا)....الخ
----------
في 2009 تزداد حالات التحرش الجنسي بوسط البلد في عيدي الفطر والأضحى على الرغم من الأحتياطات الأمنية المكثفة الا انه يبدو ان الغريزة الجنسية في مصر اقوى كثيرا من الأحتياطات الأمنية
----------
في 2009 تشهد نهاية العام منافسة شرسة بين عدد كبير من المطربات على غناء اكثر الأغنيات اثارة في كلماتها
فأذا كانت 2008 قد انتهت بأغنية دوللي شاهين (لازم يقف) يبقى 2009 هتنتهي بأغنية ايه؟
------------
في 2009 يستمر تامر امين يؤدي دوره بنجاح ساحق في (البيت بيتك)..اما عبد الله كمال (فمفيش احسن من كدة في
روزاليوسف)....وعلى المتضرر اللجوء الى الله لأن القضاء لن ينصفه
----------
في 2009 يحتدم الصراع صيفا بين الأهلي و الزمالك على ضم اكبر عدد ممكن من اللاعبين وينشغل الناس خلال شهري يونيو و يوليو بأخر اخبار الصفقات الكروية وعدد الصفعات التي يصفعها كل نادي للأخر
------------
في 2009 ربما تزيد اسعار البنزين ولكن رد فعل الناس سيكون عنيفا كالعادة حيث سيكتفون بالصمت التااااااااااااااااام
وهو في اقوى من كدة رد فعل؟
-------------
في 2009 تستمر الحرب الطاحنة بين المدرسين والتلاميذ والتي اندلعت شرارتها الأولى في شتاء 2008 الا انها تشتعل وتبلغ ذروتها في العام القادم بعد سقوط عدد كبير من الضحايا بين مدرسين وتلاميذ على حد سواء
-----------
في 2009 يستمر بناء مصر بحماس منقطع النظير ويتم تسليم وحدات سكنية جديدة لحاجزي الفيلات والقصور في القطامية واكتوبر واب تاون بينما يضطر ابناء مصر الأخرى في الدويقة و شق التعبان ومجرى العيون للأنتظار عاما اخر قابل للزيادة لأستلام فيلاتهم
----------
في 2009 يتكرس ويتأصل الشعار الخالد (الشرطة في خدمة الشعب)...مع سقوط عدد كبير من ضحايا التعذيب وتهور بعض (لازم بعض دي) رجال الشرطة تجاه المواطنين بس نرجع ونقول ان (ضرب الحبيب زي اكل الزبيب)..هم برضة بيعذبونا علشان مصلحتنا
----------
هي ليست تنبؤات ولا تنجيم بقدر ما هي قراءة لأحوال مصر منذ سنوات ولم تتغير للأسف كل هذه الأحداث بل تتكرر سنويا وبالنص
وبالتالي فكل هذه التوقعات مرشحة للحدوث في 2009 و2010 وكل عام بنجاح ساحق طالما لا نسعى لتغيير واقعنا وازالة اسباب كل هذه الأحباطات
لن افرح اذا تحققت كل هذه النبؤات او التوقعات لأنها غالبا ستتحقق وانما سأفرح غاية الفرح اذا خيب الله ظني ولم يتحقق منها شيئا

Wednesday, 17 December 2008

كل شهر....جزرة جديدة




بادىء ذي بدء.....لو في مصطلح مش فاهمه او حاجة صعبة عليك ممكن تلاقي شرح لها في معاني الكلمات اخر البوست


لو انت بتشتغل مندوب دعاية طبية
يبقى الموضوع دة هيهمك
ولو انت بعيد عن المجال دة تماما...يبقى الموضوع دة برضة هيهمك لأنه اكيد بيتكرر في مهن اخرى كثيرة
اي مهنة مرتبطة بالمبيعات بتعاني مما يعانيه اهل الدعاية الطبية
لو انت قديم في الشغلانة دي يبقى هتحس قوي بالكلمات دي وهتحس انك سمعتها كتــــــيـــــــــــر قبل كدة
لو انت جديد في الكار دة يبقى دي فرصة انك تتعرف على بعض اصول الشغلانة والليلة دي ماشية ازاي
عدد كبير من المديرين (السوبرفايزرز)* بيحبوا يتعاملوا مع مندوبيهم بمنطق الجزرة
ومنطق الجزرة دي لمن لا يعرفه هو مصطلح يطلق على التحفيز المستمر
يعني يعلق لك الجزرة كحافز لك على العمل وكل ماتحاول توصل للجزرة دي تلاقيها بتبعد اكتر فتحاول توصل لها فتلاقيها بتبعد وهكذا
ولأنك في سباق وطحن مستمر....طوال السنة....فلابد من تصبيرة او تحفيزة او حتى تهديد علشان تعرف تواصل السباق بنجاح ساحق
ولأن ماينفعش رسالة التحفيز او التهديد تبقى ثابتة على مدار السنة والا ستصاب بالتبلد وعدم الاقتناع
اصبح لكل شهر من شهور السنة الأثنى عشر رسالته الخاصة به....او بمعنى اخر الجزرة الخاصة به
مجرد محاولة من العبد لله لنقل خبرات 7 سنوات دعاية انتقلت خلالها عبر 3 شركات ادوية في مصر وخارجها
وللعلم الكلام دة واحد في جميع شركات الأدوية المحلية منها والعالمية سواء في مصر او خارجها وكأنه كتاب محفوظ عن ظهر قلب
******************************
يناير: دة اول شهر في السنة يا رجالة......لو بدأنا بقوة يبقى السنة كلها هتبقى قوية وهنقفل السنة بقوة.....لازم يكون طموحنا كبير
احنا عارفين كويس قوي ان انتم تعبتم الكام شهر اللي فاتوا علشان نقفل السنة كويس
ولازم نجاحنا اللي حققناه السنة اللي فاتت يستمر وبنجاح اكبر السنة دي
فبراير: كلنا طبعا عارفين اهمية الكوارتر* الأول واللي بنبني على اساسه نجاحات السنة كلها
فبراير شهر في منتهى الأهمية.....لازم بقى نفوق بعد الراحة اللي ريحناها في يناير (دة على اساس ان احنا ريحنا في يناير)..لازم نشد شوية احنا في نص الكوارتر
مارس: التقفيلة* يا رجااااااالة.....الكام يوم اللي جايين دول هيتحدد على اساسهم السنة كلها
الكوارتر الأول مهم جدااااااااااااا
مفيش اجازات لحد نهاية شهر مارس...معلش نستحمل شوية
احنا ريحنا الشهرين اللي فاتوا ولازم نشد شوية علشان نلحق السنة
ابريل: الف شكر يا رجالة على المجهود اللي بذلتوه في الكوارتر الاول....بس الكوارتر الاول مش هو نهاية المطاف...ولو ماحافظناش على النجاح اللي حققناه في الكوارتر الاول يبقى اكننا ما عملناش حاجة
الكوارتر التاني في منتهى الاهمية لأن دي تقفيلة واذا قفلنا السيمستر* صح يبقى هنقفل السنة صح
لازم نشد من الأول علشان الوقت ما يسرقناش
مايو: شدوا حيلكم يا رجالة....هاااااااااانت...احنا في نص الكوارتر....ما تبوظوش الطبخة علشان شوية ملح
هنتعب الشهر دة ....نرتاح بقية السنة وتقفل السيمستر زي الفل
يونيو: السيمستر يا شبااااااااااب......عايزين نقبض السيمستر دة
الكام يوم اللي جايين دول هم اللي هيحددوا السنة دي وهم اللي هيريحونا بقية السنة
هنتعب الشهر دة.....هنرتاح بقية السنة ونعرف بقى نصيف براحتنا
مش عايز افكركم ان مفيش اجازات.....عايزين 12 زيارة في اليوم....ننسى بقى اجازة يوم الخميس....لو تعرفوا تشتغلوا يوم الجمعة يااااريت
لازم كلنا نبقى على مستوى المسئولية الكام يوم اللي فاضلين دول
يوليو: احنا عارفين يا رجالة ان احنا تعبنا قوي في السيمستر اللي فات...واكيد كلنا محتاجين ناخد اجازات ونسافر ونرتاح
بس معقول نضيع اللي احنا عملناه والمجهود المبذول دة علشان نصيف
كلنا هناخد اجازة بس لازم نعوض الاجازة دي بعد ما نرجع
يعني بدل ما بنعمل 8 زيارات نعمل 10.....واللي بيعملوا 10 زيارات يعملوا 12 زيارة
لازم نعوض الاجازات....لازم نلحق الكوارتر الثالث من بدري
لو الوقت سرقنا في الكوارتر دة...مش هنعرف نقفل السنة كويس
الكوارتر التالت هو عنق الزجاجة بجد
اغسطس: ايه يا رجالة؟ البيع فين؟
عارفين اه ان الدكاترة في اجازات بس الارقام ما بترحمش
لازم نلحق نفسنا .....الكوارتر هيضيع مننا....شدوا حيلكم
سبتمبر: لازم الكوارتر التالت يقفل كويس يا شباب
فاضل كام يوم.....عايزين نعوض يوليو واغسطس بعد الاجازات اللي اخدناها (على اساس ان احنا كنا مقضينها في يوليو واغسطس)....سبتمبر هو شهر البيع
لو ما بيعتوش في سبتمبر اومال هتبيعوا امتى؟؟؟
نركز شوية يا جماعة
مفيش اجازات لحد اخر سبتمبر....الخميس شغل.....مش مقبول اقل من 12 زيارة
اكتوبر: اخر كوارتر يا رجالة.....السنة خلصت
ماينفعش نضيع مجهود السنة كلها في اخر 3 شهور
نشد شوية.....نتعب الشهرين تلاتة اللي فاضلين علشان نقبض
عايزين وحوش في الفيلد......مش متصور اننا مانحققش بعد المجهود الكبير اللي بذلناه السنة دي
نوفمبر: الشتا دخل يا رجالة.....احنا في عز البيع.....عايزين طلبيات على قد ما نقدر....بيــــــــــــــــــــــــــــع.....بيــــــــــــــــــــــــــــــــع
مفيش اجازات.....الخميس شغل والجمعة كمان
فاضل 60 يوم والسنة تخلص......عايزين 60 يوم من نااااااااااااااااااااااار........ماينفعش ما نحققش
اللي محقق 100% ليه ما يحققش 120%......واللي فاضل له حاجة بسيطة لازم يتصرف....مفيش وقت
يا اما نحقق.....يا اما كل اللي عملناه دة مالوش اي قيمة
ديسمبر: السنة خلصت يا رجالة
مجهود السنة كلها متوقف على الكام يوم دول
يا نتعب شوية علشان نرتاح بعد كدة.....يا اما نضيع مجهود السنة كلها علشان شوية دلع
مطلوب من كل واحد 12 زيارة....الاجازات ممنوعة منعا باااااااااااااااتا
ماينفعش حد ينام في بيتهم.....اعتبروا نفسكم في حالة طوارىء
كلها كام يوم يا نحقق ونقبض يا مانحققش اي حاجة
نتعب شوية وهنلاقي وقت كتيـــــــــــــــــــــــــــــــــر نرتاح فيه بعد كدة
كله يضبط بيعه ويضبط كمان زياراته
بيــــــــــــــــــــــــــــــــــــع حتى الموووووت

وتنتهي السنة على خير او على شر.....علشان تبدأ سنة جديدة بيناير جديد بدورة جديدة بكلام قديـــــــــــــــــــــــــــــــــــم
وبتكتشف ان كل الشهور مهمة وكل الأيام شغل وكل الأجازات ملغية وكل شهر اهم من اللي قبله وكل يوم اهم من اللي فات
وان لا وقت للراحة ولا وقت للدموع
-*-*-*-*-*-*-*-*-
معاني الكلمات
مندوب دعاية طبية:
هو شخص خريج احدى الكليات الأتية
صيدلة-طب بشري-طب بيطري
و احيانا (مش في كل الشركات) علوم
وظيفته هي زيارة الأطباء في عياداتهم او المستشفيات او المستوصفات لعمل دعاية لمستحضر طبي او اكثر واقناع الأطباء بوصفه للمرضى
وهو شخص غالبا يرتدي بدلة كاملة او بنطلون وقميص وكرافتة او بنطلون وقميص بدون كرافتة ودائما يحمل في يده حقيبة
اكيد انت شفت منه كتير في الشارع او في العيادات لو كنت من مرتادي العيادات الطبية
ويكون هناك مستهدف للبيع من مستحضراته الطبية لابد من بيعه شهريا
واذا حقق المستهدف من البيع يحق له ان يقبض عمولة تختلف قيمتها تبعا لكل شركة من شركات الأدوية
ومندوب الدعاية مسئول عن عدد يومي من الزيارات للعيادات الطبية تتراوح مابين 8 الى 10 زيارات في اغلب الأحيان قد تقل عن ذلك تبعا لعوامل كتيرة
--------------------
سوبرفايزر=superviser=مدير يعني
هو بني ادم كان مندوب دعاية عادي بس لما اترقى الكرسي غيره
--------------
الكوارتر=3 شهور
وتنقسم السنة في الدعاية ل 4 كوارتر
يناير فبراير مارس=quarter1
ابريل مايو يونيو=quarter2
يوليو اغسطس سبتمبر=quarter3
اكتوبر نوفمبر ديسمبر=quarter4
و زي ما شوفنا كل كوارتر اهم من اللي قبله و الأربعة ما يتخيروش عن بعض
----------------
التقفيلة: هي اجمالي المبيعات التي تم بيعها بعد فترة زمنية معينة
ممكن تلاقي حاجة اسمها تقفيلة الشهر يعني اجمالي البيع بعد نهاية شهر معين
وفي حاجة اسمها تقفيلة السنة يعني اجمالي المبيعات اللي تم بيعها بعد سنة كاملة
وغالبا السنة بتقفل على صباعنا
----------------
السيمستر=6اشهر
وبالتالي تنقسم السنة ل 2 سيمستر
السيمستر الأول من يناير وحتى نهاية يونيو
السيمستر الثاني من يوليو وحتى ديسمبر
وبطبيعة الحال يحتوي كل سيمستر على 2 كوارتر
وطبقا للعرف السائد في بعض شركات الأدوية المحترمة يتم قبض نسبة من العمولة في نهاية السيمستر الأول في حالة تحقيق مندوب الدعاية للبيع المستهدف
------------------
الفيلد=الحقل
وطبعا مش المقصود هنا الحقل بمعنى الغيط انما المقصود هو المجال الطبي او الوسط من شركات ادوية وعيادات طبية وصيدليات....الخ
زي الوسط الفني كدة
------------------

Friday, 12 December 2008

مانديلا مصر

من صغري وانا معجب بالرجل دة
وكنت اقعد اتفرج على جلسات مجلس الشعب اللي بتيجي بعد نشرة 6 في القناة الأولى (كنت باتغاظ منها بصراحة علشان كتير كانت بتكون السبب ان مسلسل 7 وربع ما يتذاعش)..بس مش دة موضوعنا
واول ما تيجي الصورة على النائب الشاب دة كنت بأفرح قوي واسأل والدي
مين الراجل الصغير دة يا بابا؟
وفضلت معجب بالراجل دة ومتابعه ومع تطور الاعلام المصري وظهور محطات فضائية شبه مستقلة وصحف معارضة بدأت اتعرف على الراجل دة اكتر
طول عمري واخده نموذج يحتذى به....نائب شاب..معارض شرس....حضور طاغي...جاذبية....وسامة...شياكة
وبما انه في بلدنا المحروسة او المخروسة من الصعب ظهور شخص بالمواصفات دي بدون ان يحارب في الف جبهة وجبهة....كان نتيجة حتمية ان اعداءه يزدادوا يوم عن يوم
اصله خرج عن المألوف....خرج عن قواعد واصول اللعبة....في بلد يعتبر الوزير الخمسيني شابا...يبقى المعارض الثلاثيني مجرد طفل يلهو
بس لو المعارض الثلاثيني دة كان معارض بجد....مش ملتزم بالنص اللي محطوط له يبقى خطر وخطر جدا كمان
وعندما تقف اعزل امام امكانيات امنية رهيبة مسخرة بالكامل لخدمة النظام واركانه يبقى القضاء عليك اسهل من القضاء على ذبابة برشة بيروسول
لو الناس في بلدنا بتعرف تقرأكويس..كانت هتقرأ برنامجه اللي وضعه في انتخابات الرئاسة 2005 ولو كانوا قرأوا برنامجه يبقى كان لازم يكون رئيس مصر الحالي
انما الناس في بلدي لا تقرأ....الناس في بلدي بيحبوا اللي يعرفوه على اساس انه احسن من اللي متيعرفهوش
حتى لو اللي يعرفوه دة اذاقهم الويل والمرارة.....برضة احسن من اللي ما يعرفوهوش
منطق العجزة والكسالى
الناس في بلدي اتعودت على الجلد....بقى عندهم مرض التلذذ والاستمتاع بالتعذيب سواء تعذيب انفسهم او الاخرين
مش عارف ليه كل ما اجيب سيرة الرجل دة قدام حد يرد عليا:
دة مزور......دة عميل......دة معندوش خبرة سياسية
الغريب ان الحد دة اللي بيقول كدة بيكون معندوش اي خبرة او معلومة سياسية انما هو يردد كلام سمعه من غيره واكيد غيره دة مصدره جريدة حكومية من بتاعت تمام يا فندم
من اعجابي به واحساسي بالظلم الشديد الواقع عليه قررت اكرمه على الاقل في المكان الوحيد اللي امتلكه وهو مدونتي
حطيت صورته وفوق الصورة كتبت
مانديلا مصر
عدد كبير من الاصدقاء علقوا على الصورة
منهم من استنكر ومنهم من تساءل واكيد منهم من ايدني
اكتشفت ان عدد كبير من المدونين وغير المدونين معلوماتهم مغلوطة او ناقصة عن الراجل دة
اما مفيش معلومات خالص....واما معلومات مضللة كلنا طبعا عارفين مصدرها
وكان من الواجب ابراز لمحة مختصرة عن ايمن نور ليس كما اراه ولكن كما هو
ايمن عبد العزيز نور مواليد 10 اكتوبر 1964
يعني في 2005 موعد الانتخابات الرئاسية التي حل فيها ثانيا كان عمره 41 سنة
طبعا دة بالمنطق المصري عيل صغير.....رضيع سياسيا....وطبعا لأننا ماشيين في حياتنا بمبدأ(الدهن في العتاقي)....كانت النتيجة معروفة
تدرج في مراحل التعليم المختلفة حتى تخرج من كلية الحقوق جامعة المنصورة
انما طبعا احنا في مصر تبهرنا حاجتين:
البدلة العسكرية.....فلا نقبل ان يحكمنا الا العسكر على اساس ان مصر طوال عمرها مستهدفة وهتفضل كدة ليوم الدين
الجامعة الامريكية: اللي لو ماكنش المسئول متخرج منها...يسقط من نظرنا على طوووول
التعليم عندنا يعني الجامعة الامريكية ومؤخرا انضم اليها اخواتها الجامعة البريطانية والكندية والفرنسية والالمانية....الخ
المهم انه يكون تعليم اجنبي والسلام
عقدة الخواجة بقى
انما لو حد من جامعاتنا اللي كلنا متخرجين منها............لااااااااااااااااااااااااا ما ينفعش طبعا معندوش خبرة
عمل صحفيا بجريدة الوفد حتى اتجه للعمل الحزبي بنفس الحزب (حزب الوفد)..حتى اصبح نائبا لرئيس الحزب
يعني احنا قدام موهبة سياسية وصحفية فذة....صعد السلم من اوله ...لم يهبط علينا بالباراشوت
هل تعتقد ان شخص غير كفء وغير مؤهل وغير ناضج يمكن ان يتدرج السلم الوظيفي ليصبح نائبا لرئيس اكبر حزب معارض في مصر؟
سيبك من السياسة ومن ايمن نور ومن كل الكلام دة
بالله عليك
هل يمكن لأي شخص ان يصل الى منصب الرجل الثاني او الثالث او حتى الرابع في اي مكان او مؤسسة الا لو كان يمتلك الكفاءة الازمة لذلك؟
اعلم تماما ان الوصول للمناصب في مصر لا يتطلب المهارة والكفاءة فقط وانما يتطلب ايضا الكثير من الذكاء والدهاء والحكمة
وهو ما يتوافر في ايمن نور تماما (كما يظهر من تاريخه)......وهو ما يعلي من قدراته وشأنه وخبراته وليس العكس
اصبح عضوا بالبرلمان المصري عن دائرة من اكبر دوائر العاصمة (دائرة باب الشعرية)...ووقتها كان يبلغ من العمر 30 عاما تقريبا

بااااااااااااااااب الشعـــــــــــــــــــرية
واحد كان نائب الشعب عن دائرة باب الشعرية لدورتين متتاليتين متحديا كل اساليب التزوير اياها والبلطجة والتعنت الامني والغير امني...وللعلم دائرة باب الشعرية دي دائرة في منتهى الصعوبة لانها احياء شعبية وبالتالي فهي مليئة بالهموم والمشكلات المصرية المزمنة من عشوائية وبطالة......الخ
والمفارقة انه في الدورة الاولى هزم مرشح الحزب الوطني وفي المرة الثانية هزم ابنه
ومعلوماتي تقول ان شعبية ايمن نور طاغية في تلك الدائرة الهامة من دوائر القاهرة
واحد بالقدرات والملكات دي....شخص بالخبرات السياسية دي
بالله عليكم....كيف يقال عليه انه غير ناضج سياسيا او لا يمتلك الخبرات الازمة لممارسة السياسة او لكونه زعيما يؤتمن على مستقبل البلد دي؟
اسس حزب الغد المصري وتقدم عن حزبه بصفته رئيسه في الانتخابات الرئاسية عام 2005 وهي اول انتخابات تجرى بالأقتراع وحل ثانيا في النتائج النهائية للانتخابات
لا فعلا...........باين انه راجل ما بيفهمش في السياسة خااااااااالص!!!!!!!!!!!!!!!!!!!!!!!!!
غير مؤهل بتاتا!!!!!!!!!!!!!!!!!!!!!!!!!!!!
المفروض انه يكون احد الشخصيات الكاريكاتيرية اللي اتقدمت للانتخابات دي...علشان يكون بيفهم في السياسة او مؤهل تماما
وهو برضة غلطان
علشان كان يفضل رئيسا لحزبه ونائبا لدائرته كان لزاما عليه ان يلبس طربوشا ويقرأ الفنجان ويبايع رئيس الجمهورية منافسه في الانتخابات
اما انه راجل ما بيفهمش في السياسة فعلا

اتهم بتزوير توكيلات تأسيس حزب الغد له حيث تم حبسه . وينادي كثير من الناشطين السياسيين والحقوقيين بالإفراج عنه ، ويستعدون لإقامة هيئة للدفاع عنه . وقد حُكم عليه بالسجن لمدة 5 سنوات في محاكمات وصفها البعض بالسريعة والمثيرة للجدل ، وبذلك يكون فقد حقه في الترشح للأنتخابات الرئاسية التى تجرى في عام 2011 .

رجل حصل على 500 الف صوت انتخابي.....ونائبا بالبرلمان عن واحدة من اكبر دوائر القاهرة الانتخابية يعجز عن توفير توكيلات لتأسيس حزبه السياسي ويضطر لتزويرها
على الرغم انه يلزمه 50 توكيل تقريا لتأسيس الحزب...انما لأن التزوير مزاج اضطر لتزوير التوكيلات
بس لا تتعجب ولا تستغرب..............انت في مصر
وحيث ان مصر ام العجايب...............يبقى مفيش داعي للأستغراب والدهشة
وبعدكل التاريخ دة....بيطلع ناس معرفش مصادر معلوماتهم ايه يقولوا ايمن نور غير مؤهل لقيادة مصر
واحد بيمارس السياسة وهو مراهق..............لا يمتلك الخبرة الكافية
اتولد بيننا واتعلم في مدارسنا واتخرج من جامعاتنا واكل من اكلنا وشرب من المية اللي كلنا بنشرب منه ومع ذلك.............لا يمتلك الخبرة الكافية
صحفي ومحامي وسياسي ومعارض بارز ولامع ومع ذلك....................لا يمتلك الخبرة الكافية
نائب برلماني وهو عنده 30 سنة عن دائرة من اصعب واكبر دوائر القاهرة ومع ذلك..............لا يمتلك الخبرة الكافية
رئيس حزب سياسي ووصيف الانتخابات الرئاسية متحديا سطوة الحكومة والامن والاعلام ومع ذلك...............لا يمتلك الخبرة الكافية
مناضل وصامد وصابر على الظلم والسجن والقسوة والمرض ومع ذلك............لا يمتلك الخبرة الكافية
من وجهة نظركم يا اصحاب (لا يمتلك الخبرة )....من يمتلك الخبرة لتولي حكم البلد دي؟
شخص يرتدي بدلة كاكي....ولا شخص خريج الجامعة الامريكية....ولا شخص لديه الجينات الرئاسية الوراثية؟
من اذن بالله عليكم يستحق حكم مصر؟
السطور اللي فاتت دي كانت عن ايمن نور اللي انا اعرفه كمعارض بارز وزعيم سياسي واشهر سجين مصري واكثر بني ادم شنت عليه واسرته صحف الحكومة اعنف واشرس بل واقذر حملات التشنيع والسب والتطاول
رجاءا لمن ينتقد ايمن نور ان يذكر لي ايمن نور اللذي يعرفه هو اما ايمن نور الذي اعرفه فلقد كتبت عنه
ملحوظة
المعلومات الواردة في البوست من موقع ويكيبديا العربية
على الهامش:
لست عضوا في حزب الغد...ولا اسعى للأنضمام لأني غير مقتنع بالتجربة الحزبية في مصر ومع كامل احترامي لحزب الغد الا ان الجو والمناخ السياسي العام في مصر في غاية التلوث وبالتالي لقد اخترت ان اكون ضمن الاغلبية الصامتة
----------------
دور السيدة جميلة اسماعيل وموقفها البطولي المساند لزوجها يثبت صحة مقولة ان وراء كل رجل عظيم امرأة
----------------
لو يدري دراويش الحزب الوطني ومجاذيب الحكومة ان هجومهم العنيف الغير مبرر والذي يصل ل (قلة الأدب) في احيان كثيرة على المعارضين بجد زي ايمن نور وجماعة الاخوان المسلمين لا يؤدي الا الي زيادة رصيدهم وارتفاع اسهمهم لدى رجل الشارع ..لو يدروا لتوقفوا عن الهجوم فوراااا
----------------

Saturday, 6 December 2008

استاذ ياسر حسين........شكرا

طول عمري بحب الرسم
وطول عمري وانا مابعرفش ارسم
مش موهوب
رحم الله امرىء عرف قدر نفسه
بحب رسوم الكاريكاتير جدا....وبحب قوي البورتريهات
مواقف كتير كنت بأتمنى فيها اني اكون بعرف ارسم علشان اعبر عنها....بس العين بصيرة والموهبة قليلة
بلاقي ان في لحظات كتير قوي الرسم فيها بيبقى اصدق من الكلام...الرسم هو اللي لازم يقول كلمته
وكنت لما الاقي رسومات كاريكاتيرية او بورتريهات في الصحف والمجلات اقول
انا عايز من دة
انا عايز حد يرسمني انا كمان
اشمعنى انا يا جدعان؟؟؟؟
من حق كل واحد في الحياة انه يترسم
لما كنت بأنزل الحسين كنت بلاقي رسامين بيرسموا الناس كدة برضة بس عمري ما فكرت اني اخللي حد يرسمني منهم
لما بدأت تدوين..اتعرفت على مدونين كتير..مدوناتهم اكثر من رائعة...موضوعات شيقة جدا وجادة وجريئة
من اهم المدونات اللي بتابعها من اول رحلتي في عالم التدوين مدونة (كارتونيا) للفنان ياسر حسين
الفنان ياسر حسين فنان مصري بيعمل في الخليج
اهم ما يميز مدونته هو التعبير بالرسم
الرسم قاسم مشترك في كل اعمال مدونته الجميلة خاصة رسم الكاريكاتير
انا لا ازعم اني ضليع في الفنون والفرق بين الانواع المختلفة من طرق الرسم والتعبير
ولكن يكفي اني اقول ان رسومه بتعجبني
في كتير من الموضوعات في المدونة عبارة عن رسم فقط
طلبت من صديقي الفنان ياسر حسين انه يرسمني.....اه كنت بجح ومتطفل وغلس...بس هو احترم غلاستي وقدر بجاحتي
ورسمني بورتريه فكرته جميلة
جمع بين اكتر حاجات بحبها في الحياة
النادي الأهلي........الصيدلة.......و الكتابة كمدون
فكرة البورتريه كانت جميلة....وبصراحة كانت مفاجأة سارة خاصة انه استجاب لغلاستي وتطفلي بسرعة فائقة

استاذ ياسر


شــــــــــــــــــــــــــــــــــــكـــــــــــــــــــــــــــــــــــــــــــــــــرااااااااااااااا



Tuesday, 2 December 2008

قتل و اشياء اخرى

احدى الفتاتين هي ابنة المطربة المغربية ليلى غفران والاخرى صاحبة الشقة صديقتها والاثنيتين تدرسان في احدى الجامعات الخاصة ب 6 اكتوبر
اهتمامي بالحادثة دي مش بسبب الشغف والتشوق لمعرفة الجاني على طريقة المفتش كرومبو.....وان كان معرفة الجاني وفك اللغز مهم جدا لبشاعة الحادثة دي والرغبة في التعرف على ملابساتها
الا ان القضية دي بتفجر قضايا وبتفتح ملفات غاية في الخطورة
والحادثة دي للي مش متابع..هو انه تم العثور على جثتين لفتاتين في احدى الشقق الفاخرة بمدينة الشيخ زايد والجثتين لفتاتين الاولى اسمها نادين وهي صاحبة الشقة ووالدها محاسب يعمل بالسعودية وتم العثور على جثتها مذبوحة ومطعونة عدد كبير من الطعنات في انحاء مختلفة من جسدها
اما الضحية الثانية فهي هبة ابنة الفنانة المغربية ليلى غفران وهي صديقة الضحية الاولى ولم تلفظ انفاسها في الحال وانما اتصلت بخطيبها تليفونيا وهي في حالة سيئة واخبرته بأنه تم طعنها بشقة صديقتها وانتقل اليها في الحال لأسعافها الا انها لفظت انفاسها بعد دقائق من دخولها المستشفى للعلاج
اهمية القضية واهتمام الرأي العام بها لعدة اسباب
اولا لبشاعتها وغرابتها وغموضها
ثانيا: لارتباط احد اطرافها بشخصية فنية معروفة في مجتمع يعشق النميمة
القضية دي بتطرح قضايا في منتهى الخطورة وبتدعو للتأمل في عدة اشياء وسلوكيات جديرة بأن يتم التأمل فيها ودراستها
القضية الاولى:
علاقة بعض الاباء بأبنائهم
فما قيل عن علاقات الضحيتين بأسرتيهما ان صحت فهي مهزلة بكل المقاييس
فالضحية الاولى نادين والدها يعمل في السعودية هو وبقية افراد الاسرة اما البنت فتعيش بمفردها......لوحدها
فتاة عندها 23 سنة عايشة لوحدها في مصر وبقية اهلها والدها ووالدتها واختها في السعودية
في الزمن المهبب دة..بنت تعيش لوحدها وفي 6 اكتوبر...اما الوالد فهو ماكينة اموال لا تنضب..وظيفته في الحياة تحويل الاموال......تحول لمضخة بنزين...كل وظيفته في الحياة هو توفير اقصى درجات الرفاهية لبنته ولتذهب التربية والرعاية الى الجحيم
بعض الصحف قالت ان البنت دي مخطوبة والبعض قال انها على علاقة بشاب وبعض المواقع ذهبت لما هو ابعد على اعتبار انها متزوجة ومنذ زمن
كم تساوي سمعة ابنتك بالريالات يا سيدي الفاضل؟؟يا اب يا عظيم
هل عوضتها الشقة الفاخرة والسيارتان عن رعايتك؟
اما الضحية الثانية هبة ابنة الفنانة فهي زي كل افراد الوسط الفني ضحية تمزق اسري وانفصال بين والدها ووالدتها (والدتها تزوجت 4 مرات تقريبا).........
في البداية قالوا عنها انها مخطوبة....وبعد شوية اكتشفنا ان خطيبها مش خطيبها وانما زوجها....قالوا انها متزوجة بدون علم والدتها وبعد كدة قالوا ان والدتها كانت على علم ان ابنتها متزوجة
قالوا ان الشقة مسرح الجريمة لقوا بداخلها زجاجات خمور ولفافات حشيش...وبعد كدة قالوا مفيش الكلام دة...وكل دي اشاعات
الا ان الثابت من كل دة ان في خلل كبير في الابوة والامومة وان الجاني الاول والاصلي هم الاهل اللي انشغلوا اما بتأمين المستقبل على حساب الحاضر او بالنزوات الشخصية وتبديل الرجال الرجل وراء الاخر
القضية الثانية اللي بتثيرها الحادثة دي هي قضية الجامعات الخاصة في مصر
ليه طلبة الجامعات الخاصة عاملين كدة؟؟؟ليه دائما على اغلبهم علامات استفهام؟؟؟؟ليه الرفاهية المبالغ فيها واللي بتصل لحد الافساد اللي اغلبهم بيعانوا منها؟؟؟؟
ليه الدولة فصلت لطائفة معينة من الناس جامعات على مقاسهم لا تناسب عقلياتهم ولا قدراتهم الذهنية ولا مهاراتهم وانما تناسب حاجة واحدة بس
تناسب جيوب اهلهم...تناسب دخول مادية عالية جدا....تناسب شخصيات كل علاقتها بجامعات اولادهم هو شيك بيتم دفعه اول كل سنة وبعد كدة النجاح مضمووون طبعا...ماهو كله بفلوسهم
ايه هي المعايير اللي بيتم تحديد قبول طلبة الجامعات دي؟ وعلى اي اساس بينجحوا؟
القضية الثالثة اللي بتثيرها الحادثة دي هي قضية سلوك الناس اللي عايشين في الاحياء الراقية وازاي ان كما يقال ان الجيران سمعوا مشاجرة الساعة 5 صباحا من الشقة اللي وقعت فيها الحادثة ولكن بلا اي رد فعل وكأن شيئا لم يكن
دة حتى بدافع الفضول كان لازم يطمئنوا ويشوفوا ايه اللي بيحصل؟
الناس دي ليه فقدت الحميمية....ليه الناس دي عايشين مع بعض بعقلية الجزر المنعزلة...محدش له دعوة بالتاني....الناس دي تقريبا مايعرفوش بعض
انا مش بأقول ان الناس تبقى حشرية...بس على الاقل يخافوا على بعض..يخافوا حتى على نفسهم
زمان الناس كانت بتستأمن جيرانها على اولادها اكتر من اهلها
دلوقتي محدش يعرف حد.....ومحدش مسئول عن حد.....انا اعتقد ان لو اي واحد من الجران كان شاف جريمة القتل لم يكن ليتدخل
هايقول لنفسه...وانا مالي يا عم؟ هم كانوا من بقية قرايبي؟؟؟
من القضايا المهمة برضة اللي بتثيرها الحادثة دي هي قضية تعامل الصحافة مع الحادثة
ليه كل جريدة بتسرد وقائع واحداث مختلفة عن الأخرى على الرغم ان الحادثة واحدة والقتلى هم هم واكيد الجاني واحد في كل الاحوال
ليه جريدة تقول انها مخطوبة وجريدة تانية تقول انها متزوجة وليه موقع الكتروني يقول كان فيه خمور وموقع تاني بتكلم عن اخلاق الضحايا وحسن سيرهن وسلوكهن
ليه بعض الشهود او الاصدقاء بيصفوا الفتاتين بصفات فيها انحلال وبيتكلموا عن سهرات للصبح وحفلات واستضافة شباب وبنات في الشقة لاوقات متأخرة من الليل
بينما احدى السيدات بتصف الضحية نادين بأنها كانت مواظبة على الصلاة وانها كانت نفسها تكون داعية اسلامية!!!!!!!!!
يعني يا اما حفلات وسهرات وحشيش ومخدرات......يا اما داعية اسلامية
مفيش وسط؟؟؟؟؟؟
الازدواج والتناقض دة سببه ايه؟
هل هو الرغبة في السبق الصحقي والتوزيع والانفراد بصرف النظر عن الحقيقة؟
ولو البنات دي مظلومة....مين اللي ياخد لهن حقهن؟
وفين المصداقية وحق القارىء والكلام الكبير دة؟
انا لا ابرىء او ادين احد....خاصة ان الحادث غامض لحد دلوقتي على الاقل...وعلى الرغم ان الملابسات مش بريئة...والكلام كتير وكل يوم كلام جديد بيقال
انما من وسط كل الكلام دة بتبقى حقائق مؤكدة بصرف النظر عن القاتل والضحية والاشخاص
عندما يتحول الاب لماكينة صرف الية وتتفرغ الام لأرضاء رغباتها ونزواتها ويصبح المال هو الحل السحري لشراء اي شيء وبلا اي حساب
ساعتها توقع اي حاجة وكل حاجة سيئة...حتى لو كانت النهاية هي الذبح والفضيحة وتلويث السمعة

fb comments

wibiya widget

LinkWithin

Related Posts with Thumbnails